1. Be bhọ a taman usun ẹbho bhi ore nin ọhẹnhẹn nin ele lu?

USUN ikpea bi ikhuo kẹkẹ da ha khian iJerusalem. Agbaẹbho kẹkẹ ene ẹbho nan na vae. Urolo kẹkẹ ele yẹ zẹ. Emhin ọhan-ilo da wo sunu bhi ọne ukpẹdẹ nin. Ibhokhan iJew eso da sabọ ha zẹ urolo ọsi ene ẹbho nan ne na bhi agbaẹbho kẹkẹ vae. Ọnan da wo manman han ele ilo. Emhin nin ene ibhokhan iJew ha taman ele, bi emhin nin Peter nin odibo ha taman ọrebhe, da wo manman rẹso ele. Ele da taman ele ghe, ele dẹ sabọ miẹn umiẹnfan sade ele mhọn urẹọbhọ da Jesu Kristi. Ọne ọta nan nin ele họn da wo rẹso ele sẹbhọ ghe, ele da nọọn yọle: “Be ọkhẹke nin mhan lu?” Peter da taman ele yọle: “Ọdeọde bhi ẹwẹ bha . . . mianmẹn.”​—Acts 2:​37, 38.

2. Be imhan ha zilo nyan bhi ọne uhọnmhọn-ọta nan? (Fẹ adudu nọn ribhi odalo ọne ebe nan ghe.)

² Emhin ọhan-ilo ọbhebhe da kie sunu. Ẹbho ne bun sẹbhi itue 3,000 da mianmẹn bhi ọne ukpẹdẹ nin dọ kiẹn edibo nesi Jesu. Ọnan da ha yi umunhẹn ọsi iwẹnna kpataki nin Jesu mun nin ene rẹkhan ọlẹn, ghe nin ele dọ re ẹbho kiẹn edibo. Ene rẹkhan iJesu sẹyẹ lu ọne iwẹnna nan ẹlẹnan. Ẹlẹnan nian, mhan iwo tẹmhọn Osẹnobulua man ọria bhi ukpẹdẹ ọkpa nin ọle yẹ wo mianmẹn bhi ọne ukpẹdẹ nin. Ọ sabọ rẹ re uki eso, ukpe, la ikpe ne bunbun ọkuẹsẹ ọria nin mhan man ọlẹn iBaibo sẹ ọnọn ha mianmẹn. Ahamiẹn mhan mhọn ọria nin mhan man ọlẹn iBaibo, mhan lẹnmhin ghe, ọ bha lẹkhẹ nan rẹ re ẹbho kiẹn edibo nesi Jesu. Bhi ọne uhọnmhọn-ọta nan, mhan dẹ zilo nyan emhin nin mhan ha sabọ lu, nin mhan da sabọ rẹkpa ọne imhan man ọlẹn iBaibo nin ọle da sabọ mianmẹn.

3. Beji Matthew 28:​19, 20 rẹman, be ọkhẹke nin ọria nin mhan man ọlẹn iBaibo lu nin ọle da sabọ mianmẹn?

³ Ọkuẹsẹ ọria nin mhan man ọlẹn Baibo mianmẹn, ọkhẹke nin ọle ha re obọ rẹkhan emhin nin ọle luẹ bhi Baibo. (Tie Matthew  28:​19, 20.) Ahamiẹn ọle re obọ rẹkhan emhin nin ọle luẹ, ọle ki diabe okpea ọkpa nọn manman mhọn ẹwanlẹn nin Jesu tẹmhọnlẹn nọn bọn uwa ọbhi uke udo. (Matt. 7:​24, 25; Luke 6:​47, 48) Be imhan ha rẹ sabọ rẹkpa ọria nin mhan man ọlẹn iBaibo yẹ rẹ ha re obọ rẹkhan emhin nin ọle luẹ? Bha ji mhan zilo nyan emhin ea nin mhan ha sabọ lu.

4. Be imhan ha rẹ rẹkpa ọria nin mhan man ọlẹn iBaibo rẹ wẹnna kaka yẹ nin ọle da sabọ mianmẹn? (Yẹ fẹ ọne ẹkpẹti ghe nọn yọle “ Rẹkpa ọne Uwẹ Man Ọle Baibo Ha Mhọn Emhanmhan Kẹkẹ Yẹ Ha Rẹkpa Ọle Mun Ele Sẹ.”)

