1. Ebɛnadze na wɔkãa kyerɛɛ nyimpadɔm bi dɛ wɔnyɛ?

NNA nyimpadɔm bi a wɔyɛ mbarimba na mbaa a wofifi aman ahorow do na ɔsor kasa a wɔkã ehyia mu. Anwanwadze bi sii dɛm da no. Ahɔho a wɔbaa nhyiamu no ase no tsee dɛ Jewfo binom rekã hɔn kurow mu kasa! Iyi yɛɛ nyimpadɔm no nwanwa, naaso nsɛm a Jewfo no kãa kyerɛɛ hɔn nye dza ɔsomafo Peter so kãe no nyina yɛɛ hɔn nwanwa koraa kyɛɛn dɛm. Nyimpadɔm no bohun dɛ sɛ wonya gyedzi wɔ Jesus Christ mu a wobotum enya nkwa. Asɛm yi a wɔtsee no kaa hɔn papaapa. Asɛm no kaa nkorɔfo no araa ma wobisaa dɛ: “Yɛnyɛ dɛn?” Peter yii hɔn ano dɛ: “Hom nnu homho, na wonnuma hom nyina.”​—Andw. 2:37, 38.

2. Ebɛnadze na yebosusu ho wɔ adzesua yi mu? (Hwɛ mfonyin a ɔwɔ Ɔweɔn-Aban yi enyim no.)

² Dza osii wɔ ɔno ekyir no yɛ soronko koraa. Nyimpa bɛyɛ 3,000 na wonumaa hɔn dɛm da no ma wɔbɛyɛɛ Christ n’esuafo. Iyi na ɔhyɛɛ edwuma kɛse a Jesus dze hyɛɛ n’ekyirdzifo nsa no ase; ɔnye dɛ wɔnyɛ nkorɔfo n’esuafo. Dze besi ndɛ, Jesus n’ekyirdzifo akɔ do ayɛ dɛm edwuma no. Wɔ hɛn aber yi do no, yerunntum nnye obi nnsũa adze ndɔnhwer kakraabi ma wonnuma no. Bi a ɔbɛgye abosoom dodow bi anaa mpo afe anaa dza ɔbor dɛm ana osuanyi bi eetum edu dɛm botae no ho. Sɛ enye obi yɛ Bible adzesua a, ebɛgye ato mu dɛ esuafoyɛ edwuma no gye mbɔdzembɔ ankasa. Wɔ adzesua yi mu no, yɛbɔhwɛ dza ibotum ayɛ dze aboa wo Bible suanyi ma ɔaabɛyɛ osuanyi a woenuma no.

3. Dɛ mbrɛ asɛm a ɔwɔ Matthew 28:19, 20 kyerɛ no, ebɛnadze na ɔsɛ dɛ Bible suanyi no yɛ ama ɔaafata dɛ wonuma no?

³ Ansaana Bible suanyi bi bɛfata dɛ wonuma no no, ɔsɛ dɛ ɔdze dza Bible no kyerɛkyerɛ no yɛ edwuma wɔ n’asetsena mu. (Kenkan Matthew 28:19, 20.) Sɛ Bible suanyi no dze dza orusũa no yɛ edwuma a, ɔbɛyɛ n’adze tse dɛ “badwembanyi” a Jesus kãa noho asɛm wɔ ne mfatoho bi mu no. Otutuu famu ma ɔdɔe na ɔtoo fapem wɔ ɔbotan do. (Matt. 7:24, 25; Luke 6:47, 48) Yebesi dɛn aboa Bible suanyi bi ma ɔdze dza orusũa no aayɛ edwuma? Hom mma yensusu nyansahyɛ ebiasa bi ho.

4. Yebesi dɛn aboa suanyi bi ma nkakrankakra no ɔaafata dɛ wonuma no? (Hwɛ adakaba a wɔato dzin “ Boa Wo Suanyi No Ma Ɔmfa Botae Ahorow Nsisi N’enyi Do Na Ɔmper Ndu Ho” no so.)

