1. Bichi abanafunzi ba Yesu babwiraga echigusho ch’abantu bajire?

CHIGUSHO chinene ch’abalume n’abakazi kurhenga mu bihugo binene banali baganira ndimi zinene, balichigushire haguma. Chintu chiguma chisomeze charhengerera m’olola lusiku. Bayahudi baguma barhondera kuderha endimi z’akaburhano z’abola balume n’abakazi barhengereraga mu bihugo binene! Echola chasomeza bwenene echola chigusho ch’abantu, aliko eby’abola Bayahudi baliri bababwira n’eby’entumwa Petro abwiraga boshi, byaliri by’akamaro bwenene. Echola chigusho ch’abantu chamenya oku chakayokolwa omu kuyerekana obwemere mu Yesu Kristu. Obola burhumwa bwalibahumire oku murhima bwenene. Abantu balihumirwe oku murhima bwenene, n’echola charhuma babaza ntya: “Bichi rhukwanene kujira?” Omu kushubiza, Petro aderha ntya: “Buli muguma wenyu abatizwe.”​—Mdo. 2:37, 38.

2. Bichi rhwaganirako mu gunola mwazi? (Olole efoto eli oku chiganda.)

² Echarhengereraga enyuma w’ahola, chalisomeze bwenene. Hofi bantu 3 000 babatizwa m’olola lusiku n’okuba banafunzi ba Kristu. Ogola gwaba murhondero gw’akasi kanene k’okujira abanafunzi Yesu arhegekaga abanafunzi bage bajire. Abanafunzi bage bagenderere kukola akola kasi kugera zene. Zene birhakashoboka okurhabala omuntu ahikire obubatizo mu bisanzi bigeke byonyine. Byakahema emyezi, omwaka changwa kurhaluka y’omwanafunzi ahikira ogola muhigo. Nk’oku onamenyere, bihemere okukola bwenene omu kurhabala omuntu abe mwanafunzi  wa Kristu, akaba zene oli wayiga Ebiblia na muntu mulebe. Mu gunola mwazi, rhwaganira oku biwakajira y’orhabala omwanafunzi wawe ahikire obubatizo.

3. Nk’oku biyerekenwe omu Matayo 28:19, 20, bichi omwanafunzi akwanene kujira y’ahikira obubatizo?

³ Embere omwanafunzi abatizwe, akwanene akolese omu kalamo kage eby’anayiga omu Biblia. (Osome Matayo 28:19, 20.) Amango omwanafunzi amahwanza kolesa eby’ali ayiga, anaba nka “mulume oyengehere” oshamberwe omu mufano gwa Yesu, wahumbaga bwenene n’okuyumbaka enju yage oku bale likomeere. (Mt. 7:24, 25; Lu. 6:47, 48) Nka gurhe rhwakarhabala omwanafunzi we Biblia akolese omu kalamo kage eby’ali ayiga? Leka rhulole bintu bisharhu rhukwanene kujira.

4. Nka gurhe rhwakarhabala omwanafunzi achihangane bwenene y’ahikira obubatizo? (Olole n’echisanduku “ Orhabale Omwanafunzi Wawe Achihebere h’Emihigo Anayihikire.”)

⁴ Orhabale omwanafunzi wawe achihebere h’emihigo. Bulagurhe okwanene kujira ntyo? Rhurhole ogula mufano: Nka bikuhemere orhole olugenzi lwa hale, byakakuhema oleme wayumanga hantu haguma hakwirire eju y’okuhumuka. Ahola, orhakavunika omurhima bulala obwene okw’emunda yiwaja hali hale bwenene. Konakuguma amango omwanafunzi we Biblia aly’achihebera h’emihigo ya hofi-hofi n’okuyihikira, abona oku byakagalikana ahikire omuhigo gwage g’okubatizwa. Okolese echigabi “Omuhigo” omu chitabu Simiira Akalamo Esiku n’Amango! omu kurhabala omwanafunzi wawe ajire amaja-mbere. Oku buzinda bwa buli somo, muganire okuntu ogola muhigo gwakarhabala omwanafunzi wawe akolese omu kalamo kage eby’amamala kuyiga. Akaba osimire omwanafunzi wawe ahikire ogwindi muhigo,  wakaguyandika omu hantu hayirikirwe “Ogwindi.” Okolese oku kahunda echila chigabi omu kushambala haguma n’omwanafunzi wawe oku mihigo ya hofi-hofi n’eya hale.