⁴ Rẹkpa ọria nin uwẹ man ọlẹn iBaibo rẹ ha mhọn emhanmhan. Bezẹle nọn da khẹke nin uwẹ lu ọnan? Bha ji mhan fẹ ọne ijiẹmhin nan ghe: Ahamiẹn uwẹ khian okhian nọn manman ree, uwẹ sabọ rẹ mundia bhi ije eso nọn mhọn-ose nin uwẹ da koahua. Uwẹ ha lu ọnan, egbe ọne okhian ida manman lọ uwẹ gbe. Iriọ yẹ nọn rẹji ọria nin mhan man ọlẹn iBaibo. Ahamiẹn ọle mhọn emhanmhan nin ọle ha sabọ re obhi ẹghe khere munsẹ, ọnan ki rẹkpa ọle rẹ lẹn ghe, nin ọle rẹ mianmẹn ida ha yi emhin nọn nọghọ gbe. Noo obọle natiọle “Lu Ọnan” bhi ọne ebe natiọle Sọnyẹnmhẹn bhi Ighegheghe! rẹ ha rẹkpa ọria nin uwẹ man ọlẹn iBaibo rẹ ha lu re alo. Uwẹ ki deba ọria nin uwẹ man ọlẹn iBaibo zilo nyan ebi ọne emhanmhan ha rẹ sabọ rẹkpa ọle yẹ rẹ re obọ rẹkhan emhin nin ọle luẹle. Ahamiẹn uwẹ mhọn emhanmhan ọbhebhe bhi ọkhọle nin uwẹ ho nin ọria nin uwẹ man ọlẹn iBaibo khu ọi, uwẹ sabọ rẹ gbẹn ọlẹn ọbhi obọle natiọle “Ọbhebhe.” Ha noo ọne obọle nan bhi ọne ebe ẹghe-ẹghe rẹ rẹkpa ọria nin uwẹ man ọlẹn iBaibo rẹ lẹn emhanmhan nin ọle ha sabọ re obhi ẹghe khere munsẹ, bi ọnọn ha re ọle ẹghe.

5. Beji Mark 10:​17-22 rẹman, be bhọ Jesu taman okpea nọn manman fe nin ọle lu? Bezẹle?

⁵ Rẹkpa ọria nin uwẹ man ọlẹn iBaibo rẹ fi emhin eso denọ bhi iẹnlẹn nọnsọle. (Tie Mark 10:​17-22.) Jesu lẹnmhin ghe, ọ ida lẹkhẹ nin ọne okpea nọn manman fe rẹ khiẹn emhin rebhe nin ọle mhọnlẹn. (Mark 10:23) Sokpan, Jesu da taman ọne okpea nan nin ọle lu ọne emhin nan. Bezẹle? Ranmhude, ọle hoẹmhọn ọlẹn. Ẹgheso,  asabọmiẹn mhan iguanọ nin mhan taman ọria nin mhan man ọlẹn iBaibo nin ọle re obọ rẹkhan emhin nin ọle luẹ, ranmhude, mhan riale ghe ọle bha sẹ muegbe nin ọle rẹ lu iriọ. Ọ sabọ rẹ re ẹghe ọkuẹsẹ ọria munhẹn ha re obọ rẹkhan emhin nin ọle luẹ bhi Baibo. (Col. 3:​9, 10) Ọkpakinọn, uwẹ ha kẹ munhẹn ha taman ọlẹn emhin nọn khẹke nin ọle fidenọ, ọle ki kẹ munhẹn ha fi ene emhin denọ. Uwẹ ha nanlẹn zilo ọnan, uwẹ ki rẹman ghe, ẹmhọn ọlẹn rẹtẹ uwẹ.​—Ps. 141:5; Prov. 27:17.

