1. Yinki badisiple ya Yesu zonzá na bantu mingi na kusala?

BABAKALA na bakento mingi salá voyaje tii na Jeruzalem. Ba katuká na babwala mingi mpe ba vandá zonza bandinga mingi. Mambu mosi ya vrai kitoko salamá kilumbu yina. Bantu yina kwizá na Jeruzalem pamuká na kutala ti, Bajwif ya nkaka vandá solola na bawu na bandinga ya bawu ya bwala! Kasi bamambu yina Bajwif yayi vandá zonza mpe mambu apotre Piere zonzá na bawu lutilá kitoko. Bantu yayi longoká ti ba lenda vuuka kaka si ba tula kiminu ya bawu na Yesu. Bamambu yayi simbá mingi bantima ya bawu. Na yawu, ba yufulá: ‘Yinki beto ke sala?’ Apotre Piere zonzá na bawu: ‘Muntu nyonso na kati ya beno kuzwa bateme.’—Bis. 2:37, 38.

2. Yinki beto ke zonzila na artikle yayi? (Tala foto ya kuverture.)

² Mambu yina salamá na manima, vandá mpe vrai kitoko. Bantu kuluta 3000 kuzwá bateme kaka na kilumbu mosi mpe ba kumá badisiple ya Yesu. Kisalu ya nene ya kukumisa bantu badisiple yina Yesu zonzá na kusala, bandá kilumbu yina. Kisalu yayi mpe ke na kontinye kusalama tii bubu yayi. Bubu yayi, beto lenda solola ve na muntu na mambu ya Biblia kaka mwa ba-heure mpe na manima yandi kuzwa bateme. Ya lendá baka ba-mois, to ba-année na muntu yina ke longoká Biblia na kuzwa bateme. Si nge ke na longoká Biblia na muntu ntangu yayi, nge me zaba ti samu na kukumisa yandi disiple ya Yesu, nge me lunga kusala bangolo. Na artikle yayi, beto ke zonzila wa’ faso beto lenda sadisa ba yina ke longoká Biblia na kuzwa bateme.

3. Faso me zonzila yawu Matayi 28:19, 20, yinki muntu yina ke longoká Biblia zolá sala samu na kukwenda tii na bateme?

³ Avant na kuzwa bateme, muntu yina ke longoká Biblia zolá sadila bamambu yina Biblia ke zonzá. (Tanga Matayi 28:19, 20.) Si yandi sala yawu, yandi ke kuma faso ‘muntu ya mayela’ yina Yesu zonzilá na ekzample ya yandi. Muntu yango timuná dibulu ya yinda tii kote yina vandá ditadi mosi ya nene mpe yandi tungá yinzo ya yandi na zulu ya yawu. (Mat. 7:24, 25; Luke 6:47, 48) Wa’ faso beto lendá sadisa muntu yina ke longoká Biblia na kusadila bamambu yina yandi ke na longoká? Beto zonzila bima tatu yina beto lenda sala.

4. Wa’ faso nge lenda sadisa muntu yina ke longoká Biblia na kusala bamambu yina ke nata yandi tii na bateme? (Tala mpe enkadre “ Sadisa muntu yina ke longoká na nge na kusala ba-projet ya kimpeve mpe na kulungisa yawu.”)

⁴ Sadisa muntu yina ke longoká Biblia na kusala ba-projet ya kimpeve. Samu na yinki nge zolá sala yawu? Kanisa ntete: nge ke na kwendá na bwala mosi yina ke ntama. Na kati-kati ya voyaje ya nge, nge me baka desizion ya kupema na kote mosi ya kitoko. Ya ke sala ti nge lemba ve ata nge zaba ti kote nge ke na kwendá ke ntama. Faso mosi mpe, si muntu yina ke longoká Biblia ke na salá ba-projet yina yandi lenda lungisa na mwa ntangu fioti, ya ke talana ve mpasi na yandi na kulungisa projet ya kuzwa bateme. Sadila enkadre yina ba ke bokilá “Yina nge lenda sala” na kati ya livre Sepela na luzingu ya ntangu nyonso!, samu na kusadisa muntu yina ke longoká na nge na kukula na kimpeve. Na nsuka ya mosi na mosi ya baleson, beno solola na enkadre “Yina nge lenda sala.” Ya ke sadisa yandi na kusadila bamambu yina yandi me longoka. Si ya ke na ba-projet ya nkaka yina nge ke na nsatu muntu yina ke longoká Biblia lungisa, nge lenda sonika yawu na plase yina ba me zonza “Mambu ya nkaka.” Ntangu nyonso, vutukila na yandi ba-projet yina yandi lendá lungisa na mwa ntangu fioti mpe yina yandi lenda lungisa na manima ya bantangu mingi.

