1. Ovikwaye ovahongewa va Jesus mbi va raera otjimbumba otjinene tjovandu okutjita meserewondo etenga?

 OTJIMBUMBA otjinene tjovarumendu novakazendu tja ya koJerusalem. Ovarumendu novakazendu mbo va zire komahi omengi pekepeke nu aave hungire omaraka omengi pekepeke. Eyuva ndo pa tjitwa otjiṋa otjihimise. Ovajuda tjiva va uta okuhungira omaraka wa imba mba zire komahi warwe. Iho tja ri otjiṋa otjikumise tjinene, posi yokutja oviṋa Ovajuda mbi va hungira kotjimbumba noviṋa omuapostele Petrus mbya hungira, vya ri oviṋa ovinanḓengu tjinene. Oviṋa mbyaave hungire aavi kamburire mo ombuze yokutja mave yamwa, indu tji va raisa ongamburiro mu Jesus Kristus. Ombuze ndjo ya ṱuna tjinene kotjimbumba ho. Nu owo va pura kutja, “Ngatu tjite vi?” Petrus we ve zira kutja, ‘Auhe weṋu nga papitisiwe.’—Oviung. 2:37, 38.

2. Morupa ndwi matu katara ku ye? (Tara kotjiperendero tjokombanda yokambo nga.)

² Otjiṋa tji tja tjitwa kombunda yanao ya ri otjiṋa otjihimise. Ovandu ape 3 000 va papitisiwa meyuva ndo, nu owo va rira ovahongewa va Kristus. Indjo ya ri ombutiro yotjiungura tjokuisapo ovandu ovahongewa, otja Jesus pa rakiza ovemukongorere okutjita. Ovemukongorere ngamba ve ungura otjiungura ho ndino. Ndino, okuhungira ku nomundu ozoiri ozonḓiṱi uriri kamaa ku mu vatere kutja ma papitisiwe. Ku kambura omieze poo nandarire ombura, poo kombanda yanao komuhongwa okuya pondondo ndjo. Indu tji u rihonga ku nomundu nai, ove mo tjiwa kutja okuvatera omundu ngo okurira omuhongewa katjiṋa otjipupu okutjita. Morupa ndwi, matu katara kutja ovikeṋa mbi mo yenene okutjita kutja u vatere omuhongwa woye wOmbeibela okupapitisiwa.

3. Otja ku Mateus 28:19, 20, ovikeṋa omuhongwa mbi ma sokutjita kutja ma vaze pondondo yokupapitisiwa?

³ Omuhongwa wOmbeibela ngunda e hi ya papitisiwa, ma sokuṱakamisa oviṋa Ombeibela mbi i honga mehupo re. (Lesa Mateus  28:19, 20.) Indu omuhongwa tji ma ṱakamisa imbi mbi me rihongo, eye u ri tjimuna omurumendu “omunazondunge” ngu sa oukoto kutja ma tunge ondjuwo ye poruwa, ngwa tamunwa i Jesus motjisasanekero. (Mat. 7:24, 25; Luk. 6:47, 48) Omomuano uṋe mu matu yenene okuvatera omuhongwa wOmbeibela okuṱakamisa oviṋa mbye rihongo? Ngatu katare koviṋa vitatu mbi matu yenene okutjita.

4. Omomuano uṋe mu matu vatere omuhongwa kutja ma vaze pondondo yokupapitisiwa? (Wina lesa okaongo nga “ Vatera omuhongwa woye okukara nozondando nokuzeyenenisa.”)