⁴ Boa wo suanyi no ma ɔmfa botae ahorow nsisi n’enyi do. Ebɛnadze ntsi na ɔsɛ dɛ eboa no wɔ dɛm kwan yi do? Hom mma yensusu dɛm mfatoho yi ho nhwɛ: Sɛ edze kaar rutu kwan akɔ kwan tsentsen a, bi a ebɛpɛ dɛ igyinagyina kakra wɔ mbea bi a hɔ yɛ ahomka na egye w’ahom. Iyi remma innhu mpo dɛ kwan no war. Dɛmara na sɛ Bible suanyi bi dze botae ahorow a ɔnnyɛ dzen dɛ obodu ho sisi n’enyi do na ɔper du ho a, obohu dɛ ɔrennyɛ dzen mma no dɛ obonuma. Fa Ibotum Enya Enyigye Daa! buukuu no ne fã a wɔato dzin “Dza Ebɛyɛ” no boa wo suanyi no ma onnya nkɔenyim. Wɔ adzesua asɛm biara n’ewiei no, boa osuanyi no ma onhu mbrɛ dɛm ɔfã no bɔboa no ma ɔdze dza oesũa no aayɛ edwuma. Sɛ ewɔ biribi fofor bi a epɛ dɛ wo suanyi no yɛ a, kyerɛw hyɛ ɔfã a wɔato dzin “Dwumadzi fofor” no. Ɔyɛ a enye wo suanyi no nsusu dɛm ɔfã yi ho na hom nsan nhwɛ botae ahorow a obotum dze ber tsiabaa bi edu ho nye dza ɔbɛgye ber tsentsen ana oeedu ho.

5. Dɛ mbrɛ Mark 10:17-22 kyerɛ no, ebɛnadze na Jesus kãa kyerɛɛ ɔdzefo bi dɛ ɔnyɛ? Na ebɛnadze ntsi na ɔkãa dɛm?

 ⁵ Boa wo suanyi no ma ɔnyɛ nsesa wɔ n’asetsena mu. (Kenkan Mark 10:17-22.) Nna Jesus nyim dɛ ɔbɛyɛ dzen ama ɔdzefo dɛ ɔbɔtɔn n’ahonyadze. (Mark 10:23) Naaso, Jesus kãa kyerɛɛ ɔdzefo no dɛ ɔnyɛ nsesa kɛse yi wɔ n’asetsena mu. Ebɛnadze ntsi a? Osiandɛ nna Jesus dɔ no. Ɔtɔ da a, bi a yɛbɔtwentweɔn hɛn ananadze dɛ yɛbɛhyɛ osuanyi no nkuran dɛ ɔmfa dza orusũa no nyɛ edwuma osiandɛ yɛtse nka dɛ ɔnnyɛɛ krado dɛ ɔbɛyɛ nsesa a no ho hia. Bi a ɔbɛgye ber ana hɛn Bible esuafo eetum ayɛ nsesa na wɔaahyɛ nyimpa fofor no. (Col. 3:9, 10) Naaso sɛ enye wo suanyi no kã ho asɛm ntsɛm a, ɔno so botum ahyɛ ase ayɛ nsesa ntsɛm. Sɛ enye wo suanyi no bɔ nkɔmbɔ a ɔtse dɛm a, eda no edzi dɛ edwen noho.​—Ndw. 141:5; Mbɛ. 27:17.

