1. Ania ti naibaga nga aramiden ti adu a tattao idi umuna a siglo?

NAGUUMMONG ti adu a lallaki ken babbai manipud iti adu a pagilian ken nadumaduma ti lengguaheda. Adda nakaskasdaaw a napasamak iti dayta nga aldaw. Maysa a grupo dagiti ordinario a Judio ti makapagsao iti lengguahe dagiti bisita! Nasdaaw dagidiay a tattao. Ngem ad-adda pay a nakaskasdaaw no ania ti ibagbaga kadakuada dagidiay a Judio ken ti imbaga kadakuada ni apostol Pedro. Karaman iti dayta ti mensahe a maisalakanda no ipakitada ti pammatida ken Jesu-Kristo. Natukay ti puso dagita a tattao. Kinapudnona, natignayda a mangisaludsod: “Ania ti rumbeng nga aramidenmi?” Insungbat ni Pedro: “Agpabautisar ti tunggal maysa kadakayo.”—Ara. 2:37, 38.

2. Ania ti usigentayo iti daytoy nga artikulo? (Kitaen ti ladawan iti akkub.)

² Nakaskasdaaw ti simmaruno a napasamak. Agarup 3,000 ti nabautisaran iti dayta nga aldaw, ket nagbalinda nga adalan ni Kristo. Daytoy ti rugi ti nasaknap a trabaho a panagaramid iti adalan nga imbilin ni Jesus kadagiti pasurotna. Nagtultuloy dayta a trabaho agingga iti maika-21 a siglo. Iti kaaldawantayo, saantayo a matulongan ti maysa nga agpabautisar kalpasan ti sumagmamano la nga oras. Mabalin a kasapulan ti adu a bulan wenno makatawen wenno nasursurok pay sakbay nga agpabautisar ti maysa a mayad-adalan. Kasapulan ti panagregget iti trabaho a panagaramid iti adalan, kas pagaammom no adda iyad-adalam ita. Iti daytoy nga artikulo, usigentayo ti aramidem tapno matulongam nga agpabautisar ti iyad-adalam.

3. Kas nadakamat iti Mateo 28:19, 20, ania ti masapul nga aramiden ti mayad-adalan tapno rumang-ay ken agpabautisar?

³ Sakbay nga agpabautisar ti maysa a mayad-adalan iti Biblia, masapul nga iyap-aplikarnan dagiti pannursuro ti Biblia. (Basaen ti Mateo 28:19, 20.) No ar-aramidenna daytan, agbalbalin a kas iti “masirib a tao” iti ilustrasion ni Jesus a nagkali iti nauneg tapno maibangonna ti pundasion ti balayna iti dakkel a bato. (Mat. 7:24, 25; Luc. 6:47, 48) Kasanotayo a matulongan ti mayad-adalan a mangyaplikar kadagiti nasursurona? Usigentayo ti tallo a suhestion.

4. Kasanotayo a matulongan ti mayad-adalan tapno itultuloyna ti rumang-ay sa agpabautisar? (Kitaen met ti kahon a “ Tulongam ti Iyad-adalam a Mangaramid Kadagiti Kalat ken Mangragpat Kadagita.”)

⁴ Tulongam ti iyad-adalam a mangaramid kadagiti kalat. Apay a masapul nga aramidem dayta? Usigem daytoy nga ilustrasion: No agbiaheka iti adayo, mabalin a dumagaska kadagiti napintas a lugar a madalanam. Iti kasta, dika unay matuokan iti kaatiddog ti panagbiahem. Kasta met, no mangaramid ti mayad-adalan iti Biblia kadagiti kalat a maragpatna iti ababa a tiempo, makitananto a posible gayam a maragpatna ti kalat nga agpabautisar. Usarem ti feature a “Padasem Daytoy” iti libro nga Agbiagka a Naragsak iti Agnanayon! tapno matulongam ti iyad-adalam a rumang-ay. Iti ngudo ti tunggal leksion, pagsaritaanyo no kasano a makatulong dayta a kalat tapno mayaplikarna dagiti nasursurona. No adda sabali a kalat a pampanunotem para iti iyad-adalam, isuratmo dayta iti espasio a “Dadduma pay.” Kanayon nga usarem daytoy a paset ti panagadal tapno pagsaritaanyo dagiti kalat a maragpatna iti ababa ken napapaut a tiempo.