6. Bezẹle nọn da khẹke nin mhan ha nọọn ọria nin mhan man ọlẹn iBaibo ebi ọle mhọn bhi ọkhọle sade mhan man ọlẹn emhin?

⁶ Ọkhẹke nin mhan nọọn ọria nin mhan man ọlẹn iBaibo ebi ọle mhọn bhi ọkhọle rẹji ebi mhan zilo ọle. Ọnan dẹ rẹkpa uwẹ rẹ lẹn ebi ọle lẹn ebi bha zilo ọle sẹ yẹ, bi ebi ọle rẹọ ọi. Ahamiẹn ẹghe rebhe uwẹ rẹ lu ọnan, ọ ki lẹkhẹ nin uwẹ rẹ nanlẹn zilo emhin nin uwẹ riale ọle ida sabọ kẹ miẹn ọbhi egbe. Ebe natiọle Sọnyẹnmhẹn bhi Ighegheghe! mhọn inọnta eso nin uwẹ ha sabọ nọọn sade uwẹ man ọria emhin. Bhi ọsi ijiẹmhin, iluẹmhin nọnzi 04 da nọọn yọle: “Be uwẹ riale ọ dẹ dia iJehova bhi egbe yẹ, sade uwẹ noo elin nọnsọle?” Iluẹmhin nọnzi 09 da nọọn yọle: “Be hi emhin eso nin uwẹ guanọ nin uwẹ taman Osẹnobulua bhi erọnmhọn?” Bhi ọsi ọhẹnhẹn, ọ sabọ ha nọghọ ọria nin uwẹ man ọlẹn iBaibo rẹ re ewanniẹn ọbhi ene inọnta nan. Uwẹ dẹ sabọ rẹkpa ọle sade uwẹ man ọlẹn ebi ọle ha rẹ ha ria eria nyan ene iBaibo bi ene ifoto ne ribhi ọne ebe.

7. Be imhan ha rẹ sabọ noo okha ọsi ibhio mhan yẹ rẹ rẹkpa ene imhan man ele iBaibo?

⁷ Ahamiẹn ọria nin uwẹ man ọlẹn iBaibo lẹn otọ emhin nọn khẹke nin ọle lu, noo okha ọsi ibhio mhan rẹ rẹkpa ọle rẹ lu iriọ. Bhi ọsi ijiẹmhin, ahamiẹn ọ nọghọ ọria nin uwẹ man ọlẹn iBaibo rẹ ha vae bhi ikolo oga ẹghe-ẹghe, uwẹ sabọ rẹ re ividio natiọle Jehova Wo Gbẹloghe Mẹn nọn ribhi obọ natiọle “Fẹ Ene Emhin Nan Ghe” bhi iluẹmhin nọnzi 14 man ọlẹn. Bhi iluẹmhin ne bunbun bhi ọne ebe natiọle Sọnyẹnmhẹn bhi Ighegheghe! uwẹ dẹ miẹn okha ne sẹ iriọ bhi obọle natiọle “Manman Lẹn Otọle Nọnsẹn” la bhi obọle natiọle “Fẹ Ene Emhin Nan Ghe.” * Dọnmhegbe nin uwẹ hẹi re ọria nin uwẹ man ọlẹn iBaibo ha khọkhọ ọria ọbhebhe. Hẹi ha taman ọlẹn, “Ahamiẹn ọne ọria nin sabọ lu ọle, uwẹ dẹ yẹ sabọ lu ọle.” Ji ọle da tobọle ha ta ọnan man egbe ọle. Ta emhin eso bhi ọne ividio ne rẹkpa ọne ọria rẹ sabọ re obọ rẹkhan emhin nin ọle luẹ. Bhi ọsi ijiẹmhin, mhan sabọ tẹmhọn iBaibo, la emhin nin ọne ọria lu nọn rẹkpa ọle. Wo ha taman ọlẹn ebi Jehova rẹ rẹkpa ọne ọria yẹ.