6. Ebɛnadze ntsi na ɔsɛ dɛ ibisa nsɛm a ɔbɛma ehu adwen a wo suanyi no wɔ?

⁶ Sɛ enye wo suanyi rusũa adze a, no ho hia dɛ ibebisa nsɛm a ɔbɛma ehu adwen a ɔwɔ wɔ dza hom rususu ho no ho. Dɛm a ebɛyɛ no bɔboa wo ma eehu ntseasee a wo suanyi no wɔ nye dza ɔgye dzi. Sɛ etaa yɛ dɛm a, ɔbɛyɛ mberɛw ama wo dɛ daakye enye no bosusu nsɛm a ɔbɛyɛ dzen dɛ ɔbɛgye ato mu no ho. Nsɛmbisa a ɔtsetse dɛm pii wɔ Ibotum Enya Enyigye Daa! buukuu no mu. Dɛ nhwɛdo no, asɛmbisa bi wɔ adzesua 04 no mu dɛ: “Ehwɛ a, sɛ yɛdze Jehovah so ne dzin no frɛ no anaa yɛdze dzi dwuma a, ɔtse nka dɛn?” Asɛmbisa bi so wɔ adzesua 09 no mu dɛ: “Ebɛn ndzɛmba dɛm na ebɛpɛ dɛ ebɔ ho mpaa?” Ahyɛse no dze, bi a ɔbɛyɛ dzen ama wo suanyi no dɛ obeyi nsɛmbisa a ɔtsetse dɛm ano. Naaso, sɛ ekyerɛ no mbrɛ obesi esusu kyerɛwnsɛm nye mfonyin ahorow a ɔwɔ adzesua no mu no ho a, ɔbɔboa no.

7. Ibesi dɛn dze afofor hɔn suahu edzi dwuma wɔ kwan a otu mpon do?

⁷ Sɛ wo suanyi no hu dza ɔsɛ dɛ ɔyɛ a, fa afofor hɔn suahu hyɛ no nkuran. Dɛ nhwɛdo no, sɛ ɔyɛ dzen ma wo suanyi no dɛ ɔbɔkɔ asafo nhyiamu a, wɔ adzesua 14 no, ibotum ama ɔaahwɛ video a wɔato dzin Jehovah Hwɛɛ Me a ɔwɔ “Hwehwɛ Pii Ka Ho” ɔfã hɔ no. Wɔ Ibotum Enya Enyigye Daa! buukuu no mu no, adzesua nsɛm pii na ibenya suahu a ɔtsetse dɛm wɔ mu. Ibohu wɔ “Pɛnsapɛnsa Mu Kɔ Ekyir” anaa “Hwehwɛ Pii Ka Ho” afã hɔ. * Hwɛ yie na aammfa wo suanyi no anntoto obi fofor ho na annkã dɛ, “Sɛ ɔno tumii yɛe a, woara so botum ayɛ.” Ma wo suanyi no ankasa nnya ɔpɛ dɛ ɔbɛyɛ. Mbom kã biribi pɔtsee a ɔboaa nyimpa a ɔwɔ video no mu no ma ɔdze Bible mu nkyerɛkyerɛ yɛɛ edwuma no ho asɛm. Bi a ibotum atwe adwen esi kyerɛwsɛm tsitsir bi anaa biribi tsitsir bi a nyimpa no yɛe no do. Aber biara a no ho behia no, twe n’adwen si mbrɛ Jehovah boaa nyimpa no do.

8. Ibesi dɛn aboa wo suanyi ma ɔaadɔ Jehovah?

⁸ Boa wo suanyi no ma ɔndɔ Jehovah. Ibesi dɛn ayɛ dɛm? Hwehwɛ ho kwan a edze bɔtwe adwen esi Jehovah no su ahorow no do. Boa wo suanyi no ma onhu dɛ Jehovah yɛ enyigye Nyankopɔn, na ɔboa hɔn a wɔdɔ no no. (1 Tim. 1:11; Heb. 11:6) Ma osuanyi no nhu dɛ sɛ ɔdze dza orusũa no yɛ edwuma a, obenya do mfaso. Afei kyerɛkyerɛ mu kyerɛ no dɛ iyi yɛ kwan a Jehovah refa do ada no edzi dɛ ɔdɔ no. (Isa. 48:17, 18) Aber a ɔdɔ a wo suanyi no wɔ ma Jehovah reyɛ kɛse no, ɔbɛyɛ mberɛw ama no dɛ ɔbɛyɛ nsesa biara a ohia no.​—1 John 5:3.

9. Dɛ mbrɛ Mark 10:29, 30 kyerɛ no, ebɛnadze na ɔbɔboa suanyi bi ma ɔdze ndzɛmba aabɔ afɔr na oeetum abɛyɛ osuanyi a woenuma no?

