1. Eme ilele Jesu a ta kẹ ogbotu ahwo jọ nọ a ru?

OGBOTU ahwo jọ a kokohọ Jerusalẹm, te ezae te eyae. A no erẹwho sa-sa ze, yọ a be ta evẹrẹ sa-sa. Oware jọ o via ẹdẹ yena nọ u gbunu gaga. Ahwo Ju jọ a jẹ ta evẹrẹ ahwo nọ a no eria avọ eria ze na kpobi! Whaọ ẹme nọ Pita avọ ahwo Ju nọ a kiọkọ na a jẹ ta o tubẹ mai gbunu. Anọ ohwo o te fi ẹrọwọ họ Jesu Kristi, a rẹ sai siwi iei. Ẹme na o duobọte ahwo na gaga, a tẹ nọ inọ: “Kọ eme ma re ru?” Pita ọ tẹ ta kẹ ae nọ: “Whai omomọvo ọ họ-ame.”​—Iruẹru 2:37, 38.

2. Eme ma te ta kpahe evaọ uzoẹme nana? (Rri uwoho nọ o rrọ uke emagazini na.)

² Oware nọ o via ẹdẹ yena u gbunu kẹhẹ! Ahwo nọ a bu te oware wọhọ idu esa (3,000) a họ-ame. Ere a ro mu iruo ilogbo nọ Jesu ọ kẹ rai na họ, inọ jọ a wuhrẹ ahwo re a zihe ruọ ilele riẹ. Ma gbe bi ru iruo yena rite inẹnẹ. Rekọ uzẹme riẹ họ, orọnọ euwa jọ ọvo ma ti ro wuhrẹ ohwo ọ vẹ nwani zihe ruọ olele Jesu hu. Ukpoye, o rẹ sai te emerae jọ, ukpe soso, hayo vrẹ ere dede. Who te wo ohwo jọ nọ who bi wuhrẹ Ebaibol kugbe, whọ te riẹ nọ re a wuhrẹ ohwo te epanọ ọ rẹ rọ họ-ame, okolo iruo ho. Ma te jọ uzoẹme nana ta kpahe epanọ whọ sai ro fiobọhọ kẹ ohwo nọ who bi wuhrẹ Ebaibol kugbe te epanọ ọ rẹ rọ họ-ame.

3. Wọhọ epanọ obe Matiu 28:19, 20 o ta, eme ohwo nọ a bi wuhrẹ Ebaibol kugbe o re ru re ọ sae họ-ame?

³ Re ohwo nọ a bi wuhrẹ Ebaibol kugbe ọ tẹ họ-ame, o re ru eware nọ o bi wuhrẹ na tao. (Se Matiu 28:19, 20.) Nọ  ọ tẹ be hai ru eware nọ o bi wuhrẹ, ọ te wọhọ “ọzae nọ o wo areghẹ” nọ Jesu ọ ta kpahe evaọ ọtadhesẹ riẹ jọ. Ọzae na ọ tọ otọ didi ọ tẹ bọ uwou riẹ fihọ ehru utho. (Mat. 7:24, 25; Luk 6:47, 48) Ẹvẹ ma sai ro fiobọhọ kẹ ohwo nọ ma bi wuhrẹ Ebaibol kugbe re ọ hai ru eware nọ o bi wuhrẹ na? Joma ta kpahe eware esa jọ nọ ma rẹ sai ru.

4. Ẹvẹ ma sai ro fiobọhọ kẹ ohwo nọ ma bi wuhrẹ nyaharo te epanọ ọ rẹ rọ họ-ame? (Rri ẹkpẹti na re, “ Fiobọhọ kẹ Ohwo nọ Who bi Wuhrẹ Ebaibol Fi itee họ Re O je Le Ai Tobọ.”)

