1. Yexus cov thwjtim hais rau cov neeg coob coob uas tuaj hauv Yeluxalees tias lawv yuav tau ua dabtsi?

 MUAJ ib hnub, muaj ib pab pojniam thiab txivneej coob coob tuaj rau hauv Yeluxalees. Lawv tuaj ntau lub tebchaws tuaj thiab hais ntau yam lus. Hnub ntawd cov neeg Yudais ib txhia cia li txawj hais lawv cov lus. Qhov no yog ib qho uas phim hwj kawg. Tiamsis qhov uas raug lawv siab heev thiab lawv haj yam xav tsis thoob li yog qhov uas cov Yudais thiab tus tubtxib Petus qhia rau lawv tias lawv yuav tau kev cawm dim yog hais tias lawv ntseeg Yexus. Lawv thiaj hais tias: “Cov kwvtij peb yuav ua li cas?” Petus thiaj teb lawv tias: ‘Nej txhua tus yuav tsum ua kevcai raus dej.’​—Tes Haujlwm 2:37, 38.

2. Hauv zaj no peb yuav tham txog dabtsi? (Saib daim duab ntawm lub khaum.)

² Tom qab Yexus cov thwjtim nrog cov neeg coob coob no tham tag, muaj li 3,000 tus los ua kevcai raus dej hnub ntawd. Nov yog thawj zaug uas Yexus cov thwjtim mus coj neeg los ua thwjtim li Yexus sam hwm. Niaj hnub nimno los peb yeej tseem mus coj tibneeg los ua Yexus cov thwjtim thiab, tiamsis peb paub hais tias yuav siv sijhawm ntev. Tej zaum yuav yog ntau hli lossis tsheej xyoo tus kawm Vajlugkub mam li ua kevcai raus dej. Hauv zaj no peb yuav kawm seb peb yuav ua li cas tus kawm Vajlugkub thiaj li yuav los ua kevcai raus dej.

3. Raws li Mathais 28:19, 20 hais, tus kawm Vajlugkub yuav tau ua li cas ua ntej nws ua kevcai raus dej?

³ Nyeem Mathais 28:19, 20. Tus kawm Vajlugkub yuav tsum ua li tej uas nws kawm nws mam li ua tau kevcai raus dej. Thaum nws ua li no ces nws zoo ib yam li tus neeg muaj tswvyim hauv Yexus zaj lus piv txwv uas khawb qhov ncej tob tob ua nws lub tsev rau saum pob zeb. (Mathais 7:24, 25; Lukas 6:47, 48) Cia peb tham txog 3 yam uas peb yuav ua tau los pab tus kawm Vajlugkub ua li tej nws kawm.

4. Peb yuav pab tus kawm Vajlugkub li cas nws thiaj yuav ua tau kevcai raus dej? (Mus saib lub ntsiab me “ Pab Tus Kawm Vajlugkub Seb Nws Yuav Ua Dabtsi Thiab Yuav Ua Li Cas Nws Thiaj Ua Tau Li Ntawd.”)

⁴ Pab tus uas koj qhia Vajlugkub rau ua zoo xav seb nws xav ua dabtsi. Muab piv txwv li no, yog peb mus kev deb es txojkev ntawd muaj chaw nuam yaj ces zoo li qhov chaw peb yuav mus ntawd tsis deb luaj twg. Zoo ib yam li ntawd, yog tus kawm Vajlugkub paub hais tias tej uas nws kawm ntawd muaj tej yam nws yuav ua tau tamsim no lossis tsis ntev tom ntej no ces qhov uas nws xav ua kevcai raus dej yuav tsis nyuaj ua luaj twg thiab. Phau Nyob Kaj Siab Lug Mus Ib Txhis muaj ib ntu hu ua “Koj Xav Xyaum Yam Twg.” Thaum neb kawm ib zaj twg tag, nrog nws tham txog ntu no seb nws yuav tau ua dabtsi ntxiv thiaj pab tau nws thiab yog muaj lwm yam nws xav xyaum los kom nws muab sau cia hauv qab kab lus “Koj xav xyaum li cas ntxiv.” Nco ntsoov siv ntu no los nrog tus kawm Vajlugkub tham txog tej uas nws xav ua tamsim no thiab yav tom hauv ntej.

