MUTWE WA KUFUNDA 22
Kwashainga bo Mufunjisha Baibolo Kufikilamo Kubatizhiwa
“Lapilai ne kubatizhiwa.”—BYU. 2:38.
LWIMBO 72 Sapwilainga Bantu pa Bukine bwa Bufumu
BIJI MU UNO MUTWE *
1. Baana ba bwanga ba kwa Yesu babuujile jibumba jikatampe ja bantu amba ka?
JIBUMBA jikatampe ja banabalume ne banabakazhi jayile ku Yelusalema. Abano bantu bafumine mu byalo byavula kabiji baambilenga milaka yapusana-pusana. Kwamwekele kintu kya kukumya. Bayudea bamo batendekele kwamba milaka ya bantu bafumine mu byalo byapusna-pusana. Kino kyalengejile jibumba kukumya bingi. Bino kintu kyakijilemo kwibakumisha ke byambo byaambilenga bano Bayudea ne byaambile mutumwa Petelo. Jino jibumba ja bantu jafunjile kuba’mba bakapuluka umvwe baitabila mwi Yesu Kilishitu. Abino byambo bibafikile pa muchima. Kabiji batundaikilwe bingi kya kuba baipwizhe’mba: “Anweba bakwetu, nanchi tube byepi?” Petelo waambile’mba: “Lapilai ne kubatizhiwa.”—Byu. 2:37, 38.
Mulongo ubena kwingijila pamo na mwinakwanji mu mwingilo kimye kyo abena kufunjisha Baibolo nsongwalume uji na buku wa kuba’mba Mukekala Myaka ne Myaka! (Monai jifuka 2)
2. Ñanyi bintu byo tusakufunda mu uno mutwe? (Monai kipikichala kya pa nkupiko.)
2 Kintu kikwabo kyamwekele kyalondejilepo kyajinga kya kukumya bingi. Pa jonkaja juba, bantu 3,000 babatizhiwe ne kwikala baana ba bwanga ba kwa Kilishitu. Ino yo yajinga ntendekelo ya mwingilo mukatampe Yesu ye akambizhe baana banji ba bwanga kwingila, wa kufunjisha bantu kwikala baana ba bwanga. Ne lelo jino, baana ba bwanga ba kwa Yesu batwajijila kwingila uno mwingilo. Ano moba kechi twakonsha kufunjisha muntu pa maola achechetu wafikilamo kubatizhiwa ne. Pakonsha kupita bañondo nangwatu mwaka umo ne kukilapo pa kuba’mba muntu afikilemo kubatizhiwa. Kikebewa kwingila na ngovu pa kuba’mba mukwashe muntu kwikala mwana wa bwanga wa kwa Kilishitu. Mu uno mutwe, tusakufunda byo mwakonsha kuba pa kuba’mba mukwashe ye mufunjisha Baibolo kwikala mwana wa bwanga wabatizhiwa.
KWASHAI MUNTU YE MUFUNJISHA BAIBOLO KWINGIJISHA BYO ABENA KUFUNDA
3. Kwesakana na byaamba Mateo 28:19, 20, muntu ubena kufunda Baibolo wafwainwa kuba byepi pa kuba’mba afikilemo kubatizhiwa?
3 Muntu ubena kufunda Baibolo saka akyangye kubatizhiwa, wafwainwa kwingijishanga byo afunda mu Baibolo. (Tangai Mateo 28:19, 20.) Umvwe ubena kufunda Baibolo ke engijisha byo afunda, wikala nobe “muntu wa maana” waambilepo Yesu mu kishimpi wapoyile kitendekesho kyazhika ne kushimika nzubo yanji pa jibwe. (Mat. 7:24, 25; Luka 6:47, 48) Twakonsha kukwasha byepi ye tufunjisha pa kuba’mba engijishenga byo afunda? Twayai twisambe pa bintu bisatu byo twakonsha kuba.
