1. Inup­pas­suit Jiisusip ajoqersugaanit qanoq ilioq­quneqar­pat?

UKIUMI 33-MI piinsip ul­luani inup­pas­suit nunanit tamalaaneersut as­sigiin­ngitsunil­lu oqaasil­lit Jerusalemimi katersuup­put. Taava juutit ilaat, ilaatigut apustili Petrusi, sas­sar­put oqaatsil­lu as­sigiin­ngitsut atorlugit oqalus­sin­naaleriasaarlutik. Taman­na inup­pas­suit tupigusuutigeqaat. Oqariar­tuutaal­li tupaal­laatigineruaat. Paasivaat an­naan­neqas­sagunik Jiisusi Kristusi up­perfigisariaqarlugu. Oqariar­tuut taan­na inup­pas­suit kil­litsis­sutigingaaramik­ku ima aperip­put: “Qanoq ilius­saagut?” Petrusil­lu ima akivai: “Tamas­si kuisigitsi [imermut morsutsin­neqaritsi, NW].” – ApS 2:37, 38.

2. Al­laaserisami matumani suut sam­mineqas­sap­pat? (Saq­qaani as­seq takuuk).

² Kingunin­ngua nuan­neqisumik pisoqar­poq. Inuit 3.000-t mis­saan­niit­tut ul­loq taan­na Kristusimut ajoqersugan­ngorlutik imermut morsutsin­neqar­put. Jiisusip peq­qus­sutaa malil­lugu ajoqersugan­ngor­titsior­tor­neq taamanik­kumiit aal­lar­tip­poq sulilu maan­na ingerlan­neqarluni. Nalitsin­ni imermut morsutsin­neqar­nis­samut taama suk­katigisumik piareer­toqar­tan­ngilaq. Inuit ilaat aatsaat qaam­matialuit, ukioq ataaseq sivisunerusorluun­niit Biibilimik ilin­niar­tin­neqareeraangamik imermut morsutsin­neqar­nis­samin­nut piareer­tar­put. Il­lit Biibilimik ilin­niar­titaqaruit nalus­sagunan­ngilat ajoqersugan­ngor­titsior­tor­neq suliarujus­suusoq. Suliami tamatumani iluaqutigisin­naasatit  al­laaserisami matumani sam­mineqas­sap­put.

3. Mat­thæusi 28:19, 20-lu naaper­torlugit Biibilimik ilin­niar­titaq imermut morsutsin­neqas­saguni susariaqar­pa?

³ Biibilimik ilin­niar­titaq imermut morsutsin­neqas­saguni ilik­kak­kaminik maleruaasariaqar­poq. (Matthæusi 28:19, 20 atuakkit). Taamaalior­nermigut as­sigis­savaa angut silatooq Jiisusip as­sersuusiaani “itisuumik as­saal­luni qaarsumut tun­ngavilerlugu il­lulior­toq”. (Matt 7:24, 25; Luk 6:47, 48) Uagut taan­na qanoq ikiorsin­naavar­put? Siun­nersuutit pingasut sam­meriar­tigit.

4. Biibilimik ilin­niar­titaq anersaak­kut siumukar­tuar­nis­saanut qanoq ikiorsin­naaviuk? (Aam­ma ungalusaq “ Ilin­niar­titat siumukar­nis­saanut ikioruk” takuuk).

⁴ Ilinniartitat anguniagas­siguk. Sooq taman­na pingaaruteqar­pa? Una eq­qarsaatigiuk: Ungasis­sumut angalatil­lutit aq­qutaani unil­latsiarlutit takusas­sarsior­taruit angalanerit sivisunaan­ngin­nerus­sagunar­pat. Taamatut­taaq Biibilimik ilin­niar­titaq siunis­sami qanin­nerusumi angusin­naasaminik anguniagaqaruni paasil­lualis­savaa imermut morsutsin­neqar­nis­saq inor­nar­tuun­ngitsoq. Ilin­niar­titat anguniagaqar­nis­saanut ikiorumal­lugu atuak­kami Naassaanngitsumik pilluarsinnaavutit!-mi ilin­niagas­sani naggasiutigineqar­tar­toq “Iliuuserisas­satit” ator­taruk. Ilin­niar­tital­lu eq­qar­torsiuk anguniagas­saq taan­na ilik­kak­kaminik maleruaanis­saminut qanoq iluaqutigisin­naagaa. Al­lamik anguniagaqar­nis­saa pitsaanerusoris­saguk­ku anguniagas­saq taan­na “Aam­ma”-p ataani al­las­sin­naavat. Ilin­niar­titavit siunis­sami qanin­nerusumi ungasin­nerusumilu angusin­naasai nalilersorumal­lugit “Iliuuserisas­satit” eq­qar­tor­tarsiuk.