⁹ Sɛ osuanyi bi botum afata dɛ wonuma no a, ɔsɛ dɛ ɔdze ndzɛmba ahorow bi bɔ afɔr. Tse dɛ ɔdzefo a yeedzi kan akã no ho asɛm no, Bible esuafo binom wɔ hɔ a bi a no ho behia dɛ wɔdze honam afamu ndzɛmba bi bɔ afɔr. Sɛ ɔba no dɛ edwuma a wɔyɛ no nnye Bible mu ngyinadonsɛm nnhyia a, bi a no ho behia dɛ wogyaa na wɔhwehwɛ fofor. Bi a ɔsɛ dɛ hɔn mu pii gyaa anyɛnkofo a wɔnnsom Jehovah no hɔn ekyir dzi. Binom so wɔ hɔ a obotum aba dɛ hɔn ebusuafo a wɔmmpɛ Jehovah Adasefo asɛm no bɔpow hɔn. Jesus kãa dɛ obotum ayɛ dzen ama binom dɛ wɔdze ndzɛmba a ɔtsetse dɛm bɔbɔ afɔr. Naaso ɔbɔɔ anohoba dɛ hɔn a wobedzi n’ekyir no nsa rinnsi famu. Jehovah bɛma woenya sunsum afamu ebusuafo bi a wɔdodɔ hɔnho. (Kenkan Mark 10:29, 30.) Ibesi dɛn aboa wo Bible suanyi ma oeenya akyɛdze a ɔka akoma yi do mfaso?

10. Ebɛnadze na isũa fi asɛm a Manuel kãe no mu?

¹⁰ Fa wo suanyi no nyɛnko. No ho hia dɛ ebɛma wo suanyi no ehu dɛ edwen noho. Ebɛnadze ntsi a? Hom mma yɛnhyɛ asɛm bi a Manuel a ɔwɔ Mexico kãe no nsew. Ɔrekã ber a nna ɔyɛ Bible suanyi ho asɛm no, ɔkãa dɛ: “Aber biara a yebosũa adze no, nna me kyerɛkyerɛfo no dzi kan bisa mbrɛ moho tse ana. Nna ɔma m’akoma tɔ me yamu ntsi nna mutum nye no bɔ nsɛm afofor ho nkɔmbɔ. Nna muhu dɛ ɔdwen moho papaapa.”

11. Sɛ egye ber nye wo Bible suanyi bɔ a, ɔbɔboa no dɛn?

¹¹ Dɛ mbrɛ Jesus gyee ber na ɔnye n’ekyirdzifo no bɔe no, woara so gye ber na enye wo Bible esuafo no mbɔ. (John 3:22) Sɛ ɔbɛyɛ yie a, to nsa frɛ wo Bible suanyi a orinya nkɔenyim no na enye no nto nsa ndzidzi anaa enye no nhwɛ JW Broadcasting^® dwumadzi no bi. Bi a wo suanyi no enyi bɛgye nsato a ɔtse dɛm ho nkanka ber a afahyɛ ahorow bi rokɔ do na osiandɛ ɔmmfa noho nnhyɛ mu ntsi ɔtse nka dɛ ɔayɛ ankonam no. Kazibwe a ɔwɔ Uganda  kãa dɛ: “Musũaa Jehovah ho adze pii wɔ me Bible adzesua no mu, na dɛmara so na mubotum akã dɛ moho adagyer a me kyerɛkyerɛfo no nyae no so maa musũaa Jehovah ho adze pii. Muhun mbrɛ Jehovah si dwen no nkorɔfo ho nye enyigye a wɔwɔ no. Nna dza morohwehwɛ wɔ m’asetsena mu ara nye no.”

