1. Saan kɛmɛkulu fɔlɔ la, a tun fɔra jamaba dɔ ye ko u ka mun lo kɛ?

CƐƐW ni musow jamaba tun nana Zeruzalɛmu. U tun bɔra jamana caaman na ani u ka kaanw tun tɛ kelen ye. Kabako koo dɔ kɛra o loon na. Yahutu dɔw sinna k’a daminɛ k’o mɔgɔw ka kaanw fɔ! O koo barila o mɔgɔw la kosɔbɛ. O Yahutuw tun be min fɔra o jamaba ye ani ciden Piyɛri ye min fɔ bɛɛ ye, o yɛrɛ lo ye mɔgɔw kabakoya ka tɛmɛ! O jamaba y’a mɛn ko u be se ka kisi n’u limaniyara Yezu Krista la. O kuma ye u dusukun sɔrɔ kosɔbɛ fɔɔ u ye ɲiningali kɛ ko: “An ka kan ka mun le kɛ sisan?” Piyɛri ye u jaabi ko: “Aw bɛɛ kelen kelen ka kan ka batize.”—Kɛw. 2:37, 38, Biblu Ala ta Kuma.

2. An bena mun lo lajɛ barokun nin na? (Jaa lajɛ ɲɛɛ fɔlɔ kan.)

² Koo min kɛra o kɔ, o tun ye kabako yɛrɛ lo ye! O loon na, mɔgɔ 3 000 ɲɔgɔn batizera ka kɛ Krista ka kalandenw ye. Yezu tun ye baaraba min kalifa a ka kalandenw ma ko u ka mɔgɔw kɛ ale ka kalandenw ye, o lo tun daminɛna ten. O baaraba bele be kɛra fɔɔ ka na se bi ma. Bi, an tɛ se ka mɔgɔ dɛmɛ a ka kɛ Krista ka kalanden ye lɛri damanin dɔrɔn kɔnɔ. Walisa kalanden ka batɛmu saratiw dafa, o be se ka kalo caaman wala saan kelen ta, walima ka tɛmɛ o kan yɛrɛ. N’i be bibulukalan kɛra ni mɔgɔ dɔ ye sisan, i b’a lɔn ko baaraba lo be kɛ walisa ka mɔgɔ dɛmɛ a ka kɛ Krista ka kalanden ye. Barokun nin na, an bena a lajɛ i be se ka min kɛ walisa k’i ka Bibulu kalanden dɛmɛ a ka batize.

3. Ka kɛɲɛ ni Matiyo 28:19, 20 ye, Bibulu kalanden ka ɲi ka mun lo kɛ walisa ka ɲɛtaga kɛ ani ka batize?

³ Kalanden be min kalanna Bibulu kɔnɔ, a ka ɲi k’o sira tagama fɔlɔ ka sɔrɔ ka batize (Matiyo 28:19, 20 kalan). A be min kalanna n’a b’o sira tagama, a be i n’a fɔ cɛɛ “hakilitigi” min kofɔra Yezu ka ntalen na. O cɛɛ ye dugukolo sogi ka dunya fɔɔ ka se fara ma walisa k’a ka boon juu sigi a kan (Mat. 7:24, 25; Luka 6:47, 48). Bibulu kalanden be min kalanna, an be se k’a dɛmɛ cogo di a k’o sira tagama? An ka cogo saba lajɛ.

4. An be se ka Bibulu kalanden dɛmɛ cogo di a ka to ka ɲɛtaga kɛ fɔɔ ka batize? (Koorilen nin fana lajɛ: “ I ka Bibulu kalanden dɛmɛ a ka laɲinitaw latigɛ ani k’u dafa.”)

⁴ I ka Bibulu kalanden dɛmɛ a ka laɲinitaw latigɛ. Mun na i ka ɲi k’o kɛ? Misali la, n’i be tagara voyazijan dɔ la, n’a sɔrɔ i bena a latigɛ ka lɔ walisa ka yɔrɔ cɛɲumanin dɔw lajɛ. O la, o voyazi tɛna janya kojugu i ɲɛɛ na. Bibulu kalanden fana be se ka laɲinita dɔw latigɛ a yɛrɛ ye, a be se ka minw dafa wagati surun na. O la, a bena a ye ko a be se ka batɛmu saratiw dafa. Walisa ka kalanden dɛmɛ a ka ɲɛtaga kɛ, baara kɛ ni gafe Ɲɛnamaya kɛ hɛɛrɛ la fɔɔ abada! ka koorilen nin ye: “Laɲinita.” Kalansen kelen kelen bɛɛ laban na, kalanden dɛmɛ a k’a faamu o laɲinita be se k’a dɛmɛ cogo min na k’o kalanw sira tagama. N’i be miirila laɲinita wɛrɛ la i ka kalanden koo la, o sɛbɛ “Laɲinita wɛrɛ” yɔrɔ la. To ka baara kɛ n’o yɔrɔ ye walisa ka kalanden dɛmɛ a k’a filɛ a be se ka laɲinita minw dafa wagati surun ani wagatijan kɔnɔ.

