អត្ថបទសិក្សា ២២
ចូរជួយសិស្សគម្ពីររបស់អ្នកឲ្យទៅជាអ្នកកាន់តាមដែលទទួលការជ្រមុជទឹក
«អ្នករាល់គ្នាម្នាក់ៗត្រូវទទួលការជ្រមុជទឹក»។—សកម្ម. ២:៣៨
ចម្រៀងលេខ៧២ ចូរផ្សាយក្ដីពិតអំពីរាជ្យព្រះ
សេចក្ដីសង្ខេប *
១. តើអ្នកកាន់តាមលោកយេស៊ូបានប្រាប់បណ្ដាជនមួយក្រុមធំឲ្យធ្វើអ្វី?
បណ្ដាជនមួយក្រុមធំបានធ្វើដំណើរទៅក្រុងយេរូសាឡិម។ ពួកគេមកពីប្រទេសផ្សេងៗនិងនិយាយភាសាខុសៗគ្នា។ នៅថ្ងៃនោះ មានអ្វីដ៏អស្ចារ្យមួយបានកើតឡើង។ ជនជាតិយូដាខ្លះស្រាប់តែអាចនិយាយភាសារបស់បុគ្គលដែលមកពីប្រទេសផ្សេងៗទាំងនោះ។ នេះបានធ្វើឲ្យបណ្ដាជនភ្ញាក់ផ្អើលយ៉ាងខ្លាំង! ប៉ុន្តែ អ្វីដែលអស្ចារ្យជាងនោះទៅទៀតគឺ អ្វីដែលជនជាតិយូដាទាំងនោះនិយាយទៅកាន់ពួកគេនិងពាក្យរបស់សាវ័កពេត្រុស។ បណ្ដាជនមួយក្រុមនោះបានរៀនថា ពួកគេអាចទទួលសេចក្ដីសង្គ្រោះដោយបង្ហាញជំនឿលើលោកយេស៊ូគ្រិស្ត។ ដំណឹងនោះមានឥទ្ធិពលយ៉ាងខ្លាំងទៅលើពួកគេ រហូតដល់ពួកគេសួរថា៖ «តើយើងគួរធ្វើយ៉ាងណា?»។ ពេត្រុសបានឆ្លើយថា៖ «អ្នករាល់គ្នាម្នាក់ៗត្រូវទទួលការជ្រមុជទឹក»។—សកម្ម. ២:៣៧, ៣៨
បងប្រុសម្នាក់នាំប្រពន្ធគាត់មកជាមួយ ពេលគាត់បង្រៀនគម្ពីរដល់បុរសវ័យក្មេងម្នាក់ ដោយប្រើសៀវភៅសប្បាយនឹងជីវិតដែលគ្មានទីបញ្ចប់! (សូមមើលវគ្គ២)
២. តើយើងនឹងពិចារណាអ្វីក្នុងអត្ថបទនេះ? (សូមមើលរូបភាពនៅក្រប)
២ អ្វីដែលបានកើតឡើងនៅបន្ទាប់មកគឺអស្ចារ្យណាស់។ មនុស្សប្រហែលជា៣.០០០នាក់ បានទទួលការជ្រមុជទឹកនៅថ្ងៃនោះ ហើយក្លាយទៅជាអ្នកកាន់តាមគ្រិស្ត។ នេះគឺជាទីចាប់ផ្ដើមនៃកិច្ចការដ៏ធំដែលលោកយេស៊ូបានបង្គាប់អ្នកកាន់តាមលោកឲ្យធ្វើ ពោលគឺការជួយមនុស្សឲ្យក្លាយទៅជាអ្នកកាន់តាមលោក ហើយកិច្ចការនេះបានបន្តរហូតដល់សព្វថ្ងៃនេះ។ ប៉ុន្តែនៅសម័យយើង យើងមិនអាចជួយបុគ្គលណាម្នាក់ឲ្យទទួលការជ្រមុជទឹកក្នុងរយៈពេលតែប៉ុន្មានម៉ោងប៉ុណ្ណោះបានទេ។ សិស្សគម្ពីរប្រហែលជាត្រូវការពេលប៉ុន្មានខែ ឬថែមទាំងមួយឆ្នាំឬច្រើនជាង ដើម្បីសម្រេចគោលដៅនោះ។ ការជួយមនុស្សឲ្យក្លាយទៅជាអ្នកកាន់តាមលោកគឺត្រូវការការខំប្រឹងព្យាយាម ដូចដែលអ្នកដឹងបើអ្នកកំពុងបង្រៀនគម្ពីរដល់អ្នកណាម្នាក់។ ក្នុងអត្ថបទនេះ យើងនឹងពិចារណាអំពីអ្វីដែលអ្នកអាចធ្វើ ដើម្បីជួយសិស្សគម្ពីររបស់អ្នកឲ្យទៅជាអ្នកកាន់តាមដែលទទួលការជ្រមុជទឹក។
ចូរជួយសិស្សគម្ពីរឲ្យធ្វើតាមអ្វីដែលគាត់កំពុងរៀន
៣. ដូចបានបង្ហាញនៅម៉ាថាយ ២៨:១៩, ២០ តើសិស្សគម្ពីរត្រូវធ្វើយ៉ាងណា ដើម្បីរីកចម្រើនរហូតដល់ទទួលការជ្រមុជទឹក?
