1. Kitendelesu kyebhi kyabhana kukifuxi kyadikota muhama yadyanga?

SAYI kifuxi kyonene kya mala ni kya ahatu atundile mujixi javulu, akexile we muzwela madimi kadifu, adyongekele. Maji mukizuwa kyenyokyo kwabhiti madiwanu. Sayi Jijudé akexile mutena kuzwela o madimi a uvwalukilu a athu yá atundile jixi jamakanga! O ima yazwela o Jijudé jojo ya abhangesa kudiwana, maji o ya abhangesa dingi kudiwana o ima yazwela poxolo Phetele. O izwelu yiyi yalungile ni njimbu yejitena kwa abhulula o myenyu, mukukala ni kixikanu kwa Jezú Kidistu. Kiki kyaswinisa kyavulu o kifuxi kyokyo. Kya abhangesa kwibhwidisa: “Akwetu, etu tu bhangaphe kyebhi?” Mukwatambwijila o maxibulu ambe: “A mi batizale en’wenu oso.”—Ika. 2:37, 38.

2. Ihi itwandamona mu milongi yiyi? (Tala o foto yakapa.)

² Mukizuwa kyenyokyo abatizalaku 3.000 a athu, ya akituka maxibulu a Kidistu. Mukithangana kyenyokyo o kikalakalu kyatumina Jezú ku akayedi yê kyamateka. O kikalakalu kyenyokyo kyamusuluka kate mu izuwa yetu yiyi. Mu izuwa yalelu kitutena dingi kukwatekesa muthu kudibatizala mu twola. Nange kubhinga jimbeji mba muvu umoxi mba ndenge kate o dixibulu kyabhixila kate kubatizu. Se kindala kiki wamulonga maxibulu, wejiya kwila o kubhanga maxibulu kikikalakakalu kyofele. Mu milongi yiyi twandamona ihi itwatokala kubhanga phala kukwatekesa o dixibulu dyetu kubhixila kate kubatizu.

3. Kala kilondekesa Matesu 28:19, 20, ihi yatokala kubhanga o dixibulu dya Bibidya phala kubhixila kate kubatizu?

³ Ande dyakubhixila kate kubatizu, o dixibulu dyatokala kubhanga yoso ilonga o Bibidya. (Tanga Matesu 28:19, 20.) Kyoso o dixibulu kyakumbidila yamudilonga, ene edi kala o  “njimu” yadiyala amutange mu kifika kya Jezú, watungu o inzo yê kundanji. (Mat. 7:24, 25; Luka 6:47, 48) Kyebhi kitutena kukwatekesa o dixibulu dya Bibidya kukumbidila yamudilonga? Twandamona jindunge jitatu.

4. Kyebhi kitutena kukwatekesa o dixibulu, kusuluka ni kubhanga o nguzu phala kubhixila kate kubatizu? (Tala o kaxa “ Kwatekesa o Dixibulu Dyé Kukala ni Jimbambe ni Kujikumbidila.”)

⁴ Mukwatekese kukala ni jimbambe. Mukonda dyahi watokala kubhanga kiki? Tala o kifika kiki: Se wamukwenda njila yadikanga, eye utena kwimana mu ididi yafwama, phala o njila ki u imone kulebha. Mukubhanga kiki wandakala ni nguzu yakubhixila bhukididi ki wakane. Kyene we kimoxi, se o maxibulu a Bibidya asota kukala ni jimbambe jofele anga ajikumbidila, ene andamona kwila, mbé ate kukumbidila o mbambe ya kwabatizala. Phala kukwatekesa o dixibulu dyé kukula mu nzumbi, dilonge né o mbandu yambe: “Mbambe” mu divulu, Sanguluka Katé Kuhádya ni Hádya! Kala disá di udilonga né, zwela né kyebhi o mbambe yandamukwatekesa kukumbidila o ima yazubha kudilonga. Se wamesena kwila o dixibulu dyé usuwa mbambe yengi, soneka bhu mbandu bhwambe: “Mbambe Yengi.” Mu ithangana yoso zwela ni dixibulu dyé yalungu ni mbandu yiyi, se mbambe yebhi yatena kukumbidila mu ithangana yofele, ni yoyo ibhinga thembu yavulu.

