1. Tsa ban langai hta masha wunawng wuwa hpe hpa galaw na matu sape ni tsun wa ai kun?

MUNGDAN law law kaw na amyu ga amyu myu shaga ai masha wunawng wuwa gaw, shara mi hta du nga ai. Dai shani hta mauhpa lam byin wa ai. Yuda masha nkau gaw, kaga amyu ga ni hpe kalang ta shaga lu wa ai. Hpawng chyawm nga ai masha hpung gaw mau mat ai. Dai Yuda masha ni hte kasa Petru tsun ai ga ni a majaw grau nna mau ma ai. Dai hta Yesu Hkristu hpe kam ai lam madun yang, hkye hkrang la hkrum na ngu ai shiga mung lawm ai. Dai shiga gaw shawa hpawng a myit masin hpe shadut ya ai. Dai majaw shanhte ndai hku san ai: “Anhte kaning rai na rai ta?” Petru ndai hku bai htai ai: “Nanhte hkum shagu . . . baptisma hkam la mu.”​—Kas 2:37, 38.

2. Ndai sumhpa hta hpa lam hkaja na kun? (Makawp sumla hpe yu u.)

² Gara mauhpa lam matut byin ai kun? Marai 3,000 daram gaw hkalup hkam la nna, Hkristu a sape ni byin wa ai. Ndai gaw Yesu a hpang hkan ai ni hpe galaw shangun da ai, kaba la ai sape shatai ai bungli a nnan hpang ai lam re. Dai bungli hpe tsa ban 21 du hkra matut nna galaw nga ai. Anhte a ban prat hta gaw, hkying hkum kachyi mi hte sha marai langai hpe hkalup hkam wa hkra n karum ya lu ai. Nkau gaw hkalup hkam na matu shata hku, shaning hku (sh) dai hta pyi grau na na re. Sape shatai ai bungli gaw, shakut galaw ra ai bungli re. Ndai laman nang Chyum ga sharin galaw nga ai nga yang, dai hpe atsawm chye na re. Ndai sumhpa hta Chyum ga sharin ni hkalup hkam ai du hkra rawt jat wa na matu, gara hku karum ya mai na hpe hkaja mat na re.

3. Mahte 28:19, 20 hta tsun da ai hku nga yang, Chyum ga sharin langai gaw hkalup hkam lu hkra hpa galaw ra na kun?

³ Chyum ga sharin langai gaw hkalup n hkam la shi yang, Chyum Laika sharin ya ai lam ni hpe tatut hkan sa ra ai. (Mahte 28:19, 20 hpe hti u.) Chyum ga sharin gaw sharin la wa ai lam ni hpe hkan sa ai shaloi, Yesu a ga shadawn hta na lunghkrung ntsa hta sung sung htu nna nta gap da ai “hpaji rawng ai wa” hte bung wa na re. (Mat 7:24, 25; Luk 6:47, 48) Sharin la wa ai lam hpe Chyum ga sharin hkan sa lu hkra, anhte gara hku karum ya lu na kun? Lam masum hpe bawng ban yu ga.

4. Chyum ga sharin ni hkalup hkam lu hkra, tsang hte tsang anhte gara hku karum ya lu ai kun? (“ Bandung Ni Jahkrat Nna Du Dep Lu Hkra Chyum Ga Sharin Hpe Karum Ya U” ngu ai lawk hpe yu u.)

⁴ Bandung ni jahkrat lu hkra Chyum ga sharin hpe karum ya u. Hpa majaw dai hku galaw ra ai? Ndai ga shadawn hpe myit yu ga. Hkrun lam galu hkawm ai nga yang, nang hkring la mayu ai shara hpe masat da na re. Rai yang, grai naw tsan ai ngu na nang hkamsha sana n re. Dai hte maren, Chyum ga sharin ni mung bandung kadun ni tawn nna du dep hkra galaw na nga yang, hkalup hkam na bandung mung mai byin ai hpe chye wa na re. Chyum ga sharin ni rawt jat wa na matu, Htani Htana Ngwi Pyaw Ai Prat! laika buk hta lawm ai “Bandung” ngu ai daw hpe akyu jashawn u. Hkaja ai daw langai ngut shagu, sharin la wa ai lam ni hpe hkan sa lu hkra, bandung gaw gara hku karum ya ai hpe Chyum ga sharin hte bawng ban u. Chyum ga sharin a matu kaga bandung ni hpe myit hkrup ai nga yang, “Kaga” ngu ai hta ka matsing da u. Chyum ga sharin a bandung kadun hte bandung galu ni hpe bai maram na matu, ndai daw hpe ayan na akyu jashawn u.

