1. Nitre kwati käkwe dre nuaindre ngwanintari kwetre ngwane, ¿dre niebare ietre?

NITRE kwati juta jene jene te aune blite kukwe jene jenebiti nükani Jerusalén. Köbö ye näire kukwe ñan tuabare namani bare ñobätä ñan aune nitre judío namani blite nitre kukwei yebiti. Nitre ye käkwe blitabare kukwe jene jenebiti ye ñan ai bäri ütiäte, ñakare aune nitre judío käkwe dre niebare aune Apóstol Pedro käkwe dre niebare nitre jökrä ie ye bäri ütiäte. Kukwe keta kabre driebare ietre ye ngätäite niaratre tödekadre Jesubiti ye köböire raba nemente kwäre ye driebare ietre arato. Kukwe ye matani niaratre brukwäte yebätä kukwe ne ngwanintari kwetre: “Mtare nunkwe dre nuendre” niere nunye. Yebätä Pedrokwe niebare ietre: “Mun jata ja mike ngökare ñöte” (Hech. 2:37, 38).

2. ¿Dre mikai gare jai kukwe ja tötikara nekänti? (Üai kena täräkwatabätä mikadre ñärärä).

² Kukwe ütiäte krubäte namani bare köbö ye näire nitre 3,000 näre ja ngökani ñöte aune namanintre ja tötikaka Jesukwe. Sribi mikani Jesukwe nitre ja tötikaka kwe kisete ye kömikani köbö ye näire kukwe namani bare yebiti. Sribi ye nuain täbe kä nengwane. Kä ne näire nitre ja tötikaka rabadre juto ja ngökakäre ñöte yekäre ora kratibe te dimikadre ye ñan ribeta kwetre jai, ñakare aune sö krati o kä kwati te tötikadre ye ribeta kwetre jai. Nikwe ja di ngwandre krubäte nitre mikakäre ja tötikaka, kukwe ye gare kwin nitre tä ni tötike ye ie. Ni raba dre nuainne nitre ja tötikaka dimikakäre ja ngökö ñöte ye rabai gare nie kukwe ja tötikara nekänti.

3. Mateo 28:19, 20 ta niere erere, ¿ni ja tötikaka dre nuaindre ja ngökakäre ñöte?

³ Ni ja tötikaka ngämi ja ngökö ñöte ye känenkri, rabadre kukwe Bibliabätä mike täte (ñäkädre Mateo 28:19, 20 yebätä). Ni ja  tötikaka tä ye erere nuainne ngwane tä ja ngwen “töbtä” ni iti bätä blitabare Jesukwe ye erere, ni ye käkwe kä muani mäbe nguse aune ürä mikani kwe jäkwata ribibiti (Mat. 7:24, 25; Luc. 6:46-48). Kukwe ketamä ni raba nuainne ni ja tötikaka Bibliabätä dimikakäre kukwe Bibliabätä mikakäre täte ye ani mike gare jai.

4. ¿Nikwe nitre ja tötikaka dimikadre ño rabakäre juto ja ngökakäre ñöte? (Recuadro “ Nitre ja tötikaka dimikadre kukwe mike nuaindre jai aune ja di ngwen mikakäre nemen bare” ye mikadre ñärärä).

⁴ Ni ja tötikaka kukwe mikadre nuaindre jai nikwe niedre ie. ¿Ñobätä kukwe ne ütiäte? Kukwe nebätä töbike: mä tädre dikekä mente kä keteiti kokwäre ngwane mä raba nemen nünenkä kä ruäre känti. Ñodre, ñö okwä ken o kä mada känti, ye köböire kä ñan rabai mente krubäte mä kräke. Ye erere arato, ni ja tötikaka Bibliabätä käkwe kukwe mikadre nuaindre jai kä braibe te aune rabai bare ie ngwane raba ja ngökö ñöte arato. Recuadro kädekata “Nuaindre” tä tärä Mä raba nüne kä jutobiti yebätä yebiti nikwe ni ja tötikaka dimikadre nirien kukwe ja üairebiti. Kukwe ja tötikara keteitire keteitire krütadre ye bitikäre, ni ja tötikaka kukwe mikani nuaindre jai ye raba dimike ño kukwe nemen gare ie ye mike täte, yebätä nikwe blitadre bentre. Ni ja tötikaka kukwe mada mikadre nuaindre jai ye ni tö niebätä ie ngwane, nikwe tikadre “kukwe mada” nieta yekänti. Kukwe meden mikadre nuaindre jai nitre ja tötikaka yekwe kä braibe o kä raire te yebätä nikwe blitadre bentre nita ja tötike bentre ngwane.

