1. Ntshinyi tshivuabu bambile musumba munene wa bantu mu bidimu lukama bia kumpala?

MUSUMBA munene wa balume ne bakaji bavua bafumine mu matunga mashilashilangane bikale bakula miakulu mishilashilangane uvua mudisangishe kaba kamue. Bualu kampanda bua dikema buakenzeka dituku adi. Bena Yuda bakuabu bakatuadija kuakula diakamue mu miakulu ya ku dibela ya bantu bavua balue abu! Bualu abu buakakemesha bantu abu bikole menemene, kadi tshivua bena Yuda abu babambila ne tshivua mupostolo Petelo mulue kuambila bantu bonso tshivua tshiotshi ne mushinga wa bungi kupita. Bakabambila ne: bavua mua kusungidibua bobu baleje ditabuja mu Yezu Kristo. Bualu abu buakabalenga ku muoyo bikole menemene, kukonkabu ne: “Tuenze tshinyi?” Ke Petelo kubandamunaye ne: “Yonso wa kunudi abatijibue.”​—Bien. 2:37, 38.

2. Ntshinyi tshituakonkonona mu tshiena-bualu etshi? (Tangila tshimfuanyi tshia pa tshizubu.)

² Bualu bua pa buabu buakenzeka pashishe. Bantu batue ku 3 000 bakabatijibua dituku adi, kuluabu bayidi ba Kristo. Tshivua ntuadijilu wa mudimu munene wa kuvuija bantu bayidi uvua Yezu mutumine bayidi bende dîyi bua kuenza. Mudimu au utshidi wenzeka too ne lelu. Lelu katuena mua kuambuluisha muntu anu mu mêba makese bua akumbane bua kubatijibua to. Bidi mua kuangata ngondo, tshidimu, anyi mene kupita apu bua mulongi kushishaye kufika ku dibatijibua. Wewe ulonga Bible ne muntu patudi tuakula apa, udi mumanye bimpe ne: kuvuija bantu bayidi kudi kulomba mudimu wa bungi. Mu tshiena-bualu etshi, netumone tshiudi mua kuenza bua kuambuluisha balongi bebe ba Bible bua kufikabu ku dibatijibua.

3. Anu mudibu baleje mu Matayi 28:19, 20, ntshinyi tshidi mulongi wa Bible ne bua kuenza bua kuyaye too ne ku batismo?

³ Kumpala kua mulongi wa Bible kubatijibuaye, udi ne bua kuteka malu adi Bible ulongesha mu tshienzedi. (Bala Matayi 28:19, 20.) Padi mulongi wa Bible uteka bidiye ulonga mu tshienzedi, udi ulua bu “muena meji” wa mu tshilejilu tshivua Yezu mufile uvua mumbule muinshi mule bua kuibakila nzubu wende pa dibue dinene. (Mat. 7:24, 25; Luka 6:47, 48) Ntshinyi tshitudi mua kuenza bua mulongi wa Bible ikale uteka malu adiye ulonga mu tshienzedi? Tumonayi malu asatu atudi mua kuenza.

4. Ntshinyi tshiudi mua kuenza bua kuambuluisha mulongi bua aye mutangile anu ku batismo? (Tangila kazubu ka “ Ambuluisha mulongi webe bua adifundile bipatshila ne abikumbaje.”)

⁴ Ambuluisha mulongi webe wa Bible adifundile bipatshila. Bua tshinyi mbimpe kuenza nanku? Tuangate tshilejilu etshi: Wewe wenza luendu lua njila mule, udi mua kupangadija bua wikale wenda wimana miaba mimpe kumona. Dîba adi ntanta udi mushale bua kufika kuudi uya kakumueneka mule menemene to. Bia muomumue, padi mulongi wa Bible udifundila bipatshila bia kukumbaja mu matuku makese ne ubikumbaja, udi mua kulua kumona ne: yeye mudifundile tshipatshila tshia kubatijibua udi mua kutshikumbaja. Enza mudimu ne kazubu ka ne: “Tshipatshila” kadi mu mukanda wa Shala ne muoyo kashidi! bua wambuluishe mulongi webe bua kuya kumpala. Panudi nufika ku ndekelu kua dilongesha dionso, leja mulongi muikala tshipatshila tshidibu baleje atshi mua kumuambuluisha bua kuenza malu adiye ufuma ku dilonga. Biwikale ne tshipatshila tshikuabu tshiudi ujinga bua akumbaje, utshifunde muaba udibu bafunde ne: “Tshikuabu.” Ikala ne tshibidilu tshia kukonkonona ne mulongi webe bipatshila bidiye mua kukumbaja mu matuku makese, ne bidi bimulomba matuku bua kubikumbajaye.