5. Sigun iti Marcos 10:17-22, ania ti imbaga ni Jesus nga aramiden ti nabaknang a lalaki, ken apay?

⁵ Tulongam ti iyad-adalam a mangaramid kadagiti panagbalbaliw iti biagna. (Basaen ti  Marcos 10:17-22.) Ammo ni Jesus a marigatan ti nabaknang a lalaki a mangilako iti amin a sanikuana. (Mar. 10:23) Ngem imbagana latta iti dayta a lalaki nga aramidenna daytoy dakkel a panagbalbaliw. Apay? Ay-ayaten ngamin isuna ni Jesus. No dadduma, baka ditay parparegtaen ti iyad-adalantayo a mangyaplikar kadagiti maad-adalna ta panagriknatayo ket saan pay a nakasagana nga agbalbaliw. Mabalin a panawen ti kasapulan tapno maisardeng ti dadduma dagiti nabayagen a nakairuamanda ket maisuotda ti baro a personalidad. (Col. 3:9, 10) Ngem no nasapsapa a pagsaritaanyo dayta a banag, nasapsapa met a makapagbalbaliw ti iyad-adalam. No aramidem dayta, ipakpakitam a maseknanka kenkuana.—Sal. 141:5; Prov. 27:17.

6. Apay a masapul a saludsodentayo no ania ti kapanunotan ti mayad-adalan?

⁶ Napateg a saludsodentayo iti mayad-adalan no ania ti opinion wenno kapanunotanna iti topiko nga ad-adalenyo. No aramidem dayta, maammuam no ania ti maawatan ken patpatienna. No kanayon nga aramidem dayta, nalaklakamto a mailawlawag dagiti sensitibo a topiko. Ti libro nga Agbiagka a Naragsak iti Agnanayon! ket naglaon iti adu a saludsod a mangadaw iti kapanunotan. Kas pagarigan, isaludsod ti leksion 04: “Ania ngata ti marikna ni Jehova no usarem ti naganna?” Isaludsod ti leksion 09: “Ania dagiti kayatmo nga ikararag?” Iti damo, mabalin a mabayag nga agpanunot ti iyad-adalam iti sungbat dagita a saludsod. Matulongam no sanayem nga agpanunot iti masursurona kadagiti teksto ken ladawan iti libro.

7. Kasano a sieepektibo a mausartayo dagiti pudno a kapadasan?

⁷ No naawatanen ti iyad-adalam ti masapul nga aramidenna, agusarka kadagiti pudno a kapadasan tapno maparegta a mangyaplikar iti dayta. Kas pagarigan, no saan a regular a makagimong, mabalin nga ipabuyam ti video nga Ipatpategnak ni Jehova a nai-feature iti “Agdiskobreka Pay” a seksion ti leksion 14 ti libro nga Agbiagka a Naragsak iti Agnanayon! Iti adu a leksion dayta a libro, makabirokka kadagiti kasta a kapadasan iti “Ammuem ti Ad-adu Pay” wenno iti seksion nga “Agdiskobreka Pay.” * Dimo ikomkompara ti iyad-adalam iti sabali babaen ti panangibagam, “No kayana dayta, kayam met.” Bay-am nga isu ti makapanunot iti dayta. Imbes ketdi, ibagam dagiti punto a nakatulong iti karakter iti video a mangyaplikar kadagiti pannursuro ti Biblia. Nalabit dakamatem ti maysa a napateg a teksto wenno praktikal nga inaramid dayta a karakter. Ikagumaam nga ipaganetget no kasano a tinulongan ni Jehova dayta a tao.

8. Kasanotayo a matulongan ti iyad-adalantayo a mangayat ken Jehova?

⁸ Tulongam ti iyad-adalam a mangayat ken Jehova. Kasano? Mangbirokka kadagiti gundaway tapno maipaganetgetmo dagiti kualidad ni Jehova. Tulongam a mangtarus a ni Jehova ket naragsak a Dios a tumultulong kadagidiay mangay-ayat kenkuana. (1 Tim. 1:11; Heb. 11:6) Ipakitam a pagsayaatanna no iyaplikarna dagiti maad-adalna ken ilawlawagmo nga ebidensia dayta nga ay-ayaten isuna ni Jehova. (Isa. 48:17, 18) Bayat nga umun-uneg ti panagayatna ken Jehova, ad-addanto a matignay a mangaramid iti aniaman a kasapulan a panagbalbaliw.—1 Juan 5:3.