⁴ Vatera omuhongwa woye kutja ma kare nozondando. Ongwaye tji mo sokutjita nao? Tara kotjihorera hi. Indu tji wa toora ouyenda oure mape ya mokati kondjira ovanga okukurama potuveze otuwa. Okutjita nao maku ku vatere kutja o ha munu kutja koṋa ku mo i okokure tjinene. Momuano otjingewo, indu omuhongwa wOmbeibela tja yenenisa ozondando ze tjiva, ihi matji mu vatere okumuna kutja ma yenene okuyenenisa ondando yokupapitisiwa. Ungurisa okaongo nga “Ondando” membo ndi Yorokera ehupo nga aruhe, okuvatera omuhongwa woye okuvaza pondondo yokupapitisiwa. Komaandero wehongwa arihe, hungirira kokutja omomuano uṋe ondando ndjo mu mai vatere omuhongwa woye okuṱakamisa imbi mbye rihongo. Indu tji mo vanga kutja omuhongwa woye ma yenenise ondando yarwe, tjanga pokarupa nga “Vyarwe.” Aruhe ungurisa okarupa komakonḓononeno ngo ku nomuhongwa woye, okutara kozondando nḓu ma yenene okuyenenisa nai na inḓa nḓu ma kayenenisa moruyaveze.

5. Otja ku Markus 10:17-22, ovikwaye Jesus mbya raera omurumendu omutumbe okutjita, nu omena ratjike?

⁵ Vatera omuhongwa woye okutjita omarundurukiro mehupo re. (Lesa Markus 10:17-22.) Jesus aa tjiwa kutja ma rire ouzeu komurumendu omutumbe okurandisa ouini we auhe. (Mar. 10:23) Posi yokutja, Jesus wa raera omurumendu ngwo okutjita omarundurukiro omanene ngo mehupo re. Omena ratjike? Mena rokutja  Jesus we mu suverere. Povikando tjiva, mape ya atu ha tunduuza ovahongwa vetu okuṱakamisa imbi mbi mave rihongo mena rokutja matu munu kutja ngunda kavee ya pondondo yokutjita omarundurukiro ngu maye heperwa po. Mape ya a ku kambura oruveze kovandu tjiva okurundurura ehupo rawo nokuhwikika omundu omupe. (Kol. 3:9, 10) Posi yokutja, indu tji u ha wombere okuraera omuhongwa woye ohunga nomarundurukiro ngu ma hepa okutjita, iho matji mu vatere okuhakahana okutjita omarundurukiro ngu maye heperwa po. Okuhungira kuna ye maku raisa kutja ove u rikendera ku ye.—Eps. 141:5; Omiano 27:17.

6. Ongwaye tji matu sokupura ovahongwa vetu kutja ve noumune uṋe?

⁶ Ounahepero okupura omuhongwa wetu kutja u noumune uṋe ohunga nepu rorive. Okupura epuriro otja indo maku ku vatere okutjiwa kutja omuhongwa woye wa zuu ye, nu u kambura mu ye. Indu tji wa tjiti nao aruhe, ma rire oupupu okuhungirira koviṋa mbi mape ya avi rire ovizeu ku ye okuyakura. Embo ndi Yorokera ehupo nga aruhe ri nomapuriro omengi otja ingo. Otjotjihorera, ehongwa 04 ri nepuriro ndi mari tja: “Mo munu kutja Jehova u kara noumune uṋe indu tji mo ungurisa ena re?” Nu ehongwa 09 ri nepuriro ndi: “Ovikwaye tjiva mbi mo vanga okukumbira?” Poutenga, mape ya a rire ouzeu komuhongwa woye okuzira omapuriro otja ingo. Ove mo yenene okumuvatera okuripura ohunga nOmatjangwa noviperendero mbi ri membo.

7. Omomuano uṋe mu matu yenene okuungurisa ovihorera vya varwe okuvatera ovahongwa vetu?

⁷ Indu omuhongwa woye tja tjiwa kutja ovikwaye mbi ma sokutjita, mu tunduuza novihorera vya varwe. Otjotjihorera, indu omuhongwa woye tje muna ouzeu wokuyenda kozombongarero zombongo, ove mo yenene okumuraisira okavidio nga Jehova we ndji vatera, ku ke ri morupa ndwi “Rihonga ovingi” mehongwa 14. Momahongwa omengi membo ndi Yorokera ehupo nga aruhe, ove mo vaza mo ovihorera otja imbyo morupa ndwi “Konḓonona oukoto” poo indwi “Rihonga ovingi.” b Ṱakamisa kutja o ha sasaneke omuhongwa woye ku nomundu warwe mokumuraera kutja, “Indu eye tji ma yenene, ove wina mo yenene.” Tjita kutja omuhongwa me rimunine otjiṋa ho omuini. Moruveze rwanao, kahurura omapu nga vatera omundu mokavidio okutjita omarundurukiro ngaaye heperwa po. Ove mo yenene okumuraera etjangwa poo otjiṋa tjarwe otjinanḓengu tja yenena okutjita. Indu tje ri ohepero yandja ombango kokutja omomuano uṋe Jehova ma vatera omundu ngo.