5. Bilondeshile Mâko 10:17-22, ntshinyi tshivua Yezu muambile muntu mubanji bua kuenza? Bua tshinyi?

 ⁵ Ambuluisha mulongi bua ashintulule malu mu nsombelu wende. (Bala Mâko 10:17-22.) Yezu uvua mumanye ne: bivua ne bua kukolela muntu mubanji bua kupana bintu biende bionso. (Mâko 10:23) Nansha nanku, wakamuambila anu bua kubipana. Bua tshinyi? Bualu Yezu uvua mumvue dinanga bua bualu buende. Imue misangu tudi mua kudikanda bua kukankamija mulongi wa Bible bua kuteka malu adiye ulonga mu tshienzedi, tuela meji ne: ki mmuanji kukumbana bua kushintulula malu adi akengedibua to. Bidi mua kuangata matuku a bungi bua bamue bantu kushintuluka ne kuvuala bumuntu bupiabupia. (Kolos. 3:9, 10) Kadi wewe uleja mulongi malu adiye ne bua kushintulula kumpala kua dîba, udi pende mua kubanga kushintuluka kumpala kua dîba. Wewe uyukila nende malu a mushindu eu, udi uleja muudi umutabalela.​—Mis. 141:5; Nsu. 27:17.

6. Bua tshinyi mbimpe kuela mulongi nkonko ya ufila wende mmuenenu?

⁶ Mbimpe kuela mulongi lukonko bua aleje wende mmuenenu bua bualu kampanda budiye ulonga. Ela mulongi lukonko lua nanku bua umanye malu adiye umvua ne witabuja. Wewe wenza nanku pa tshibidilu, nebikale bipepele bua kulua kuyukila nende malu adiye kayi witaba anyi adi amukolela bua kushintulula. Mukanda wa Shala ne muoyo kashidi! udi ne nkonko ya bungi idi isaka mulongi bua aleje wende mmuenenu. Tshilejilu, mu dilongesha 04 mudi lukonko elu: “Udi wela meji ne: Yehowa udi umvua mushindu kayi paudi umubikila mu dîna diende?” Mu dia 09 mudi lukuabu elu: “Udi musue kusambila bua malu kayi?” Kumpala, bidi mua kulomba mulongi bua angate dîba dia kuela meji bua amone mua kuandamuna. Wewe mumuleje bua kuanji kubala mvese idibu bafile, kutangila bimfuanyi ne pashishe kuela meji, bidi mua kumuambuluisha.

7. Mmunyi mutudi mua kulongesha ne bilejilu bia bantu bakuabu bimpe menemene?

⁷ Padi mulongi umvua tshidiye ne bua kuenza, umupeshe bilejilu bia bamue bantu bua kumukankamija bua atshienze. Tshilejilu, bikala mulongi webe kayi ubuela mu bisangilu pa tshibidilu, udi mua kumuleja filme wa Yehowa uvua muntabalele udi mu tshitupa tshia “Bia kutangila kabidi” mu dilongesha dia 14. Mu malongesha a bungi adi mu mukanda wa Shala ne muoyo kashidi!, neupete bilejilu bia buena ebi mu tshitupa tshia “Buela mu buondoke” anyi tshia “Bia kutangila kabidi”. * Udimuke bua kufuanyikiji mulongi webe ne muntu mukuabu, ukadi umuambila ne: “Bu muvuaye mukumbane bua kuenza bualu abu wewe pebe udi mua kubuenza.” Lekela mulongi nkayende afike ku diamba nanku. Tshiudi wewe mua kuenza nkumuleja malu masunguluke avua mambuluishe muntu udibu bakuile mu filme au bua kutumikila malu adi Bible ulongesha. Pamuapa udi mua kumuleja mvese kampanda uvua mumuambuluishe anyi bualu kansanga buvuabu bamuenzele. Dîba dionso didiku mushindu, umuleje muvua Yehowa muambuluishe muntu au.

