1. Jezuchea xisamnim ektthaim zalʼlea zaitea lokank kitem sanglem?

JERUSALEMANT veg-vegllea desam thaun zaite lok ektthaim zalʼle. Te veg-veglleo bhaso uloitale. Punn ojapachem mhunnttlear, Jezuche xis tanchea veg-vegllea bhasamnim ulounk xoktale ani tannim dilʼlo sondex lokanchea kallzak laglo. Tor tannim dilʼlo sondex kitem aslo? Jezucher bhavarth dovorlear tim salvar zaunk xoktat mhunn tankam sanglolem. Tem aikon tancher itlo probhav poddlo ki tannim vicharlem: “Ami kitem korchem?” Tednam Pedrun tankam zobab dilo: “Zonn-eklean Jezu Kristachea nanvan snan gheunchem.”​—Itihas 2:37, 38.

2. Hea lekhant ami kitem xiktolim? (Masikachem fuddlem chitr polloiat.)

² Tor tea disa sumar 3,000 lokamnim bautizm ghetlo. Tea vellar suru zalʼlem bautizm diun xis korchem kam, aiz pasun chaluch asa. Tednam lokamnim thoddeach vella bhitor bautizm ghetlo. Punn ekleak bautizm gheun Jezucho xis zaunk ami modot kortolim zalear amkam zaite mhoine vo thoddim vorsam lagonk xokta. Tor, hea kamant zaito vavr mellon asa mhunn amkam kollon ieta. Ami ho vavr koso korunk zata tem ami hea lekhant polloum-ia.

3. Matev 28:19, 20-a pormonnem eka videarthean vaddavoll korunk kitem korunk zai?

³ Bautizm gheunchea poilim, eka Bible videarthean apunn kitem xikta tem apnnaunk zai. (Matev 28:19, 20 vachat.) Hea vixim Jezun ek udharonn dilʼlem. Ek ‘xanno munis’ aplem ghor khoddpar bandta. Tor, ek videarthi apunn xikta tem apnnaita  tednam to tea xannea munxa sarko zata. (Mt. 7:24, 25; Lukas 6:47, 48) To xikta tem apnnaunk ami taka koxi modot korunk zata, tacheo tin vatto atam ami polloum-ia.

4. Eka Bible videartheak eka-fattlean-ek dhei dovrun bautizm gheunk tumi koxim modot korunk xoktat? (“ Dhei Dovrunk Ani Te Melloun Gheunk Tumchea Videartheak Modot Korat” hem boks pasun polloiat.)

⁴ Dhei dovrunk tumi tumchea Bible videartheak modot korat. Hem kiteak gorjechem tem somzonk ek udharonn polloum-ia. Ek sobit zago pollounk tumkam zaito provas korcho asa mhunn chitat. Punn vatter tumi modem thambon thodde lhan sobit zage polloit voitat zalear, tumkam provas korunk bejar ieunchona. Teach bhaxen tumchea Bible videartheak bautizm gheuncho dhei mellon gheunk dhakte-dhakte dhei dovrunk modot korat. Hem korunk Sasnak Khuxalkaien Jieiat! hea pustokachea odheai-amnim aslolem “Tumi Kitem Korunk Zata” hem boks uzar korat. Obheasachea xevottak hea boksant dilolo dhei ani xikoilolo vixoi hanchea modem kitem sombond asa tem videartheak somzaiat. Tumchea videartheak hachea bhair dusro khoincho-i ek dhei dovrunk zai mhunn tumkam dista zalear, tea boksant aslolem “Anik Kitem Korunk Zata” hachea khala tumi to dhei boroun dovrunk zata. Hea toren tumchea videartheak lhan toxech vhodd dhei dovrunk tumi modot korunk pavtolim.

5. Marku 10:17-22-a pormonnem, Jezun tea girest munxak kitem sanglem, ani kiteak?

⁵ Videartheank aplea jivitant bodol korunk modot korat. (Marku 10:17-22 vachat.) Eka girest munxak apleacho xis zaunk kotthin asa mhunn Jezuk khobor asli. (Marku 10:23) Tori astana, Jezun tea munxak tachea lagim asa tem soglem vikunk sanglem. Karonn Jezuk tacho mog aslo. Thodde pavtti amchea videartheank aplea jivitant bodlav korunk vell lagtolo vo teo sonvoim-o moddunk tim atam toiar nant oxem amkam disonk puro. Taka lagon ami tankam  tea vixim sangonk fattim soronk puro. (Kol. 3:9, 10) Punn amkam tanchi kallji asa zalear Jezuchi dekh gheun ami tankam rokddinch sangtolim.​—St. 141:5; Mho. 27:17.

