1. ¿Mbaʼépa heʼi vaʼekue Jesús disipulokuéra peteĩ hénte atýpe?

HETAITEREI kuimbaʼe ha kuña oviaha vaʼekue Jerusalénpe. Haʼekuéra oho upépe heta paísgui ha oñeʼẽ diferénte idióma. Upe díape oiko peteĩ mbaʼe ijojahaʼỹva: Derrepentete, unos kuánto judío oñepyrũ oñeʼẽ umi hénte diferénte paisgua idiómape. Upéva osorprendeterei umi héntepe, péro osorprendeve chupekuéra umi mbaʼe heʼíva umi judío ha avei umi mbaʼe heʼíva apóstol Pedro. Umi hénte ohendu haʼekuéra ikatuha ojesalva ohechaukáramo ojeroviaha Jesucrístore. Upe ohendúva ningo og̃uahẽ ikorasõmekuéra, upévare oporandu hikuái: “¿Mbaʼe piko rojapo vaʼerã?”. Ha Pedro heʼi chupekuéra: “Pejevautisa káda uno” (Hech. 2:37, 38).

2. ¿Mbaʼépa jahecháta ko artíkulope? (Ehecha pe taʼanga oĩva ko rrevísta apére).

² Tuichaitereive mbaʼéntema la oiko vaʼekue upe rire. Amo 3.000 persónarupi ojevautisa upe díape ha oiko chuguikuéra Cristo disípulo. Upérõ oñepyrũ vaʼekue pe traváho tuichaite Jesús omanda vaʼekue isegidorkuérape ojapo hag̃ua: Oipytyvõ la héntepe oiko hag̃ua chuguikuéra idisípulo. Upe tembiapo ningo koʼag̃aite peve osegi, péro koʼág̃a ñande ndahaʼéi ñañemongetánteva peteĩ persónandi sapyʼaitemi ha upéi ikatúmava ojevautisa. Ikatu hína ohasa heta mése, un áño, térã hetave voi ikatu hag̃uáicha peteĩ estudiánte ojevautisa. Heta ñañehaʼã vaʼerã ñaipytyvõ hag̃ua peteĩ persónape oiko hag̃ua chugui Cristo disípulo, oikuaaháicha umi koʼag̃aite ombostudiáva hína la Biblia peteĩ persónape. Ko artíkulope jahecháta mbaʼéichapa ikatu ñaipytyvõ peteĩ estudiántepe ikatu hag̃uáicha ojevautisa.

3. Ohechaukaháicha Mateo 28:19, 20, ¿mbaʼépa ojapo vaʼerã pe estudiánte ojevautisa hag̃ua?

³ Pe estudiánte ojevautisa mboyve ojapo vaʼerã umi mbaʼe la Biblia  omboʼéva (elee Mateo 28:19, 20). Pe estudiánte ojapo jave umi mbaʼe oaprendéva, ojogua pe “kuimbaʼe iñarandúvape” Jesús oñeʼẽ vaʼekuére iñehémplope. Haʼe heʼi vaʼekue hese ojoʼo pypuku hague omoĩ hag̃ua hóga simiénto pe ita ári (Mat. 7:24, 25; Luc. 6:47, 48). ¿Mbaʼéichapa ikatu ñaipytyvõ pe estudiántepe ojapo hag̃ua umi mbaʼe oaprendéva? Jahechamína mbohapy mbaʼe ikatúva jajapo.

4. ¿Mbaʼéichapa ikatu ñaipytyvõ pe estudiántepe oprogresa hag̃ua kontinuadoite ha ojevautisa? (Ehecha avei pe rrekuádro “ Ñaipytyvõ ñane estudiántepe omoĩ hag̃ua umi méta ha ohupyty hag̃ua umíva”).

⁴ Ñaipytyvõ ñane estudiántepe omoĩ hag̃ua umi méta. ¿Mbaʼérepa iñimportantete upéva? Ñapensamína ko ehémplore: Jajapótaramo peteĩ viáhe puku oime vaʼerã japyta mimíta jepi tapére jajogua hag̃ua chipa, jajetepyso hag̃ua, térã jahecha hag̃ua umi lugár porã porã. Péicha nañanekaneʼõmoʼãi ha nañañanduguasumoʼãi la viáhe. Péicha avei peteĩ estudiánte omoĩramo umi méta ikatúva ensegída ohupyty, ifasilvéta chupe ohecha hag̃ua ikatuha ohupyty pe vautísmo. Upearã ikatu jaipuru pe rrekuádro “Méta”, oĩva pe lívro héravape ¡Jaikóta vyʼápe pára siémpre! Opakuévo káda leksión ñañemongeta pe estudiántendi mbaʼéichapa pe méta oipytyvõta chupe ojapo hag̃ua upe oaprende ramóva hína. Oiméramo ñapensa haʼe tekotevẽha ohupyty ótra méta, ñañemongeta hendive ha toskrivi upéva pe párte heʼihápe “Ótro”. Káda tánto ñañemongeta hendive umi mbaʼe ikatúvare ohupyty ensegidaiténtema voi, ha avei umi ikatúvare ohupyty amo gotyove.

