1. Anni i kinagi na disipulos ni Jesus nga mawag tu kuan na totolay nga naggarammammung?

NAPAKARU nga lallaki anna babbay i naggarammammung ta Jerusalem. Nadduruma nga nasion i naggafuadda anna nadduruma gapa i lengguaheda. Tapus egga i kappabbaw nga nesimmu tatun nga aggaw. Gavva laman nga nakapabbida i karuan nga Judio ira ta lengguahe natun ira nga lallaki anna babbay! Aru nga totolay i nappabbaw tatun ngem mas nappabbaw ira ta kinagi natun ira nga Judio ta nira anna ta kinagi ni apostol Pedro. Nelagum tatun i mensahe nga mapaliag ira nu mangurug ira kani Jesu-Cristo. Talaga napaguyu i totolay megafu tatun yayya nga niyavuda: “Anni gafu i kuam-mi?” Kinagi ni Pedro: ‘Mawag tu mappabawtiso i kataggi-tadday nikamu.’—King. 2:37, 38.

2. Anni i gigiammuattam taw nga artikulo? (Innan i letratu ta vungun.)

² Kappabbaw i tumunug nga nesimmu. Ma-3,000 i nabawtisowan tatun nga aggaw anna nabbalin tu disipulo ni Cristo. Tatun nga namegafu i dakal nga trabahu na pangngua tu disipulos nga nipakua ni Jesus ta tagatuttulna ira. Tulu-tuloy lagapa yatun nga trabahu adde sangawe. Ngem ari nga mabawtisowan i tadday gafu laman ta piga oras tam yayya nga nakibbida. Piga nga vulan, tanga-ragun, onu maturu paga i kawagan tapenu madde yatun na Bible study. Mawag tam i mappursigi ta pangngua tu disipulos. Magga umanugu ka tatun mas ngana nu egga i Bible studym. Gigiammuattam taw nga artikulo nu kunnasi tam moffunan i Bible study tam tapenu mabawtisowan yayya.

3. Segun ta Mateo 28:19, 20, anni i mawag nga kuan na Bible study tapenu mabawtisowan yayya?

³ Nige nga mabawtisowan i tadday nga Bible study, mawag labbi nga iyaplikana i tuttuddu na Biblia. (Bibbigan i Mateo 28:19, 20.) Nu kuanna yatun, megitta yayya ta “ma-uto nga tolay”  ta ilustrasion ni Jesus nga nakkokkog tu aralam tapenu mamataddag tu balena ta dadda. (Mat. 7:24, 25; Luc. 6:47, 48) Kunnasi tam moffunan i Bible study tapenu meyaplikana i giggigiammuanna? Ammuattam i tallu nga makua tam.

4. Kunnasi tam nga moffunan i Bible study tapenu sisinu nga mapprogreso adde ta bawtismo? (Innan gapa i kahon nga “ Uffunan i Bible Studym nga Mapeggan tu Addetan Anna Gawatan Danatun.”)

⁴ Uffunammu i Bible studym nga mapeggan tu addetan. Ngatta kunnatun nakuan i kuammu? Nonopammu yaw nga ilustrasion: Nu apaddu anna mabayag i biahem, awayyam planowan nga ma-stop over labbi ta makasta ira nga lugar. Nu kunnatun i kuammu, ariammu nga matageno nga ararayyu i angngayammu. Kunnatun gapa ta Bible studym. Nu egga ira i addetanna nga mabi laman nga madde, mas nga posible para nisa nga madde i bawtismo. Usammu i parte nga “Puruebammu yaw” ta libru nga Magayayya nga Mattolay tu Mannanayun! tapenu moffunammu i Bible studym nga mapprogreso. Ta ultimu na kada leksion, ipakanawag mu ta Bible studym nu kunnasina nga meyaplika i nagigiammuna nu puruebanna yatun ira nga addetan. Nu egga i manono mu nga tanakuan paga nga addetan para ta Bible studym, itura mu yatun ta parte nga “Tanakuan paga.” Kanayummu nakuan nga usan yatun nga parte ta paggigiammunu tapenu masingammu nu anni ira nga addetan i madde na Bible studym ta mabi laman nga tiempo anna nu anni gapa danuri kawaganna i mas apaddu nga tiempo.