៣ មុនទទួលការជ្រមុជទឹក សិស្សគម្ពីរត្រូវធ្វើតាមអ្វីដែលគម្ពីរចែង។ (សូមអាន ម៉ាថាយ ២៨:១៩, ២០) ពេលសិស្សធ្វើតាមអ្វីដែលគាត់រៀន គាត់ប្រៀបដូចជា«មនុស្សចេះពិចារណា»ក្នុងឧទាហរណ៍របស់លោកយេស៊ូ ដែលជីកដីយ៉ាងជ្រៅដើម្បីសង់ផ្ទះនៅលើផ្ទាំងថ្ម។ (ម៉ាថ. ៧:២៤, ២៥; លូក. ៦:៤៧, ៤៨) តើយើងអាចជួយសិស្សគម្ពីរឲ្យធ្វើតាមអ្វីដែលគាត់រៀនយ៉ាងដូចម្ដេច? សូមយើងគិតអំពីយោបល់បី។
៤. តើយើងអាចជួយសិស្សឲ្យបន្តរីកចម្រើនរហូតដល់ទទួលការជ្រមុជទឹកតាមរបៀបណា? (សូមមើលផងដែរនូវប្រអប់ដែលមានចំណងជើងថា « ចូរជួយសិស្សគម្ពីរឲ្យកំណត់និងសម្រេចគោលដៅ»)
៤ ចូរជួយសិស្សឲ្យកំណត់គោលដៅ។ ហេតុអ្វីអ្នកគួរធ្វើដូច្នេះ? សូមគិតអំពីឧទាហរណ៍មួយ។ បើអ្នកត្រូវធ្វើដំណើរដ៏ឆ្ងាយ អ្នកប្រហែលជាចង់ឈប់នៅកន្លែងស្អាតៗតាមផ្លូវ។ យ៉ាងនេះ អ្នកនឹងមិនមានអារម្មណ៍ថា ទីដៅរបស់អ្នកគឺឆ្ងាយពេកឡើយ។ ស្រដៀងគ្នាដែរ ពេលសិស្សគម្ពីរកំណត់និងសម្រេចគោលដៅរយៈពេលខ្លី គាត់ទំនងជានឹងទទួលស្គាល់ថា គាត់ក៏អាចសម្រេចគោលដៅទទួលការជ្រមុជទឹកបានដែរ។ នៅក្នុងសៀវភៅសប្បាយនឹងជីវិតដែលគ្មានទីបញ្ចប់! សូមប្រើផ្នែក«គោលដៅ»ដើម្បីជួយសិស្សឲ្យរីកចម្រើន។ នៅចុងបញ្ចប់នៃមេរៀននីមួយៗ សូមពិចារណាអំពីរបៀបដែលគោលដៅនោះជាប់ទាក់ទងនឹងអ្វីដែលសិស្សទើបតែរៀន។ បើអ្នកចង់ឲ្យសិស្សសម្រេចគោលដៅផ្សេង សូមសរសេរគោលដៅនោះនៅកន្លែង«គោលដៅផ្សេងទៀត»។ សូមប្រើផ្នែកនេះជារឿយៗដើម្បីសើរើឡើងវិញជាមួយសិស្សអំពីគោលដៅរយៈពេលខ្លីនិងគោលដៅរយៈពេលវែងរបស់គាត់។
៥. ដូចបានត្រូវកត់ទុកនៅម៉ាកុស ១០:១៧-២២ តើលោកយេស៊ូបានប្រាប់បុរសអ្នកមានឲ្យធ្វើអ្វី ហើយហេតុអ្វី?