5. Marku 10:17-22 hta sut su ai la hpe Yesu hpa galaw shangun ai kun? Hpa majaw kun?

⁵ Prat hkrun lam hpe galai shai lu hkra Chyum ga sharin hpe karum ya u. (Marku 10:17-22 hpe hti u.) Sut su ai wa gaw shi hta nga manga hpe dut kau na matu yak ai hpe Yesu chye ai.  (Mrk 10:23) Raitim, shi a prat hkrun lam hpe galai shai na matu Yesu tsun wa ai. Hpa majaw kun? Shi hpe tsawra ai majaw re. Kalang lang chye wa ai hpe tatut hkan sa na matu, Chyum ga sharin hpe n-gun jaw na matu hting nut nga chye ai. Galai shai na matu shanhte jin jin n rai shi ai ngu shadu ai majaw re. Prat hkrun lam dingsa hpe kau da nna, gawng shingyan nnan hpe dagraw hpun na matu aten ra ai. (Kol 3:9, 10) Galai shai ra ai lam ni hpe jau jau shadum na nga yang, jau jau galai shai lu na re. Dai hku galaw ai gaw, shi hpe nang lanu lahku ai lam madun ai re.​—Shk 141:5; Gsh 27:17.

6. Chyum ga sharin a ningmu hpe hpa majaw san ging ai kun?

⁶ Bawng ban taw nga ai lam hte seng nna Chyum ga sharin gara hku mu mada ai hpe san na matu ahkyak ai. Chyum ga sharin a chye na ai lam hte kamsham ai lam hpe chye lu na matu, dai zawn ga san ni hpe lang u. Dai zawn ayan galaw ai nga yang, shi hkap la na matu yak ai lam ni hpe bawng ban ai shaloi grau loi wa na re. Htani Htana Ngwi Pyaw Ai Prat! laika buk hta ningmu hte seng nna san ai ga san grai law hkra nga ai. Ga shadawn, daw 4 hta ndai ga san lawm ai: “Nang gaw Yehowa a mying hpe shaga ai nga yang, shi gara hku hkamsha na ngu shadu ai kun?” Daw 9 hta, “Nang akyu hpyi mayu ai lam nkau gaw hpa ni rai kun?” Shawng nnan hta Chyum ga sharin gaw, ga san ni hpe htai na matu loi yak na re. Dai hta lawm ai Chyum daw ni hte sumla ni hpe arau sawn dinglik ai hku nna shi hpe shaman ya mai ai.

7. Mahkrum madup ni hpe tang du hkra gara hku akyu jashawn lu na kun?

⁷ Chyum ga sharin gaw shi galaw ra na lam hpe chye na sai nga yang, n-gun jaw ya lu na mahkrum madup ni hpe akyu jashawn u. Ga shadawn, Chyum ga sharin gaw zuphpawng lung na matu yak nga ai nga yang, daw 14 kaw na “Sawk Sagawn” ngu ai npu hta lawm ai Ngai Hpe Yehowa Lanu Lahku ngu ai video hpe madun mai ai. Htani Htana Ngwi Pyaw Ai Prat! ngu ai laika buk a daw law law hta, “Kahtap Hkaja” hte “Sawk Sagawn” ngu ai daw ni hta, dai zawn mahkrum madup ni hpe grai law hkra mu lu ai. * “Shi pyi galaw lu yang, nang mung galaw lu na re” ngu na, marai langai ngai hte shing daw na n tsun na matu sadi u. Shi nan chye na nna daw dan la u ga. Chyum Laika sharin achyin ya ai lam ni hpe video hta lawm ai wa hkan sa lu hkra, karum ya ai lam ni hpe tsun u. Dai video kaw na ahkyak ai Chyum daw (sh) tatut akyu lu shangun ai lama ma hpe tsun dan u. Video hta lawm ai wa hpe Yehowa gara hku karum ya ai lam, byin mai shagu ahkyak shatai tsun dan u.