5. Marcos 10:17-22 tä niere erere, ¿Jesukwe dre niebare ni jondron bökäne ie aune ñobätä?

⁵ Ni ja tötikaka dimikadre ja töi kwite (ñäkädre Marcos 10:17-22 yebätä). Ni iti jondron bökäne krubäte yekwe jondron jökrä nämäne ye rürübäindre kwe niebare Jesukwe ie, ñan rabai nuäre kräke nämäne gare Jesús ie yebiti ta (Mar. 10:23). ¿Ñobätä kukwe ye niebare kwe ie? Ñobätä ñan aune nämäne tarere yebätä. Ni ja tötikaka Bibliabätä käkwe kukwe Bibliabätä  mikadre täte ye ja ñan raba nüke törö nie niekäre ie ruäre ngwane, ñobätä ñan aune ngämi juto raba nemen ruin nie yebätä. Bäkänä, dän ngutu bitin kitadre jabätä aune ja töi ükadrete kukwe ruärebätä ye ñaka rabai bare jötrö, ñakare aune kä ribeta jai nuainkäre (Col. 3:9, 10). Nikwe ñaka kä mikadre niken raire ta blitakäre bentre kukwe yebätä. Ye käkwe dimikai ja töi kwite bengwairebe, nikwe ye erere nuaindi ngwane tare nikwe, nikwe bämikai (Sal. 141:5; Prov. 27:17).

6. ¿Ni ja tötikaka tä töbike ño yebätä kukwe ngwandretari ie ye ñobätä ütiäte?

⁶ Ni ja tötikaka tä töbike ño yebätä nikwe kukwe ngwandretari ie ye ütiäte krubäte. Ye köböire dre nüke gare ie aune dre era kräke ye rükai gare nie. Nita käre ye erere nuainne ngwane, kukwe meden ñan raba nemen nuäre ka ngäbitikäre ni ja tötikaka ie yebätä rabai nuäre ni kräke blitakäre ja känenkäre. Tärä Mä raba nüne kä jutobiti yebätä kukwe ngwantarita nitre mikakäre töbike ye tärä keta kabre. Ñodre, kukwe ja tötikara ketabokä yekänti kukwe ngwantarita ne raba kwen nie: “Mätä Jehová kädeke kä jeñe kwe yebiti ngwane, ¿jata nemen ruin ño ie raba ruin mäi?”. Aune kukwe ja tötikara keta ökän yekänti kukwe ngwantarita ne raba kwen nie: “¿Drebätä mä törbadre oradi Ngöböi?”. Kenanbe nikwe kä biandre ni ja tötikaka ie kukwe mikakäre gare kukwe ngwantarita yebätä raba ribere jai. Kukwe ja tötikarabätä texto aune üai tä mikani yebätä rabadre töbike ño ye nikwe driedre ietre dimikakäre.

7. ¿Kukwe nuainbare ja mräkätrekwe yebiti ni raba ni ja tötikaka dimike ño?

⁷ Ni ja tötikaka dre nuaindre rükadre gare ie ngwane ni madakwe kukwe ye erere nuainbare ye nikwe niedre ie töi mikakäre kukwe ye mike täte. Ñodre, ñaka nemen nuäre kräke rikakäre gätäte ngwane, video Jehová töita tibätä tä sección “Kukwe mada mike gare jai” kukwe ja tötikara 14 yekänti ye mäkwe mika tuare ie. Tärä Mä raba nüne kä jutobiti yebätä kukwe ja tötikara keta kabre yekänti kukwe namani bare mikata gare ye tä sección “Ja tötikadre bäri” o “Kukwe mada mike gare jai” nieta yekänti. * Nikwe ñaka ni ja tötikaka ketadre ni madabe. Nikwe ñaka niedre ie: “Niara ie namani bare, mä raba nuainne arato”. Kukwe ye rükadre gare akwle ni ja tötikaka ie. Kukwe meden käkwe ja mräkä tä videote dimikani kukwe Bibliabätä mike täte, texto o kukwe mada ye nikwe kädekadrete ni ja tötikaka ie. Raba ngwane Jehovakwe ja mräkä dimikani ño, ye ni raba mike gare ni ja tötikaka ie.