5. Raws li Malakaus 10:17-22, Yexus hais kom tus txivneej nplua nuj ua dabtsi thiab yog vim li cas?

⁵ Nyeem Malakaus 10:17-22. Yexus yeej paub tias yuav tsis yoojyim rau ib tug neeg  nplua nuj muab nws tej qhov txhia chaw muag. (Malakaus 10:23) Txawm li ntawd los, Yexus tseem hais kom tus txivneej uas khiav tuaj cuag nws ua li ntawd vim Yexus hlub nws. Muaj tej thaud, thaum chiv thawj peb yuav tsis txhawb kom tus kawm Vajlugkub xyaum ua nws lub neej raws li tej uas nws kawm vim peb xav tias nws tseem paub tsis tau txaus thiab yeej yuav siv sijhawm rau tej tug hloov nws lub neej kom haum Yehauvas siab. (Kaulauxais 3:9, 10) Tiamsis yog peb hlub nws ces peb yim ntxov nrog nws tham los yim zoo xwb. (Phau Ntawv Nkauj 141:5; Pajlug 27:17) Yog li ntawd peb yuav tau pab tus kawm Vajlugkub kom nws hloov nws lub neej raws li tej uas nws kawm.

6. Vim li cas thiaj zoo rau peb nrog tus kawm Vajlugkub tham seb nws xav li cas txog zaj nws kawm?

⁶ Thaum koj qhia Vajlugkub rau ib tug, zoo rau koj nrog nws tham seb nws xav li cas txog lub ntsiab uas neb tabtom kawm, koj thiaj paub seb nws to taub li cas thiab nws ntseeg li cas. Yog koj ua li no ces yuav yoojyim rau nws tham txog tej uas nyuaj rau nws ntseeg rau koj. Muaj cov lus uas koj yuav nrog tus kawm tham txog nyob hauv phau Nyob Kaj Siab Lug Mus Ib Txhis. Xws li zaj kawm 04 neb yuav tham txog lo lus no: “Yehauvas puas nyiam thaum koj tuav nws lub npe hu nws?” Thiab hauv zaj kawm 09: “Koj xav thov Yehauvas txog tej yam twg?” Tej zaum thaum xub thawj yuav tsis yoojyim rau tus kawm Vajlugkub qhia tias nws xav li cas. Tiamsis yog koj qhia kom nws ua zoo xav txog cov duab thiab cov nqi Vajlugkub ces yuav pab tau nws.

7. Cov kwvtij nkauj muam cov qauv yuav pab tau tus kawm Vajlugkub li cas?

⁷ Thaum tus kawm Vajlugkub paub tias nws yuav tau ua dabtsi ces qhia nws txog cov kwvtij nkauj muam uas twb ua dua los lawm seb nws yuav xyaum lawv li cas. Xws li yog tus kawm Vajlugkub ntshai mus kev sib txoos ces tso zaj yeeb yaj kiab Yehauvas Mob Siab Txog Kuv uas nyob hauv zaj kawm 14 ntawm ntu “Tshawb Ntxiv” rau nws saib. Phau Nyob Kaj Siab Lug Mus Ib Txhis ntawm ntu “Kawm Ntxiv” thiab “Tshawb Ntxiv” muaj cov qauv no ntau heev. b Ceev faj tsis txhob muab tus kawm Vajlugkub piv rau lwm tus thiab hais tias, “Yog nws twb ua tau ces koj yeej ua tau thiab!” Tiamsis tham txog cov nqi Vajlugkub hauv zaj yeeb yaj kiab thiab tej uas pab tus hauv zaj yeeb yaj kiab ua tau li phau Vajlugkub hais, thiab tham tias Yehauvas pab tus ntawd li cas.

8. Peb yuav pab tus kawm Vajlugkub li cas nws thiaj muaj kev hlub rau Yehauvas?

⁸ Pab tus koj qhia Vajlugkub rau kom nws muaj kev hlub rau Yehauvas. Xws li tham txog Yehauvas tej yam ntxwv thiab qhia rau nws tias Yehauvas xav kom nws ua li tej nws kawm vim Yehauvas hlub nws, thiab tej uas nws kawm yuav pab tau nws. (Yaxayas 48:17, 18; Henplais 11:6) Thaum tus kawm Vajlugkub muaj kev hlub rau Yehauvas ntau zuj zus ces yuav yoojyim dua rau nws hloov nws lub neej.​—1 Yauhas 5:3.

9. Ua ntej ib tug yuav ua kevcai raus dej nws yuav tau tso qee yam tseg. Malakaus 10:29, 30 yuav pab tau nws li cas?

⁹ Tus kawm Vajlugkub yuav tau tso qee yam tseg ua ntej nws los ua kevcai raus dej. Cov  kawm Vajlugkub ib txhia yuav tau tso tej yam uas lawv muaj tseg li tus txivneej nplua nuj uas peb tham tas los. Ib txhia yuav tau tso tes haujlwm uas Vajtswv tsis pom zoo tseg. Muaj coob tus yuav tau tso tseg lawv cov phoojywg uas tsis teev tiam Yehauvas. Hos ib txhia, lawv tsev neeg tso lawv tseg vim lawv tsev neeg tsis nyiam Yehauvas Cov Timkhawv. Yexus yeej paub hais tias yeej tsis yoojyim rau cov kawm Vajlugkub tso tej no tseg. Tiamsis Yexus cog lus tias Yehauvas tsev neeg yuav yog lawv tsev neeg thiab yuav hlub lawv. (Nyeem Malakaus 10:29, 30.) Koj yuav pab tus uas koj qhia Vajlugkub rau li cas nws thiaj yuav tau txais tej txiaj ntsim no?