8. Chyum ga sharin ni Yehowa hpe tsawra wa hkra anhte gara hku karum ya lu ai kun?

⁸ Chyum ga sharin Yehowa hpe tsawra wa hkra karum ya u. Gara hku nna kun? Yehowa a atsam ningja ni hpe tsun dan lu na matu ahkaw ahkang tam u. Yehowa gaw kabu gara ai Karai rai nna, shi hpe tsawra ai ni hpe karum ya mayu ai lam Chyum ga sharin chye na hkra tsun dan u. (1 Tm 1:11; Heb 11:6) Chye wa ai ni hpe tatut hkan sa yang akyu lu la na lam shi hpe tsun dan u. Dai gaw shi hpe Yehowa tsawra myit madun ai lam re ai hpe sang lang dan u. (Esa 48:17, 18) Yehowa hpe tsawra ai myit hta madung nna, Chyum ga sharin gaw ra ang ai galai shai lam ni hpe galaw mayu wa na re.​—1 Yh 5:3.

9. Marku 10:29, 30 hku nga yang, sak jaw nna hkalup hkam la lu hkra marai langai hpe hpa gaw karum ya lu na kun?

⁹ Hkalup hkam ai kaw du hkra rawt jat na matu, Chyum ga sharin gaw sak jaw ai lam ni galaw ra na re. Mi tsun wa sai sut su ai wa zawn,  Chyum ga sharin nkau gaw arung arai ni hpe sak jaw ra na re. Shanhte a bungli gaw Chyum Laika tara hte nhtan shai ai nga yang, kaga bungli hpe pyi galai galaw ra na re. Chyum ga sharin law law gaw Yehowa hpe n tsawra ai manang ni hpe kau da wa ai. Nkau gaw Yehowa Sakse ni hpe n ra sharawng ai nta masha ni a kabai kau ai hpe hkrum ai. Nkau gaw dai zawn sak jaw ai lam ni hpe galaw na matu yak na re ngu Yesu tsun wa ai. Raitim, shi hpang hkan ai ni gaw myit daw ra na n re ngu Yesu ga sadi jaw da ai. Tsawra myit nga ai wenyi kun dinghku hpe shaman chyeju hku na shanhte lu la na re. (Marku 10:29, 30 hpe hti u.) Ndai grai kaja ai shaman chyeju kaw na akyu lu la na matu Chyum ga sharin hpe gara hku karum ya lu na kun?

10. Man-noi a mahkrum madup kaw na hpa sharin la lu ai kun?

¹⁰ Chyum ga sharin hte grau hku hkau hkra galaw u. Nang gaw Chyum ga sharin hpe karum ya mayu ai lam shi chye hkra madun dan na matu ahkyak ai. Hpa majaw kun? Meksiko hta nga ai Man-noi tsun ai ga hpe sadi yu u. Shi Chyum Laika sharin la wa ai aten hte seng nna ndai hku tsun ai: “Hkaja lamang n hpang shi yang, sharin ya ai wa gaw, ‘gara hku kun?’ ngu na ngai hpe ayan san ai. Myit atsang sha hte wanglu wanglang tsun lu hkra shi ngai hpe karum ya ai. Gaja wa ngai hpe karum ya mayu ai ngu hkamsha ai.”

11. Chyum ga sharin ni anhte hte aten jaw na kanawn mazum ai kaw na gara hku akyu lu la ai kun?

¹¹ Yesu gaw shi a hpang hkan ai ni a matu aten jaw ai zawn, nang mung Chyum ga sharin ni a matu aten jaw u. (Yhn 3:22) Htap htuk ai nga yang, rawt jat nga ai Chyum ga sharin hpe nta de saw shaga nna, kohpi arau lu mai ai, lu sha daw mai ai, shata shagu na JW TV lamang langai hpe yu mai ai. Laksan hku nna, poi shani re ai majaw bungli pat nna shi hkrai rai nga ai aten hta saw shaga na nga yang, grai chyeju dum na re. Yuganda hta nga ai Kazinbwi ndai hku tsun ai: “Chyum Laika hkaja nga ai laman hta, sharin ya ai wa hte aten jaw na kanawn mazum ai majaw, Yehowa a lam grau nna chye wa ai ngu ngai shadu ai. Yehowa gaw shi a amyu masha ni hpe kade daram lanu lahku ai, shanhte kade daram pyaw nga ai hpe ngai mu ai. Dai gaw ngai lu la mayu ai prat re.”

