1. Ɔdi nɛ ayikpo ku Ujisɔsi da ɛwa nɛhi ku ācɛ a kéē ya a?

ALƐWA ku acɛnyilɔ mla acɛnya lɛ iyawu yɛ gā Ujerusalɛm. É wɛ ācɛ nōo ŋma éwo ɛyɛɛyɛyi, klla gē ka uce ɛyɛɛyɛyi. Ó lɛ ɔdā ō ohidaago éyi nōo ya ɛ̄cī ɔɔma. Acigili, ācɛ Ujiyu ōhī gbɔɔ ō ka uce ku augbɔga nyā nōo wa Ujerusalɛm a! Ɛnyā le hɛ ɛwa nɛhi ku ācɛ a idaago. Amáŋ ɔdā nɛ ācɛ Ujiyu a yɔ i ka lɛ uwa mla ɔdā nɛ Upita ka lɛ ɛjɛɛji uwa a, hɛ uwa idaago fiyɛ a. Ɛwa ku ācɛ a nwu kē lɔfu lɛ onyata ŋma lɛ ō mafu ɔtu ō kpoce lɛ Ujisɔsi Ukraist. Ɛlā ɔɔma lɛ abɔ kwu ɛwa a ɔtu nɛhi. Ɛla ā lɛ abɔ kwu ācɛ a ɔtu néē da ɔka kahinii: “Ɔdi nɛ alɔ cika ō ya a?” É ta uwa ohi kahinii: “Kéē lɛ éyééye kú aá yá ubatísim.”​—Ācot. 2:37, 38.

2. Ɔdi nɛ alɔ gáā leyi yɛ ɔ ipu ikpɛyi ɛlā nyā a? (Má ifoto nōo yɔ iyɔbu ku Ɔda Ō Gbaajɛ nyā a.)

² Ó klla lɛ ɔdā ō ohidaago ɔhá nōo ya kpɔ. Ācɛ nōo lɛbɛɛka utajan ɛta (3,000) lɛ ubatisim ya ɛ̄cī ɔɔma, klla kwu piya ayikpo ku Ukraist. Ɛnyā wɛ ō gbɔɔ ku uklɔ nɛhi ō je ācɛ piya ayikpo ku Ukraist, nɛ Ujisɔsi je ɔ́da lɛ ayikpo ku nu kéē ya a. Ayikpo ku nu yɔ i yuklɔ ɔɔma icɛ. Ɛpleeko ku alɔ nyā, alɔ i gē bi awa ligii le kɛla lɛ ɔcɛ, cɛɛ ɔcɛ ɔɔma le tutu ō ya ubatisim ŋ. Ó lɔfu je ɔya ōhī amāŋ ihayi amāŋ fiyɛ, gbɔbu ɛɛ ku ɔcɛ nɛ alɔ gē klɔcɛ mla ɔ a kóō gáā ya ubatisim. Ɛgɛ nɛ a jé a, ɔdaŋ ku a yɔ i ya oklɔcɛ mla ɔcɛ babanya, ó géē cɛgbá ō ceyitikwu nɛhi gbɔbu ɛɛ ka ó gáā ya ubatisim. Ipu ikpɛyi ɛlā nyā, alɔ géē lɛyi yɛ ɔdā nɛ a lɔfu ya ku a je otabɔ lɛ ɔcɛ nɛ a gē klɔcɛ ku Ubáyíbu mla ɔ, o ya ɛɛ kóō gáā ya ubatisim.

3. Ɔdi nɛ ɔkpá ku Umátiyu 28:19, 20 ka ka ɔcɛ nɛ alɔ gē klɔcɛ mla ɔ a cika ō ya, o ya ɛɛ kóō jɛ gɔbu ō gáā ya ubatisim a?

