XTUUTYUM ARTIKEL 22
Helef tayn xtutënt pis aan taaf hin khome
‘Yeete eene fon aych sol ketaaft wëre.’ (APHOSTELE SAYN KEXICHT 2:38)
LIIT 72 Macht ti woerheet fom Raych pekhant
WAS TUUN MER SIIN? *
1. Was praucht een kroos folek mache, tëm noo was Yeesus sayn tisipele kesaat hon?
EEN kroose folek fon mëner un fraae is tsu Yeruusalem kereest. Tii sin fon fiile lënter khom un hon unerxiitliche xprooche fertseelt. Wii se tat waare, is was wunerliches pasiirt: etliche yuuter hon terek aan kefang ti xprooche fon tiise layt xpreche. Tas folek hot sich mechtich ferwunert! Awer, was ti yuuter am saan waare un was te aphostel Pheeter kesaat hot, waar noch wunerlicher kewees. Was waar tas? Ti layt khente keret wëre wën se klaape aan Yeesus tsayche teete. Tiise wërter sin tiif pis tas hërts fon tëne kang. Tes weeche hon se kefroot: “Was sole mer mache?” Too hot Pheeter keantwort: “Tas yeete eene fon aych ketaaft wërt.” (Aph. 2:37, 38)
Een pruuter un sayn fraa penutse tas puuch Los tich kuut keen im leepe fer imer! fer een Piipel xtuutyum mit een yunge man fiire (Kuk te apsats 2.)
2. Was tuun mer in tiise artikel lërne? (Kuk tas pilt am aanfang fom piichelche.)
2 Im selwich taach, is noch etwas krooses pasiirt. Unkefeer 3.000 layt hon sich taafe kelos un sin Yeesus sayn tisipele kep. Tas waar te aanfang fon te aarwayt fer tisipele mache — een aarwayt woo Yeesus kexikt hot; un pis hayt, xafe sayn tisipele too traan. Awer, hayt praycht ma mee wii ploos phaar xtune fer een xtutënt helfe pis aan taaf hin khome. Im xtant, prayche mer moonate, een yoer orer soo kaar mee fer een xtutënt helfe tiise tsiil trefe. Es khost aanxtrengung fer yemant helfe Yeesus sayn tisipel wëre. Un, wëns tuu mit yemant am xtutiire pist, weest tuu tas xon. Awer, was khanst tuu mache fer tayn xtutënt helfe een ketaafte tisipel sin? Tas is was mer in tiise artikel lërne tuun.
HELEF TAYN XTUTËNT AAN WËNE WAS TEE AM LËRNE IS
3. Tëm noo Matheus 28:19, 20, was praucht een xtutënt mache fer pis aan taaf hin khome?
3 Foer sich taafe, praucht een xtutënt aan wëne was eyer in te Piipel lërnt. (Lees Matheus 28:19, 20.) * Soo wërt eyer wii te “ferxtëntiche man” fon Yeesus sayn ferklaychung; tee hot tiif kekraapt fer sayn haus ufm fels paue. (Mat. 7:24, 25; Luk. 6:47, 48) Awer, was khanst tuu mache fer tayn xtutënt helfe aan wëne was tee lërnt? Wole mer iwer tray itee xpreche.
4. Was khene mer mache fer een xtutënt helfe pis aan taaf hin khome? (Kuk aach te khaste “ Helef tayn xtutënt tsiile xtele un trefe”.)
4 Helef tayn xtutënt tsiile xtele. Warom solst tuu tas mache? Wole mer tas ferklayche: xtel tich mool foer tas tuu pist pis aan wayt plats am faare. Ti rees tuut lang tauere. Awer tan, tuust tuu uf etliche xeene pletse xtil hale. Soo ferliirst tuu net tayn muut ploos wayl tas een pisye tauere tuut fer ti rees fërtich pringe. Kraat soo, wën te xtutënt tsiile xtelt woo eyer klaych trefe khan, mërkt eyer aach tas es meechlich is tas tsiil fon sich taafe lose trefe. Penuts tas teel “Tsiil” im puuch Los tich kuut keen im leepe fer imer! fer tayn xtutënt helfe foran keen. Am ën fon yeete lisyoon, xprech mit tayn xtutënt iwer wii tas tsiil tëm helfe tuut aan wëne was eyer kraat kelërnt hot. Wëns tuu kërn hëst tas tayn xtutënt een aner tsiil trefe teet, xrayp tas in tëm teel “Noch een tsiil”. Tuu eftas tiise teel fom xtuutyum penutse fer mit tayn xtutënt fertseele iwer ti tsiile woo eyer klaych trefe khan un iwer tii woo mee tsayt nëme tuun fer se trefe.