8. Be imhan ha rẹ rẹkpa ọria nin mhan man ọlẹn iBaibo rẹ dọ hoẹmhọn iJehova yẹ?

⁸ Rẹkpa ọria nin uwẹ man ọlẹn iBaibo rẹ hoẹmhọn iJehova. Be uwẹ ha rẹ sabọ lu ọnan yẹ? Ha noo isẹhoa nin uwẹ hi ki rẹ miẹn rẹ ha tẹmhọn ikpẹ nesi Jehova man ọlẹn. Rẹkpa ọle rẹ lẹn ghe, Osẹ ọsi eghọnghọn, ọle Jehova khin, nọn rẹkpa ẹbho ne hoẹmhọn ọlẹn. (1 Tim. 1:11; Heb. 11:6) Rẹkpa ọria nin uwẹ man ọlẹn iBaibo rẹ lẹn ghe, ọle dẹ miẹn elele sade ọle re obọ rẹkhan emhin nin ọle luẹ. Yẹ ji ọle lẹn ghe, ene elele nin ọle ha miẹn rẹman ghe Jehova hoẹmhọn ọlẹn. (Isa. 48:​17, 18) Beji ọle ha rẹ manman ha hoẹmhọn iJehova, iriọ ọle ha yẹ rẹ ha guanọ nin ọle fi emhin eso denọ bhi iẹnlẹn nọnsọle.​—1 John 5:3.

9. Beji Mark 10:​29, 30 rẹman, be ha rẹkpa ọria nin ọle da sabọ fikeke gbe emhin eso yẹ mianmẹn?

⁹ Emhin eso ribhọ ne khẹke nin ọria nin uwẹ man ọlẹn iBaibo fikeke gbe ọkuẹsẹ ọle sabọ mianmẹn. Bọsi ọne okpea nọn fele nin mhan ka tẹmhọn ọlẹn, eso bhi eria nin mhan man ele iBaibo sabọ rẹ fikeke gbe afe bi ua nọnsele. Ahamiẹn iwẹnna nin ele lu bha diẹn mun adia ne ribhi Baibo, ele sabọ rẹ zẹ ọne iwẹnna obọ dọ guanọ iwẹnna ọbhebhe. Ene bunbun bhi ẹwẹ ele sabọ rẹ zẹ  imọẹ nesele obọ ne bha hoẹmhọn iJehova. Sẹyẹ, ene ribhi azagba-uwa ọsi eso sabọ rẹ zẹ ele obọ ranmhude ele bha hoẹmhọn Esali Jehova. Jesu da tale ghe asabọmiẹn ọ ida lẹkhẹ nin ẹbho eso nin mhan man ele Baibo rẹ lu ene emhin nan. Ọkpakinọn, ọle da ve ghe ene rẹkhan ọlẹn dẹ miẹn elele. Ele ki dọ deba azagba-uwa nọnsi Jehova ne ga ọle bhi ọne otọ agbọn nan rebhe. (Tie Mark 10:​29, 30.) Be uwẹ ha rẹ sabọ rẹkpa ọria nin uwẹ man ọlẹn iBaibo yẹ nin ọle da sabọ dọ deba azagba-uwa nọnsi Jehova?

10. Be uwẹ miẹn luẹ bhi okha ọsi Manuel?

¹⁰ Deba ọria nin uwẹ man ọlẹn iBaibo ha lu ọmọẹ. Emhin nọn lu uhọnmhọn emhin nọn, nin uwẹ rẹ rẹman ọria nin uwẹ man ọlẹn iBaibo ghe, ẹmhọn ọlẹn rẹtẹ uwẹ. Bezẹle? Bha ji mhan fẹ ebi Manuel nọn nyẹnlẹn bhi Mexico ta yẹ. Bhi ẹghe nin ọle rẹ ha tẹmhọn ebi obhio mhan nọn man ọlẹn emhin rẹ rẹkpa ọle yẹ. Ọle da yọle: “Ọkuẹsẹ mhan mun iman-emhin nọnsẹmhan hẹn, ọle ki nọọn mẹn ebi emhin diayẹ. Ọnan ki wo rẹkpa mẹn rẹ taman ọlẹn ebi emhin dia mẹn yẹ bhi egbe, yẹ nanlẹn zilo ẹmhọn emhin ọbhebhe. Mẹn da wo daghe ọle ghe, ẹmhọn mẹn wo gene rẹtẹ ọle.”