5. Ka kɛɲɛ ni Mariki 10:17-22 ka fɔta ye, Yezu ko cɛɛ nafolotigi dɔ ka mun lo kɛ ani mun na?

 ⁵ I ka Bibulu kalanden dɛmɛ a ka yɛlɛmaniw kɛ (Mariki 10:17-22 kalan). Yezu tun b’a lɔn ko a tun bena gwɛlɛya cɛɛ nafolotigi dɔ ma k’a bololafɛnw feere (Mariki 10:23). O bɛɛ n’a ta, Yezu ko a k’o yɛlɛmaniba kɛ. Mun na do? Sabu a tun b’o cɛɛ kanu. Kalanden be min kalanna, tuma dɔw la an t’a jija a k’o sira tagama sabu an b’a miiri ko a labɛnnin tɛ ka yɛlɛmani dɔ kɛ. Sanni mɔgɔ ka yɛlɛmaniw kɛ ani ka kɛ ni jogo kuraw ye, o be se ka wagati ta (Kɔlɔs. 3:9, 10). Nka kalanden ka ɲi ka yɛlɛmani minw kɛ, n’i kɔnna ka baro kɛ n’a ye o koo la, a bena a daminɛ joona k’o yɛlɛmaniw kɛ. O b’a yira ko i b’i janto a la.—Zab. 141:5; Talenw 27:17.

6. Mun na an ka ɲi ka kalanden ɲininga a ka miiriya la?

⁶ A kɔrɔtanin lo an ka kalanden ɲininga a be min miiri koo dɔ la. O ɲiningali b’i dɛmɛ k’a lɔn a ye min faamu ani a lara min na. N’i be to k’o kɛ, a bena nɔgɔya i ma ka baro kɛ n’a ye koo dɔw kan, a ka gwɛlɛ a ma ka sɔn minw ma. O ɲiningaliw ɲɔgɔn caaman be sɔrɔ gafe Ɲɛnamaya kɛ hɛɛrɛ la fɔɔ abada! kɔnɔ. Misali la, ɲiningali nin be sɔrɔ kalansen 4nan na: “Ele ka miiri la, n’i be Jehova tɔgɔ weele wala n’i b’a tɔgɔ fɔ, o be mun lo kɛ a la?” Kalansen 9nan na a fɔra ko: “I b’a fɛ ka delili kɛ mun ni mun lo koo la?” A daminɛ na, a be se ka gwɛlɛya kalanden ma k’o ɲiningaliw jaabi. Walisa a k’a lɔn o be jaabi cogo min na, i be se k’a dɛmɛ a ka miiri vɛrisew ni jaaw kan minw be sɔrɔ o ɲiningaliw yɔrɔ la.

7. I be se ka baara kɛ koɲuman ni mɔgɔ wɛrɛw ka walew ye cogo di?

⁷ Ni kalanden y’a lɔn a ka ɲi ka min kɛ, a jija a k’o kɛ i kɛtɔ ka mɔgɔ wɛrɛw ka walew yira a la. Misali la, n’a tɛ na lajɛnw na tuma o tuma, i be se ka videwo nin yira a la: Jehova y’a janto n’ na. A be sɔrɔ gafe Ɲɛnamaya kɛ hɛɛrɛ la fɔɔ abada! ka kalansen 14nan na yɔrɔ nin na: “Nunu lajɛ fana.” I be se k’o walew ɲɔgɔn sɔrɔ o gafe ka kalansen caaman kɔnɔ yɔrɔ nunu na: “A ɲini ka dɔ lɔn tugun” ani “Nunu lajɛ fana.” * I janto i kana i ka Bibulu kalanden suma ni mɔgɔ wɛrɛ ye i kɛtɔ k’a fɔ ko: “Ni ale sera k’o kɛ, e fana be se.” A to kalanden k’o faamu a yɛrɛ ma. Mɔgɔ min kofɔra, koo tigitigi minw y’a dɛmɛ ka Bibulu ka kalanw sira tagama, o bɔ kɛnɛ kan. N’a sɔrɔ i be se ka vɛrise jɔnjɔn dɔ kofɔ wala ka koo tigitigi dɔ lakali a tigi ye min kɛ. Tuma o tuma n’a be se ka kɛ, a yira ka gwɛ Jehova y’o tigi dɛmɛ cogo min na.