12. Ebɛnadze ntsi na ɔsɛ dɛ yɛnye adawurbɔfo afofor kɛyɛ hɛn Bible adzesua?

¹² Enye adawurbɔfo afofor nkɛyɛ Bible adzesua no. Ɔtɔ da a, yebotum atse nka dɛ sɛ hɛn nko yɛkɔ hɔ anaadɛ yɛnye ɔdawurbɔfo kor no ara kɔ hɔ aber biara a, oye. Ɔwɔ mu dɛ iyi ne yɛ bɛyɛ mberɛw ama hɛn dze, naaso sɛ ɔyɛ na yɛnye adawurbɔfo afofor so kɔ a, hɛn Bible suanyi no benya do mfaso kɛse. Dmitrii a ɔwɔ Moldova no kãa dɛ: “Nna dawurbɔfo biara a me kyerɛkyerɛfo nye no ba mo hɔ no kyerɛkyerɛ nsɛm mu wɔ kwan soronko do. Iyi boaa me ma muhun mbrɛ medze dza murusũa no bedzi dwuma wɔ tsebea ahorow mu. Afei so ɔno boaa me ma ber a mokɔr asafo nhyiamu a odzi kan no, osiandɛ nna minyim enuanom piinara dadaw ntsi nna memmfɛr kɛse.”

13. Ebɛnadze ntsi na ɔsɛ dɛ eboa wo Bible suanyi ma ɔhyɛ asafo nhyiamu ase?

¹³ Boa wo Bible suanyi no ma ɔnkɔ asafo nhyiamu. Ebɛnadze ntsi a? Osiandɛ Jehovah ahyɛ n’asomfo dɛ wonhyia mu; ɔka hɛn som ho. (Heb. 10:24, 25) Iyi da nkyɛn a, hɛn nuanom a yɛnye hɔn wɔ asafo no mu no yɛ hɛn ebusuafo a yɛnye hɔn som Nyankopɔn. Sɛ yehyia mu wɔ asafo nhyiamu ase a, ɔtse dɛ mbrɛ yɛwɔ fie na yɛato nsa ridzi edziban dɛɛdɛw bi. Sɛ eboa wo Bible suanyi no ma ɔhyɛ asafo nhyiamu ase a, ɔkyerɛ dɛ anamɔn a no ho hia papaapa ama obi aafata dɛ wonuma no no, aboa no ma oetu no mu kor. Naaso obotum ayɛ dzen ama no dɛ obotu anamɔn a ɔtse dɛm. Ebɛn kwan do na Ibotum Enya Enyigye Daa! buukuu no bɔboa wo suanyi no ma oeedzi nsɛndzendzen a obehyia no do?

14. Yebesi dɛn ekenyan hɛn Bible esuafo ma wɔaaba asafo nhyiamu?

¹⁴ Fa Ibotum Enya Enyigye Daa! buukuu no n’adzesua 10 no kenyan wo suanyi no. Ansaana woribeyi buukuu yi edzi no, wɔmaa adawurbɔfo a hɔnho akokwaa sɔe hwɛe, na wotumii dze boaa hɔn esuafo ma wɔbaa asafo nhyiamu. Iyi nnkyerɛ dɛ tweɔn araa kesi adzesua 10 no ansaana ato nsa afrɛ wo Bible suanyi no aba asafo nhyiamu. To nsa frɛ no ntsɛmara dɛ ɔmbra asafo nhyiamu, na yɛ dɛm aber biara. Bible suanyi biara na ne haw. Dɛm ntsi hu wo suanyi no ne haw, na hwɛ dɛ ibotum ayɛ biribi dze aboa no a. Bi a ɔbɛgye mber kakra ana ɔaaba asafo nhyiamu. Ɔba dɛm a, mma w’abaw mu mmbu. Mbom nya abotar na kɔ do ara to nsa frɛ no.

15. Ebɛn ndzɛmba na bi a ɔbɛma suro aka wo suanyi?

¹⁵ Bi a ebɛkaa dɛ ber bi nna woara so suro dɛ ebɛba abɛyɛ Jehovah Adasefo no mu kor. Bi a nna etse nka dɛ irunntum nndzi dase wɔ bagua mu da. Anaadɛ nna isuro dɛ bi a w’ebusuafo anaa w’anyɛnkofo bɔsoɛr etsia wo. Sɛ nna dɛm na ɔtse wɔ w’afamu a, ɔno ɔsɛ dɛ etse wo Bible suanyi no ase. Jesus kãa dɛ suro a ɔtse dɛm botum aka binom. Naaso otuu n’ekyirdzifo no fo dɛ ɔnnsɛ dɛ wogyaa Jehovah no som osian suro ntsi. (Matt. 10:16, 17, 27, 28) Ebɛn kwan do na Jesus boaa n’ekyirdzifo no ma wodzii suro a nna wɔwɔ no do? Na ibesi dɛn esũasua dza ɔyɛe no?