³ Gbɔbu ɛɛ kóō gáā ya ubatisim, ɔcɛ nɛ a gē ya oklɔcɛ ku Ubáyíbu mla ɔ a cika ō yuklɔ mla ɛlā nɛ Ubáyíbu gē nwu a. (Jé  Umátiyu 28:19, 20.) Ɔdaŋ ku ɔcɛ nɛ a gē klɔcɛ mla ɔ a yuklɔ mla ɛlā nɛ ó gē nwu a, ó géē lɛbɛɛka “ɔ̄cɛ ojéeyī” ipu aciije ku Ujisɔsi nōo bu ɔgɔ lipu lipu kóō gwo inu ku nu ɛyi ɛcɔ a. (Umát. 7:24, 25; Ulúk. 6:47, 48) Ɛgɛnyá nɛ alɔ gáā je otabɔ lɛ ɔcɛ nɛ alɔ gē klɔcɛ mla ɔ kóō yuklɔ mla ɛlā nɛ ó gē nwu a? Alɔ kɛla lɛyikwu aɔdā ɛta nɛ alɔ lɔfu ya a.

4. Ɛgɛnyá nɛ alɔ gáā je otabɔ lɛ ɔcɛ nɛ alɔ gē klɔcɛ mla ɔ kóō yɔ i yuklɔ gɔbu, o ya ɛɛ kóō cika jɛ ō gáā ya ubatisim a? (Má ikpati nōo kahinii: “ Je Otabɔ Lɛ Ɔcɛ Nɛ A Gē Klɔcɛ Mla Ɔ A Kóō Ya Ōmiya Klla Lɛ Ɔ Ya Jila.”)

⁴ Ta ɔcɛ nɛ a gē ya oklɔcɛ mla ɔ a abɔ kóō ya ōmiya. Ɔdiya nɛ a cika ō ya ɔɔma a? Leyi yɛ aciije nyā ɛ: Ɔdaŋ ku a dɔka ō pɛ umoto gā ɛga oligbo, a lɔfu miya ō mahayi ɛga oheyifuu éyi abɔ a yɔ ɔwɛ a. Ɛnyā géē ta uwɔ abɔ cɛɛ ku ɔtu ka ó hii gbenyi gā uwɔ, ohigbu ku a gbɛla ku ɛga nɛ a yɔ i nyɔ a ligbo nɛhi ŋ. Ɛgɔɔma duu, ɔdaŋ ka ɔcɛ nɛ a gē klɔcɛ mla ɔ a ya ōmiya ku ɔdā nɛ ó lɔfu ya eko kpii klla lɛ ɔ ya, ó géē má kóō ya ubatisim wɛ ōmiya nōo géē tɔɔtɛ lɛ ɔ ō ya. Ta ɔcɛ a abɔ kóō ya ōmiya ŋma lɛ ō yuklɔ mla aya ku ikpati néē hi ku “Ɔdā nɛ a géē ya,” nōo yɔ ipu ɔkpá ku Jɔɔnyɛ Oyeeyi Nōó Gáā Mɛ Gboogboo Ŋ! ma. Oŋmɛyi ku ɛlā ō nwu duuma, kɔka lɛyikwu ɛgɛ nɛ ōmiya a géē ta ɔ abɔ kóō yuklɔ mla ɛlā nɛ ó nwu a. Ɔdaŋ ka ó lɛ ōmiya éyi nɛ a dɔka kóō ya, a lɔfu ta ɔ ipu ɛga néē hi ku “Ɔdā ɔhá” a. Awɔ mla ɔcɛ nɛ a gē klɔcɛ mla ɔ a kóō bēē leyi yɛ aya nyā eko doodu, o ya ɛɛ kóō má ōmiya nɛ ó lɔfu ya jila eko kpii, mla ɛ̄nɛ̄ ó lɔfu je eko nwune a.

5. Oŋma ɛlā nōo yɔ ipu ɔkpá ku Umáki 10:17-22 a, ɔdi nɛ Ujisɔsi da ɔcɛ éyi nōo gbagbenu nɛhi a kóō ya a, ɔdiya nɛ ó kē da ɔ lɛ a?

