1. Le kibumbo kikatampe kya mu myaka katwa kabajinji bēkilombwele kulonga bika?

KIBUMBO kikatampe kya bana-balume ne bana-bakaji bātambile mu matanda mavule kadi besamba ndimi mishileshile kyēbungile pamo. Kwālongekele mwanda utulumukwa mu dine difuku’dya. Bayuda bamo, bābwenye kwisamba mu ndimi ya beni! Kibumbo kyātulumukile bininge, byobya byēbanenene Bayuda ne byēbanenene mutumibwa Petelo byādi bitulumuja bininge. Bēbalombwele amba bakapanda shi abalombola lwitabijo mudi Yesu Kidishitu. Kibumbo kyātengelwe bininge na uno musapu. Bantu pa kutengwa bāipangula’mba: “Le tulonge namani?” Petelo wālondolola’mba: “Umo ne umo abatyijibwe.”​—Bil. 2:37, 38.

2. Le i bika byotusa kwisambila’po mu kino kishinte? (Tala kifwatulo pa kibalu.)

² Bintu byālondele’po byādi bitulumukwa! Mu dine difuku’dya, bantu kubwipi kwa 3000 bābatyijibwa ke bana ba bwanga ba Kidishitu. Ino yādi i ngalwilo ya mwingilo mukatampe wa kulonga bana ba bwanga, obāsoñenye balondi kwingila kudi Yesu. Uno mwingilo wingilwanga kufika ne mu ino myaka ya katwa ka 21. Dyalelo ketubwanyapo kukwasha muntu abatyijibwe mu mansá’tu matyetye. Yewa wifunda Bible ubwanya kulonga myeji, mwaka, nansha ne kupita pa kubatyijibwa. Monka moyukile’kyo kala, shi wifunda Bible na muntu bilombanga bukomo pa kumukwasha ekale mwanā bwanga. Mu kino kishinte tusa kwisambila pa bintu byobwanya kulonga pa kukwasha muntu omwifundanga nandi Bible ekale ke mwanā bwanga mubatyijibwe.

3. Monka mokilombwedilwe mu Mateo 28:19, 20, le muntu wifunda Bible ufwaninwe kulonga bika pa kwendelela kufika ne ku kubatyijibwa?

³ Kumeso kwa kubatyijibwa, yewa wifunda Bible ufwaninwe kwingidija byobya bifundija Bible. (Tanga Mateo 28:19, 20.) Shi yewa wifunda Bible wingidija byaefunda, ukekala pamo bwa “muntu mudyumuke” utelelwe mu kyelekejo kya Yesu, wākolele bininge mwanda wa kwala kyalwilo kya njibo yandi pa mwala wa dibwe. (Mat. 7:24, 25; Luka 6:47, 48) Le i muswelo’ka otubwanya kukwasha yewa wifunda Bible engidije byaefunda? Tutalei bintu bisatu byotubwanya kulonga.

4. Le i muswelo’ka otubwanya kukwasha yewa wifunda Bible endelele kufika ne ku kubatyijibwa? (Tala ne kapango kanena’mba “ Kwasha Omwifundanga Nandi Bible Etungile Bitungo ne Kufikila’po.”)

⁴ Kwasha omwifundanga nandi etungile bitungo. Mwanda waka ufwaninwe kulonga namino? Tulete kimfwa: Shi udi mu lwendo lulampe, ubwanya kwimana pa bifuko bimobimo bikusangaja. Nabya koenda kekukakulepelapo. Muswelo umo onka, shi muntu wifunda Bible witungila tubitungo tutyetutye ne kufikila’po, nabya padi ukakulupila’mba ubwanya kufikila ne pa kitungo kya kubatyijibwa. Ingidija kakipindi kanena’mba, “Witungile Kitungo” kadi mu dibuku Ikala Mūmi Nyeke! pa kukwasha omwifundanga nandi Bible endelele. Ku mfulo kwa kifundwa ne kifundwa, wisambile na omwifundanga nandi pa muswelo ubwanya kumukwasha kitungo kyandi engidije byobya byomwatamba mu kwifunda. Shi kudi kitungo kyolangilanga omwifundanga nandi, lemba’kyo popa palembelwe amba, “Kitungo Kikwabo.” Ingidija kitatyi ne kitatyi kino kipindi pa kwisambila na omwifundanga nandi pa bitungo bityebitye ne bikatampe byaetungile.

