1. Yɛɛ ndaa dimullɛ faŋga bɛndoo o wɔsiŋ kɛmɛ tasoŋ niŋ le tosaa?

O PAALE Pɛŋtikɔɔsileŋ choo wɔsi 33 o faŋaŋ Chiisu wo kɔɔli, mi puaa a waŋ laanduaa fula o lɛŋii yɛ yɛi niŋnda chuuŋgiaŋ Chulusalɛm. Nduyɛ, nda kpou sɔɔŋ maŋgalaŋ yɛ yiɔɔŋ ndaa dimi ni. Kɛ mi suɛi kɔndɔfille yɔŋnuŋ paaleleŋ. Mi Chuuwa apum kandu sɔɔŋ maŋgalaŋ wanaa ndaa fula kaŋ o lɛŋii yɛ yɛi niŋnda dimioo. Mi kɔndɔfillo bii faŋga bɛndoo hoo tau. Nduyɛ, mi nyɛ Chuuwa haa a nyɛ Pitɛ dimi wo pilaŋ faŋga bɛndoo hoo kɔltaŋ tau. Ma dimul faŋga bɛndu koŋ maa le ma sɔla piŋioo, mɛɛ ma dɔu tiindaŋndo o Chiisu Kiliti niŋ. Mi nyɛ nda tuei hoo wo nyindu nda ma nyuna aa: “Yɛɛnɛ naa ŋ tosa yɛ?” Mi Pitɛ mulul nda aa: “La mal yɔŋnda nyala wɔɔŋndaŋ, . . . ma yiŋ nya mɛɛ nya cho fau.”—Walta. 2:​37, 38.

2. Yɛɛ naŋ cho yɛ yaasiaa o buŋgɛi hei niŋ? (Tofa fotueiyo o kɔɔ.)

² Mi suɛi kɔndɔfilii cheleŋ yɔŋnuŋ vɛlɛ okoŋ kɔɔli. Mi waŋnda 3,000 sɔla yiŋɔɔ o paaleleŋ choo, nduyɛ ma simnuŋ buɛiyaa Kilitiaa. O paaleleŋ choo wali Chiisu dimul buɛiyaa nduaa le ma tosa wo kanduŋ ni. Nduyɛ, wali koŋ buɛiyaa nduaa cho hau tosaa ni. I cho tonya maa, ŋ tiuba miŋ mala hau waŋndo mbo yiŋ o hawɛila biŋgi bɛŋgu le. Mbo chua fɛŋ paŋgoŋ ɔɔ wɔsila bɔɔbɔɔ, tuupa miŋ mala wana naŋ cho pɛɛkoo wo mbo komal kpeleŋndo hoo. Naa kpou sina maa wallo pila yeemaŋ ni le waŋnda siiŋgoo buɛiyaa Chiisuaa. O buŋgɛi hei niŋ, ŋ cho yaasiaa nyɛ naŋ nɔ miŋ tosa le wanaa naŋ cho Baabuiyo pɛɛkoo wa malaa ma suliŋ le yiŋɔɔ wo.

3. A mɛɛ Maatiu 28:​19, 20 dimi yɛ, yɛɛ wana cho Baabuiyo pɛɛkoo wo nɔ yɛ mbo tosa le mbo suliŋ le yiŋɔɔ?

³ Tuupa mi wana cho Baabuiyo pɛɛkoo wo sɔla yiŋɔɔ, o nɔ fɛŋ mbo dɔu nyɛ o cho pɛɛkoo wo o wali niŋ. (Nuawɔ Maatiu 28:​19, 20.) Te o dɔu pɛ nyɛ o cho pɛɛkoo wo o wali niŋ, mɛɛ o cho machuaa maa “wana kɔl kalu pilɛ” Chiisu soo a ndu okɔɔ wo. Mi wana kɔl kaloo hoo taŋgul chiɛi ndɔɔ o lɛŋnde wɔsɔkɔleŋ choo. (Maa. 7:​24, 25; Luku 6:​47, 48) Vɛɛ naŋ mala yɛ wana naŋ cho Baabuiyo pɛɛkoo wo le mbo dɔu nyɛ o cho pɛɛkoo wo o wali niŋ? Ŋ tofaŋndɔ sɔɔŋ ŋgaa ŋ naŋ nɔ miŋ tosa woŋ.