6. Eka vixoi-acher amcho videarthi kitem chinta tem ami kiteak vicharunk zai?

⁶ Eka vixoi-acher amcho videarthi kitem chinta tem zannam zaunk ami taka prosn vicharunk zata. Ami oxem kortat tednam to vixoi taka somzolo vo tea vixoi-acher to kitem patieta tem amkam kollttolem. Hem korunk Sasnak Khuxalkaien Jieiat! hea pustokant thodde prosn dilʼle asat. Udharonnak, odheai 4-ant “Tumi Jehovachem nanv uzar kortat tednam taka koxem dista?” ani odheai 9-ant “Tumi kitea vixim magnnem korunk sodhtat?” he prosn dilʼle asat. Oslea prosnancho zobab diunk survatek tumchea videartheak ghoddie kotthin zaunk xokta. Punn pustokantlim versam ani chitram uzar korun tumi taka modot korta tednam taka tem sompem zatolem. Tumi osle prosn vicharit ravtat tednam, taka manunk kotthin zata toslea vixoi-ancher pasun to ukteponnim ulounk xoktolo.

7. Eka videartheak aplea jivitant bodlav korunk modot zaunk ami dusreanchim udharonnam koxim uzar korunk zata?

⁷ Kitem korunk zai tem kollʼllea uprant tachea jivitant bodlav korunk modot zaunk tumi tumchea videartheak dusreanchim udharonnam diunk xokta. Hem korunk tumi tankam thodde viddeo dakhounk zai. Sasnak Khuxalkaien Jieiat! hea pustokachea odheai-amnim “Anik Sodhat” ani “Kholaien Xikat” * he bhag asat. Tantunt tumkam zaitea viddeo-nchim nanvam mellttolim. Udharonnak, tumcho videarthi mittingek ieunk fatti-fuddem sorta zalear, odheai 14-nt aslolea “Anik Sodhat” hantunt, Jehovan Mhoji Kallji Ghetli ho viddeo tumi taka dakhounk xoktat. Punn to viddeo dakhoilea uprant, “tannim kelam dekhun tujean-ui korunk zata” oxem mhunno nakat. Tachea bodlek, taka tantuntlim lisanvam somzonk tea viddeo-ntlea bhavan vo bhoinnin Bible totvam koxim apnnailim vo kitem kelem tea vixim sangat. Vo tantuntlem ek vers dakhoiat. Tea bhair, Jehovan tea munxak koxi modot keli tacher dhean diunk proitn korat.

8. Ami amchea videartheak Jehovacho mog korunk koxim modot korunk zata?

⁸ Videartheak Jehovacho mog korunk modot korat. Hem ami koxem korunk zata? Tumkam sondhi melltta tednam tumi tankam Jehovachea gunnam vixim sangonk zata. Toxench, Jehova ek khuxalkaiecho Dev ani aplo mog kortoleank to kednanch sanddina mhunn tumi tankam sangonk zata. (1 Tim. 1:11; Heb. 11:6) Tea bhair, to xikta tem apnnailʼlean taka faido zatolo ani tantuntlean Jehova tacho kitlo mog korta tem taka kollon ietolem. (Iz. 48:17, 18) Ani hea toren Jehova pasot tancho mog vaddttolo ani tim aplea jivitant bodlav korunk fuddem sortolim.​—1 Juanv 5:3.

9. Eka videartheak bautizm gheunk zai zalear Marku 10:29 ani 30, goroz te teag korunk taka koso modot korta?

⁹ Tumchea videarthean bautizm gheunk taka thodde teag korche poddttole. Udharonnak, Jezun tea girest munxak thoddeo vostu soddcheo poddttoleo mhunn sanglem. Toxench, amcho videarthi korta tem kam Devachea dorjeam pormonnem na zalear taka ghoddie tem bodolchem poddttolem. Tea bhair Jehovacho mog korina tosle ixtt taka soddun diunche poddot. Vo to ek Jehovacho Sakxi zala  mhunn tachea familintlim taka pois korunk xoktat. He teag korunk thoddea lokank kotthin zatolem mhunn Jezun poilinch sanglolem. Punn jim konn oxem kortat tankam zaitim besanvam mellttolim ani Jehovachi seva kortat toslea eka familichim tim bhag zatolim mhunn pasun sanglolem. (Marku 10:29, 30 vachat.) Tor, tumi tumchea videartheak hea familicho bhag zaunk koxi modot korunk xoktat?