12. Chyum ga sharin lamang de n bung ai hkaw tsun masha ni hpe hpa majaw shaga sa ging ai kun?

 ¹² Chyum ga sharin de n bung ai hkaw tsun masha ni hpe shaga sa u. Kalang lang Chyum ga sharin hpang de tinang hkrai sa ai (sh) sa ga ai wa hte sha sa ai gaw grau nna loi ai ngu hkamsha na re. Anhte a matu dai hku galaw ai gaw loi ai raitim, n bung ai hkaw tsun masha ni hpe shaga sa ai gaw Chyum ga sharin hpe grau nna akyu lu shangun ai. Modoba kaw nga ai Dimitari ndai hku tsun ai: “Ngai hpe sa sharin ya ai hkaw tsun masha langai hpra gaw grai kaja ai hku nna sanglang dan ya lu ai. Dai gaw lam amyu myu hku nna mu mada lu hkra karum ya ai. Hpunau nauna law law hte hkrum da ngut chyalu re ai majaw, shawng nnan zuphpawng sa lung ai shaloi mung nau n kaya ai.”

13. Chyum ga sharin zuphpawng ni lung hkra anhte hpa majaw karum ya ra ai kun?

¹³ Nawku zuphpawng ni lung na matu Chyum ga sharin hpe karum ya u. Hpa majaw kun? Yehowa gaw shi hpe nawku ai ni hpe arau zuphpawng na matu hpyi shawn da ai majaw re. Dai gaw nawku daw jau ai a daw langai re. (Heb 10:24, 25) Ngut nna hpunau nauna ni gaw anhte a wenyi kun dinghku re. Zuphpawng hta shanhte hte arau shang lawm ai gaw nta hta grai mu ai malu masha hpe arau sha ai hte bung ai. Chyum ga sharin hpe zuphpawng ni lung lu hkra karum ya ai gaw, ahkyak htum lahkam re ai hkalup hkam lu hkra karum ya nga ai re. Raitim, zuphpawng lung hpang na matu yak chye ai. Htani Htana Ngwi Pyaw Ai Prat! laika buk gaw shi hkrum wa na mayak mahkak ni hpe tawt lai lu hkra gara hku karum ya lu na kun?

14. Zuphpawng ni lung wa hkra Chyum ga sharin hpe gara hku shadut ya mai na kun?

¹⁴ Chyum ga sharin hpe shadut ya lu na matu, Htani Htana Ngwi Pyaw Ai Prat! laika buk a daw 10 hpe akyu jashawn u. Ndai laika buk hpe n shapraw shi yang, mahkrum madup nga ai hkaw tsun masha nkau gaw, dai daw hpe lang chyam yu nna Chyum ga sharin ni zuphpawng lung wa hkra karum ya wa sai. Raitim, Chyum ga sharin ni zuphpawng ni lung wa hkra saw shaga na matu, daw 10 du hkra n la ra ai. Byin mai ai daram jau jau lung na matu hte ayan na lung na matu saw shaga u. N bung ai Chyum ga sharin ni hta, n bung ai mayak mahkak ni nga ai. Dai majaw Chyum ga sharin a ra ai lam hpe atsawm myit yu nna, byin mai yang tatut karum ya u. Shawng nnan lang sa lung na matu aten jaw ra tim, myit hkum daw. Myit galu u. Matut na saw shaga u.

