1. Ɛbɛ Pɩyɛɛrɩ heyi samaɣ sɔsɔɔ nakɛyɛ se kala?

ABALAA nɛ halaa sakɩyɛ kaaɖɔm nʋmɔʋ nɛ powolo Yeruzalɛm, paalɩnɩ ajɛɛ ndɩ ndɩ taa nɛ pɔyɔɔdaɣ kʋnʋmɩŋ ndɩ ndɩ. Nabʋyʋ kaalabɩ puwiye nɛ pɩwɛɛ piti. Tuda lɛ, Yuuda ñɩma nabɛyɛ paɣzɩ yɔɔdʋʋ agɔma mba pɔkɔma yɔ pa-kʋnʋmɩŋ! Ɛzɩma Yuuda ñɩma mba pɔyɔɔdaɣ kʋnʋmɩŋ lɛɛŋ yɔ, pɩɖɩɣzɩ samaɣ siŋŋ; ɛlɛ tɔm ndʋ Yuuda ñɩma mba peheyi-wɛ nɛ tɔm ndʋ apostoloo Pɩyɛɛrɩ heyi pa-tɩŋa yɔ, tɩɖɩɣzɩ-wɛ nɛ pɩkɩlɩ. Ɛyaa mba, pɛkpɛlɩkɩ puwiye se ye pawɩlaa se pɛwɛnɩ tisuu Yesu Krɩstʋ yɔɔ yɔ, papɩzɩɣ nɛ pehiɣ ñʋʋ yabʋ. Tɔm ndʋ titukuni ɛyaa mba siŋŋ. Titukuni-wɛ siŋŋ nɛ halɩ pɔpɔzɩ se: “Ɛbɛ pɩwɛɛ se ɖɩla?” Pɩyɛɛrɩ cosi-wɛ se: “Mɩ-taa paa weyi eyele nɛ pamɩyɩsɩ-ɩ lɩm.”—Tʋma 2:37, 38.

2. Ɛbɛ ɖɩkaɣ naʋ tɔm ñʋʋ kʋnɛ kɩ-taa? (Cɔnɩ takayaɣ huyuu yɔɔ kɩlɛmʋʋ.)

² Mbʋ pɩlabɩ pʋwayɩ yɔ pɩwɛ piti. Ɛyaa ɛzɩ 3 000 mbʋ yɔ ha pa-tɩ nɛ pamɩyɩsɩ-wɛ lɩm puwiye nɛ papɩsɩ Krɩstʋ tɔmkpɛlɩkɩyaa. Tɔmkpɛlɩkɩyaa labʋ tʋmɩyɛ sɔsɔɖɛ nɖɩ Yesu ɖʋ ɛ-wayɩ tɩŋɩyaa paɣtʋ se pala yɔ, ɖɩ-ɖɩbazɩyɛ lɛ. Ɛ-wayɩ tɩŋɩyaa wɛɛ nɛ palakɩ tʋmɩyɛ nɖɩ halɩ nɛ sɔnɔ. Sɔnɔ, ɖɩɩpɩzɩɣ nɛ ɖɩyɔɔdɩnɩ ɛyʋ ñɩɣtʋ pazɩ nɛ ɛtalɩ se pamɩyɩsɩ-ɩ lɩm. Pɩpɩzɩɣ nɛ pɩkpaɣ fenasɩ, pɩnaɣ yaa halɩ pɩcɛzɩ mbʋ pʋcɔ nɛ kpɛlɩkɩyʋ nɔɔyʋ talɩ kaɖʋwa ŋga. Ye alɩwaatʋ tʋnɛ ŋwɛɛ nɛ ŋkpɛlɩkɩɣnɩ nɔɔyʋ Bibl yɔ, ña-maɣmaɣ ŋnɩɣ pɩ-taa se kpɛlɩkɩyaa labʋ tʋmɩyɛ wɛ kaɖɛ. Tɔm ñʋʋ kʋnɛ kɩ-taa, ɖɩkaɣ naʋ mbʋ ŋpɩzɩɣ ŋla nɛ ŋsɩnɩ ñe-Bibl kpɛlɩkɩyʋ nɛ ɛpɩsɩ tɔmkpɛlɩkɩyʋ weyi pamɩyɩsɩ-ɩ lɩm yɔ.

3. Ɛzɩ pɔyɔɔdʋʋ Maatiyee 28:19, 20 taa yɔ, ɛbɛ pɩwɛɛ se Bibl kpɛlɩkɩyʋ ɛla nɛ ɛɖɛɛnɩ ɛsɩndaa nɛ pamɩyɩsɩ-ɩ lɩm?

