1. Wetin Jizɔs in disaypul dɛn bin tɛl bɔku pipul dɛn fɔ du?

BƆKU pipul dɛn we na man ɛn uman dɛn we kɔmɔt na bɔku kɔntri dɛn ɛn we de tɔk bɔku langwej dɛn bin kam na Jerusɛlɛm. Wɔndaful tin bin apin da de de. Wantɛm wantɛm, di Ju pipul dɛn bin ebul fɔ tɔk langwej dɛn we di pipul dɛn we kam waka na Jerusɛlɛm de tɔk. Di pipul dɛn we kam waka bin rili sɔprayz, bɔt di tin we bin rili wɔndaful na we dɛn de yɛri wetin di Ju dɛn bin de tɛl dɛn ɛn wetin apɔsul Pita bin se to ɔlman. Di tin dɛn we di pipul dɛn bin lan na dat dɛn go sev if dɛn sho se dɛn gɛt fet pan Jizɔs Krays. Dis tin we di pipul dɛn bin yɛri bin rili tɔch dɛn at. Di tin dɛn we di pipul dɛn bin lan bin rili tɔch dɛn at we mek dɛn aks se: “Wetin wi fɔ du?” Pita bin ansa dɛn se: “Una ɔl fɔ baptayz.”—Akt 2:37, 38.

2. Wetin wi go tɔk bɔt insay dis atikul? (Luk di pikchɔ na di frɔnt pej.)

² Di nɛks tin we bin apin bin rili wɔndaful. Na lɛk 3,000 pipul dɛn bin baptayz da de de, we bin kam fɔ bi Jizɔs in disaypul dɛn. Na so di big wok we Jizɔs bin gi in disaypul dɛn fɔ du bin bigin. Ɛn di wan dɛn we de fala Jizɔs de stil du da wok de tide. Tide, pɔsin nɔ go baptayz bikɔs wi tɔk to am fɔ smɔl tɛm. I kin tek sɔm mɔnt ɔ ivin wan ɔ mɔ ia fɔ mek wi Baybul studɛnt dɛn rich di gol fɔ baptayz. Wi fɔ wok tranga wan fɔ ɛp pɔsin fɔ bi Jizɔs in disaypul. If yu de stɔdi di Baybul wit pɔsin rayt naw, yu go gri se na so i bi. Insay dis atikul, wi go tɔk bɔt aw yu go ɛp yu Baybul studɛnt fɔ bi baptayz disaypul.

3. Wetin Matyu 28:19, 20 se Baybul studɛnt dɛn fɔ du so dat dɛn go rich di gol fɔ baptayz?

³ Bifo yu Baybul studɛnt baptayz, i fɔ de du wetin di Baybul se. (Rid Matyu 28:19, 20.) We Baybul studɛnt de du wetin i de lan, i go tan lɛk di “man we gɛt sɛns” na Jizɔs in stori, we dig dip fɔ bil in os pantap rɔk. (Mat. 7:24, 25; Lyuk 6:47, 48) Aw wi go ɛp Baybul studɛnt fɔ du wetin i de lan? Lɛ wi tɔk bɔt tri tin dɛn we wi fɔ du.

4. Aw wi go ɛp Baybul studɛnt fɔ mek i kɔntinyu fɔ du tin dɛn we go mek i kwalifay fɔ baptayz? (Luk di bɔks we se “ Ɛp Yu Baybul Studɛnt fɔ Sɛt Gol dɛn ɛn Rich Dɛn.”)

⁴ Ɛp yu Baybul studɛnt fɔ sɛt gol dɛn. Wetin mek yu fɔ du dat? Tink bɔt dis ɛgzampul: If una de travul go na fa say, una go gri fɔ pas na sɔm fayn ples dɛn. Da tɛm de, yu at nɔ go pwɛl bikɔs di ples fa. Semweso, we Baybul studɛnt dɛn sɛt gol dɛn we dɛn go rich jisnɔ, ɛn dɛn ebul fɔ rich dɛn gol dɛn de, dɛn go si am se dɛn go ebul fɔ rich di gol fɔ mek dɛn baptayz. Yuz di bɔks we se “Gol” na di Ɛnjɔy Layf Sote Go! buk fɔ ɛp yu Baybul studɛnt fɔ sɛt gol dɛn. Afta una dɔn ɛni lɛsin, tɔk to am bɔt aw di gol go ɛp am fɔ du wetin i jɔs dɔn lan. If yu go lɛk fɔ mek yu studɛnt sɛt ɔda gol, na fɔ rayt am na di say we se “Ɔda Gol.” Go de tɔk to yu studɛnt bɔt di gol dɛn we i go ebul fɔ rich insay shɔt tɛm ɔ di wan we i go tek lɔng tɛm fɔ rich.