4. Twakonsha kukwasha byepi ye tufunjisha Baibolo pa kuba’mba atwajijile kuyilako palutwe ne kubatizhiwa? (Monai ne kakitenguluzha ka kuba’mba “ Kwashai ye Mufunjisha Kwibikila Bikonkwanyi ne Kwibifikizha.”)
4 Kwashai ye mufunjisha kwibikila bikonkwanyi. Mambo ka o mwafwainwa kubila bino? Langulukai pa kino kimwesho: Umvwe mubena kuya kwalepa panshi nangwa na nkinga, inge mwafika pa mpunzha ibena kumweka bulongo mwakonsha kufuukulapo kwimana. Kechi mukalangulukapo ne byalepa museke washalako pa kuba’mba mufike ko mubena kuya ne. Kyo kimotu ne muntu ubena kufunda Baibolo, inge wibikila binkokwanyi byo akonsha kufikizha mu kimye kicheche, ukamona kuba’mba wakonsha kufikizha ne kikonkwanyi kya kubatizhiwa. Ingijishainga kipungu kya kuba’mba “Ubai bino” mu buku wa kuba’mba Mukekala Myaka ne Myaka! pa kuba’mba mukwashe ye mufunjisha kwibikila bikonkwanyi. Inge mwapwisha lufunjisho, isambai pa kyokyo kikonkwanyi byo kyakwatankana na bintu byo afunda. Inge mubena kukeba ye mufunjisha kufikizha kikonkwanyi kikwabo, mwakonsha kwikinemba pa mpunzha po banemba’mba “Bikwabo.” Kimye kyonse ingijishainga kino kipungu kwisamba na ye mufunjisha Baibolo bikonkwanyi byo afwainwa kwibikila bya kufikizha mu kimye kicheche ne bikebewa kimye kyabaya pa kuba’mba ebifikizhe.
5. Kwesakana na byaamba Mako 10:17-22, Yesu wabuujile mwanamulume munonshi kuba byepi, kabiji mambo ka?
5 Kwashai ye mufunjisha Baibolo kupimpula byubilo byanji. (Tangai Mako 10:17-22.) Yesu wayukile’mba kikakatazha bingi munonshi kupotesha bunonshi bwanji bonse. (Mako 10:23) Pano bino, Yesu wabuujile mwanamulume umo kuba kino. Mambo ka? Mambo Yesu watemenwe uno muntu. Bimye bimo, twakonsha kuchinuzhuka kutundaika ye tufunjisha kwingijisha byo abena kufunda na mambo a kulanguluka’mba kechi winengezha kupimpula byobyo bintu ne. Pakonsha kupita kimye pa kuba’mba bantu basankilepo miteeto yabo ya kala ne kuvwala bumuntu bupya. (Kolo. 3:9, 10) Bino umvwe mwisambapo bukiji kwa kubula kupita mu mbaji, ye mufunjisha kechi ukabanda kutendeka kupimpula byubilo byanji ne. Umvwe ke mwisambe pa bino bintu, mukamwesha’mba mwamuta muchima.—Sala. 141:5; Maana 27:17.
6. Mambo ka o twafwainwa kwipwizhanga bo tufunjisha Baibolo kwamba milanguluko yabo?
6 Kyanema bingi kwipuzha ye mufunjisha Baibolo byo alanguluka pa mutwe ye mubena kumufunjishapo. Kuba bino kukemukwasha kuyuka milanguluko yanji ne bintu byo aitabilamo. Umvwe ke mube bino kimye kyonse, kikemupeelela kwisamba pa bintu byo akonsha kubula kuswa bukiji. Mu buku wa kuba’mba Mukekala Myaka ne Myaka! muji mepuzho avula bingi alengela muntu kwamba milanguluko yanji. Nabiji mu lufunjisho 04 muji bwipuzho bwa kuba’mba: “Mwalanguluka’mba Yehoba umvwa byepi ku muchima inge mwaingijisha jizhina janji?” Mu lufunjisho 09 muji bwipuzho wa kuba’mba: “Ñanyi bintu bimo byo mukebesha kulombapo kwi Lesa?” Patanshi, muntu ye mufunjisha kyakonsha kumukatazha kukumbula ano mepuzho. Mwakonsha kumukwasha kupichila mu kumufunjisha kulanguluka pa binembelo ne bipikichala bijimo.
