1. Murid Jesus ngasuh seraban besai orang ngereja nama?

SERABAN besai orang datai ngagai Jerusalem. Sida datai ari mayuh bengkah menua lalu bisi bansa jaku diri empu. Utai ti ngalitka ati nyadi ba hari nya. Sekeda orang Judah ulih bejaku ngena bansa jaku orang ke datai nya. Ketegal nya, sida ke datai ari menua bukai tekenyit ati maya ninga orang Judah bejaku ngena jaku bansa sida. Tang sida mega alit ati ninga utai ke dipadah orang Judah sereta rasul Peter. Sida sedar sida ulih diselamatka enti sida arapka Jesus. Lebuh sida ninga nya, ati sida balat ditegu lalu sida nanya: “Nama utai ti patut dikereja kami?” Peter nyaut sida: “Nesal ati ke dosa kita, genap iku kita, lalu dibaptisa.”—SKR. 2:37, 38.

2. Nama deka dipejuraika kitai dalam artikel tu? (Peda gambar ba mua majalah.)

² Utai ke nyadi pengudah nya amat ngalitka ati. Kira 3,000 iku orang dibaptisa ba hari nya, lalu nyadi murid Jesus. Nya meh pun pengawa nginjil ke diasuh Jesus kereja bala murid iya. Pengawa tu agi dipejalaika nyentukka diatu. Kemayaharitu, kitai begunaka mayuh awak kena nulung pemelajar Bup Kudus dibaptisa. Pengawa ngaga murid enda senang. Nya alai, kitai deka bejuraika chara kitai ulih nulung pemelajar Bup Kudus dibaptisa.

3. Nitihka Matthew 28:19, 20, nama patut dikereja pemelajar kitai ngambika ulih ngaga pemansang lalu dibaptisa?

³ Sebedau dibaptisa, pemelajar patut nitihka utai ti udah diajar Bup Kudus. (Bacha Matthew 28:19, 20.) Lebuh pemelajar  nitihka utai ti udah dipelajar iya, iya baka “orang siku ke pintar” ba sempama Jesus. Iya numbak lubang ti dalam kena nirika rumah iya ba atas batu. (Mat. 7:24, 25; Luk. 6:47, 48) Baka ni kitai ulih nulung pemelajar nitihka utai ti udah dipelajar iya? Aram kitai berandauka tiga iti pekara ti ulih digaga kitai.

4. Baka ni nuan ulih nulung pemelajar nuan terus ngaga pemansang ngambika dibaptisa? (Peda mega kutak “ Tulung Pemelajar Nuan Netapka Juluk Ati lalu Nyapai Iya.”)

⁴ Nulung pemelajar nuan netapka juluk ati. Nama kebuah? Peratika sempama tu. Enti nuan bejalai jauh, nuan engka sangkai ba sekeda endur. Enggau nya, nuan ngasaika pejalai nuan enda kelalu jauh. Sama mega, enti pemelajar netapka juluk ati ti ulih dijapai iya dalam timpuh ti pandak, tu ulih nulung iya sedar iya ulih nyapai juluk ati dibaptisa. Kena kutak “Uji Tu” dalam bup Idup enggau Lantang Belama Iya! ngambika ulih nulung pemelajar nuan netapka juluk ati. Ba pengujung tiap iti pelajar, kerandauka baka ni juluk ati iya bisi kaul enggau utai ke udah dipelajar iya. Enti nuan deka pemelajar nuan nyapai juluk ati ti bukai, nuan ulih nulis nya ba “Utai Bukai.” Seruran ngena begian tu kena meresa juluk ati pemelajar nuan ke ulih dijapai iya dalam timpuh ti pandak sereta ke begunaka mayuh awak.