⁵ Ta ɔcɛ nɛ a gē klɔcɛ mla ɔ a abɔ kóō ya opiyabɔ ipu oyeeyi ku nu. (Jé Umáki 10:17-22.) Ujisɔsi jé ka ó géē lɔnɔ ku ɔcɛ nōo gbagbenu kóō je oduudu ɔdā nɛ ó lɛ a lá. (Umák. 10:23) Amáŋ, Ujisɔsi da adā ɔɔma kóō ya opiyabɔ nɛhi nyā ipu oyeeyi ku nu. Ɔdiya a? Ohigbu ka  Ujisɔsi yihɔtu ku nu. Ekoohi, alɔ lɔfu kwu iyi alɔ bi ŋma ō je ɔtu ō tu kwu ɔtu lɛ ɔcɛ nɛ alɔ gē klɔcɛ mla ɔ a, ohigbu ku alɔ gbɛla ka ó tutu ō ya opiyabɔ ipu oyeeyi ku nu ŋ. Ó lɔfu je eko nɛhi ku ācɛ kéē ya opiyabɔ ipu oyeeyi ku uwa, cɛɛ kē kwu piya ācɛ ɛyipɛ a. (Ukól. 3:9, 10) Amáŋ ɔdaŋ ku a gbɔɔ fiya fiya mla ō da uwa lɛyikwu opiyabɔ néē cɛgbá ō ya, é géē gbɔɔ ō ya opiyabɔ ɔɔma. Ō ka ɛdɔ ɛlā ɛgɔɔma mla ɔ a géē mafu ku a lɛ ɛlá wu ɔ.​—Aíjē 141:5; Aíit. 27:17.

6. Ɔdiya nɛ alɔ cika ō da ācɛ nɛ alɔ gē klɔcɛ mla uwa ɔka nōo géē ya kéē ka ɔdā néē gbɛla a?

⁶ Ó cɛgbá nɛhi ku alɔ da ācɛ nɛ alɔ gē klɔcɛ mla uwa ɔka, nōo géē cɛ lɛ uwa ka ɔdā néē gbɛla lɛyikwu ikpɛyi ɛlā nɛ alɔ yɔ i kɛla lɛyikwu ɔ a. Ɛnyā géē cɛ gā uwɔ jé ɔdā nɛ ɔcɛ nɛ a gē klɔcɛ mla ɔ a jé, mla ɔdā nɛ ó kpɔtuce a. Ɔdaŋ ku a gē ya ɛnyā eko doodu, ó géē tɔɔtɛ gā uwɔ ō kɛla lɛyikwu aɔdā ōhī nōo lɔfu lɔnɔ tu ɔ ō miyɛ cɛ a. Ɔkpá nōo wɛ u Jɔɔnyɛ Oyeeyi Nōó Gáā Mɛ Gboogboo Ŋ! ma, lɛ alɛwa ku aɔka nōo géē cɛ lɛ ɔcɛ ka ɔdā nɛ ó gbɛla a. Ocabɔ mafu, ɛlā ō nwu ɔmɛ 04 da ɔka nyā: “Ɛgɛnyá nɛ a gbɛla ka ɔtu gē ya Ujehofa lɛ ɔdaŋ ku a bi iye ku nu le yuklɔ a?” Ɛla ō nwu ɔmɛ 09 da ɔka nyā: “Ɔdi wɛ ɔdā ōhī nɛ a géē dɔka ō gbɔɔkɔ lɛyikwu ɔ a?” Eko aflɛyi, ó géē lɔfu lɔnɔ ta ɔcɛ nɛ a gē klɔcɛ mla ɔ a kóō cila ohi ku aɔka nyā. A lɔfu ta ɔ abɔ ŋma lɛ ō nwu ɔ ɛlā kóō gbɛla lɛyikwu aɛga ku Ubáyíbu mla aifoto nōo yɔ ipu ɔkpá a.

7. Ɛgɛnyá nɛ alɔ gáā bi aɔ̄kā nōo ya ɔkwɔɔkwɛyi a le yuklɔ lɔɔlɔhi a?