³ Pʋcɔ nɛ pamɩyɩsɩ Bibl kpɛlɩkɩyʋ nɔɔyʋ lɩm lɛ, pɩwɛɛ se ɛɖɔ tɔm ndʋ Bibl wɩlɩɣ yɔ tɩ-yɔɔ (Kalɩ Maatiyee 28:19, 20.)  Ye Bibl kpɛlɩkɩyʋ nɔɔyʋ ɛɖɔŋ tɔm ndʋ ɛkpɛlɩkɩɣ yɔ tɩ-yɔɔ yɔ, ɛwɛɣ ɛzɩ “abalʋ lɔŋsɩnɖʋ” weyi ɛ-tɔm Yesu yɔɔdɩ ɛ-kɩɖaʋ taa yɔ. Abalʋ ɛnʋ ehuyaa nɛ pilimi nɛ ɛma ɛ-ɖɩɣa kaaʋ ɖoŋ ñɩŋgʋ yɔɔ. (Mat. 7:24, 25; Luka 6:47, 48) Ɛzɩma ɖɩpɩzɩɣ nɛ ɖɩsɩnɩ Bibl kpɛlɩkɩyʋ nɔɔyʋ nɛ ɛɖɔ tɔm ndʋ ɛkpɛlɩkɩɣ yɔ tɩ-yɔɔ? Iyele nɛ ɖɩna lɔŋ tasʋʋ naadozo.

4. Ɛzɩma ɖɩpɩzɩɣ nɛ ɖɩsɩnɩ Bibl kpɛlɩkɩyʋ nɛ ewolo pɩ-yɔɔ nɛ ɛñakɩ pana se ɛtalɩ nɛ pamɩyɩsɩ-ɩ lɩm? (Kalɩ ɖɔɖɔ aɖakaɣ “ Sɩnɩ ñe-Bibl kpɛlɩkɩyʋ nɛ ɛɖʋ ɛ-tɩ kaɖʋsɩ nɛ ɛtalɩ-sɩ.”)

⁴ Sɩnɩ ñe-Bibl kpɛlɩkɩyʋ nɛ ɛɖʋ ɛ-tɩ kaɖʋsɩ. Ɛbɛ yɔɔ pɩwɛɛ se ŋla mbʋ? Kɩɖaʋ nakʋyʋ yɔ: Ye ŋɖʋwa se ŋɖɔŋ nʋmɔʋ kɩɖaɣlʋʋ nakʋyʋ yɔ, pɩtɩla ŋɖʋʋ ña-taa se ŋsɩŋɩɣ lona kɩbana naayɛ taa alɩwaatʋ ndʋ ŋɖɔŋ nʋmɔʋ ŋgʋ yɔ. Ðɩnɛ ɛlɛ, pɩɩlakɩ-ŋ ɛzɩ nʋmɔʋ ŋgʋ kɩkɩlɩ ɖaɣlʋʋ yɔ. Mbʋ ɖɔɖɔ, ye Bibl kpɛlɩkɩyʋ ɛɖʋ ɛ-tɩ kaɖʋsɩ cikpesi nɛ ɛtalɩ-sɩ yɔ, ɛkaɣ naʋ se ɛpɩzɩɣ nɛ ɛtalɩ lɩm mɩyɩsʋʋ kaɖʋwa. Tɩŋnɩ aɖakasɩ “Mon objectif” nzɩ sɩwɛ Vivez pour toujours! takayaɣ taa yɔ sɩ-yɔɔ nɛ ŋsɩnɩ ñe-Bibl kpɛlɩkɩyʋ nɛ ɛɖɛɛnɩ ɛsɩndaa. Ɩtɛŋ kpɛlɩkʋʋ paa ñʋʋ ŋgʋ lɛ, ña nɛ ñe-Bibl kpɛlɩkɩyʋ ɩyɔɔdɩ ɛzɩma kaɖʋwa ŋga kɔ-tɔm pɔyɔɔdɩ tɔm ñʋʋ ŋgʋ kɩ-taa yɔ kakaɣ-ɩ sɩnʋʋ nɛ ɛɖɔ ndʋ ɛkpɛlɩkaa yɔ tɩ-yɔɔ yɔ. Ye ŋsɔɔlaa se ñe-Bibl kpɛlɩkɩyʋ ɛtalɩ kaɖʋwa lɛɛka yɔ, ŋpɩzɩɣ nɛ ŋma-kɛ hɔɔlʋʋ ŋgʋ pamawa se “Autre objectif” yɔ kɩ-yɔɔ. Ðoŋ ɖoŋ lɛ, ña nɛ ñe-Bibl kpɛlɩkɩyʋ ɩlabɩnɩ hɔɔlʋʋ kʋnɛ tʋmɩyɛ nɛ ɩtazɩɣ kaɖʋsɩ cikpesi nɛ kaɖʋsɩ sɔsɔsɩ nzɩ ɛɖʋ ɛ-tɩ yɔ sɩ-taa.

5. Ɛzɩ pɔyɔɔdʋʋ Maarkɩ 10:17-22 taa yɔ, ɛbɛ Yesu heyi abalʋ ñɩm tʋ nɔɔyʋ se ɛla, nɛ ɛbɛ yɔɔ?