7. Twakonsha kwingijisha byepi bulongo mashimikila amwesha byaubile bamo pa kuba’mba bapimpule bwikalo bwabo?
7 Umvwe ye mufunjisha wayuka kintu kyo afwainwa kuba, ambai pa bimweka mu bwikalo byakonsha kumutundaika kuba kyo kyo kintu. Inge kya kuba’mba ye mufunjisha kechi utaanwa ku kupwila kimye kyonse ne, mwakonsha kumutambisha vidyo wa kuba’mba Yehoba Wantele Bingi Muchima, uji pa kipungu kya kuba’mba “Kebai Bishinka Bikwabo” kiji mu lufunjisho 14. Mu mafunjisho avula aji mu buku wa kuba’mba Mukekala Myaka ne Myaka!, mukataana mashimikila a byamwekele mu kipungu kya kuba’mba “Funjilaipo Bikwabo,” nangwa pa kipungu kya kuba’mba “Kebai Bishinka Bikwabo.” * Bino kechi mwafwainwa kwesakanyanga muntu ye mufunjisha ku muntu mukwabo kupichila mu kwamba’mba, “Inge kananga wakonsheshe, ko kuba’mba ne obewa wakonsha,” ine. Mwine wafwainwa kwifuukwilapo. Mwafwainwa kwamba pa bishinka byakwashishe muntu ye bamwesha mu vidyo kwingijisha mafunjisho a mu Baibolo. Kampe mwakonsha kwamba pa kinembelo kyamukwashishe nangwa kishinka kikwabo kyo aubile. Kabiji mwafwainwa kwamba pe Yehoba byo akwashishe uno muntu.
8. Twakonsha kukwasha byepi muntu ye tufunjisha kutemwa Yehoba?
8 Kwashai ye mufunjisha kutemwa Yehoba. Mwakonsha kuba byepi bino? Monaingapo bimye bya kwamba pa byubilo bya Yehoba. Kwashai ye mufunjisha kuyuka kuba’mba Yehoba ke Lesa wa lusekelo kabiji ukwasha bantu bamutemwa. (1 Timo. 1:11; Hebe. 11:6) Mweshai ye mufunjisha kuba’mba ukamwenamo byawama inge ke engijishe byo abena kufunda. Kabiji mulumbulwilai kuba’mba bintu byawama byo akamwenamo ke biyukilo bimwesha’mba Yehoba wamutemwa. (Isa. 48:17, 18) Umvwe ye mufunjisha watemwa Yehoba, kikamupelela kupimpula bwikalo bwanji.—1 Yoa. 5:3.
KWASHAI YE MUFUNJISHA KUYUKA BAKAMONYI BAKWABO
9. Kwesakana na byaamba Mako 10:29, 30, ki ka kyakonsha kukwasha muntu kusankilapo bintu bimo pa kuba’mba abatizhiwe?
9 Pa kuba’mba ayileko palutwe kufika ne ku lubatizhilo, muntu ubena kufunda Baibolo wafwainwa kusankilapo bintu bimo. Byonka byo kyajinga ku munonshi ye twaambapo kala, bantu bafunda Baibolo bamo bafwainwa kusankilapo bya bunonshi. Inge kya kuba’mba nkito yo bengila ilala mafunde a mu Baibolo, bakonsha kuleka yoyo nkito ne kukebako ikwabo. Bavula bakonsha kuleka kupwanañana na balunda babula kutemwa Yehoba. Bakwabo bakonsha kwibakana ku balongo babo bashikwa Bakamonyi ba kwa Yehoba. Yesu waambile’mba bamo kikebakatazha bingi kuba bino bintu. Bino walayile’mba baana banji ba bwanga bakamwenamo byawama. Yehoba ukebapa kisemi kyawama kya bantu baji na butemwe bamupopwela. (Tangai Mako 10:29, 30.) Mwakonsha kukwasha byepi ye mufunjisha Baibolo kumwenamo mu buno bupe bwawama?