5. Akɔdin to wetin de na Mak 10:17-22, wetin Jizɔs tɛl wan jɛntriman fɔ du, ɛn wetin mek?

⁵ Ɛp yu Baybul studɛnt fɔ mek chenj dɛn na in layf. (Rid Mak 10:17-22.) Jizɔs bin no se i go at fɔ mek wan jɛntriman sɛl ɔl wetin i gɛt. (Mak 10:23) Bɔt pan ɔl dat, i bin tɛl di man fɔ mek da big chenj  de na in layf. Wetin mek? Na bikɔs Jizɔs bin lɛk am. Sɔntɛnde, wi nɔ kin ɛnkɔrej wi Baybul studɛnt fɔ du di tin dɛn we i de lan bikɔs wi fil se i nɔ rɛdi fɔ mek dɛn chenj dɛn de na in layf. I kin tek tɛm fɔ mek pipul dɛn lɛf dɛn ol abit dɛn ɛn gɛt nyu abit dɛn. (Kol. 3:9, 10) We yu nɔ westɛm fɔ tɛl yu studɛnt fɔ mek chenj dɛn na in layf, insɛf nɔ go westɛm fɔ chenj in ol abit dɛn. If una de tɔk bɔt aw i go mek chenj dɛn na in layf, yu de sho se yu bisin bɔt am.—Sam 141:5; Prɔv. 27:17.

6. Wetin mek wi fɔ aks wi studɛnt kwɛstyɔn dɛn we de mek i tink?

⁶ I impɔtant fɔ mek wi aks wi Baybul studɛnt dɛn wetin dɛn de tink bɔt di tin we wi de tɔk bɔt. Dis go mek yu no wetin yu studɛnt ɔndastand ɛn wetin i biliv. If yu de du dis ɔltɛm, i go mek i izi fɔ mek yu tɔk to yu Baybul studɛnt bɔt tin dɛn we i nɔ gri wit. Di Ɛnjɔy Layf Sote Go! buk gɛt bɔku kwɛstyɔn dɛn fɔ mek pɔsin tink. Fɔ ɛgzampul, lɛsin 04 aks se: “Aw yu tink se Jiova de fil we yu yuz in nem?” Lɛsin 09 aks se: “Wetin na sɔm tin dɛn we yu go lɛk fɔ pre bɔt?” Fɔs, yu studɛnt go nid sɔm tɛm fɔ tink bɔt aw i go ansa kwɛstyɔn dɛn we de mek i tink. Yu go ɛp bay we yu tren am fɔ tink bɔt di skripchɔ dɛn ɛn di pikchɔ dɛn we de insay di buk.

7. Aw yu go yuz rial layf stori dɛn gud gud wan?

⁷ We yu studɛnt ɔndastand wetin i nid fɔ du, yuz rial layf stori dɛn fɔ ɛnkɔrej am fɔ du wetin i dɔn lan. Fɔ ɛgzampul, if yu studɛnt nɔ de atɛnd ɔl di mitin dɛn, yu kin sho am di vidio we nem Jiova Kia fɔ Mi we de na di say we nem “Du Mɔ Risach” na lɛsin 14. Insay bɔku lɛsin dɛn we de na di Ɛnjɔy Layf Sote Go! buk, yu go fɛn dɛn kayn ɛkspiriɛns dɛn ya na di say we nem “Lan Mɔ” ɔ “Du Mɔ Risach.” * Na fɔ tek tɛm mek yu nɔ kɔmpia yu studɛnt wit ɔda pɔsin bay we yu go se, “If da pɔsin de ebul fɔ du am, yusɛf go ebul fɔ du am.” Na fɔ mek di studɛnt se dat fɔ insɛf. Bifo dat, na fɔ tɔk bɔt di men tin dɛn we ɛp di pɔsin na di vidio fɔ du wetin i dɔn lan frɔm di Baybul. Sɔntɛm, yu kin tɔk bɔt wan impɔtant skripchɔ ɔ sɔntin we di pɔsin bin du. Ɛnitɛm we yu gɛt chans, na fɔ tɔk mɔ bɔt aw Jiova ɛp da pɔsin de.