8. Omomiano viṋe mu matu yenene okuvatera ovahongwa vetu okusuvera Jehova?

⁸ Vatera omuhongwa woye okusuvera Jehova. Omomiano viṋe? Paha omiano mu mo yenene okuvatera omuhongwa woye okurihonga ovingi ohunga novikaṋena vya Jehova. Mu vatera kutja ma mune kutja Jehova oMukuru wondjoroka ngu vatera imba mbe mu suvera. (1 Tim. 1:11; Hebr. 11:6) Vatera omuhongwa woye okumuna kutja ouwa waye mbu ma munu indu tja ṱakamisa oviṋa mbi me rihongo. Nu mu kahururira kutja ouwa mbu ma munu mbo u raisa kutja Jehova we mu suvera. (Jes. 48:17, 18) Otja orusuvero rwomuhongwa woye ku Jehova pu maru kurire ko, eye ma kara nonḓero yokutjita omarundurukiro ngu maye heperwa po.—1 Joh. 5:3.

9. Otja ku Markus 10:29, 30, otjikwaye tji matji yenene okuvatera omundu okutjita omarundurukiro ngu maye heperwa po kutja ma papitisiwe?

⁹ Kutja omuhongwa ma vaze pondondo yokupapitisiwa, eye u hepa okutjita omarundurukiro kaaṋi. Tjimuna omurumendu omutumbe ngwa tamunwa rukuru, ovahongwa tjiva mape ya ave  hepa okunakaura onḓero yokuvanga oviṋa ovingi mehupo. Indu oviungura mbi ve ungura tji vi ha hitasana nomirari vyOmbeibela, owo mape ya ave hepa okupaha oviungura vyarwe. Ovengi mape ya ve sokuisa okukara pu nomapanga nge ha hupu otja komirari vya Jehova. Varwe mape ya ave nakaurwa i yomaṱunḓu wawo mena rokutja omaṱunḓu kaye vanga Ovahongonone va Jehova. Jesus wa tja okutjita omarundurukiro otja ingo mape ya ai ha rire otjiṋa otjipupu ku tjiva. Posi yokutja, eye wa kwizika kutja imba mbu mave mu kongorere mave munine mo ouwa. Jehova me ve sere ondaya mokuvepa eṱunḓu rorusuvero. (Lesa Markus 10:29, 30.) Hapo ove mo yenene vi okuvatera omuhongwa woye wOmbeibela okumuna ouwa kotjiyandjewa ho?

10. Ove we rihongo tjike okuza kotjihorera tja Manuel?

¹⁰ Kondja okukara noupanga ouwa ku nomuhongwa woye. Ounahepero okuraisira omuhongwa woye kutja u rikendera ku ye. Omena raye? Tara ku imbi Manuel ngwa tura moMexico mbi ma zemburuka indu tja ri omuhongwa wOmbeibela. Eye wa tja: “Ngunda atu hi ya uta okurihonga, omundjihonge aruhe ee ndji pura kutja mbi ri vi. Otjiṋa ho aatji ndji vatere kutja mbi rire omupaturuke kuna ye. Nu ee munu kutja eye tjiri u rikendera kwami.”