5. Segun ta Marcos 10:17-22, anni i nipakua ni Jesus ta mariku nga lalaki, anna ngatta?

⁵ Uffunammu i Bible studym nga ulian i pattolena. (Bibbigan i Marcos 10:17-22.) Ammu ni Jesus nga marigatan i mariku nga tolay nga ilaku i ngamin nga pakkukuana. (Mar. 10:23) Ngem kinagi lagapa ni Jesus nga kuan na lalaki yatun nga dakal nga panguli ta pattolena. Ngatta? Megafu ta ayatan yayya ni Jesus. Nu mittan,  baka magalangan ittam nga pagaramman i Bible study tam nga iyaplika i magiggigiammuna megafu ta abbo tam nga arianna paga makua yatun nga mawag nga ulianna. Kurug tu kawagan i tiempo tapenu malsa na tadday i dana nga kata-katolena anna mebaruasi i bagu nga kata-katolay. (Col. 3:9, 10) Ngem nu ta gafu pagalaman ay ari ka ngana mappasiran nga ipakiyuvovug nisa i mawagna nga ulian, mas mabi para ta Bible studym nga manguli. Nu kunnatun i kuattam, mepasingattam nga ikavurungattam yayya.​—Sal. 141:5; Prov. 27:17.

6. Ngatta mawag nga mangusa ittam tu mamappanono ira nga pakkiavu?

⁶ Importante nga iyavu mu ta Bible studym nu anni i makagina meyannung ta tadday nga topiko. Mammuattam gare tatun nu anni i nalippawana anna nu anni i kuru-kuruganna. Nu kanayun nga kunnatun i kuammu, mas nga mabi para nikaw nga ipakiyuvovug nisa i gannug ira nga awayyana tu marigatan yayya nga akseptan. Aru i mamappanono nga pakkiavu ta libru nga Magayayya nga Mattolay tu Mannanayun! Angngariganna, kunnaw i pakkiavu ta leksion 04: ‘Anni i matageno ni Jehova nu usammu i ngaganna?’ Kunnaw gapa i pakkiavu ta leksion 09: “Anni ira i kayà mu nga ipakimallo?” Ta olluna, awayyana tu marigatan paga i Bible studym nga tabbagan danatun nga pakkiavu. Ngem masanay mu yayya nga marrason nu usammu i teksto anna letratu ira ta libru.

7. Kunnasi tam nga efektibo nga meyusa i ekspiriensa ira?

⁷ Nu nalippawa ngana na Bible studym nu anni i mawag nga kuanna, mangistoria ka nisa tu ekspiriensa ira tapenu mapagaram yayya nga iyaplika yatun. Angngariganna, nu sinaggi-mittan laman nga makistudy i Bible studym, puedem nga ipagiraw nisa i video nga Ariannà Pinagurayan ni Jehova nga malegan ta parte nga “I Awayyam Paga Kuan” ta leksion 14. Ta aru nga leksion ta libru nga Magayayya nga Mattolay tu Mannanayun! makaleg ka tu kunnatun ira nga ekspiriensa ta parte natun nga libru nga “Gigiammuan i Aru Paga” onu ta “I Awayyam Paga Kuan.” * Ariammu nakuan nga ikumpara i Bible studym ta tanakuan nga tolay. Ariammu gapa kagian nisa nga “Nu nakuana, makuam gapa yatun.” Pagurayammu i Bible studym nga yayya lagapa i makanono tatun. Ipasigo mu laman nisa nu anni i nakoffun tatun nga tolay ta video tapenu meyaplikana i tuttuddu na Biblia. Awayyam nga makkagi tu tadday nga teksto onu i praktikal nga kingnguana tapus nu posible, ipasigo mu gapa nu kunnasi nga inuffunan ni Jehova yatun nga tolay.

8. Kunnasi tam nga moffunan i Bible study tam tapenu ayatanna si Jehova?

⁸ Uffunammu i Bible studym nga ayatan si Jehova. Kunnasi? Magaleg ka tu chansa tapenu magigiammu na Bible studym i kualidad ira ni Jehova. Uffunammu yayya tapenu malippawana nga si Jehova ay tadday nga magayayya nga Dios anna uuffunanna danuri mangiddu nisa. (1 Tim. 1:11; Heb. 11:6) Ipasingammu ta Bible studym nga mabbenefisio yayya nu iyaplikana i magiggigiammuna anna ikagim nga pangipasingan mismu yatun ni Jehova ta pangayana nisa. (Isa. 48:17, 18) Mas nga mapaguyu i Bible studym nga kuan i mawag ira nga ulianna nu mas nga dumakal i pangayana kani Jehova.​—1 Juan 5:3.

9. Segun ta Marcos 10:29, 30, anni i makoffun tapenu massakrifisio i Bible study tapenu mabbalin tu bawtisadu nga disipulo?