⁷ Eko duuma nōó gáā ta ɔcɛ nɛ a gē klɔcɛ mla ɔ a eyī peee ɔdā nɛ ó cika ō ya a, bi aɔ̄kā nōo ya ɔkwɔɔkwɛyi a le ta ɔ ɔtu kwu ɔtu kóō ya ɔ. Ocabɔ mafu, ɔdaŋ ku ɔcɛ nɛ a gē klɔcɛ mla ɔ i gē gā ōjila ku ujɔ ojigogo ŋ, a lɔfu ma uvidio nōo kahinii: Jehovah Cared for Me a fu lɛ ɔ, nōo yɔ ipu aya ku “Jila Ɛlā Nyā Má Tōōtɔ̄ɔ̄” ipu ɛlā ō nwu ɔmɛ 14 a. Ipu aɛlā ō nwu alɛwa nōo yɔ ipu ɔkpá ku Jɔɔnyɛ Oyeeyi Nōó Gáā Mɛ Gboogboo Ŋ! ma, a géē má ɛdɔ aɔ̄kā ɛgɔɔma ipu aya ku “Jé Gɔbu” amāŋ ipu aya ku “Jila Ɛlā Nyā Má Tōōtɔ̄ɔ̄” a. * Leyi kwɛcɛ ku a hii lɛ ɔcɛ nɛ a gē klɔcɛ mla ɔ a gbla ɔcɛ ɔhá ŋ, ŋma lɛ ō ka kahinii: “Ɔdaŋ ka ó ya ɔ gla, a lɔfu ya ɔ gla.” Ɔcɛ nɛ a gē klɔcɛ mla ɔ a kóō ya ōmiya ɔɔma abɔyi nu. Ikɔkɔ ɔɔma, kɛla lɛyikwu aɛlā ocɛgbá ōhī nōo ta ɔcɛ nōo yɔ ipu uvidio ɔɔma abɔ kóō yuklɔ mla aɛlā ō nwu ku Ubáyíbu a. A jé ŋ, a lɔfu kɛla lɛyikwu ɛga ku Ubáyíbu éyi nōo cɛgbá, amāŋ ɔdā ijeeyi éyi nɛ ɔcɛ ɔɔma ya a. Eko duuma nōó tɔɔtɛ, kɛla okpɔcii lɛyikwu ɛgɛ nɛ Ujehofa ta ɔcɛ ɔɔma abɔ a.

8. Ɛgɛnyá nɛ alɔ gáā je otabɔ lɛ ɔcɛ nɛ alɔ gē klɔcɛ mla ɔ kóō yihɔtu ku Ujehofa a?

⁸ Ta ɔcɛ nɛ a gē klɔcɛ mla ɔ abɔ kóō yihɔtu ku Ujehofa. Ɛgɛnyá a? Dɔka ɛnɛɛnɛ ɛga nɛ a géē lɔfu bi le ta ɔ abɔ kóō nwu ɛlā lɛyikwu auce ō ya ku Ujehofa. Ta ɔ abɔ kóō jé ku Ujehofa wɛ Ɔwɔico nōo gē gweeye, nōo klla gē je otabɔ lɛ ācɛ nōo yihɔtu ku nu a. (1 Utím. 1:11; Uhíb. 11:6) Mafu lɛ ɔ ka ó géē lɛ itene ŋma lɛ ō yuklɔ mla aɛlā nɛ ó nwu a, ku a klla mafu lɛ ɔ ku ɛjɛɛji itene nɛ ó gáā lɛ a mafu ku Ujehofa yihɔtu ku nu. (Ayis. 48:17, 18) Ɛgɛ nɛ ɔcɛ nɛ a gē klɔcɛ mla ɔ a gē ya ku ihɔtu nɛ ó lɛ lɛ Ujehofa a kóō lɔfu tōōtɔ̄ɔ̄ a, ɛgɔɔma nɛ ó gáā dɔka ō bēē ya opiyabɔ nōó cɛgbá lɛ duu a.​—1 Ujɔ́n. 5:3.

9. Ɛgɛ nɛ ɔkpá ku Umáki 10:29, 30 ka lɛ a, ɔdi lɔfu ta ɔcɛ abɔ kóō leyi gwu aɔdā ōhī bonu o ya ɛɛ kóō lɛ ubatisim ya a?