៥ ចូរជួយសិស្សឲ្យធ្វើការផ្លាស់ប្ដូរផ្សេងៗក្នុងជីវិតរបស់គាត់។ (សូមអាន ម៉ាកុស ១០:១៧-២២) លោកយេស៊ូដឹងថា អ្នកមានពិបាកលក់របស់របរទាំងអស់។ (ម៉ាក. ១០:២៣) ប៉ុន្តែ លោកយេស៊ូបានប្រាប់បុរសម្នាក់ឲ្យធ្វើការផ្លាស់ប្ដូរដ៏ធំនេះក្នុងជីវិតរបស់គាត់។ ហេតុអ្វី? ពីព្រោះលោកយេស៊ូស្រឡាញ់គាត់។ ជួនកាល យើងប្រហែលជាស្ទាក់ស្ទើរលើកទឹកចិត្តសិស្សឲ្យធ្វើតាមអ្វីដែលគាត់កំពុងរៀន ដោយសារយើងគិតថាគាត់មិនទាន់មានគុណសម្បត្តិគ្រប់គ្រាន់ដើម្បីធ្វើការផ្លាស់ប្ដូរដែលចាំបាច់។ ការលះចោលទម្លាប់ចាស់ៗ និងការពាក់បុគ្គលិកលក្ខណៈថ្មីគឺត្រូវការពេលវេលា។ (កូឡ. ៣:៩, ១០) ប៉ុន្តែ ពេលអ្នកកាន់តែឆាប់និយាយជាមួយសិស្សអំពីរឿងនេះ នោះគាត់អាចចាប់ផ្ដើមធ្វើការផ្លាស់ប្ដូរកាន់តែឆាប់។ ការនិយាយជាមួយគាត់អំពីរឿងនេះ បង្ហាញថាអ្នកយកចិត្តទុកដាក់ចំពោះគាត់។—ទំនុក. ១៤១:៥; សុភ. ២៧:១៧
៦. ហេតុអ្វីយើងគួរសួរសិស្សអំពីទស្សនៈរបស់គាត់?
៦ គឺសំខាន់ណាស់ដែលយើងសួរសិស្សគម្ពីរអំពីទស្សនៈរបស់គាត់ចំពោះប្រធានបទដែលគាត់កំពុងរៀន។ ការសួរសំណួរបែបនេះនឹងជួយអ្នកឲ្យដឹងថាសិស្សជឿនិងយល់យ៉ាងណា។ បើអ្នកធ្វើដូច្នេះជារឿយៗ អ្នកនឹងឃើញថានៅពេលក្រោយមកគឺស្រួលជាងឲ្យអ្នកនិយាយជាមួយសិស្សអំពីប្រធានបទ ដែលគាត់មិនងាយទទួលយក។ សៀវភៅសប្បាយនឹងជីវិតដែលគ្មានទីបញ្ចប់! មានសំណួរជាច្រើនដែលសួរអំពីទស្សនៈរបស់សិស្ស។ ជាឧទាហរណ៍ មេរៀនទី០៤សួរថា៖ «ពេលអ្នកប្រើឈ្មោះព្រះយេហូវ៉ា តើអ្នកគិតថាលោកមានអារម្មណ៍យ៉ាងណា?»។ មេរៀនទី០៩សួរថា៖ «តើអ្នកចង់អធិដ្ឋានអំពីរឿងអ្វីខ្លះ?»។ ដំបូង សិស្សគម្ពីរប្រហែលជាត្រូវការពេលគិត មុនគាត់ឆ្លើយសំណួរបែបនេះ។ អ្នកអាចជួយគាត់ដោយបង្រៀនគាត់ឲ្យវែកញែកអំពីបទគម្ពីរដែលជាប់ទាក់ទងនឹងរឿងនោះ ព្រមទាំងអំពីរូបភាពក្នុងសៀវភៅនេះដែរ។
៧. តើយើងអាចប្រើបទពិសោធន៍ជីវិតពិតដោយមានប្រសិទ្ធភាពតាមរបៀបណា?
៧ កាលដែលសិស្សដឹងថាគាត់ត្រូវធ្វើអ្វី សូមប្រើបទពិសោធន៍ជីវិតពិតដើម្បីលើកទឹកចិត្តគាត់ឲ្យធ្វើអ្វីនោះ។ ជាឧទាហរណ៍ បើសិស្សគម្ពីរពិបាកមកកិច្ចប្រជុំជាទៀងទាត់ អ្នកអាចបង្ហាញគាត់វីដេអូដែលមានចំណងជើងថា ព្រះយេហូវ៉ាយកចិត្តទុកដាក់ចំពោះខ្ញុំ នៅមេរៀនទី១៤ក្រោមផ្នែក«ស្វែងយល់ថែមទៀត»។ អ្នកនឹងឃើញបទពិសោធន៍ផ្សេងៗនៅមេរៀនជាច្រើនក្នុងសៀវភៅសប្បាយនឹងជីវិតដែលគ្មានទីបញ្ចប់! ក្រោមផ្នែក«បង្កើនចំណេះ» ឬ«ស្វែងយល់ថែមទៀត»។ * សូមប្រុងប្រយ័ត្នមិនប្រៀបធៀបសិស្សរបស់អ្នកទៅនឹងបុគ្គលឯទៀត ដោយនិយាយថា៖ «បើគាត់អាចធ្វើបាន បងក៏អាចធ្វើបានដែរ»។ ផ្ទុយទៅវិញ សូមទុកឲ្យសិស្សទាញមេរៀននេះដោយខ្លួនឯង។ សូមលើកចំណុចសំខាន់ដែលបានជួយបុគ្គលក្នុងវីដេអូនោះឲ្យធ្វើតាមសេចក្ដីបង្រៀនពីគម្ពីរ។ ប្រហែលជាអ្នកអាចលើកបទគម្ពីរដ៏សំខាន់មួយ ឬអ្វីមួយដែលអ្នកនោះបានធ្វើដែលមានប្រយោជន៍។ ពេលណាដែលអាចធ្វើបាន សូមលើកបញ្ជាក់អំពីរបៀបដែលព្រះយេហូវ៉ាបានជួយអ្នកនោះ។
៨. តើយើងអាចជួយសិស្សឲ្យស្រឡាញ់ព្រះយេហូវ៉ាយ៉ាងដូចម្ដេច?