5. Mungya Mako 10:17-22, le Yesu wālombwele mpeta alonge bika ne mwanda waka?

⁵ Kwasha omwifundanga nandi ashinte bintu mu būmi bwandi. (Tanga Mako 10:17-22.)  Yesu wādi uyukile amba i bikomo mpeta kupoteja bintu byonso byadi nabyo. (Mako 10:23) Inoko, Yesu wānenene uno muntu ashinte mu būmi bwandi. Mwanda waka? Mwanda Yesu wādi umusenswe. Kyaba kimo tubwanya kwikaka kukankamika otwifunda nandi engidije byaefunda, padi na kulanga’mba kabwanyapo kushinta. Bilombanga kitatyi pa kusaka’mba muntu aleke bibidiji byandi bya kala, avwale bumuntu bupya. (Kol. 3:9, 10) Inoko shi tubashilwila’ko kwisamba na otwifunda nandi pa uno mwanda, nandi ukashilwila’ko kushinta. Shi wisamba nandi uno muswelo ukalombola’mba umutele mutyima.​—Ñim. 141:5; Nki. 27:17.

6. Mwanda waka tufwaninwe kwipangula bipangujo bya kuloba tudi mu kanwa?

⁶ Kipangujo kya kuloba tudi mu kanwa i kipangujo kyotwipangula yewa wifunda alombole milangwe yandi nansha mwalangila pa mwanda kampanda. Ipangula kino kipangujo pa kuyuka biyukile kala omwifundanga nandi ne byakulupile. Shi ulonga namino kitatyi ne kitatyi, ukapēlelwa kwisambila na omwifundanga nandi pa myanda mikomo mu mafuku a kumeso. Mu dibuku Ikala Mūmi Nyeke! mudi bipangujo bivule bya kuloba tudi mu kanwa. Kimfwa mu kifundwa kya 04 mudi kipangujo kinena’mba: “Le ulanga Yehova wiivwananga namani shi ubatela dyandi dijina?” Mu kifundwa kya 09 namo mudi kipangujo kinena’mba: “Le i myanda’ka imoimo yoabila kutela mu milombelo?” Ku ngalwilo, bikalomba padi omwifundanga nandi kitatyi kya kulangulukila pa mwa kulondolwela kipangujo kiloba tudi mu kanwa. Ubwanya kumukwasha na kumufundija kulangulukila pa bisonekwa bikwatañene na mwanda’wa ne pa bifwatulo.

7. Le i muswelo’ka muyampe otubwanya kwingidija myanda mimweke?

⁷ Shi omwifundanga nandi wayuka byafwaninwe kulonga, musekunwine myanda mimweke pa kumukankamika ebilonge. Shi omwifundanga nandi Bible katanwangapo ku kupwila kitatyi ne kitatyi, ubwanya kumulombola video inena’mba, Yehova Wankwatakenye idi mu kifundwa kya 14 mu kipindi kinena’mba, “Kimba.” Mu bifundwa bivule bidi mu dibuku Ikala Mūmi Nyeke! ukatana’mo myanda mimweke ya uno muswelo mu kakipindi “Languluka Bininge” nansha kakipindi “Kimba.” * Leka kudingakanya omwifundanga nandi na muntu mukwabo na kunena kimfwa amba, “shi aye wabwenye, nobe usa kubwanya.” Leka omwifundanga nandi aye mwine afule ku kunena namino. Inoko abe wisambile pa myanda mikatampe yakweshe muntu wisambilwe’po mu video engidije byobya bifundija Bible. Padi ubwanya kutela kisonekwa nansha kintu kampanda kyaalongele. Ponso pobibwanika, wisambile pa muswelo obakweshe yao muntu kudi Yehova.

8. Le tubwanya kukwasha otwifundanga nandi namani asanswe Yehova?

⁸ Kwasha omwifundanga nandi asanswe Yehova. Namani? Kimba miswelo ya kumukwasha ayuke ngikadila ya Yehova. Kwasha omwifundanga nandi amone Yehova bu Leza wa nsangaji, ukwatakanyanga boba bamusenswe. (1 Tm. 1:11; Bah. 11:6) Lombola omwifundanga nandi amba ukamwena’mo shi engidije byaefunda, kadi mushintulwile amba byakamwena’mo bilombola’mba Yehova umusenswe. (Isa. 48:17, 18) Shi omwifundanga nandi wasanswa Yehova bininge nabya ukashinta.​—1 Yo. 5:3.

9. Kukwatañana na Mako 10:29, 30, le i bika bibwanya kukwasha muntu esuminwe bintu kampanda mwanda wa kwikala mwanā bwanga mubatyijibwe?