⁹ O ya ɛɛ ku ɔcɛ nɛ a gē klɔcɛ mla ɔ a kóō jɛ gɔbu ō gáā ya ubatisim, ó cika ō leyi gwu aɔdā ōhī bonu. Bɛɛka ɔcɛ ō gbagbenu nɛ alɔ kɛla  lɛyikwu ɔ gbɔbu a, ōhī ku ācɛ nɛ alɔ gē klɔcɛ mla uwa a géē cɛgbá ō leyi gwu aɔdā agbenu ō lɛ bonu. Ɔdaŋ ku uklɔ néē gē ya i cɛtɔha mla ukɔ́ ku Ubáyíbu ŋ, é géē lɔfu dɔka uklɔ ɔhá gla. Ōhī ku uwa géē cɛgbá ō habɔ aɔkpa nōó yihɔtu ku Ujehofa ŋ ma ta. Ó kē lɛ ācɛ ɔhá nɛ ācɛ apɔlɛ ku uwa nōó yihɔtu ku Ācɛ Ocijali Ku Ujehofa ŋ ma, géē leyi gwu uwa bonu. Ujisɔsi ka ka ó géē lɔnɔ ku ācɛ ōhī kéē leyi gwu aɔdā ɛgɛnyā bonu. Amáŋ ó cokonu ku Ujehofa i gáā lɛ ācɛ nōo gē yɛce ɔ a abɔ gaajɛ ŋ. Ujehofa géē hɔ̄hā ce uwa ŋma lɛ ō je apɔlɛ nōo lɛ ihɔtu ipu ācɛ ɔlɛ nu a lɛ uwa. (Jé Umáki 10:29, 30.) Ɛgɛnyá nɛ a gáā ta ɔcɛ nɛ a gē klɔcɛ mla ɔ a abɔ kóō lɛ itene ŋma ɛnɛɛnɛ ɛhi nyā a?

10. Ɔdi nɛ a nwu ŋma ɛlā nɛ u Manuel ka a?

¹⁰ Kwu piya ɔya ku ɔcɛ nɛ a gē klɔcɛ mla ɔ a. Ó wɛ ɔdā nōo cɛgbá nɛhi ku a mafu lɛ ɔcɛ nɛ a gē klɔcɛ mla ɔ a ku a lɛ ɛlá wu ɔ nɛhi. Ɔdiya a? Má ɔdā nɛ u Manuel nōo lā ipu éwo ku Mexico ka a. Ó kɛla lɛyikwu ɛgɛ nɛ itica ku nu ta ɔ abɔ eko nɛ ó yɔ i ya oklɔcɛ ku Ubáyíbu a. Ó kahinii: “Gbɔbu ɛɛ ku alɔ gbɔɔ oklɔcɛ duuma, itica ku um gē da um ɔka abɔ um yɔ i ya lɛ a. Ó ta um abɔ ku ɔtu ku um kóō yaajɛ, klla jɛga gā um ku um ka ɔdā duuma nɛ um dɔka ō ka a lɛ ɔ. N má ka ó lɛ ɛlá wu um ɔkwɔɔkwɛyi.”

11. Ɛgɛnyá nɛ ācɛ nɛ alɔ gē klɔcɛ mla uwa lɔfu lɛ itene ŋma lɛ ō lɛ eko taajɛ ō yɔ mla alɔ a?

¹¹ Lɛ eko taajɛ ku a yɔ mla ācɛ nɛ a gē klɔcɛ mla uwa, ɛgɛ nɛ Ujisɔsi lɛ eko taajɛ yɔ mla ayikpo ku nu a. (Ujɔ́n. 3:22) Ɔdaŋ ku ɔcɛ nɛ a gē klɔcɛ mla ɔ a yɔ i ya opiyabɔ ipu oyeeyi ku nu, a lɔfu hi ɔ igwu wa ɔlɛ uwɔ cɛɛ ku a gwa umu amāŋ ɔdole, amāŋ ō má ōmiya ku JW Broadcasting nōo gē bɛɛcɛ ɔya doodu a tɔha. Ó géē jɛ ɔ eyī nɛhi, ɔdaŋ ka hi ɔ igwu eko nɛ aɔkpa ku nu mla ācɛ apɔlɛ ku nu yɔ i ya isimisi, amāŋ ucolu néē gē ya nōó cɛtɔha mla ukɔ́ ku Ubáyíbu ŋ, nɛ anu foofunu géē ya ɔ cii a. Kazibwe nōo lā ipu Uganda a kahinii: “N nwu ɔdā alɛwa lɛyikwu Ujehofa ŋma lɛ ō lɛ eko taajɛ ō yɔ mla itica ku um, ɛgɛ nɛ um gē ya eko ku oklɔcɛ ku alɔ a. N lɛ ɛgɛ nɛ Ujehofa yihɔtu ku ācɛ ɔlɛ nu,  mla ɛgɛ néē gē gweeye lɛ a má ɛ. Ɔdā nɛ um tine ipu oyeeyi ku um a ya abɔɔ a.”

