1. Bandongesi ba Yesu balekele bika banu baje bakungulukilile mu Yelusalema?

LITANGWA limo, mbunga ya banalume na banakazi balikungulwilile mu Yelusalema. Aba banu batundile ku mafuti a kuliseza-seza. Co lalo, bakele na kwendeka bindaka bya kuliseza-seza. Lije litangwa kwalingiwile cuma cimo ca kukomokesa. Bayunda bamo bashangumukile kwendeka bindaka byeka bya banu baje batundile ku mafuti eka. Baje banu bakungulukile, bakomokele mubazibile Bayunda bendeka bindaka byabo. Oloni byuma byendekele Petulu ku mbunga yoshe bikebyo byabakomokesele manene. Petulu wabalekele ngwendi nga bakulahela Yesu Kilistu, co bakoboka. Ou muzimbu wabakwatele manene ku bimbunge. Ngeci, behwile ngwabo: “Tunapande kulinga bika?” Petulu wabakumbulwile ngwendi: ‘Munu na munu banapande kumumbwitika.’—Vili 2:37, 38.

2. Bika bitusimutwiya muno mu cilongesa? (Taleni cikupulo cili ha liputa lya kulibanga)

² Kuli cuma cikwabo lalo cakomokesele manene. Lije litangwa, banu ba kweta ku 3,000 babambwitikile, co bapwile bandongesi ba Kilistu. Aha hakeho hacashangumukilile cipangi cakama ca kupwisa banu bandongesi cashikile Yesu. Baka-kukabangeya Yesu bacili na kulinga eci cipangi ano matangwa. Oloni ano matangwa, kutwasa kukwasa munu ete ha kumumbwitika ha litangwa lya ngongo. Kunasa kwita bingonde, mwaka nambe kututubakana. Ngwe mutuzibukila kukwasa munu uje acililongesa Mbimbilya apwe ndongesi ya Kilistu kwatonda kulifwita. Muno mu cilongesa, tusimutwiya byuma bimunapande kulinga mangana mukwase banu bamukalilongesa nabo Mbimbiliya bapwe bandongesi ba kumbwitika.

3. Kwesekesa na mukanda wa Mateo 28:19, 20, bika byanapande kulinga uje acililongesa Mbimbiliya mangana bamumbwitike?

³ Munu uje acililongesa Mbimbiliya napande tahi kupangesa byali na kulilongesa asinoni bamumbwitike. (Tandeni Mateo 28:19, 20.)  Nga munu uje acililongesa Mbimbiliya apangesa byali na kulilongesa, co apwa ngwe ‘munalume wa kunyanyama’ wa mu cisimo ca Yesu uje watungilile njibo yendi ha limanya. (Mateo 7:24, 25; Luka 6:47, 48) Twasa kukwasa bati munu uje acililongesa Mbimbiliya apangese byali na kulilongesa. Tusimutwiyeni ha byuma bitatu bitwasa kulinga.

4. Twasa kukwasa bati munu uje acililongesa Mbimbiliya apwisemo bitondeka mangana bamumbwitike? (Taleni lalo cipalo ca “ Kwaseni Munu Uje Acililongesa Mbimbiliya Alyakele Bilengo na Kubishulisilila.”)

⁴ Kwaseni munu imukalilongesa nendi Mbimbiliya alyakele bilengo. Kulyakela bilengo kumukwasa bati? Cakumwenako, nga mwenda bungenzi bwabulaha na mota, mwasa kwimanako ha mitambela imo yaibwa. Kulinga ngoco kumikwasa mujeneke kumona bungenzi kupwa bwabulaha manene. Mu ngila imolika, nga uje acililongesa Mbimbiliya alyakela bilengo byabindondo na kubishulisilila, nasa kunanguka ngwendi asa kupwisamo byuma bitondeka mangana bamumbwitike. Pangeseni mutamba wa “Cilengo” uje uli mu libulu lya Likuweni Kuyoya Myaka Yoshe! mangana mushongangeye munu imukalilongesa nendi Mbimbiliya alyakele bilengo. Ku mamaneselelo a cilongesa na cilongesa, mukwaseni amone omwo kulyakela bilengo kumukwasela apangese byanalilongesa. Nga kuli cilengo ceka cimushaka ngweni alyakele, co cisonekeni ha mutamba wa “Cilengo Cikwabo.” Ha cilongesa na cilongesa, kwaseni munu uje acililongesa Mbimbiliya alyakele bilengo byabindende na bilengo byakama.

