1. Nso ke mme mbet Jesus ẹkedọhọ udịmowo emi ẹkedude ke Jerusalem ẹnam?

ATA ediwak iren ye iban emi ẹsemde nsio nsio usem ẹma ẹto ediwak idụt ẹdi Jerusalem. Usen emi mmọ ẹsopde idem, ata n̄kpọ n̄kpaidem ama etịbe. Mme Jew emi mîkedịghe-di n̄kpọ ndomokiet ke obio ẹma ẹsem mme usem isenowo oro! N̄kpọ oro ama akpa otuowo oro idem etieti, edi se mme Jew oro ẹkedade usem oro ẹtịn̄ ẹnọ mmọ ye se apostle Peter eketịn̄de akakam akpa mmọ idem akan. Ẹma ẹnam otuowo oro ẹdiọn̄ọ ke ana mmọ ẹbuọt idem ye Jesus Christ man ẹnyan̄a mmọ. Ikọ oro ama otụk mmọ tutu mmọ ẹbụp ẹte: “Nso ke nnyịn inyene ndinam?” Peter ama ọbọrọ mmọ ete: “Kpukpru mbufo . . . ẹna baptism.”—Utom 2:37, 38.

2. Nso ke idineme ke ibuotikọ emi? (Se ndise ikpædem Enyọn̄-Ukpeme emi.)

² N̄kpọ nte tọsịn owo ita ẹma ẹna baptism usen oro ẹkabade ẹdi mbet Jesus. Utọ n̄kpọ oro iketịbeke akpa. Jesus ama ọdọn̄ mme mbet esie ata akamba utom, ete mmọ ẹnam mme owo ẹdi mbet imọ. Ntọn̄ọ utom oro ekedi oro. Mme mbet Jesus ke ẹnanam utom oro tutu mfịn. Edi ke eyo nnyịn emi, nnyịn ikemeke ndikpep owo Bible ke ufan̄ hour ifan̄ kpọt yak odot ndina baptism. Ediwak ọfiọn̄ ekeme ndibe, ekeme ndisịm isua kiet mîdịghe akan oro mbemiso owo odotde ndina baptism. Ekpedi ke ekpep owo Bible idahaemi, ọyọdiọn̄ọ ke ndikpep owo Bible yak odot ndina baptism idịghe ifia ubọk kiet. Iyetịn̄ ke ibuotikọ emi se afo ekemede ndinam man an̄wam owo emi esikpepde Bible odot ndina baptism.

3. Matthew 28:19, 20 owụt ke nso ke ana owo anam man enye odot ndina baptism?

³ Mbemiso owo odotde ndina baptism, ana enye anam se  ẹkpepde enye ke Bible. (Kot Matthew 28:19, 20.) Enye ama anam se enye ekpepde, enye editie nte “owo ọniọn̄” emi Jesus ọkọdọhọde ke ekedi oyom ndibọp ufọk, enye ọdọk isọn̄ enen̄ede otụn̄ọ onyụn̄ esịn itiat idakisọn̄ odori ke akamba itiat. (Matt. 7:24, 25; Luke 6:47, 48) Ikpanam didie in̄wam owo anam se enye ekpepde? Se usụn̄ ita mi.

4. Didie ke ikpan̄wam owo aka iso anam mme n̄kpọ emi ẹdin̄wamde enye odot ndina baptism? (Se n̄ko ekebe emi “ N̄wam Owo Emi Afo Ekpepde Bible Emek Se Enye Edinamde Onyụn̄ Anam Mmọ.”)

⁴ N̄wam enye emek se edinamde. Ntak ọfọnde inam oro? Yak idọhọ ke oyom ndika ebiet emi enen̄erede oyom usụn̄. Ekeme ndidi eyetie ekere mme itie emi edituakde ida iduọk odudu man edikakak fi ikaha. Ukem ntre n̄ko, owo emi isikpepde Bible ama emek n̄kpri n̄kpri n̄kpọ emi enye edinamde onyụn̄ anam mme n̄kpọ oro, oro ayanam enye okụt ke se anade imọ inam man idot ndina baptism isọn̄ke ikaha. Da ekebe emi ẹkotde “Se Afo Edinamde” ke n̄wed Du Ata Uwem ke Nsinsi! n̄wam enye anam oro. Ke utịt ibuot ukpepn̄kpọ kiet kiet, n̄wam enye okụt nte se enye emekde ndinam oro edin̄wamde enye anam se enye ekpepde ke ibuot ukpepn̄kpọ oro. Ekpedi enyene n̄kpọ en̄wen emi akpamade enye anam, ẹwet ke ukpọk ufan̄ emi ẹnịmde ndida n̄wet “N̄kpọ En̄wen.” Siwak ndida ekebe emi nneme n̄kpri n̄kpri n̄kpọ emi mîdidaha enye ini ndinam, emi enye emekde, ye mme n̄kpọ emi ẹdidade enye ini ekpri.