៨ ចូរជួយសិស្សឲ្យស្រឡាញ់ព្រះយេហូវ៉ា។ តើយើងអាចធ្វើដូច្នេះតាមរបៀបណា? សូមស្វែងរកឱកាសដើម្បីលើកឡើងអំពីគុណសម្បត្តិរបស់ព្រះយេហូវ៉ា។ សូមជួយសិស្សឲ្យយល់ថា ព្រះយេហូវ៉ាជាព្រះដ៏សប្បាយដែលគាំទ្រពួកអ្នកដែលស្រឡាញ់លោក។ (១ធី. ១:១១; ហេ. ១១:៦) សូមជួយសិស្សឲ្យដឹងថា គាត់នឹងទទួលប្រយោជន៍បើគាត់ធ្វើតាមព័ត៌មានដែលគាត់កំពុងរៀន ហើយពន្យល់គាត់ថាប្រយោជន៍ទាំងនោះបង្ហាញថា ព្រះយេហូវ៉ាស្រឡាញ់គាត់។ (អេ. ៤៨:១៧, ១៨) កាលដែលសិស្សមានសេចក្ដីស្រឡាញ់កាន់តែជ្រាលជ្រៅចំពោះព្រះយេហូវ៉ា នោះគាត់នឹងកាន់តែចង់ធ្វើការផ្លាស់ប្ដូរណាដែលចាំបាច់។—១យ៉ូន. ៥:៣
ចូរណែនាំសិស្សឲ្យស្គាល់បងប្អូនរួមជំនឿ
៩. ដូចម៉ាកុស ១០:២៩, ៣០ចែង តើអ្វីអាចជួយសិស្សគម្ពីរឲ្យធ្វើការលះបង់ដើម្បីទៅជាអ្នកកាន់តាមដែលទទួលការជ្រមុជទឹក?
៩ ដើម្បីរីកចម្រើនរហូតដល់ទទួលការជ្រមុជទឹក សិស្សគម្ពីរត្រូវធ្វើការលះបង់ផ្សេងៗ។ ដូចបុរសអ្នកមានដែលបានត្រូវរៀបរាប់នៅខាងលើ សិស្សគម្ពីរខ្លះប្រហែលជាត្រូវលះបង់វត្ថុទ្រព្យ។ បើការងាររបស់ពួកគេខុសពីគោលការណ៍គម្ពីរ ពួកគេប្រហែលជាត្រូវរកការងារថ្មី។ សិស្សគម្ពីរជាច្រើនប្រហែលជាត្រូវឈប់ធ្វើជាមិត្តរបស់បុគ្គលដែលមិនស្រឡាញ់ព្រះយេហូវ៉ា។ ម្យ៉ាងទៀត ក្រុមគ្រួសាររបស់អ្នកខ្លះ ប្រហែលជាបោះបង់ចោលពួកគេដោយសារមិនចូលចិត្តសាក្សីព្រះយេហូវ៉ា។ លោកយេស៊ូបានមានប្រសាសន៍ថា អ្នកខ្លះប្រហែលជាពិបាកធ្វើការលះបង់បែបនេះ។ ប៉ុន្តែលោកសន្យាថា ពួកអ្នកដែលកាន់តាមលោកនឹងមិនខកចិត្តឡើយ។ ព្រះយេហូវ៉ានឹងផ្ដល់ពរឲ្យពួកគេមានក្រុមគ្រួសាររួមជំនឿមួយដែលស្រឡាញ់ពួកគេ។ (សូមអាន ម៉ាកុស ១០:២៩, ៣០) តើអ្នកអាចជួយសិស្សគម្ពីររបស់អ្នកឲ្យទទួលប្រយោជន៍ពីអំណោយដ៏វិសេសវិសាលនេះយ៉ាងដូចម្ដេច?