⁵ Sɩnɩ ñe-Bibl kpɛlɩkɩyʋ nɛ ɛla lɛɣzɩtʋ e-wezuu caɣʋ taa. (Kalɩ Maarkɩ 10:17-22.) Yesu kaanawa se pɩwɛɣ abalʋ ñɩm tʋ nɔɔyʋ kaɖɛ se ɛpɛdɩ mbʋ payɩ ɛwɛna yɔ. (Mark. 10:23) Ɛlɛ, Yesu heyi abalʋ ɛnʋ se ɛla lɛɣzɩtʋ sɔsɔtʋ ndʋ e-wezuu caɣʋ taa. Ɛbɛ yɔɔ? Mbʋ  pʋyɔɔ yɔ Yesu kaasɔɔlɩ-ɩ. Nabʋyʋ taa, ɖɩpɩzɩɣ nɛ ɖɩkpa ɖa-tɩ nɛ ɖiiseɣtiɣ Bibl kpɛlɩkɩyʋ nɔɔyʋ se ɛɖɔ tɔm ndʋ ɛkpɛlɩkɩɣ yɔ tɩ-yɔɔ, mbʋ pʋyɔɔ yɔ pɩlakɩ-ɖʋ ɛzɩ ɛtɩtalɩta se ɛla lɛɣzɩtʋ ndʋ yɔ. Pɩpɩzɩɣ nɛ pɩkpaɣ alɩwaatʋ pʋcɔ nɛ ɛyaa nabɛyɛ lɛɣzɩ pe-wezuu caɣʋ nɛ posuu ɛyʋtʋ kɩfatʋ. (Kol. 3:9, 10) Ɛlɛ ye ña nɛ Bibl kpɛlɩkɩyʋ ɩyɔɔdɩ lɛɣzɩtʋ ndʋ pɩpɔzʋʋ se ɛla yɔ tɩ-tɔm lɔŋ yɔ, pɩpɩzɩɣ piyele nɛ ɛpaɣzɩ lɛɣzʋʋ ɖɔɖɔ lɔŋ. Ye ña nɛ ɩ ɩyɔɔdʋʋ lɛɣzɩtʋ ndʋ tɩ-tɔm yɔ, ŋwɩlɩɣ se ŋmaɣzɩɣ ɛ-yɔɔ.—Keɣa 140:5 Adu. 27:17.

6. Ɛbɛ yɔɔ pɩwɛɛ se ɖɩpɔzɩ ɖe-Bibl kpɛlɩkɩyʋ tɔm nɛ ɖɩna ndʋ ɛmaɣzɩɣ yɔ?

⁶ Pɩcɛyaa se ɖɩpɔzɩ ɖe-Bibl kpɛlɩkɩyʋ nɛ ɖɩna ndʋ ɛmaɣzɩɣ tɔm natʋyʋ yɔɔ yɔ. Pɩkaɣ yebu nɛ ŋtɩlɩ ndʋ tɩ-yɔɔ ñe-Bibl kpɛlɩkɩyʋ maɣzɩɣ nɛ ndʋ tɩ-yɔɔ etisiɣ yɔ. Ye ŋlakɩ mbʋ ɖoŋ ɖoŋ yɔ, pɩkaɣ wɛʋ kɛlɛʋ se ña nɛ ɩ ɩyɔɔdɩ tɔm ndʋ pɩtɩla pɩwɛɣ-ɩ kaɖɛ se etisi tɩ-yɔɔ yɔ. Tɔm ndʋ pɔpɔzʋʋ se pana nɔɔyʋ lɩmaɣza tɔm natʋyʋ yɔɔ yɔ, tɩɖɔ Vivez pour toujours! takayaɣ taa. Kɩɖaŋ nɩɩyɩ yɔ: Tɔm kɩkpɛlɩkɩtʋ 04 taa, pɔpɔzɩ tɔm tʋnɛ: “À votre avis, que ressent Jéhovah quand vous utilisez son nom?” Tɔm kɩkpɛlɩkɩtʋ 09 taa, pɔpɔzɩ tɔm tʋnɛ: “Pour quelles choses voudriez-vous prier?” Kajalaɣ taa lɛ, pɩpɩzɩɣ nɛ pɩwɛɛ ñe-Bibl kpɛlɩkɩyʋ kaɖɛ se ecosi tɔm ndʋ tɩ-yɔɔ. Ŋpɩzɩɣ nɛ ŋtɩŋnɩ masɩ nɛ kɩlɛmɩŋ weyi ɩwɛ takayaɣ ŋga ka-taa yɔ ɩ-yɔɔ nɛ ŋsɩnɩ-ɩ nɛ ɛmaɣzɩ tɔm ndʋ tɩ-yɔɔ.

7. Ɛzɩma ɖɩpɩzɩɣ nɛ ɖɩlabɩnɩ lalaa kɩɖaŋ tʋmɩyɛ camɩyɛ?