11. Elele nela ene imhan man ele iBaibo ha sabọ miẹn sade mhan deba ele ha gbe ẹghe?

¹¹ Beji Jesu rẹ ha deba ene rẹkhan ọlẹn gbe ẹghe, ọ yẹ khẹke nin uwẹ ha deba eria nin uwẹ man ele iBaibo gbe ẹghe. (John 3:22) Ahamiẹn ọria nin uwẹ man ọlẹn iBaibo re obọ rẹkhan emhin nin ọle luẹ, uwẹ sabọ rẹ tie ọle vae bhi uwa nọnsẹ nin ọle dọ deba bha re egbe re ahoho, la ghe JW Broadcasting. Ọ dẹ wo manman ti ọria nin uwẹ man ọlẹn iBaibo bhọ sade ẹghe nin ẹbho rẹ lu iluemhin ukpe uwẹ rẹ tie ọle vae bhi uwa nọnsẹ. Ranmhude, bhi ọne ẹghe nan, ọle dẹ ha guanọ ọria nin ọle ha ne gbe ẹghe. Kazibwe nọn nyẹnlẹn bhi Uganda da yọle: “Mẹn riale ghe, beji mẹn rẹ luẹ ẹmhọn iJehova sade mẹn deba ọria nọn man mẹn iBaibo ha luẹ emhin, iriọ mẹn yẹ rẹ luẹ emhin sade mhan ko ha gbe ẹghe. Mẹn da wo daghe ebi Jehova rẹ gbẹloghe ẹbho nesọle yẹ, bi ebi ele rẹ ghọnghọn yẹ. Ọnan hi emhin nin mẹn guanọ bhi iẹnlẹn nọnsẹmhẹn.”

12. Bezẹle nọn da khẹke nin mhan ha ne ibhio mhan kẹkẹ rẹkhan egbe sade mhan khian dọ man ọria iBaibo?

¹² Ha tie ibhio mhan kẹkẹ rẹkhan egbe sade uwẹ khian dọ man ọria iBaibo. Ẹgheso, mhan sabọ rẹ  ha riale ghe ọ dẹ wo lẹkhẹ nin mhan sade imhan ọkpa dọ ha man ọria emhin, la ha re otuọnkpa rẹkhan egbe ẹghe rebhe. Aharẹmiẹn ọ dẹ wo lẹkhẹ nin mhan rẹ ha lu iriọ, ọria nin mhan man ọlẹn iBaibo dẹ manman miẹn elele sade mhan ne ibhio mhan kẹkẹ rẹkhan egbe dọ ha man ọlẹn iBaibo. Obhio mhan nin Dmitrii nọn nyẹnlẹn bhi Moldova da yọle: “Ibhio mhan kẹkẹ ne rẹkhan ọnọn man mẹn iBaibo dọ ha man mẹn emhin ki wo gbotọ Baibo fanọn an man mẹn bhi uwedẹ nin mẹn bha rẹ re ẹlo ọi. Ọnan da wo rẹkpa mẹn rẹ manman lẹn otọ ebi mẹn luẹ. Sẹyẹ, ẹkhọle bha ha manman lo mẹn ẹghe nin mẹn rẹ yo ikolo oga bhi ọsi ọhẹnhẹn, ranmhude, mẹn ki ka lẹn ene bunbun bhi ẹwẹ ene ibhio mhan nan khẹ.”

13. Bezẹle nọn da khẹke nin mhan ha rẹkpa ọria nin mhan man ọlẹn iBaibo rẹ ha vae bhi ikolo oga nesẹmhan?

¹³ Rẹkpa ọria nin uwẹ man ọlẹn iBaibo rẹ ha vae bhi ikolo oga nesẹmhan. Bezẹle? Ranmhude, Jehova taman ẹbho nesọle ghe ne ele ha sikoko ga ọle. (Heb. 10:​24, 25) Rẹ deba ọnin, ibhio mhan nin mhan ko ga diabe azagba-uwa nọnsẹmhan. Ahamiẹn mhan ko ha ribhi ikolo oga, inian ọ diabe mhan ko dotua ha le ebale nọn mhẹn bhi unun. Ahamiẹn uwẹ rẹkpa ọria nin uwẹ man ọlẹn Baibo ha vae bhi ikolo oga nesẹmhan, emhin kpataki nọn ha re ọle mianmẹn uwẹ rẹkpa ọle ha lu riọ. Ọkpakinọn, asabọmiẹn ọ ida lẹkhẹ nanlẹn rẹ ha vae bhi ikolo oga nesẹmhan. Be ọne ebe natiọle Sọnyẹnmhẹn bhi Ighegheghe! ha rẹ sabọ rẹkpa ọria nin mhan man ọlẹn iBaibo rẹ khọn ọnọghọ kẹkẹ nin ọle ha miẹn?