១០. តើអ្នករៀនអ្វីពីបទពិសោធន៍របស់បងមេនវេល?
១០ សូមបង្កើតមិត្តភាពជាមួយសិស្ស។ គឺសំខាន់ដែលអ្នកបង្ហាញសិស្សថា អ្នកយកចិត្តទុកដាក់ចំពោះគាត់។ ហេតុអ្វី? សូមកត់សម្គាល់ពាក្យសម្ដីរបស់បងប្រុសមេនវេលដែលរស់នៅប្រទេសម៉ិកស៊ិក។ គាត់នឹកចាំអំពីពេលដែលគាត់នៅជាសិស្សគម្ពីរថា៖ «រាល់ដងមុនរៀន អ្នកបង្រៀនសួរសុខទុក្ខខ្ញុំ។ គាត់បានជួយខ្ញុំឲ្យមានអារម្មណ៍ស្រួល ហើយឲ្យខ្ញុំនិយាយអំពីរឿងផ្សេងៗ។ ខ្ញុំយល់ថាគាត់ពិតជាយកចិត្តទុកដាក់ចំពោះខ្ញុំមែន»។
១១. តើសិស្សគម្ពីររបស់យើងអាចទទួលប្រយោជន៍យ៉ាងណាពីការសេពគប់ជាមួយយើង?
១១ សូមចំណាយពេលជាមួយសិស្សដូចដែលលោកយេស៊ូធ្វើជាមួយអ្នកកាន់តាមលោក។ (យ៉ូន. ៣:២២) បើសិស្សគម្ពីររបស់អ្នកកំពុងរីកចម្រើន អ្នកប្រហែលជាអាចអញ្ជើញគាត់ឲ្យមកផ្ទះរបស់អ្នកដើម្បីផឹកកាហ្វេ ឬបរិភោគអាហារ ឬក៏មើលកម្មវិធីJWទូរទស្សន៍ប្រចាំខែ។ គាត់ប្រហែលជាសប្បាយចិត្តទទួលការអញ្ជើញបែបនេះ ជាពិសេសនៅរដូវបុណ្យទានដែលប្រហែលជាពេលគាត់អផ្សុក។ បងប្រុសខាស៊ីបវេដែលរស់នៅប្រទេសអ៊ូហ្គង់ដានិយាយថា៖ «ខ្ញុំគិតថា ការសេពគប់អ្នកបង្រៀនខ្ញុំជួយខ្ញុំរៀនច្រើនអំពីព្រះយេហូវ៉ា ស្មើនឹងអ្វីដែលខ្ញុំរៀនអំពីលោកក្នុងអំឡុងពេលរៀនគម្ពីរ។ ខ្ញុំឃើញថាព្រះយេហូវ៉ាយកចិត្តទុកដាក់យ៉ាងខ្លាំងចំពោះរាស្ត្រលោក ហើយថាពួកគេមានសុភមង្គល។ នេះជាអ្វីដែលខ្ញុំចង់បានក្នុងជីវិតខ្ញុំដែរ»។
ពេលអ្នកអញ្ជើញអ្នកផ្សព្វផ្សាយផ្សេងៗឲ្យចូលរួមការសិក្សាគម្ពីរជាមួយអ្នក សិស្សគម្ពីរនឹងកាន់តែចង់ទៅកិច្ចប្រជុំ (សូមមើលវគ្គ១២) *
១២. ហេតុអ្វីយើងគួរនាំអ្នកផ្សាយផ្សេងៗឲ្យទៅជាមួយពេលបង្រៀនគម្ពីរ?
១២ សូមអញ្ជើញអ្នកផ្សាយផ្សេងៗឲ្យមកជាមួយយើងពេលបង្រៀនគម្ពីរ។ ជួនកាល យើងប្រហែលជាមានអារម្មណ៍ថាគឺស្រួលជាងបើយើងទៅម្នាក់ឯង ឬនាំអ្នកផ្សាយដដែលៗទៅជាមួយយើង។ ទោះជានេះប្រហែលជាស្រួលមែនក្ដី សិស្សគម្ពីររបស់យើងទំនងជានឹងទទួលប្រយោជន៍ បើម្ដងម្កាលយើងនាំអ្នកផ្សាយផ្សេងៗទៅជាមួយ។ បងប្រុសឌីមីទ្រីដែលរស់នៅប្រទេសម៉ុលដាវីនិយាយថា៖ «អ្នកផ្សាយម្នាក់ៗដែលមកជាមួយអ្នកបង្រៀនខ្ញុំ មានរបៀបពន្យល់តាមរបៀបរៀងៗខ្លួន។ នេះជួយខ្ញុំឲ្យឃើញរបៀបថ្មីដែលខ្ញុំអាចធ្វើតាមអ្វីដែលខ្ញុំកំពុងរៀន។ ខ្ញុំក៏មិនសូវអៀន ពេលខ្ញុំចូលរួមកិច្ចប្រជុំជាលើកដំបូង ដោយសារខ្ញុំបានជួបបងប្អូនជាច្រើននាក់រួចហើយ»។
១៣. ហេតុអ្វីយើងត្រូវជួយសិស្សគម្ពីរឲ្យចូលរួមកិច្ចប្រជុំ?