10. Manuel-achea utrantlean tumi kitem xikonk zata?

¹⁰ Tumchea videarthea sangata ixttagot korat. Hem korunk tumkam tumchea videartheachi kallji asa mhunn dakhoiat. Hea vixim Mexico-nt ravpi bhav Manuel apunn videarthi aslo tednacho ugddas korun mhunntta. “Mhozo Bible obheas ghetalo to bhav poilim mhoji khobor ghetalo ani hanv sangta tem to bore bhaxen aikotalo. Tantuntlean taka mhoji kitli kallji asa tem dison ietalem. Taka lagon hanv tache lagim khoinchea-i vixoi-acher ulounk xoktalo.”

11. Ami amchea Bible videarthea sangata vell sartat tednam amkam koso faido zata?

¹¹ Jezun aplea xisam sangata vell sarlo. Tor amchea Bible videarthea sangata ixttagot korunk anik ek vatt mhunnttlear, tanchea sangata vell sarop. (Juanv 3:22) Hem korunk tumi tankam tumchea ghora chav pieunk, jevnnak vo broadcast pollounk apounk zata. Khas korun festam vellar tankam khub eksurponn bhogonk xokta. Tor tumi oxem kortat tednam tim khuxal zatolim. Uganda-ntlo Kazibwe mhunntta: “Mhojea Bible xikoupea sangata hanv vell sartalo tednam, hanv mhojea Bible obheasant xiktalo tachea poros chodd xikonk pavlo. Karonn Jehova aplea lokanchi kallji koxi gheta ani Jehovache lok khuxal asat tem hanv pollounk pavlo ani mhaka pasun tanchea sarkem zaunk zai oxem dislem.”

12. Ami amchea Bible obheasak veg-vegllea porgottnnarank vhorop kiteak gorjechem?

¹² Veg-vegllea porgottnnarank tumchea sangata Bible obheasak vhorat. Thodde pavtti, amkam amchea Bible obheasak ekttench vochonk vo sodanch ekach porgottnnarak gheun vochonk borem oxem disot. Punn ami amchea sangata veg-vegllea  porgottnnarank gheun vochot zalear, amchea videartheak faideak poddttolem. Hea vixim Moldova-nt ravpi Dmitrii nanvacho bhav mhunntta: “Mhojea obheasak ietalim tea porgottnnaranchim somzaupachi rit veg-veglli asli. Tor tanchea udexim hanv xiktam tem, mhojea jivitant veg-vegllea toren koxem lagu korunk xokta, tem hanv zannam zaunk pavlo. Tor, tanchi vollokh zalolean hanv poilech pavtt mittingek gelo tednam, hanv ek onvollkhi zagear gela oxem mhaka disonk na.”

13. Videartheank mittingek ieunk ami kiteak urba diunk zai?

¹³ Videartheak mittingek ieunk urba diat. Jehova Devan amkam mellon ieunk adnea dilea, karonn oxem korop amchea bhoktecho ek bhag zaun asa. (Heb. 10:24, 25) Tea bhair, amche videarthi mittingek ietat tednam, tim amchea sobhecho bhag mhunn tankam distolem. Karonn sobhent vochop mhunnchem ami amchea famili sangata ruchichem jevonn jevop oxem zata. Tor amcho videarthi mittingek ieta tednam to pasun sobhecho bhag mhunn taka distolem ani to bautizm gheunk pavtolo. Punn oxem korunk tankam kotthin zata zalear Sasnak Khuxalkaien Jieiat! hem pustok tankam koxem modot korunk xokta tem polloum-ia.