5. Jiisusip angut pisooq qanoq ilioq­quaa, aam­ma sooq? (Markusi 10:17-22)

⁵ Ilinniartitat allan­nguinis­saanut ikioruk.  (Markusi 10:17-22 atuakkit). Jiisusip nalun­ngilaa angutip pisuup pigisaminik tamanik iperaanis­sani saper­nar­tis­sin­naagaa. (Mark 10:23) Taava sooq angut taan­na taamaalioq­quaa? Asagamiuk. Uagut ilin­niar­titat­ta ilik­kak­kaminik maleruaanis­saanik kajumis­saar­nis­saa nangaanar­tis­sin­naasar­par­put, im­maqa misigigat­ta al­lan­nguinis­saminut piareersiman­ngitsoq. Eq­qaamasariaqar­par­put ilin­niar­titat­ta saper­nar­titaminik al­lan­nguiniar­nera sivisusin­naasar­toq. (Kol 3:9, 10) Kajumis­saar­nis­saali nangaas­sutigisarutsigu suli sivisunerus­saaq. Akerlianil­li kajumis­saar­tarutsigu ersersis­savar­put asal­lutigu. – Tuss 141:5; Uss 27:17.

6. Ilin­niar­titat­ta isumaa paasiumal­lugu sooq apeq­quteqar­tariaqar­pugut?

⁶ Sam­misas­sin­nut tun­ngatil­lugu ilin­niar­titavit isumaa eq­qarsaataalu paasiumal­lugit apeq­quteqar­tar­nis­sat pingaaruteqar­poq. Taamaalior­taruit ilin­niar­titavit sam­misarsi paasisimaneraa up­perineraalu paasis­savat. Aam­ma akueriuminaatsitaanik eq­qar­tuisar­nis­saq ajor­nan­ngin­nerulis­saaq. Apeq­qutit atuak­kami Naassaanngitsumik pilluarsinnaavutit!-miit­tut atorluarsin­naavatit. As­sersuutigalugu apeq­qut una ilin­niagas­saq 04-miip­poq: “Il­lit Guutip atia atoraangak­ku Jehova qanoq misigisarsoraajuk?” Apeq­qut una ilin­niagas­saq 09-miip­poq: “Il­lit suut qin­nutigerusup­pigit?” Ilin­niar­titavit apeq­qutit taak­ku aal­laq­qaam­mut akiuminaatsis­sin­naavai. Al­las­simaf­fiil­li as­silis­sal­lu atuak­kamiit­tut atorlugit eq­qarsalersis­sin­naavat.

7. Al­lat misigisimasaat qanoq atorluarsin­naavagut?

⁷ Ilin­niar­titavit qanoq ilior­tariaqar­nini paasip­pagu al­lat misigisimasaat iluaqutigalugit taamaalior­nis­saanut kajumis­saarsin­naavat. As­sersuutigalugu ilaatiguin­naq ataatsimiigiar­tar­pat video Jehova tog sig af mig ilin­niagas­saq 14-imi “Nam­mineq misis­sugas­satit”-miit­toq takutis­sin­naavat. Misigisalik­kersaarutit taamaat­tut ilin­niagas­sar­pas­suar­ni “Itisiliineq”-mi imaluun­niit “Nam­mineq misis­sugas­satit”-ni in­nersuus­sutigineqar­put. * Ilin­niar­tital­li al­lanut sanil­liuteqinagu ima oqarlutit: “Taan­na sapin­ngip­pat aam­ma il­lit saper­navian­ngilatit.” Ilin­niar­titat nam­mineq taamatut isum­merumaar­poq. Il­lil­li erseq­qis­sarsin­naavat videumi misigisalik­kersaar­tup Biibilimi ilik­kak­kani malin­niarlugit suut iluaqutigisimanerai. Im­maqa al­las­simaf­fik pingaarutilik iliuuserisimasaaluun­niit aalajangersimasoq maluginiaq­qusin­naavat. Ajor­nan­ngik­kaangat Jehovap ikiuisimanera erseq­qis­sar­taruk.

