1. Éé ní e gbò nyòòne nvéè Jíízọ̀s beè kọ gbòa á naa ẽ́?

KÀ GÃ́BUG gbò gbálà nè gbò bia beè kil Jèrúsalẹ̀m. Ba beè aa kele-kele dó vaá ló kele-kele dém bel. Nu bọ̀ọ̀ló beè naaá deeá. Sìgà pá Júù beè dààmà togó gè ló dém bel e gbò e bà aa kele-kele dóá dã́! A beè palàge bọọ́ vá ló. Nú e pá Júù géè kọ́ nè vaá nè nú e neǹ tóm Pítà kọ́ beè dú kà agẹ bá nu ge nvèè kpíí ló. Gbòa beè nó kọọ̀ bàé láá duuàẹ̀ be bà íèè zìgà mm̀ Jíízọ̀s Kráìst. Belá beè palàge tọá vá ló, naa ní e bà bĩ́íná kọọ̀: “Éé ní e beele é náa é?” Pítà à aalá nèva kọọ̀: “Buù bọ̀ì é íè ge . . . diiai múú.”—Tóm 2:37, 38, NW.

2. Éé ní eé ló bel boo mm̀ nakà togó belí é? (Ẹ̀b fùtó ea di boo kóó kpáí.)

² Nú ea beè kpáá naaá beè dú nu bọ̀ọ̀ló. Nú ea é tóólá 3,000 nen beè dììa múú vaá dú gbò nyòòne nvéè Kráìst deeá. Níí ní ea beè dú dààmà togó tóm ge naa kọọ̀ gbò nen á nyoone nvéè Kráìst, e Jíízọ̀s beè kọọ̀ pá a gbò nyòòne nvée á naaá ẽ́. Pá a gbò nyòòne nvée dì e bà gé sí nágé tómá tẹlẹ̀ kátogóí. Deè nieí, née é láá noòmà nuù nen vaá à dììa múú tẽ̀ènè deeá. Àé láá tú sìgà ẽ́, gbáá àbèè à èl ló vó besĩ́ nen ea gé nó Kpá Káí kálá sìm tùlà ge dììa múú. Dì belí bé eo nyímà naa, tóm di ló gè naa kọọ̀ nen á nyoone nvéè Kráìst, be ò ié nen eo gé noòmà nu. Mm̀ nakà togó belí, èé ló bel boo nú eé láá naa ge nvèèmà bá nè nen e ólò noòmà Kpá Káí kọ á láá sìm tùlà ge dììa múú.

3. Dẹ̀ẹ̀a boo nú ea di mm̀ kpá Máátìù 28:19, 20, éé ní e nen ea gé nó Kpá Káí é íè ge naa kọbé à sim tùlà ge dììa múú ẽ́?

³ Besĩ́ nen e ólò noòmà Kpá Káí kálá dììa múú, àé íè ge tú gbò nú ea gé nó lọl mm̀ Kpá Káí siimá tóm. (Bugi Máátìù 28:19, 20.) Tṍó e nen ea gé nó Kpá Káí tú gbò nú ea gé nó  siimá tóm, à bélí “nen nyìmà nu” e Jíízọ̀s beè kọ́ mm̀ a bel dòòle ló kọ à do díí kẽè a tọ boo demá. (Máát. 7:24, 25; Lúùk 6:47, 48) Mósĩ́ deè ní eé láá nvèè bá nè nen ea gé nó Kpá Káí kọ á tú gbò nú ea gé nó siimá tóm ẽ́? Naanii èé ló bel boo taà kà nú eé láá naa.

4. Mósĩ́ deè ní eé láá nvèè bá nè nen ea gé nó Kpá Káí kọ á láá sìm tùlà ge dììa múú ẽ́? (Ẹ̀b nàgé ńkpó ea kọ́ọ̀ “ Nvèè Bá Nè Nen Eo Ólò Noòmà Kpá Káí Kọ Á Ié Gbò Nú Ea Noo Sẹ̀ẹ̀a Sĩ́ Vaá Teá Tùlà.”)