⁷ Alɩwaatʋ ndʋ ñe-Bibl kpɛlɩkɩyʋ tɩlɩɣ mbʋ pɩwɛɛ se ɛla yɔ lɛ, tɩŋnɩ wezuu caɣʋ taa kɩɖaŋ yɔɔ nɛ ŋseɣti-i se ɛla mbʋ. Kɩɖaʋ nakʋyʋ yɔ. Ye ñe-Bibl kpɛlɩkɩyʋ ɛɛkɔŋ kediɣzisi ɖoŋ ɖoŋ yɔ, ŋpɩzɩɣ nɛ ŋwɩlɩ-ɩ video Jéhovah a pris soin de moi ŋgʋ kɩwɛ takayaɣ ŋga kɛ-tɛ tɔm kɩkpɛlɩkɩtʋ 14 taa hɔɔlʋʋ “À découvrir aussi” taa yɔ. Vivez pour toujours! takayaɣ taa, ŋkaɣ naʋ kɩɖaŋ ɛzɩ kʋnɛ yɔ hɔɔlʋʋ “Approfondissons” yaa “À découvrir aussi” taa, tɔm kɩkpɛlɩkɩtʋ sakɩyɛ taa. * Kpa ña-tɩ nɛ taakpaɣ ñe-Bibl kpɛlɩkɩyʋ nɛ ŋmaɣzɩnɩ nɔɔyʋ nɛ ŋtɔ se: “Ye ɛpɩzaa nɛ ɛla mbʋ yɔ, ña ɖɔɖɔ ŋpɩzɩɣ nɛ ŋla mbʋ.” Yele nɛ tɔmkpɛlɩkɩyʋ maɣmaɣ sɛtɩnɩ ɛ-tɩ tɔm mbʋ. Ɛlɛ yɔɔdɩ video taa lɩmaɣza sɔsɔna wena asɩnɩ ɛyʋ ɛnʋ nɛ ɛɖɔ Bibl wɩlɩtʋ yɔɔ yɔ a-tɔm. Pɩtɩla ŋpɩzɩɣ nɛ ŋñɩɣ niye mayaɣ kɩbaŋa nakɛyɛ yɔɔ yaa mbʋ ɖeyi ɖeyi ɛyʋ ɛnʋ ɛlaba nɛ pɩsɩnɩ-ɩ yɔ pɩ-yɔɔ. Ye pɩsaŋ yɔ, yɔɔdɩ ɛzɩma Yehowa sɩnɩ ɛyʋ ɛnʋ yɔ pɩ-tɔm.

8. Ɛzɩma ɖɩpɩzɩɣ nɛ ɖɩsɩnɩ ɖe-Bibl kpɛlɩkɩyʋ nɛ ɛsɔɔlɩ Yehowa?

⁸ Sɩnɩ ñe-Bibl kpɛlɩkɩyʋ nɛ ɛsɔɔlɩ Yehowa. Ɛzɩma ŋpɩzɩɣ nɛ ŋsɩnɩ-ɩ? Tɩŋnɩ wala ndɩ ndɩ yɔɔ nɛ ŋhɔ ñe-Bibl kpɛlɩkɩyʋ lɩmaɣza nɛ ŋwoni Yehowa wɛtʋ kɩbandʋ yɔɔ. Sɩnɩ ñe-Bibl kpɛlɩkɩyʋ nɛ ɛnɩɩ pɩ-taa se Yehowa kɛ Ɛsɔ koboyaɣ tʋ, nɛ ɛsɔɔlaa se ɛsɩnɩ mba pɔsɔɔlɩ-ɩ yɔ. (1 Tim. 1:11; Ebr. 11:6) Wɩlɩ ñe-Bibl kpɛlɩkɩyʋ se ye ɛɖɔŋ tɔm ndʋ ɛkpɛlɩkɩɣ yɔ tɩ-yɔɔ yɔ, ɛkaɣ hiɣu wazasɩ; nɛ ŋlɩzɩ-ɩ pɩ-taa se wazasɩ nzɩ sɩwɩlɩɣna se Yehowa sɔɔlɩ-ɩ. (Iza. 48:17, 18) Alɩwaatʋ ndʋ sɔɔlɩm mbʋ ñe-Bibl kpɛlɩkɩyʋ wɛnɩ Yehowa yɔɔ yɔ pɩwɛɣ nɛ pɩpaɣlɩɣ yɔ, pɩkaɣ-ɩ seɣtuu nɛ pɩkɩlɩ se ɛla lɛɣzɩtʋ ndʋ payɩ pɩpɔzʋʋ yɔ.—1 Yoh. 5:3.

9. Ɛzɩ Maarkɩ 10:29, 30 yɔɔdʋʋ yɔ, ɛbɛ pɩzɩɣ nɛ pɩsɩnɩ nɔɔyʋ nɛ ɛlaa kɩlaŋ nɛ ɛpɩsɩ tɔmkpɛlɩkɩyʋ weyi pamɩyɩsɩ-ɩ lɩm yɔ?