12. Ɔdiya nɛ alɔ cika ō bi ācɛ ō tɔɔna ɛlā Ɔwɔico ɛyɛɛyɛyi nyɔ gáā ya oklɔcɛ ku alɔ a?

¹² Bi ācɛ ō tɔɔna ɛlā Ɔwɔico ɛyɛɛyɛyi nyɔ i ya oklɔcɛ a. Ekoohi, alɔ lɔfu gbɛla ka ó géē tɔɔtɛ ku alɔ nyɔ abɔyi alɔ, amāŋ bi ɔcɛ ō tɔɔna ɛlā Ɔwɔico ekponu nōo tɛtɛ gē nyɔ mla alɔ a. Naana nōo ya ɛnyā lɔfu tɔɔtɛ lɛ alɔ a, ó géē ta ɔcɛ nɛ alɔ gē ya oklɔcɛ mla ɔ a abɔ fiyɛ, ɔdaŋ ku ekoohi alɔ gē bi ācɛ ō tɔɔna ɛyɛɛyɛyi nyɔ mla iyi alɔ. Dmitrii nōo lā ipu Moldova a kahinii: “Eyeeye ku ācɛ ō tɔɔna ɛlā Ɔwɔico nōo gē wa i ya oklɔcɛ mla um a, gē lɛ ɛlā teyi peee ɔwɛ nōó lɛ ɛdɔ ŋ. Ɔɔma ta um abɔ ku um má ɔwɛ ɔhá nɛ um lɔfu bi aɛlā nɛ um yɔ i nwu a le yuklɔ. Eko nɛ um kē gā ōjila ku ujɔ eko aflɛyi a, uweyi i ya um lɛ a ŋ, ohigbu ku um lɛ alɛwa ku ayinɛ a má gbɔbu ɛ.”

13. Ɔdiya nɛ alɔ cika ō ta ɔcɛ nɛ alɔ gē klɔcɛ mla ɔ a abɔ kóō wa ōjila ku ujɔ a?

¹³ Je otabɔ lɛ ɔcɛ nɛ a gē klɔcɛ mla ɔ a kóō wa ōjila ku ujɔ. Ɔdiya a? Ohigbu ku Ujehofa je ɔ́da lɛ ācɛ nōo gē gba ɔ ɛ̄gbā a kéē jila tɔha, ó wɛ ipu aya ku ɛ̄gbā ō gba ku alɔ. (Uhíb. 10:24, 25) Ō ka tu ɔ, ayinɛ alɔ nōo yɔ ipu ujɔ a lɛbɛɛka ācɛ apɔlɛ ku alɔ a. Eko duuma nɛ alɔ yɔ ōjila ku ujɔ tɔha mla uwa, ó lɛbɛɛka alɔ yɔ i lé ɔdole olɔɔnyɛ tɔha a. Ɔdaŋ ku a je otabɔ lɛ ɔcɛ nɛ a gē klɔcɛ mla ɔ a kóō wa ōjila ku ujɔ, a yɔ i ta ɔ abɔ kóō ya ɔdā ocɛgbá, o ya ɛɛ kóō lɛ ubatisim ya. Amáŋ, ó lɔfu lɔnɔ tu ɔ kóō gbɔɔ ō wa ōjila ku ujɔ. Ɛgɛnyá nɛ u Jɔɔnyɛ Oyeeyi Nōó Gáā Mɛ Gboogboo Ŋ! ma, gáā ta ɔ abɔ kóō lɛ unwalu duuma nōo géē ya kóō wa ōjila ku ujɔ ŋ ma yale a?

14. Ɛgɛnyá nɛ alɔ gáā ya cɛɛ ku ɔcɛ nɛ alɔ gē klɔcɛ mla ɔ a kóō wa ōjila ku ujɔ a?