⁴ Nvèè bá nèe kọ á ié gbò nú ea noo sẹ̀ẹ̀a sĩ́. Éé ní ea náa vaá à bọ́ló kọ ó naa vó é? Bugi togó boo nakà nu dòòle lóí: Be ò gé ọ́bví faà sí kpã́á deè kyẽè, òó láá beeláfùl ge zẹ́ẹ́ elá gã́ èèlè tṍó eo ni ọ́bví begè dẽe. Àé náa kọọ̀ lóó ni á gá ọọ, boo béè kọọ̀ kiẽ́e eo gé kil náa é bọọgẹ̀ dú ná kpã́á. Mm̀ tẽ̀ènè sĩ́ deèá, tṍó e nen ea gé nó Kpá Káí noo nu sẹ̀ẹ̀a sĩ́ vaá à láá teá tùlà, àé mon kọọ̀ náa tavàlà ge noo gè dììa múú. Tú ńkpó ea togó bel kọ́ọ̀ “Nú Eo Sẹẹ̀a Sĩ́” ea di mm̀ kpá ea kọlà Dé Kpéè Ló Dùm Dọ̀ọ̀mà Dè-dè! nvèèmà bá nè nen eo ólò noòmà Kpá Káí kọ á sìm kilsĩ́. Tṍó e buù kà nu gè nò ni íná kùbmà, baatẽ́ nèe bé e gbò nu sẹẹ̀a sĩ́á é nveè bá nèe kọ á tú gbò nú ea ni nó siimá tóm naa. Be ò íè dõòna kà nu sẹ̀ẹ̀a sĩ́ eo gbĩ́ì kọọ̀ nen eo ólò noòmà Kpá Káí á teá tùlà, òó láá emí boo gbṍó ea di kè kẽè “Ńdõòna kà.” Olòó tú ńkpóí zọ̀ọ̀mà nen eo ólò noòmà Kpá Káí tenmá boo gbò nu sẹ̀ẹ̀a sĩ́ ea é láá vàlẹ̀ bá teá tùlà nè gbò ní ea é túe gã́bug tṍó bá.

5. Dẹ̀ẹ̀a boo nú ea di mm̀ kpá Máàk 10:17-22, éé ní e Jíízọ̀s beè kọọ̀ neǹ ménéá á naa ẽ́, vaá ló éé?

⁵ Nvèè bá nèe kọ á nyaaná a sĩ́deè tõò dùm. (Bugi Máàk 10:17-22.) Jíízọ̀s beè nyimá kọọ̀ àé tavala ló neǹ méné ge oo dénè a ìènù. (Máàk 10:23) Sõò, Jíízọ̀s beè kọ́ nè gbálàa kọ á nyaaná a sĩ́deè tõò dùm. Ló éé? Boo béè kọọ̀ Jíízọ̀s beè vùlèe. Sìgà  tṍó, èé láá òòà aa ló gè siè kpóó ló gbò e ólò noòmà Kpá Káí, boo béè kọ è ẹbvì kọ à gáà kpènà ló gè nyaaná a tõò dùm. Àé láá tú tṍó bá sìgà nen ge nyaaná a nómá sĩ́deè tõò dùm vaá tõó dùm ea lelà. (Kọ́l. 3:9, 10) Sõò bé eo valẹ̀ bá kọ́ nú ea bọ́ló kọọ̀ nen eo ólò noòmà Kpá Káí á sí tóm boo naa, níà bé ea é valẹ̀ bá sí tóm boo naa ẽ́. Ò zógè kọọ̀ ò ẹ̀bvìè nú ea kilíé ló tṍó eo zọọ̀ẹ loá bel naa vó.—Ps. 141:5; Pró. 27:17.

6. Éé ní ea náa vaá èé tú gbò bíb ea é náa kọ é nyimá nú ea di bùlà nen siimá tóm ẽ́?

⁶ À palàge dú bíi kọ é bĩiná bíb ea é náa kọ é nyimá nú ea di bùlà nen e ólò noòmà Kpá Káí. Ge bĩiná gbò bíbvá é náa kọ ó nyimá nú e nen eo ólò noòmà Kpá Káí dã́tẽ́ ló vaá ziga ló. Be ò ólòó naa vó, àé válí ni ló ge zọ̀ẹ loá bel boo gbò gá ea tàvàlàẹ́ ló ge dã́ ból ló. Gã́bug bíb ea é náa kọ ó nyimá nú ea di bùlà nen di mm̀ kpá ea kọlà Dé Kpéè Ló Dùm Dọ̀ọ̀mà Dè-dè. Dì belí nu dòòmà bá, 04 nu ge nò, fáálá bíb ea kọ́ọ̀: Ò bulà kọọ̀ à ólò tõó ló Jìhóvà naa vàẹ tṍó eo túù a bée kolmáe ẽ́?” 09 nu ge nò, fáálá bíb ea kọ́ọ̀: “Gbò éé ní ea é léémá ni gè tã̀àgã ló Bàrì kilma ló é?” Túá tṍó, àé láá tàvala ló nen eo ólò noòmà Kpá Káí ge aalá gbò bíbví. Òó láá nvèè bá nèe kọ á bugi togó boo gbò dọ̀ Kpá Káí nè tã́à nu ea di mm̀ kpáá.

