1. Iesu ena hahediba taudia ese vadivadi taudia momo dekenai dahaka sivarai idia harorolaia?

TATAU bona hahine hutuma be Ierusalema dekenai idia mai. Idia be tano idauidau taudia bona edia gado be idauidau. Unai dina ai hoa gauna ta ia vara. Iuda taudia haida be unai vadivadi taudia edia gado ai idia hereva. Iuda taudia ese idia herevalaia gaudia bona aposetolo Petero ese ia herevalaia gauna dekenai idia hoa. Idia dibaia gauna be Iesu Keriso abidadama henia karana amo mauri do idia abia. Unai sivarai ese edia kudouna ia hamarerea dainai, idia henanadai: “Dahaka ai karaia be namo?” Vadaeni, Petero ia haere: “Bapatiso umui abia be namo.”​—Kara 2:37, 38.

2.  Inai stadi ai dahaka do ita herevalaia? (Rau 1 ena laulau itaia.)

² Unai dina ai hoa gauna ma ta ia vara: Idia vadivadi taudia 3,000 be bapatiso idia abia bona Keriso ena hahediba taudia ai idia lao. Iesu ese ena hahediba taudia dekenai ia henia hahegani, hahediba taudia halaoa gaukarana, be unai dina ai idia hamatamaia. Unai nega amo ema bona hari, unai gaukara ita karaia noho. Hari, Baibel stiuden be hora haida sibona lalonai ita durua diba lasi bapatiso ia abia totona. To reana hua haida eiava lagani haida lalonai do ita durua murinai, bapatiso ia abia. Stiuden ita durua hahediba tauna ai ia lao totona be mai ena hekwarahi. Inai stadi ai, do ita itaia edena dala ai emu Baibel stiuden do oi durua bapatiso ia abia totona.

3. Mataio 28:19, 20 hegeregerena, stiuden ese dahaka do ia karaia bapatiso ia abia totona?

³ Baibel stiuden ia do bapatiso lasi neganai, Baibel amo ia  dibaia gaudia ia badinaia be namo. (Mataio 28:19, 20 duahia.) Unai ia karaia neganai, ia be Iesu ena haheitalai lalonai ia gwauraia “aonega tauna” bamona. Ia ese tano ia geia dobu ela bona nadi badana ta latanai ena ruma ia haginia. (Mat. 7:24, 25; Luka 6:47, 48) Edena dala ai stiuden ita durua ia dibaia gaudia ia badinaia totona? Mani heduru daladia toi ita herevalaia.

4. Edena dala ai stiuden ita durua ela bona bapatiso ia abia? (Maua ladana “ Stiuden Oi Durua Tahua Gaudia Ia Atoa Bona Ia Hagugurua” itaia.)

⁴ Stiuden oi durua tahua gaudia do ia atoa. Dahaka dainai unai oi karaia be namo? Mani inai haheitalai oi laloa. Bema oi be gabu daudauna ta dekenai oi raka lao noho, reana gabu mai hairaidia hegeregere ororo eiava sinavai badinai do oi laga-ani. Unai amo oi lao henia gabuna ena daudau do oi laloa momo lasi. Unai hegeregerena, stiuden be nega kwadogina lalonai ia atoa tahua gaudia ia hagugurua neganai, ia diba ena tahua gauna badana bapatiso, do ia abia diba. Mauri Moalelaia Hanaihanai! bukana dekenai inai kahana, “Tahua Gauna” oi gaukaralaia emu stiuden oi durua ia goada ia lao totona. Leseni ta ta ena dokona ai, stiuden be ia dibaia gaudia ese do ia durua ena tahua gauna ia hagugurua daladia do umui herevalaia. Bema oi ura emu stiuden be tahua gaudia ma haida ia hagugurua, inai kahana “Ma haida” henunai umui torea diba. Hanaihanai stiuden ida ena tahua gaudia umui herevalaia be namo.