¹⁴ Bi ɛlā ō nwu ɔmɛ 10 ku ɔkpá ku Jɔɔnyɛ Oyeeyi Nōó Gáā Mɛ Gboogboo Ŋ! ma, le je otabɔ lɛ ɔcɛ nɛ a gē klɔcɛ mla ɔ a kóō wa ōjila ku ujɔ. Gbɔbu ɛɛ kéē ya ɔkpá a mɛ a, é da ācɛ ō tɔɔna ɛlā Ɔwɔico ōhī kéē yuklɔ mla ɛlā ō nwu nyā mla ācɛ néē gē klɔcɛ mla uwa a. É ka ka ó yuklɔ lɔɔlɔhi klla ta ācɛ néē gē klɔcɛ mla uwa a abɔ kéē wa ōjila ku ujɔ. Ku ɛlā ɔkwɛyi a ba, a hii gbeyi jaa gā ɛlā ō nwu ɔmɛ 10 gbɔbu ɛɛ ku aa hi ɔcɛ nɛ a gē klɔcɛ ku Ubáyíbu mla ɔ igwu wa ōjila ku alɔ ŋ. Hi ɔ igwu fiya a ɛgɛ nōó tɔɔtɛ a, ku a klla bēē ya ɛnyā ojigogo. Ācɛ ɛyɛɛyɛyi nɛ alɔ gē klɔcɛ ku Ubáyíbu mla uwa a lɛ unwalu ɛyɛɛyɛyi. Ó lɛ a, jahɔ tu ɔdā nōo wɛ ɛgbá ku ācɛ nɛ a gē klɔcɛ mla uwa a, cɛɛ ku a má ɔ ɔdaŋ ku a lɔfu je otabɔ nōo cɛgbá a gla. Ɔtu kóō hii gbenyi gā uwɔ ɔdaŋ ka ó je eko gbɔbu ɛɛ kóō wa ōjila ku ujɔ ŋ. Gbeyi cii, amáŋ bēē hi ɔ igwu ojigogo.

15. Ɛdɔ ufi nyá nɛ ɔcɛ nɛ alɔ gē klɔcɛ mla ɔ lɔfu lɛ a?

¹⁵ A blakwu eko nɛ ufi ya uwɔ ō je piya éyi ku Ācɛ Ocijali Ku Ujehofa kpɔ ɛ? A jé ŋ, ɔtu lɔfu ya uwɔ bɛɛka ó gáā tɔɔtɛ gā uwɔ ō yuklɔ ku ɔna ō ta ŋma ɔlɛ gā ɔlɛ gla ŋ ma. Amāŋ a lɔfu yɔ i yuufi ku apɔlɛ ku uwɔ amāŋ aɔkpa ku uwɔ géē ya uwɔ ŋmo. Ɔdaŋ ka ó lɛ a, a lɔfu je ɛgɛ nɛ ɔtu lɔfu ya ɔcɛ nɛ a gē klɔcɛ mla ɔ a. Ujisɔsi ka ka ācɛ ōhī lɔfu lɛ ɛdɔ ufi ɛgɛnyā. Amáŋ, ó ta ayikpo ku nu ɔtu kwu ɔtu kéē cɛ lɛ ufi ci uwa ŋma ō gba Ujehofa ɛ̄gbā ŋ. (Umát. 10:16, 17, 27, 28) Ɛgɛnyá nɛ Ujisɔsi je otabɔ lɛ ayikpo ku nu kéē lɛ ufi ku uwa yale a? Ɛgɛnyá nɛ a kē gáā yɛce ocabɔ ku nu a?

16. Ɛgɛnyá nɛ alɔ gáā nwu ɔcɛ nɛ alɔ gē klɔcɛ mla ɔ ɛlā, kóō ka ɔdā nɛ ó kpɔtuce a mla ācɛ ɔhá a?