4. Vɛɛ naŋ mala yɛ wana naŋ cho Baabuiyo pɛɛkoo wo le mbo suliŋ le yiŋɔɔ? (Tofa vɛlɛ kɔfoo hoo, “ Mala Wana Ŋ Cho Baabuiyo Pɛɛkoo Wo Mbo Kɛsi Kpeleŋndaŋ, Nduyɛ Mbo Komal Taŋ.”)

⁴ Mala wana ŋ cho Baabuiyo pɛɛkoo wo le mbo kɛsi kpeleŋndaŋ. Le yɛɛ naŋ nɔ yɛ miŋ tosa keŋ? Yiyaŋndɔ a taamaseliiyo hoo okɔɔ: Te a wa pɛ kɔlaŋ o tiŋ vilɛi vilɛiyo niŋ, mɛɛ ma wa pɛŋgioo o nɛi kanifuule, keŋ cho num mala a hiu saŋga le. O nɛi pilɛ koŋ choo, te wana cho Baabuiyo pɛɛkoo wo kɛsi pɛ kpeleŋnda pɔmpɔmbɔ laŋ nduyɛ mbo komal taŋ, keŋ cho ndu mala mbo kɛsi kpeleŋndo le yiŋɔɔ, nduyɛ mbo komal ndu. Soliŋ fondaŋndo hoo kpeku “Kpeleŋ Ŋ Nɔ Ma Kɛsi Wo” o yauwo hoo niŋ, Tuei Yoomoo Yeela Lefafɛɛŋ! le wana ŋ cho Baabuiyo pɛɛkoo wo malaa mbo kɛsi kpeleŋndaŋ. Te la chii pɛ suɛi lebolii kɛ kɛ, la suukaŋ mɛɛ nyɛ o pɛɛku wo chɛlaŋ a kpeleŋ o nɔ mbo kɛsi wo yɛ. Te a nɔ pɛ kpeleŋ cheleŋ o kɔl le wana ŋ cho pɛɛkoo wo, a poonyiaa ndu o fondaŋndo hoo “Nyɛ Cheleŋ.” Teleŋ o teleŋ nya pɛɛku pɛ, a soliŋ fondaŋndo hoo kpeku le mi la yaasiaa kpeleŋnda wana ŋ cho pɛɛkoo wo tiuba mbo komal suŋ suŋndaŋ, a la o tiuba mbo komal o chilaŋ niŋndaŋ.

5. A mɛɛ Maki 10:​17-22 dimi yɛ, yɛɛ Chiisu ndoo dimullɛ po sulaa pilɛ le mbo tosa, nduyɛ le yɛɛ?

⁵ Mala wana ŋ cho Baabuiyo pɛɛkoo wo le mbo tosa siŋgaŋndaŋ o yoomu ndɔɔ niŋ.  (Nuawɔ Maki 10:​17-22.) Mi Chiisu sina maa i cho wa ikala le mi wana sulaa pisi nyɛm kɛŋ ndɔŋ kpou, okoŋ mbo simnuŋ buɛi ndɔɔ. (Maki 10:​23) A koŋ kpou, mi Chiisu dimul po sulaa koŋ le mbo tosa siŋgaŋ bɛndu koŋ o yoomu ndɔɔ niŋ. Le yɛɛ? Kanifuule, Chiisu ndoo kaala ndu tau. Lepum, mi dialloŋ vi naa le wana naŋ cho Baabuiyo pɛɛkoo wo dɛɛniaa le mbo dɔu nyɛ o cho pɛɛkoo wo o wali niŋ kanifuule, miŋ yiyaŋ maa o bɛɛndiaŋndɔ le siŋgaŋndaŋ tosaa le. Le waŋnda apum, mbo chua teleŋndo tau le ma mal kaala ndala paandulaŋ, okoŋ ma wounuŋ wanachieeyɛi sɛnɛiye. (Kolo. 3:​9, 10) Kɛ te ŋ keleŋa nda pɛ chɔm siŋgaŋnda nda nɔ ma tosalaŋ, keŋ tosa ma keleŋa kaala laŋ malɔɔ. Te la wa pɛ suukaŋndo o sɔɔŋ waa naa choo, mɛɛ keŋ chɔm kpeekpei maa a nɔ yeemɛi o nda niŋ.—Sam 141:​5; Pulɔ. 27:​17.