14. Be imhan ha rẹ sabọ rẹkpa ene imhan man ele iBaibo yẹ rẹ ha vae bhi ikolo oga?

¹⁴ Noo iluẹmhin 10 bhi ọne ebe natiọle Sọnyẹnmhẹn bhi Ighegheghe! rẹ rẹkpa ọria nin uwẹ man ọlẹn iBaibo. Ọkuẹsẹ a re ọne ebe nan dagbare, a da taman ibhio mhan eso nin ele re iluẹmhin nọnzi 10 nọn ribhi ọne ebe rẹ ne eria nin ele man ele emhin zilo. Ene ibhio mhan nan da tale ghe, ọne iluẹmhin nan da wo rẹkpa eria nin ele man ele Baibo rẹ vae bhi ikolo oga. Ọnan bha rẹman ghe, mhan dẹ luẹ ọria emhin sẹbhi iluẹmhin nọnzi 10 ọkuẹsẹ mhan tie ọle vae bhi ikolo oga nesẹmhan. Wo kẹ munhẹn ha tie ele vae bhi ikolo nesẹmhan. Uwẹ wo ha lu iriọ ẹghe rebhe. Eria nin mhan man ele Baibo wo mhọn ọnọghọ kẹkẹ. Bhiriọ, ji ẹmhọn ele rẹtẹ uwẹ. Uwẹ ha yẹ guanọ uwedẹ kẹkẹ nin uwẹ ha rẹ rẹkpa ele. Hẹi ji egbe lọ uwẹ sade ele bha sẹ munhẹn ha vae bhi ikolo oga. Wo ha re iziẹngbe rẹ nin ele lu emhin. Uwẹ ha sẹyẹ ha tie ele vae bhi ikolo oga.

15. Emhin nela ha sabọ re ofẹn ha mun ọria nin mhan man ọlẹn iBaibo?

¹⁵ Uwẹ be yẹ yere ẹghe nin ofẹn rẹ ha mun uwẹ ranmhude uwẹ khian kiẹn ọkpa bhi Esali Jehova? Iriọ a ha da miẹn uwẹ da ha riale ghe, uwẹ ida sabọ ha tẹmhọn Osẹnobulua rẹ na bhi uwa rẹ sẹbhi uwa. La, uwẹ sabọ ha mun ofẹn ghe, ene ribhi azagba-uwa nọnsẹ bi imọẹ ẹ dẹ ha kpokpo uwẹ. Ahamiẹn inian ọ dia rẹji uwẹ, uwẹ dẹ sabọ lẹn ebi emhin dia ọne uwẹ man ọlẹn iBaibo yẹ bhi egbe. Jesu da yọle ghe, ene emhin nan sabọ rẹ re ofẹn ha mun ẹbho eso. Ọkpakinọn, ọle da taman ene rẹkhan ọlẹn ghe, nin ele hẹi ji ofẹn re ele zobọ bhọ rẹ ha ga iJehova. (Matt. 10:​16, 17, 27, 28) Be iJesu rẹ rẹkpa ene ha rẹkhan ọlẹn rẹ khọn ofẹn nọn ha mun ele yẹ? Be uwẹ ha rẹ sabọ re egbe khọkhọ ijiẹmhin nọnsọle yẹ?