⁹ Pɩsa nɛ Bibl kpɛlɩkɩyʋ ɖɛɛnɩ ɛsɩndaa nɛ pamɩyɩsɩ-ɩ lɩm lɛ, pɩkaɣ pɔzʋʋ se ɛlaa kɩlaŋ. Ɛzɩ abalʋ ñɩm tʋ weyi ɛ-tɔm ɖɩyɔɔdaa nɛ pɩɖɛɛ yɔ, pɩpɩzɩɣ nɛ pɩpɔzɩ se Bibl kpɛlɩkɩyaa  nabɛyɛ ikizi tomnaɣ yɔɔ ñɩm. Ye tʋmɩyɛ nɖɩ palakɩ yɔ ɖɩɩlakɩ nɔɔ kʋɖʋmaɣ nɛ Bibl paɣtʋ kila yɔ, pɩpɩzɩɣ nɛ pɩpɔzɩ se pɛlɛɣzɩ tʋmɩyɛ naɖɩyɛ. Pɩpɩzɩɣ nɛ pɩpɔzɩ se pa-taa sakɩyɛ ɩcɛ pa nɛ ɛyaa mba patɩsɔɔlɩ Yehowa yɔ pa-taabalɩyɛ. Lalaa lɛ, pɔ-hɔʋ taa ñɩma mba patɩsɔɔlɩ Yehowa Aseɣɖe Tɩnaa yɔ, papɩzɩɣ nɛ pɔlɔ-wɛ. Yesu kaanawa se pɩpɩzɩɣ nɛ pɩla ɛyaa nabɛyɛ kaɖɛ se palaa kɩlaŋ ɛnɩ. Ɛlɛ ɛlabɩ tamaɣ se mba patɩŋɩɣ-ɩ yɔ, pɩɩkaɣ-wɛ ɖʋzʋʋ. Ɛlɛ Yehowa kaɣ-wɛ wazʋʋ nɛ ɛha-wɛ fezuu taa hɔʋ ŋgʋ kɩ-taa wɛ sɔɔlɩm yɔ. (Kalɩ Maarkɩ 10:29, 30.) Ɛzɩma ŋpɩzɩɣ nɛ ŋsɩnɩ ñe-Bibl kpɛlɩkɩyʋ nɛ kʋjɔʋ kɩbaŋʋ kʋnɛ kɩwazɩ-ɩ?

10. Ɛbɛ ŋkpɛlɩkɩ tɔm ndʋ Manuel yɔɔdaa yɔ tɩ-taa?

¹⁰ Ðʋ taabalɩyɛ nɛ ñe-Bibl kpɛlɩkɩyʋ. Pɩcɛyaa se ŋwɩlɩ ñe-Bibl kpɛlɩkɩyʋ se ŋmaɣzɩɣ ɛ-yɔɔ. Ɛbɛ yɔɔ? Manuel wɛ Mɛkɩsiiki ɛjaɖɛ taa, na tɔm ndʋ ɛyɔɔdaa yɔ. Ɛkɛdɩ ɛzɩma ɛ-wɩlɩyʋ sɩnɩ-ɩ alɩwaatʋ ndʋ ɛɛkɛ Bibl kpɛlɩkɩyʋ yɔ pɩ-tɔm. Ɛyɔɔdaa se: “Pʋcɔ nɛ ɖɩpaɣzɩ paa kpɛlɩkʋʋ mbʋ lɛ, ɛpɔzʋʋ-m se ɛna se ɛzɩma pɩɖɔŋ. Ɛsɩɣnɩ-m se sɔɔndʋ ɛtaakpa-m nɛ eyeki se monkuli ma-laŋɩyɛ nɛ meheyi-i tɔm ndʋ payɩ tɩwɛ man-taa yɔ. Piyeba nɛ mana se toovenim taa lɛ, ɛmaɣzɩɣ mɔ-yɔɔ.”

11. Ye ɖɩkpakɩɣ alɩwaatʋ nɛ ɖa nɛ ɖe-Bibl kpɛlɩkɩyaa ɖɩcakɩ yɔ, ɛzɩma pɩpɩzɩɣ nɛ pɩwazɩ-wɛ?

¹¹ Kpakɩɣ alɩwaatʋ nɛ ña nɛ ñe-Bibl kpɛlɩkɩyaa ɩcakɩ ɛzɩ Yesu kaakpaɣʋ alɩwaatʋ nɛ ɛ nɛ ɛ-wayɩ tɩŋɩyaa pacaɣ yɔ. (Yoh. 3:​22) Ye pɩsaŋ yɔ, yaa ñe-Bibl kpɛlɩkɩyʋ weyi ɛwɛɛ nɛ ɛlɛɣzɩɣ e-wezuu caɣʋ yɔ se ɛkɔɔ ñɛ-tɛ nɛ ña nɛ ɩ ɩñɔɔ kɔfɩ, yaa ɩtɔɔ tɔɔnaɣ, yaa ɩcɔnɩ JW Tɔm Ðɩyɔɔdɩyɛ yɔɔ videowaa mba paɖʋʋ paa fenaɣ ŋga yɔ pa-taa nakʋyʋ. Pɩpɩzɩɣ nɛ pɩkɛdɩnɩ ñe-Bibl kpɛlɩkɩyʋ siŋŋ, ye ŋya-ɩ alɩwaatʋ ndʋ ɛ-taabalaa nɛ ɛ-hɔʋ taa ñɩma pɛwɛɛ nɛ palakɩ cɛtɩm Ɛsɔ sɛtʋ kazandʋ natʋyʋ nɛ pɩlakɩ-ɩ ɛzɩ ɛwɛ e-ɖeke yɔ. Kazibwe wɛ Ugandaa ɛjaɖɛ taa, ɛyɔɔdaa se: “Mamaɣzɩɣ se mɛnkpɛlɩkɩ tɔm sakɩyɛ Yehowa yɔɔ alɩwaatʋ ndʋ ma nɛ ma-wɩlɩyʋ ɖɩkpaɣ alɩwaatʋ nɛ ɖɩkɛdɩɣ yɔ nɛ pɩkɩlɩ alɩwaatʋ ndʋ ɖɩkpɛlɩkaɣ yɔ. Mana ɛzɩma Yehowa cɔŋnɩ ɛ-samaɣ yɔɔ yɔ nɛ ɛzɩma kɛwɛ taa leleŋ taa yɔ. Mbʋ maasɔɔlɩ me-wezuu caɣʋ taa.”