6. Le yɛɛ naŋ nɔ yɛ miŋ nyuna wana naŋ cho pɛɛkoo wo nyunala mala ndu mbo yiyaŋndaŋ?

⁶ I cho suɛi sɔvɛ le miŋ nyuna wana naŋ cho pɛɛkoo wo le mbo chɔm naa yiyaŋ ndɔɔ a nyɛ o cho pɛɛkoo wo okɔɔ. A soliŋ nyunala waa naa kpeku le sinaa te o cho pɛ nyɛ ŋ cho ndu pɛɛkoo wo biyɔɔ bila ɔɔ te o laalaŋ ndu pɛ. Te la wa pɛ hei tosaa teleŋ o teleŋ, keŋ cho tosa mii wa tɛtɛlɛ le mi la suukaŋ o sɔɔŋ ŋpum choo, ŋ kiandu niŋ ndu o ba le mbo laalaŋ ndoŋ. Yauwo hoo Tuei Yoomoo Yeela Lefafɛɛŋ! nɔ nyunalaŋ tau la mala wana cho pɛɛkoo wo mbo yiyaŋndo. Le taamaseliiyo, suɛi lebolii 04 nɔ nyunaa aa: “O yiyaŋ numndo niŋ, vɛɛ kɔllo wa yɛ Chɛhowa te a wa pɛ diola ndɔlaŋ soliŋndo kpeku?” Suɛi lebolii 09 nɔ nyunaa aa: “Sɔɔŋ kuɛɛ ŋ yeema yɛ ma piɛi a muŋ okɔɔ?” O tasela ndɔ, mbo wa ikala le mi wana cho pɛɛkoo wo muli nyunalaŋ ndaŋ. A mala ndu le mbo yiyaŋ o bolii Baabuiye a fotueila cho o yau koŋ niŋndaŋ choo, le halikpeŋ mbo che mulilaŋ le nyunala laŋ.

7. Vɛɛ naŋ soliŋ yɛ sɔɔŋ yɔŋnaŋndoŋ kpeku le wanaa naŋ cho Baabuiyo pɛɛkoo wa malaa?

⁷ Te wana ŋ cho pɛɛkoo wo bii pɛ bila nyɛ o nɔ mbo tosa wo, a soliŋ sɔɔŋ yɔŋnaŋndoŋ kpeku le ndu malaa mbo tosa ndi. Le taamaseliiyo, te wana ŋ cho pɛɛkoo wo che ndi pɛ ikala le kɔlaŋ o bɔŋaŋndaŋ, a soliŋ viduei cho o suɛi lebolii 14 niŋndo kpeku le ndu malaa. Tofa o fondaŋndo hoo, “Chɔɔlu Sɔɔŋ Pum Tofa.” Vidueiyo hoo nɔ suɛi lebolle aa: Chɛhowa Buulaŋ a Ya. A saaluŋ vɛlɛ sɔɔŋ yɔŋnaŋ waa naa o fondaŋndo hoo bɛŋgu, “Chɔɔlu Yaasiaa Tosa.” * Wa yekeŋ, a nɔ ma tuu wana ŋ cho Baabuiyo pɛɛkoo wo a wana cheleŋ te. Nduyɛ a nɔ ma fafaŋ dimioo aa: “Te ndu tosa keŋ pɛ, mɛɛ num bɛɛ tiuba ma tosa ndi.” Wana ŋ cho Baabuiyo pɛɛkoo wo pila nɔ ni mbo dimi lende. A soliŋ sɔɔŋ kuluŋ mala wana nya che o vidueiyo niŋndo kpeku, le ndu malaa. Naapum a suaa a bolle Baabuile kpeekpeile mala ndu leŋ okɔɔ ɔɔ nyɛ o tosa mbo mala ndu wo. Te o bɛnda pɛ, a kindila a mɛɛ Chɛhowa mala wana koŋ yɛ okɔɔ.