⁴ Fiobọhọ kẹ ohwo nọ who bi wuhrẹ Ebaibol kugbe ma omaa eware nọ o re ru. Fikieme u ro fo re who ru ere? Dae rehọ iẹe nọ whọ gwọlọ kpohọ erẹ othethabọ jọ, yọ omoto obọra whọ te dhẹ. Ẹsejọhọ whọ te ma omaa emamọ eria nọ whọ te hae jọ breki somahọ. Who te ru ere, ugbo nọ whọ te dhẹ na u gbe ti theri owhẹ abọ gahrọ họ. Epọvo na re, ohwo nọ who bi wuhrẹ Ebaibol ọ tẹ ma omaa emeware jọ hayo fi itee sa-sa họ nọ ọ rẹ rọ omoke kakao le tobọ, ọ te ruẹ nọ o te raha oke lelehie taure ọ tẹ te họ-ame he. Rehọ oria “Utee nọ whọ rẹ sai fihọ” evaọ obe Reawere Uzuazọ Bẹdẹ Bẹdẹ! na ro fiobọhọ kẹ ohwo nọ who bi wuhrẹ Ebaibol kugbe fi itee họ. Nọ wha te wuhrẹ uzoẹme jọ no, wha vẹ ta kpahe oghẹrẹ nọ utee nọ o fihọ na u ti ro fiobọhọ kẹe ru eware nọ o wuhrẹ na. Otẹrọnọ utee ọfa whọ gwọlọ nọ o le, kere iei fihọ oria “Utee ọfa” na kẹe. Hae rọ oria nana lele iei ta ẹme noke toke kpahe itee nọ o fihọ, te esese te ilogbo gbe epanọ o ru te no.

5. Wọhọ epanọ o rrọ Mak 10:17-22, eme Jesu ọ ta kẹ ọdafe jọ nọ o ru, kọ fikieme?

⁵ Fiobọhọ kẹ ohwo nọ who bi wuhrẹ siobọno uruemu nọ u fo ho. (Se Mak 10:17-22.) Jesu ọ riẹ nọ o rẹ jọ bẹbẹ kẹ ọdafe re ọ zẹ eyero riẹ kpobi no. (Mak 10:23)  Ghele na ọ ta kẹ ọdafe jọ nọ jọ o ru ere. Fikieme? Fikinọ Jesu o you rie. Ẹsejọ ma tẹ make ruẹ oria jọ nọ u fo nọ ohwo nọ ma bi wuhrẹ Ebaibol kugbe ọ rẹ jọ nwene, ma rẹ gwọlọ kake vuẹe he, keme ma re roro nọ u ri te epanọ ọ te sai ro siobọno ekpehre uruemu riẹ na ha. Uzẹme riẹ họ, re ohwo o te siobọno ekpehre uruemu jẹ whẹ uruemu okpokpọ na họ oma o rẹ ginẹ rehọ oke. (Kọl. 3:9, 10) Rekọ nọ whọ tẹ kake vuẹe kpahe oware jọ nọ u fo nọ ọ rẹ jọ nwene obọ, ẹsiẹe ọ te rọ kaki muhọ enwene. Whọ tẹ kake vuẹe kpahotọ ere, u re dhesẹ nọ whọ gwọlọ ewoma riẹ.​—Ol. 141:5; Itẹ 27:17.

6. Fikieme ma rẹ rọ nọ ohwo nọ ma bi wuhrẹ enọ nọ e rẹ lẹliẹe ta oghẹrẹ nọ o rri eware nọ o bi wuhrẹ na?

⁶ O roja gaga re ma hae nọ ohwo nọ ma bi wuhrẹ kugbe re ọ ta oghẹrẹ nọ o rri oware nọ ma bi wuhrẹ iẹe no Ebaibol ze. Hae nọe enọ itieye re whọ riẹ oware nọ ọ rọwo. Wha tẹ be hai ru enẹ, odẹnotha o gbẹ te bẹ hẹ re wha ta kpahe iwuhrẹ Ebaibol nọ e rẹ sae jọ bẹbẹ kẹe re ọ rọwo. Obe Reawere Uzuazọ Bẹdẹ Bẹdẹ! na u wo enọ itiena buobu. Wọhọ oriruo, a jọ uwuhrẹ avọ 04 nọ inọ: “Ẹvẹ who roro nọ o rẹ jọ Jihova oma nọ who te bi se odẹ riẹ?” A tẹ jẹ jọ uwuhrẹ avọ 09 nọ inọ: “Eware jọ vẹ whọ gwọlọ nọ whọ rẹ lẹ kpahe?” Ẹsejọhọ evaọ oke ọsosuọ, o te nwane lọhọ kẹ ohwo na re ọ kẹ uyo enọ itieye na ha. O tẹ rrọ ere, whọ sai fiobọhọ kẹe re ọ rọ eria Ebaibol gbe iwoho nọ e rrọ oria nọ wha bi wuhrẹ na kẹ uyo enọ itiena.