5. Ohechaukaháicha Marcos 10:17-22, ¿mbaʼépa Jesús heʼi vaʼekue peteĩ kuimbaʼe irríkovape ojapo hag̃ua, ha mbaʼérepa?

⁵ Ñaipytyvõ ñane estudiántepe ojapo hag̃ua umi kámbio hekovépe (elee Marcos 10:17-22). Jesús oikuaa vaʼekue pe kuimbaʼe irríkova hakateʼỹha ikosakuérare, upévare ijetuʼutaha chupe ovendepa hag̃ua umíva. Péro Jesús lomímonte heʼi vaʼekue chupe ojapo hag̃ua upe kámbio tuichaitéva (Mar. 10:23). ¿Mbaʼérepa haʼe ojapo upéva?  Ohayhúgui chupe. Ñande ningo sapyʼánte nañañanimái jaʼe ñane estudiántepe ojapo hag̃ua upe oaprendéva, ñaimoʼãgui haʼe ndaikatumoʼãiha gueteri ojapo upe kámbio. Jaikuaa heta tiémpo rire ae peteĩ persóna ikatuha ohejaite pe ikondúkta yma guare, ha omonde peteĩ aóicha pe kondúkta pyahu (Col. 3:9, 10). Péro amáske pyaʼe jaʼe chupe mbaʼépepa tekotevẽ okambia, pyaʼevéntema pe estudiánte oñepyrũta okambia. Ñañemongetáramo hendive péicha, jahechaukáta hína jahayhuha chupe (Sal. 141:5; Prov. 27:17).

6. ¿Mbaʼérepa iñimportánte ñaporandu ñane estudiántepe mbaʼépa opensa peteĩ témare?

⁶ Iñimportánte ningo ñaporandu ñane estudiántepe mbaʼépa opensa peteĩ témare. Upéva ñanepytyvõta jaikuaa hag̃ua mbaʼépa haʼe ontende ha oguerovia. Jajapo meméramo upéva, upéi ifasilvétama ñandéve ñañemongeta hag̃ua hendive umi mbaʼe ijetuʼúvare chupe oguerovia hag̃ua. Pe lívro ¡Jaikóta vyʼápe pára siémpre!, oreko heta pregúnta ñanepytyvõtava jaikuaa hag̃ua mbaʼépa opensa pe estudiánte. Por ehémplo, leksión 04-pe oĩ ko porandu: “¿Mbaʼéichapa ere oñeñanduha Jehová nde reipuru jave héra?”. Ha leksión 09-pe heʼi: “¿Mbaʼépa nde remombeʼuse Ñandejárape?”. Ñepyrũrã ikatu ijetuʼu ñane estudiántepe ombohovái hag̃ua koʼãichagua porandu, péro ikatu ñamboʼe chupe opensa hag̃ua umi téxto ha taʼanga oĩvare pe lívrope.

7. ¿Mbaʼéichapa ikatu jaipuru umi ermanokuéra rembiasakue ñaipytyvõ hag̃ua ñane estudiántepe?

⁷ Ñane estudiánte ontende vove mbaʼépepa tekotevẽ okambia, jaipurúkena umi ermanokuéra rembiasakue omokyreʼỹtava chupe ojapo hag̃ua upéva. Por ehémplo, pe estudiántepe ijetuʼúramo oho hag̃ua rreunionhápe, ikatu jaipuru pe lívro ¡Jaikóta vyʼápe pára siémpre!, ha pe leksión 14-pe jahechauka chupe pe vidéo Jehová oñeinteresa cherehe, oĩva pe párte heʼihápe “Einvestiga hag̃ua”. Pe lívro ningo oreko heta leksión jatopahápe umi tembiasakue oĩva pe párte héravape “Ejepyʼamongetamína”, térã pe párte heʼihápe “Einvestiga hag̃ua”. * Ñañatendékena ani hag̃ua ñakompara ñane estudiántepe ótrore, jaʼévo chupe: “Haʼe ikatu kuri ojapo, upéicharõ nde avei ikatúta”. Jaheja vaʼerã pe estudiántepe tohechakuaa upéva ijeheguiete. Upéva rangue, ñañemongeta hendive umi mbaʼe iñimportantevéva oipytyvõ vaʼekuére pe persónape ojapo hag̃ua la Biblia omboʼéva. Por ehémplo, peteĩ téxto bíblico iñimportánteva térã peteĩ mbaʼe oipytyvõ vaʼekue upe persónape. Ha opyta porã vove, ñamyesakã chupe mbaʼéichapa Jehová oipytyvõ kuri upe persónape.