5. Mareko 10:17-22 hegeregerena, Iesu ese taga tauna ia hamaoroa dahaka do ia karaia, bona dahaka dainai?

⁵ Stiuden oi durua senisi haida do ia karaia. (Mareko 10:17-22 duahia.) Iesu ia diba unai taga tauna ese ena kohu ibounai ia hoihoilaia be auka. (Mar. 10:23) To, Iesu ese ia hamaoroa ena mauri lalonai  senisi haida do ia karaia. Dahaka dainai? Badina Iesu ese ia lalokau henia. Nega haida stiuden ita hagoadaia lasi ia dibaia gaudia ia badinaia totona, badina ita laloa ia do hegeregere lasi. Haida be nega daudau lalonai idia hekwarahi edia mauri gunana idia haidaua totona. (Kol. 3:9, 10) To bema stiuden oi durua haraga, ena mauri ai senisi do ia karaia matamaia. Stiuden ida unai bamona gaudia umui herevalaia neganai, oi hahedinaraia ia oi laloa bada.​—Sal. 141:5; Aon. 27:17.

6. Dahaka dainai stiuden ita nanadaia ena lalohadai ia gwauraia be namo?

⁶ Namona be stiuden ita nanadaia ita stadilaia gauna dekenai ena lalohadai do ia gwauraia. Unai amo do oi diba stiuden be dahaka gaudia ia lalopararalaia bona abia dae. Bema hanaihanai unai umui karaia, do ia auka lasi ia daradaralaia gaudia umui herevalaia totona. Mauri Moalelaia Hanaihanai! bukana lalonai unai bamona henanadai momo idia noho. Hegeregere, leseni 04 ena henanadai be: “Iehova ena ladana oi gaukaralaia neganai, oi laloa iena hemami be edena bamona?” Bona leseni 09 be: “Emu guriguri ai dahaka gaudia oi ura gwauraia?” Matamanai, do ia auka emu stiuden ese unai henanadai ia haerelaidia totona. Ia oi durua diba idia noho siri bona laulau ia lalohadailaia totona.

7. Edena dala ai mauri sivaraidia amo iseda stiuden ita durua diba?

⁷ Emu stiuden ia ura senisi haida do ia karaia neganai, mauri sivaraidia oi gaukaralaia ia oi durua totona. Hegeregere, bema ia be hebou dekenai ia mai hanaihanai lasi, leseni 14 ai “Referens Itaia” kahanai ia noho vidio ladana “Iehova be lau ia laloa bada” oi hahedinaraia diba. Mauri Moalelaia Hanaihanai! bukana ena “Diba Ma Haida Abia” eiava “Referens Itaia” ena kahana dekenai unai bamona mauri sivaraidia idia noho. * Namo lasi stiuden be ma ta ida oi hahegeregerea bona oi gwau: “Bema ia karaia diba, oi danu oi karaia diba.” Namona be stiuden sibona ese unai do ia lalopararalaia. To, namona be vidio lalonai ia hedinarai tauna be dahaka ese ia durua unai amo Baibel ena hereva ia badinaia, dahaka ia karaia bona vidio ena siri badana ta umui herevalaia diba. Danu, Iehova ese unai tauna ia durua dalana oi herevalaia.

8. Edena dala ai iseda stiuden ita durua Iehova ia lalokau henia totona?

⁸ Emu stiuden oi durua Iehova do ia lalokau henia. Edena dala ai? Dala idauidau ai ia oi durua Iehova ena kara namodia ia dibaia totona. Stiuden dekenai oi hahedinaraia, Iehova be moale Diravana bona Ia idia lalokau henia taudia ia durua. (1 Tim. 1:11; Heb. 11:6) Ia oi hadibaia ia dibaia gaudia ia badinaia neganai, namo do ia davaria, bona unai ese ia hahedinaraia Iehova be ia ia lalokau henia. (Isa. 48:17, 18) Stiuden ena lalokau Iehova dekenai ia goada neganai, unai ese do ia durua senisi haida ia karaia totona.​—1 Ioa. 5:3.

9. Mareko 10:29, 30 hegeregerena, dahaka ese stiuden ia durua diba gau haida ia rakatania bona bapatiso ia abia totona?

⁹ Baibel stiuden be bapatiso ia abia totona, gau haida do ia dadaraia. Matamanai ita herevalaia taga tauna bamona, stiuden be gau haida do idia rakatania danu. Bema edia moni gaukara be Baibel ena hakaua  herevadia ia utua, gaukara ma ta idia tahua be namo. Reana haida be Iehova idia ura henia lasi turadia do idia rakatania. Ma haida be edia ruma bese taudia ese idia dadaraia, badina Iehova ena Witnes taudia idia ura henia lasi. Iesu ia gwau do ia auka unai gaudia idia rakatania totona. To, ia gwauhamata iena murinai idia raka taudia be do idia lalohisihisi lasi. Oibe, Iehova ese do ia hanamodia bona Keristani ruma besena lalonai do idia noho. (Mareko 10:29, 30 duahia.) Edena dala ai stiuden oi durua diba, unai hahenamo ia moalelaia totona?