8. Vɛɛ naŋ mala yɛ wana naŋ cho pɛɛkoo wo le mbo kaala Chɛhowa?

⁸ Mala wana ŋ cho pɛɛkoo wo le mbo kaala Chɛhowa. Vɛɛ ŋ tosa hei? Nuuviaa nɛila ŋ mala ndu le mbo chɔɔlu sina a suliŋnda Chɛhowalaŋ okɔɔ wo. Mala ndu mbo che maa Mɛlɛka kɔl kɛndɔɔ Chɛhowa cho ni, nduyɛ maa mbo toolu wanaa kaala ndu wa. (1 Timo. 1:​11; Hibu. 11:​6) Chɔm ndu maa o cho tɔnɔɔ sɔla tau, te o dɔu pɛ nyɛ o cho pɛɛkoo wo o wali niŋ. Nduyɛ tɛɛsial ndu maa, o nɛiyo hoo choo Chɛhowa chɔm ni maa o kaala ndu. (Aisaya 48:​17, 18) Te wana ŋ cho pɛɛkoo wo nɔ pɛ kaala yiŋgoloŋndo le Chɛhowa, keŋ cho ndu mala mbo tosa siŋgaŋnda yeemaŋ ndaŋ.—1 Chɔŋ 5:​3.

9. Vɛɛ diomnde mɛyaale Chiisu dimi o Maki 10:​29, 30 niŋndo mala yɛ waŋndo mbo soliŋ sala, nduyɛ mbo suliŋ le yiŋɔɔ?

⁹ Le mi wana ŋ cho pɛɛkoo wo suliŋ le yiŋɔɔ, o nɔ mbo soliŋ sala. Maa po sulaa naŋ soo suŋ a ndu okɔɔ wo, wanaa naŋ cho pɛɛkoo wa apum nɔ ma soliŋ sala le nyɛm kiɔɔŋ malɔɔ. Nduyɛ te o yɔŋ pɛ maa wali nda cho tosaa wo chɛlaŋ a sawala mandaala Baabuiyo le, mɛɛ a nɔ ma mal wali koŋ okoŋ ma nuuviaa wali cheleŋ. Mi a bɔɔbɔɔ soliŋ sala le chaaŋaa ndaa piɛi Chɛhowa le wa fafaŋndo. Apum yɛ, mi yuŋgula ndalaŋ la mal nda le mɛɛ nda cho Chɛhowa piɛiyo yɛ. Mi Chiisu dimi maa i cho wa ikala waŋnda apum o ba, le ma soliŋ sala o nɛila waa naa choo. Kɛ mbo dimi vɛlɛ maa, wanaa tual ndu kɔɔli wa kil niŋ iso le. Chɛhowa cho nda salaa dɔwɔɔ ma sɔla yuŋgulaŋ o kɔɔna ndɔɔ niŋ. (Nuawɔ Maki 10:​29, 30.) Vɛɛ ŋ mala yɛ wana ŋ cho Baabuiyo pɛɛkoo wo le mbo sɔla tɔnɔɔ o diomnde mɛyaaleŋ ndeŋ niŋ?

10. Yɛɛ ŋ pɛɛku yɛ o nyɛ Manuɛl dimi wo niŋ?

¹⁰ Kindiŋ le mi chaŋyɛi kpɛɛluŋnde wa nya tɛɛŋ nya wana ŋ cho pɛɛkoo wo. I cho suɛi sɔvɛ le ma chɔm wana ŋ cho pɛɛkoo wo maa a buulaŋ tau a ndu okɔɔ. Le yɛɛ? Tofawɔ nyɛ Manuɛl, puaapilɛnɔɔ o lɛŋnde Mɛsikoleŋ niŋ dimi wo, mɛɛ o loonuŋ a teleŋ o wa Baabuiyo pɛɛkoo wo. Mbo dimi aa: “Tuupa mi naŋ kandu pɛɛku kɛ kɛ, mi wana ni pɛɛkaa ndoo nyuna ya mɛɛ sɔɔŋ wa a ya yɛ. Mi hei ndii mala ya mi wa fɛɛsɛŋ le ndu chɔmndo nyɛ o nyɛ. Mi sina kɛsɛ maa o buulaŋ bɔɔ a ya okɔɔ.”