5. Kwesekesa na mukanda wa Mako 10:17-22, Yesu walekele bika munalume umo wa kufuka, co mwafwa bika?

⁵ Kwaseni munu imukalilongesa nendi Mbimbiliya ecele bilinga byabibi. (Tandeni Mako 10:17-22.) Yesu wazibukile ngwendi kwakukalu kuli muka-kufuka kulandesa byuma byoshe byali nabyo. (Mako 10:23) Oloni walekele munalume umo wa kufuka ngwendi alandese byuma byoshe byakele nabyo. Mwafwa bika? Mwafwa wamuzemene. Simbu imo, tunasa kwishwala kushongangeya  munu ngwetu ashangumuke kupangesa byali na kulilongesa mwafwa ya kusinganyeka ngwetu kasa kulinga ngoco ha simbu oyo. Banu bamo, kubesi kwecela bwasi bilinga byabibi na kuzala bunu bwabuha. (Kolo 3:9, 10) Oloni nga mulibanga kuleka munu imukalilongesa nendi Mbimbiliya hanapande kupangela, co mumukwasa apangeleho bwasi. Nga mumukwasa mu ngila eyi, mumwesa ngweni mwamwaka mbunge.—Myaso 141:5; Visi 27:17.

6. Mwafwa bika tunapande kwihula munu biyongola byendi ha ñanda ituli na kulilongesa?

⁶ Omwo mulilongesa na munu, munapande kumwihula biyongola byendi ha ñanda imuli na kulilongesa. Kulinga ngoco, kumikwasa muzibuke indi munu imuli na kulilongesa nendi ali na kuzibisisa byali na kulilongesa na kubikulahela. Nga mumwihula-ihula bihula bya cifwa eci, co kumipwila kwakwasi kumukwasa azibisise bilongesa bije binasa kumupwila byabikalu kubikulahela. Mu libulu lya Likuweni Kuyoya Myaka Yoshe! muli bihula byabingi bije bilingisa munu endeke biyongola byendi. Cakumwenako, ha cilongesa 04 hali cihula ca: “Musinganyeka ngweni Yehova aliziba bati nga mupangesa lizina lyendi?” Co ha cilongesa 09 hali cihula ca: “Yeni mushaka kulombela ha byuma muka?” Ha kulibanga kunasa kupwa kwakukalu kuli munu imukalilongesa nendi kwendeka biyongola byendi. Oloni mwasa kumwizilisa kulinga ngoco nga mumulomba ngweni endeke biyongola byendi ha bikupulo nambe ha bisoneka bibanamwesa.

7. Mwasa kupangesa bati bya kuliwana nabyo?

⁷ Nga munu imukalilongesa nendi Mbimbiliya nazibisisa byanapande kulinga, co mulekeniko byakuliwana nabyo bimo bije bimushongangeya kupangesa byanalilongesa. Cakumwenako, nga munu imukalilongesa nendi kesi kukunguluka kushwa kumo, co mumweseni vidio ya Yehova Wanjakele Mbunge ije ili mu cilongesa 14 ha mutamba wa “Waneni Bikwabo.” Mu bilongesa byabingi bya mu libulu lya Likuweni Kuyoya Myaka Yoshe! muli byakuliwana nabyo byabingi ha mutamba wa “Tondeseseni” nambe wa “Waneni Bikwabo.” * Munima ya kukenga vidio, kesi muleke munu imukalilongesa nendi ngweni, ‘Nga nasa kulinga ngoco, co neni mwasa kulingamo.’ Oloni kwaseni munu imukalilongesa nendi ananguke ngwendi asa kulinga ngoco. Cakumwenako, mwasa kwendeka byuma bimo binakwasa munu imunakenge mu vidio apangese byuma byanalilongesa. Mwasa kwendekako ha cisoneka cimo camukwasele nambe byuma bimo byalingile. Co lalo, mwasa kwendekako byuma bimo bije bimwesa mwanamukwasela Yehova.