10. Manuel ena hereva amo dahaka oi dibaia?

¹⁰ Baibel stiuden oi tura henia. Gau badana be oi hahedinaraia ia oi laloa bada. Dahaka dainai? Mexico ai ia noho tadikaka Manuel ena hereva mani oi laloa. Guna Baibel ia stadilaia negana ia laloa lou, bona ia gwau: “Stadi ai do hamatamaia lasi neganai, egu stadi naria tauna be lau ia nanadaia bema lau namo. Unai amo lau gari lasi egu lalohadai haida lau gwauraia totona. Lau mamia ia be lau ia laloa bada.”

11. Nega ita atoa iseda Baibel stiuden ita bamoa karana ese edena dala ai ia do ia durua?

¹¹ Nega oi atoa emu stiuden oi bamoa totona, Iesu ese ena hahediba taudia dekenai ia karaia hegeregerena. (Ioa. 3:22) Bema emu stiuden be ia goada ia lao noho, reana emu ruma dekenai oi boiria ti kavakava umui inua o aniani totona, eiava hua ta ta ena JW Broadcasting^® umui itaia diba. Tomadiho koikoi ena holidei negadia ai stiuden ena famili bona turadia be unai holidei idia moalelaia, unai dainai namona be stiuden oi boiria oi ia bamoa totona. Uganda ai Baibel stiuden ladana Kazibwe, ia gwau: “Stadi negadia sibona lasi, to nega ma haida ai egu stadi naria tauna lau bamoa karana amo Iehova lau dibaia namonamo danu. Lau itaia Iehova be ena taunimanima ia laloa bada bona idia moale. Lau ura egu mauri be unai bamona.”

12. Dahaka dainai pablisa idauidau be Baibel stadi dekenai ita abia lao be namo?

 ¹² Baibel stadi dekenai pablisa idauidau oi abia lao. Nega haida ita laloa Baibel stadi dekenai ita sibona ita lao, eiava hanaihanai ita ia bamoa pablisa ita abia lao be hegeregere. To pablisa idauidau ita abia lao neganai, unai ese stiuden do ia durua bada. Moldova ai ia noho tadikaka ladana Dmitrii, ia gwau: “Egu stadi ai idia mai pablisa ta ta edia hahediba daladia be idauidau. Unai ese lau ia durua lau dibaia gauna be dala idauidau ai lau badinaia totona. Bona nega ginigunana hebou lau lao neganai, lau hemarai lasi badina tadikaka taihu momo lau diba vadaeni.”

13. Dahaka dainai stiuden do ita durua kongrigeisen hebou ia mai be namo?

¹³ Emu stiuden oi durua kongrigeisen heboudia do ia mai. Dahaka dainai? Badina Iehova ese ena taunimanima ia hagania idia hebou totona, bona unai be iseda tomadiho ena kahana ta. (Heb. 10:24, 25) Danu, kongrigeisen ai tadikaka taihu be iseda famili bamona. Idia ida hebou dekenai ita noho neganai, unai be hegeregere aniani namona ta ita ania hebou. Emu stiuden oi durua hebou ia lao be mai anina bada, badina unai ese ia do ia durua bapatiso ia abia totona. To, hebou ia lao matamaia totona be do ia hekwarahi. Edena dala ai Mauri Moalelaia Hanaihanai! bukana ese emu stiuden do ia durua koua gaudia ia hanaia totona?