5. Ke Mark 10:17-22, nso ke Jesus ọkọdọhọ owo inyene kiet anam? Nso ikanam Jesus ọdọhọ enye ntre?

⁵ N̄wam enye anam mme n̄kpọ emi ẹsọn̄de enye ndinam. (Kot Mark 10:17-22.) Jesus ama ọdiọn̄ọ ke ẹkpedọhọ owo inyene anyam kpukpru se enye enyenede, ke ọkpọsọn̄ enye. (Mark 10:23) Kpa ye oro, Jesus ama osụk ọdọhọ ete oro yak  anam utọ ọkpọsọn̄ n̄kpọ oro. Nso ikanam enye ọdọhọ? Jesus ama ama ete oro etieti. Ndusụk ini imekeme ndimen̄e ndisio ndọhọ owo emi ikpepde Bible yak anam se enye ekpepde ke ntak emi ikerede ke enye iben̄eke idem kan̄a ndinam utọ n̄kpọ oro. Ekeme ndida ini mme owo nditre ndiọi n̄kpọ emi mmọ ẹkesinamde, ntọn̄ọ nnam se ifọnde. (Col. 3:9, 10) Edi edieke abakde osio ọdọhọ enye se anade enye etre, enye ekeme ndinyụn̄ nsọp ntre n̄kpọ oro. Afo ndineme n̄kpọ oro ye enye ayanam enye okụt ke omoyom n̄kpọ ọfọn imọ.—Ps. 141:5; N̄ke 27:17.

6. Ntak emi ikpesibụpde owo mbụme emi edinamde enye etịn̄ se enye ekerede?

⁶ Ọfọn yak isibụp owo emi ikpepde Bible se enye ekerede aban̄a se ikpepde enye. Oro ayanam fi ọdiọn̄ọ nte se ekpepde an̄wan̄ade enye, ye se enye enịmde. Ekpesiwak ndibụp enye mme mbụme ntre, ama aka ko, akpana nte eneme n̄kpọ emi ekemede ndisọn̄ enye ndinyịme, eyemem fi utom ndineme. Mme mbụme emi ẹnamde owo etịn̄ se enye ekerede ẹyọyọhọ n̄wed Du Ata Uwem ke Nsinsi! Ke uwụtn̄kpọ, ẹbụp ke ukpepn̄kpọ ọyọhọ 4 ẹte: “Ndi emekere ke esinem Jehovah afo ama okot enyịn̄ esie?” Ke ukpepn̄kpọ 9, ẹbụp ẹte: “Nso ye nso ke edima ndisịn ke akam fo?” Ekeme ndisọn̄ owo emi afo ekpepde Bible ndibọrọ utọ mbụme ntem ke nsonso oro. N̄kpọ kiet emi afo ekemede ndinam n̄n̄wam enye edi ndidọhọ enye etịm ekere mme itie Bible ye mme ndise emi ẹdude do.

7. Didie ke ikeme ndida mbụk nditọete nnyịn n̄n̄wam owo emi ikpepde Bible?

⁷ Ama an̄wan̄a owo emi afo ekpepde Bible se anade enye anam, da mbụk nditọete nnyịn n̄wam enye yak anam oro. Ke uwụtn̄kpọ, edieke enye mîsiwakke ndidụk mbono esop, emekeme ndibre vidio Jehovah Enen̄ede An̄wam Mi nnọ enye. Edikụt vidio emi ke ukpepn̄kpọ 14 ke ekebe emi ẹkotde “Kpep N̄kpọ En̄wen.” Ẹdọn̄ mme mbụk ntem ke ediwak ibuot ukpepn̄kpọ ke n̄wed Du Ata Uwem ke Nsinsi! Oyokụt mmọ ke ekebe emi ẹkotde “Sịn Idem Kpep” mîdịghe afo okụt ke “Kpep N̄kpọ En̄wen.” * Kpeme mbak udûmen owo emi afo ekpepde Bible udomo ye owo emi afo ọnọde enye mbụk aban̄a. Kûdọhọ enye, “Sia owo emi ama akanam, afo n̄ko emekeme ndinam.” Yak enye ebiere enye oro ke idemesie. Ẹma ẹse vidio ẹma, kam tịn̄ ban̄a mme akpan n̄kpọ emi ẹken̄wamde owo oro anam se Bible ekpepde. Emekeme ndisiak itie Bible kiet emi akan̄wamde owo oro, mîdịghe afo etịn̄ akpan n̄kpọ kiet emi enye akanamde yak an̄wam enye. Ama okụt n̄kpọ emi owụtde nte Jehovah akan̄wamde owo oro, nen̄ede tịn̄ enye oro.

