1. Izaza deneni mumafuku awapostolu adilejeli kwiladi?

IZAZA deneni dawamayala niambanda afumi kumatuña acheñi nawa ahosheleña madimi ashiyashana apompeli hamu. Hanidi ifuku kwamwekeni chuma chakuhayamisha. AYudeya atachikili kuhosha mumadimi ahosheleña antu enjili! Ichi chuma chayihayamishili antu amavulu, yuma yahosheleñawu aYudeya niyuma yahosheleña kapostolu Petulu yahayamishili antu ejima. Ayilejeli nawu neyi akuhwelela mudi Yesu Kristu akayamwina. Iyi nsañu yayishikili hamuchima. Yayishikili antu hamuchima chakwila ehwili nawu: “Twili ñahi?” Petulu wakwili nindi: “Wejima wenu hamuntu-hamuntu, ayipapatishi.”—Yilw. 2:37, 38.

2. Tukuhanjekadi muchinu chibaaba? (Talenu mwevulu wudi hakava.)

² Chuma chikwawu chamwekeni chadiña chakuhayamisha. Antu akushika ku 3,000 apapatisheweli hanidi ifuku nawa ekalili atumbanji twaKristu. Iyi diyi yadiña ntachikilu yamudimu weneni wakwilisha atumbanji wayilejeliyi Yesu akwakumulondela kuzata. Iwu mudimu wunatwalekihu nimakonu. Makonu hitunateli kukwasha muntu kupapatishewa mwifuku dimu hohuku. Hanateli kuhita tukweji hela chaaka nikubadikahu hakwila nawu yapapatishewi. Neyi chimweluka, chakeñekaña kuzata nañovu hakwila tukwashi muntu yekali kambanji kaKristu. Muchinu chibaaba, tukuhanjeka yuma yitwatela kwila hakwila tukwashi kadizi yekali kambanji wapapatishewa.

3. Neyi chinamwekeshiwu haMatewu 28:19, 20, chumanyi chatela kwilayi kadizi hakwila yashikihu nakupapatishewa?

³ Henohu kadizi kanda yapapatishewi, watela kuzatishaña yuma yatañishaña Bayibolu. (Tañenu Matewu 28:19, 20.) Neyi kadizi yazatishaña yuma yinakudizayi, wukwikala neyi “muntu wamaana” washimunawu muchishimu chaYesu wapundili chakunama nakutuñila itala dindi helola. (Mat. 7:24, 25; Luka 6:47, 48) Tunateli kumukwasha ñahi kadizi wetu kuzatisha yuma yinakudizayi? Tuhanjekenu haniyi yuma yisatu yitunateli kwila.

4. Tunateli kukwasha ñahi kadizi kuzata nañovu kulonda yashikihu nakupapatishewa? (Talenu chikasha chinakwila nawu “ Kwashenu Atudizi Ekali naYikonkwanyi niKuyishikija.”)

⁴ Mukwashenu kadizi wenu yemiki yikonkwanyi. Muloñadi chimwatela kumukwashila? Chakutalilahu, neyi munakuya kwiluña dadilehi, mukutonda maluña imwatela kunookela. Hela kumunakuya kwakulehi mukuzeya wanyi. Munjila yoyimu, neyi kadizi waBayibolu yemika yikonkwanyi yinateli kushikijayi mukapinji kantesha, wukuzata nañovu kulonda yapapatishewi. Zatishenu chikasha chinakwila nawu “Yuma Yinnakukeña Kwila” chidi mumukanda waLuñenu naWumi Haya Nyaaka! kulonda muyikwashi atudizi kupaminaku. Hanyima yakudiza nikudiza hanjekenu hayuma yinakufwilayi kwila chiyinateli kumukwasha kuzatisha yuma yinadiziyi. Neyi kudi chikonkwanyi chikwawu chimunamutoñojokeliku kadizi wenu, chisonekenu hanasonekiwu nawu “Chikwawu.” Mpinji yejima hitulukenuña nakadizi wenu muyikonkwanyi yinateli kushikijayi mukapinji kantesha niyinateli kushikijayi hadi mpinji yayilehi.