8. Ntshinyi tshitudi mua kuenza bua kuambuluisha mulongi wetu bua afike ku dinanga Yehowa?

⁸ Ambuluisha mulongi bua afike ku dinanga Yehowa. Mushindu kayi? Keba mishindu ya kumuambuluisha bua amanye ngikadilu mikuabu ya Yehowa. Muambuluisha bua amone mudi Yehowa muikale Nzambi wa disanka udi wambuluisha badi bamunange. (1 Tim. 1:11; Eb. 11:6) Umuleje ne: yeye utumikila bidiye ulonga, neapete masanka, ne umumvuije ne: masanka adiye upeta au adi aleja mudi Yehowa mumunange. (Yesh. 48:17, 18) Padi dinanga didi mulongi munange  Yehowa dikola, muoyo newikale umusaka anu kumusaka bua kushintulula bualu buonso budi bukengedibua.​—1 Yone 5:3.

9. Bilondeshile Mâko 10:29, 30, ntshinyi tshidi mua kuambuluisha muntu bua kudipangisha amue malu bua kufikaye ku dibatijibua?

⁹ Bua mulongi wa Bible kufikaye too ne ku batismo, nebimulombe bua ikale udipangisha amue malu. Anu bu muntu mubanji utukadi batele, bidi mua kulomba bamue balongi ba Bible bua kudipangisha bimue bintu bia ku mubidi. Mulongi yeye ne mudimu udi kawuyi upetangana ne mêyi manene a mu Bible, bidi mua kumulomba nansha bua kuwulekela kukeba mukuabu. Bidi mua kulomba bakuabu bua kulekela balunda badi kabayi banange Yehowa. Bakuabu bobu badi mua kubalekela kudi bena mu mêku abu batu kabayi basue Bantemu ba Yehowa. Yezu uvua muambe ne: bidi mua kukolela bantu bakuabu bua kudipangisha malu a mushindu eu. Kadi uvua mulaye ne: bantu badi bamulonda kabakuedibua mâyi ku makasa to. Yehowa neabapeshe dîku dia mu nyuma didi dibanange. (Bala Mâko 10:29, 30.) Ntshinyi tshiudi mua kuenza bua dipa dimpe dia kudi Yehowa edi diambuluishe mulongi webe wa Bible?

10. Tshidi muanetu Manuel muambe tshidi tshikulongesha tshinyi?

¹⁰ Diaku bulunda ne mulongi webe. Kuleja mulongi webe muudi umutabalela kudi ne mushinga. Bua tshinyi? Mona tshidi muanetu Manuel wa mu Mexique wamba padiye uvuluka tshikondo tshivuaye mulongi wa Bible: “Musangu wonso kumpala kua kutuadija kulonga, mulongeshi wanyi wa Bible uvua wanji ungebeja bua kumanya mumvua muladile. Uvua ungambuluisha bua ndilekelele ne umpesha mushindu wa kumuambila malu makuabu. Mvua ngumvua ne: uvua untabalela bushuwa.”