12. Ɛbɛ yɔɔ pɩwɛɛ se tɔm susuyaa ndɩ ndɩ ɩsɩɩ-ɖʋ nɛ ɖiwolo ɖɩkpɛlɩkɩnɩ ɖe-Bibl kpɛlɩkɩyʋ?

 ¹² Yaa tɔm susuyaa ndɩ ndɩ nɛ pasɩ-ŋ alɩwaatʋ ndʋ ɩkpɛlɩkɩɣ yɔ. Nabʋyʋ taa, ɖɩpɩzɩɣ nɛ ɖɩmaɣzɩ se pɩwɛ kɛlɛʋ se ɖe-ɖeke ɖiwolo, yaa ɖa nɛ tɔm susuyu kʋɖʋm nɔɔyʋ ɖiwoki paa ɛzɩmtaa. Pɩpɩzɩɣ nɛ pɩwɛɛ kɛlɛʋ se ɖɩlakɩ mbʋ, ɛlɛ ye ɖɩkpɛndɩɣnɩ tɔm susuyaa ndɩ ndɩ nɛ ɖiwoki kpɛlɩkɩyʋ cɔlɔ yɔ, pɩpɩzɩɣ nɛ pɩsɩnɩ kpɛlɩkɩyʋ nɛ pɩkɩlɩ. Dmitrii wɛ Mɔlɩdaavii ɛjaɖɛ taa, ɛyɔɔdaa se: “Alɩwaatʋ ndʋ pɛkpɛlɩkɩɣnɩ-m yɔ, tɔm susuyaa mba pɔkɔŋ yɔ, ɛzɩma nɔɔyʋ lɩzɩɣ tɔm taa yɔ pɩwɛ ndɩ nɛ ɛzɩma lɛlʋ lɩzɩɣ pɩ-taa yɔ. Pɩsɩnɩ-m nɛ mana hɔɔlɩŋ lɛɛŋ weyi ɩ-taa manpɩzɩɣ nɛ mɔnɖɔ tɔm ndʋ mɛnkpɛlɩkaa yɔ tɩ-yɔɔ yɔ. Pɩsɩnɩ-m ɖɔɖɔ nɛ fɛyɛ tɩkɩlɩ-m kpaʋ alɩwaatʋ ndʋ mowobi kediɣzaɣ kajalaɣ ɖeɖe yɔ, mbʋ pʋyɔɔ yɔ maatɛm katʋʋ koobiya sakɩyɛ.”

13. Ɛbɛ yɔɔ pɩwɛɛ se ɖɩsɩnɩ ɖe-Bibl kpɛlɩkɩyʋ nɛ ɛkɔŋ kediɣzisi?

¹³ Sɩnɩ ñe-Bibl kpɛlɩkɩyʋ nɛ ɛkɔŋ ɛgbɛyɛ taa kediɣzisi. Ɛbɛ yɔɔ? Mbʋ pʋyɔɔ yɔ, Yehowa ɖʋ paɣtʋ ɛ-sɛyaa se pekpeɣliɣ ɖama; pɩkɛ ɖɛ-Ɛsɔ sɛtʋ hɔɔlʋʋ nakʋyʋ. (Ebr. 10:24, 25) Pɩtasɩ lɛ, ɖo-koobiya kɛ ɖe-fezuu taa hɔʋ taa ñɩma. Alɩwaatʋ ndʋ ɖa nɛ wɛ ɖɩwɛɣ kediɣzisi taa yɔ, pɩwɛ ɛzɩ ɖa nɛ wɛ ɖɩkpɛndaa nɛ ɖɩwɛɛ ɖɩɣa nɛ ɖɩtɔkɩ tɔɔnaɣ kɩbaŋa nakɛyɛ yɔ. Ye ŋsɩɣnɩ ñe-Bibl kpɛlɩkɩyʋ se ɛkɔŋ kediɣzisi yɔ, pɩwɩlɩɣ se ŋwɛɛ nɛ ŋsɩɣnɩ-ɩ se ɛla mbʋ pɩ-tɔm cɛyɩ siŋŋ se ɛla nɛ ɛtalɩ nɛ pamɩyɩsɩ-ɩ lɩm yɔ. Ɛlɛ pɩpɩzɩɣ nɛ pɩwɛɛ-ɩ kaɖɛ se ɛpaɣzɩ kɔm kediɣzisi. Ɛzɩma tɩyɛ Vivez pour toujours! takayaɣ pɩzɩɣ nɛ kasɩnɩ ñe-Bibl kpɛlɩkɩyʋ nɛ ɛlʋbɩnɩ kala wena payɩ ɛpɩzɩɣ nɛ ɛkatɩ yɔ?