8. Ilin­niar­titar­put Jehovamik asan­niler­nis­saanut qanoq ikiorsin­naavar­put?

⁸ Ilinniartitat Jehovamik asan­nilernis­saanut ikioruk. Qanoq taamaaliorsin­naavit? Jehovap pis­susiinik eq­qar­tuinis­samut periarfis­sarsior­tar­nik­kut. Ilin­niar­titat paasitiguk Jehova Guutiusoq pil­luar­toq asan­nitsiminil­lu tapersersuisoq. (1 Tim 1:11; Hebr 11:6) Erseq­qis­saruk ilik­kak­kaminik maleruaanini iluaqutigis­sagaa, taman­nalu Jehovap asan­nin­neranut ersiutaasoq. (Es 48:17, 18) Ilin­niar­titat Jehovamik asan­nin­nerujar­tor­til­luni pisariaqar­tumik al­lan­nguinis­saminut kajumis­suseqar­nerulis­saaq. – 1 Joh 5:3.

9. Biibilimik ilin­niar­tup imermut morsutsin­neqarumal­luni pil­liuteqar­nis­saminut Markusi 10:29, 30-lu qanoq iluaqutigisin­naavai?

⁹ Biibilimik ilin­niar­titat imermut morsutsin­neqas­saguni pil­liuteqar­tariaqar­poq. Angut pisooq  eq­qaaneqareersoq as­sigalugu pigisat tungaatigut pil­liuteqar­tariaqarsin­naavoq. Aam­ma Biibilimut naleq­qutin­ngitsumik sulif­feqaruni al­lamik sulif­fis­sarsior­tariaqas­saaq. Ikin­ngutinilu Jehovamik asan­nin­ngitsut ikin­ngutigiun­naar­tariaqarsin­naavai. Aam­ma imaas­sin­naavoq ilaqut­taminit Jehovap Nalunaajaasuinik uumigin­nit­tunit alar­neqar­toq. Jiisusip nalun­ngilaa inuit ilaasa taamatut pil­liuteqar­nis­sar­tik saper­nar­tis­sin­naagaat. Neriorsuivorli im­minik malin­nit­tut pakatsinavian­ngitsut anersaak­kut ilaqut­tanik asan­nit­tunik Jehovamit pil­luaq­quneqarumaaramik. (Markusi 10:29, 30 atuakkit). Il­lit Biibilimik ilin­niar­titat taamatut pil­luaq­quneqaq­qul­lugu qanoq ikiorsin­naaviuk?

10. Manuelip misigisaanit suna paasiviuk?

¹⁰ Ilin­niartitat ikin­ngutigileruk. Ilin­niar­titavit soqutigineqar­tutut misigitin­nis­saa pingaaruteqar­poq. Manuelip Mexicomeersup suli Biibilimik ilin­niar­tin­neqar­taral­larami misigisaa maluginiaruk. Ima oqar­poq: “Atuaq­qis­saar­nit­ta aal­lar­tin­ngin­nerani ilin­niar­titsisuma aperisar­paanga qanoq in­nersunga. Taman­na toq­qis­sisimalis­sutigisarak­ku suul­luun­niit pil­lugit oqaloqatigisin­naasar­para. Misigisar­punga ilumut soqutigigaanga.”

11. Ilin­niar­titavit ilin­nik ilagisaqar­tar­nini qanoq iluaqutigisin­naavaa?

¹¹ Jiisusip malin­nitsimi ilaginis­saat pif­fis­saqarfigisar­paa. (Joh 3:22) Aam­ma il­lit ilin­niar­titat anersaak­kut siumukarluar­toq ilagisarsin­naavat. Ajor­nan­ngip­pat ilis­sin­nut kaf­fisoriar­toq­qul­luguluun­niit neriar­toq­qusin­naavat, imaluun­niit qaam­mam­mut aal­lakaatitas­siat ilaan­nik isigin­naariar­toq­qul­lugu. Taman­na ilin­niar­titavit qujamasuutigis­sajun­narsivaa, ingam­mik nal­liut­torsior­nerit pis­sutigalugit kiserlior­tutut misigileriaan­naanerata nalaani qaaq­qusimaguk­ku. Angut Ugandami najugalik, Kazibwe, ima oqar­poq: “Biibilimik ilin­niar­titsisuma ilagisar­nerani Jehova pil­lugu ilik­kagaqangaar­punga. Takusin­naaler­para Jehovap in­nut­tani qanoq isumas­sor­tigigai,  taak­kulu qanoq nuan­naar­tigisut. Uangat­taaq taman­na misigerusup­para.”