15. Chyum ga sharin ni hta gara hkrit ai myit ni nga chye ai kun?

¹⁵ Yehowa Sakse galaw na matu hkrit wa ai hpe nang naw dum ai kun? Galoi mung hkaw tsun lu na n re ngu nang hkamsha wa ai rai na re. Shing nrai, nta masha, manang ni a ninghkap ai hpe hkrit ai mung rai na re. Rai yang, Chyum ga sharin hpe nang chye na ya lu na re. Dai zawn hkrit ai myit ni nga chye ai hpe Yesu chye ai. Raitim, hkrit ai majaw Yehowa hpe n nawku mat ai baw n byin na matu, shi hpang hkan ai ni hpe Yesu n-gun jaw wa ai. (Mat 10:16, 17, 27, 28) Hkrit ai myit hpe tawt lai lu hkra, shi a hpang hkan ai ni hpe Yesu gara hku karum ya wa ai kun? Yesu hpe gara hku kasi la lu na kun?

16. Makam masham hpe Chyum ga sharin tsun dan chye hkra gara hku karum ya mai ai kun?

¹⁶ Makam masham hpe Chyum ga sharin tsun dan chye hkra angwi ngwi shaman ya u. Yesu a sape ni gaw hkaw tsun na matu sa dat hkrum ai shaloi, myit tsang nga na re. Raitim, gara shara hta hkaw tsun ra na, gara shiga hpe hkaw tsun ra na hpe tsun dan ai hku nna shanhte hpe Yesu karum ya ai. (Mat 10:5-7) Yesu hpe anhte gara hku kasi la lu na kun? Gara shara kaw hkaw tsun mai ai hpe chye hkra Chyum ga sharin hpe karum ya u. Ga shadawn, Chyum Laika hta lawm ai lam hpe tsun dan yang, akyu lu la wa  na marai langai ngai hpe chye ai kun? ngu na san mai ai. Dai hpang, dai teng man lam hpe atsawm sang lang dan lu na matu shi hte arau hkyen lajang ya u. Htap htuk ai nga yang, Htani Htana Ngwi Pyaw Ai Prat! laika buk hta lawm ai, “Nkau Mi Tsun Ai” hte “Nkau Mi San Chye Ai” ngu ai daw hta lawm ai lam hpe akyu jashawn mai ai. Chyum Laika hpe akyu jashawn nna, asan sha hte chye na loi ai mahtai hpe chye jaw hkra, Chyum ga sharin hpe shaman ya u.

17. Chyum ga sharin ni Yehowa hpe kamhpa wa hkra Mahte 10:19, 20, 29-31 hpe gara hku akyu jashawn mai ai kun?

¹⁷ Yehowa hpe kamhpa chye hkra Chyum ga sharin hpe karum ya u. Sape ni hpe Yehowa tsawra ai majaw, karum ya na re ai lam sape ni hpe Yesu tsun wa ai. (Mahte 10:19, 20, 29-31 hpe hti u.) Na a Chyum ga sharin hpe mung Yehowa karum ya na re ngu shadum ya u. Shi a bandung hte seng nna arau akyu hpyi ai hku nna Yehowa hpe kamhpa chye hkra karum ya mai ai. Polan hta nga ai Hparansizek ndai hku tsun ai: “Ngai hpe sharin ya ai sara gaw akyu hpyi ga hta nye a bandung hpe chyahkring hkring hpyi shalawm ai. Shi a akyu hpyi ga hpe Yehowa mahtai jaw ai hpe mu ai shaloi, ngai mung kalang ta akyu hpyi hpang ai. Zuphpawng ni hte ginwang zuphpawng lung na matu nye a bungli nnan hta ahkang hpyi ra wa ai. Dai shaloi, Yehowa karum ya ai ngu ngai hkamsha ai.”

18. Hkristan ni galaw nga ai sharin achyin bungli hte seng nna Yehowa gara hku hkamsha ai kun?

¹⁸ Anhte a Chyum ga sharin ni hpe Yehowa gaw grai lanu lahku ai. Masha ni Yehowa hpang sit sa wa na matu karum ya nga ai Hkristan ni gaw, kade daram shakut ra nga ai hpe Yehowa chye ai. Dai hpe manu shadan ya ai. (Esa 52:7) Ndai laman hta Chyum ga sharin nang n galaw lu shi ai rai na re. Raitim, kaga hkaw tsun masha ni hte rau, shanhte a hkaja lamang ni hta hkan karum ya nna, Chyum ga sharin ni hkalup hkam ai kaw du hkra rawt jat wa na matu nang karum ya lu ai.