8. ¿Ni raba ni ja tötikaka dimike ño Jehová tarere?

⁸ Nikwe ni ja tötikaka dimikadre Jehová tarere. Nikwe kä diandrekä jai blitakäre bentre Jehová töi kwin keta kabre yebätä. Jehová ye kä juto bökänkä aune tä ni niara tarekä ye ken dimikakäre ye nikwe ni ja tötikaka dimikadre mike nüke gare jai (1 Tim. 1:11; Heb. 11:6). Kukwe Bibliabätä nüke gare ie ye mikadre täte kwe ye köböire kukwe kwin raba nemen kwe aune yebiti Jehovata tarere bämikata Jehovakwe ie ye nikwe mikadre gare ie (Is. 48:17, 18). Jehová jatai tare bäri kwe ngwane, bäri töi rabai kwatibe ja töi kwitakäre kukwe medenbätä ja töi kwitadre kwe yebätä (1 Juan 5:3).

9. Marcos 10:29, 30 tä niere erere, ¿dre käkwe nitre ja tötikaka dimikai kukwe ruäre tuenmetre ja ngökakäre ñöte?

⁹ Ni ja tötikaka rabadre ja di ngwen jondron ruäre tuametrekäre ja ngökakäre ñöte. Ni ja tötikaka ruäre rabadre ja di ngwen jondron ruäre känebätä tuametrekäre ni jondron bökäne bätä blitani párrafo ketarike yekänti ye erere. Ruäre  tä sribi tuenmetre ñobätä ñan aune yete kukwe ñaka kwin nuainta ye Biblia tä ñäkäire yebätä. Mada abokän ñan tä ja kete ja ketamuko kwe ben ñobätä ñan aune nitre ye ñan tä Jehová tarere yebätä. Nitre mada mräkätre kwe tä ja mike nitre testiko Jehovakwe rüere, yebätä mräkätre kwe ñan tä kain ngäbiti. Kukwe ye ñaka rabai nuäre nitre ruäre kräke niebare Jesukwe. Akwa Jehovakwe ja mräkätre ja üairebiti biandi nitre ja tötikaka Jesukwe ie ye käbämikani Jesukwe (ñäkädre Marcos 10:29, 30 yebätä). * ¿Nitre ja tötikaka dimikadre ño ne kwe kukwe kwin ne rabadre kwetre?

10. ¿Manuel tä dre niere yebätä dre raba nemen gare nie?

¹⁰ Nikwe ja ketadre nitre ja tötikaka Bibliabätä ben. Niaratre ye ütiäte ni kräke ye nikwe bämikadre. ¿Ñobätä? Ja mräkä kädekata Manuel nünanka México, nämäne ja tötike Bibliabätä ngwane, kukwe namani barebätä tä mike gare ye ani mike ñärärä: “Ti tua ño ye ni dirikä tie nämä käre ngwentari tie ja tötika ye känenkri. Ye köböire ja nämä nemen ruin kwin tie aune kukwe meden nämäne nemen bare ye ti nämä niere ie. Niara töi nämä metre tibätä ye nämä nüke gare tie”.

11. ¿Nikwe kä diandrekä jai nitre ja tötikaka kräke ye ñobätä ütiäte?