11. Vɛɛ wana naŋ cho Baabuiyo pɛɛkoo wo sɔla yɛ tɔnɔɔ, te ŋ wa pɛ teleŋndo chuaa latulu a ndu?

¹¹ Chua teleŋndo a wana num pɛɛkaa, mɛɛ Chiisu ndoo chua teleŋndo a buɛiyaa nduaa yɛ. (Chɔŋ 3:​22) Te o bɛnda pɛ, a veelu pɛɛku Baabui cho hiouwɔɔ lachioo tosaa wo o numndo bɛɛ le nyɛdiaa dioo ɔɔ le mi la tofa Tɛlivisiɔŋ Seiyaa Chɛhowaa fula ipaŋgu o ipaŋgu wo. Naapum mbo naŋ kɔl tau le veelu waa naa taama taama o palɛi bɛnduei choo kanifuule, a teleŋ koŋ chaaŋaa nduaa paanduaa  kua yelelaŋndaŋ tosaa ni. Mi puaapilɛnɔ pilɛ o lɛŋnde Yukaŋndaleŋ niŋ diolaŋ Kasibui dimi aa: “I yiyaŋ maa a teleŋ yaa wa latulu naa wana ni pɛɛkaa wo yaa pɛɛku tau a Chɛhowa okɔɔ ni, mbo hiau teleŋ naŋ soliŋ kpeku le pɛɛkoo wo. Mi cha mɛɛ Chɛhowa buulaŋ a wanaa nduaa yɛ vɛlɛ a mɛɛ nda cho a kɔl kɛndɛ yɛ. Nduyɛ lende yaa yeema ni mi yoomu nuu ndoo wa.”

12. Le yɛɛ naŋ nɔ yɛ miŋ kuɛ a wanaa dimiaa yooŋgu kɛndiaa yɛ yiaa o pɛɛkula Baabuila naalaŋ?

¹² Kɔ a wanaa dimiaa yooŋgu kɛndiaa yɛ yiaa o pɛɛkula Baabuila numndaŋ. Lepum miŋ yiyaŋ maa o bɛnda miŋ kuɛ kpeele ɔɔ miŋ wa kɔlaŋ teleŋ o teleŋ a wana pilɔɔ o wanaa naŋ cho pɛɛkoo wa lo. Mi che bɛɛ hei cho suɛi wɔɔŋ te, kɛ mi wanaa naŋ cho pɛɛkoo wa sɔla tɔnɔɔ tau, te ŋ kuɛ pɛ a wanaa cheleŋ le nda pɛɛkoo. Mi puaapilɛnɔ pilɛ o lɛŋnde Mɔdovaleŋ niŋ diolaŋ Dimitili dimi aa: “Mi wanaa ndaa huŋ ya pɛɛkoo wa ndaa soliŋ nɛila yɛ yɛlaŋ kpeku le ya sɔɔŋ tɛɛsiallo. Mi hei ndii mala ya le mi nuuviaa nɛila cheleŋnda ya duau nyɛ ya wa pɛɛkoo wo o wali niŋndo. Paale tasele ya kuɛ o bɔŋaŋndo leŋ, siɔmbula ve ya tau le kanifuule, yaa sina niŋ puaapiliaa a ndepiliaa bɔɔbɔɔ.”

13. Le yɛɛ naŋ nɔ yɛ miŋ mala wana naŋ cho pɛɛkoo wo le mbo wa kɔlaŋ o bɔŋaŋndaŋ?

¹³ Mala wana ŋ cho pɛɛkoo wo le mbo wa kɔlaŋ o bɔŋaŋndaŋ. Le yɛɛ? Kanifuule, Chɛhowa dimul buɛiyaa nduaa le ma wa chuuŋgiaŋndo diompilɛ le ndu piɛiyo. (Hibu. 10:​24, 25) Le handɔɔ lechoo, puaapiliaa a ndepiliaa cho yuŋgu naa o Mɛlɛka piɛiyo niŋ ni. Te ŋ kuɛ pɛ o bɔŋaŋndaŋ, mii wa ko naŋ chaa o bɛɛ naŋ cho ni, miŋ wa nyɛdiaa dioo latulu naa ndaa. Te a mala pɛ wana ŋ cho Baabuiyo pɛɛkoo wo le mbo wa kɔlaŋ o bɔŋaŋndaŋ, mɛɛ kpeleŋ sɔvɛ sɔviɔɔ o cho koŋ komallo ni le mbo suliŋ le yiŋɔɔ. Kɛ i cho wa bɛɛŋ bɛɛŋ le kpeleŋndo hoo komallo le. Vɛɛ yauwo hoo Tuei Yoomoo Yeela Lefafɛɛŋ! cho yɛ ndu mala, mbo tiu simulta cho ndu komal taŋ ba?