8. Aw wi go ɛp wi studɛnt fɔ lɛk Jiova?

⁸ Ɛp yu Baybul studɛnt fɔ lɛk Jiova. Aw yu go du dat? Na fɔ luk fɔ we dɛn fɔ ɛp yu studɛnt fɔ lan mɔ bɔt Jiova in kwaliti dɛn. Ɛp yu Baybul studɛnt fɔ si Jiova as Gɔd we gladi ɔltɛm ɛn we de sɔpɔt di wan dɛn we lɛk am. (1 Tim. 1:11; Ibru. 11:6) Ɛp di studɛnt fɔ no se i go bɛnifit bay we i du di tin dɛn we i de lan, ɛn ɛksplen se di bɛnifit we i de gɛt de sho se Jiova lɛk am. (Ayz. 48:17, 18) Di mɔ we yu studɛnt lɛk Jiova, na di mɔ i go want fɔ mek ɛni chenj na in layf.—1 Jɔn 5:3.

9. Frɔm wetin de na Mak 10:29, 30, wetin go ɛp pɔsin fɔ mek sakrifays dɛn so dat i go bi baptayz disaypul?

⁹ Fɔ lɛ Baybul studɛnt baptayz, i nid fɔ mek sakrifays dɛn. Lɛk da jɛntriman we  wi bin dɔn tɔk bɔt, sɔm pan wi studɛnt dɛn nid fɔ sakrifays dɛn prɔpati dɛn. If di wok we i de du nɔ gri wit Baybul prinsipul dɛn, i go ivin nid fɔ chenj am ɛn go fɛn ɔda wan. Bɔku pan dɛn gɛt fɔ lɛf dɛn padi dɛn we nɔ lɛk Jiova. Ɔda wan dɛn fambul dɛn go drɛb dɛn bikɔs dɛn nɔ lɛk Jiova Witnɛs dɛn. Jizɔs bin tɔk se i go tranga fɔ sɔm pipul dɛn fɔ mek dɛn kayn sakrifays dɛn de. Bɔt i bin prɔmis di wan dɛn we de fala am se i nɔ go kɔmɔt biɛn dɛn. Jiova go blɛs dɛn wit famili we lɛk dɛn. (Rid Mak 10:29, 30.) Aw yu go ɛp yu Baybul studɛnt fɔ bɛnifit frɔm dis fayn gift?

10. Wetin yu lan frɔm wetin Manwɛl bin tɔk?

¹⁰ Na fɔ mek yu Baybul studɛnt bi yu padi. I impɔtant fɔ mek yu studɛnt no se yu bisin bɔt am. Wetin mek? Dis na wetin Manwɛl we de na Mɛksiko bin se. We i mɛmba we in na bin Baybul studɛnt, i se: “Ɛnitɛm we wi kin bigin fɔ stɔdi, mi ticha kin aks mi aw a de du. I bin de ɛp mi fɔ rilaks ɛn alaw mi fɔ tɔk bɔt ɛnitin. A kin fil se i rili bisin bɔt mi.”

11. Aw wi studɛnt dɛn go bɛnifit we dɛn de spɛn tɛm wit wi?

¹¹ Na fɔ spɛn tɛm wit yu studɛnt dɛn lɛk aw Jizɔs insɛf bin de spɛn tɛm wit in disaypul dɛn. (Jɔn 3:22) If yu Baybul studɛnt de mek chenj dɛn na in layf, yu kin invayt am fɔ kam na yu os fɔ kam it ɔ wach wan pan di JW Brɔdkastin program dɛn we wi kin gɛt ɛni mɔnt. Yu studɛnt go rili gladi if yu invayt am we in padi ɛn in fambul dɛn de ɛnjɔy ɔlide dɛn we Jiova nɔ gri wit, ɛn sɔntɛm i de fil lɛk se na in wangren de. Kazibwɛ we de na Yuganda bin se: “A tink se a lan bɔku tin bɔt Jiova we a bin de spɛn tɛm wit mi ticha ɛn we wi bin de stɔdi. A si aw Jiova bisin bɔt in pipul dɛn ɛn aw dɛn rili gɛt gladi-at. Na da kayn layf de misɛf bin want fɔ liv.”