14. Ɛzɩma ɖɩpɩzɩɣ nɛ ɖiseɣti ɖe-Bibl kpɛlɩkɩyʋ nɛ ɛkɔŋ kediɣzisi?

¹⁴ Labɩnɩ tʋmɩyɛ Vivez pour toujours! takayaɣ tɛ tɔm kɩkpɛlɩkɩtʋ 10 nɛ pɩsɩnɩ-ŋ nɛ ŋseɣti ñe-Bibl kpɛlɩkɩyʋ. Pʋcɔ nɛ palɩzɩ takayaɣ ŋga lɛ, pɔpɔzɩ tɔm susuyaa nabɛyɛ se pa nɛ pe-Bibl kpɛlɩkɩyaa palabɩnɩ tʋmɩyɛ tɔm kɩkpɛlɩkɩtʋ ndʋ. Pɔyɔɔdaa se pɩɖɔm camɩyɛ nɛ pɩsɩnɩ pe-Bibl kpɛlɩkɩyaa nɛ pɔkɔŋ kediɣzisi. Paa mbʋ yɔ, taaɖaŋ se ɩtalɩ tɔm kɩkpɛlɩkɩtʋ 10 pʋcɔ nɛ ŋyaa ñe-Bibl kpɛlɩkɩyʋ se ɛkɔŋ kediɣzisi. Ye pɩsaŋ yɔ, yaa-ɩ lɔŋ nɛ wolo pɩ-yɔɔ nɛ ŋyaɣ-ɩ ɖoŋ ɖoŋ. Bibl kpɛlɩkɩyaa katɩɣ tɩlasɩ nzɩ yɔ sɩwɛ ndɩ ndɩ. Pʋyɔɔ lɛ, maɣzɩ ñe-Bibl kpɛlɩkɩyʋ kɩcɛyɩm yɔɔ nɛ ŋna se ŋpɩzɩɣ nɛ ŋla nabʋyʋ ɖeyi ɖeyi nɛ ŋsɩnɩ-ɩ yaa we. Ye pɩkpakɩɣ alɩwaatʋ se pʋcɔ nɛ ɛpaɣzɩ kɔm yɔ pitaatibi-ŋ yɔɔɔ. Wɛɛ suuɖu ɛlɛ taayebi-i yaʋ.

15. Sɔɔndʋ ndʋ pɩzɩɣ nɛ tɩkpa ɖe-Bibl kpɛlɩkɩyʋ?

¹⁵ Ŋtɔzʋʋ se sɔɔndʋ kpaɣaɣ-ŋ pazɩ se ŋpɩsɩ Yehowa Aseɣɖe Tʋ na? Pɩtɩla ŋmaɣzaɣ se ŋŋkaɣ pɩzʋʋ nɛ ŋsusi tɔm samaɣ taa kpa. Yaa pɩtɩla sɔɔndʋ kpaɣaɣ-ŋ se ñɔ-hɔʋ taa ñɩma yaa ña-taabalaa pɩzɩɣ nɛ pakaɖɩnɩ-ŋ. Ye mbʋ yɔ, ŋpɩzɩɣ nɛ ŋnɩɩ ɛzɩma pɩlakɩ ñe-Bibl kpɛlɩkɩyʋ yɔ pɩ-taa. Yesu kaanawa se sɔɔndʋ, ɛzɩ tʋnɛ yɔ, pɩzɩɣ nɛ tɩkpa ɛyaa nabɛyɛ. Paa mbʋ yɔ, eseɣti ɛ-wayɩ tɩŋɩyaa se pataayele nɛ sɔɔndʋ ɖɩɣ-wɛ nʋmɔʋ nɛ peyele Yehowa sɛʋ. (Mat. 10:16, 17, 27, 28) Ɛzɩma Yesu sɩnɩ ɛ-wayɩ tɩŋɩyaa nɛ pawa pɔ-sɔɔndʋ? Nɛ ɛzɩma ŋpɩzɩɣ nɛ ŋmaɣzɩnɩ ɛ-kɩɖaʋ?

16. Ɛzɩma ɖɩpɩzɩɣ nɛ ɖɩfalɩsɩ ɖe-Bibl kpɛlɩkɩyʋ nɛ eheyi lalaa e-tisuu yɔɔ tɔm?