5. Faso ke na zonzak’ yawu Marke 10:17-22, yinki Yesu zonzá na bakala mosi yina vandá na mbongo mingi na kusala mpe samu na yinki?

⁵ Sadisa muntu yina ke longoká na nge na kusala bachanjement na luzingu ya yandi. (Tanga Marke 10:17-22.) Yesu zabá ti ya zolá vanda mpasi na bakala mosi yina vandá na mbongo mingi na kutekisa babima nyonso yina vandá na yandi.  (Mrk. 10:23) Ata faso yina, Yesu zonzá na bakala yango na kusala chanjement ya nene yina na luzingu ya yandi. Samu na yinki? Samu Yesu vandá zola yandi. Bantangu ya nkaka, beto lenda ezite na kunata muntu yina ke longoká na beto na kusadila bamambu yina yandi ke na longoká samu beto ke na kanisá ti, yandi ke ntete ve na ngolo ya kusala bachanjement yina Biblia ke na zonzá na yandi na kusala. Ya vrai, ya lenda baka ntangu na bantu ya nkaka na kusala bachanjement na luzingu ya bawu mpe na kulwata kimuntu ya malu-malu. (Kol. 3:9, 10) Kasi, si beto lutisa ve ntangu avant na kuzonzila yandi bachanjement yina yandi me lunga kusala, yandi mpe ke lutisa ve ntangu mingi samu na kubanda kusala yawu. Kuzonzila yandi bamambu yayi ke lakisa ti nge ke zolak’ yandi.—Nku. 141:5; Bin. 27:17.

6. Samu na yinki nge zolá yufula muntu yina ke longoká na nge bakestion yina ke nata yandi na kuzonza bamambu yina ke na yandi na ntima?

⁶ Ya ke important na kuyufula na muntu yina ke longoká na nge yinki yandi ke na kanisá na mambu yina nge ke na sololá na yandi. Ya ke sadisa nge na kuzaba yinki yandi ke na komprendre mpe si yandi ke na ndimá mambu yina beno ke na sololá. Si ntangu nyonso nge ke na masolo ya faso yayi na yandi, ya ke vanda ve mpasi na nge na kusolola na yandi na bamambu yina yandi ke na talá mpasi na kundima. Livre Sepela na luzingu ya ntangu nyonso! ke na bakestion mingi yina ke nata muntu yina ke longoká Biblia na kuzonza bamambu yina ke na yandi na ntima. Na kifwani, leson 04 ke na kestion yayi: “Yinki ya ke salá Yehova na ntima, ntangu nge ke sadilá nkumbu ya yandi?” Leson 09 ke na kestion yayi: “Samu na wapi mambu nge lenda sambila?” Na kubanda, ya lenda vanda mpasi na yandi na kupesa bareponse na bakestion yayi. Nge lenda lakisa yandi faso ya kukanisa na baverse mpe bafoto yina ba me tula na kati ya livre.

7. Wa’ faso nge lenda sadila masolo ya luzingu ya bantu ya nkaka?

⁷ Ntangu muntu yina ke longoká na beto ke zaba bamambu yina yandi me lunga kusala, sadila masolo ya luzingu ya bantu ya nkaka samu na kunata yandi na kusala bachanjement. Na kifwani, si yandi ke na talá mpasi na kukwiza na balukutakanu, nge lenda lakisa yandi video ‘Yehova vandá na munu’ yina ke na seksion “Sala barecherche” na leson 14. Na baleson mingi ya livre Sepela na luzingu ya ntangu nyonso!, nge ke kuzwa masolo mingi ya luzingu ya bantu na baseksion “Sosa kuzaba mbote-mbote” to “Sala barecherche.” * Sala keba, kukompare ve yandi na muntu yina ba ke na zonzilá na disolo ya luzingu. Na yawu, kuzonza ve: “Si yandi lendá kusala yawu nge mpe ke lenda.” Bika yandi mosi kwiza ndima yawu na ntima ya yandi. Zonzila yandi mwa bima yina sadisá muntu yina ke na kati ya video na kusadila mambu ya Biblia. Na kifwani, nge lenda rapele yandi verse to kima ya nkaka yina sadisá muntu yina. Zonzila yandi surtout faso Yehova sadisá muntu yango.