12. Wetin mek wi fɔ briŋ difrɛn pɔblisha dɛn we wi de go du Baybul stɔdi?

 ¹² Invayt difrɛn pɔblisha dɛn we yu de go du yu Baybul stɔdi. Sɔntɛnde, wi kin si am izi fɔ mek wi wangren go du di stɔdi ɔ fɔ kɛr di sem pɔblisha ɔltɛm we wi de go stɔdi am. Pan ɔl we i go izi fɔ mek wi du dat, wi go ɛp wi Baybul studɛnt fɔ bɛnifit mɔ if sɔntɛnde, wi de kɛr difrɛn brɔda ɛn sista dɛn fɔ go stɔdi am. Dimitri we de na Mɔldova bin se: “Ɛni pɔblisha we bin kam fɔ stɔdi mi bin de ɛksplen di Baybul to mi fayn fayn wan. Dis bin ɛp mi fɔ si difrɛn we dɛn fɔ du wetin a de lan. Dɔn bak, a nɔ bin shem bɛtɛ we a go mi fɔs mitin bikɔs a bin dɔn sabi bɔku brɔda ɛn sista dɛn.”

13. Wetin mek wi fɔ ɛp wi Baybul studɛnt fɔ go di mitin dɛn?

¹³ Ɛp yu Baybul studɛnt fɔ go di mitin dɛn. Wetin mek? Na bikɔs Jiova kɔmand di wan dɛn we de wɔship am fɔ de mit togɛda, as dat na pat pan wi wɔship. (Ibru. 10:24, 25) Pantap dat, wi brɔda ɛn sista dɛn na di kɔngrigeshɔn tan lɛk wi famili. We wi de na mitin wit dɛn, i tan lɛk se wi de it swit it togɛda. We yu ɛp yu Baybul studɛnt fɔ de go di mitin dɛn, yu de ɛp am fɔ du wan impɔtant tin we go ɛp am fɔ baptayz. Bɔt i nɔ go izi fɔ mek i bigin go di mitin dɛn. Aw di buk we nem Ɛnjɔy Layf Sote Go! go ɛp yu Baybul studɛnt fɔ sɔlv ɛni prɔblɛm we de mek i nɔ go di mitin dɛn?

14. Aw wi go ɛnkɔrej wi Baybul studɛnt fɔ go di mitin?

¹⁴ Yuz lɛsin 10 na di buk we nem Ɛnjɔy Layf Sote Go! fɔ ɛp yu fɔ ɛnkɔrej yu Baybul studɛnt. Bifo dɛn mek dis buk dɔn, dɛn bin aks sɔm pɔblisha dɛn fɔ yuz dis lɛsin wit dɛn Baybul studɛnt dɛn. Dɛn se i bin wok fayn, ɛn i ɛp dɛn Baybul studɛnt dɛn fɔ go di mitin. Bɔt nɔ wet te una rich lɛsin 10 bifo yu invayt yu Baybul studɛnt fɔ go di mitin. Na fɔ invayt am wantɛm wantɛm ɛn kɔntinyu fɔ du so ɔltɛm. Difrɛn Baybul studɛnt dɛn kin gɛt difrɛn prɔblɛm dɛn. So pe atɛnshɔn to wetin yu studɛnt nid, ɛn si if yu go ebul fɔ ɛp am. Nɔ mek yu at pwɛl if i go tek lɔng tɛm bifo i bigin go di mitin dɛn. Na fɔ peshɛnt, bɔt kɔntinyu fɔ invayt am.