5. Neyi chashimunawu haMaku 10:17-22, Yesu wamulejeli iyala samaheta kwiladi, nawa muloñadi?

⁵ Kwashenu kadizi wenu yahimpi chihandilu chindi. (Tañenu Maku 10:17-22.) Yesu welukili  nindi chinateli kwikala chakala samaheta kulandisha yuma yindi yejima. (Maku 10:23) Hela chochu, Yesu wamulejeli iwu iyala kuhimpa chihandilu chindi. Muloñadi? Muloña Yesu wamukeñeli iwu muntu. Mpinji yikwawu, chinateli kutukalila kumukolesha kadizi waBayibolu kuzatisha yuma yinakudizayi muloña tunateli kumona netu mpinji kanda yishikili yakuhimpa. Hanateli kuhita mpinji hakwila muntu yaleki yilwilu yatama nakuvwala wuntu wawuha. (Kol. 3:9, 10) Ilaña neyi muhanjeka nakadizi swayi-swayi niyena wukutachika kuhimpa swayi. Neyi muhanjeka nindi mukumwekesha nenu mwamwakamenaña.—Mas. 141:5; Yish. 27:17.

6. Muloñadi chitwatela kuzatishila malwihu akutoñojokahu?

⁶ Lwihu lwakutoñojokahu hilwihu lutwamwihulaña kadizi kulonda yashimuni yitoñojoka yindi hela chinakutoñojokayi hanoyu nsañu. Zatishenuña malwihu amuchidiwu kulonda mwiluki yuma yelukayi kadizi wenu niyakuhwelelayi. Neyi mumwihulaña mpinji yejima, chikekala chaswayi kuhanjeka nindi nsañu yinateli kumukalila kwiteja. Mukanda waLuñenu naWumi Haya Nyaaka! wukweti malwihu amavulu akutoñojokahu. Chakutalilahu, mukudiza 04 mwekala lwihu nawu: “Munakutoñojoka nenu Yehova watiyaña ñahi neyi muzatishaña ijina dindi?” Mukudiza 09 nawu: “Yumanyi yimwatela kutena mukulomba?” Hakutachika chinateli kumukalila kadizi kwakula awa malwihu. Mwatela kumukwasha kutoñojoka hajinsona ninyevulu yidi muniwu mukanda.

7. Tunateli kuzatisha ñahi chiwahi yuma yayimwekenaña antu?

⁷ Neyi kadizi wenu yeluka yuma yatela kwilayi, zatishenuña yuma yamwekanaña muchihandilu kulonda mumukoleshi. Chakutalilahu, neyi chamukalilaña kadizi wenu kuya nakupompa, mutalishenu vidiyo yinakwila nawu Yehova Wañakameneni, muchibalu chinakuhosha nawu “Keñelenuhu Jikwawu” chakudiza 14. Mukudiza kwakuvulu mumukanda waLuñenu naWumi Haya Nyaaka! mukuwana nsañu yayivulu yayuma yamwekeni muchibalu chinakwila nawu “Sandujolenu Chikupu” hela “Keñelenuhu Jikwawu.” * Bayi mumwesekeja kadizi wenu namuntu mukwawu nakuhosha nenu, “neyi yena watwesheli nineyi wukutwesha.” Mulekenu kadizi yomweni yafuukulihu. Ilaña hoshenu hayikuma yamukwashili muntu wudi muvidiyo kuzatisha yuma yatañishaña Bayibolu. Hadaha munateli kumuleja nsona hela yuma yeliliyi. Neyi chinatwesheki konkomwenenu Yehova chamukwashiliyi owu muntu.

8. Tunateli kumukwasha ñahi kadizi wetu kulonda yamukeñi Yehova?

⁸ Kwashenu kadizi wenu yamukeñi Yehova. Munjilanyi? Ikalenu nampinji yakumukwasha kadizi wenu kwiluka yilwilu yaYehova. Kwashenu kadizi wenu yeluki nindi Yehova hiNzambi wamuzañalu wakwashaña antu amukeña. (1 Tim. 1:11; Heb. 11:6) Mulejenu kadizi wenu yeluki nindi neyi yazatishaña iyi nsañu yikumukwasha, nawa mulumbulwilenu nenu Yehova wamukeña. (Isa. 48:17, 18) Neyi kadizi wenu yasweja kumukeña Yehova, chikumukwasha kuhimpa yilwilu yindi.—1 Yow. 5:3.

9. Kwesekeja naMaku 10:29, 30, yumanyi yinateli kumukwasha muntu kuleka yuma yimu kulonda yekali kambanji wapapatishewa?

⁹ Hakwila yapapatishewi, kadizi waBayibolu watela kulekahu yuma yimu. Kufwana iyala samaheta itwashimuna, atudizi aBayibolu amakwawu atela kuleka kufwila yuma yakumujimba. Neyi mudimu wazatañawu waditadikishaña nayishina  yamuBayibolu atela kuwuleka. Amakwawu atela kuleka kudikunda nawakwawu abula kumukeña Yehova. Amakwawu anateli kuyikaana kudi antaña jawu ahela aYinsahu jaYehova. Yesu welukili nindi chinateli kuyikalila antu amakwawu kuleka yuma yamuchidiwu. Ilaña washiika nindi antu ejima amulondelaña hakayishiyaku. Wakayinka chisaka cheneni chakuspiritu. (Tañenu Maku 10:29, 30.) Munateli kumukwasha ñahi kadizi wenu waBayibolu kulonda iyi yuma yimukwasheña?