8. ¿Mbaʼéichapa ikatu ñaipytyvõ ñane estudiántepe ohayhu hag̃ua Jehovápe?

⁸ Ñaipytyvõ ñane estudiántepe ohayhu hag̃ua Jehovápe. ¿Mbaʼéichapa ikatu jajapo upéva? Jaheka umi oportunida ñamboʼe hag̃ua ñane estudiántepe umi kualida porã Jehová orekóva. Ñaipytyvõ chupe ohechakuaa hag̃ua Jehová haʼeha Ñandejára ovyʼáva, ha oĩha umi ohayhúva chupe ykére (1 Tim. 1:11; Heb. 11:6). Jahechauka pe estudiántepe mbaʼéichapa ideprovéchota chupe ojapóramo umi mbaʼe oaprendéva, ha mbaʼeichaitépa umíva ohechauka Jehová ohayhuha chupe (Is. 48:17, 18). Amáske pe estudiánte ohayhuve ohóvo Jehovápe, koʼýte okambiaséta tekotevẽhápe (1 Juan 5:3).

9. Ohechaukaháicha Marcos 10:29, 30, ¿mbaʼépa oipytyvõta peteĩ estudiántepe ojapo hag̃ua umi sakrifísio ha ojevautisa?

⁹ Pe estudiánte ojesakrifika vaʼerã ikatu hag̃uáicha ojevautisa. Oĩ ningo umi estudiánte tekotevẽtava osakrifika umi imbaʼerepy pe kuimbaʼe irríkovaicha ajeʼi ñañeʼẽ hague. Por ehémplo,  oiméramo pe itraváho oñemoĩ la Biblia heʼívare, upéicharõ tekotevẽta oheka ótro itravahorã. Avei heta estudiánte oheja vaʼerã umi iñamigokuéra ndohayhúiva Jehovápe. Ha ótrope katu ifamília oheja rei ndochaʼéi rupi Testigokuérare. Jesús orrekonose vaʼekue ijetuʼutaha algúnope ojapo hag̃ua koʼãichagua sakrifísio. Péro haʼe opromete umi osegíva chupe ni mbaʼevéicharõ nombyasymoʼãiha upéva. Jehová ovendesi ha orresivíta chupekuéra ifamília ojoayhuetévape (elee Marcos 10:29, 30). ¿Mbaʼéichapa ikatu ñaipytyvõ ñane estudiántepe oñevenefisia hag̃ua ko rregálo porãitégui?

10. ¿Mbaʼépa ñaaprende Manuel heʼi vaʼekuégui?

¹⁰ Ñañamiga ñane estudiántere. Iñimportanteterei ningo jahechauka ñane estudiántepe jahayhuha chupe. ¿Mbaʼérepa? Jahechamína mbaʼépa heʼi Manuel, peteĩ ermáno oikóva Méxicope. Haʼe omombeʼu mbaʼéichapa iñinstruktór oipytyvõ vaʼekue chupe ostudiárõ guare la Biblia. Manuel heʼi: “Rostudia mboyve, che instruktór katuete oporandúmi vaʼerã chéve mbaʼetekópa aime. Haʼe chepytyvõ aime hag̃ua trankílo, ha upévare ikatu vaʼekue añeʼẽ hendive oimeraẽ mbaʼére. Che añandu vaʼekue haʼe añetehápe ojepyʼapyha cherehe”.

11. ¿Mbaʼéichapa ñane estudiantekuéra oñevenefisia ohasáramo tiémpo ñanendive?

¹¹ Jesús ningo ohasa vaʼekue tiémpo isegidorkuérandi, ha ñande jajapo vaʼerã avei upéva ñane estudiantekuérandi (Juan 3:22). Oiméramo ñane estudiánte ojapóma oikóvo umi kámbio hekovépe, ikatu ñainvita chupe ñande rógape jakaru, jaterere, térã jahecha hag̃ua oñondive pe prográma de Broadcasting osẽva káda mes. Ñane estudiánte koʼýte oagradeséta ñainvitáramo chupe umi ihénte ha iñamigokuéra omboarete jave umi fiésta ojejapóva rrelihión fálsape, térã umi fiésta patriótika jave. Péicha jave pe estudiánte ikatu hína oñeñandu haʼeño. Kazibwe, oikóva Ugándape heʼi: “Che ningo aaprende hetaiterei mbaʼe ore estúdio aja, péro hetaitereive mbaʼe aaprende Jehovágui ahasávo tiémpo che instruktór ndive. Ahecha Jehová ohayhuetereiha ipuévlope ha mbaʼeichaitépa ovyʼa hikuái, ha che aikose avei upéicha”.