¹⁶ Falɩsɩ ñe-Bibl kpɛlɩkɩyʋ pazɩ pazɩ nɛ eheyi lalaa e-tisuu yɔɔ tɔm. Alɩwaatʋ ndʋ Yesu tiyi ɛ-tɔmkpɛlɩkɩyaa se powolo nɛ posusi tɔm yɔ, pɩtɩla sɔɔndʋ kpaɣaɣ-wɛ. Ɛlɛ Yesu sɩnɩ-wɛ nɛ ɛwɩlɩ-wɛ ɖenɖe posusi tɔm yɔ nɛ tɔm ndʋ pɔyɔɔdɩ yɔ. (Mat. 10:5-7) Ɛzɩma ŋpɩzɩɣ nɛ ŋmaɣzɩnɩ Yesu? Sɩnɩ ñe-Bibl  kpɛlɩkɩyʋ nɛ ɛtɩlɩ ɖenɖe ɛpɩzɩɣ nɛ esusi tɔm yɔ. Ŋpɩzɩɣ nɛ ŋpɔzɩ-ɩ nɛ ŋna se ɛsɩm nɔɔyʋ, weyi Bibl taa toovenim tɔm natʋyʋ pɩzɩɣ nɛ tɩwazɩ-ɩ yɔ. Pʋwayɩ lɛ ŋsɩnɩ-ɩ nɛ ɛñɔɔzɩ tɔm ndʋ pɩwɛɛ se ɛyɔɔdɩ yɔ nɛ ŋwɩlɩ-ɩ nʋmɔʋ kɛlɛʋ ŋgʋ kɩ-yɔɔ pɩwɛɛ se ɛtɩŋna nɛ ɛyɔɔdɩ toovenim tɔm ndʋ yɔ. Ye pɩsaŋ yɔ, ña nɛ ɩ ɩpɩzɩɣ nɛ ɩtɩŋnɩ Vivez pour toujours! takayaɣ taa hɔɔlɩŋ weyi payaɣ se “On entend parfois” nɛ “On pourrait vous demander” yɔ ɩ-yɔɔ nɛ ɩla la ŋwɩlɩ. Ɩɩlakɩ mbʋ lɛ, ka ña-lɩmaɣza ɛzɩma pɩwɛɛ se ŋsɩnɩ ñe-Bibl kpɛlɩkɩyʋ nɛ ɛlabɩnɩ tʋmɩyɛ Bibl nɛ ecosi tɔm yɔɔ kɛlɛʋ nɛ nɔɔ kɩbaŋa yɔ pɩ-yɔɔ.

17. Ðɩɩsɩɣnɩ ɖe-Bibl kpɛlɩkɩyʋ se ɛtaa Yehowa liu lɛ, ɛzɩma ɖɩpɩzɩɣ nɛ ɖɩlabɩnɩ tʋmɩyɛ Maatiyee 10:19, 20, 29-31?

¹⁷ Sɩnɩ ñe-Bibl kpɛlɩkɩyʋ nɛ ɛtaa Yehowa liu. Yesu heyi ɛ-tɔmkpɛlɩkɩyaa se Yehowa kaɣ-wɛ sɩnʋʋ mbʋ pʋyɔɔ yɔ ɛsɔɔlɩ-wɛ. (Kalɩ Maatiyee 10:19, 20, 29-31.) Tɔzɩ ñe-Bibl kpɛlɩkɩyʋ se Yehowa kaɣ-ɩ sɩnʋʋ ɖɔɖɔ. Ña nɛ ɩ ɩpɩzɩɣ nɛ ɩtɩmɩ kaɖʋsɩ nzɩ ɛwɛna yɔ sɩ-yɔɔ nɛ pɩsɩnɩ-ɩ nɛ ɛtaa Yehowa liu. Franciszek wɛ Pɔlɔɔñɩ ɛjaɖɛ taa, ɛyɔɔdaa se: “Ðoŋ ɖoŋ ma-wɩlɩyʋ kaatɩmɩɣ lɛ, ɛyɔɔdʋʋ man-kaɖʋsɩ tɔm ɛ-adɩma taa. Manpaɣzɩ tɩmʋʋ kpaagbaa alɩwaatʋ ndʋ mana ɛzɩma Yehowa cosi ma-wɩlɩyʋ adɩma yɔɔ yɔ. Maanawa se Yehowa sɩnɩ-m alɩwaatʋ ndʋ pɩɩpɔzaa se mɔnpɔzɩ nɛ paha-m nʋmɔʋ man-tʋmɩyɛ kɩfaɖɛ taa nɛ mowolo kediɣzisi nɛ kigbeɣluu yɔ.”

18. Ɛzɩma pɩlakɩ Yehowa tʋmɩyɛ nɖɩ wɩlɩyaa Krɩstʋ ñɩma lakɩ yɔ ɖɩ-yɔɔ?

¹⁸ Yehowa maɣzɩɣ ɖe-Bibl kpɛlɩkɩyaa yɔɔ siŋŋ. Ɛsɩm pana wena wɩlɩyaa Krɩstʋ ñɩma ñakɩ se pasɩnɩ ɛyaa nɛ pɔñɔtɩnɩ-ɩ yɔ, nɛ ɛsɔɔlɩ-wɛ pa-pana ñaɣʋ mbʋ pɩ-yɔɔ. (Iza. 52:7) Paa alɩwaatʋ tʋnɛ ŋfɛyɩnɩ Bibl kpɛlɩkɩyʋ nɔɔyʋ yɔ, ŋpɩzɩɣ nɛ ŋsɩnɩ Bibl kpɛlɩkɩyaa nɛ pɛɖɛɛnɩ ɛsɩndaa nɛ patalɩ se pamɩyɩsɩ-wɛ lɩm, ye ña nɛ tɔm susuyaa lalaa iwoki pe-Bibl kpɛlɩkɩyaa cɔlɔ yɔ.