8. Idisan̄a didie in̄wam owo ama Jehovah?

⁸ N̄wam enye ama Jehovah. Edisan̄a didie in̄wam? Siyom usụn̄ tịn̄ ban̄a mme edu Jehovah. N̄wam enye yak okụt ke Jehovah edi Abasi inemesịt, ke esinyụn̄ an̄wam mbon emi ẹmade enye. (1 Tim. 1:11; Heb. 11:6) Nam enye okụt ke edieke enye anamde se enye ekpepde, ke enye edidia, ndien ke ufọn emi enye ọbọde do owụt ke Jehovah ama enye. (Isa. 48:17, 18) Nte owo emi afo ekpepde Bible amade Jehovah aka, ntre ke edidọn̄ enye ndikpụhọde se ededi emi anade enye okpụhọde.—1 John 5:3.

9. Mark 10:29, 30 owụt ke nso ikeme ndin̄wam owo ayak n̄kpọ atak enye man odot ndina baptism?

⁹ Eyedi se owo emi ikpepde Bible asanade  ndusụk n̄kpọ ayak man enye odot ndina baptism. Ukem nte akanade owo inyene oro ayak inyene esie atak enye, ekeme ndidi se ndusụk mbon emi ikpepde Bible ẹkpọn̄de utom emi mîkemke ye Bible. Ekeme ndidi se ediwak mmọ ẹdian̄arede nsan̄a ye mme ufan emi mîmaha Jehovah. Mbon ubon emi mîmaha Mme Ntiense Jehovah ẹkeme ndisịn ndusụk mmọ. Jesus ama ọdọdọhọ ke ekeme ndisọn̄ ndusụk owo ndiyak mme n̄kpọ ntem ẹtak mmọ. Edi enye ama ọn̄wọn̄ọ ke mbon emi ẹtienede imọ idituaha n̄kpọfiọk. Jehovah edikam idọdiọn̄ mmọ, anam mmọ ẹnyene mme ete ye eka ye nditọeka emi ẹmade mmọ ke otu ikọt esie. (Kot Mark 10:29, 30.) Ikpanam didie in̄wam owo emi isikpepde Bible yak edibọ utọ edidiọn̄ emi?

10. Se Manuel etịn̄de ekpep fi nso?

¹⁰ Di ufan esie. Enen̄ede ọfọn yak anam owo emi afo esikpepde Bible okụt ke amama enye. Nso inam ọfọn? Manuel emi odụn̄de ke Mexico etịn̄ nte owo emi ekekpepde imọ Bible akan̄wamde imọ, ete: “Mbemiso itọn̄ọde ndikpep n̄kpọ, enye ama esibụp mi m̀mê n̄kpọ etie didie. Oro ama anam esịt ana mi sụn̄ onyụn̄ anam n̄keme nditịn̄ n̄kpọ ekededi nnọ enye. Mma n̄kụt ke enye enen̄ede ama mi.”

11. Nso ufọn ke mbon emi isikpepde Bible ẹdibọ edieke isiwakde ndidu ye mmọ?

¹¹ Siwak ndidu ye mbon emi afo ekpepde Bible nte Jesus ekesidude ye mme mbet esie. (John 3:22) Ekpedi enye ke anam se enye ekpepde ke Bible, emekeme ndikot enye edibịt itọn̄ ke ufọk fo, edidia udia, m̀mê editiene ese edinam TV nnyịn. N̄kpọ ntre ekeme ndinen̄ede nnem enye, akpan akpan ekpedi okot enye ke mme ini emi mbon ubon esie ye mme ufan esie ẹdiade usọrọ emi mîsịneke ke Bible, enye inyụn̄ itieneke mmọ inam usọrọ oro. Kazibwe emi odụn̄de ke Uganda ọdọhọ ete: “Nsio nsio ini emi owo emi ekekpepde mi Bible ekesidude ye ami, mma nsikpep ediwak n̄kpọ mban̄a Jehovah nte n̄kesinyụn̄  n̄kpepde ke ini ikpepde n̄kpọ. Mma n̄kụt ke Jehovah esinen̄ede ese aban̄a ikọt esie, ke esịt esinyụn̄ enen̄ede enem mmọ. Se n̄koyomde edi oro n̄ko.”