14. Edena dala ai stiuden ena lalona ita veria diba hebou ia mai totona?

¹⁴ Mauri Moalelaia Hanaihanai! bukana ena leseni 10 oi gaukaralaia, emu stiuden ena lalona oi veria totona. Unai buka idia do halasia lasi neganai, pablisa haida idia abia hidi unai leseni be edia stiuden ida idia stadilaia totona. Idia gwau unai leseni ese edia stiuden ia durua hebou ia lao totona. To, namo lasi oi naria ela bona leseni 10 umui stadilaia neganai, emu stiuden be hebou dekenai oi boiria mai. Namona be matamana amo ia oi boiria hebou ia mai totona, bona hanaihanai unai do oi karaia. Baibel stiuden edia hekwakwanai be idauidau. Unai dainai, ena dabu gaudia oi diba be namo, bona heduru oi henia. Bema hebou dekenai ia mai lasi, oi hesiku haraga lasi, to oi haheauka bona oi boiria noho.

15. Emu stiuden be dahaka gaudia dainai ia gari diba?

¹⁵ Oi laloatao guna oi danu be Iehova ena Witnes ta ai oi ura lao neganai oi gari, ani? Reana oi mamia oi be ruma-ta-ruma-ta haroro gaukara oi karaia diba lasi. Eiava oi gari badina emu turadia bona famili ese oi idia koua. Unai dainai, emu Baibel stiuden ena hemami oi lalopararalaia diba. Iesu ia gwau haida be unai gaudia dainai do idia gari. To, Iesu be iena murinai idia raka taudia ia hagoadaia, namo lasi unai ese idia ia koua Iehova idia hesiai henia totona. (Mat. 10:16, 17, 27, 28) Edena dala ai Iesu be iena murinai idia raka taudia ia durua gari karana idia hanaia totona? Bona edena dala ai iena haheitalai oi tohotohoa diba?

16. Edena dala ai stiuden oi hadibaia ia haroro totona?

¹⁶ Stiuden oi hadibaia loulou ia dibaia gaudia do ia harorolaia. Iesu ena hahediba taudia be haroro totona ia siaidia lao neganai, reana idia gari. To, Iesu ese idia ia durua bona ia hamaoroa edeseniai do idia haroro bona dahaka sivarai do idia harorolaia. (Mat. 10:5-7) Edena dala ai Iesu oi tohotohoa diba? Emu stiuden oi hadibaia daidia ia haroro henia diba. Hegeregere, oi nanadaia bema ia diba tauna ta be Baibel  ena hereva momokani ese do ia durua. Bena oi hadibaia auka lasi dalanai ia haroro henia totona. Umui praktis totona, Mauri Moalelaia Hanaihanai! bukana ena kahana “Haida Idia Gwau” bona “Reana Ta Do Ia Henanadai” oi gaukaralaia. Danu, oi durua Baibel ia gaukaralaia haere maorodia ia henia totona.

17. Edena dala ai Mataio 10:19, 20, 29-31 ita gaukaralaia diba stiuden ita durua Iehova ia abidadama henia totona?

¹⁷ Emu stiuden oi durua Iehova do ia abidadama henia. Iesu ese ena hahediba taudia ia hamaoroa, Iehova be idia ia lalokau henia dainai do ia durudia. (Mataio 10:19, 20, 29-31 duahia.) Emu stiuden oi hamaoroa Iehova be ia do ia durua danu. Ia ida oi guriguri negadiai ena tahua gaudia oi herevalaia danu, unai amo ia oi durua Iehova dekenai do ia tabekau. Poland ai tadikaka ta ladana Francis, ia gwau: “Lau ia stadi henia tauna be nega momo guriguri dekenai egu tahua gaudia ia gwauraia. Lau itaia Iehova ese iena guriguri ia haerelaia neganai, lau danu lau guriguri matamaia. Egu gaukara matamatana dekenai bosi do lau noia dina haida do lau gaukara lasi, unai amo kongrigeisen heboudia bona rijinol hebouhebou do lau lao neganai, lau mamia Iehova ese lau ia durua.”

18. Keristani hahediba taudia edia gaukara dekenai Iehova ena lalohadai be dahaka?

¹⁸ Iehova be iseda Baibel stiuden ia lalodia bada. Iehova be Keristani hahediba taudia ia lalokau henia, badina ia diba idia gaukara goada taunimanima idia durua ia kahirakahira idia lao totona. (Isa. 52:7) Bema oi be Baibel stadi ta oi karaia lasi, namona be pablisa ma haida edia stadi dekenai oi helai, unai amo Baibel stiuden oi durua diba bapatiso idia abia totona.