⁹ Tapenu mapprogreso i tadday nga Bible study adde ta bawtismo, kawaganna i massakrifisio. Kagitta na mariku nga lalaki nga nakagi  ta gafu, mawag gapa nga isakrifisio na karuan nga Bible study i material ira nga gannug. Nu mekontra ta prinsipio na Biblia i trabahuda, mawag tu magaleg ira tu tanakuan nga trabahu. Mawag gapa nga iyemmang na aru nga Bible study i pakikkofudda turi ira ta ari nga mangaya kani Jehova. Egga gapa danuri Bible study nga pinanawan na kafamiliada megafu ta manakida i Saksi ira ni Jehova. Kinagi ni Jesus nga marigatan i karuan nga kuan yatun nga passakrifisio ngem nipromesana nga ari nga madismaya danuri tumuttul nisa. Bendisionan ira ni Jehova tu minaggiddu nga espiritual nga familia. (Bibbigan i Marcos 10:29, 30.) Kunnasim nga moffunan i Bible studym tapenu mabbenefisio taw nga makakkasta nga regalu?

10. Anni i magigiammum ta niyistoria ni Manuel?

¹⁰ Makikkofun ta Bible studym. Importante nga mepatageno mu ta Bible studym nga iddukammu yayya. Ngatta? Kunnaw i niyistoria ni Manuel nga taga-Mexico turi ta Bible study pagalaman yayya. Kunna: “Nige na kada Bible study mi, kumustannà na mangistudy nio. Inuffunannà nga mabbalin tu kalmadu yayya nga meyistorià nisa i maski anni. Talaga matageno ku nga kuruga iddukannà.”

11. Anni i makasta nga efektona nu egga i tiempo tam para ta Bible study tam?

¹¹ Egga nakuan i tiempom para ta Bible studym ira gitta na kingngua ni Jesus ta tagatuttulna ira. (Juan 3:22) Nu mappopprogreso ngana i Bible studym, baka puedem yayya nga imbitan ta balenu tapenu makkafe, makipakkan, onu maggiraw tu JW Broadcasting^®. Mas nga maappresia na Bible studym i kunnatun mas ngana nu egga ira i selebrasion ta mundo. Makoffun yatun tapenu arianna matageno nga magitetadday yayya. “Aru i nagigiammù meyannung kani Jehova ta Bible study ngem kunnatun gapa i karu na nagigiammù ta pakikavulu ku ta mangistudy niakan,” kunni Kazibwe nga taga-Uganda. “Nasingakku nga talaga iddukan ni Jehova i totolena anna kuruga magayayya i totolena. Kunnatun i kayà ku ta pattolè.”

12. Ngatta madduruma nakuan nga publisher i ivulu tam ta pab-Bible study?

 ¹² Imbitan i nadduruma nga publisher ta Bible study. Nu mittan, baka matageno tam nga mas mabi nu sittam ngana laman onu kanayun nga parefu nga publisher i kavulu tam. Maski nu kunnatun ngana i nakasanayattam, mas nga moffunattam i Bible study tam nu mangivulu ittam tu nadduruma nga publisher. “Nadduruma i istilo na pangipakanawag na kada publisher nga nevulu ta paggigiammù,” kunni Dmitrii nga taga-Moldova. “Nakoffun yatun niakan tapenu mas malippawa ku nu sitaw ku paga nga mas meyaplika i magiggigiammù. Tapus turi ta ollu nga pagatendè ta study, ariakku ngana kuruga mappasiran ta aru ngana nga wawwaragi i kilalà.”

13. Ngatta uffunattam nakuan i Bible study tam nga makistudy?

¹³ Uffunammu i Bible studym nga makistudy. Ngatta? Nibilin gare ni Jehova ta maddayarayaw nisa nga maggarammammung ira anna parte yatun na paddayaw tam. (Heb. 10:24, 25) Fuera tatun, i wawwaragi ta kongregasion i mabbalin tu gittana familia tam. Nu kavulu tam ira ta study, gittana makkaravulu ittam nga kuman tu masingngo nga makan. Nu uffunammu i Bible studym tapenu makistudy, uuffunammu ngana gapa yayya tapenu kuan i tadday ta pinaka-importante nga dakkua mappange ta bawtismo. Ngem awayyana nga marigatan yayya nga pegafuanan nga kuan yatun. Kunnasi nga makoffun i libru nga Magayayya nga Mattolay tu Mannanayun! tapenu malsa na Bible studym i maski anni nga makefugag nisa nga makistudy?