10. Mwafunjilako ka ku byaambile ba Manuel?
10 Ikalai balunda na ye mufunjisha. Kyanema bingi kumwesha ye mufunjisha kuba’mba mwamutemwa. Mambo ka? Monai byaambile ba Manuel bekala ku Mexico. Balumbulwile mufunjishi wabo byo ebakwashishe kimye kyo bafunjilenga Baibolo. Baambile’mba: “Kimye kyonse saka tukyangye kutendeka kufunda, bangipuzhanga kuba’mba bayuke inge kya kuba njitu bulongo. Bandengejile kwibakasulukila ne kwibabuula bintu bimo. Nashiinwe kuba’mba bantemwa.”
11. Bantu bo tufunjisha Baibolo bakonsha kumwenamo byepi umvwe ke tupwanañane nabo?
11 Monaingapo kimye kya kwisamba na bo mufunjisha Baibolo, byonkatu Yesu byo aikalanga na baana banji ba bwanga. (Yoa. 3:22) Inge kya kuba’mba ye mufunjisha ubena kupimpula byubilo byanji, mwakonsha kumwitako ku nzubo yenu na kujiila pamo kajo nangwa kutamba mutanchi umo wa pa ñondo pa ñondo wa Broadcasting. Ye mufunjisha wakonsha kusanta bingi inge mwamwita ku nzubo, kikatakata kimye balunda nanji ne balongo banji kyo babena kusekelela moba a kukookoloka, mambo wakonsha kumvwa mukose. Ba Kazibwe ba ku Uganda baambile’mba: “Nafunjile byavula pe Yehoba kupichila mu kupwanañana na mufunjishi wami. Namwene Yehoba byo akwasha bantu banji ne lusekelo lo bajinga nalo. Ne amiwa byo byo nakebelenga kwikala.”
Inge saka muya na basapwishi bapusana-pusana ku muntu ye mufunjisha Baibolo, kikamupelala kutendeka kupwila (Monai jifuka 12) *
12. Mambo ka o twafwainwa kusendelangako basapwishi bapusana-pusana pa kuya na kufunjisha muntu?
12 Sendaingako basapwishi bapusana-pusana pa kuya na kufunjisha muntu Baibolo. Bimye bimo, twakonsha kulanguluka’mba kyapeela kuyatu bunke na kufunjisha muntu nangwa kuyangatu na musapwishi umo kimye kyonse. Nangwa kya kuba kyakonsha kwitupeelela kuba bino, bino ye tufunjisha Baibolo ukamwenamo bingi umvwe ke tuyeko na basapwishi bapusana-pasana. Ba Dmitrii, bekala ku Moldova baambile’mba: “Musapwishi yense waiyanga na mufunjishi wami, walumbulwilanga bintu mu jishinda japusanako. Kino kyankwashishe kumona mashinda akwabo a kwingijishishamo bintu byo nafunjilenga. Kabiji kino kyankwashishe kukepeshako bumvu kimye kitanshi kyo nayile na kupwila, mambo balongo ne banyenga bavula namonañene nabo.”