5. Tëm noo Markus 10:17-22, was hot Yeesus kesaat tas eene rayche man mache solt, un warom?
5 Helef tayn xtutënt ënerunge in sayn leepe mache. (Lees Markus 10:17-22.) * Yeesus wust tas es net laycht weyer fer eene rayche man sayn tinge ferkhaafe. (Mar. 10:23) Awer noch soo, hot Yeesus tëm kesaat tiise kroos ënerung mache. Warom? Wayl Yeesus liip tsu tëm kexpiirt hot. Manich mool, mërke mer tas een xtutënt praucht een ënerung mache. Awer im xtant, muute mer tëm net uf tas mache wayl mer tenke: ‘Tee is noch net fërtich.’ Es khan tsayt tauere pis tas ti layt ti neetiche ënerunge mache un ti nay personaliteet aan tsiie. (Kol. 3:9, 10) Awer, woo friier tas tuu mit te xtutënt too triwer xprechst, woo eente khan tee ti ënerunge mache. Wëns tuu mit tëm iwer tas fertseelst, tsaychst tuu tas tuu tich mit tëm khimerst. (Psal. 141:5; Xpr. 27:17)
6. Warom sole mer te xtutënt frooe was tee iwer ti sache mënt?
6 Es is wichtich fer te xtutënt se frooe was eyer iwer ti sache mënt. Soo sorte frooche tuun uns helfe wërklich siin was te xtutënt ferxteet un aan was eyer klaapt. Warom is es kuut? Xpeeter im xtuutyum, khome etliche sache foer woo te xtutënt im xtant net soo laycht aan nëme tuut. Awer wëns tuu xon reeklich mit tëm iwer sayn mënunge fertseelst, wërts net soo xlim mit tëm too triwer xpreche. Tas puuch Los tich kuut keen im leepe fer imer! is fol tiise sorte frooche. Tsum payxpiil, in te lisyoon 4 kepts ti frooch: “Wii mënst tuu tas Yeehoowa sich xpiirt wëns tuu tëm sayn naame penutst?” In te lisyoon 9 kepts ti frooch: “Iwich was teest tuu kërn peete?” Am aanfang, khan es xweyer sin fer te xtutënt tiise frooche antworte. Awer wii khanst tuu tëm iipe tas mache? Helef tëm iwer ti tekste un pilter woo foer khome se tenke.
7. Wii khene mer ti speryense fon te anere kuut penutse?
7 Ferxteet tayn xtutënt xon was eyer mache mus? Tan, penuts ti speryense fer tëm uf muute tas mache. Tsum payxpiil, wën es xweyer fer te xtutënt is in te fersamlunge khome, khanst tuu tëm te wiiteo Jeová sempre cuidou de mim tsayche, woo im teel “Fer mee wise” fon te lisyoon 14 xteet. In fiile lisyoone fom puuch Los tich kuut keen im leepe fer imer! tuust tuu soo sorte speryense fine im teel “Lërn mee” orer “Fer mee wise”. * Awer, phas uf! — tuu net te xtutënt mit een aner persoon ferklayche. Tsum payxpiil, saa net: ‘Wën tee tas kemacht kriit, kriist tuu tas aach kemacht.’ Es is peser te xtutënt lose tas aleen mërke. Xtats te xtutënt ferklayche, xprech iwer spetsiifixe tinge woo ti persoon fom wiiteo kemacht hot fer ti piiplixe aanreete aan wëne; fiilaycht khan es een tekst orer een praktix phunkt sin. Imer wëns meechlich is, fertseel iwer wii Yeehoowa ti persoon keholef hot.
8. Wii khene mer unser xtutënt helfe Yeehoowa liipe?
8 Helef tayn xtutënt Yeehoowa liipe. Tuu imer tëm helfe iwer Yeehoowa sayn kwaliteete lërne. Helef tayn xtutënt Yeehoowa aan siin wii een frooe Kot, woo uner xtitst tii woo tëm liipe. (1 Tim. 1:11; Hep. 11:6) Tsaych te xtutënt wii fiil nutse eyer kriit wën eyer ti piiplixe aanreete aan wënt. Un lee tëm aus tas tiise nutse sin aach een pewaysung fon Yeehoowa sayn liip. (Isa. 48:17, 18) Woo xtërker te xtutënt sayn liip tsu Yeehoowa is, woo kreeser wërt tëm sayn wunx fer ti neetiche ënerunge mache. (1 Yo. 5:3)