5. Nk’oku olwandiko lwa Marko 10:17-22 luderhere, bichi Yesu abwiraga mulume muguma w’omuchire ajire, na bulagurhe?

⁵ Orhabale omwanafunzi wawe ajire eby’ahindamula omu kalamo kage. (Osome Marko 10:17-22.) Yesu alimenyere oku byakakomerere mulume muguma w’omuchire okuguza ebirugu byage byoshi. (Mk. 10:23) Aliko Yesu amubwira achihangane ajire echola chintu chikomeere omu kalamo kage. Bulagurhe? Bulala Yesu alimuzigiire. Mango maguma rhwakalema rhwagangana kuheba omwanafunzi omurhima akolese eby’ali ayiga bulala rhubwene okw’arhaza kuba tayari kuhindamula ebintu akwanene ahindamule. Byakahema akasanzi y’abantu balekana engeso zabo za mira n’okuyambala oborhere buhyahya. (Kol. 3:9, 10) Aliko amango mwamahwanza kubiganirako buzira kulegama, intyo ku n’omwanafunzi naye arhalegama kuhindamula ebintu omu kalamo kage. Omu kujira naye eyola nganiro, wanamuyereka ok’omulagireko.​—Zb. 141:5; Mez. 27:17.

6. Bulagurhe rhukwanene kukolesa ebibazo by’okurhuma omuntu aderha ebi muli oku murhima?

⁶ Echibazo ch’okurhuma omuntu aderha ebi muli oku murhima chili chibazo rhunabaza omwanafunzi yi rhumenya bichi awazize oku bilolere omwazi ali ayiga. Okolese mwen’echola chibazo y’omenya bichi omwanafunzi ayunvirhe na bichi ayemerere. Nk’ojirire ntyo buli mango, echola chakakurhabala bikuyorohere kuganira naye amango mayinja oku bintu bikomeere. Echitabu Simiira Akalamo Esiku n’Amango! chigwerhe bibazo binene by’okurhuma omuntu aderha ebi muli oku murhima. Omufano, esomo lya 04 libazize ntya: “Nka gurhe owazize Yehova anachiyunva amango wamakolesa ezino lyage?” Esomo lya 09 libazize ntya: “Bintu bihe wakasima kuderha omu sala?” Burhanzi, byakahema omwanafunzi wawe aleme awaza embere ashubize oku bibazo by’okurhuma omuntu aderha ebi muli oku murhima. Wakamurhabala omu kumukoomeza aleme akengeera oku mandiko n’amafoto.

7. Nka gurhe rhwakakolesa bwinja eby’abandi bagereremo omu kalamo?

⁷ Amango omwanafunzi wawe amayunva bichi akwanene kujira, okolese eby’abantu bagereremo omu kalamo omu kumurhabala ajire ntyo. Omufano, akaba omwanafunzi wawe aly’agambwa kuhika oku mbuganano, wakamuyereka evideo Yehova Anshishikere ebonekene omu chigabi “Eyindi Myazi” ch’esomo lye 14. Mu masomo manene m’echila chitabu Simiira Akalamo Esiku n’Amango!, wabona mw’emifano eli nk’eyola omu chigabi “Humba Bwenene” changwa omu chigabi “Eyindi Myazi.” * Omenye wayinja wahuzanya omwanafunzi we Biblia n’owindi muntu yeshi-yeshi omu kuderha ntya, “Akaba yewe agalire kujira ntyo, nawe wakagala kujirako.” Oleke omwanafunzi achibonere yewe yenyine oku akagala kujira ntyo. Oku bwindi, oshambale oku mawazo makulu, marhabalaga omuntu oshamberwe omu video akolese enyigirizo ze Biblia. Nkabaga wakashambala oku lwandiko lw’akamaro changwa echindi chintu chilebe ajiraga chamurhabalaga. Amango moshi-moshi byakagalikana, oshambale bwenene okuntu Yehova arhabalaga oyola muntu.