5. Nitihka Mark 10:17-22, Jesus ngasuh lelaki ti kaya nya ngereja nama, lalu nama kebuah?

⁵ Nulung pemelajar nuan ngaga ubah dalam pengidup. (Bacha Mark 10:17-22.) Jesus nemu, enda senang ba lelaki ke kaya nya nyual semua utai ti dikemisi iya. (Mrk. 10:23) Tang, Jesus ngasuh iya ngaga ubah ti besai tu dalam pengidup iya. Nama kebuah? Laban Jesus rinduka iya.  Kekadang, kitai engka enda meransang pemelajar kitai nitihka utai ti udah dipelajar iya laban kitai ngumbai iya bedau besedia ngaga ubah. Kingatka, orang begunaka awak kena ngelengkaka pengidup ti lama lalu ngerasukka ulah ti baru. (Kol. 3:9, 10) Tang tumu agi nuan berandau enggau pemelajar nuan, jampat agi iya ulih ngaga ubah. Enggau tu, nuan nunjukka diri ibuhka iya.—Mas. 141:5; J-lam. 27:17.

6. Nama kebuah kitai patut nanya runding pemelajar Bup Kudus kitai?

⁶ Kitai enda tau enda nanya runding pemelajar kitai pasal sesiti pekara. Tu deka nulung kitai nemu utai ke ditemu iya enggau utai ke dipechayaka iya. Enti kitai suah ngereja nya, kitai deka senang agi berandau pasal topik ti tusah diterima iya. Bup Idup enggau Lantang Belama Iya! bisi mayuh tanya ke baka tu. Ambika chunto, ba pelajar 04 bisi tanya: “Ba runding nuan, nama asai ati Jehovah lebuh nuan ngena nama Iya?” Lalu ba pelajar 09: “Nama utai ke deka disampika nuan?” Terubah iya, pemelajar nuan engka tusah deka nyaut tanya ke baka tu. Tang nuan ulih nulung iya ngena ayat Bup Kudus tauka gambar ke bisi ba bup nya berundingka tanya nya.

7. Baka ni kitai ulih ngena peneleba bala menyadi enggau manah?

⁷ Lebuh pemelajar nuan nemu utai ke patut digaga iya, kena meh peneleba bala menyadi bukai meransang iya ngereja nya. Ambika chunto, enti pemelajar nuan tusah deka datai gempuru, nuan ulih nunjukka video Jehovah Ibuhka Aku ba begian “Aram Belajar” pelajar 14. Mayuh pelajar ba bup Idup enggau Lantang Belama Iya! bisi ngembuan peneleba ba begian “Belajar Mayuh Agi” tauka “Aram Belajar.” * Tang nuan patut bejimat ngambika enda mandingka pemelajar nuan enggau orang bukai. Seliahka ari nyebut, “Enti iya ulih ngereja nya, nuan pan ulih.” Awakka iya empu sedar pasal utai ke patut digaga iya. Tang berandauka utai ti nulung orang ba video nya nitihka ajar Bup Kudus. Engka nuan ulih nyebut ayat Bup Kudus tauka utai ke digaga iya. Nuan mega ulih nerangka, baka ni Jehovah udah nulung orang nya.

8. Baka ni kitai ulih nulung pemelajar rinduka Jehovah?

⁸ Nulung pemelajar nuan rinduka Jehovah. Baka ni? Giga peluang madahka kualiti Jehovah ngagai pemelajar nuan. Tulung meh pemelajar nuan mereti Jehovah nya Petara ti gaga ati, ke nyukung orang ke rinduka Iya. (1 Tim. 1:11; Heb. 11:6) Terangka ngagai pemelajar pasal penguntung ke diulih enti iya nitihka utai ke dipelajar iya. Lalu padahka, tu meh bukti pengerindu Jehovah ke iya. (Isa. 48:17, 18) Majak dalam pengerindu pemelajar nuan ke Jehovah, majak agi iya keran deka ngaga ubah dalam pengidup iya.—1 Jhn. 5:3.