១៣ ចូរជួយសិស្សគម្ពីរឲ្យចូលរួមកិច្ចប្រជុំក្រុមជំនុំ។ ហេតុអ្វី? ពីព្រោះព្រះយេហូវ៉ាបង្គាប់ពួកអ្នកគោរពប្រណិប័តន៍លោកឲ្យប្រជុំគ្នា នេះជាផ្នែកមួយនៃការគោរពប្រណិប័តន៍របស់យើង។ (ហេ. ១០:២៤, ២៥) ម្យ៉ាងទៀត បងប្អូនជាក្រុមគ្រួសាររួមជំនឿរបស់យើង។ ពេលយើងនៅកិច្ចប្រជុំជាមួយពួកគេ គឺហាក់ដូចជាយើងនៅផ្ទះបរិភោគអាហារឈ្ងុយឆ្ងាញ់ជាមួយគ្នា។ ពេលអ្នកជួយសិស្សគម្ពីរឲ្យចូលរួមកិច្ចប្រជុំ អ្នកជួយគាត់ឲ្យធ្វើតាមជំហានដ៏សំខាន់បំផុតមួយដើម្បីឈានទៅដល់ការជ្រមុជទឹក។ ប៉ុន្តែ គាត់ប្រហែលជាពិបាកចាប់ផ្ដើមចូលរួមកិច្ចប្រជុំ។ តើសៀវភៅសប្បាយនឹងជីវិតដែលគ្មានទីបញ្ចប់! អាចជួយសិស្សរបស់អ្នកយ៉ាងដូចម្ដេចឲ្យយកឈ្នះការពិបាកណាក៏ដោយដែលគាត់ជួបប្រទះ?
១៤. តើតាមរបៀបណាយើងអាចជំរុញចិត្តសិស្សគម្ពីររបស់យើងឲ្យចូលរួមកិច្ចប្រជុំ?
១៤ ចូរប្រើមេរៀនទី១០ពីសៀវភៅសប្បាយនឹងជីវិតដែលគ្មានទីបញ្ចប់! ដើម្បីជួយអ្នកឲ្យជំរុញចិត្តសិស្សគម្ពីររបស់អ្នក។ មុនសៀវភៅនេះបានត្រូវរៀបចំឡើងរួចរាល់ អ្នកផ្សាយខ្លះបានត្រូវសុំឲ្យប្រើមេរៀននេះជាមួយសិស្សគម្ពីរ។ ពួកគេនិយាយថានោះទទួលផលបានល្អក្នុងការជួយសិស្សគម្ពីរឲ្យចូលរួមកិច្ចប្រជុំ។ សូមកុំរង់ចាំរហូតដល់មេរៀនទី១០ទើបអញ្ជើញសិស្សគម្ពីរឲ្យចូលរួមកិច្ចប្រជុំឡើយ។ សូមឆាប់អញ្ជើញគាត់ឲ្យចូលរួមកិច្ចប្រជុំរបស់យើង ហើយបន្តអញ្ជើញគាត់ជារឿយៗ។ សិស្សគម្ពីរម្នាក់ៗមានការពិបាកខុសៗគ្នា។ ដូច្នេះ សូមយកចិត្តទុកដាក់ចំពោះសេចក្ដីត្រូវការរបស់សិស្សគម្ពីរ ហើយព្យាយាមជួយគាត់តាមវិធីផ្សេងៗ។ សូមកុំធ្លាក់ទឹកចិត្ត បើគាត់មិនមកកិច្ចប្រជុំភ្លាមៗ។ ចូរមានចិត្តអត់ធ្មត់ តែបន្តព្យាយាម។
ចូរជួយសិស្សឲ្យយកឈ្នះការភ័យខ្លាច
១៥. តើសិស្សគម្ពីររបស់យើងប្រហែលជាមានការភ័យខ្លាចអ្វីខ្លះ?