7. Ẹvẹ ma sae rọ rehọ iku amọfa fiobọhọ kẹ ohwo nọ ma bi wuhrẹ kugbe?

⁷ Ohwo nọ who bi wuhrẹ kugbe na ọ tẹ riẹ oria nọ u fo nọ ọ rẹ jọ nwene no, who ve dhesẹ iku ahwo jọ nọ a nwene uruemu rai kẹe re u fiobọhọ kẹe ru oware nọ u fo. Wọhọ oriruo, otẹrọnọ o bi kpohọ ewuhrẹ ẹsikpobi hi, whọ sai dhesẹ ividio na, Jihova Ọ Rẹrote Omẹ kẹe. Whọ sae jọ uwuhrẹ avọ 14 evaọ oria “Kiẹ Kpahe Efa” ruẹ ividio nana. Whọ rẹ jọ izoẹme nọ e rrọ obe Reawere Uzuazọ Bẹdẹ Bẹdẹ! na ruẹ iku itiena evaọ oria “Gbe Wuhrẹ Eware Efa” hayo “Kiẹ Kpahe Efa” na. * Dede na, who du rọ ohwo nọ who bi wuhrẹ kugbe na kele omọfa ha, re whọ ta nọ “Otẹrọnọ ohwo yena o ru rie, whọ sai ru ei re.” Jọ ọye ọvo o roro oyena kẹ omobọ riẹ. Ukpoye, ta kpahe eware jọ nọ i fiobọhọ kẹ ohwo nọ wha rri evaọ ividio na ru eware nọ ọ jọ Ebaibol wuhrẹ. Whọ sae ta kpahe oria Ebaibol jọ hayo oware jọ nọ ohwo na o ru dẹẹ nọ u fiobọhọ kẹe. O tẹ lọhọ, ta kpahe oghẹrẹ nọ Jihova o ro fiobọhọ kẹ ohwo na.

8. Ẹvẹ ma sai ro fiobọhọ kẹ ohwo nọ ma bi wuhrẹ Ebaibol kugbe re o you Jihova?

⁸ Fiobọhọ kẹ ohwo nọ who bi wuhrẹ Ebaibol kugbe re o you Jihova. Ẹvẹ whọ sai ro ru ere? Nọ wha bi wuhrẹ na, rẹro da eria nọ whọ sae jọ fiobọhọ kẹe roro kpahe iruemu Jihova. Ru re ọ riẹ nọ Jihova yọ Ọghẹnẹ nọ eva e rẹ were gaga, yọ o re fiobọhọ kẹ ahwo nọ a you rie. (1 Tim. 1:11; Hib. 11:6) Fiobọhọ kẹe vuhumu inọ o te bi ru eware nọ o bi wuhrẹ na, o ti wo irere buobu. U te no ere no, ru re ọ riẹ nọ fikinọ Jihova o you rie o bi ro wuhrẹ iẹe eware nana. (Aiz. 48:17, 18) O ti you Jihova ziezi, ọye ọvo ọ vẹ te rọ iroro obọriẹ siobọno ekpehre uruemu je ru oware nọ o rẹ were Ọghẹnẹ.​—1 Jọn 5:3.

9. Who te rri ẹme nọ ọ rrọ Mak 10:29, 30, eme o rẹ sai fiobọhọ kẹ ohwo nọ who bi wuhrẹ siobọno eware jọ?

⁹ Re ohwo nọ a bi wuhrẹ Ebaibol kugbe ọ sai te ame-ọhọ, o re siobọno eware jọ. O sae tubẹ gwọlọ nọ o siobọno eyero riẹ jọ wọhọ epanọ Jesu ọ ta kẹ ọdafe jọ na. Otẹrọnọ iruo riẹ e rọwokugbe izi Ọghẹnẹ hẹ, ọ sae siọ iruo na ba. Enọ i wo egbẹnyusu nọ i bi koko izi Jihova ha a re siomano ae. Ahwo uviuwou ejọ a sae siọ ae fikinọ a mukpahe Isẹri Jihova. Jesu ọ ta nọ o sae jọ bẹbẹ kẹ ahwo jọ re a siomano eware nana kpobi. Rekọ ọ ta nọ ohwo kpobi nọ ọ kpairoro vrẹ eware yena je lele iei, u ti kiekpei hi. O ti wo amọfa buobu nọ a te jọ wọhọ ahwo uviuwou obọriẹ evaọ ukoko na. (Se Mak 10:29, 30.) Ẹvẹ whọ sai ro fiobọhọ kẹ ohwo nọ who bi wuhrẹ kugbe re ọ sai kuomagbe uviuwou nana?