¹¹ Jesús nämäne kä denkä jai nitre ja tötikaka kwe kräke, ye erere nikwe kä diandrekä jai nitre ja tötikaka nikwe kräke (Juan 3:22). Ni ja tötikaka Bibliabätä kite nirien kukwe ja üairebiti aune debe ni kräke ngwane, ni raba nübaire ja gwirete, kabe ñain jabe, mröre jabe o JW Broadcasting ye tuin jabe. Nitre tä fiesta nuainne ye ngwane, nikwe nitre ja tötikaka nübaidre ja gwirete yebätä rabai debe bien nie, ñobätä ñan aune ja raba nemen kaibe ietre yebätä. Kazibwe, nünanka Uganda, tä niere: “Ti nämä ja tötike Bibliabätä ngwane, kukwe nämä nemen  gare krubäte tie ye kwrere arato ti nämä kä denkä jai ni dirikä tie ye kräke ye köböire kukwe rababa gare krubäte tie Jehovabätä. Jehová töita krubäte nitre niara mikaka täte yebätä aune käta juto bätätre ye nämä tuin tie aune kukwe ye ie ti tö rababa ja kräke”.

12. ¿Ni rikadre ja mräkätre mada mada ngwena jabe nitre tötike ye ñobätä ütiäte?

¹² Nikwe ja mräkätre mada mada nübaidre jabe nitre tötike. Ni rikadre kaibe o ja mräkä arabe ben ye raba nemen tuin kwin nie. Ruäre ngwane kukwe ye kwin, akwa nikwe ja mräkätre mada nübaidre jabe nitre tötike ye rabai kwin nitre ja tötikaka kräke. Dimitri, nünanka Moldavia, tä niere: “Ja mräkätre itire itire nämä nüke dirikä tie yebe ye nämä ñaka dirire ja erebe tie, ye köböire kukwe nämä nemen gare tie ye ti rabadre mike täte kukwe jene jene känti nämä nüke gare tie. Aune ye köböire ti ñan rababa ja gaire rikakäre kena gätäbätä ñobätä ñan aune ja mräkätre aune ja ngwaitre nämäna gare tie yebätä”.

13. ¿Ñobätä nikwe nitre ja tötikaka dimikadre rikakäre gätäbätä?

¹³ Nikwe nitre ja tötikaka dimikadre rikakäre gätäbätä. ¿Ñobätä? Ñobätä ñan aune Jehovata ye nuainmana nie aune yebiti nita niara mike täte (Heb. 10:24, 25). Ne madakäre, ja mräkätre konkrekasionte ye abokän ni mräkä kukwe ja üairebiti. Nita niaratre ben gätäte ngwane, ye abokän nita mrö bänänte kwete bentre ye kwrere. Nikwe nitre ja tötikaka dimikadre rikakäre gätäbätä yebiti kukwe keteiti ütiäte nuaindre ja ngökakäre ñöte, yebätä nita dimike. Akwa kukwe keteiti raba nitre ja tötikaka ketebätä rikakäre gätäbätä rabadre ruin nie ngwane, tärä Mä raba nüne kä jutobiti yebiti, ¿ni raba dimike ño?

14. ¿Nikwe nitre ja tötikaka töi mikadre ño niken gätäbätä?

¹⁴ Tärä Mä raba nüne kä jutobiti yete kukwe ja tötikara keta jätä yebiti ni raba ni ja tötikaka nikwe ye tötike töi mikakäre rikakäre gätäbätä. Tärä ye mikadre gare ye känenkri, ja mräkätre ruäre käkwe nitre ja tötikaka kwe tötikadre kukwe ja tötikara yebiti ribebare ietre aune kukwe kwin namani bare. Ni rükadre kukwe ja tötikara keta jätä yekänti ngwane, nikwe ni ja tötikaka Bibliabätä nübaidre gätäbätä ye nikwe ñaka ngübadre, ñakare aune nuaindre biarebe aune käre. Nitre ja tötikaka itire itire ye ñaka ja erebe aune kukwe jene jene ben ja tuata kwetre. Aisete tätre dre ribere jai yebätä nikwe ja töi mikadre kwatibe aune nikwe dimikadre ño yebätä nikwe töbikadre. Ñaka nüke biarebe gätäbätä ngwane, nikwe ñaka ja di ngwandre nekä. Nikwe ngübadre bätärekä, akwa nübaidre jankunu.

15. ¿Kukwe meden meden jürä raba nemen nitre ja tötikakabätä?