11. Ouwa waye mbu mape ya ovahongwa vetu ave munu mokukara puna eṱe?

¹¹ Tjimuna Jesus tjaa twapo oruveze okukara pu novemukongorere, ove wina mo yenene okutjita nao ku novahongwa voye. (Joh. 3:22) Indu omuhongwa woye tje tjita omarundurukiro mehupo re, ove mo yenene okumuṋanga koyoye okuyekuuhara puna ove poo okuyekutarera pamwe o-JW Broadcasting^®. Omuhongwa woye mape ya a kara nondangi tjinene, indu tji we mu ṋanga moruveze omapanga novazamumwe ve tji mave zemburuka ovitjitwa mbi ha hitasana ku nOmatjangwa, nu pu mape ya e rimunu ourike. Omurumendu wena Kazibwe ngwa tura moUganda wa tja: “Ami mbi muna kutja mbe rihonga oviṋa ovingi ohunga na Jehova, mokukara pu nomundjihonge wOmbeibela okukapita imbi mbyaatu rihongo pamwe. Mba muna omuano Jehova me rikendera kovakarere ve nondjoroka ndji va ri na yo. Nu ee vanga okukara nehupo tjimuna ndo.”

12. Ongwaye tji matu sokutwaerera ovazuvarise pekepeke, indu tji matu kerihonga ku nomuhongwa wOmbeibela?

 ¹² Ṋanga ovazuvarise pekepeke komerihongero weṋu. Povikando, eṱe mape ya atu munu kutja oupupu okuyenda oveni komuhongwa wetu poo okutwaerera omuzuvarise ngu twa iririra. Nandarire kutja oupupu okutjita nao, indu tji twa twaerere ovazuvarise pekepeke iho matji yenene okumuvatera. Omurumendu wena Dmitrii ngwa tura moMoldova, wa tja: “Omuzuvarise auhe ngwee ya komakonḓononeno wandje wOmbeibela wa ri nomuano we omuwa wokukahurura oviṋa. Momuano mbo mba yenena okuzuva nawa oviṋa mbyee rihongo. Nu indu tji mba ya kombongarero yandje ondenga, ami hee ṱohoṋi mena rokutja mba hakaena rukuru ku novakambure ovengi.”

13. Ongwaye tji matu sokuvatera omuhongwa wetu okuyenda kozombongarero zombongo?

¹³ Vatera omuhongwa woye okuyenda kozombongarero zombongo. Omena raye? Mena rokutja Jehova wa rakiza ovakarere ve okuworongana pamwe, otjorupa rwomerikotameneno ku ye. (Hebr. 10:24, 25) Nu wina, ovakambure ovakwetu mombongo ve ri tjimuna eṱunḓu retu. Indu tji tu ri pozombongarero zombongo puna wo, iri tjimuna matu ri eriro ewa pamwe. Indu tji mo vatere omuhongwa woye okuyenda kozombongarero zombongo, ove mo mu vatere okutjita otjiṋa otjinanḓengu tjinene tji matji mu vatere kutja ma vaze pondondo yokupapitisiwa. Posi yokutja, okuuta okuyenda kozombongarero zombongo mape ya a ha rire otjiṋa otjipupu ku ye okutjita. Omomuano uṋe embo ndi Yorokera ehupo nga aruhe, mu mari vatere omuhongwa woye okutuurunga omauzeu ngamwa ngu maye mu tjaere kutja a ha i kozombongarero zombongo?

14. Omomuano uṋe mu matu yenene okutunduuza omuhongwa wetu okuyenda kozombongarero zombongo?

¹⁴ Ungura ehongwa 10 rembo ndi Yorokera ehupo nga aruhe okukuvatera kutja u tunduuze omuhongwa woye. Ngunda embo ndo ari hi ya pitisiwa, ovazuvarise tjiva va ningirwa okuungura ehongwa ndo ku novahongwa vawo. Owo va tja ehongwa ndo re ve vatera tjinene, nu ra tunduuza ovahongwa vawo okuyenda kozombongarero zombongo. Otjingaperi kutja ove ko nokuhepa okuundja nga tji weya pehongwa 10 okuṋanga omuhongwa woye kozombongarero zombongo. Mu ṋanga okuza pomautiro nu kayende komurungu okutjita nao. Ovahongwa ve kara nomauzeu pekepeke. Kunao, yandja ombango kouhepe womuhongwa auhe nu u pahe omiano mu mo yenene okuvevatera. Mape ya a ku kambura oruveze komuhongwa woye okuuta okuyenda kozombongarero zombongo. Posi yokutja o yumbu ohama, kara nomuretima nu kayende komurungu okumuṋanga.