12. Ntak ọfọnde isisan̄a ye nsio nsio nditọete ikekpep owo n̄kpọ-ọ?

¹² Sisan̄a ye nsio nsio nditọete kekpep enye n̄kpọ. Ndusụk ini, imekeme ndikere ke ndisan̄a ikpọn̄ n̄kekpep owo n̄kpọ m̀mê ndisụk nyịre nsan̄a ye owo kiet n̄ka, emem nnyịn utom. Kpa ye emi ekemede ndimem nnyịn utom ndinam ntre, ndisisan̄a ye nsio nsio owo n̄kekpep enye n̄kpọ edin̄wam enye ikan. Dmitrii emi odụn̄de ke Moldova ọdọhọ ete: “Owo kiet kiet emi ekesitienede edikpep mi n̄kpọ ama enyene usụn̄ esiemmọ emi enye akasan̄ade anam se ẹkpepde an̄wan̄a mi. Oro ama anam n̄kụt nsio nsio usụn̄ emi n̄kpanamde se n̄kpepde. Bụt ikonyụn̄ inen̄ekede inam mi akpa ini emi n̄kade mbono esop sia mma ndọdiọn̄ọ ediwak nditọete.”

13. Ntak emi ikpan̄wamde owo emi isikpepde Bible esidụk mbono esop?

¹³ N̄wam enye esidụk mbono esop. Ntak ọfọnde an̄wam-a? Sia Jehovah ọdọhọ ikọt esie ẹsisop idem ntre; n̄kpọ kiet emi inamde ituak ibuot inọ enye edi oro. (Heb. 10:24, 25) N̄kpọ efen edi ke nditọete nnyịn ẹtie nte mbon ubon nnyịn. Ntre ke ini idụkde mbono esop, etie nte n̄kpọ eke itiede ye ubon nnyịn idia udia. Ke ini an̄wamde owo emi afo esikpepde Bible ọtọn̄ọ ndidụk mbono esop, ọwọrọ aman̄wam enye yak anam akpan n̄kpọ kiet emi anade enye anam man odot ndina baptism. Edi ekeme ndisọn̄ enye nditọn̄ọ mbono esop. Didie ke n̄wed Du Ata Uwem ke Nsinsi! ekeme ndin̄wam enye akan n̄kpọ ekededi emi mîyakke enye ọtọn̄ọ mbono esop?

14. Nso ke ikpanam yak ọdọn̄ owo ndidụk mbono esop?

¹⁴ Da ọyọhọ ukpepn̄kpọ 10 ke n̄wed Du Ata Uwem ke Nsinsi! nam ọdọn̄ owo emi afo esikpepde Bible ndidụk mbono esop. Mbemiso ẹkesiode n̄wed emi, ẹma ẹdọhọ nditọete emi ẹnen̄erede ẹdiọn̄ọ ndikpep owo n̄kpọ ẹda ukpepn̄kpọ emi ẹn̄wam mbon emi mmọ ẹsikpepde Bible ẹdụk mbono esop. Mmọ ẹdọhọ ke oro ama an̄wam ediwak mmọ ẹdụk mbono esop. Edi emi iwọrọke ke akpana ibebet tutu esịm ọyọhọ ukpepn̄kpọ 10 mbemiso itọn̄ọde ndikot owo mbono esop. Kûbiat ini ndikot owo mbono esop, sinyụn̄ tịn̄ ndien ndien. Diọn̄ọ ke se ikpande owo kiet ndidụk mbono esop idịghe ukem ye se ikpande owo en̄wen. Ntre diọn̄ọ se ikpande enye ndidụk mbono esop, nyụn̄ se m̀mê enyene se ekemede ndinam n̄n̄wam enye. Kûyak akak fi edieke okotde afiak okot, enye isụk imaha ndidi. Nyene ime, edi kûnyụn̄ utre ndisikot enye.