8. An be se k’an ka Bibulu kalanden dɛmɛ cogo di a ka Jehova kanu?

⁸ Kalanden dɛmɛ a ka Jehova kanu. I be se k’o kɛ cogo di? Sababuw ɲini k’a dɛmɛ a ka Jehova ka jogow lɔn koɲuman. A dɛmɛ a k’a faamu ko Jehova ye ninsɔndiyatigi Ala ye ani ko minw b’a kanu, a b’olu dɛmɛ (1 Tim. 1:11; Eburuw 11:6). A yira a la ko a be min kalanna, n’a b’o sira tagama, o bena a nafa. A fɔ a ye ko a be nafa min sɔrɔla o la, o b’a yira ko Jehova b’a kanu (Ezayi 48:17, 18). Ni dɔ tora ka fara kalanden ka kanuya kan Jehova koo la, o bena a lasun ka yɛlɛmaniw kɛ.—1 Zan 5:3.

9. Ka kɛɲɛ ni Mariki 10:29, 30 ye, mun lo be se ka mɔgɔ dɔ dɛmɛ a ka fɛɛn dɔw to yen walisa ka batize ka kɛ Yezu ka kalanden ye?

⁹ Bibulu kalanden ka ɲi ka fɛɛn dɔw to yen walisa ka ɲɛtaga kɛ ani ka batize. I ko cɛɛ nafolotigi min kofɔra ka tɛmɛ, n’a sɔrɔ kalanden dɔw ka ɲi ka u bololafɛnw saraka. N’u ka baloɲini baara bɛnnin tɛ ni Bibulu ka sariyaw ye, n’a sɔrɔ u ka ɲi ka baara wɛrɛ ɲini. N’a sɔrɔ u caaman ka ɲi k’u ka teriya sa ni mɔgɔ dɔw ye minw tɛ Jehova kanu. Jehova koo man di dɔ wɛrɛw somɔgɔw ye. O kama, u somɔgɔw be se ka ban u la. Yezu y’a fɔ ko n’a sɔrɔ a bena gwɛlɛya mɔgɔ dɔw ma k’o fɛɛnw saraka. Nka, a ye layidu ta ko mɔgɔ minw bena tugu ale kɔ, u jigi tɛna tigɛ. Jehova ye layidu ta ko a bena denbaya mɔgɔ dɔw di u ma a sagokɛlaw cɛma, o minw be ɲɔgɔn kanu (Mariki 10:29, 30 kalan). I be se k’i ka Bibulu kalanden dɛmɛ cogo di a k’o dugaba sɔrɔ?

10. I be kalan juman lo sɔrɔ Manuel ka koo la?

¹⁰ Teriya kɛ n’i ka Bibulu kalanden ye. A kɔrɔtanin lo i k’a yira i ka Bibulu kalanden na ko i b’i janto a la. Mun na do? Manuel be Mɛkisiki jamana na ani a y’a lakali a ka Bibulu kalanfa y’a dɛmɛ cogo min na tuma min na a tun ye Bibulu kalanden ye. A ko: “Ka kɔn kalan kelen kelen bɛɛ ɲɛ, n’ ka Bibulu kalanfa tun be n’ ɲininga ko n’ ka koow be di. A tun be n’ hakili sigi ani n’ tun be se ka n’ kɔnɔ gwɛ ka koo wɛrɛw fɔ a ye. N’ tun b’a ye ko a b’a janto n’ na sɔbɛ la.”