8. Twasa kukwasa bati munu itukalilongesa nendi azeme Yehova?

⁸ Kwaseni munu imukalilongesa nendi azeme Yehova. Mwasa kulinga bati ngoco? Mukwaseni ananguke bifwa bya Yehova. Kwaseni munu imukalilongesa nendi azibuke ngwendi Yehova wapwa Njambi wa kubwahelela, co akakwasa baje bamuzema. (1 Tima 1:11; Heve 11:6) Mukwaseni ananguke ngwendi Yehova namwana binangulo bya mu Mbimbiliya mwafwa wamuzema, co kubipangesa kumukwasa. (Isaya 48:17, 18) Nga munu imukalilongesa nendi Mbimbiliya azema manene Yehova, co kumupwila kwakwasi kutengulula futisi yendi.—1 Yowa 5:3.

9. Kwesekesa na Mako 10:29, 30, bika byasa kukwasa munu asezeko byuma bimo mangana bamumbwitike?

⁹ Munu uje acililongesa Mbimbiliya napande kwecela kulinga byuma bimo mangana bamumbwitike. Ngwe mwa uje munalume wa kufuka itunabanga kusimutwiya, banu bamo banapande kulyana mangana becele byuma bimo. Cakumwenako, nga cipangi cibakapanga kucilitombola na binangulo bya mu Mbimbiliya, banapande kutondako cipangi ceka. Bamoco banapande kwecela  kulikwatasana na babusamba babo baje kubesi na kupangela Yehova. Bakwaboco banasa kubayengula kuli baka-naanga yabo baje bazinda Bakaleho ba Yehova. Yesu wendekele ngwendi banu bamo kunasa kubakaluwila kulyana mu ngila eyi. Oloni wakulahesele ngwendi baje bamukabangeya kubakalibeye mwafwa Yehova abana naanga ya ku sipilitu. (Tandeni Mako 10:29, 30.) Mwasa kukwasa bati imukalilongesa nendi Mbimbiliya awane bukwasi ku bandolome na bandokazi mu cikungulukilo?

10. Bika bitulilongesa ku byuma byendekele Manuel?

¹⁰ Likuteni busamba na munu imukalilongesa nendi. Munu uje acililongesa Mbimbiliya napande kulimwena ngwendi mwamwaka mbunge. Mwafwa bika? Tuzibeni byendekele Manuel uje wakala ku Mexico. Manuel walumbunwine mwamukwaselele uje wamulongesele Mbimbiliya. Wendekele ngwendi: “Simbu kanda tushangumuke kulilongesa, ndolome uje wakele na kunjilongesa wakele na kunjihula tahi munjinendukila. Wanjikwasele njipwe wa kuzituka na kumuleka byuma byoshe-byoshe bili ku mbunge yange. Co njalizibile ngwange wanjaka manene mbunge.”

11. Kusikama na munu imukalilongesa nendi Mbimbiliya kumukwasa bati?

¹¹ Yesu wakele na kusikama na bandongesi bendi. Ngeci, neni waneniko simbu ya kusikama na banu bamukalilongesa nabo Mbimbiliya. (Yowa 3:22) Nga munu imukalilongesa nendi ali na kutengulula futisi yendi, co mwasa kumulanya ku njibo mangana mwakulye nendi byakulya nambe kukenga nendi JW Broadcasting. Munu uje acililongesa Mbimbiliya nasa kuziba buli nga babusamba na babushoko bendi balinga cilika ca bulombelo nambe ca lifuti. Ngeci, eyi ikeyo simbu yaibwa ya kumulanya ku njibo yeni. Kazibwe wa ku Uganda wendekele ngwendi: “Ha simbu injakele na kusikama na ndolome uje wakele na kunjilongesa, njalilongesele byabingi hali Yehova ngwe bije binjakele na kulilongesa ha simbu ya cilongesa. Njalimwenenene ngwange Yehova wazema banu bendi, co bapwa ba kubwahelela. Ebi bikebyo bene byuma binjatondele mu kuyoya kwange.”