8. Nka gurhe rhwakarhabala omwanafunzi werhu ahikire kuzigira Yehova?

⁸ Orhabale omwanafunzi wawe ahikire kuzigira Yehova. Nka gurhe wakajira ntyo? Olonze ebisanzi binja byakakurhabala oganire oku ngeso zinja za Yehova. Orhabale omwanafunzi wawe abone Yehova nka Mungu w’obusime  onarhabala balala bamuzigira. (1 Ti. 1:11; Ebr. 11:6) Oyereke omwanafunzi okw’apata enyungu omu kukolesa omu kalamo kage eyola myazi, onamufasiriye okw’ezola nyungu ziyerekene oku Yehova amuzigiire. (Isa. 48:17, 18) Omwanafunzi wawe ahirwa omurhima bwenene kuhindamula ebintu akwanene kuhindamula omu kalamo kage amango obuzigire bwage ku Yehova buli bwakula.​—1 Yo. 5:3.

9. Nk’oku olwandiko lwa Marko 10:29, 30 luderhere, bichi byakarhabala omuntu alekane na bintu bilebe y’ahikira obubatizo?

⁹ Byakahema omwanafunzi we Biblia alekane na bintu bilebe y’ahikira obubatizo. Kuguma n’olala mulume w’omuchire rhwashambalagako burhanzi, byakahema banafunzi baguma balekane n’ebintu by’omubiri. Nk’akasi kabo karhapatene n’amakanuni me Biblia, byakabahema balonze akandi kasi. Banene bakwanene balekane n’abera barhazigiire Yehova. Abandi bakajahikwa n’abantu b’omulala gwabo banashomba Abahamirizi ba Yehova. Yesu aliderhere oku byakakomerere bantu baguma okulekana n’ebyola bintu. Aliko alilaganyize oku balala bali bamukulikira barhakachiganya. Yehova abagisha omu kubaha omulala gugwerhe obuzigire ahakagarhi k’abantu bage. (Osome Marko 10:29, 30.) Nka gurhe wakarhabala omwanafunzi we Biblia ayunguke n’olola luhembo lwinja bwenene?

10. Bichi ebinwa Manuel aderhere bikuyigirize?

¹⁰ Obe mwira w’omwanafunzi wawe. Kuli kw’akamaro oyereke omwanafunzi wawe ok’omulagireko. Bulagurhe? Yunva ebi Manuel, olamire omu Mexique aderhere. Ashambere okuntu omwalimu wage alimurhabere amango aliri ayiga Ebiblia. Aderhere ntya: “Buli mango embere rhuyige, mwalimu wani aliri ambaza emyazi yani. Aliri antabala nchiyunve bwinja n’okundeka mubwire buli chintu. Nalichibwenere kweri okuntu andagireko.”