14. Kunnasi tam nga mapaguyu i Bible study tam tapenu makistudy?

¹⁴ Usan i leksion 10 ta libru nga Magayayya nga Mattolay tu Mannanayun! tapenu mapaguyu i Bible studym nga magatende ta study. Nige nga ne-release yatun nga libru, nekiddaw ta karuan nga publisher nga usadda yatun nga leksion ta pab-Bible studyda. Kinagida nga efektibo yatun anna nakoffun ta Bible studyda tapenu makistudy ira. Siempre, ariammu nga innaggan i leksion 10 nigem nga imbitan i Bible studym ta study ira. Insigidam yayya nga imbitan anna kanayummu nga kuan yatun. Nadduruma i problema na kada Bible study yayya nga sifutammu nu anni i pakawaganna anna nu kunnasim yayya nga moffunan. Ari nakuan nga makkafi i nono mu nu mappasa labbi i tiempo nige yayya nga magatende. Pasa-pasensiammu yayya anna ari ka magimmang nga imbitan yayya.

15. Anni ira i awayya nga paganassingan na Bible study tam?

¹⁵ Manono mu kari turi ta naganassing ka nga mabbalin tu tadday nga Saksi ni Jehova? Awayyana nga natageno mu nga ariammu vuluvuga makapallayyagayya ta babalay. Baka naganassing ka gapa nga kontran naka na kafamiliam onu na kokkofummu. Nu natageno mu i kunnatun, malippawa mu i mataga-tageno na Bible studym. Kinagi ni Jesus nga normal laman i kunnatun ira nga paganassing. Ngem pinagaramna i tagatuttulna ira nga ari nakuan tu danatun i mamagimmang nira ta passerbida kani Jehova. (Mat. 10:16, 17, 27, 28) Kunnasi nga inuffunan ni Jesus i tagatuttulna ira tapenu malsa i anassidda? Kunnasim gapa nga maparigan yatun?

16. Kunnasi tam nga sanayan i Bible study tam tapenu ibillena i kuru-kuruganna?

¹⁶ Sanayammu i Bible studym tapenu sisinu nga mebillena i kuru-kuruganna. Awayyana nga navvurung i disipulos ni Jesus turi ta zinogna ira nga mallayyagayya. Ngem inuffunan ira ni Jesus gukaban na pakkagina nira nu sitaw anna nu anni i ilayyagayyada. (Mat. 10:5-7) Kunnasim  nga maparigan si Jesus? Uffunammu i Bible studym tapenu mammuanna nu sinni i puedena nga layyagayyan. Angngariganna, iyavu mu nisa nu egga i kakilalana nga mammakapia nu mammuanna gapa i kinakurug ta Biblia. Tapus uffunammu yayya nga mapprepara nu anni i kagianna. Ipasingammu nisa nu kunnasi i simple nga pangibillay ta kinakurug tapus nu puede, mappraktis kamu gukaban na pangusanu ta parte nga “I Kagian na Karuan” anna “Baka Iyavu na Karuan” ta libru nga Magayayya nga Mattolay tu Mannanayun! Nu kunnatun i kuannu, maffokus ka ta passanay ta Bible studym tapenu meyusana i Biblia ta pangiyawana tu simple anna mataktika ira nga tabbag.

17. Kunnasi tam nga meyusa i Mateo 10:19, 20, 29-31 tapenu moffunattam i Bible study tam nga mattalo kani Jehova?

¹⁷ Uffunammu i Bible studym nga mattalo kani Jehova. Nipasiguradu ni Jesus ta tagatuttulna ira nga uffunan ira ni Jehova megafu ta iddukanna ira. (Bibbigan i Mateo 10:19, 20, 29-31.) Iperaddammu ta Bible studym nga uffunan gapa yayya ni Jehova. Moffunammu yayya nga mattalo kani Jehova nu ipakimallo mu i addetanna ira. “Kanayun nga ipakimallo na mangistudy niakan i addetakku ira,” kunni Franciszek nga taga-Poland. Kunna paga: “Turi ta nasingakku nga sinabbag ni Jehova i pakimallona ira, insigida ngà ngana gapa nga nakimallo. Natageno ku i panguffun niakan ni Jehova turi ta kawagakku i mabbakasion tapenu maka-atende ta kombension anna kawagakku gapa i insigida nga lubbe maggafu ta bagu nga trabahù tapenu makistudy.”

18. Anni i matageno ni Jehova ta kukukuan na wawwaragi tam nga mangi-Bible study?

¹⁸ Talaga iddeddu ni Jehova i Bible study tam ira. Appresianna gapa i lallappo na wawwaragi nga mangi-Bible study tapenu moffunan i totolay nga maddukko nisa. Yayya nga iddedduna ira. (Isa. 52:7) Nu awan tu Bible studym ta maddaggun, moffunammu lagapa i Bible study ira nga mapprogreso adde ta bawtismo nu makikavulu ka ta tanakuan nga publisher ta Bible studyda.