11. N’an ka Bibulu kalandenw be wagati kɛ n’an ye, o be se k’u nafa cogo di?

¹¹ Wagati kɛ n’i ka Bibulu kalandenw ye i ko Yezu tun be wagati kɛ n’a ka kalandenw ye cogo min na (Zan 3:22). Ni kalanden be ɲɛtaga kɛra, i be se k’a weele i ka soo walisa aw ka fɛɛn dɔ min, ka dumuni kɛ wala ka JW telewisɔn filɛ, min be bɔ kalo o kalo. A be se ka diya  kalanden ye kosɔbɛ n’i b’o kɛ fɛtiw tuma na sabu o wagatiw la, n’a sɔrɔ a b’a jati ko a b’a kelen na. Kazibwe be Uganda jamana na. A ko: “Ne fɛ, n’ ye wagati min kɛ ni n’ ka Bibulu kalanfa ye, o ye n’ dɛmɛ ka koo caaman faamu Jehova koo la i ko n’ ka bibulukalan ye dɛmɛ cogo min na. N’ y’a ye Jehova b’a janto a sagokɛlaw la cogo min na ani u ninsɔn diyanin lo kosɔbɛ. N’ tun b’o ɲɔgɔn lo fɛ.”

12. Mun na an man ɲi ka balima kelen dɔrɔn sugandi a ka to k’an bila sira bibulukalan dɔ la?

¹² A to balima wɛrɛw k’i bila sira i ka bibulukalan na. Tuma dɔw la, an be se k’a jati ko a ka nɔgɔ ka taga bibulukalan kɛ an kelen wala ka balima dɔ sugandi a ka to k’an bila sira tuma o tuma. N’a sɔrɔ o ka nɔgɔ an ma. Nka, n’an be taga ni balima wɛrɛw ye an ka bibulukalan na tuma dɔw la, o bena kalanden nafa kosɔbɛ. Dmitrii be Mɔldavi jamana na ani a ko: “Weleweledala minw tun be na n’ ka bibulukalan na, u si ka koow ɲɛfɔcogo tun tɛ kelen ye. O ye n’ dɛmɛ k’a faamu n’ tun be se ka kalan sira tagama cogo wɛrɛ minw na. Ka fara o kan, n’ siɲɛ fɔlɔ ka taga lajɛn na, n’ hakili tun siginin lo sabu n’ tun be balima caaman lɔn ka ban.”

13. Mun na an ka ɲi ka an ka Bibulu kalanden dɛmɛ a ka na lajɛnw na?

¹³ I ka Bibulu kalanden dɛmɛ a ka na lajɛnw na. Mun na do? Sabu Jehova b’a ɲini a sagokɛlaw fɛ u ka ɲɔgɔn lajɛn. O la, lajɛnw ye an ka batoli faan dɔ lo ye (Eburuw 10:24, 25). An balimaw ye an ka denbaya mɔgɔw lo ye Alako ta fan fɛ fana. N’an be ɲɔgɔn fɛ lajɛnw na, a be i n’a fɔ an be dumuni diiman dɔ lo kɛra ɲɔgɔn fɛ. N’i be i ka Bibulu kalanden dɛmɛ a ka na lajɛnw na, i b’a dɛmɛna le a ka koo kɔrɔtaninba dɔ kɛ min bena a to a be batize. Nka, a be se ka gwɛlɛya a ma k’a daminɛ ka na lajɛnw na. Gafe Ɲɛnamaya kɛ hɛɛrɛ la fɔɔ abada! be se k’a dɛmɛ cogo di a ka see sɔrɔ o gwɛlɛyaw bɛɛ kan?

14. An be se ka kalanden jija cogo di a ka na lajɛnw na?

¹⁴ Baara kɛ ni gafe Ɲɛnamaya kɛ hɛɛrɛ la fɔɔ abada! ka kalansen 10nan ye walisa ka kalanden jija. Sanni o gafe ka bɔ, a ɲinina weleweledala kolɔnbaga dɔw fɛ u k’o kalansen lajɛ n’u ka Bibulu kalandenw ye. U ko o kalansen ye kalandenw dɛmɛ kosɔbɛ u y’a daminɛ ka na lajɛnw na. Nka, kana kɔnɔni kɛ aw be se kalansen 10nan na, i be sɔrɔ ka kalanden weele ka na lajɛnw na. Kalan daminɛ na, a weele ka na lajɛnw na ani to k’o kɛ tuma o tuma. Kalandenw ka gwɛlɛyaw tɛ kelen ye. O la, miiri i ka Bibulu kalanden ka makoyaw la ani a filɛ i be se k’a dɛmɛ cogo tigitigi min na. Kana i fari faga n’a be wagati tara ka sɔrɔ k’a daminɛ ka na lajɛnw na. Muɲu a kɔrɔ ani to k’a weele a ka na lajɛnw na.