11. Nyungu zichi abanafunzi berhu bakagwarha omu kugeza akasanzi haguma nerhu?

¹¹ Ogeze ebisanzi haguma n’abanafunzi bawe kuguma nk’oku Yesu naye aliri ageza ebisanzi haguma n’abanafunzi bage. (Yoh. 3:22)  Akaba byakahashikana, ohamagale omwanafunzi wawe oli wajira amaja-mbere emwawe musangire akalyo haguma, changwa mulole haguma naye eprograme ya buli mwezi ya JW Télédiffusion. Omwanafunzi wawe akasima omuhamagale ahanene amango bera bage n’abantu b’omulala gwage bali bajira esiku zikulu z’amadini changwa z’echihugo. Mw’amola mango akachiyunva nk’ahugirwe. Mwene-werhu Kazibwe olamire e Buganda aderhere ntya: “Ebisanzi nagezeze haguma na mwalimu wani n’okuyiga Ebiblia byarhumire namenya bintu binene ku Yehova. Nalibwene oku Yehova alagire oku bantu bage bwenene n’okubanagwerhe busime bunene. Echola chinalilagirire omu kalamo kani.”

12. Bulagurhe rhurhakwanene kuzigana kugenda na muhubiri muguma y’on’oyo amango rhwajiongoza efunzo?

¹² Ogende n’abahubiri balengene oku funzo lye Biblia. Mango maguma rhwakabona oku biyorohere okugenda rhwenyine changwa n’okugenda na muhubiri muguma y’on’oyola oku funzo. Chiro akaba oku byakarhuyorohera okujira ntyo, omwanafunzi werhu akayunguka bwenene amango rhuli rhwagenda n’abahubiri balengene. Mwene-werhu Dmitrii olamire omu Moldova aderhere ntya: “Buli muhubiri waliri ayinja oku funzo lyani aliri afasiriya ebintu omu bwage-bwage bulyo. Okola kwalintabere imbone okwindi kuntu nakakolesa ebi ndi nayiga. Intanayunvaga eshonyi zinene amango nahikaga oku mbuganano ob’oburhanzi, bulala nabaga nabuganene na banene mu bene-berhu na bali-berhu.”

13. Bulagurhe rhukwanene kurhabala omwanafunzi werhu ayinje ahika oku mbuganano?

¹³ Orhabale omwanafunzi wawe aleme aja oku mbuganano z’echibaga. Bulagurhe? Bulala Yehova ahemere balala banamuharamya bayinje babuganana haguma; chili chigabi ch’obuharamye bwerhu. (Ebr. 10:24, 25) Echindi, bene-berhu na bali-berhu bali mulala gwerhu gw’ekiroho. Amango rhuli oku mbuganano haguma nabo, kuli nka kulala rhwakabere ahambuga haguma nabo omu kusangira akalyo kalokere. Amango wamarhabala omwanafunzi wawe ayinje ahika oku mbuganano, eyi wamamurhabala ajire entambu y’akamaro bwenene y’ahikira obubatizo. Aliko hali oku byakamukomerera ahwanze kuhika oku mbuganano. Nka gurhe echitabu Siimira Akalamo Esiku n’Amango! chakarhabala omwanafunzi wawe ahime echibazo choshi-choshi chakarhuma arhahika oku mbuganano?

14. Gurhe rhwakaheba abanafunzi berhu omurhima bahwanze kuhika oku mbuganano?

¹⁴ Okolese esomo lye 10 ly’echitabu Siimira Akalamo Esiku n’Amango! omu kuhira omwanafunzi wawe omurhima. Abahubiri bagwerhe obufundi bahemwaga barhange bakolese elila somo omu mahubiri embere echila chitabu chirhenge, balipatire amalehe menja bwenene omu kurhabala abanafunzi babo bayinje bahika oku mbuganano. Aliko chiro akaba ntyo, omenye walingiriza muyige esomo lye 10 y’ohamagala omwanafunzi wawe we Biblia aleme ahika oku mbuganano zerhu. Omuhamagale juba-juba nk’oku byakanagalikana, onagenderere kujira ntyo. Abanafunzi be Biblia barhajira ebibazo bili kuguma. Bobola oseze obwenge oku by’omwanafunzi wawe alagirire, onalole gurhe wakamurhabala. Omenye wavunika omurhima akaba arhahwanzize kuja oku mbuganano han’aho. Aliko obe muntu w’okulembera onagenderere kumuhamagala.