9. Bepelasarka Mark 10:29, 30, nama ulih nulung seseiku orang ngelengkaka sekeda utai ngambika ulih dibaptisa?

⁹ Enti pemelajar deka ngaga pemansang lalu dibaptisa, iya enda tau enda ngelengkaka sekeda utai. Baka lelaki ti kaya ti disebut ba pun tadi, sekeda pemelajar engka patut ngelengkaka utai ti dikemisi sida.  Enti kereja sida ngelaban prinsip Bup Kudus, sida engka patut ngiga kereja bukai. Pia mega, sida engka patut ninggalka bala bakih ti enda rinduka Jehovah. Ke bukai engka ditinggalka diri sebilik ke enda rinduka Saksi-Saksi Jehovah. Jesus nemu sekeda orang engka tusah deka ngelengkaka utai tu. Tang Jesus besemaya, orang ke nitihka iya deka diberekat enggau ruang bilik ti bepengerindu. (Bacha Mark 10:29, 30.) Baka ni nuan ulih nulung pemelajar nuan ngulihka berekat tu?

10. Nama ulih dipelajarka nuan ari peneleba Manuel?

¹⁰ Bebakih enggau pemelajar nuan. Siti utai ti beguna iya nya nunjukka pengibuh ngagai pemelajar nuan. Nama kebuah? Peratika utai ke dipadah Manuel, ari Mexico. Lebuh iya ngenang maya iya agi belajarka Bup Kudus, iya madah: “Tiap kali sebedau belajar, pengajar aku deka nanya rita aku. Iya ngasuh aku berasai nyamai lalu aku ulih bejaku pasal sebarang utai. Aku ulih ngasaika iya amat ibuhka aku.”

11. Nama penguntung ke diulih pemelajar enti sida begulai enggau kitai?

¹¹ Beri awak begulai enggau pemelajar nuan, baka Jesus meri awak begulai enggau bala murid iya. (Jhn. 3:22) Enti pemelajar nuan benung ngaga ubah ba pengidup iya, nuan ulih mai iya datai ke rumah ngirup kupi, makai begulai tauka meda Berita JW. Iya tentu berasai beterima kasih lebuh nuan mai iya maya diri sebilik enggau bala bakih ngintu hari besai. Maya nya iya engka berasai sunyi. Ku Kazibwe ke diau ba Uganda, “Lebuh begulai enggau pengajar aku, aku mega ulih belajar mayuh pasal Jehovah. Aku ulih meda pengibuh Jehovah ke bala nembiak Iya enggau pengaga ati sida. Aku deka pengidup ke baka nya.”

12. Nama kebuah kitai patut mai penginjil ti enda sama belajarka Bup Kudus enggau kitai?

¹² Mai penginjil bukai enggau nuan ngajar.  Kitai engka berasai nyamai agi ngajar kediri tauka mai penginjil ti sama enggau kitai. Taja pia, pemelajar kitai deka bulih penguntung, enti kitai mai penginjil ti enda sama belajar enggau kitai. Dmitrii ke diau ba Moldova madahka: “Tiap iku penginjil ke dibai pengajar aku nerangka ajar Bup Kudus enggau chara ti bebida. Tu nulung aku meda bisi mayuh macham chara ulih nitihka utai ti dipelajar aku. Lebuh aku datai begempuru keterubah kali, aku enda entu berasai malu laban aku udah betemu enggau mayuh bala menyadi.”

13. Nama kebuah kitai patut nulung pemelajar kitai datai begempuru?

¹³ Nulung pemelajar nuan datai begempuru. Nama kebuah? Laban Jehovah mesan nembiak Iya datai begempuru. Tu sebagi ari sembah kitai. (Heb. 10:24, 25) Nambahka nya, bala menyadi Kristian kitai baka diri sebilik. Maya kitai datai begempuru, tu baka kitai makai begulai enggau bala menyadi kitai. Enti kitai nulung pemelajar kitai datai begempuru, kitai nulung iya ngereja utai ti beguna bendar ngambika iya ulih dibaptisa. Tang iya engka tusah deka berengkah datai begempuru. Baka ni bup Idup enggau Lantang Belama Iya! ulih nulung pemelajar mutarka penanggul nya?