9. Maitunos iti Marcos 10:29, 30, ania ti makatulong iti maysa a tao tapno makapagsakripisio ket agpabautisar?

⁹ Tapno rumang-ay ken agpabautisar ti mayad-adalan iti Biblia, masapul nga agsakripisio.  Kas iti baknang a lalaki a nadakamaten, adda dagiti mayad-adalan a masapul a mangisakripisio iti material a bambanag. No ti trabahoda ket saan a maitunos kadagiti prinsipio ti Biblia, baka masapul nga agbirokda iti sabali a trabaho. Adu met ti masapul a mangpanaw kadagiti gagayyemda a saan a mangay-ayat ken Jehova. Adda pay dagidiay binaybay-an dagiti miembro ti pamiliada a dida kayat dagiti Saksi ni Jehova. Imbaga ni Jesus a mabalin a marigatan ti dadduma a mangaramid kadagiti kasta a panagsakripisio. Ngem inkarina a saanto a mapaay wenno malugi dagidiay sumurot kenkuana. Sibabaknangdanto a mabendisionan iti naayat a naespirituan a pamilia. (Basaen ti Marcos 10:29, 30.) Kasanom a matulongan ti iyad-adalam tapno magunggonaan iti daytoy nagsayaat a sagut?

10. Ania ti masursurom iti kapadasan ni Manuel?

¹⁰ Gayyemem ti iyad-adalam. Napateg nga ipakitam iti iyad-adalam a maseknanka kenkuana. Apay? Kitaentayo ti imbaga ni Manuel a taga-Mexico. Malagipna idi mayad-adalan pay laeng iti Biblia: “Sakbay nga agadalkami, komustaennak ti mangyad-adal kaniak. Gapu iti dayta, agbalin a relaks ti riknak isu a maibagak kenkuana ti aniaman a banag. Nariknak a talaga a maseknan kaniak.”

11. Kasano a magunggonaan dagiti iyad-adalantayo iti pannakikaduada kadatayo?

¹¹ Mangiwayaka iti panawen para kadagiti iyad-adalam, kas iti inaramid ni Jesus kadagiti pasurotna. (Juan 3:22) No maitutop, awisem iti paggigianam ti rumangrang-ay nga iyad-adalam iti Biblia tapno agmerienda wenno mangankayo wenno agbuyakayo iti maysa a binulan a broadcasting-tayo. Nalabit apresiaren unay ti iyad-adalantayo ti kasta nga imbitasion nangruna bayat dagiti holiday wenno nailubongan a selebrasion a mabalin a naliday kadagita a tiempo. “Nagadu ti naadalko maipapan ken Jehova iti pannakikaduak iti nangyadal kaniak a kas met laeng no agadalkami,” kinuna ni Kazibwe a taga-Uganda. “Nakitak nga ipatpateg unay ni Jehova dagiti adipenna ken nakaragragsakda. Kasta ti kayatko.”

12. Apay a masapul a mangikuyogtayo iti nadumaduma nga agibumbunannag no mangyadaltayo iti Biblia?

 ¹² Awisem ti nadumaduma nga agibumbunannag iti panangyadalmo iti Biblia. No dadduma, baka mariknatayo a nalaklaka ti mangyadal no datayo laeng wenno isu la nga isu a kabsat ti ikuyogtayo. Nupay mabalin a kombiniente dayta, mabenepisiaran ti iyad-adalantayo no mangikuyogtayo iti nadumaduma a kakabsat. “Tunggal agibumbunannag nga immay nangyadal kaniak ilawlawagna ti bambanag iti naiduma a pamay-an,” imbaga ni Dmitrii a taga-Moldova. “Dayta ti timmulong kaniak tapno makitak ti dadduma a pamay-an a mayaplikarko dagiti maad-adalko. Saanak met unay a mabain idi damok ti makigimong, ta adun ti am-ammok a kakabsat.”

13. Apay a masapul a tulongantayo a makigimong ti iyad-adalantayo?

¹³ Tulongam ti iyad-adalam nga umatender kadagiti gimong ti kongregasion. Apay? Gapu ta imbilin ni Jehova nga agtataripnong dagiti agdaydayaw kenkuana; paset dayta ti panagdaydayawtayo. (Heb. 10:24, 25) Kasta met, dagiti kakabsattayo a lallaki ken babbai ket paset ti naespirituan a pamiliatayo. No aggigimongtayo, kaslatayo agkakadua a mangan iti naimas a taraon. No tultulongam ti iyad-adalam nga umatender kadagiti gimong, tultulongam a mangaramid iti maysa kadagiti kapatgan nga addang tapno agpabautisar. Ngem mabalin a marigatan a mangaramid iti dayta. Kasano a makatulong kenkuana ti publikasion nga Agbiagka a Naragsak iti Agnanayon! tapno mapagballigianna ti aniaman a karit a mabalin a pakaipasanguanna?