5. Kala kilondekesa Máluku 10:17-22, ihi yambele Jezú kudiyala wexile mvwama ni mukonda dyahi?

⁵ Kwatekesa o dixibulu dyé kulungulula ima kumwenyu wê. (Tanga Máluku 10:17-22.) Jezú wejidile kwila kyeji bhonza phala o diyala wexile mvwama kusumbisa o jimbote jê. (Mál. 10:23) Maji ne kiki Jezú wambela o diyala dyenyodyo phala kulungulula ima yabhonzo kyavulu kumwenyu wê. Mukonda dyahi? Mukonda Jezú wamuzolele. Sayi bhabha, tukala ni hele yakuswinisa o dixibulu dyetu dya  Bibidya kukumbidila o ima yamudilonga mukonda tudivwa kwila ene kala hanji polondo phala kulungulula ima kumwenyu wâ. Mukidi phala muthu kweha o ifwa yokulu ni kukala ni ifwa ya ubhe kubhinga thembu. (Kol. 3:9, 10) Maji se umateka kuzwela selu yalungu ni ima yabhingi kulungulula, mwene wandamateka we selu kulungulula o ifwa yê. Kyoso ki uzwela ni dixibulu dyê ni kidi kyoso eye ulondekesa kwila wamuzolo.—Jisá. 141:5; Jisa. 27:17.

6. Mukonda dyahi twatokala kwibhwidisa kumaxibulu m’etu se ihi yabanza ene?

⁶ Kima kyambote kwibhwidisa o dixibulu dyetu se ihi ibanza mwene yalungu ni maka utwamuzwela. O kubhanga ibhwidisu mu ukexilu yú, kwandakukwatekesa kwijiya se ihi yamutendela o dixibulu dyé ni ihi ixikina. Se kyene ki ubhanga jinga, kikyanda kubhonza kuzwela né yalungu ni ima nange itena kumubhonza ku ixikina kuhadya. O divulu, Sanguluka Katé Kuhádya ni Hádya! dyala ni ibhwidisu yavulu itena kukwatekesa kwijiya o ibanzelu ya dixibulu. Mukifika, o disá dya 04 dyala ni kibhwidisu: “Mudyé, kyebhi kyadivwa Jihova kyoso ki utumbula o dijina dyê?” O disá dya 09, dyala ni kibhwidisu: “Ima yebhi iwamesena kutumbula mu musambu?” Kudimatekenu nange kutena kubhonza phala o dixibulu dyé kutambwijila o ibhwidisu yiyi. Eye utena kumukwatekesa mukumulonga kuxinganeka mu ibatulu ya Bibidya ni jifoto jimoneka mu disá.

7. Kyebhi ki utena kukwatekesa o dixibulu dyé ni misoso yakidi?

⁷ Kyoso o dixibulu dyé kyandatendela kwila wabhingi kulungulula ima kumwenyu wê, mutangele misoso yakidi yandamukwatekesa kubhanga kiki. Mukifika, se o dixibulu dyé kyene mumubhonza kuya muyônge, mulondekese o vidyu ni dyambu: Jihova Wangilange Ithangana Yoso, imoneka mumbandu, “tokwesa dingi” mu disá dya 14. Mu madisá avulu mu divulu Sanguluka Katé Kuhádya ni Hádya!, wandasangamu misoso yakidi, kikale mu jimbandu “Dilonge Dingi” ni mu jimbandu “Tokwesa Dingi.” * Aluka phala kusokese o dixibulu dyé ni muthu amutange mumusoso mukwamba: “Se mwene watena kubhanga kiki, eye we utena.” Ehela o dixibulu kubhixila mukibanzelu kiki. Se kibhana, zwela né o jipondo jabetakota jakwatekesa o muthu amutange mu vidyu kubelesela o itendelesu ya Bibidya. Nange utena kutumbula velusu mba kima kyengi kyabhange o muthu. Mu jividyu joso se kibhana tumbula kyebhi Jihova kyakwatekesa o muthu yú.

8. Kyebhi kitutena kukwatekesa o dixibulu dyetu kuzola Jihova?

⁸ Kwatekesa o dixibulu dyé kuzola Jihova. Kyebhi ki utena kubhanga kiki? Mukubhanga yoso phala kuzwela o idifwa ya Jihova. Kwatekesa o dixibulu dyé kumona kwila Jihova, Nzambi yasanguluka, ni kwila ukwatekesa yó amuzolo. (1 Tim. 1:11; Jihe. 11:6) Zwela kudixibulu dyé kwila, wandakatula mbote mukukumbidila izwela o Bibidya ni kumujimbulula kwila kiki kilondekesu kya henda ya Jihova kwa mwene. (Iza. 48:17, 18) Kyoso o dixibulu dyé kidiya ni kuzola Jihova, kiki kyandamukwatekesa kulungulula o ima kumwenyu wê.—1 Nzwá 5:3.