10. Yumanyi yimunadizili kunsañu yaManuel?

¹⁰ Dikundenuña nakadizi wenu. Mwatela kumwekeshaña nenu mwamwakamenaña kadizi wenu. Muloñadi? Talenu chahosheliyi Manuel, washakamaña kuMexico. Washimwini chamukwashileñayi ntañishi yindi hadiñayi kadizi waBayibolu nindi: “Henohu kanda tutachiki kudiza, muntu wadiña nakundizisha Bayibolu wañihwileña chinahandileña. Chumichi chankwashileña kuwundisha muchima nikwikala wakasunuka kumuleja nsañu yikwawu. Nelukili chikupu nami wañakameneneña.”

11. Yumanyi yinateli kufumamu neyi twikala nampinji yakuhanjeka nawatudizi etu?

¹¹ Ikalenuña nampinji yakuhanjeka nawatudizi enu, neyi chelileñayi Yesu nawakwakumulondela indi. (Yow. 3:22) Neyi chinatwesheki, mutambikenu kadizi wenu waBayibolu wunakuyilaku hambidi nakudiila nindi hamu yakuda hela kutambila hamu jw broadcast yahakakweji. Kadizi wenu waBayibolu nateli kutiya kuwaha neyi mumutambikaku kwitala denu hampinji yanakanañawu antu yidika chakwila nashali hohu kankawindi. Kazibwe washakamaña kuUganda wahosheli nindi: “Nadizili yuma yayivulu hadi Yehova chitwahanjekeleña namuntu wandizishileña, neyi chitwelileña hakudiza Bayibolu. Nelukili nami Yehova wakamenaña chikupu antu jindi nawa akweti muzañalu. Ninami dichinakeñeleña muchihandilu chami.”

12. Muloñadi chitwatela kuyilaña nawakwakushimwina amboka-mboka kudi kadizi waBayibolu?

¹² Yenuña nawakwakushimwina amboka-mboka kudi kadizi wenu. Mpinji yikwawu, tunateli kumona netu chidi hohu chiwahi kuya nkawetu  hela kuya nawakwakushimwina wowamu. Hela chakwila chachiwahi kwila mwenimu, neyi tuyaña nawakwakushimwina amboka-mboka chinateli kumukwasha kadizi. Dmitrii, washakamaña kuMoldova wahosheli nindi: “Mukwakushimwina wejima wenjileña nakundizisha walumbulwileña yuma munjila yambukaku. Chumichi chankwashili kwiluka njila jikwawu munatela kuzatishila yuma yinadizileña. Chinayili nakupompa katachi, hinatiyili nsonyi nankashiku muloña nadiña neluka dehi amakwetu niahela amakwawu.”

13. Muloñadi chitwatela kumukwashila kadizi kulonda yapompeña?

¹³ Kwashenu atudizi enu kulonda apompeña. Muloñadi? Muloña Yehova wayileja akwakudifukula indi nindi apompeña hamu, himbadi yakudifukula kwetu. (Heb. 10:24, 25) Kubombelahu, twekala muchisaka chimu nawamanakwetu niahela amuchipompelu. Neyi tunakupompa hamu chekalaña tuhu neyi kwiji tunakudiila hamu yakuda kwitala. Neyi mumukwasha kadizi wenu waBayibolu kulonda yapompeña, chidi neyi munakumukwasha kwila chuma chimu chalema chikuletesha yashikihu nakupapatishewa. Ilaña chinateli kumukalila hakwila yatachiki kupompa. Mukanda waLuñenu naWumi Haya Nyaaka! wunateli kumukwasha ñahi kadizi kushinda kukala kudi kwejima kunateli kumonayi?