12. Sooq oqaluus­sisar­tut as­sigiin­ngitsut Biibilimik atuaq­qis­saaqatigiin­nermut ilaserisas­savagut?

¹² Oqaluus­sisartut assigiin­ngitsut Biibilimik atuaq­qis­saaqatigiin­nermut ilaserisakkit. Im­maqa misigivugut kisimiil­luta oqaluus­sisar­torluun­niit aalajangersimasoq ilagalugu atuaq­qis­saaqateqar­tarut­ta ajor­nan­ngin­ner­paas­sasoq. Taman­na ilumooriaan­naavoq, Biibilimil­li ilin­niar­titat­ta oqaluus­sisar­tunik as­sigiin­ngitsunik ilaqar­tar­ner­put iluaqutigis­savaa. Dimitrij Moldovami najugalik ima oqar­poq: “Atuaq­qis­saaqatigineqar­taral­larama maluginiar­para oqaluus­sisar­tut as­sigiin­ngitsut atuaq­qis­saar­nermi peqataasut tamarmik im­mik­kut nas­suiaariaaseqar­tut. Taman­na pis­sutigalugu atuak­kama qanoq maleruar­nis­saat paasil­luar­neruler­para. Aam­ma qatan­nguter­pas­suit naapereer­nikuugak­kit ataatsimiigiaq­qaarama it­toor­pal­laan­ngilanga.”

13. Sooq ilin­niar­titagut ataatsimiigiar­taler­nis­saan­nut ikior­tariaqar­pagut?

¹³ Ilin­niartitat ataatsimiigiartalernis­saanut ikioruk. Sooq? Taman­na pal­lorfigin­nin­nitsin­nut ilaam­mat, Jehovam­mi kif­fani taamaalior­taq­quai. (Hebr 10:24, 25) Tamatuma saniatigut up­peqatigut anersaak­kut ilaqutaraagut. Ataatsimeeqatigigaangatsigit mamar­torsuar­nik nereqatigisar­pagul­lusooq. Biibilimik ilin­niar­titat ataatsimiigiar­taler­nis­saanut ikioruk­ku imermut morsutsin­neqar­nis­samut piumasaqaatit ilaat pingaarutilerujus­suaq eq­qor­tis­savaa. Ataatsimiigiar­taler­nis­sanili saper­nar­tis­sin­naavaa. Taamaap­pat atuagaq Naassaanngitsumik pilluarsinnaavutit! qanoq iluaqutaasin­naava?

14. Biibilimik ilin­niar­titagut ataatsimiigiar­taler­nis­saan­nut qanoq kajumis­saarsin­naavagut?

¹⁴ Ilin­niar­titat ataatsimiigiar­taler­nis­saanut kajumis­saar­niarlugu atuak­kami Naassaanngitsumik pilluarsinnaavutit!-mi ilin­niagas­saq 10 atorsin­naavat. Atuak­kap tamatuma suliarineqar­nerani oqaluus­sisar­tut misilit­tagaqarluar­tut ilaat aperineqar­put ilin­niagas­saq taan­na ilin­niar­titamin­nut misiliutigisin­naaneraat. Taman­na qanoq kinguneqar­pa? Biibilimik ilin­niar­tut amerlasuut ataatsimiigiar­taler­put. Soorunalimi Biibilimik ilin­niar­titagut sapin­ngisamik piaar­tumik ataatsimiigiaqatiseris­savagut akulikitsumil­lu taamaalior­tarluta. Ilin­niagas­sap 10-p sam­miler­nis­saanut utaq­qisariaqan­ngilagut. Biibilimik ilin­niar­tut tamarmik as­sigiin­ngitsunik unam­miniagas­saqar­put. Taamaat­tumik ilin­niar­titavit pisariaqar­titai eq­qumaf­figisak­kit qanorlu ikiorsin­naanerlugu eq­qarsaatigisarlugu. Ingerlaan­naq ataatsimiigiar­talin­ngip­pat nikal­loqinak, utaq­qisin­naas­suseqarlutil­li qaaq­qujuar­taruk.