⁹ Pa kunena’mba omwifundanga nandi Bible endelele kufika ne ku kubatyijibwa, ufwaninwe kwisuminwa bintu kampanda. Pamo bwa mpeta otwatelanga kala, bantu bamo befunda  Bible bafwaninwe kwisuminwa bintu bya ku ngitu. Shi kaji kobengila kekakwatañenepo na misoñanya ya mu Bible, bakokeja padi kukimba’ko kaji kakwabo. Bavule bibalomba padi kuleka balunda nabo kebasenswepo Yehova. Bakwabo nabo babwanya padi kupelwa na bantu ba mu kisaka bashikilwe Batumoni ba Yehova. Yesu wānenene amba bantu bamo babwanya padi kukomenwa kwisuminwa uno muswelo. Ino wālaile amba boba bakamulonda kebakatyumukwapo mutyima. Yehova ukebesela bininge na kwibapa kisaka kya bantu ba buswe ba ku mushipiditu. (Tanga Mako 10:29, 30.) Le i muswelo’ka obwanya kukwasha omwifundanga nandi Bible amwene mu kino kyabuntu kilumbuluke?

10. Le i ñeni’ka yowaboila ku byanenene Manuel?

¹⁰ Pwana na omwifundanga nandi. I biyampe ulombole omwifundanga nandi amba umutele mutyima. Mwanda waka? Tala byanenene Manuel ushikatanga mu Meksike. Uvuluka kitatyi kyaadi wifunda Bible amba: “Kumeso kwa kwifunda, yewa wadi umfundija wadi ungipangula mombukile. Wadi unkwasha ndeke kusela mutyima kūlu ne kumpa mukenga wa kumulombola myanda mikwabo. Namwene amba untele mutyima bya binebine.”

11. Shi tushikata’ko na botwifundanga nabo, le bakamwena’mo namani?

¹¹ Shikata’ko pamo na bomwifundanga nabo, na mwādi mulongela Yesu na balondi bandi. (Yoa. 3:22) Shi bibwanika, ita omwifundanga nandi Bible āye ku yobe njibo, mutome nandi kafé, mudye nandi byakudya, nansha kutala nandi televijo ya JW. Omwifundanga nandi ukasangela bininge kumwita uno muswelo mu mafuku a mafetyi, mwine mwawiivwananga padi bu udi bunka. Kazibwe ushikatanga mu Uganda unena’mba, “momwena, nayukile myanda mivule itala padi Yehova kitatyi kyotwadi tushikata na wadi umfundija kupita’ko kitatyi kyotwadi twifunda. Namwene Yehova mwaadi ukwatakenya bantu bandi, ne nsangaji yobadi nayo. Nami ye byonadi nsaka mu bwami būmi.”

12. Mwanda waka tufwaninwe kwenda na basapudi beshileshile potukefunda Bible na muntu?

¹² Ita basapudi beshileshile bakakutūle pomukefunda. Kyaba kimo tubwanya kumona bu i biyampe’tu kwenda bunka, nansha kwenda na  basapudi’nka bamobamo. Nansha byobitupēlelanga kulonga namino, ino otwifundanga nandi ukamwena’mo shi twenda na basapudi beshileshile. Dmitrii, ushikatanga mu Moldova unena’mba: “Musapudi yense wadi wiya pobamfundija, wadi ushintulula bintu mu muswelo mwishile. Kino kyadi kinkwasha ngivwanije myanda mu miswelo mishileshile. Kadi nkyaivwenepo’tu bumvu bininge ponakatenwe musunsa mubajinji ku kupwila, mwanda twadi kala ketudi bemone na batutu ne bakaka bavule.”

13. Mwanda waka tufwaninwe kukwasha otwifundanga nandi atanwe ku kupwila?

¹³ Kwasha omwifundanga nandi atanwe ku kupwila. Mwanda waka? Mwanda Yehova i musoñanye batōtyi bandi bebungile pamo; kadi kuno kwibungila pamo kubadilwa mu butōtyi botumutōta. (Bah. 10:24, 25) Ne kadi batutu ne bakaka i kisaka kyetu kya ku mushipiditu. Potwitana nabo ku kupwila, tudi pamo bwa batwe badi kwetu tudya pamo byakudya biyampe. Shi ukwasha omwifundanga nandi Bible atanwe ku kupwila, nabya umukwashanga atabule ditabula dikatampe dikamukwasha afikile pa kubatyijibwa. Inoko kutanwa ku kupwila kubwanya kumukomena. Le dibuku Ikala Mūmi Nyeke! dibwanya kukwasha omwifundanga nandi namani anekenye makambakano amulengejanga aleke kwiya kutanwa ku kupwila?