12. ¿Mbaʼérepa ñainvita vaʼerã diferénte ermánope ñanemoirũ hag̃ua pe estúdio bíblicope?

 ¹² Ñainvita diferénte ermánope ñanemoirũ hag̃ua pe estúdio bíblicope. Sapyʼánte ifasilve ñandéve jajapo ñaneaño pe estúdio térã ñainvita siémpre el mísmo ermánope. Ikatu ningo opyta porãve ñandéve upéva, péro ideprovechovéta pe estudiántepe jagueraháramo ñanendive diferénte ermánope. Dimitri, peteĩ ermáno oikóva Moldáviape heʼi: “Che astudiárõ guare la Biblia, káda ermáno omoirũva che instruktórpe idiferénte vaʼekue la omyesakã lája umi mbaʼe omboʼéva la Biblia. Upéva chepytyvõ ahecha hag̃ua mbaʼéichapa heta hendáicha ikatu ajapo umi mbaʼe aaprendéva. Ha ahárõ guare primera ves rreunionhápe ndahaʼevéima la atĩetereíva, pórke aikuaáma heta ermáno ha ermánape”.

13. ¿Mbaʼérepa ñaipytyvõ vaʼerã ñane estudiántepe oho hag̃ua rreunionhápe?

¹³ Ñaipytyvõ ñane estudiántepe oho hag̃ua rreunionhápe. ¿Mbaʼérepa jajapo vaʼerã upéva? Pórke Jehová voi omanda isiervokuérape oñembyaty hag̃ua. Avei péicha jaadora hína chupe (Heb. 10:24, 25). Hiʼarive umi ermáno ha ermána oĩva kongregasiónpe haʼe hína ñane família. Upévare ñaime jave rreunionhápe hendivekuéra, haʼete hína ñañembyatýva ñande rógape jaʼu hag̃ua peteĩ tembiʼu hetereíva. Ñaipytyvõ jave ñane estudiántepe oho hag̃ua rreunionhápe, jaajuda hína chupe ojapo hag̃ua peteĩ mbaʼe iñimportantetereíva ikatu hag̃uáicha ojevautisa. Péro ikatu ijetuʼu chupe oñepyrũ hag̃ua oho rreunionhápe. ¿Mbaʼéichapa pe lívro ¡Jaikóta vyʼápe pára siémpre!, oipytyvõta pe estudiántepe osolusiona hag̃ua oimeraẽ provléma ojokóva hína chupe oho hag̃ua rreunionhápe?

14. ¿Mbaʼéichapa ikatu ñamokyreʼỹ ñane estudiántepe oho hag̃ua rreunionhápe?

¹⁴ Jaipuru pe leksión 10 oĩva pe lívro ¡Jaikóta vyʼápe pára siémpre!, ñamokyreʼỹ hag̃ua ñane estudiántepe oho hag̃ua umi rreuniónpe. Ko lívro oñeguenohẽ mboyve, heta ermánope ojejerure kuri oipuru hag̃ua ko leksión iñestudiantekuérandi. Haʼekuéra heʼi oikoite hague ha oipytyvõ hague iñestudiantekuérape oho hag̃ua rreunionhápe. Jaikuaa ningo natekotevẽiha ñahaʼarõ leksión 10 peve ñainvita hag̃ua ñane estudiántepe oho hag̃ua umi rreuniónpe. Ensegídantema voi ñainvita vaʼerã chupe ha jasegi jajapo meme upéva. Umi estudiánte ningo káda uno oreko iprovléma, upévare ñañatende vaʼerã mbaʼépa hína la oikotevẽva ñane estudiánte, ha jahecha mbaʼéichapa ikatu ñaipytyvõ porãve chupe. Ani ñañedesanima ndohóiramo ensegída rreunionhápe. Ñanepasiénsia vaʼerã ha jasegi ñainvita chupe.

15. ¿Mbaʼe mbaʼépa ikatu omongyhyje ñane estudiántepe?