8. Wa’ faso beto lenda sadisa muntu yina ke longoká na beto na kuzola Yehova?

⁸ Sadisa muntu yina ke longoká na nge na kuzola Yehova. Wa’ faso? Sosa ba-okazion ya kusadisa muntu yina ke longoká na nge na kuzaba dyaka mingi bifu ya mbote ya Yehova. Sadisa yandi na kuzaba ti Yehova ke Nzambi ya kilengi, yina ke sadisá ba yina ke zolak’ yandi. (1 Tim. 1:11; Ebr. 11:6) Lakisa yandi ti, kusadila bamambu ya Biblia ke natina yandi mambu ya bien na luzingu, mpe ya ke faso ya Yehova ya kulakisa yandi luzolo. (Iza. 48:17, 18) Ntangu luzolo ya yandi samu na Yehova ke kula, yandi ke kuma na nsatu ya kusala bachanjement.—1 Yoa. 5:3.

9. Faso me zonza Marke 10:29, 30, yinki lenda sadisa muntu yina ke longoká Biblia na kusala basakrifise samu na kukwenda tii na bateme?

⁹ Samu na kukwenda tii na bateme muntu yina ke longoká Biblia zolá sala basakrifise. Faso Yesu  zonzá na bakala yina vandá na mbongo mingi yina kwenda tala yandi, bantu ya nkaka yina ke longoká Biblia zolá ndima kusala basakrifise. Si kisalu yina ba ke na salá ke na kwelaná ve na mambu yina Biblia ke zonzá, ya lenda sosa ti ba sala bachanjement. Mingi lenda zenga kikamarade ya bawu na ba yina ke zolá ve Yehova. Ba ya nkaka lenda ndima ti bantu ya famiye ya bawu yina ke zolá ve Batemwe ya Yehova manga bawu. Yesu zonzá ti ya lenda vanda mpasi na bantu ya nkaka na kusala basakrifise yayi. Kasi yandi pesá promese ti, ba yina ke ndima kukuma badisiple ya yandi ke nyonga ve desizion yina ba ke baka. Yehova ke pesa bawu famiye ya luzolo na kati ya bisadi ya yandi. (Tanga Marke 10:29, 30.) Wa’ faso nge lenda sadisa muntu yina ke longoká na nge na kuzwa kado ya kitoko yayi?

10. Yinki beto lenda longoka na mambu yina Manuel zonzá?

¹⁰ Vanda kamarade ya muntu yina ke longoká na nge. Ya ke important na kulakisa na muntu yina ke longoká na nge ti nge ke zolak’ yandi. Samu na yinki? Tala mambu yayi zonzá Manuel, yina ke vandá na Mexique. Yandi ke na serapeleke ntangu yina yandi vandá longoka ntete Biblia. Yandi me zonza: “Avant beto banda kulongoka, mpangi yina vandá longoká na munu vandá yufulá munu faso vandá sante ya munu. Ya sadisá munu na kuvanda aleze na yandi mpe na kuzonzila yandi bamambu mingi ya nkaka ya luzingu ya munu. Mu vandá tala ti yandi vandá na luzolo ya mingi samu na munu”