13. Twakonsha kukwasha byepi ye tufunjisha Baibolo kutendeka kupwila?
13 Kwashai ye mufunjisha kutendeka kupwila. Mambo ka? Mambo Yehoba wakambizha bapopweshi banji kupwila pamo, kabiji ke lubaji lwa mpopwelo yetu. (Hebe. 10:24, 25) Kikwabo, balongo ne banyenga mu kipwilo bajitu nobe kisemi kyetu. Inge twapwila pamo, kijitu nobe tubena kujiila pamo kajo pa nzubo. Umvwe mwakwasha ye mufunjisha kutendeka kupwila, ko kuba’mba mubena kumukwasha kuba kintu kimo kyanema kyakonsha kumulengela kubatizhiwa. Bino kyakonsha kumukatazhako kutendeka kupwila. Buku wa kuba’mba Mukekala Myaka ne Myaka! wakonsha kukwasha byepi ye mufunjisha kushinda makatazho onse akonsha kumulengela kukankalwa kutendeka kupwila?
14. Twakonsha kutundaika byepi ye tufunjisha Baibolo kutendeka kupwila?
14 Ingijishai lufunjisho 10 mu buku wa kuba’mba Mukekala Myaka ne Myaka! kukwasha ye mufunjisha kwikala na kizaku kya kupwila. Basapwishi bayuka bingi kufunjisha bo baambijile’mba beseke kwingijisha luno lufunjisho mu uno buku saka bakyangye kumulupula, baambile’mba luno lufunjisho lwaingijile bingi bulongo kukwasha bo bafunjisha kutendeka kupwila. Pano bino, kechi mwafwainwa kupembelela’mba kana mukafike mu lufunjisho 10 bino mukatundaike ye mufunjisha Baibolo kutendeka kupwila ne. Aku mutendekatu kufunda nanji mwakonsha kumutundaika kutendeka kupwila, kabiji mwafwainwa kutwajijilatu na kuba bino. Bantu bo tufunjisha Baibolo baji na makatazho apusana-pusana. Onkao mambo, tai muchima ku bintu bibena kupitamo ye mufunjisha ne kumona inge mwakonsha kumukwashako mu mashinda amo. Inge kya kuba papita kimye kyabaya ye mufunjisha Baibolo kutendeka kupwila ne, kechi mwafwainwa kulefulwa ne. Mwafwainwa kutekanya, bino kechi mwafwainwa kuleka kumutundaika kupwila ne.
KWASHAI YE MUFUNJISHA KUBULA KWIKALA NA MOYO
15. Ñanyi bintu bimo byakonsha kulengela ye tufunjisha Baibolo kwikala na moyo?
15 Abya mubena kuvuluka byo mwaumvwine moyo kwikala Kamonyi wa Yehoba nyi? Kampe mwalangulukile’mba kechi mwakonsha kusapwila ku nzubo ku nzubo nangwa pa mvula bantu ne. Nangwa kampe mwachiinenga kisemi kyenu nangwa balunda nenu kuba’mba bakemwimena ku ntundwa. Inge byo byo kyajinga, mwakonsha kumvwisha ene mambo ye mufunjisha Baibolo o akonsha kwikela na moyo. Yesu waambile’mba bantu bamo bakachiinanga bino bintu. Nangwa byonkabyo, watundaikile baana banji ba bwanga amba moyo kechi wafwainwa kwibalengela kuleka kwingijila Yehoba ne. (Mat. 10:16, 17, 27, 28) Yesu wakwashishe byepi baana banji ba bwanga kushinda moyo ye banjinga nanji? Kabiji mwakonsha kulondela byepi byo aubile?