14. Kasanotayo a matignay ti iyad-adalantayo nga umatender kadagiti gimong?

¹⁴ Usarem ti leksion 10 ti libro nga Agbiagka a Naragsak iti Agnanayon! tapno matignay ti iyad-adalam. Adda dagiti eksperiensiado nga agibumbunannag a naawis a mangi-testing iti dayta a leksion sakbay a nairuar ti libro. Sibaballigi a natulonganda dagiti iyad-adalanda a makigimong. Siempre, dimo urayenen a makadanon ti iyad-adalam iti leksion 10 sakbay nga awisem a makigimong. Dagus nga awisem a makigimong ken kanayon nga aramidem dayta. Nagduduma a lapped ti pakaipaspasanguan ti tunggal mayad-adalan iti Biblia isu a siputam dagiti kasapulanna, ket kitaem no ania ti maitulongmo. Dika koma maupay no saan a dagus nga umatender. Agan-anuska ken itultuloymo nga awisen.

15. Ania dagiti mabalin a kabuteng ti iyad-adalam?

¹⁵ Malagipmo kadi a medio mabutengka idi nga agbalin a Saksi ni Jehova? Baka nariknam a dimo pulos kaya ti mangasaba iti publiko. Wenno kabutengmo a mabalin a busorennaka ti pamiliam wenno dagiti gagayyemmo. No kasta, maawatam ti marikrikna ti iyad-adalam. Imbaga ni Jesus a kasta ti marikrikna ti dadduma a tattao. Ngem pinaregtana dagiti pasurotna a dida agsardeng nga agserbi ken Jehova gapu iti buteng. (Mat. 10:16, 17, 27, 28) Kasano a tinulongan ni Jesus dagiti pasurotna tapno dida agbuteng? Ken kasanom a matulad ti inaramidna?

16. Kasano a masanaytayo ti iyad-adalantayo a mangipakaammo kadagiti nasursurona?

¹⁶ In-inut a sanayem ti iyad-adalam a mangipakaammo kadagiti nasursurona. Mabalin a nagnerbios dagiti adalan ni Jesus idi imbaonna ida a mangasaba. Ngem tinulongan ida ni Jesus. Imbagana no sadino ti pangasabaanda ken no ania ti ikasabada. (Mat. 10:5-7) Kasanom a matulad ni Jesus? Tulongam ti iyad-adalam no sadino ti mabalin a pangasabaanna. Kas pagarigan, damagem no adda am-ammona a mabalin  a matulongan no maammuanna ti maysa a kinapudno iti Biblia. Kalpasanna, tulongam a mangisagana iti ibagana. Ipakitam iti simple a pamay-an no kasano a maipakaammona dayta a kinapudno. No maitutop, mabalinyo a praktisen ti adda iti feature a “Kuna ti Dadduma” ken “No Adda Agsaludsod” iti libro nga Agbiagka a Naragsak iti Agnanayon! No aramidem dayta, agpokuska a mangsanay iti iyad-adalam a mangusar iti Biblia tapno makaited iti simple ken nataktika a sungbat.

17. Kasanotayo a mausar ti Mateo 10:19, 20, 29-31 bayat a tultulongantayo ti iyad-adalantayo nga agtalek ken Jehova?

¹⁷ Tulongam ti iyad-adalam nga agtalek ken Jehova. Impasigurado ni Jesus kadagiti adalanna a tulongan ida ni Jehova gapu ta ay-ayatenna ida. (Basaen ti Mateo 10:19, 20, 29-31.) Ipalagipmo iti iyad-adalam a tulongan met isuna ni Jehova. Matulongam nga agtalek ken Jehova no dakamatem dagiti kalatna bayat ti panagkararagyo. “Dagiti kalatko ket masansan a dakamaten ti mangyad-adal kaniak no agkararagkami,” imbaga ni Franciszek a taga-Poland. “Idi nakitak a sinungbatan ni Jehova dagiti kararag ti mangyad-adal kaniak, dagus metten nga inrugik ti agkararag. Mariknak idi ti tulong ni Jehova no kasapulak ti ag-day off iti baro a trabahok tapno maatenderak dagiti gimong ken kombension.”

18. Ania ti marikna ni Jehova iti trabaho a panangisuro dagiti Kristiano?

¹⁸ Maseknan unay ni Jehova kadagiti iyad-adalantayo iti Biblia. Apresiarenna ti kinagaget dagiti Kristiano a tumulong kadagiti tattao nga umasideg kenkuana, ket ay-ayatenna ida gapu iti dayta. (Isa. 52:7) No awan pay ita ti iyad-adalam, makatulongka latta kadagiti mayad-adalan a rumang-ay ken agpabautisar babaen ti panangkaduam iti dadduma a kakabsat iti panangyadalda.