10. Eme who wuhrẹ no ẹme Manuel ze?

¹⁰ Mu usu kugbe ohwo nọ who bi wuhrẹ Ebaibol kugbe. U wuzou gaga re who dhesẹ kẹ ohwo nọ who bi wuhrẹ Ebaibol kugbe nọ who you rie. Fikieme? Rri ẹme nọ Manuel nọ ọ be rria obọ Mexico ọ ta kpahe oke nọ a je ro wuhrẹ Ebaibol kugbei. Ọ ta nọ: “Taure ma te ti muhọ ewuhrẹ, oniọvo na ọ rẹ nọ omẹ kpahe epanọ eware e rrọ kẹ omẹ. Ọ jẹ hai ru udu te omẹ otọ, yọ fiki oghẹrẹ nọ ọ rrọ, mẹ rẹ ta eware efa kpobi kẹe. Oghẹrẹ nọ o re ru omẹ u ru nọ mẹ rọ riẹ nọ o gine you omẹ yọ ọ gwọlọ ewoma mẹ.”

11. Erere vẹ ahwo nọ ma bi wuhrẹ Ebaibol kugbe a re wo nọ ma tẹ be hae jọ kugbe ae?

¹¹ Hae jọ kugbe ohwo nọ who bi wuhrẹ kugbe wọhọ epanọ Jesu ọ jẹ hae jọ kugbe ilele riẹ na. (Jọn 3:22) O tẹ lọhọ, zizie ohwo nọ who bi wuhrẹ kugbe nọ who rri nọ ọ nyaharo ziezi no ziọ uwou ra re wha gbẹ re omoware jọ kugbe. Whọ jẹ sai zizie ei re wha gbe rri JW Broadcasting^®  amara jọ kugbe. Who te zizie ei evaọ oke nọ a bi ru oghẹrẹ ehaa jọ evaọ oborai, o te were iẹe. Keme oma o te jariẹ goli nọ orọnọ o gbe bi lele ahwo ru ehaa yena ha fikinọ e rọwokugbe izi Ọghẹnẹ hẹ na. Brọda Kazibwe nọ ọ be rria obọ Uganda ọ ta nọ: “Mẹ avọ oniọvo nọ o wuhrẹ Ebaibol kugbe omẹ ma jẹ hae jọ kugbe ohwohwo gaga. Yọ eware nọ mẹ jẹ hae jọ obọ riẹ wuhrẹ kpahe Jihova nọ ma tẹ rrọ kugbe ohwohwo avọ enọ mẹ jẹ hai wuhrẹ nọ ma tẹ keria kẹ ewuhrẹ mẹ ẹrẹrẹe. Nọ mẹ tẹ rrọ kugbei, mẹ jẹ hae ruẹ nọ Jihova ọ rẹ rẹrote idibo riẹ gaga yọ eva e rẹ were ae. Yọ ere mẹ gwọlọ nọ uzuazọ mẹ o rẹ jọ.”

12. Fikieme u ro fo re ma hae wha inievo sa-sa lele oma nọ ma tẹ be nyai wuhrẹ kugbe ohwo?

¹² Hae wha inievo sa-sa lele oma kpohọ ewuhrẹ na. Ẹsejọ ma re roro nọ mai ọvo ma tẹ be hae nyai wuhrẹ ohwo na, hayo nọ ma tẹ be hae wha oniọvo jọ ọvo lele oma ẹsikpobi, oye o te mai kiehọ. O tẹ make rọnọ oyena o mai kiehọ owhẹ oma, whọ tẹ be hae wha inievo sa-sa lele oma, oye o te mai fiobọhọ kẹ ohwo na. Dmitrii nọ ọ be rria obọ Moldova ọ ta nọ: “Inievo sa-sa nọ e jẹ hai lele oniọvo nọ o je wuhrẹ omẹ na nyaze a wo ọvuọ oghẹrẹ riẹ nọ a re ro ru oware vẹ kẹ ohwo. O jẹ hai fiobọhọ kẹ omẹ ruẹ idhere efa nọ mẹ sai ro ru eware nọ me je wuhrẹ na. Yọ oma o vuọ omẹ tere he evaọ ẹdẹ ọsosuọ nọ me ro kpohọ ewuhrẹ keme mẹ ruẹ inievo na buobu no vẹre.”