10. Koj kawm tau li cas los ntawm kwvtij Mavaus?

¹⁰ Yog koj sib raug zoo nrog tus uas koj qhia Vajlugkub rau ces nws yuav paub hais tias koj hlub tshua nws tiag. Ib tug kwvtij nyob Mev teb hu ua Mavaus (Manuel) hais txog thaum nws tseem kawm Vajlugkub tias: “Tus kwvtij uas qhia Vajlugkub rau kuv nco ntsoov nug kuv tias kuv nyob li cas ua ntej wb pib kawm Vajlugkub. Kuv tsis ntshai nrog nws tham vim kuv paub hais tias nws yeej hlub tshua kuv tiag.”

11. Thaum peb caw tus uas peb qhia Vajlugkub rau tuaj xyuas peb yuav pab tau nws li cas?

¹¹ Nrog tus uas koj qhia Vajlugkub rau ua ke ib yam li thaum ub Yexus nrog nws cov thwjtim. (Yauhas 3:22) Yog tus uas koj qhia Vajlugkub rau pib ua li tej nws kawm lawm ces kuj zoo rau koj caw nws tuaj xyuas koj, nrog koj noj ib pluas mov, lossis nrog koj saib Yehauvas Cov Timkhawv Tshooj TV ua ke. Thiab nws yuav zoo siab heev yog koj caw nws tuaj xyuas koj thaum nws tsev neeg ua tej kab lig kevcai uas tsis raws li phau Vajlugkub qhia. Ib tug kwvtij hu ua Kaxives (Kazibwe) uas nyob tebchaws Yunkadas (Uganda) hais tias: “Thaum kuv nrog tus kwvtij uas qhia Vajlugkub rau kuv ua ke, kuv kawm tau ntau yam txog Yehauvas ib yam li thaum nws tuaj qhia Vajlugkub rau kuv thiab.” Nws hais  ntxiv tias: “Thaum kuv pom Yehauvas Cov Timkhawv txawj sib hlub thiab muaj kev zoo siab ua rau kuv xav nrog lawv.”

12. Vim li cas thaum peb mus qhia Vajlugkub rau ib tug thiaj zoo rau peb coj lwm tus nrog peb mus thiab?

¹² Thaum koj mus qhia Vajlugkub rau ib tug, coj lwm tus nrog koj mus thiab. Tej zaum yuav yoojyim dua yog koj mus koj ib leeg lossis niaj zaus coj tus qub nrog koj mus xwb. Tiamsis yog koj ib sij coj ib tug tshiab mus ces nws yuav kawm tau ntau yam ntawm ntau tus. Kwvtij Dimiv-rhim (Dmitrii) nyob tebchaws Maudauva (Moldova) hais tias: “Thaum tus kwvtij uas qhia Vajlugkub rau kuv coj lwm tus nrog nws tuaj, kuv kawm tau ib yam tshiab ntawm tus ntawd. Kuv thiaj paub muab tej kuv kawm coj los siv rau ntau ntau yam. Thiab vim kuv twb paub cov kwvtij nkauj muam coob tus lawm ces thaum kuv mus kev sib txoos kuv thiaj tsis txaj muag.”

13. Vim li cas peb yuav tsum yaum tus kawm Vajlugkub mus koom tej kev sib txoos?

¹³ Yehauvas sam hwm kom cov uas teev tiam nws mus sib txoos ua ke. (Henplais 10:24, 25) Yog li ntawd nco ntsoov yaum tus uas koj qhia Vajlugkub rau kom nws mus koom peb tej kev sib txoos. Thaum nws tuaj kev sib txoos ces zoo ib yam li nws tuaj nrog peb cov kwvtij nkauj muam noj ib pluas mov li ib tse neeg. Qhov uas nws tuaj kev sib txoos yuav pab kom nws ua tau kevcai raus dej tiamsis tej zaum yuav tsis yoojyim rau nws tuaj. Yog li, phau Nyob Kaj Siab Lug Mus Ib Txhis yuav pab kom nws tuaj tau tej kev sib txoos li cas?