16. Be imhan ha rẹ sabọ ha rẹkpa ọria nin mhan man ọlẹn iBaibo yẹ nin ọle da sabọ ha taman ẹbho emhin nin ọle luẹ?

¹⁶ Rẹkpa ọria nin uwẹ man ọlẹn iBaibo rẹ ha tẹmhọn Osẹnobulua man ẹbho. Ofẹn sabọ rẹ ha mun edibo nesi Jesu bhi ẹghe nin ọle rẹ je ele nin ele dọ tẹmhọn Osẹnobulua. Ọkpakinọn, Jesu da rẹkpa ele. Ọle da taman ele eji ele ha da dọ tẹmhọn Osẹnobulua, bi uhọnmhunje nin ele ha taman ẹbho. (Matt. 10:​5-7) Be uwẹ ha rẹ re egbe khọkhọ iJesu yẹ? Rẹkpa ọria nin uwẹ man ọlẹn iBaibo rẹ lẹn eji ọle ha da sabọ tẹmhọn Osẹnobulua. Bhi ọsi ijiẹmhin, uwẹ sabọ rẹ nọọn ọlẹn si ọle mhọn ọria nin ọle ha sabọ ta emhin nin ọle luẹ bhi Baibo man. Rẹkpa ọle rẹ muegbe ebi ọle ha sabọ  taman ọne ọria ọbhi otọ. Uwẹ ha yẹ man ọlẹn uwedẹ nọn lẹkhẹ nin ọle ha rẹ lu ọle. Uwẹ sabọ rẹ noo obọle natiọle “Ẹbho Eso Sabọ Yọle” bi “Ọria Sabọ Nọọn Uwẹ” bhi ọne ebe natiọle Sọnyẹnmhẹn bhi Ighegheghe! rẹ deba ọle muegbe ebi ọle ha rẹ sabọ tẹmhọn Osẹnobulua man ẹbho yẹ. Ẹghe nin uwẹ ha rẹ ha lu ọnan, dọnmhegbe rẹ rẹkpa ọle lẹn ebi ọle ha rẹ ha noo iBaibo rẹ re ẹwanlẹn re ewanniẹn nọn lẹkhẹ ọbhi inọnta.

17. Be imhan ha rẹ sabọ noo Matthew 10:​19, 20, 29-31 rẹ rẹkpa ene imhan man ele iBaibo yẹ, nin ele da sabọ ha mun udu nyan iJehova?

¹⁷ Rẹkpa ọria nin uwẹ man ọlẹn iBaibo rẹ mun udu nyan iJehova. Jesu da taman edibo nesọle ghe, Jehova dẹ rẹkpa ele ranmhude ọle hoẹmhọn ele. (Tie Matthew 10:​19, 20, 29-31.) Sẹyẹ ji ọria nin uwẹ man ọlẹn iBaibo lẹn ghe, Jehova dẹ yẹ rẹkpa ọle. Uwẹ dẹ yẹ sabọ rẹkpa ọle mun udu nyan iJehova sade uwẹ deba ọle nan erọnmhọn rẹji emhanmhan nesọle. Franciszek nọn nyẹnlẹn bhi Poland da yọle: “Obhio mhan nọn man mẹn Baibo wo sunu bhi emhanmhan nesẹmhẹn sade ọle deba mẹn nan erọnmhọn. Ẹghe nin mẹn ki rẹ daghe ebi Jehova rẹ wanniẹn erọnmhọn nesọle yẹ, mẹn da wo re ẹjẹje munhẹn ha nan erọnmhon. Mẹn da wo daghe ebi Jehova rẹ rẹkpa mẹn yẹ, ẹghe nin mẹn rẹ yọle nan re ẹghe mẹn bhi isi iwẹnna nọnsẹmhẹn nin mẹn da sabọ yo ikolo oga nesẹmhan, bi usikoko nọn nẹ.”

18. Ẹlo nela iJehova rẹ ghe iwẹnna nin ibhio mhan lu nin ele rẹ man ẹbho emhin?

¹⁸ Ẹmhọn eria nin mhan man ele Baibo wo manman rẹtẹ iJehova. Ọle lẹnmhin ghe, ibhio mhan wo manman wẹnna kaka nin ele rẹ dọ rẹkpa ẹbho dọ lẹn ọlẹn. Ọle wo hoẹmhọn ele bhi ọne ẹsọn nan nin ele lu. (Isa. 52:7) Ahamiẹn uwẹ isẹ mhọn ọria nin uwẹ man ọlẹn iBaibo nian, uwẹ dẹ sabọ rẹkpa ọria nin obhio mhan man ọlẹn iBaibo rẹ sabọ lu re alo dọ mianmẹn, sade uwẹ rẹkhan ọne obhio mhan dọ ha man ọlẹn emhin.