13. Fikieme u ro wuzou gaga re ma fiobọhọ kẹ ohwo nọ ma bi wuhrẹ kugbe re ọ hae ziọ ewuhrẹ?

¹³ Fiobọhọ kẹ ohwo nọ who bi wuhrẹ Ebaibol kugbe re ọ hae kpohọ ewuhrẹ. Fikieme? Fikinọ Jihova ọ vuẹ idibo riẹ nọ a hai kuomagbe, onana yọ abọ jọ egagọ mai. (Hib. 10:24, 25) Inievo ukoko na a wọhọ ahwo uviuwou obọmai. Fikiere ma tẹ rrọ obọ ewuhrẹ o rẹ wọhọ ẹsenọ ma lele ahwo uviuwou mai keria be re emu kugbe. Nọ who te zizie ohwo nọ who bi wuhrẹ kugbe ziọ ewuhrẹ, yọ who bi fiobọhọ kẹe ru oware jọ nọ u wuzou gaga, nọ u re fiobọhọ kẹ ohwo te kẹ ame-ọhọ. Rekọ o sae jọ bẹbẹ kẹe re ọ ziọ ewuhrẹ. O tẹ rrọ ere, ẹvẹ whọ sae rọ rehọ obe Reawere Uzuazọ Bẹdẹ Bẹdẹ! na fiobọhọ kẹe re ọ hae ziọ ewuhrẹ?

14. Ẹvẹ ma sai ro fiobọhọ kẹ ohwo nọ ma bi wuhrẹ kugbe re ọ hae ziọ ewuhrẹ?

¹⁴ Rehọ uwuhrẹ avọ 10 orọ obe Reawere Uzuazọ Bẹdẹ Bẹdẹ! na fiobọhọ kẹ ohwo nọ who bi wuhrẹ re ọ hae ziọ ewuhrẹ. Taure a te ti siobọno obe na, a ta kẹ inievo jọ re a rọ eware nọ e rrọ uwuhrẹ avọ 10 na fiobọhọ kẹ ahwo nọ a bi wuhrẹ kugbe mu ewuhrẹ họ ẹnyaze. Nọ a ru ere, ahwo buobu nọ a bi wuhrẹ kugbe a te mu ewuhrẹ họ ẹnyaze. Dede na, orọnikọ whọ rẹ hẹrẹ bẹsenọ wha re te uwuhrẹ avọ 10 re who te ti zizie ei ziọ ewuhrẹ hẹ. Zizie ei nọ wha tẹ nwani muhọ ewuhrẹ no. Yọ hai zizie ei noke toke. Orọnọ ebẹbẹ ọvona ahwo nọ who bi wuhrẹ kugbe a wo ho. Fikiere hai muẹrohọ ohwo kpobi nọ who bi wuhrẹ kugbe re whọ riẹ oware nọ o be kẹe uye gbe epanọ whọ sai ro fiobọhọ kẹe. Whọ tẹ maki bi zizie ei yọ ọ be rọwo nyaze he, o kẹ owhẹ uye he. Hai gbe zizie ei, jọ obọ o rrọ owhẹ hẹ.

15. Ozọ vẹ o rẹ sae jọ ahwo nọ ma bi wuhrẹ kugbe ẹro?

¹⁵ Kọ ozọ o jẹ dina mu owhẹ oke nọ who je ro kurẹriẹ ze obọ? Ẹsejọhọ who je roro nọ whọ te sae wọ ẹkpa nyae ta usi uwoma ha. Hayo o sae jọ nọ ozọ u je mu owhẹ inọ  ahwo uviuwou hayo egbẹnyusu ra a te wọso owhẹ. O tẹ rrọ ere, kiyọ whọ riẹ nọ ozọ o sai mu ohwo nọ who bi wuhrẹ na re. Jesu ọ ta nọ ozọ o sai gine mu ahwo jọ. Rekọ ọ ta kẹ ilele riẹ nọ a du kuvẹ re ozọ u ru ai siọ Jihova ba ẹgọ họ. (Mat. 10:16, 17, 27, 28) Ẹvẹ Jesu o ro fiobọhọ kẹ ilele riẹ si ozọ no ẹro? Kọ ẹvẹ ma sae rọ rehọ aro kele iei?