9. Kala kilondekesa Máluku 10:29, 30, ihi itena kukwatekesa o muthu kuxisa ima kudima phala n’a mu batizale?

⁹ Phala o dixibulu kubhixila kate kubatizu, mwene wabhingi kuxisa ima kudima. Kala o diyala wexile mvwama twamutange kudima,  sayi maxibulu abhingi kuxisa jimbote kudima. Mukifika se o salu yê imubhangesa kubhukumukina o itumu ya Bibidya, nange mwene wandabhinga kusota salu yengi. Kumbandu yengi, avulu nange andabhinga kubatula o ukamba ni yó kazolo Jihova. Amukwa o miji yâ, ya abhana dikunda mukonda kawabhela o Jimbangi ja Jihova. Jezú wejidile kwila phala amoxi kyeji kwabhonza kuxisa ima kudima. Maji wakanena kwila, o yó amukayela kandadyela. Jihova weji kwabhana mwiji mu nzumbi. (Tanga Máluku 10:29, 30.) Kyebhi ki utena kukwatekesa o dixibulu dyé kukatula mbote mu ujitu yú wakatunda?

10. Ihi iwadilongo ku musoso wa Maniku?

¹⁰ Kala udikamba dya dixibulu dyé. Kima kyambote kulondekesa kudixibulu dyé kwila wamusuwu. Mukonda dyahi? Tala yazwela Maniku watungu ku México. Mukulembalala kyoso mwene kyexile dixibulu dya Bibidya, mwene wambe: “Ande dya kumateka kudilonga, o mulongexi wami wexile mu ngibhwidisa se ngala kyebhi. Mwene wexile mungikwatekesa kudivwa kyambote, mukonda dya kiki eme ngexile mutena kuzwela kabasa maka. Eme ngexile mutena we kumona kwila mwene wangisuwu.”

11. Kyebhi o maxibulu kyatena kukatula mbote mukubhita ithangana n’etu?

¹¹ Bhita ithangana ni maxibulu mê kala kyakexile mubhanga Jezú ni maxibulu mê. (Nzwá 3:22) Se o dixibulu dyé dya mulungulula ima kumwenyu, o kwila utena kumwixana phala kudya kadikoka, mba kudimosala, kutala né kumoxi o minangu ya JW Broadcasting? Kiki kyandakala kima kyambote, mbengembenge kyoso o makamba ni mwiji, kyamubhanga o jifesa kijala mu Bibidya, kala, ja natale, ja uvwalukilu ni ja ixi. Mukonda mu ithangana yiyi mwene utena kudivwa ubheka. Kazibwe watungu ku Uganda wambe: “Eme kingidilongo ngo yalungu ni Jihova mu ithangana yakudilonga o Bibidya, maji ni mu ithangana ingabhiti ni mulongexi wami. Ngamono kyebhi bhukaxi kajiselevende jê Jihova wangisuwu, ngamono  we kyebhi ene kya sanguluka. Kiki kyene we kingamesenene kumwenyu wami.”

12. Mukonda dyahi kima kyambote kwixana jiphange javulu phala kutuxinjikila kulonga o Bibidya?

¹² Exana jiphange javulu phala kukuxinjikila kulonga o Bibidya. Sayi bhabha tudivwa kyambote mukuya ubheka mba kuya ni muthu umoxi muveji javulu. Sumbala o kubhanga kiki kikitubhonzo, maji ejiya kwila, twandakwatekesa dingi o dixibulu dyetu se twambata aboki avulu. Dmitrii, watungu ku Moldavia wambe: “Kala muboki wexile mukwiza ni mulongexi wami, wexile mulombolola o ima mu ukexilu ki udifu, kiki kyangikwatekesa kumona o milongi mu maukexilu avulu.” Kumbandu yengi, “kyoso kingayi mukyônge muveji yadyanga, kingexile dingi ni jisonyi javulu, mukonda ngejidile kya jiphange javulu.”

13. Mukonda dyahi kima kyambote kukwatekesa o dixibulu dyé kuya muyônge?

¹³ Kwatekesa o dixibulu dyé kuya muyônge. Mukonda dyahi? Mukonda Jihova watumu o abhezyê kudyongeka, kiki kibhanga mbandu ya ubhezelu wetu. (Jihe. 10:24, 25) Kumbandu yengi o jiphange jetu mu kilunga ene o mwiji wetu mu nzumbi. Kyoso kitwala muyônge ni ene kyedi kala twamudya kumoxi kudya kwatowala kubhata dyetu. Se ukwatekesa o dixibulu dyé kuya muyônge, eye wamumukwatekesa kubhanga ima yabetakota, yandamubhangesa kudibatizala. Maji nange mukidi kitena kumubhonza kuya muyônge. Kyebhi o divulu Sanguluka Katé Kuhadya ni Hadya! ditena kumukwatekesa kutolola o ibhidi yosoyoso imufidisa kuya muyônge?