14. Le i muswelo’ka otubwanya kukankamika otwifundanga nandi āye atanwe ku kupwila?

¹⁴ Ingidija kifundwa kya 10 kya dibuku Ikala Mūmi Nyeke! kikukwashe ukankamike omwifundanga nandi. Basapudi ba bwino bobanenene kutompa kwingidija kino kifundwa kumeso kwa dino dibuku kulupulwa, babwenye kukwasha bobefundanga nabo Bible batanwe ku kupwila. Inoko kokilaija’nka ne byomufika mu kifundwa kya 10, ebiya koite omwifundanga nandi āye atanwe ku kupwila. Mwite enka’tu pomukishilula’pa kadi endelela kumwita kitatyi ne kitatyi. Bantu befunda Bible batanwanga na makambakano meshile. Nanshi tá mutyima ku bisakibwa bya omwifunda nandi, kadi tala shi ubwanya kumukwasha mu muswelo kampanda. Kokazoza shi waije kwiya kutanwa ku kupwila. Mutūkijije mutyima kadi endelela na kumwita.

15. Le yewa otwifundanga nandi ubwanya kwikala na moyo wa bika?

¹⁵ Le nobe ubavuluka kitatyi kyowadi na kamoyo ka kwikala Kamoni wa Yehova? Padi wadi ulanga’mba kukabwanyapo kusapula ku njibo ne njibo. Nansha padi wadi utyina amba bantu ba mu kyenu kisaka nansha balunda nobe babwanya kukulwa. Shi bidi uno muswelo, nabya ukabwanya kwitūla pa kyaba kya omwifundanga nandi. Yesu wānenene amba bantu bamo babwanya kwivwana uno moyo. Inoko Yesu wāsoñenye balondi bandi amba kebakaleka uno moyo wibalengeje baleke kwingidila Yehova. (Mat. 10:16, 17, 27, 28) Le Yesu wākweshe balondi bandi namani baleke kwikala na moyo? Le nobe ubwanya kumwiula namani?

16. Le i muswelo’ka otubwanya kufundija otwifundanga nandi asapwile bakwabo byaefunda?

¹⁶ Fundija bityebitye omwifundanga nandi asapwile bakwabo nkulupilo yandi. Bana ba bwanga ba Yesu bādi bakokeja kwivwana moyo kitatyi kyāebatumine bakasapule. Ino Yesu wēbakweshe na kwibalombola kwa kusapula ne musapu wa kusapula. (Mat. 10:5-7) Le i muswelo’ka obwanya kwiula Yesu? Kwasha omwifundanga nandi ayuke kwabwanya kukasapula. Kimfwa, mwipangule shi uyukile’ko muntu kampanda ubwanya kumwena mu bubine kampanda bwa mu Bible. Kupwa mukwashe ateakanye bya kunena na kumulombola mwa kusapwila buno bubine mu muswelo upēla. Shi bibwanika, mubwanya kwiibidija nandi na kwingidija tubipindi “Bantu Bamo Banenanga’mba” ne “Muntu Ubwanya Kwipangula’mba,” tudi mu dibuku Ikala Mūmi Nyeke! Pomwiibidija, tá mutyima ku kufundija omwifundanga nandi engidije  Bible pa kulondolola na bunwa kadi mu muswelo upēla.

17. Le i muswelo’ka otubwanya kwingidija Mateo 10:19, 20, 29-31, potukwasha otwifundanga nandi akulupile mudi Yehova?

¹⁷ Kwasha omwifundanga nandi akulupile mudi Yehova. Yesu wākulupije bandi bana ba bwanga’mba Yehova ukebakwasha mwanda wibasenswe. (Tanga Mateo 10:19, 20, 29-31.) Vuluja omwifundanga nandi amba Yehova ukamukwasha ne aye. Ubwanya kumukwasha akulupile mudi Yehova na kutela bitungo byandi pomulombela nandi. Franciszek, ushikatanga mu Polonye unena’mba: “Divule dine yewa wadi umfundija wadi utela bitungo byami mu milombelo. Ami pa kumona muswelo walondolwele Yehova milombelo ya yewa wadi umfundija, bukidi bonka nami nashilula kulombela. Namwene bukwashi bwa Yehova ponakalombele konje ku kaji kami kapya, mwanda wa kwenda ku kupwila ne ku kitango.

18. Le Yehova umwene namani mwingilo wingila bafundiji bene Kidishitu?

¹⁸ Yehova utele mutyima bininge botwifundanga nabo Bible. Usangedile mwingilo wingilanga bafundiji bene Kidishitu wa kukwasha bantu bafwene kwadi, kadi wibasenswe pa kino. (Isa. 52:7) Shi pano kwendejangapo kifundwa kya Bible, ubwanya kukwasha boba befunda Bible bendelele kufika ne ku kubatyijibwa na kukatūla basapudi bebafundijanga.