HELEF TAYN XTUTËNT ANERE YEEHOOWA SAYN TSAYER KHËNE
9. Tëm noo Markus 10:29, 30, was khan yemant helfe fon etliche tinge uf kepe, tas eyer sich taafe khan?
9 Fer pis aan taaf hin khome, prayche ti Piipel xtutënte fon etliche tinge uf kepe. Tsum payxpiil: soo wii te rayche man, iwer weem mer kraat kexproch hon, mise etliche xtutënte materyaalixe tinge uf kepe. Wole mer saan tas eyer een aarwayt hot, woo keet keeche was ti Piipel saat richtich is. Tan, praycht eyer fiilaycht een aner aarwayt fine. Anere mise im xtant froynte uf sayt lose, woo net Yeehoowa liipe tuun. Un noch anere sin im xtich kelos fon sayn aychne familye, wayl se Yeehoowa sayn Tsayer net kërn hon. Yeesus hot kesaat tas es net laycht fer etliche weyer soo sorte tinge uf kepe. Awer, tee hot ferxproch tas tii woo tëm noo keen, wëre net im xtich kelos: Yeehoowa tuut se een liiplich kaystlich familye xenke. (Lees Markus 10:29, 30.) * Wii khanst tuu tayn xtutënt helfe nutse fon tiise xeene kexenk kriin?
10. Was host tuu mit Manuel sayn wërter kelërnt?
10 Pau een froyntxaft mit tayn xtutënt. Es is wichtich tas tuu tsaychst tas tuu tich mit tayn xtutënt khimerst. Warom? Kuk mool ti speryens fon Manuel, woo in Mëksiko leept. Tee pexraypt wii sayn Piipel leerer tëm keholef hot wii eyer noch een xtutënt waar: “Foer yeete xtuutyum, hot eyer mich kefroot ep ich kuut traan waar. Tee hot mich keholef in ruu plaype un hot mich kelos iwer anere sache xpreche. Ich hon kexpiirt tas eyer sich wërklich mit mich kekhimert hot.”
11. Was fer nutse khene ti xtutënte kriin wën se tsayt mit uns aus kepe?
11 Tuu tsayt mit tayn xtutënte aus kepe, kraat soo wii Yeesus mit sayn tisipele kemacht hot. (Yoo. 3:22) Is tayn Piipel xtutënt xon am ënerunge mache? Tan, fiilaycht khanst tuu tëm in laate fer pay tich maaye khome, een khafi trinke, was ese, orer een prokram fon te JW Broadcasting kuke. Hauptseechlich in te fayertaache — wën te xtutënt sich aleen fint — hët eyer tiise inlaatunge kërn. Kazibwe, een pruuter woo in Ukanta woont, fertseelt: “Ich tenke tas wën ich tsayt mit mayn leerer aus kep hon, hon ich soo fiil iwer Yeehoowa kelërnt wii wën mer ti Piipel xtutiirt hon. Ich hon taytlich kesiin tas Yeehoowa tuut sayn folek liipe un tas Tëm sayn tiiner froo sin. Ich wolt tas fer mich hon!”
Pring unerxiitliche puplikatoore tsu tayn Piipel xtuutyum; tas tuut te xtutënt uf muute aan te fersamlunge keen (Kuk te apsats 12.) *
12. Warom sole mer unerxiitliche puplikatoore im xtuutyum mit nëme?
12 Tuu unerxiitliche puplikatoore fer tas xtuutyum in laate. Manich mool khene mer tenke tas es laychter is tas xtuutyum aleen fiire orer imer te selwich puplikatoer mit nëme. Awer unser xtutënt kriit tsiimlich sicher mee nutse wën mer anere puplikatoore mit pringe. Dmitrii, woo in Moltaawya leept, saat: “Yeete puplikatoer woo in mayn xtuutyum khom is, hot ti sache in een ekstra aat aus keleet. Tes weeche, khont ich noch peser ferxteen was ich am lërne waar. Un wii ich tas eyerste mool in een fersamlung kang sin, hon ich mich net kexeemt — ich hon xon fiile priiter un xwestere kekhënt!”
13. Warom mise mer unser xtutënte helfe in te fersamlunge keen?
13 Helef tayn xtutënt in te fersamlunge keen. Warom is tas wichtich? Wayl Yeehoowa saat tas sayn tiiner sich fersamele sole; tas is een teel fon unser aanpeetung. (Hep. 10:24, 25) Un noch: unser priiter un xwestere sin unser kaystlich familye. Tan, wën mer in te fersamlunge mit tëne sin, is es wii wën mer tehëm was kuutes mitsamer am ese weyere. Soo, wëns tuu tayn xtutënt helfst in te fersamlunge keen, pist tuu in woerheet tëm am helfe eene fon te wichtichste xrite kepe fer pis aan taaf hin khome. Awer als mool, tiise xrit kepe is net laycht. Tan, wii khan tas puuch Los tich kuut keen im leepe fer imer! te xtutënt helfe torich sayn kefoore triwer wech khome?