14. Tunateli kumukwasha ñahi kadizi wetu hakwila nawu yapompeña?

¹⁴ Zatishenu kudiza 10 kwamukanda waLuñenu naWumi Haya Nyaaka! kulonda mumukwashi kadizi kwikala nampwila. Henohu iwu mukanda kanda awidishi, akwakushimwina amakwawu ayilejeli kuzatisha iku kudiza nawatudizi awu. Ahosheli nawu wazatikili chiwahi nawa wakwashili atudizi kutachika kupompa. Hela chochu, bayi muhembelela sampu munashiki mukudiza 10 dinu mwakayitambikeña atudizi enu kukupompaku. Yitambikenu swayi nawa yitambikenuña mpinji yejima. Atudizi aBayibolu amonaña kukala kwashiyashana. Dichi, shenu muchima kuyuma yinakukeñayi kadizi wenu nawa neyi chinatwesheki mukwashenu. Bayi muneña neyi chakwila hanahiti mpinji hakwila yatachiki kupompaku. Ikalenu adiwunjika, ilaña twalekenuhu kumutambika.

15. Atudizi anateli kwikala nawoma wamuchidinyi?

¹⁵ Komana mwanukaña mpinji yimwatiyili woma hakwikala Chinsahu chaYehova? Hadaha mwatoñojokeleña nenu mukutweshaña wanyi kushimwina kudi antu amavulu. Hela hadaha mwatiyileña woma nenu chisaka chenu hela amabwambu jenu anateli kuyikañesha. Neyi dimu, munateli kwiluka chinakutiyayi kadizi wenu waBayibolu. Yesu welukili nindi antu amakwawu anateli kutiya woma wamuchidiwu. Hela chochu, wayilejeli akwakumulondela kubula kwiteja woma wuyikañeshi kumukalakela Yehova. (Mat. 10:16, 17, 27, 28) Yesu wayikwashili ñahi akwakumulondela kuleka kutiya woma? Nawa munateli kumwimbujola ñahi?

16. Tunateli kumukwasha ñahi kadizi wetu kulonda yalejeñaku akwawu yuma yinakudizayi?

¹⁶ Twalekenuhu kudizisha atudizi enu kulonda alejeñaku akwawu yuma yakuhwelelawu. Hadaha atumbanji twaYesu atiyili woma hayitemesheliyi nindi ayi nakushimwina. Ilaña Yesu wayikwashili chayilejeliyi kwiluña kwakushimwina ninsañu yakushimwina. (Mat. 10:5-7) Munateli kumwimbujola ñahi Yesu? Mukwashenu kadizi wenu yeluki kwatela kushimwinayi. Chakutalilahu, mwihulenu neyi kudihu muntu welukayi watela kutiya kuwaha kudiza chalala chamuBayibolu. Mukwashenu chakuloñesha yuma yatela kuhoshayi nawa mulejenu chatela kulejayi akwawu chalala. Neyi chinatwesheki, munateli kuhitulukamu nindi kuzatisha nsañu yasonekawu mumutu wunakwila nawu “Antu Amakwawu Ahoshaña Nawu” hela “Antu Amakwawu Anateli  Kwihula Nawu,” yidi mumukanda waLuñenu naWumi Haya Nyaaka! Neyi munakumudizisha, mudizishenuña kadizi wenu kuzatisha Bayibolu kulonda yahaneña ñakwilu yapela nawa mukubabala.

17. Tunateli kuzatisha ñahi Matewu 10:19, 20, 29-31 hakukwasha kadizi wetu kulonda yamukuhweleli Yehova?

¹⁷ Mukwashenu kadizi wenu yamukuhweleli Yehova. Yesu wayilejeli atumbanji twindi nindi Yehova wukuyikwashaña muloña wayikeña. (Tañenu Matewu 10:19, 20, 29-31.) Mulejenu kadizi wenu nenu Yehova wukumukwashaña niyena. Munateli kuyikwasha kumushindamena Yehova neyi mulombelaña nawu hamu hayuma yinakufwila kwilawu. Franciszek, washakamaña kuPoland wahosheli nindi: “Ntañishi yami wateneneña yuma yinafwilileña kwila mukulomba kwindi. Chinamweni Yehova chakwiliyi kulomba kwantañishi yami, ninami natachikili kulomba. Yehova wakwili kulomba kwami chinalombeli kumudimu nami añiteji niyeña nakupompa nikukupompa kweneni.”

18. Yehova watiyaña ñahi namudimu wazatañawu akwaKristu?

¹⁸ Yehova wayakamenaña nankashi atudizi etu aBayibolu. Wamonaña chazatañawu nañovu akwaKristu hakwila akwashi antu kuswina kwakwihi nayena nawa wayikeña chikupu hamuloña wachumichi. (Isa. 52:7) Neyi chayinu mpinji munakulombola wanyi kadizi waBayibolu, munateli kukwasha atudizi kuhitila mukuya nawakwakushimwina amakwawu kudi atudizi awu.