14. Vɛɛ ŋ mala yɛ wana ŋ cho pɛɛkoo wo le mbo nɔ yeemɛi le kɔlaŋ o bɔŋaŋndaŋ?

¹⁴ Soliŋ suɛi lebolii 10 kpeku o yauwo hoo niŋ, Tuei Yoomoo Yeela Lefafɛɛŋ! le wana ŋ cho pɛɛkoo wo dɛɛniaa le mbo nɔ yeemɛi le kɔlaŋ o bɔŋaŋndaŋ. Tuupa mi yauwo hoo fula, ma dimul wanaa dimiaa yooŋgu kɛndiaa nɔ taasioo tau wa le ma soliŋ ndu kpeku le wanaa nda cho pɛɛkoo wa dɛɛniaa le ma kandu kɔlaŋ o bɔŋaŋndaŋ. Nduyɛ ma sɔla batiuwaa tau. Te la kandu pɛ yauwo hoo pɛɛkoo nya wana ŋ cho Baabuiyo pɛɛkoo wo, a nɔ ma chum haaa mɛɛ mi la fuuluu fɛŋ o suɛi lebolii 10, malaŋ ŋ veelu ndu o bɔŋaŋndaŋ te. Kindiŋ ma veelu ndu o bɔŋaŋndaŋ te la kandu dɔɔ pɛ pɛɛkoo. Nduyɛ wa keŋ tosaa teleŋ o teleŋ, te o kendu wɔ le. Wanaa naŋ cho pɛɛkoo wa o kɛ kɛ nɔ bahawɛilaŋ. Lelaŋ, yaŋ o kɛ kɛ nilaŋ te o wa num pɛ bahawɛi ndɔɔ chɔmndo. Nduyɛ, kindiŋ le ndu mala o yeema wo kioo. Tambu kɔl te o yɔŋ bɛɛ mbo keleŋa kandɔɔ kɔlaŋ o bɔŋaŋndaŋ te. Biunuŋ ndu, nduyɛ ma hiou lachi a ndu veeloo.

15. Siooŋii yɛɛ wanaa naŋ pɛɛku wa apum nɔ yɛ?

¹⁵ A loonuŋ mɛɛ siooŋnde ndii wa num le simnɔŋndo Sei Chɛhowaa yɛ? Naapum a teleŋ koŋ ma yiyaŋ maa a tiuba ma dimi yooŋgu kɛndɔɔ o luŋ kpendekele le. Ɔɔ naapum, siooŋnde wa num maa yuŋgu numndo ɔɔ chaaŋaa numnda cho num simul tau. Te o yɔŋ pɛ maa lende i wa ni, mɛɛ a tiuba ma bii bila mɛɛ wana ŋ cho pɛɛkoo wo cho sinaŋndo yɛ. Mi Chiisu dimi maa waŋnda apum cho nɔ siooŋii waa naa. Kɛ mbo dimul buɛiyaa nduaa maa a nɔ ma chɛl mi siooŋnde kuuna nda Chɛhowa piɛiyo le. (Maa. 10:​16, 17, 27, 28) Vɛɛ Chiisu mala yɛ buɛiyaa nduaa le ma mal siooŋnde? Nduyɛ vɛɛ naŋ tuallɛ tamasi ndɔɔ kɔɔli?