11. Tuetu tusomba ne balongi betu ba Bible, bidi mua kubambuluisha mushindu kayi?

¹¹ Ikala usomba ne balongi bebe ba Bible, anu muvua Yezu pende usomba ne bayidi bende. (Yone 3:22) Kuoku mushindu ne bikala mulongi webe wa Bible wenda uya kumpala, mubikila  kuebe bua kudiaku nende kambele anyi kuela nende tshianza mukana peshi kulonda nende ndongamu wa ku ngondo wa ku TV wetu wa jw. Mulongi webe udi mua kusanka nangananga wewe mumubikile bikondo bitu bena mu dîku diabu benza mafesto a mu bitendelelu bia dishima yeye eku pamuapa udiumvua nkaya. Muanetu Kazibwe wa mu Uganda udi wamba ne: “Ndi mumone ne: pamvua nsomba ne mulongeshi wanyi wa Bible, mvua mulonge kabidi malu a bungi anu bu a pavuaye undongesha Bible. Mvua mudimuene mudi Yehowa utabalela bantu bende ne mudibu ne disanka. Ke tshimvua njinga mu nsombelu wanyi atshi.”

12. Patudi tuya kulonga ne muntu, bua tshinyi mbimpe tuikale tuya ne bamanyishi bashilashilangane?

¹² Ikala uya ne bamanyishi bashilashilangane bua kulongesha mulongi. Imue misangu udi mua kumona ne: mbipepele bua wewe kudiyila anyi kuya ne mumanyishi anu umue umue au. Nansha mudibi mua kuikala bipepele bua kuenza nanku, wewe uya kumulongesha ne bamanyishi bashilashilangane makuabu matuku, bidi mua kumuambuluisha bikole. Muanetu Dmitrii wa mu Moldavie udi wamba ne: “Mumanyishi yonso uvua mulongeshi wanyi ulue nende uvua ne wende mushindu uvuaye ungumvuija malu. Bivua bingambuluisha bua kumona mishindu mikuabu imvua mua kuteka bimvua ndonga mu tshienzedi. Pangakabuela mu bisangilu bua musangu wa kumpala, tshivua ne buôwa bua bungi to, bualu nkavua mumanye Bantemu ba bungi.”

13. Bua tshinyi tudi ne bua kuambuluisha balongi betu ba Bible bua bikale babuela mu bisangilu?

¹³ Ambuluisha mulongi bua ikale ubuela mu bisangilu. Bua tshinyi? Bualu Yehowa mmutumine batendeledi bende dîyi bua bikale badisangisha; mmushindu mukuabu utudi tumutendelela. (Eb. 10:24, 25) Bualu bukuabu, bena Kristo netu mbena mu dîku dietu dia mu nyuma. Patudi nabu mu bisangilu, mbienze anu bu ne: tudi nabu kumbelu tudia biakudia bia muenya. Paudi wambuluisha mulongi webe wa Bible bua kubuela mu bisangilu, udi umuambuluisha bua kuela tshidia tshinene menemene bua afike ku batismo. Kadi bidi mua kumukolela bua kuela tshidia atshi. Mmunyi mudi mukanda wa Shala ne muoyo kashidi! mua kuambuluisha mulongi webe bua kujikija lutalu luonso ludi lumupangisha bua kubuela mu bisangilu?

14. Leja muudi mua kujula mulongi dijinga dia kubuela mu bisangilu.

¹⁴ Angata dilongesha dia 10 dia mukanda wa Shala ne muoyo kashidi! bua kujula mulongi dijinga dia kubuela mu bisangilu. Kumpala kua kupatulabu mukanda eu, bavua balombe bamue bamanyishi bapiluke bua kulongesha balongi babu dilongesha dia 10 edi. Bavua bambe ne: ndiambuluishe balongi bikole bua kubangabu kubuela mu bisangilu. Kadi kuindidi too ne panuafika mu dilonga dia 10 bua kushisha kuambila mulongi bua kubuela mu bisangilu to. Muambila anu panutshidi nubangilaku ne ushale umuambila bualu ebu pa tshibidilu. Balongi ba Bible bonso kabatu ne ntatu ya muomumue to. Nanku ikala utabalela majinga a mulongi webe bua umone ni udi mua kumuambuluisha ne tshidiye natshi dijinga. Yeye ujanguluka bua kubuela mu bisangilu, kuteketshi mu maboko to. Ikala ne lutulu, tshibi usuminyina anu ne dimuambila.