7. Mósĩ́ deè ní eé láá tú gbò nú ea beè naaá ló dõòna gbò siimá tóm leevè e?

⁷ Tṍó e nen eo ólò noòmà Kpá Káí ni dã́tẽ́ ló nú ea dú bíi kọ á naa, sièe kpóó ló kọ á naa vó tení dú ló gè tú gbò nú ea beè naaá ló nen nvèèmà bá nèe. Dì belí nu dòòmà bá, be à ólò tàvàlàẹ́ ló ge sí nònù dénè dee, òó láá zogèe vídiò ea kọlà Jehovah Cared for Me, ea di kè kẽè ge “Kpáá Gbĩ́ Tẽ́ Ló” ea di mm̀ 14 nu ge nò. Mm̀ gã́bug nu ge nò ea di mm̀ kpá ea kọlà Dé Kpéè Ló Dùm Dọ̀ọ̀mà Dè-dè! òó mon gã́bug nú ea beè naaá ló gbò nen, kè kẽè “Kpáá Nó Bọ̀ọ̀vẹ̀” àbèè kè kẽè ge “Kpáá Gbĩ́ Tẽ́ Ló.” * Ọẹ̀ dẽe kọbé nóo túù nen eo ólò noòmà nu doolé ló dõòna nèn, tení dú ló gè kọọ̀: “Be ẹlẹ beè láá naa olo é láá naa nagé.” Aa ló kọ nen eo ólò noòmà nu á beeláfùl naa vó. Kọ́ gbò nú ea beè nvèè bá nè nen ea di mm̀ vídiòá kọ á tú gbò nú ea nó lọl mm̀ Kpá Káí siimá tóm. Be à sẹlẹ, òó láá kọ́ dọ̀ Kpá Káí àbèè nú ea beè naa ea nvèè bá nèe. Be à válí, ò nveè kà m bé e Jìhóvà beè nvèè bá nè nená naa.

8. Mósĩ́ deè ní eé láá nvèè bá nè nen e gé nóòmà Kpá Káí kọ á vùlè Jìhóvà ẹ?

⁸ Nvèè bá nè nen eo ólò noòmà Kpá Káí kọ á vùlè Jìhóvà. Mósĩ́ deè e? Gbĩ́ gbò sĩ́deè eo é láá nvèèmà bá nè nen eo ólò noòmà Kpá Káí kọ á nyimá ló gbò kpãà Jìhóvà. Nvèè bá nèe kọ á dã́ ból ló kọọ̀ Jìhóvà dú Bàrì ẹ́ẹ́ nyíe ea ólò nvèè bá nè gbò e bà vulèe. (1 Tím. 1:11; Híb. 11:6) Naa kọọ̀ nen eo ólò noòmà Kpá Káí á nyimá bé e gè tú gbò nú ea ni nó siimá tóm é dọ bélè nèe naa, vaá ò baatẽ́ nèe kọ gbò nuí zógè kọọ̀ Jìhóvà vulèe. (Àìz. 48:17, 18) Bé e nen eo gé nóòmà Kpá Káí kilsĩ́ ge vùlè Jìhovà naa, níà bé ea é gbĩ́ gè nyaaná a sĩ́deè tõò dùm naa ẽ́.—1 Jọ́ọ̀n 5:3.