16. Ẹvẹ ma sai ro fiobọhọ kẹ ohwo nọ ma bi wuhrẹ kugbe re ọ hae ta usi uwoma?

¹⁶ Fiobọhọ kẹ ohwo nọ who bi wuhrẹ re ọ riẹ epanọ ọ sae rọ ta usi uwoma. Oke nọ Jesu o vi ilele riẹ nọ a nyae ta usi uwoma, o sae jọ nọ ozọ u je mu ai. Rekọ nọ Jesu ọ vuẹ ae oria nọ a rẹ jọ ta usi uwoma gbe ẹme nọ a rẹ ta no, udu u te te ae otọ. (Mat. 10:5-7) Ẹvẹ whọ sae rọ rehọ aro kele Jesu? Vuẹ ohwo nọ who bi wuhrẹ na ahwo jọ nọ ọ rẹ sae ta usi uwoma kẹ. Whọ sae nọe sọ ọ riẹ ohwo jọ nọ ẹme jọ nọ wha wuhrẹ no evaọ Ebaibol o ti fiobọhọ kẹ. Kẹsena who ve wuhrẹ iẹe epanọ ọ sae rọ rehọ ẹme yena ta usi uwoma kẹ ohwo. O tẹ lọhọ, whọ sae vuẹe re ọ kake rọ ẹme na ta usi uwoma kẹ owhẹ tao. Whọ sae rọ oria “Ahwo Jọ A rẹ Ta Nọ” gbe “Ohwo Jọ Ọ tẹ Nọ Owhẹ Nọ” evaọ obe Reawere Uzuazọ Bẹdẹ Bẹdẹ! na wuhrẹ iẹe epanọ ọ rẹ rọ ta usi uwoma. Wuhrẹ iẹe re ọ hae rọ Ebaibol na kuyo nọ a tẹ nọe onọ evaọ oghẹrẹ nọ u re ro vẹ ohwo ẹro. O ve je ru ei evaọ oghẹrẹ nọ o gbẹ rọ dha ohwo na eva ha.

17. Ẹvẹ ma sae rọ rehọ eme nọ e rrọ Matiu 10:19, 20, 29-31 fiobọhọ kẹ ahwo nọ ma bi wuhrẹ kugbe re a rẹroso Jihova?

¹⁷ Fiobọhọ kẹ ohwo nọ who bi wuhrẹ re ọ hae rẹroso Jihova. Jesu ọ ta kẹ ilele riẹ nọ Jihova o you rai yọ o ti fiobọhọ kẹ ae. (Se Matiu 10:19, 20, 29-31.) Vuẹ ohwo nọ who bi wuhrẹ na inọ Jihova o ti fiobọhọ kẹe. Hae lẹ re Jihova o fiobọhọ kẹe ru eware nọ ọ ma omaa rai nọ o ti ru re ọ sae họ-ame. Onana u ti fiobọhọ kẹe rẹroso Jihova. Franciszek nọ ọ be rria obọ Poland ọ ta nọ: “Oniọvo nọ o je wuhrẹ kugbe omẹ ọ jẹ hae fodẹ eware nọ mẹ ma omaa rai nọ ọ tẹ be lẹ. Nọ mẹ ruẹ nọ Jihova ọ be ginẹ kuyo elẹ na, me te muhọ ẹlẹ re. Mẹ ruẹ nọ Jihova ọ kuyo olẹ mẹ nọ mẹ yare nọ jọ o ru re ọga-iruo mẹ ọ kẹ omẹ uvẹ kpohọ ewuhrẹ gbe okokohọ.”

18. Ẹvẹ Jihova o rri iruo nọ ma bi ru na?

¹⁸ Jihova o you ahwo nọ ma bi wuhrẹ na gaga. U te no ere no, eva mai e be were iẹe gaga inọ ma be daoma fiobọhọ kẹ ahwo si kẹle iẹe. (Aiz. 52:7) O tẹ make rọnọ who ri wo ohwo nọ who bi wuhrẹ Ebaibol kugbe he, whọ sai fiobọhọ kẹ ahwo nọ inievo efa a bi wuhrẹ nyaharo te epanọ a rẹ rọ họ-ame nọ whọ tẹ be hai kuomagbe ai wuhrẹ ahwo na.