12. Mwafwa bika tunapande kuya na baka-kwambulula ba kuliseza-seza ku cilongesa?

¹² Yeni na baka-kwambulula ba kuliseza-seza ku cilongesa. Simbu imo tunasa kuliziba ngwetu kwakubwa kuya likalyetu ku cilongesa nambe  kuya na muka-kwambulula umo lika simbu yoshe. Nameme kwakwasi kulinga ngoco, mukwasa manene munu imukalilongesa nendi nga muya na baka-kwambulula ba kuliseza-seza ku cilongesa. Dmitrii wa ku Moldova wendekele ngwendi: “Muka-kwambulula na muka-kwambulula uje wakele na kwija na ndolome injakele na kulilongesa nendi wakele na kulumbununa byuma mu ngila ya kulitila. Oku kwanjikwasele njinanguke bingila bya kuliseza-seza mwakupangesela byuma binjakele na kulilongesa. Co lalo, njazitukile munjaile ku biwano lwa kulibanga mwafwa njalizibukile na bandolome na bandokazi babangi.”

13. Mwafwa bika tunapande kukwasa munu itukalilongesa nendi ashangumuke kukunguluka?

¹³ Kwaseni munu imukalilongesa nendi Mbimbiliya ashangumuke kukunguluka. Bika kwapwila kwa seho kulinga ngoco? Mwafwa Yehova washika bangamba bendi ngwendi bakunguluke-kunguluke. Kukunguluka yapwa ngila itukamulemeselamo. (Heve 10:24, 25) Co lalo, bandolome na bandokazi bapwa baka-naanga yetu ku sipilitu. Mutukakala nabo ku biwano kukafu lika ngwe tuli na kulila hamo nabo byakulya ku njibo. Nga mukwasa munu acililongesa Mbimbiliya ashangumuke kukunguluka, co mumukwasa apwisemo bitondeka mangana bamumbwitike. Oloni kunasa kumukaluwila kushangumuka kukunguluka. Libulu lya Likuweni Kuyoya Myaka Yoshe! lyasa kukwasa bati munu uje acililongesa Mbimbiliya ahyane bukalu bwoshe-bwoshe buje bunasa kumwonowesa kukunguluka?

14. Twasa kushongangeya bati munu uje acililongesa Mbimbiliya ashangumuke kukunguluka?

¹⁴ Pangeseni cilongesa 10 ca libulu lya Likuweni Kuyoya Myaka Yoshe! mangana mushongangeye munu imukalilongesa nendi ashangumuke kukunguluka. Baka-kwambulula baje besekele kupangesa eci cilongesa simbu kanda batuhule eli libulu, basele kukwasa banu babakele na kulilongesa nabo bashangumuke kukunguluka. Oloni kumwapandele kubandamena ngweni kubanga mwete ha cilongesa 10 asinoni mulanye munu ku biwano. Mwasa kumulanya mucishangumuka lika kulilongesa nendi, co twaleleleniho kumulanya. Banu batukalilongesa nabo kubesi kuliwana na bukalu bwa kulifwa. Ngeci, zibukeni bukalu bwali na kuliwana nabwo munu imukalilongesa nendi na kuwanako ngila imo mwakumukwasela. Keti muzeye nga kashangumuka bwasi kukunguluka. Kaleni na mbunge ya kubandamena, oloni twaleleleniho kumulanya.