9. Dẹ̀ẹ̀a boo nú ea di mm̀ kpá Máàk 10:29, 30, éé ní ea é láá nvèè bá nè nen kọ á sọ̀bá sìgà nu kọbé à láá dììa múú ẽ́?

⁹ Kọbé nen ea gé nó Kpa Káí láá sìm tùlà ge dììa múú, à dú bíi kọ á sọ̀bá gã́bug  nu. Dì belí neǹ méné e beè zẹ́ẹ́ kọ́ nú ea kil lóá, àé dú bíi kọọ̀ gbò e ólò noòmà Kpá Káí á sọ̀bá sìgà nu. Beè tóm e bà gé sí náa gbááá ló gbò nòòkúu ea di mm̀ Kpá Káí, bàé láá aa ló gé gbĩ́ dõòna kà tóm. Gã́bug nen é láá kùb ge zọ̀ gbò kóò e bà náa vulè Jìhóvà naaá nu. Kilma ló sìgà gbò, pá ba tọ e bà náa vulè Gbò Neǹ Ditõ̀ò Jìhóvà é láá kìn va. Jíízọ̀s beè kọọ̀ àé tavala ló sìgà gbò ge sọ̀bá gbò nuí. Sõò a beè zìgà kọọ̀ náa é kẹlẹ̀ẹ̀ gbò e bà nyoonìèe nvée. Jìhóvà é né va kpẽ́ tení dú ló gè nè va pá tọ e bà íe vulè. (Bugi Máàk 10:29, 30.) Mósĩ́ deè ní eo é láá nvèè bá nè nen eo ólò noòmà Kpá Káí kọ á ié bélè lọl ló nakà lé nènùí ẽ́?

10. Éé ní eo nóò lọl ló nú ea beè naaá ló Manuel ẹ?

¹⁰ Bã̀àà kóò nen eo ólò noòmà Kpá Káí. À palàge dú bíi gè naa kọọ̀ nen eo ólò noòmà Kpá Káí á nyimá kọọ̀ ò bulà nú ea kilìèe ló. Ló éé? Nvèè kpíí ló nú e Manuel, ea ólò tõó Mexico kọ́. Ge kẽ̀èa boo bé e nen ea beè noòmàe Kpá Káí beè nvèè bá nèe naa, à kọ́ọ̀: “Besĩ́ è kálá dààmà togó gè nó nu, à ólò bĩ́ínám bé em dì naa. À ólò naa kọọ̀ lóóm á dĩ̀ìnà vaá sọ̀tọ́ deè kọ ḿ ló bel kilma ló kọ̀láá kà nú ea gé tãagém. M beè nyimá kọọ̀ à palàge ẹ̀b nú ea kilím ló.”

11. Mósĩ́ deè ní e gbò e ólò noòmà Kpá Káí é láá ié bélè lọl ló gè tú gã́bug tṍó dììmàí ló é?

¹¹ Ié tṍó nè gbò eo ólò noòmà nu, dì belí bé e Jíízọ̀s beè ié tṍó nè pá a gbò nyòòne nvée naaá. (Jọ́ọ̀n 3:22) Be à válí, kolí nen eo ólò noòmà Kpá Káí kilma o be vaá ò gbái õi tíì àbèè ge deái gyã́á, àbèè ò ẹbvii ene kà broadcast ea ólò sẹ̀ẹ̀a buù ẽ́. Nyíè nen eo ólò noòmà nu é palàge ẹẹ be ò kólíe tṍó e pá ba tọ gé sẹlẹ sẹ̀lẹ̀nù e bè náa gbááá ló Kpá Káí, tṍó ea tõóé ló kọ à dúè áá ẹ̀ẹ̀. Kazibwe ea ólò tõó Uganda kọ́ọ̀: “M beè nó gã́bug nú ea kil ló Jìhóvà tení dú ló gè tú gã́bug tṍó dììma ló nen ea ólò noòmàm nu belí bé em ólò naa tṍó em gé nó nu. M beè mòn bé e Jìhóvà ólò ẹ̀b nú ea kil ló pá a gbò naa, nè bé e nyíé  va ólò ẹẹ naa. Níà nú em beè gbĩ́ kọ á naaá ḿ ló mm̀ dùm ẽ.”

12. Éé ní ea náa vaá èé fáálá kele-kele nen tṍó e gé nóòmà kpá Káí nen ẽ́?

¹² Faalá kele-kele nen siimá tṍó eo é gé noòmà nu. Sìgà tṍó, àé láá léémái kọọ̀ áá bẹ̀ì é sí tṍó eé gé noòmà nu, àbèè ge olòó faalá áá enè neǹ vígà siimá. Àé láá leemái gè olòó naa vo, sõò àé palàge nvèè bá nè nen e ólò noòmà Kpá Káí tṍó e fáàlà kele-kele nen siimáé ló. Dmitrii, ea ólò tõó Moldova kọ́ọ̀: “Buù neǹ kọ̀ kpẹ̀a ea dú tṍó e gé nóá nu ólò baatẽ́ nu mm̀ sĩ́deè ea palàge kpe ló nen. Vó beè naa kọ ḿ nyimá bé em é láá tú gbò nú em géè nòa siimá tóm mm̀ kele-kele sĩ́deè naa. Kẹ́ẹ náa beè bọọgẹ̀ siím túá deé em síì nònù, boo béè kọ m nyímá ló gã́bug pá vígà.”