14. Kyebhi kitutena kuswinisa o maxibulu metu kuya muyônge?

¹⁴ O disá dya 10 mu divulu Sanguluka Katé Kuhadya ni Hadya! ditena kukukwatekesa kuswinisa o dixibulu dyé. Ande dyakuzubha o kusoneka o divulu didi, sayi aboki ala ni uhete a abhingi phala kudilonga ni maxibulu mâ o disá dya dikwinyi, ene ambe kwila aditundu kyambote, o maxibulu a mateka kuya muyônge. Maji kana kukingila kubhixila kate kudisá dya 10 phala kwixana o maxibulu mê kuya muyônge. Mwixane tunde kudimatekenu phala kuya muyônge, suluka mukubhanga kiki. Kala dixibulu dya Bibidya udibhana ni ibhidi ki idifu ni ya akwa. Kyenyiki, tonginina kyambote o maxibulu mê, ni kumona se ihi i utena kubhanga phala kwa akwatekesa. Kana kuzoza se mwene ulaleka kuxikina kumateka kuya muyônge. Kala ni mwanyu, suluka ni kumwixana.

15. Nange ihi itena kubhekela o wôma ku maxibulu metu?

¹⁵ O kwila utena kulembalala o wôma uwexilenawu kyoso kiwakituka Mbangi ya Jihova? Nange wadivu kwila nuka wejitena kuboka nzo ni inzo. Mba nange wexile ni wôma wakwila o mwiji mba makamba mê atena kukulungulukila. Se kyene, eye utena kutendela se kyebhi kyamudivwa o dixibulu dyé. Jezú wejidile kwila sayi yá eji kala ni wôma. Maji mwene waswinisa o akayedyê phala o wôma yu kiwafidise kusidivila Jihova. (Mat. 10:16, 17, 27, 28) Ihi yabhange Jezú phala kukwatekesa o akayedyê kutolola o wôma? Kyebhi ki utena kukayela o phangu yê?

16. Kyebhi ki utena kukwatekesa o maxibulu mê, kutangela kwa akwa o ima yamudilonga?

¹⁶ Longa o dixibulu dyé, kutangela kwa akwa o ima yamudilonga. Kyoso Jezú kyatumikisa o maxibulu mê phala kuboka nange ene exile ni hele. Maji Jezú wa akwatekesa. Kyebhi? Mwene watangela o maxibulu kwebhi ni njimbu yebhi yeji boka. (Mat. 10:5-7) Kyebhi ki utena kukayela o phangu ya Jezú? Kwatekesa o dixibulu dyé kwijiya kwebhi kwatena kuboka.  Mu kifika mwibhwidise: O kwila wejiya muthu weji sanguluka se umutangela o kidi kiki kya Bibidya? Kyenyiki mukwatekese kupelepalala se ihi yatokala kuzwela ni muthu, mu ukexilu wabhebhuluka. Se kibhana utena kudipelepalala né o mbandu: “Athu Avulu Amba” ni “Nange Sayi Muthu Wibhula,” itusanga mu divulu Sanguluka Katé Kuhadya ni Hadya! Kyoso kimwamubhanga kiki, longa o dixibulu dyé kubhana itambwijilu yabhebhuluka bhukaxi ka Bibidya ni kuxila kwoso.

17. Kala kilondekesa Matesu 10:19, 20, 29-31, kyebhi kitutena kukwatekesa o maxibulu metu kudyelela kwa Jihova?

¹⁷ Kwatekesa o maxibulu mê kudyelela kwa Jihova. Jezú wadiyelelesa o maxibulu mê kwila, Jihova weji kwa akwatekesa mukonda Jihova wa azolo. (Tanga Matesu 10:19, 20, 29-31.) Dyelelesa o dixubulu dyé kuma, Jihova wandamukwatekesa we. Utena kumukwatekesa kudyelela kwa Jihova, mukusamba né yalungu ni jimbambe jê. Franciszek watungu ku Polonia wambe: “Muveji javulu o mulongexi wami wexile mutumbula o jimbambe jami mu musambu wê. Kyoso kingamono kwila Jihova wakexile mutambwijila o misambu ya mulongexi wami, eme ngamateka na kubhanga o misambu yami se kulaleka. Ngamono kwila Jihova wangikwatekesa, kyoso kingasoto salu yengi, eme ngabhindamene kubhinga twizuwa phala kuya muyônge ya kilunga ni muyônge ya makota.”

18. Kyebhi Jihova kyadivwa ni kikalakalu kibhanga o aboki?

¹⁸ Jihova usuwa kyavulu o maxibulu metu a Bibidya. Mwene wazolo kyavulu o aboki, mukonda wejiya o nguzu yabhanga phala kukwatekesa o athu kukala makamba mê. (Iza. 52:7) Se mukithangana kiki kiwamulonga dixibulu, ne kiki eye utena hanji kukwatesa o athu kubhixila kate kubatizu, mukuxinjikila o aboki amukwa mukulonga o Bibidya.