14. Baka ni kitai ulih meransang pemelajar kitai datai begempuru?

¹⁴ Kena meh pelajar 10 ba bup Idup enggau Lantang Belama Iya! kena meransang pemelajar nuan datai begempuru. Sebedau bup tu dikeluarka, sekeda penginjil diasuh nguji pelajar tu enggau pemelajar sida. Sida madah pelajar 10 tu mujur mai pemelajar sida datai begempuru. Taja pia, kitai enda ibuh nganti nyentukka pelajar 10 kena mai pemelajar kitai datai begempuru. Nuan ulih mai iya ari pun pelajar lalu terus ngereja nya. Kingatka, tiap iku pemelajar napi penanggul ti bebida. Nya alai, uji nemu penanggul iya lalu meri bantu ti ngena. Anang asa ati enti iya bedau datai begempuru, terus sabar lalu suah mai iya begempuru.

15. Nama utai ke engka ditakutka pemelajar kitai?

¹⁵ Kala nuan berasai takut deka nyadi seiku ari Saksi-Saksi Jehovah? Nuan engka ngasaika diri enda ulih nginjil ngagai orang tauka berasai takut disakal diri sebilik tauka bala bakih. Enti pia, nuan ulih meretika asai ati pemelajar nuan. Jesus madah sekeda orang deka berasai takut. Tang, Jesus ngasuh bala murid iya anang ngelakka asai takut nagang sida ari nyembah Jehovah. (Mat. 10:16, 17, 27, 28) Baka ni Jesus nulung murid iya mutarka asai ati ti takut? Lalu baka ni nuan ulih nunda teladan iya?

16. Baka ni nuan ulih ngelatih pemelajar nuan bekunsika utai ti udah dipelajar iya?

¹⁶ Terus ngelatih pemelajar nuan bekunsika utai ti udah dipelajar iya. Murid Jesus engka berasai takut lebuh sida diasuh Jesus nginjil. Tang Jesus nulung sida enggau madahka dini alai sida patut nginjil lalu nama pesan ke patut dibai sida. (Mat. 10:5-7) Baka ni nuan ulih nunda Jesus? Tulung meh pemelajar nuan nemu dini iya ulih nginjil. Ambika chunto, nuan ulih nanya iya sapa ke ditemu iya begunaka pemendar Bup Kudus. Udah nya, ajar iya chara deka bekunsika pemendar ngagai orang bukai. Nuan ulih belatih enggau iya ngena begian  “Bisi Orang Madah” enggau “Orang Engka Nanya” ba bup Idup enggau Lantang Belama Iya! Tulung pemelajar nuan ngena Bup Kudus meri saut ti mudah sereta bebasa.

17. Baka ni kitai ulih ngena Matthew 10:19, 20, 29-31 ngambika ulih nulung pemelajar kitai arapka Jehovah?

¹⁷ Nulung pemelajar nuan arapka Jehovah. Jesus madah ngagai bala murid iya, Jehovah deka nulung sida laban Jehovah rinduka sida. (Bacha Matthew 10:19, 20, 29-31.) Padah ngagai pemelajar nuan, Jehovah mega deka nulung iya. Enti pemelajar nuan bisi juluk ati, nuan ulih besampi pasal nya enggau iya. Tu deka nulung iya bepanggai ba Jehovah. Franciszek ke diau ba Poland madahka: “Pengajar aku suah besampi pasal juluk ati aku. Maya aku meda chara Jehovah nyaut sampi iya, aku mega berengkah besampi. Aku ngasaika tulung ari Jehovah maya aku patut minta chuti ngambika ulih datai gempuru enggau konvensyen.”

18. Nama asai ati Jehovah ngagai pengawa ke digaga pengajar Bup Kudus?

¹⁸ Jehovah amat ibuhka pemelajar Bup Kudus kitai. Iya amat beterima kasihka pengawa pengajar Bup Kudus ke nulung orang datai semak ngagai Iya. Tu ngasuh Jehovah amat rinduka sida. (Isa. 52:7) Enti nuan nadai pemelajar Bup Kudus, nuan agi ulih enggau pengajar ke bukai ngajar pemelajar sida ngambika sida ulih ngaga pemansang lalu dibaptisa.