13. Éé ní ea náa èé íè ge nvèè bá nè nen e ólò noòmà Kpá Káí kọ á sí nònù ẽ?

¹³ Nvèè bá nè nen eo ólò noòmà Kpá Káí kọ á sí nònù. Ló éé? Boo béè kọọ̀ Jìhóvà ne log pá a gbò kọ bàá olòó bõoná; à dṹùnà báàsĩ́ ló bẹẹ fã̀. (Híb. 10:24, 25) Gba nágé ló vó, gbò vígà págbálà nè pábia mm̀ bõ̀ònatõ̀ò dì belí pá bẹẹ tọ. Tṍó e dìvá ló gbẹá nònù, à bélí kọ è gé gbá deá lé gã́ gyã́á. Tṍó eo nveè bá nè nen eo gé nóòmà Kpá Káí kọ á sí nònù, ò gé nveè bá nèe kọ á naa nú ea palàge dú bíi kọbé à láá dììa múú. Sõò àé láá tàvàlàẹ́ ló gè dààmà togó gè sí nònù. Mósĩ́ deè ní e kpá ea kọlà Dé Kpéè Ló Dùm Dọ̀ọ̀mà Dè-dè! é láá nvèè bá nè nen eo ólò noòmà Kpá Káí kọ á láá bé èlbá íb gbò ànà-ànàá ẽ́?

14. Mósĩ́ deè ní eé láá nvèè bá nè nen e ólò noòmà Kpá Káí kọ á sí nònù ẽ?

¹⁴ Tú ní ea égè 10 kà nu ge nò ea di mm̀ kpá ea kọlà, Dé Kpéè Ló Dùm Dọ̀ọ̀mà Dè-dè! nvèèmà bá nè nen eo ólò noòmà Kpá Káí kọ á ié tàn. Besĩ́ bà kalá tú kpáí tẹlẹ bàlà kẽ, ba beè kọ́ nè sìgà pá vígà kọ bàá zọ̀ gbò e bà ólò noòmà nu, noá 10 nu ge nò ea di mm̀ kpáí. Ba beè kọọ̀ à palàge dú lé vaá à nveè bá nè gbò e bà ólò noòmàè Kpá Káí kọ bàá sí nònù. Sõò, ó gá elá dọ̀ọ̀mà tṍó eo é ínaí boo 10 kà nu ge nò ea di mm̀ kpáí besĩ́ ò kálá kolí nen eo ólò noòmà Kpá Káí kọ á sí nònù. Kolíe kọ̀láá tṍó ea válí, vaá ò ólòó naa vó lee. Gbò e ólò noòmà Kpá Káí íe kele-kele nú e bà gé téní bá. Vóà naa, palàge pãane tṍ tṍó e nen eo ólò noòmà Kpá Káí gé kọ́ gbò a bíi nè ni kọbé ò nyímá bé eo é láá nvèè bá nèe naa. Lóó ni á gá ọọ be náa valẹ̀ bá sí nònù. Ĩ̀ìmà vaá ò ólòó kolíe.

15. Éé ní ea é láá siimà pọ̀ gbò e ólò noòmà Kpá Káí é?

¹⁵ É kọ ò kẽ̀èà boo bé e pọ̀ beè zẹ́ẹ́ síi ni naa besĩ́ ò kalá dú enè Neǹ Ditõ̀ò Jìhóvà? Be à sẹlẹ, pọ̀ beè olòó síi ni kọ nóo é láá kọẹ̀ kpẹ̀a. Àbèè ge siiá pọ̀ kọọ̀ pá bọọ tọ àbèè pá o kóò é náa uulìè ní boo. Beè vó, òó láá dã́ ból ló bé ea é tõó ló nen eo ólò noòmà Kpá Káí naa. Jíízọ̀s beè kọọ̀ íb gbò pọ̀í é láá sii sìgà nen. Vóà naa, a beè siè kpóó ló gbò e bà géè nyoonée nvée kọ bàá gá zìgà kọọ̀ síìà pọ̀ á òòmà va lọl ló gè fã̀ Jìhóvà. (Máát. 10:16, 17, 27, 28) Mósĩ́ deè ní e Jíízọ̀s beè nvèè bá nè gbò e bà ólò nyoonée nvée kọ bàá bé èlbá síìà pọ̀ ẹ? Vaá mósĩ́ deè ní e olo é láá nó a nu dòòmà bá ẹ́?