15. Mbuôwa kayi budi mulongi wa Bible mua kuikala nabu?

¹⁵ Utshidi uvuluka buôwa buuvua nabu bua kulua Ntemu wa Yehowa anyi? Pamuapa uvua umona ne: kuvua mua kuyisha kumpala kua bantu nansha kakese. Peshi uvua mua kuikala ne buôwa bua ne: bena mu dîku dienu anyi balunda bebe bavua mua kukuluisha. Biobi nanku, udi mua kumvua mudi mulongi webe wa Bible umvua. Yezu wakamba ne: bantu bakuabu badi mua kumvua buôwa bua nunku. Kadi wakalomba bayidi bende bua kabalekedi buôwa bubapangisha bua kuenzela Yehowa mudimu to.  (Mat. 10:16, 17, 27, 28) Ntshinyi tshivua Yezu muenze bua kuambuluisha bayidi bende bua kudiata buôwa? Mmunyi muudi pebe mua kumuidikija?

16. Ntshinyi tshiudi mua kuenza bua kulongesha mulongi webe mua kuambila bakuabu malu adiye ulonga?

¹⁶ Enda ulongesha mulongi webe bua ikale wambila bakuabu malu adiye ulonga. Bayidi ba Yezu bavua mua kuikala bumvue buôwa pavuaye mubatume bua kuyisha. Kadi wakabambuluisha, kubambilaye muaba wa kuyisha ne tshivuabu mua kuyisha. (Mat. 10:5-7) Mmunyi muudi mua kuidikija Yezu? Ambuluisha mulongi webe bua amanye dîba didiye mua kuambila bakuabu malu adiye ulonga. Tshilejilu, muebeja ni mmumanye muntu udiye umona ne: yeye mulonge bualu kampanda bua mu Bible bidi mua kumuambuluisha. Pashishe umuleje mushindu mupepele wa kuyishaye muntu au bua amanye tshia kuamba. Biobi bikumbana, udi mua kuenza nende dinaya dimanyine mu tshitupa tshia ne: “Bamue batu bamba ne:” ne tshia ne: “Muntu yeye muebeje ne:” bia mu mukanda wa Shala ne muoyo kashidi! Paudi wenza nanku, utambe kumuleja mua kuandamuna muntu ne Bible mu mushindu mupepele ne bukalanga.

17. Mmunyi muudi mua kuambuluisha mulongi webe ne Matayi 10:19, 20, 29-31 bua ikale weyemena Yehowa?

¹⁷ Ambuluisha mulongi webe bua kueyemena Yehowa. Yezu wakajadikila bayidi bende ne: bu muvua Yehowa mubanange, uvua ne bua kubambuluisha. (Bala Matayi 10:19, 20, 29-31.) Vuluija mulongi webe ne: Yehowa neamuambuluishe pende. Udi mua kusambila nende bua bipatshila bidiye mudifundile bua amanye mua kueyemena Yehowa. Muanetu Franciszek wa mu Pologne udi wamba ne: “Mulongeshi wanyi uvua utamba kutela bipatshila bianyi mu masambila avuaye wenza. Pangakamona muvua Yehowa wandamuna masambila ende, ngakatuadija kusambila diakamue. Ngakamona muvua Yehowa ungambuluisha dîba dimvua ndomba ku mudimu wanyi mupiamupia bua kuya kubuela mu mpungilu ne mu bisangilu.”

18. Mmunyi mudi Yehowa umona mudimu wa dilongesha bantu udi bena Kristo benza?

¹⁸ Yehowa utu utabalela balongi betu ba Bible bikole menemene. Mmumanye mudi bena Kristo baditatshisha bikole bua kulongesha bantu bua basemene kudiye, ne mmubanange bua bualu abu. (Yesh. 52:7) Nansha wewe kuyi ulonga Bible ne muntu patudi tuakula apa, udi mua kufila bamanyishi bakuabu mu malonga abu bua wambuluishe pebe balongi abu bua baye too ne ku batismo.