11. Wa’ faso kulutisa ntangu na muntu yina ke longoká na beto lenda sadisa yandi?

¹¹ Lutisa ntangu na muntu yina ke longoká na nge, faso Yesu vandá lutisá ntangu na badisiple ya yandi. (Yoa. 3:22) Si muntu yina ke longoká na nge ke na salá bachanjement na luzingu ya yandi, nge lenda invite yandi na yinzo ya nge samu beno kunwa mwa jus, to kudya mwa kima to beno tala emision mosi ya JW Télédiffusion. Yandi ke sepela surtout si nge invite yandi ntangu bakamarade ya yandi mpe bantu ya famiye ya yandi ke salá bafete yina Biblia ke niminá to ntangu yandi ke vandá izole. Kazibwe, mpangi mosi ya bakala yina ke vandá na Ouganda me zonza: “Mu kwizá zaba bamambu mingi ya Yehova lere mu vandá lutisá ntangu na mpangi yina vandá longoká na munu, kulutila ntangu yina beto vandá longoká Biblia. Mu vandá  tala na meso ya munu faso Yehova vandá kipe bisadi ya yandi mpe kilengi yina vandá na bawu. Mu vandá na nsatu luzingu ya munu vanda faso ya bawu.”

12. Samu na yinki nge zolá nata baproklamatere mingi ya nkaka ntangu nge ke kwendá longoká na muntu?

¹² Nata baproklamatere ya nkaka na kukwenda longoka na yandi. Bantangu ya nkaka, nge lenda tala ti ya ke bien nge kwenda longoka na muntu kaka nge mosi to na kunata kaka proklamatere mosi bambala nyonso yina nge ke kwenda longoká na yandi. Ata faso ya kusala yayi ke bien samu na nge, zaba ti si na ba-okazion nyonso yina beno ke longoká nge ke natá baproklamatere mingi ya nkaka, ya ke sadisa muntu yina ke longoká na nge. Dmitrii yina ke vandá na Moldavie me zonza: “Mosi na mosi ya baproklamatere yina vandá kwizá na mpangi yina vandá longoká na munu vandá lakisá munu bamambu na faso ya malu-malu. Ya vandá sadisa munu na kutala faso ya nkaka yina mu lenda sadila mambu yina mu me longoka. Ya salá mpe ti mu vanda ve na nsoni ntangu mu kwizá mbala ya ntete na balukutakanu, samu mu zabá deja bampangi mingi ya kento na ya bakala.”

13. Samu na yinki beto zolá sadisa muntu yina ke longoká na beto na kukwiza na balukutakanu?

¹³ Sadisa yandi na kukwiza na balukutakanu. Samu na yinki? Samu Yehova zonzá na bisadi ya yandi na kuvukaná. Ya ke faso ya beto ya kusambila yandi. (Ebr. 10:24, 25) Mpe, bampangi ya beto Batemwe ke faso famiye ya beto. Ntangu beto ke vandá na balukutakanu na bawu, ya ke nete beto me vukana samu na kudya madya ya kitoko. Si nge sadisa muntu yina ke longoká na nge na kukwiza na balukutakanu, yandi ke luta etape mosi ya important yina ke nata yandi tii na bateme. Kasi ya lenda vanda mpasi na yandi na kubanda kukwiza na balukutakanu. Wa’ faso livre Sepela na luzingu ya ntangu nyonso! lenda sadisa yandi?

14. Wa’ faso beto lenda pesa kuraje na muntu yina ke longoká na beto na kukwiza na balututakanu?

¹⁴ Leson 10 ya livre Sepela na luzingu ya ntangu nyonso! ke sadisa nge na kupesa kuraje na muntu yina ke longoká na nge na kukwiza na balukutakanu. Avant livre yayi basika, ba zonzá na baproklamatere ya nkaka na kusadila leson yayi na ba yina ke longoká na bawu. Ba me zonza ti ya ke leson mosi ya bien, mpe ya me sadisa bantu mingi yina ke longoká Biblia na kukwiza na balukutakanu. Kuvingila ve tii leson 10 samu na kubokila muntu yina ke longoká na nge na balukutakanu. Lere nge ke bandá kulongoka na muntu, bokila yandi na balukutakanu mpe kontinye kusala yawu ntangu nyonso. Ba yina ke longoká Biblia ke kutaná ve na bamambu ya mpasi ya faso mosi. Sosa kuzaba kima yina muntu yina ke longoká Biblia ke na nsatu mpe tala faso nge lenda sadisa yandi. Kulemba ve si yandi ke na baká mwa ntangu avant na kukwiza na balukutakanu. Vanda na ntima ya yinda mpe kontinye na kubokila yandi.