¹⁶ Bēē nwu ɔcɛ nɛ a gē klɔcɛ mla ɔ a ɛlā kóō ka ɔdā nɛ ó kpɔtuce a mla ācɛ ɔhá. Ayikpo ku Ujisɔsi lɔfu yɔ i yuufi eko nɛ ó ta uwa ɛhɔ gā ɛcɛ kéē nyɔ i tɔɔna a. Amáŋ Ujisɔsi ta uwa abɔ ŋma lɛ ō da uwa ɛga néē cika ō tɔɔna, mla ɔdā néē cika ō tɔɔna lɛyikwu ɔ a. (Umát. 10:5-7)  Ɛgɛnyá nɛ a lɔfu gbla Ujisɔsi ya a? Ta ɔcɛ nɛ a gē klɔcɛ mla ɔ abɔ kóō jé ɛga nɛ ó cika ō tɔɔna a. Ocabɔ mafu, da ɔ ɔka ɔdaŋ ka ó jé ɔcɛ duuma nōo lɔfu lɛ itene ŋma ō jé ɛlā ɔkwɛyi éyi ŋma ipu Ubáyíbu. Cɛɛ a ta ɔ abɔ kóō tutu ɔdā nɛ ó géē ka, ŋma lɛ ō mafu lɛ ɔ ɔwɛ ō tɔɔtɛ nɛ ó lɔfu bi le da ācɛ ɔhá ɛlā ɔkwɛyi a. Eko duuma nōó cɛgbá, a lɔfu ya otutu mla ɔ ŋma lɛ ō yuklɔ mla ɛlā néē ka ipu ikpɛyi ɛlā nōo kahinii: “Ācɛ Ōhī Gē Ka” mla “Ɔcɛ Lɔfu Da Ɔka Ka,” nōo yɔ ipu ɔkpá ku Jɔɔnyɛ Oyeeyi Nōó Gáā Mɛ Gboogboo Ŋ! ma. Eko duuma nɛ a ya lɛ a, lɛ ɔtu ku uwɔ kwu ō nwu ɔcɛ nɛ a gē ya oklɔcɛ mla ɔ a ɛlā, kóō bi Ubáyíbu le je ohi nōo tɔɔtɛ mla ō ka ɔ ɔwɛ ijeeyi.

17. Ɛgɛnyá nɛ alɔ gáā bi ɔkpá ku Umátiyu 10:19, 20, 29-31, le ta ācɛ nɛ alɔ gē klɔcɛ mla uwa abɔ kéē kpɔtuce Ujehofa a?

¹⁷ Ta ɔcɛ nɛ a gē klɔcɛ mla ɔ a abɔ kóō kpɔtuce Ujehofa. Ujisɔsi da ayikpo ku nu ka Ujehofa géē ta uwa abɔ, ohigbu ka ó yihɔtu ku uwa. (Jé Umátiyu 10:19, 20, 29-31.) Ta ɔcɛ nɛ a gē klɔcɛ mla ɔ a ɛlá kwu ɔ ka Ujehofa géē ta ɔ abɔ duu. A lɔfu ta ɔ abɔ kóō gbolo ce Ujehofa, ŋma lɛ ō gbɔɔkɔ mla ɔ lɛyikwu aɔdā nɛ ó miya ō ya a. Franciszek nōo lā ipu Poland a kahinii: “Igbalɛwa, itica ku um gē ka ɔdā nɛ um miya ō ya a ipu ɔkɔ ō gba ku nu. Eko nɛ um má ɛgɛ nɛ Ujehofa cila ɔkɔ ō gba ku itica ku um a, n paapa gbɔɔ ō gbɔɔkɔ. N má ku Ujehofa ta um abɔ eko nɛ um da ɔka kē lɛ ɛga je gā um ŋma uklɔ ɛpɛpɛ ku um, o ya ɛɛ ku um lɔfu gā ōjila ku ujɔ mla ōjileyi nɛhi a.”

18. Ɛgɛnyá nɛ ɔtu gē ya Ujehofa lɛ lɛyikwu uklɔ ō nwu ɛlā nɛ Ācɛ O Yɛce Ukraist gē ya a?

¹⁸ Ujehofa lɛ ɛlá wu ācɛ nɛ alɔ gē klɔcɛ ku Ubáyíbu mla uwa a nɛhi. Ó jé ɛgɛ nōó lɔnɔ lɛ ku aitica nōo wɛ Ācɛ O Yɛce Ukraist kéē yuklɔ lɔfu lɔfu ō ta ācɛ abɔ kéē tubla ɔ ajaajɛ a, ó kē yihɔtu ku uwa ohigbu ɔdā néē i ya a. (Ayis. 52:7) Ɔdaŋ ku á ka ó yɔ i ya oklɔcɛ ku Ubáyíbu mla ɔcɛ babanya ŋ naana, a lɔfu ta ācɛ néē gē klɔcɛ mla uwa abɔ kéē jɛ gɔbu ō gáā lɛ ubatisim ya, ŋma lɛ ō ba ācɛ ō tɔɔna ɛlā Ɔwɔico ɔhá iyē ō gáā ya oklɔcɛ mla ācɛ néē gē klɔcɛ mla uwa a.