16. Vɛɛ naŋ mala yɛ wana naŋ cho pɛɛkoo wo le mbo dimul acheleŋnda nyɛ o cho pɛɛkoo wo?

 ¹⁶ Mala wana ŋ cho pɛɛkoo wo o pɔmpɔmbɔ le mbo dimul acheleŋnda nyɛ o cho pɛɛkoo wo. Naapum siooŋnde wa buɛiyaa Chiisuaa mɛɛ o vem nda yooŋgu kɛndɔɔ dimioo, kɛ mbo mala nda tau. Mbo dimul nda wanaa nda nɔ ma dimul yooŋgu kɛndɔɔ wa, a yooŋgu nda nɔ ma dimi wo. (Maa. 10:​5-7) Vɛɛ ŋ tuallɛ taamasi Chiisu wo kɔɔli? Mala wana ŋ cho pɛɛkoo wo mbo sina wanaa o nɔ mbo kandu yooŋgu kɛndɔɔ dimullo wa. Le taamaseliiyo, a nyuna ndu te o sina wana sɔla niŋ tɔnɔɔ o tonya Baabuiyo opum niŋndo. Mala ndu o nɛi tɛtɛlɔɔ niŋ le mbo bɛɛndiaŋ nyɛkɛndɛi le wana koŋ tɛɛsiallo. Te o bɛnda pɛ, soliŋ fondaŋndo hoo kpeku, “Te Waŋndo Dimi Pɛ Aa” a “Te Waŋndo Nyuna Pɛ Aa” o yauwo hoo niŋ, Tuei Yoomoo Yeela Lefafɛɛŋ! le mi la tuula mɛɛ o tosa ndi yɛ. Te la wa pɛ hei tosaa, pɛɛku ndu mɛɛ o soliŋ Baabuiyo kpeku le nyunala wana koŋ mulioo o nɛi tɛtɛlɔɔ a o nɛi lebɛɛ niŋ yɛ.

17. Vɛɛ naŋ soliŋ yɛ Maatiu 10:​19, 20 a 29-31 kpeku, le wana naŋ cho pɛɛkoo wo malaa mbo tiindaŋ Chɛhowa?

¹⁷ Mala wana ŋ cho pɛɛkoo wo le mbo tiindaŋ Chɛhowa. Mi Chiisu ke buɛiyaa nduaa tiindaŋndo maa Chɛhowa cho nda mala kanifuule, o kaala nda. (Nuawɔ Maatiu 10:​19, 20, 29-31.) Ke wana ŋ cho pɛɛkoo wo tiindaŋndo maa ndu bɛɛ Chɛhowa cho ndu mala. A mala ndu mbo tiindaŋ Chɛhowa te la wa pɛ piɛileŋ diompilɛ a kpeleŋnda ndɔlaŋ okɔɔ. Mi puaapilɛnɔ pilɛ o lɛŋnde Polaŋndeŋ niŋ diolaŋ Filaŋsisɛk dimi aa: “Te wana ni pɛɛkaa ndoo wa pɛ piɛileŋ, mi ndoo soo a kpeleŋnda nilaŋ okɔɔ. Nduyɛ mɛɛ ya che mɛɛ Chɛhowa ndoo muli piɛile ndɔleŋ yɛ, mi ya bɛɛ kandu piɛileŋ o Chɛhowa lo. Teleŋ o teleŋ Chɛhowa wa ya malaa, te yaa nyuna pɛ wana ni banaa le mbo ke ya palɛi itiŋ le kɔlaŋ o bɔŋaŋndaŋ a o bɔŋaŋ bɛndoo.”

18. Yɛɛ Chɛhowa nɔ yɛ le wanaa dimiaa yuŋgu kɛndiaa cho sɛmbɔɔ dɔwɔɔ le waŋnda malaa ma sɔɔŋguu ndu ikɛi ya?

¹⁸ Chɛhowa buulaŋ tau a wanaa naŋ cho Baabuiyo pɛɛkoo wa okɔɔ. O nɔ balika melaa tau le wanaa dimiaa yuŋgu kɛndiaa cho sɛmbɔɔ dɔwɔɔ le waŋnda malaa ma sɔɔŋguu ndu ikɛiya, nduyɛ o kaala nda tau. (Aisaya 52:​7) O yɔŋ bɛɛ ma nɔ wana ŋ pɛɛku Baabuiyo suŋ suŋ te, a tiuba ma mala wanaa cho Baabuiyo pɛɛkoo wa ma tosa hiouwɔɔ lachioo, nduyɛ ma suliŋ le yiŋɔɔ. A tosa hei sanaa te a wa pɛ wanaa cho nda pɛɛkoo wa malaa le nda pɛɛkoo.