16. Mósĩ́ deè ní eé láá bumá nen e ólò noòmà Kpá Káí kọ á kọ́ nú ea ziga ló nè dõòna gbò e?

¹⁶ Kilsĩ́ gè bumá nen eo ólò noòmà Kpá Káí kọ á kó nú ea ziga ló nè dõòna gbò. Pọ̀ beè láá sii gbò nyòòne nvéè Jíízọ̀s tṍó ea lẹẹlà va kọ bàá gé kọ́ kpẹ̀a. Sõò Jíízọ̀s  beè nvèè bá nèva tení dú ló gè kọ́ kiẽ́e bàé kọ́ kpẹ̀a nè nú e bàé kọ́ kpẹ̀a kilma ló. (Máát. 10:5-7) Mósĩ́ deè ní eo é láá nó Jíízọ̀s e? Nvèè bá nè nen eo ólò noòmà Kpá Káí kọ á nyimá kiẽ́e ea é láá kọ́ kpẹ̀a. Dì belí nu dòòmà bá, bĩináe be à nyimá ló nen ea é léémáe gè nó kà kà bel ea di mm̀ Kpá Káí. Tṍóá ò gbóó nvèè bá nèe kọ á nyimá nu gè kọ̀ tení dú ló gè zogèe bé ea é láá dààmà togó gè zọ̀ nen loá bel boo Kpá Káí naa. Tṍó ea válí, òó láá zọ̀ẹ tení boo bá gè zọ̀ọ̀mà nen loá bel boo Kpá Káí ea di mm̀ kpá ea kọlà, Dé Kpéè Ló Dùm Dọ̀ọ̀mà Dè-dè! ea di kè kẽè kpò ea kọ́ọ̀: “Sìgà Gbò Kọ́ọ̀” nè “Sìgà Nen É Láá Bĩiná Kọọ̀.” Tṍó eo gé náa vó, ká bùlà gbẹẹ́ boo gè bumá nen eo ólò noòmà Kpá Káí kọ á láá tú Kpá Káí kọọmá kpèa mm̀ sĩ́deè ea válí nè ge aalá bel boo bá ea bọ́ló.

17. Mósĩ́ deè ní eé láá tú nú ea di mm̀ kpá Máátìù 10:19, 20, 29-31 nvèèmà bá nè nen e ólò noòmà Kpá Káí kọ á dẹlẹ nyíé boo Jìhóvà ẹ?

¹⁷ Nvèè bá nèe kọ á dẹlẹ nyíé boo Jìhóvà. Jíízọ̀s beè kọ́ nè gbò e bà géè nyoonée kọọ̀ Jìhóvà é nveè bá nèva boo béè kọ à vulè va. (Bugi Máátìù 10:19, 20, 29-31.) Kọ́ nè nen eo ólò noòmà Kpá Káí kọọ̀ Jìhóvà é nveè nàgé bá nè ẹlẹ. Òó láá nvèè bá nèe kọ á dẹ̀ẹ̀a boo Jìhóvà tení dú ló gè zọ̀ẹ tã̀àgã ló Bàrì kilma ló gbò nú ea noo sẹ̀ẹ̀a sĩ́. Franciszek ea ólò tõó Poland kọ́ọ̀: “Nen ea ólò noòmàm nu ólò kọ́ gbò nú em sẹẹà sĩ́ ge naa mm̀ a tã̀àgã ló. Tṍó em monì bé e Jìhóvà áálá gbò tã̀àgã lóá naa, m beè gbóó dààmà togó gè tã̀àgã ló Bàrì. M beè mòn bé e Jìhóvà nveè bá nèm naa tṍó em beè bàn tṍó boo bẹẹ tóm kọbé m̀ láá sí bẹẹ gbò nònù nè pọ̀bkà bõ̀ònaló.”

18. Tóm gè noòmà nuù gbò nen e pá vígà gé síí ólò tõó ló Jìhóvà naa vàẹ?

¹⁸ Jìhóvà ólò palàge ẹ̀b nú ea kil ló gbò e ólò noòmà Kpá Káí. À nyímá bé e pá vígà gé piìga boo gè nvèè bá nè gbò nen kọ bàá tõo bãèé ló naa, vaá à vulè va ló tóm e bà gé sí. (Àìz. 52:7) Be nóo íè nen eo gé nóòmà Kpá Káí kátogóí, òó láá nvèè bá nè gbò e bà gé nó Kpá Káí kọ bàá sìm kilsĩ́ vaá dììa múú tení dú ló gè zọ̀ pá vígà gbá tọ tṍó e bàé gé noòmà va nu.