15. Koo jumanw lo be se ka siranya bila an ka Bibulu kalanden na?

¹⁵ Yala i tun be siranna ka kɛ Jehova Seere ye wa? N’a sɔrɔ i tun b’a miiri ko i tɛna se ka waajuli kɛ abada soo ni soo. Wala n’a sɔrɔ i tun be siranna ko i somɔgɔw wala i teriw bena i kɛlɛ. N’o lo, i b’i ka Bibulu kalanden faamu. Yezu y’a fɔ k’o siranya ɲɔgɔn bena dɔw minɛ. Nka, a y’a ka kalandenw jija ko u kana a to siranya k’u bali ka Jehova sago kɛ (Mat. 10:16, 17, 27, 28). A y’u dɛmɛ cogo di u ye see sɔrɔ u ka siranya kan? I be se k’a ladegi cogo di?

16. An be se ka an ka Bibulu kalanden dɛmɛ cogo di a k’a ka lannakow fɔ tɔɔw ye?

 ¹⁶ Kalanden dɛmɛ dɔɔni dɔɔni a k’a ka lannakow fɔ tɔɔw ye. Tuma min na Yezu y’a ka kalandenw ci ko u ka taga waajuli kɛ, n’a sɔrɔ u tun sirannin lo. Nka, Yezu y’u dɛmɛ a kɛtɔ k’a fɔ u ye u ka ɲi ka waajuli kɛ yɔrɔ min na ani u ka ɲi ka min fɔ (Mat. 10:5-7). I be se ka Yezu ladegi cogo di? I ka Bibulu kalanden dɛmɛ a k’a lɔn a be se ka waajuli kɛ yɔrɔ minw na. Misali la, a ɲininga n’a be mɔgɔ dɔ lɔn a bena diya min ye ka Bibulu ka kalan tigitigi dɔ lɔn. O kɔ, a dɛmɛ a k’a yɛrɛ labɛn i kɛtɔ k’a yira a la a be se k’o tiɲɛnkalan fɔ cogo nɔgɔman min na. N’a bɛnnin lo, min fɔra yɔrɔ nunu na, u kɛ k’a filɛ ni kalanden ye: “Ni mɔgɔ dɔ y’a fɔ ko” ani “Dɔ be se ka ɲiningali kɛ ko.” U be sɔrɔ gafe Ɲɛnamaya kɛ hɛɛrɛ la fɔɔ abada! kɔnɔ. N’i b’o kɛra, i jija ka kalanden dɛmɛ a ka basigi Bibulu kan k’a lamɛnbaga jaabi nɛmɛnɛmɛ ani cogo nɔgɔman na.

17. An be se ka tɛmɛ Matiyo 10:19, 20, 29-31 fɛ cogo di ka kalanden dɛmɛ a k’a jigi la Jehova kan?

¹⁷ Kalanden dɛmɛ a k’a jigi la Jehova kan. Yezu y’a ka kalandenw hakili sigi ko Jehova bena u dɛmɛ sabu a be u kanu (Matiyo 10:19, 20, 29-31 kalan). A fɔ i ka Bibulu kalanden ye ko Jehova bena ale fana dɛmɛ. N’i be delili kɛ n’a ye a ka laɲinitaw koo la, i bena a dɛmɛ a k’a jigi la Jehova kan. Franciszek be Polɔɲi jamana na. A ko: “N’ ka Bibulu kalanfa be to ka n’ ka laɲinitaw fɔ Jehova ye a ka deliliw la. N’ y’a ye ko Jehova y’a ka deliliw jaabi, n’ sinna k’a daminɛ ka delili kɛ. Tuma min na n’ ye baara kura sɔrɔ ani n’ ye sira deli n’ ka patɔrɔn fɛ walisa ka taga lajɛnw ni lajɛnba la, n’ y’a ye ko Jehova ye n’ dɛmɛ.”

18. An be bibulukalan minw kɛ ni mɔgɔw ye, Jehova be mun lo miiri o koo la?

¹⁸ Jehova b’a janto kosɔbɛ an ka Bibulu kalandenw na. An be jijaliba minw kɛ ka mɔgɔw kalan walisa u k’u magwɛrɛ Jehova la, a b’o kala ma ani a b’an kanu o kosɔn (Ezayi 52:7). Hali ni bibulukalan t’i fɛ sisan, i bele be se ka Bibulu kalandenw dɛmɛ u ka ɲɛtaga kɛ ka batize. I be se k’o kɛ n’i be weleweledala wɛrɛw bila sira u ka bibulukalanw na.