15. Buba buchi omwanafunzi werhu akaba agwerhe?

¹⁵ K’ochiyibukire okuntu waliri wachiyunva nk’oyubahire okuba Muhamirizi wa Yehova? Nkabaga walichiyunvirhe nk’orhakagala chiro kuhubiri nju ku nju. Changwa wakaba eyi waliyubahire okw’abantu b’omulala gwawe changwa bera bawe bakupinga. Akaba ntyo ku bili, wakachiheba ahali h’omwanafunzi wawe we Biblia.  Yesu aliderhere oku bantu baguma bakagwarhire obola buba. Aliko alihebere abanafunzi bage omurhima bamenye baleka obuba bwarhuma barhagenderera kukolera Yehova. (Mt. 10:16, 17, 27, 28) Nka gurhe Yesu arhabalaga abanafunzi bage bahime obuba bwabo? Na nka gurhe wakayiga omufano gwage?

16. Gurhe rhwakarhabala omwanafunzi werhu ashambale n’abandi oku by’ali ayiga?

¹⁶ Okoomeze omwanafunzi wawe kubuya-buya ashambalire abandi oku bilolere obwemere bwage. Byakashobokana okw’abanafunzi ba Yesu baliyubahire amango abarhuma baje hubiri. Aliko Yesu alibarhabere omu kubabwira ngahe bahubiri n’oburhumwa bakwanene kuhubiri. (Mt. 10:5-7) Nka gurhe wakayiganya Yesu? Orhabale omwanafunzi wawe amenye ngahe akahubiri. Omufano, omubaze akaba amenyere muntu muguma wakasima amenye bukweri bulebe bwe Biblia. Naho, wanaja wamurhabala arheganye eby’akaderha omu kumuyereka obulyo buyanguhire akabwira mw’abandi obola bukweri. Omu mango makwanene, wakamukoomeza omu kukolesa echigabi “Bantu Baguma Banaderha” na “Hali Owakabaza,” bili omu chitabu Siimira Akalamo Esiku n’Amango! Amango wamajira ntyo, wanachihangana kukoomeza omwanafunzi wawe akolese Ebiblia omu kuhaana ebishubizo biyorohere n’amayeri.

17. Nka gurhe rhwakakolesa olwandiko lwa Matayo 10:19, 20, 29-31 omu kurhabala omwanafunzi werhu alangalire Yehova?

¹⁷ Orhabale omwanafunzi wawe alangalire Yehova. Yesu alibwirire abanafunzi bage oku Yehova abarhabala bulala abazigiire. (Osome Matayo 10:19, 20, 29-31.) Oyibuse omwanafunzi wawe oku Yehova amurhabala naye. Wakamurhabala alangalire Yehova omu kusalira haguma naye oku bilolere emihigo yage. Franciszek olamire omu Pologne aderhere ntya: “Mwalimu wani aliri azigana kuderha emihigo yani omu sala. Amango mbona okuntu Yehova ashubize oku masala ma mwalimu wani, han’aho narhondera kusalira. Nalibwene oku Yehova aliri antabala eyi nakahemere oku kasi kani kahyahya esiku z’okurhakola y’inja oku mbuganano z’echibaga n’oku mbuganano nkulu.”

18. Nka gurhe Yehova anachiyunva oku bilolere akasi abalimu ba Bakristu banakola?

¹⁸ Yehova alagire bwenene oku banafunzi berhu be Biblia. Anasima bwenene okuntu abalimu be Chikristu bali bachihangana bwenene omu kurhabala abantu bamuyegere, n’echola chinarhuma abazigira. (Isa. 52:7) Akaba zene orhali waongoza efunzo lye Biblia, wakachirhabala abanafunzi be Biblia bajire amaja-mbere kuhikira obubatizo omu kuherekeza abandi bahubiri amango bamaja ongoza amafunzo mabo.