16. Ibesi dɛn atsetse wo suanyi no ma ɔaakã dza orusũa no ho asɛm akyerɛ afofor?

¹⁶ Tsetse wo suanyi no nkakrankakra ma ɔnkã dza orusũa no ho asɛm nkyerɛ afofor. Obotum aba dɛ aber a Jesus somaa n’esuafo no dɛ  wɔnkɛkã asɛm no, hɔn akoma tui. Naaso Jesus boaa hɔn. Ɔkyerɛɛ hɔn beebi a wɔnkɛkã asɛm no, nye asɛm a wɔnkã. (Matt. 10:5-7) Ibesi dɛn esũasua Jesus? Boa wo suanyi no ma onhu beebi a obotum akã asɛm no. Dɛ nhwɛdo no, bisa no dɛ bi a onyim obi a ɔno so botum enya mfaso efi Bible mu nokwasɛm pɔtsee bi do a. Afei boa no ma onsiesie asɛm a ɔbɛkã, na kyerɛ no kwan tsiabaa a ɔbɛfa do akã asɛm no. Sɛ ɔbɛyɛ yie a enye no nsusu “Binom Kã Dɛ” nye “Bi A Obi Bebisa Dɛ” afã a ɔwɔ Ibotum Enya Enyigye Daa! buukuu no mu no ho, na boa no ma onhu mbrɛ obesi ayɛ no. Sɛ ereyɛ dɛm a, boa wo suanyi no ma onhu mbrɛ obotum efi enyidahɔ mu dze Bible no ama mbuae a ne ntseasee nnyɛ dzen.

17. Ibesi dɛn dze Matthew 10:19, 20, 29-31 aboa wo suanyi no ma ɔdze noho aato Jehovah do?

¹⁷ Boa wo suanyi no ma ɔmfa noho nto Jehovah do. Jesus maa n’esuafo no awerɛhyɛmu dɛ Jehovah dɔ hɔn, ntsi ɔbɔboa hɔn. (Kenkan Matthew 10:19, 20, 29-31.) Ma wo suanyi no nnya awerɛhyɛmu dɛ Jehovah bɔboa ɔno so. Sɛ enye no bɔ botae a ɔwɔ ho mpaa a, ebɔboa no ma ɔdze noho aato Jehovah do. Franciszek a ɔwɔ Poland no kãa dɛ: “Nna me kyerɛkyerɛfo no taa kã mo botae ho asɛm wɔ ne mpaabɔ mu. Ber a muhun mbrɛ Jehovah buaa me kyerɛkyerɛfo no ne mpaabɔ no, ɔkaa me ma ntsɛmara mehyɛɛ ase dɛ morobɔ mpaa. Aber bi minyaa edwuma fofor, ntsi nna ɔwɔ dɛ meserɛ kwan a medze bɔkɔ asafo nhyiamu nye ehyiadzi, na muhun dɛ Jehovah boaa me papaapa.”

18. Jehovah tse nka dɛn wɔ nkyerɛkyerɛ edwuma a Christianfo yɛ no ho?

¹⁸ Jehovah dwen hɛn Bible esuafo ho papaapa. Ohu mbɔdzen a Christianfo akyerɛkyerɛfo robɔ dze aboa nkorɔfo ma wɔaatwe abɛn no no. (Isa. 52:7) Sɛ innyi Bible suanyi seseiara mpo a, ibotum nye adawurbɔfo afofor akɛyɛ hɔn adzesua, na aaboa Bible esuafo no ma woeenya nkɔenyim na wɔaafata ama enuma.