¹⁵ ¿Ñandépa jakyhyje vaʼekue oiko hag̃ua ñandehegui testígo de Jehová? Ikatu voi ñapensa raʼe: “Che ni mbaʼevéicharõ nasẽichéne apredika”. Térã ikatu oime jakyhyje raʼe ñane hénte ha amigokuéra oñemoĩrõ g̃uarã ñane kóntrape. Oiméramo upéicha, ñande ikatu ñantende mbaʼéichapa oñeñandu ñane estudiánte. Jesús orrekonose vaʼekue oĩtaha umi hénte okyhyjétava péicha, péro haʼe omokyreʼỹ vaʼekue idisipulokuérape ani hag̃ua okyhyjégui ou ndoservivéi Jehovápe (Mat. 10:16, 17, 27, 28). ¿Mbaʼéichapa Jesús oipytyvõ vaʼekue isegidorkuérape ani hag̃ua okyhyje? ¿Ha mbaʼéichapa ñande ikatu jasegi iñehémplo?

16. ¿Mbaʼéichapa ikatu ñamboʼe ñane estudiántepe oñeʼẽ hag̃ua ótrondi umi mbaʼe ogueroviávare?

¹⁶ Ñamboʼe ñane estudiántepe oñeʼẽ hag̃ua ótrondi umi mbaʼe ogueroviávare. Jesús omondórõ guare idisipulokuérape opredika hag̃ua, oiméne okyhyje raʼe hikuái. Péro haʼe oipytyvõ vaʼekue umi idisípulope heʼívo chupekuéra mávape ha mbaʼe mensáhepa opredika vaʼerã (Mat. 10:5-7). ¿Mbaʼéichapa ikatu jasegi Jesús ehémplo? Ñaipytyvõ ñane estudiántepe opensa hag̃ua mávapepa ikatu opredika. Por ehémplo, ikatu ñaporandu chupe: “¿Mávapepa nde ere ikatuha ideprovécho  ko mbaʼe omboʼéva la Biblia?”. Upéi ñamboʼe chupe mbaʼépa ikatu heʼi, ha ñañensaja hendive ikatu hag̃uáicha sensillomínte oñeʼẽ upe témare ótrondi. Upearã opyta porã vove ikatu jaipuru pe párte hérava “Oĩramo heʼíva” ha “Oĩramo oporandúva”, jatopáva ñande lívrope ¡Jaikóta vyʼápe pára siémpre! Ñaipytyvõkena ñane estudiántepe oipuru hag̃ua la Biblia omeʼẽ hag̃ua umi rrespuésta isensíllova ha nombopochymoʼãiva umi héntepe.

17. ¿Mbaʼéichapa ikatu jaipuru Mateo 10:19, 20, 29-31 ñaipytyvõ hag̃ua ñane estudiántepe ojerovia hag̃ua Jehováre?

¹⁷ Ñaipytyvõ ñane estudiántepe ojerovia hag̃ua Jehováre. Jesús oasegura vaʼekue umi idisípulope Jehová ohayhuha chupekuéra, ha upévare siémpre oĩtaha hendivekuéra (elee Mateo 10:19, 20, 29-31). Ñamomanduʼákena ñane estudiántepe Jehová oĩtaha avei ijykére. Ñande ikatu ñaipytyvõ chupe ojerovia hag̃ua Jehováre ñañemboʼévo hendive umi méta orekóvare. Franciszek, oikóva Polóniape heʼi: “Che instruktór pyʼỹinte imanduʼa vaʼekue iñemboʼépe umi méta che arekóvare. Ha ahechávo mbaʼéichapa Jehová ombohovái chupe iñemboʼe, che pyaʼéma avei añepyrũ añemboʼe. Añandu vaʼekue Jehová chepytyvõha tekotevẽrõ guare ajerure permíso che traváho pyahúpe aha hag̃ua rreunionhápe ha asambleahápe”.

18. ¿Mbaʼéichapa Jehová ohecha pe traváho ojapóva umi oporomboʼéva la Biblia?

¹⁸ Jehová ningo ohayhueterei ñane estudiantekuérape. Haʼe oikuaa ha omombaʼe mbaʼéichapa umi oporomboʼéva la Biblia ombaʼapo jejopy oipytyvõ hag̃ua la héntepe ikatu hag̃uáicha oñemoag̃ui hese, ha haʼe ohayhueterei chupekuéra upévare (Is. 52:7). Ikatu oime koʼag̃aite ndajarekói hína peteĩ estúdio bíblico. Péro ñamoirũkuaa ótrope ojapo hag̃ua ijestúdio, péicha ñande avei ñaipytyvõta umi estudiántepe ikatu hag̃uáicha ojevautisa.