14. Wii khene mer unser xtutënte uf muute in te fersamlunge khome?
14 Penuts ti lisyoon 10 fom puuch Los tich kuut keen im leepe fer imer! fer tayn xtutënt uf muute in te fersamlunge keen. Eep tas puuch fërtich waar, waars fer etliche puplikatoore ferlangt fer ti lisyoon mit sayn xtutënte penutse. Tii hon kesaat tas es kuut pariirt hot un tas ti lisyoon sayn xtutënte keholef hot in te fersamlunge keen. Kewis prauchst tuu net pis ti lisyoon 10 waarte fer tayn xtutënt fer ti fersamlung in laate. Mach tas soo friier wiis meechlich is un laat tëm eftas in. Unerxiitliche xtutënte hon unerxiitliche propleeme. Soo, fersuuch se mërke was ti neetichkheete fon tayn xtutënt sin un piit tich aan fer hilef kepe. Say net traurich wën es tsayt nëmt pis te xtutënt in te fersamlunge khomt. Xtats tas, say ketultich un laat tëm wayter in.
HELEF TAYN XTUTËNT TORICH SAYN PANG TRIWER WECH KHOME
15. Weeche was khan unser xtutënt pang xpiire?
15 Erinerst tuu tich was tuu kemënt host iwer een Yeehoowa sayn Tsayer wëre? Host tuu een pisye pang kriit? Fiilaycht host tuu ketenkt: ‘Preetiche? Tas kriin ich net hin.’ Orer im xtant: ‘Meecht mayn familye orer froynte sich keeche mich xtele?’ Tan khanst tuu xon ferxteen wii tayn xtutënt sich fine tuut. Yeesus hot kesaat tas etliche sich kraat soo fine teete. Awer tee hot aach fer sayn tisipele kesaat tas ti pang selt tëne net um hale Yeehoowa tiine. (Mat. 10:16, 17, 27, 28) Wii hot Yeesus sayn tisipele keholef torich sayn pang triwer wech khome? Un wii khanst tuu tëm noo mache?
16. Wii khene mer unser xtutënte iipe fer iwer tëne sayn klaape xpreche?
16 Tuu tayn xtutënt iipe fer iwer sayn klaape xpreche. Wii Yeesus sayn tisipele kexikt hot se preetiche, sin se fiilaycht nerwees kep. Awer Yeesus hot tëne keholef. Tee hot tëne aus keleet fer weem un iwer was se preetiche solte. (Mat. 10:5-7) Wii khanst tuu Yeesus noo mache? Helef tayn xtutënt se mërke fer weem khan eyer preetiche. Tsum payxpiil, tuu khanst tëm frooe: ‘Khënst tuu yemant woo nutse kreecht fon een spetsiifix woerheet fon te Piipel?’ Tan, khanst tuu tëm helfe een keweenlich foerxtelung in richte fer mit te persoon fertseele. Wëns phast, khanst tuu mit tëm ti teele “Etliche saan” un “Yemant khan frooe” fom puuch Los tich kuut keen im leepe fer imer! penutse fer mit tëm ti foerxtelung iipe. Wëns tuu es machst, hal tich traan aan tayn xtutënt helfe ti Piipel penutse fer keweenliche antworte mit kexik kepe.
17. Wii khene mer Matheus 10:19, 20, 29-31 penutse fer unser xtutënt helfe aan Yeehoowa traue?
17 Helef tayn xtutënt aan Yeehoowa traue. Yeesus hot fer sayn tisipele kesaat tas Yeehoowa teet, weeche liip, tëne helfe. Los tayn xtutënt aach sicher tas Yeehoowa tëm helfe tuut. Tuu khanst tëm helfe uf Yeehoowa traue wëns tuu mit tëm iwer sayn tsiile peete tuust. Wii soo? “Mayn leerer hot imer iwer mayn tsiile in sayn kepeete fertseelt — saat Franciszek, woo in Poole leept. — Wii ich kesiin hon tas Yeehoowa tëm keantwort hot, hon ich klaych aan kefang se peete. Tsum payxpiil: wën ich in te aarwayt feele praucht fer in een konkrës orer ti fersamlunge keen, hon ich kexpiirt tas Yeehoowa mich keholef hot.” (Lees Matheus 10:19, 20, * 29-31. *)