16. Twakonsha kufunjisha byepi mwana wa bwanga bya kubuulako bakwabo bintu byo aitabilamo?
16 Funjishainga mwana wa bwanga bya kubuulako bakwabo bintu byo aitabilamo. Baana ba bwanga ba kwa Yesu baumvwine moyo kimye kyo ebatumine kuya na kusapwila. Bino Yesu wibakwashishe kupichila mu kwibabuula mpunzha ko bafwainwe kuya na kusapwila ne byambo bya kwamba. (Mat. 10:5-7) Mwakonsha kulondela byepi byaubile Yesu? Kwashai ye mufunjisha kuyuka ko afwainwa kusapwila. Mwakonsha kumwipuzha inge wayukapo muntu umo wakonsha kumwenamo mu kishinka kimo kya mu Babiolo. Apa bino mwamukwasha kunengezha bya kwamba kupichila mu kumumwesha jishinda japeela kwisambilamo na bantu bukine. Pa kimye kyafwainwa, mwakonsha kuba bintu biji mu kipungu kya kuba’mba “Bantu Bamo Bamba’mba” ne kipungu kya kuba’mba “Muntu umo Wakonsha Kwimwipuzha’mba” biji mu buku wa kuba’mba Mukekala Myaka ne Myaka! Pa kuba bino, mwafwainwa kuta muchima pa kukwasha ye mufunjisha kwingijisha Baibolo pa kusapwila ne pa kukumbula mepuzho.
17. Twakonsha kwingijisha byepi Mateo 10:19, 20, 29-31 pa kukwasha ye tufunjisha Baibolo kuketekela mwi Yehoba?
17 Kwashai ye mufunjisha kuketekela mwi Yehoba. Yesu wabuujile baana banji ba bwanga amba Yehoba ukebakwasha mambo wibatemwa. (Tangai Mateo 10:19, 20, 29-31.) Vululaimo ye mufunjisha kuba’mba Yehoba ukamukwasha ne aye. Mwakonsha kumukwasha kuketekela mwi Yehoba kupichila mu kulombela pamo ne aye pa binkonkwanyi byanji. Ba Franciszek bekala ku Poland baambile’mba: “Mufunjishi wami javula watongolanga bikonkwanyi byo nebikijile mu milombelo yanji. Byo namwene Yehoba byo akumbwile milombelo ya mufunjishi wami, ponkapotu ne amiwa natendekele kulomba. Namwenenga bukwasho bwa Yehoba inge nalomba moba ku nkito kuba’mba katanwe ku kupwila kwa kipwilo ne kushonkena.”
18. Yehoba umvwa byepi pa mwingilo wa kufunjisha ubena kwingila bena Kilishitu?
18 Yehoba wata bingi muchima bantu bo tufunjisha Baibolo. Wayuka basapwishi byo bengila na ngovu kukwasha bantu kufwenya kwipi ne aye, kabiji wibatemwa bingi na mambo a kino. (Isa. 52:7) Inge kya kuba kechi mujipo na muntu ye mubena kufunjisha Baibolo ne, mwakonsha kukwasha boba babena kufunda Baibolo kukomenako kufika ne ku lubatizhilo kupichila mu kwingijila pamo na basapwishi bebafunjisha.
LWIMBO 60 Bakwashai Bakapuluke
^ jifu. 5 Uno mutwe waamba pe Yesu byo akwashishe bantu kwikala ke baana banji ba bwanga, ne byo twakonsha kulondela byo aubile. Kabiji tusakwisamba pa byo twakonsha kwingijisha buku wa katataka wa kuba’mba Mukekala Myaka ne Myaka! Uno buku banengezha kuba’mba tukwashenga bo tufunjisha Baibolo kukomenako kufika ne ku lubatizhilo.
^ jifu. 7 Kabiji mwakonsha kutaana mashimikila a bwikalo bwa bantu mu (1) Buku wa Kukwasha Bakamonyi ba kwa Yehoba Kukebakeba Bishinka, pa mutwe wa kuba’mba “Baibolo,” apa bino mwaya pa kamutwe kacheche ka kuba’mba “Buneme Bujimo,” kabiji mwaya pa kamutwe ka kuba’mba “‘Baibolo Upimpula Bwikalo bwa Bantu’ (Bibaba bya mu Kyamba kya Usopa)” nangwa mu (2) JW Library® pa kipungu kya mavidyo pa kamutwe ka kuba’mba “Misambo ne Byamwekele.”
^ jifu. 62 KULUMBULULA KIPIKICHALA: Mulongo wayila pamo na mwinakwanji na kufunjisha nsongwalume. Pa bimye bikwabo, uya na balongo bapusana-pusana ku muntu ye afunjisha.