14. Ami amchea videartheak mittingek ieunk koxi urba diunk zata?

¹⁴ Sasnak Khuxalkaien Jieiat! hea pustokacho odheai 10 uzar korun tumi tumchea Bible videartheak mittingek ieunk urba diunk zata. Hem pustok bhair sorchea poilim, ho odheai thoddea bhav-bhoinnank aplea videarthea sangata bhasabhas korunk sanglolo ani hacho videartheancher boro porinnam zaun tim mittingek ieunk laglim. Punn mittingek apounk, ami amchea videarthea sangata to odheai suru korchea meren ravchi goroz na. Zata titlea begin ani zaite pavtti pasiesan tankam mittingek ieunk urba diat. Thodde pavtti tumche videarthi mittingek rokddech ieunk suru korche nant. Tor tea vellar nirax zainakat. Mittingek ieunk tumchea videartheak kosleo oddchonneo asat teo zannam zaun, tankam modot korunk proitn korat. Punn zata titlea begin ani zaite pavtti tankam mittingek ieunk urba diat.

15. Amchea videartheank kosli bhirant asonk xokta?

¹⁵ Tumkam survatek Jehovache Sakxi zaunk bhirant distali kai? Tumkam ghoddie, tumchean kednanch ghor-ghoramnim vochon porgott korunk zaunchem na oxem dislem astolem. Vo tumchea familintlim vo ixttam tumkam mittingek vochonk diunchim nant mhunn tumkam bhirant disli astoli. Toxem zalear, tumchea videartheak koxem dista tem tumi somzonk xoktat. Amkam oslea torechea bhirantecho fuddo korcho poddttolo mhunn Jezu pasun zannam aslo. Punn hea bhirantek lagon tumi Jehovachi seva korop bond koru nakat mhunn tannem aplea pattlavdarank sanglem. (Mt. 10:16, 17, 27, 28) Tor Jezun aplea pattlavdarank tanchi bhirant pois korunk koxi modot keli? Ani ami Jezuchi dekh koxi gheunk zata?

16. Bible-antlean xikleant tem dusreank sangonk ami amchea videartheak koxi modot korunk zata?

¹⁶ Bible-antlean xikleant tem dusreank sangonk videartheak modot korat. Jezuche xis porgottnni korunk gele tednam tankam bhirant disli astoli. Tea pasot, Jezun tankam khoim porgottchem ani kitem porgottchem tem sanglem. (Mt. 10:5-7) Teach bhaxen, ami Jezuchi dekh gheun amchea videartheank modot korunk zata. Udharonnak, Bible-a vixim zannam zaunk khuxi asa toslea munxank tim vollkhotat kai mhunn ami tankam vicharunk zata. Toxench, tim tankam kitem sangtolim tachi toiari korunk ami tankam modot  korunk zata. Tannim dusreank sangtana tem chitun ulounk ani Bible-antlean sangonk modot zaunk Sasnak Khuxalkaien Jieiat! hantunt aslole “Thoddo Lok Mhunntta” ani “Thoddim Vicharit” he bhag uzar korun tanchea sangata toiari korunk zata.

17. Matev 10:19, 20, 29-31-ant sanglolim utram amchea videartheak Jehovacher patieun ravonk ami koxim uzar korunk zata?

¹⁷ Tumchea videartheak Jehovacher patieun ravonk modot korat. Jezun aplea xisank Jehova tankam modot kortolo mhunn khatri dili, karonn Jehova tancho mog korta. (Matev 10:19, 20, 29-31 vachat.) Toxench, ami pasun amchea videartheak Jehovachi modot gheunk urba diunk zata. Hem korunk, ami tanchea sangata tannim dovorlolea dhei-am vixim Jehova lagim magonk zata. Hea vixim Poland-ant ravpi Franciszek mhunntta: “Mhozo xikoupi mhojea dhei-am vixim magnnem kortalo. Tannem kelʼlea magnneancho Jehovan zobab dilo tem polloun hanvem pasun magnnem korunk suru kelem. Hanv halinch kamak laglo tednam mittingek ani odhivexonak vochonk mhaka sutti mellʼlli tem polloun, Jehovan mhojea magnneancho zobab dilo mhunn mhaka kollon ailem.”

18. Ami Bible xikoupachem kam kortat tem polloun Jehovak koxem dista?

¹⁸ Jehovak amchea videartheachi khub kallji asa. Ani tankam xikounk ami zo vavr kortat tacho to khub valor korta ani mog korta. (Iz. 52:7) Somoz tumchea lagim Bible obheas na zalear, tumi khoinchea-i eka porgottnnara sangata tachea Bible obheasak vochonk zata. Ani tea videartheak vaddavoll korun bautizm gheunk modot korunk zata.