15. Ilin­niar­titat­ta suut an­nilaangagisin­naavai?

¹⁵ Il­lit Jehovamik Nalunaajaasun­ngor­nis­sat an­nilaangaginikuuiuk? Im­maqa misiginikuuvutit il­lumiit il­lumut oqaluus­sisaler­naviar­nak. Im­maqaluun­niit ilaqut­tan­nit ikin­ngutin­nil­lu akerlilersor­neqar­nis­sat an­nilaangagisimavat. Taamaap­pat ilin­niar­titavit misigis­susii paasil­luarsin­naavatit. Jiisusip nalun­ngilaa inuit ilaat taamatut misigisarumaar­tut. Taamaat­torli malin­nitsini kajumis­saar­pai Jehovamut kif­fan­ngor­nis­samin­nut taman­na aporfigeq­qunagu. (Matt 10:16, 17, 27, 28) Jiisusip malin­nitsini an­nilaangan­ngin­nis­saan­nut qanoq ikior­pai? Uagul­lu qanoq ilaarsin­naavar­put?

16. Ilin­niar­titagut oqaluus­sinis­samut qanoq sungiusarsin­naavagut?

¹⁶ Ilinniartitat oqaluus­sisarnis­saanut sungiusaruk. Jiisusip ajoqersugai oqaluus­siar­tor­tin­neqaramik an­nilaangasimas­sap­put. Jiisusil­li  ikiorlugit oqalut­tuup­pai sumi sunalu pil­lugu oqaluus­sis­sasut. (Matt 10:5-7) Jiisusi qanoq ilaarsin­naaviuk? Ilin­niar­titat oqaluus­sinis­saminut periarfis­sarsior­tar­nis­saanut ikioruk. As­sersuutigalugu aperisin­naavat nalun­ngisami arlaata al­las­simaf­fik aalajangersimasoq iluaqutigisin­naas­saneraa. Taava takutiguk al­las­simaf­fik taan­na paasiuminar­tumik qanoq nas­suiar­neqarsin­naasoq. Naleq­quk­kaangal­lu atuak­kami Naassaanngitsumik pilluarsinnaavutit!-mi im­mik­koor­tut “Oqar­toqar­tar­poq” aam­ma “Aperisoqar­tar­poq” ator­tak­kit. Taamaalior­nin­ni ilin­niar­titavit Biibili atorlugu paasiuminar­tumik periaaseril­lunilu akis­suteqar­tar­nis­saanut sungiusar­nis­saa pingaar­ner­paatiguk.

17. Ilin­niar­titar­put Jehovamik tatigin­niler­nis­saanut ikiorumal­lugu Mat­thæusi 10:19, 20, 29-31 qanoq atorsin­naavagut?

¹⁷ Ilinniartitat Jehovamik tatigin­nilernis­saanut ikioruk. Jiisusi ajoqersuk­kaminut oqar­poq taak­ku Jehovamit asaneqaramik ikior­neqarumaar­tut. (Matthæusi 10:19, 20, 29-31 atuakkit). Aam­ma il­lit ilin­niar­titat Jehovamit ikior­neqar­tarumaar­neranik eq­qaasit­taruk. Anguniagas­sai pil­lugit qinoqatigisar­neratigut Jehovamik tatigin­nilersis­sin­naavat. Franciszek Polenimi najugalik ima oqar­poq: “Biibilimik ilin­niar­titsisuma qin­nutimini anguniak­kak­ka eq­qaakulasar­pai. Paasigak­ku Jehovap ilin­niar­titsisuma qin­nutai akisarai uangat­taaq ingerlaan­naq qinusaler­punga. Ataatsimiin­ner­ni ataatsimeersuar­ner­nilu peqataajumal­lunga sulif­fit­taan­niit freer­nis­samut aperisariaqaraangama misigisar­punga Jehovap ikior­taraanga.”

18. Jehovap kif­fami ilin­niar­titsisar­nerat pil­lugu qanoq misigiva?

¹⁸ Jehovap Biibilimik ilin­niar­titagut soqutigingaar­pai. Kif­fami ilungersorlutik inun­nik ilin­niar­titsinerat maluginiar­tar­paa, ilaatigul­lu taman­na pil­lugu asangaar­pai. (Es 52:7) Il­lit maan­nak­kor­piaq Biibilimik ilin­niar­titaqan­ngik­kaluarlutit oqaluus­sisar­tut al­lat Biibilimik ilin­niar­titsineran­ni ikior­nerisigut ajoqersugan­ngor­titsior­toqataasin­naavutit.