18. Wii xpiirt sich Yeehoowa iwer ti inlërnung aarwayt woo sayn tiiner mache?
18 Yeehoowa khimert sich wërklich fiil mit unser Piipel xtutënte. Awer wëns tuu khee Piipel xtuutyum yets am fiire pist? Tuu khanst noch een xtutënt helfe pis aan taaf hin khome wëns tuu aan te xtuutye fon anere puplikatoore mit helfst. Yeehoowa kept fiil weyert fer ti aanxtrengung woo sayn tiiner mache fer ti layt helfe tichter pay tëm khome. Xafst tuu aach in tiise inlërnung aarwayt? Tan say tich sicher: Yeehoowa liipt tich aarich fiil! (Isa. 52:7)
LIIT 60 Tas petayt ayer leepe
^ parágrafo 5 Was hot Yeesus kemacht fer ti layt helfe tëm sayn tisipele wëre? Wii khene mer tëm noo mache? Tas is was mer in tiise artikel lërne tuun. Meyer xpreche aach iwer wii tas puuch Los tich kuut keen im leepe fer imer! penutse. Tas puuch is kepleent kep fer ti xtutënte helfe pis aan taaf hin khome.
^ parágrafo 3 (Matheus 28:19, 20) Tan keet un macht tisipele fon mënxe fon ale natsyoone, taaft se im naame fom Fater un fom Soon un fom hayliche kayst, 20 un tuut se in lërne aan heere ales was ich aych kexikt hon. Un ferkest net: Ich sin mit aych ti kans tsayt, pis tsum ën fom sisteem.”
^ parágrafo 5 (Markus 10:17-22) Wii eyer am raus keen waar, is eene man tsu tëm kexprung un hot sich foer tëm kekniit un tëm kefroot: “Kuute Leerer, was mus ich mache fer tas eewiches leepe ërpe?” 18 Yeesus hot tëm kesaat: “Warom nënst tuu mich kuut? Nimant is kuut, ploos eene: Kot. 19 Tuu khënst ti kepoote: ‘Tuu net um pringe; tuu net sëks aus ti hayrat mache; tuu net xteele; tuu net falx tsayung kepe; tuu net hinerkeen; eer tayne fater un tayn muter.’” 20 Te man hot tëm kesaat: “Leerer, fon yung aan tuun ich tas ales aan heere.” 21 Yeesus hot tëm aan kekukt un liip fer tëm kexpiirt un kesaat: “Een tings tuut tich noch feele: kee un ferkhaaf was tuu host un kep tas kelt fer ti aarme; soo tuust tuu een xats im himel hon; un khom, kee mich noo.” 22 Awer te man is oone muut mit tiise antwort kep un is traurich fat kang, wayl tee fiile tinge hat.
^ parágrafo 7 Tuu khanst anere speryense fine in (1) te Guia de Pesquisa para Testemunhas de Jeová, unich te unerthitel “A Bíblia”, noo heyer “Valor prático”, un tan “‘A Bíblia muda a vida das pessoas’ (sessão de A Sentinela)”; orer in (2) te aplikatiiw JW Library unich Mídias, un tan “Speryense”.
^ parágrafo 9 (Markus 10:29, 30) Yeesus hot kesaat: “Ich saan aych mit kans sicherheet: nimant hot sayn haus, priiter, xwestere, muter, fater, khiner orer khemp hiner kelos — weeche mich un weeche ti kuute notisye —, 30 woo net yets kriit, in tiise tsayt, 100 mools mee hayse, priiter, xwestere, muter, khiner un khemp — unich yachtung — un, im sisteem woo noch khomt, tas eewiches leepe.
^ parágrafo 17 (Matheus 10:19, 20) Awer, wën se aych hin kepe, macht aych net ketanke mit was teyer saat orer wii teyer es saat, wayl wën ti xtun khomt, wërt es aych ketsaycht was teyer saan solt. 20 Wayl teyer tuut net aleen xpreche: te kayst fon ayre Fater tuut torich aych xpreche.
^ parágrafo 17 (Matheus 10:29-31) Tswaay xpërlinge wëre mit een nikel woo kleen weyert hot ferkhaaft, kël? Awer, soo kaar wën eene fon tëne ufm pootem falt, wees ayre Fater es xon. 30 Toch, yeete hooe uf ayre khop is aach xon ketseelt. 31 Tes weeche, tuut khee pang hon; teyer hot mee weyert wii fiile xpërlinge.
^ parágrafo 67 PILT AUSLEYUNG: Een pruuter un sayn fraa xtutiire mit eene yunge man. In anere taache, ferlangt eyer unerxiitliche priiter fer mit tëm khome.