១៥ តើអ្នកធ្លាប់មានអារម្មណ៍ភ័យខ្លាចបន្តិចបន្តួចពេលគិតអំពីការទៅជាសាក្សីព្រះយេហូវ៉ាឬទេ? ប្រហែលជាអ្នកមានអារម្មណ៍ថា អ្នកមិនអាចផ្សព្វផ្សាយពីផ្ទះមួយទៅផ្ទះមួយបានទេ។ ឬប្រហែលជាអ្នកខ្លាចថាក្រុមគ្រួសារឬមិត្តភក្ដិនឹងប្រឆាំងអ្នក។ បើដូច្នេះ អ្នកអាចយល់អារម្មណ៍របស់សិស្សគម្ពីរ។ លោកយេស៊ូបានមានប្រសាសន៍ថា មនុស្សខ្លះនឹងមានការភ័យខ្លាចបែបនេះ។ ប៉ុន្តែ លោកបានលើកទឹកចិត្តអ្នកកាន់តាមលោកមិនឲ្យការភ័យខ្លាចបញ្ឈប់ពួកគេពីការបម្រើព្រះយេហូវ៉ាឡើយ។ (ម៉ាថ. ១០:១៦, ១៧, ២៧, ២៨) តើលោកយេស៊ូបានជួយអ្នកកាន់តាមលោកឲ្យយកឈ្នះការភ័យខ្លាចរបស់ពួកគេយ៉ាងដូចម្ដេច? តើអ្នកអាចធ្វើតាមគំរូរបស់លោកតាមរបៀបណា?
១៦. តើយើងអាចបង្ហាត់បង្រៀនសិស្សរបស់យើងឲ្យប្រាប់អ្នកឯទៀតអំពីជំនឿរបស់គាត់យ៉ាងដូចម្ដេច?
១៦ ចូរបង្ហាត់បង្រៀនសិស្សរបស់អ្នកបន្តិចម្ដងៗឲ្យប្រាប់អ្នកឯទៀតអំពីជំនឿរបស់គាត់។ ពេលលោកយេស៊ូចាត់ពួកអ្នកកាន់តាមលោកឲ្យផ្សព្វផ្សាយ ពួកគេប្រហែលជាភ័យ។ ប៉ុន្តែ លោកយេស៊ូបានជួយពួកគេដោយប្រាប់ពួកគេថា ត្រូវផ្សព្វផ្សាយដល់អ្នកណានិងត្រូវផ្សព្វផ្សាយអំពីអ្វី។ (ម៉ាថ. ១០:៥-៧) តើអ្នកអាចយកតម្រាប់លោកយេស៊ូតាមរបៀបណា? សូមជួយសិស្សឲ្យដឹងថា គាត់អាចផ្សព្វផ្សាយដល់អ្នកណាខ្លះ។ ជាឧទាហរណ៍ សូមសួរគាត់ថាតើគាត់ស្គាល់អ្នកណាដែលអាចទទួលប្រយោជន៍ពីការរៀនសេចក្ដីបង្រៀនណាមួយពីគម្ពីរឬទេ។ បន្ទាប់មក សូមជួយគាត់ឲ្យរៀបចំពាក្យផ្សាយ ដោយបង្ហាញគាត់អំពីរបៀបនិយាយសាមញ្ញដើម្បីប្រាប់សេចក្ដីពិតនោះ។ ពេលសមរម្យ អ្នកអាចហាត់ជាមួយគាត់ដោយប្រើអ្វីដែលបានចែងនៅក្រោមចំណងជើង«មនុស្សខ្លះនិយាយថា» និង«មនុស្សខ្លះប្រហែលជាសួរថា» ក្នុងសៀវភៅសប្បាយនឹងជីវិតដែលគ្មានទីបញ្ចប់! ពេលអ្នកធ្វើដូច្នេះ សូមផ្ដោតអារម្មណ៍ទៅលើការបង្ហាត់បង្រៀនសិស្សឲ្យប្រើគម្ពីរ ដើម្បីឆ្លើយយ៉ាងសាមញ្ញនិងដោយមិនធ្វើឲ្យអ្នកឯទៀតទើសចិត្ត។
១៧. តើយើងអាចប្រើម៉ាថាយ ១០:១៩, ២០, ២៩-៣១យ៉ាងដូចម្ដេច ដើម្បីជួយសិស្សគម្ពីររបស់យើងឲ្យទុកចិត្តព្រះយេហូវ៉ា?