¹⁵ Ni jatani ja tötike Bibliabätä ngwane, nikwe ja mikadre testiko Jehovakwe, ¿ye jürä nämäne nemen nibätä? Nikwe kukwe driedre ju ju te ye ñan raba nemen nie nämä nemen ruin nie o ni mräkätre o ja ketamuko nikwe käkwe ja mikadre ni rüere ye jürä nämäne nemen nibätä. Ye erere akräke, ja ruin ño nitre ja tötikaka ie ye rükai gare mäi. Kä jürä rabai nitrebätä niebare Jesukwe. Akwa kä jürä ye ñaka käkwe nitre ja tötikaka ketadrebätä Jehová mikakäre täte niebare Jesukwe (Mat. 10:16, 17, 27, 28, TNM). ¿Jesukwe nitre ja tötikaka kwe dimikani ño ñan kä jürä ngwen jabätä? ¿Aune ye erere ni raba nuainne ño kä nengwane?

16. Kukwe nemen gare nitre ja tötikaka ie yebätä blitadre kwetre yekäre, ¿nikwe dimikadre ño?

¹⁶ Dre nemen gare nitre ja tötikai ie yebätä blitadre kwe ye nikwe driedre ietre. Jesukwe nitre ja tötikaka juani kukwe driere ngwane, kä jürä namani bätätre raba ruin nie. Akwa nire ie kukwe driedre kwetre aune dre niedre kwetre ye Jesukwe driebare ietre dimikakäre (Mat. 10:5-7). Jesús erere, ¿ni raba nuainne ño? Ni ja tötikaka raba kukwe driere nire ie ye ni raba driere ie. Ñodre, kukwe keteiti Bibliabätä ye raba ni  iti dimike ye gare ie ya, ye nikwe ngwandretari ie. Biti, kukwe metre ye raba mike gare ño, ye nikwe bämikadre ie kukwe nuärebiti. Raba debe ni kräke ngwane tärä Mä raba nüne kä jutobiti yebätä sección “Nitre ruäre tä kukwe ne niere” aune “Nitre ruäre tä kukwe ne ngwentari” yebätä nikwe ja kitadre bentre. Nita ja kite ben kukwe nebiti ngwane, nikwe ja töi mikadre nitre ja tötikaka dimike. Ne kwe rabadre kukwe Bibliabätä ye driere kukwe nuärebiti aune töi jämebiti.

17. Mateo 10:19, 20, 29-31 yebiti, ¿ni raba ni ja tötikaka dimike ño tö ngwen Jehovai?

¹⁷ Nikwe nitre ja tötikaka dimikadre tö ngwen Jehovai. Jehovata nitre ja tötikaka ye tarere yebätä dimikai kwe niebare Jesukwe (ñäkädre Mateo 10:19, 20, 29-31 yebätä). Jehová täi nitre ja tötikaka ye ken dimikakäre ye nikwe ngwandre törö ie. Nita orare ben ngwane, tö dre nuainbätä ja känenkäre ye nikwe kädekadrete Jehovai orasionte, yebiti nikwe dimikai tö ngwen Jehovai. Franciszek, nünanka Polonia, ta niere: “Ti töi nämä dre nuainbätä ye ni dirikä tie nämä kädekete bä kabre nämä orare Jehovai ngwane, Jehová nämä orasion kwe kukwe nuin ye nämä tuin tie yebätä ti jataba orare arato. Sribi mrä mada rababa tikwe yekänti tikwe köbö käräba ngwarbe jai rikakäre gätä kribätä aune gätäbätä ye ngwane, Jehovakwe ti dimikaba rababa gare tie”.

18. ¿Ni dirikä Bibliabätä tä dre dre nuainne ye tuin ño Jehovai?

¹⁸ Akwa ni ñaka ni iti tötike Bibliabätä ngwane, ¿ni raba dre nuainne? ¿Ni raba ni ja tötikaka Bibliabätä dimike ja ngökö ñöte? Jän. ¿Ni raba nuainne ño? Ni rikadre ja mräkätre mada mukore nitre tötike. Jehová töita krubäte nitre ja tötikaka Bibliabätä yebätä. Nita dre dre nuainne nitre dimikakäre nökrö Jehová ken ye ütiäte Jehová kräke aune Jehovata ni tarere sribi ye nuainbätä (Is. 52:7).