15. Nso ikeme ndinam owo emi ikpepde Bible ndịk?

¹⁵ Ndi ke eteti ini ekekerede ndikabade ndi Ntiense Jehovah? Ndi idem ama enyek fi ekpri? Ekeme ndidi ekekere ke tutu amama imọ idikemeke ndisan̄a ke ufọk ke ufọk n̄kwọrọ ikọ. Ekeme ndinyụn̄ ndi idem ekenyek fi ke mme ufan fo m̀mê mbon ubon mbufo ẹkeme ndikọbọ fi. Ekpedi ntre, se iwọrọde owo emi afo ekpepde Bible ekeme ndin̄wan̄a fi. Jesus ama ọdiọn̄ọ ke utọ n̄kpọ ntre ekeme ndinyek ndusụk owo idem. Edi enye ama ọdọhọ mme mbet esie ẹkûyak ndịk akpan mmọ ndikpono Jehovah. (Matt. 10:16, 17, 27, 28) Jesus akanam didie an̄wam mme mbet esie ẹtre ndikop ndịk? Didie ke afo ekeme ndikpebe enye?

16. Didie ke ikpekpep owo emi isikpepde Bible ndikwọrọ ikọ?

¹⁶ Kpep enye sụn̄sụn̄ sụn̄sụn̄ ndikwọrọ ikọ. Ekeme ndidi idem ama enyek mme  mbet Jesus ini enye ọkọdọhọde mmọ ẹkekwọrọ ikọ. Edi Jesus ama an̄wam mmọ; enye ama ọdọhọ mmọ se ẹdikwọrọde ye mbon emi mmọ ẹdikwọrọde ẹnọ. (Matt. 10:5-7) Didie ke afo ekpekpebe Jesus? N̄wam owo emi afo ekpepde Bible ọdiọn̄ọ mbon emi enye ekemede ndikwọrọ ikọ nnọ. Sio akpan n̄kpọ kiet emi Bible ekpepde bụp enye m̀mê enye ọdiọn̄ọ owo emi utọ ukpepn̄kpọ oro ekemede ndin̄wam. Ekem wụt enye mmemmem usụn̄ emi enye ekemede ndineme n̄kpọ oro ye owo oro. Emekeme ndida ekebe mbiba emi “Ndusụk Owo Ẹsidọhọ Ẹte” ye “Ndusụk Owo Ẹkeme Ndibụp” emi ẹdude ke n̄wed Du Ata Uwem ke Nsinsi! nnam nse nte enye edikọkwọrọde. Nen̄ede n̄wam enye yak ọdiọn̄ọ ndida Bible mbọrọ owo mbụme ke usụn̄ emi ọsọpde an̄wan̄a owo, inyụn̄ inamke ikọ ikọ.

17. Didie ke ikeme ndida Matthew 10:19, 20, 29-31 n̄n̄wam owo ọbuọt idem ye Jehovah?

¹⁷ N̄wam enye ọbuọt idem ye Jehovah. Jesus ama ọdọhọ mme mbet esie ke Jehovah ayan̄wam mmọ koro enye ama mmọ. (Kot Matthew 10:19, 20, 29-31.) Siti owo emi afo ekpepde Bible ke Jehovah ayan̄wam enye n̄ko. Ini etiede ye enye ọbọn̄ akam, sịn mme n̄kpọ emi enye emekde ndinam ke akam. Oro ayan̄wam enye eberi edem ye Jehovah. Franciszek emi odụn̄de ke Poland ọdọhọ ete: “Owo emi ekekpepde mi Bible ama esiwak ndisịn mme n̄kpọ emi n̄kemekde ndinam ke akam. Mma nsọsọp ntọn̄ọ nditiene mbọn̄ akam ke mma n̄kokụt nte Jehovah ọbọrọde akam esie. Mma n̄kụt ubọk Jehovah ini n̄kakade n̄keben̄e eteutom mi ke obufa itieutom ndọhọ ọnọ mi ini nsida ndụk mbono esop nnyụn̄ n̄ka akamba mbono.”

18. Jehovah ese didie nte ikpepde mme owo Bible?

¹⁸ Jehovah enen̄ede ama mbon emi ikpepde Bible. Jehovah okụt kpukpru se mbon emi ẹsikpepde owo Bible ẹnamde man ẹn̄wam mme owo ẹnen̄ede ẹkpere enye, enye onyụn̄ ama mmọ ke se mmọ ẹnamde oro. (Isa. 52:7) Ekpedi unyeneke owo emi afo esikpepde Bible idahaemi, omosụk ekeme ndin̄wam owo odot ndina baptism edieke esitienede nditọete asan̄a ekekpep owo n̄kpọ.