15. Wapi boma muntu yina ke longoká Biblia lenda vanda na yawu?

¹⁵ Nge na zabá dyaka faso dikanisi ya kukuma Temwe ya Yehova vandá pesa nge boma? Ntangu ya nkaka nge vandá kanisa ata fioti ve ti nge ke lenda kusala predikasion ya yinzo na yinzo. To nge vandá na boma ti bantu ya famiye ya nge to bakamarade ya nge ke banda kukwamisa nge. Kuserapele na bamambu yayi ke sadisa nge na kukomprendre makanisi yina ke na muntu yina ke longoká na nge. Yesu zonzá ti bantu ya nkaka ke vanda na boma. Kasi yandi zonzá na badisiple ya yandi na kubika ve boma ku-empeche bawu na kusadila Yehova. (Mat. 10:16, 17, 27, 28) Wa’ faso Yesu sadisá badisiple ya yandi na kukatula boma? Mpe wa’ faso beto lenda landa ekzample ya yandi?

16. Wa’ faso beto lenda pesa formasion na muntu yina ke longoká na beto samu yandi banda kuzonzila mambu ya Nzambi?

¹⁶ Malembe-malembe lakisa yandi faso ya kuzonzila mambu ya Nzambi na bantu ya nkaka. Ntangu ya nkaka badisiple ya Yesu vandá na boma ntangu Yesu filisá bawu kupreche. Kasi Yesu sadisá bawu ntangu yandi zonzá na bawu kote yina ba ke preche,  mpe wapi mambu ba ke zonza. (Mat. 10:5-7) Wa’ faso nge lenda landa ekzample ya Yesu? Sadisa muntu yina ke longoká na nge na kuzaba kote yina yandi lenda preche. Na kifwani, yufula yandi si yandi zaba muntu yina lenda vanda na nsatu ya kuwa mambu ya Biblia. Na manima, sadisa yandi na kuprepare mambu yina yandi ke zonza mpe lakisa yandi faso ya simple ya kuzonzila yawu. Na yawu, sala ba-ekzersise na yandi na livre Sepela na luzingu ya ntangu nyonso! na baparti “Bantu ya nkaka ke zonzá” mpe “Muntu ya nkaka lenda yufula.” Ntangu nge ke na formeke yandi, lakisa yandi faso ya kusadila Biblia samu na kupesa bareponse yina ke simple mpe na buzitu.

17. Wa’ faso beto lenda sadila Matayi 10:19, 20, 29-31 samu na kusadisa ba yina ke longoká na beto na kutula konfianse na Yehova?

¹⁷ Sadisa yandi na kutula konfianse ya yandi na Yehova. Yesu zonzá na badisiple ya yandi ti Yehova ke sadisa bawu samu yandi ke zolá bawu. (Tanga Matayi 10:19, 20, 29-31.) Rapele yandi ti, Yehova ke vanda mpe na yandi. Samu na kusadisa yandi na kutula konfianse na Yehova, nge lenda sambilá na yandi samu na ba-projet ya yandi ya kimpeve. Franciszek, mpangi mosi ya bakala yina ke vandá na Pologne me zonza: “Mpangi yina vandá longoká na munu, vandá zonzilá bambala mingi na priere ba-projet ya munu ya kimpeve. Ntangu mu vandá tala faso Yehova vandá pesa bareponse na bapriere yina yandi vandá salá, munu mpe mu vandá eziteke ve na kusambila Yehova. Mu talá faso Yehova sadisá munu ntangu mu vandá na nsatu ya kuzwa bilumbu ya kupema na kisalu ya munu ya malu-malu, samu na kuvanda na balukutakanu ya kimvuka mpe na balukutakanu ya nene.”

18. Wa’ faso Yehova ke talá kisalu yina ke salá baproklamatere?

¹⁸ Yehova ke zolá mingi ba yina ke longoká na beto. Yandi zaba kisalu ya ngolo yina ke salá baproklamatere samu na kusadisa ba yina ke longoká Biblia na kuvanda na kikamarade na yandi, na yawu, yandi ke zolá bawu. (Iza. 52:7) Si bubu yayi, nge ke ve na muntu yina ke longoká na nge, nge lenda sadisa ba yina ke longoká na baproklamatere ya nkaka na kukwenda tii na bateme.