15. Omuhongwa wetu wOmbeibela mape ya a tira ye?

¹⁵ Hapo ove oo tira okurira umwe wOvahongonone va Jehova? Mape ya oo munu kutja komoo yenene okuzuvarisa okuza kondjuwo nondjuwo, poo oo tira kutja ovazamumwe nomapanga woye mape ya ave ku pirukire. Kunao, ove mo yenene okutjiwa kutja omuhongwa woye u ri mongaro iṋe. Jesus wa tja ovandu tjiva mape ya ave tira oviṋa otja imbyo. Nungwari, eye wa tunduuza ovemukongorere kutja ave ha yandjere oviṋa otja imbyo okuvetjaera okurikotamena ku Jehova. (Mat. 10:16, 17, 27, 28) Omomuano uṋe Jesus ma vatera ovemukongorere kutja ave ha kara nondira? Nu ove mo yenene vi okuhorera ku ye?

16. Omomuano uṋe mu matu yenene okuvatera ovahongwa vetu okuhaṋasana imbi mbi ve rihongo ku novandu varwe?

¹⁶ Honga omuhongwa woye kouṱiṱiṱiṱi kutja ma haṋasane imbi mbye rihongo. Ovahongewa va Jesus mape ya va ri nemuma indu tje ve hinda okukazuvarisa. Posi yokutja, Jesus we ve vatera mokuveraera kutja mave sokukazuvarisa pi nu ovikwaye mbi mave sokuzuvarisa. (Mat. 10:5-7) Hapo mo yenene vi okuhorera ku Jesus? Vatera omuhongwa woye ma mune kutja omozongaro  zeṋe mu ma yenene okuzuvarisa. Otjotjihorera, mu pura kutja ma tjiwa omundu ngu ma yenene okumuna ouwa mokurihonga epu kaaṋi rOmbeibela. Okuzambo mu vatera okurirongerisa imbi mbi ma yenene okukahungira komundu ngo momuano omupupu. Tje ri ohepero ungurisa omapuriro nge ri kehi yorupa ndwi “Ovandu tjiva ve tja” na indwi “Omundu mape ya a pura kutja,” okuza membo ndi Yorokera ehupo nga aruhe. Otja tji mo tjiti nao, yandja ombango kokuvatera omuhongwa woye okuungurisa Ombeibela okuyandja omaziriro omasupi nomakahu.

17. Matu yenene vi okuungurisa omambo nge ri mu Mateus 10:19, 20, 29-31 okuvatera ovahongwa vetu okuṱakama mu Jehova?

¹⁷ Vatera omuhongwa woye okuṱakama mu Jehova. Jesus wa raera ovahongewa ve kutja Jehova me ve vatere mena rokutja we ve suvera. (Lesa Mateus 10:19, 20, 29-31.) Zemburukisa omuhongwa woye kutja Jehova ma yenene okumuvatera wina. Mo yenene okuvatera omuhongwa woye okuṱaṱera ku Jehova, mokukumba puna ye ohunga nozondando ze. Franciszek ngwa tura moPoland, wa tja: “Omundu ngwee ndji hongo Ombeibela aa tamuna ozondando zandje mongumbiro ye. Tji mba muna omuano Jehova ma zira ozongumbiro ze, ami wina mba uta okukumba. Ami mba muna kutja Jehova we ndji vatera, indu tjee hepa okuningira omayuva womasuviro poviungura vyandje ovipe, kutja mbi yenene okuyenda kozombongarero zombongo nomaworonganeno wotukondwa.”

18. Jehova u noumune uṋe ohunga noviungura vyokuhonga mbi ungurwa i yOvakriste?

¹⁸ Jehova u rikenda tjinene ohunga novahongwa vetu vOmbeibela. Eye u tjiwa kutja Ovakriste ve ungura oukukutu okuvatera ovandu okutumbuka popezu na ye, nu mena ranao eye we ve suvera. (Jes. 52:7) Tji u hi nomuhongwa wOmbeibela nai, mo yenene okuvatera ovahongwa vOmbeibela varwe okuvaza pondondo yokupapitisiwa, indu tji mo i pu novazuvarise varwe kovahongwa vawo.