15. Wetin kin mek wi studɛnt dɛn fred?

¹⁵ Yu mɛmba se yu bin de fred smɔl fɔ bi wan pan Jiova Witnɛs dɛn? Sɔntɛm yu go dɔn fil se yu nɔ go ɛva ebul fɔ prich frɔm os to os. Ɔ yu go dɔn fred se yu fambul ɛn padi dɛn go de agens yu. If na so i bi, yu go ɔndastand aw yu Baybul studɛnt de fil. Jizɔs bin se sɔm pipul dɛn go fred da kayn we de. Bɔt i bin tɛl di wan dɛn we de fala am se dɛn nɔ fɔ alaw da kayn we de aw dɛn de fred fɔ mek dɛn lɛf fɔ sav Jiova. (Mat. 10:16, 17, 27, 28) Aw Jizɔs bin ɛp in disaypul dɛn fɔ lɛf fɔ fred? Ɛn aw wi go ebul fɔ falamakata in ɛgzampul?

16. Aw wi go tren wi Baybul studɛnt fɔ tɔk bɔt wetin i biliv to ɔda pipul dɛn?

¹⁶ Tren yu Baybul studɛnt smɔl smɔl fɔ tɔk bɔt wetin i biliv. Jizɔs in disaypul dɛn go dɔn fred smɔl we i bin sɛn dɛn fɔ go prich. Bɔt Jizɔs bin ɛp dɛn bay we i tɛl dɛn usay dɛn fɔ prich ɛn wetin dɛn fɔ prich bɔt. (Mat. 10:5-7) Aw yu go falamakata Jizɔs? Ɛp yu Baybul studɛnt fɔ si say dɛn we i go ebul fɔ prich. Fɔ ɛgzampul, yu kin aks am if i sabi pɔsin  we go bɛnifit fɔ lan wan patikyula tin we de insay di Baybul. Dɔn ɛp am fɔ pripia wetin i fɔ se bay we yu sho am simpul we dɛn fɔ tɛl ɔda pipul dɛn bɔt di trut. We nid de, yu ɛn in du di say we de na di Ɛnjɔy Layf Sote Go! buk we se “Sɔm Pipul dɛn Kin Se” ɛn “If Pɔsin Aks Yu.” We una de du dat, na fɔ pe atɛnshɔn fɔ tren yu Baybul studɛnt fɔ yuz di Baybul fɔ gi simpul ansa ɛn tek tɛm ansa dɛn.

17. Aw wi go yuz Matyu 10:19, 20, 29-31 fɔ ɛp wi Baybul studɛnt fɔ abop pan Jiova?

¹⁷ Ɛp yu Baybul studɛnt fɔ abop pan Jiova. Jizɔs bin tɛl in disaypul dɛn se Jiova go ɛp dɛn bikɔs I lɛk dɛn. (Rid Matyu 10:19, 20, 29-31.) Mɛmba yu studɛnt se Jiova go ɛp am bak. Yu kin ɛp yu Baybul studɛnt fɔ abop pan Jiova bay we yu de pre wit am bɔt di gol dɛn we i gɛt. Franchishɛk we de na Poland bin se: “Mi ticha bin de pre bɔt mi gol dɛn ɛnitɛm we i de pre. We a si aw Jiova ansa mi ticha in prea dɛn, wantɛm wantɛm, a bigin fɔ pre. A bin si aw Jiova ɛp mi di tɛm dɛn we a gɛt nyu wok ɛn we a bin nid fɔ aks mi bɔs fɔ mek a nɔ go go wok so dat a go ebul fɔ atɛnd di mitin dɛn ɛn di kɔnvɛnshɔn.”

18. Aw Jiova de fil bɔt di wok we Kristian ticha dɛn de du?

¹⁸ Jiova rili bisin bɔt wi Baybul studɛnt dɛn. I no se Kristian ticha dɛn de wok tranga wan fɔ ɛp pipul dɛn fɔ kam nia am mɔ ɛn mɔ, ɛn i lɛk dɛn fɔ dat. (Ayz. 52:7) If yu nɔ gɛt Baybul stɔdi naw, yu kin stil ɛp Baybul studɛnt dɛn so dat dɛn go kwalifay fɔ baptayz bay we yu de go wit ɔda pɔblisha dɛn to dɛn stɔdi dɛn.