១៧ ចូរជួយសិស្សរបស់អ្នកឲ្យទុកចិត្តព្រះយេហូវ៉ា។ លោកយេស៊ូបានប្រាប់អ្នកកាន់តាមលោកថា ព្រះយេហូវ៉ានឹងជួយពួកគេដោយសារលោកស្រឡាញ់ពួកគេ។ (សូមអាន ម៉ាថាយ ១០:១៩, ២០, ២៩-៣១) សូមរំលឹកសិស្សរបស់អ្នកថា ព្រះយេហូវ៉ាក៏នឹងជួយគាត់ដែរ។ អ្នកអាចជួយគាត់ឲ្យពឹងផ្អែកលើព្រះយេហូវ៉ា ដោយអធិដ្ឋានជាមួយគាត់អំពីគោលដៅរបស់គាត់។ បងប្រុសហ្វ្រានឈីសិកដែលរស់នៅប្រទេសប៉ូឡូញនិយាយថា៖ «អ្នកបង្រៀនខ្ញុំច្រើនតែនិយាយអំពីគោលដៅរបស់ខ្ញុំក្នុងសេចក្ដីអធិដ្ឋានរបស់គាត់។ ពេលខ្ញុំឃើញថា ព្រះយេហូវ៉ាបានតបឆ្លើយសេចក្ដីអធិដ្ឋានរបស់អ្នកបង្រៀនខ្ញុំ ខ្ញុំចាប់ផ្ដើមអធិដ្ឋានភ្លាមៗ។ ខ្ញុំដឹងថាព្រះយេហូវ៉ាជួយខ្ញុំ ពេលខ្ញុំត្រូវសុំច្បាប់ពីការងារថ្មីរបស់ខ្ញុំដើម្បីចូលរួមកិច្ចប្រជុំនិងមហាសន្និបាត»។
១៨. តើព្រះយេហូវ៉ាមានអារម្មណ៍យ៉ាងណាចំពោះកិច្ចការរបស់អ្នកបង្រៀនគម្ពីរ?
១៨ ព្រះយេហូវ៉ាយកចិត្តទុកដាក់យ៉ាងខ្លាំងចំពោះសិស្សគម្ពីររបស់យើង។ លោកឲ្យតម្លៃចំពោះការខំប្រឹងព្យាយាមរបស់អ្នកបង្រៀនគម្ពីរ ដើម្បីជួយមនុស្សឲ្យចូលកាន់តែជិតលោក ហើយលោកស្រឡាញ់ពួកគេដោយសារការខំប្រឹងនោះ។ (អេ. ៥២:៧) បើនៅឥឡូវនេះអ្នកមិនដឹកនាំការសិក្សាគម្ពីរ អ្នកនៅតែអាចជួយសិស្សគម្ពីរឲ្យរីកចម្រើនរហូតដល់ទទួលការជ្រមុជទឹក ដោយទៅជាមួយអ្នកផ្សាយឯទៀតពេលពួកគេបង្រៀនគម្ពីរ។
ចម្រៀងលេខ៦០ ចូរខំជួយគេឲ្យបានរួចជីវិត
^ វគ្គ 5 ក្នុងអត្ថបទនេះ យើងនឹងពិចារណាអំពីរបៀបដែលលោកយេស៊ូបានជួយមនុស្សឲ្យក្លាយទៅជាអ្នកកាន់តាមលោក និងរបៀបដែលយើងអាចយកតម្រាប់លោក។ យើងក៏នឹងពិចារណាអំពីរបៀបដែលយើងអាចប្រើសៀវភៅថ្មីសប្បាយនឹងជីវិតដែលគ្មានទីបញ្ចប់! សៀវភៅនេះបានត្រូវរៀបចំឡើង ដើម្បីជួយសិស្សគម្ពីររបស់យើងឲ្យរីកចម្រើនរហូតដល់ទទួលការជ្រមុជទឹក។
^ វគ្គ 7 អ្នកក៏អាចស្វែងរកបទពិសោធន៍ជីវិតពិតនៅក្នុង(១) សៀវភៅជំនួយស្រាវជ្រាវសម្រាប់សាក្សីព្រះយេហូវ៉ា ក្រោមប្រធានបទ«គម្ពីរបរិសុទ្ធ» និងចំណងជើងតូច«ប្រយោជន៍ក្នុងជីវិតប្រចាំថ្ងៃ» សូមមើល«‹គម្ពីរជួយមនុស្សឲ្យកែប្រែជីវិត› (អត្ថបទតភាគក្នុងទស្សនាវដ្ដីប៉មយាម)» ឬនៅក្នុង(២) JWបណ្ណាល័យ ក្រោមផ្នែក«ឯកសារ» (media) សូមចុច«បទសម្ភាសន៍និងបទពិសោធន៍»។
^ វគ្គ 62 ការពណ៌នាអំពីរូបភាព: បងប្រុសម្នាក់នាំប្រពន្ធគាត់មកជាមួយ ពេលបង្រៀនគម្ពីរដល់បុរសវ័យក្មេងម្នាក់។ នៅពេលផ្សេងទៀត បងប្រុសផ្សេងៗទៅជាមួយគាត់ពេលគាត់បង្រៀនគម្ពីរ។