14. Peb yuav pab tus kawm Vajlugkub li cas nws thiaj yuav mus koom peb tej kev sib txoos?

¹⁴ Zaj kawm 10 hauv phau Nyob Kaj Siab Lug Mus Ib Txhis yuav pab tau tus kawm Vajlugkub mus kev sib txoos. Cov kwvtij nkauj muam uas sim siv phau ntawv no ua ntej muab tso tawm rau sawvdaws siv hais tias zaj no yeej pab tau cov lawv qhia Vajlugkub rau mus kev sib txoos. Nco ntsoov caw tus kawm Vajlugkub tuaj kev sib txoos thaum koj mus qhia Vajlugkub rau nws, tsis txhob tos kom txog zaj kawm 10 tso. Cov kawm Vajlugkub nyias muaj nyias ib yam teeb meem, yog li ntawd ua zoo xyuas seb koj yuav ua li cas koj thiaj pab tau tus koj qhia, nws thiaj tuaj kev sib txoos. Yog nws tsis tuaj los tsis txhob qaug zog tiamsis ua siab ntev rau nws thiab yaum nws tsis tseg.

15. Tus kawm Vajlugkub yuav ntshai dabtsi?

¹⁵ Koj puas nco qab thaum koj nyuam qhuav kawm Vajlugkub? Koj puas ntshai los ua Yehauvas ib tug Timkhawv thiab? Tej zaum koj ntshai vim koj txaj muag mus qhia Vajlugkub lossis koj ntshai tsam koj tsev neeg thiab koj cov phoojywg tawm tsam koj. Tus uas koj qhia Vajlugkub rau los tej zaum yuav ntshai ib yam li ntawd thiab. Yexus paub li ntawd nws thiaj txhawb kom nws cov thwjtim tsis txhob cia ib yam dabtsi ua rau lawv ntshai los teev tiam Yehauvas. (Mathais 10:16, 17, 27, 28) Yexus pab nws cov thwjtim li cas thiab koj yuav xyaum ua li Yexus li cas?

16. Peb yuav qhia tus kawm Vajlugkub kom nws paub mus qhia nws txojkev ntseeg rau lwm tus li cas?

¹⁶ Qhia tus kawm Vajlugkub kom nws paub mus qhia nws txojkev ntseeg rau lwm tus. Yexus cov thwjtim thaum ub los tej zaum lawv yeej ntshai mus tshaj tawm thiab. Tiamsis Yexus ua zoo qhia rau lawv tias lawv yuav mus tshaj tawm qhov twg thiab thaum lawv mus tshaj tawm lawv yuav hais li cas. (Mathais 10:5-7) Koj kuj pab tau tus uas koj qhia Vajlugkub rau ib yam li ntawd thiab. Nug nws seb tej  uas nws kawm hauv phau Vajlugkub puas pab tau cov uas nws paub thiab nrog nws npaj seb nws yuav nrog lawv tham li cas. Muaj cov lus uas koj yuav siv tau los xyaum nrog tus uas koj qhia Vajlugkub rau, hauv phau Nyob Kaj Siab Lug Mus Ib Txhis ntawm ntu hu ua “Ib Txhia Hais Tias.” Thaum neb xyaum, nco ntsoov qhia kom nws siv phau Vajlugkub.

17. Peb yuav muab Mathais 10:19, 20, 29-31 los pab tus kawm Vajlugkub kom nws tso siab rau Yehauvas li cas?

¹⁷ Pab kom tus koj qhia Vajlugkub rau tso siab rau Yehauvas. Yexus qhia nws cov thwjtim tias Yehauvas yuav pab lawv rau qhov nws hlub lawv. (Nyeem Mathais 10:19, 20, 29-31.) Qhia tus kawm Vajlugkub kom nws tso siab rau Yehauvas rau qhov Yehauvas yuav pab nws thiab. Thaum koj thov Yehauvas nrog nws los thov kom Yehauvas pab nws txog tej uas nws xav ua. Ib tug kwvtij nyob Phaulees (Poland) hais tias: “Thaum tus kwvtij uas qhia Vajlugkub rau kuv thov Yehauvas txog tej uas kuv xav ua es kuv pom hais tias Yehauvas teb nws tej lus thov lawm, kuv txawm pib thov Yehauvas thiab. Kuv pom hais tias Yehauvas yeej pab kuv thaum kuv thov sijhawm so tom haujlwm mus tej kev sib txoos thiab rooj sib txoos.”

18. Yehauvas xav li cas xwb rau cov uas mus qhia Vajlugkub rau lwm tus?

¹⁸ Yehauvas hlub cov uas kawm Vajlugkub heev thiab Yehauvas paub hais tias cov uas mus qhia Vajlugkub rau lawv los yeej khwv heev. Yehauvas yeej hlub lawv kawg thiab. (Yaxayas 52:7) Yog hais tias tamsim no koj tsis muaj ib tug uas koj qhia Vajlugkub rau los koj yeej tseem pab tau cov kawm Vajlugkub los ua kevcai raus dej thaum koj nrog ib tug mus qhia Vajlugkub rau lawv.