15. Byuma muka bibanasa kulishoshomwena banu batukalilongesa nabo Mbimbiliya?

¹⁵ Kuma ha kulibanga mwazibile lyoba mumwasinganyekele bya kupwa Mukaleho indi? Hamo mwasinganyekele ngweni kumwasa kwambulwila ku mbunga. Nambe hamo mwasinganyekele ngweni babusamba beni na baka-naanga yeni bamilwisa. Nga mukemwo, co mwasa kuzibisisa mwali na kulizibila munu imuli na kulilongesa nendi. Yesu wendekele ngwendi banu bamo banasa kulishoshomwena ha byuma ebi. Oloni wanangwile baka-kumukabangeya ngwendi lyoba kulyapandele kubonowesa kupangela Yehova. (Mateo 10:16, 17, 27, 28) Yesu wakwasele bati baka-kumukabangeya bapwe ba kusimpa, co twasa kumutembwinina bati?

16. Twasa kulongesa bati munu uje acililongesa Mbimbiliya mwakulekelako bakwabo byali na kulilongesa?

¹⁶ Kamandende-kamandende, kwaseni munu imukalilongesa nendi alekeko bakwabo byali na kulilongesa. Hamo bandongesi ba Yesu bazibile lyoba mwabalekele ngwendi baye na kwambulula. Oloni Yesu wabakwasele omwo wabalekele kwakwambulwila na muzimbu ubapandele kwambulula. (Mateo 10:5-7) Mwasa kutembwinina bati Yesu? Kwaseni munu imukalilongesa nendi azibuke kwanasa kwambulwila. Cakumwenako, mwihuleni indi kuli munu yazibuka yanasa kulekako cuma cimo canalilongesa. Kutundaho, mukwaseni alibwahesele bya kwendeka. Mumweseni ngila yayasi yakwendekelamo byashaka kulekako bakwabo. Nga citaba mwasa kupangesa mutamba wa “Bamo Bakendeka  Ngwabo” nambe wa “Bamo Banasa Kwihula Ngwabo” uje uli mu libulu lya Likuweni Kuyoya Myaka Yoshe! omwo mulibwahesela. Mukwaseni azibuke mwakupangesela Mbimbiliya mangana akumbulule mu ngila yayasi na mu kasingimiko.

17. Twasa kupangesa bati mukanda wa Mateo 10:19, 20, 29-31 mangana tukwase munu uje acililongesa Mbimbiliya akulahele Yehova?

¹⁷ Kwaseni munu imukalilongesa nendi akulahele Yehova. Yesu wakwasele bandongesi bendi bakulahele ngwabo Yehova abakwasa mwafwa wabazema. (Tandeni Mateo 10:19, 20, 29-31.) Lekeni munu imukalilongesa nendi ngweni Yehova amukwasa. Lombeni Yehova ngweni amukwase ashulisilile bilengo byendi. Nga mulombela oku nendi hali, co mumukwasa akulahele manene Yehova. Franciszek wa ku Poland wendekele ngwendi: “Ndolome uje wakele na kunjilongesa Mbimbiliya wakele na kutumbula bilengo byange mu lilombelo. Munjamwene omwo Yehova wakele na kukumbulwilamo malombelo endi, nange njashangumukile kulombela-lombela. Njalimwenenene mwakele na kunjikwasela Yehova munjakele na kulomba mukulunu wa bipangi ngwange anjaneko simbu ya kukunguluka ku biwano bya cikungulukilo na biwano byakama. Ha simbu eyi, te njicikobela-kobela bipangi.”

18. Yehova wamona bati baka-kwambulula baje bali na kulinga cipangi ca kulongesa?

¹⁸ Yehova wazema manene banu batukalilongesa nabo Mbimbiliya. Azibuka ngwendi baka-kwambulula bali na kulifwita kukwasa banu bashwenye kuyehi nendi, co wabazema manene. (Isaya 52:7) Nga kumwesi na kutwamenena cilongesa ca Mbimbiliya ha simbu ino, mwasa kukwasa baje bacililongesa Mbimbiliya bapwisemo bitondeka mangana babambwitike nga muya na baka-kwambulula baje bakalilongesa nabo.