1. Iesu ena hahediba taudia ese hutuma be dahaka e hamaorodia?

HANUA bona gado idauidau taudia hutuma na ela Ierusalem. Una negai hoa ḡauna ta e vara. Iuda taudia haida na unu vadivadi taudia edia gado ai e herevava! Hutuma na unu Iuda taudia ese e gwaurai herevadia bona aposetolo Petro ena hereva daidiai e hoa. Idia na e diba bema Iesu Keriso bae abidadama henia neganai, bae mauri diba. Una hereva ese idia na e hagoadadia bada dainai, e henanadai: “Ede baia kara toma?” Petro ese e haere henidia, eto: “Iboumui ai bapatiso bavabia.”​—Apos. 2:37, 38.

2. Ina atikol ai dahaka baita herevalaimu? (Rau 1 laulauna ba itaia.)

² Hoa ḡauna na ina, taunimanima 3,000 bamona na una dina ai e bapatiso, bona Keriso ena hahediba ai ela. Una negai hahediba taudia ihalaodia ḡaukarana e hematama, Iesu ese ia murinai e rakava taudia e haḡanidia heḡereḡerena. Una nega amo ema bona hari una ḡaukara na dounu e karaiamu. Hari ina negai, ita na dia hora haida lalodiai ta baita duruamu bena be bapatisomu. To, hua haida o laḡani haida lalodiai stiuden baita duruamu ela bona baine bapatiso. Ta baita duruamu Keriso ena hahediba ai bainela na mai hekwarahina. Ina atikol ai, emu Baibul stiuden ba durua ela bona baine bapatiso totona ba kara ḡaudia haida baita herevalaimu.

3. Mataio 28:19, 20 heḡereḡerena, stiuden be dahaka baine kara baine bapatiso totona?

³ Baibul stiuden na baine bapatiso totona, namona na Baibul amo e dibamu ḡaudia baine badina. (Mataio 28:19, 20 ba duahi.) Eda stiuden na e dibamu ḡaudia baine badina neganai,  ia na Iesu ena haheitalai lalonai e gwauraia “aonega tauna” na heto, ia ese guri e ḡeia dobu bena papapapa latanai ena ruma e hadaia. (Mat. 7:24, 25; Luka 6:47, 48) Edena dalai stiuden ta baita durua e dibamu ḡaudia baine badina? Mani dala toi aita herevalai.

4. Edena dalai stiuden baita durua baine ḡaukara goada bapatiso iabina totona? (Maua ladana “ Emu Stiuden Ba Durua Tahua Ḡaudia Baine Ato Bona Baine Haḡuḡuru” ba itaia.)

⁴ Emu stiuden ba durua tahua ḡaudia baine ato. Dahaka dainai unu ba kara toma? Ina haheitalai mani a laloa: Bema oi na motuka amo gabu daudauna ta bo laomu, reana oi na gabu namona ta ai do bo stopumu. Unu amo una gabu daudau dainai basio lalohekwarahimu. Una heḡereḡerena, Baibul stiuden ta na baine haḡuḡuru diba tahua ḡaudia be atomu, bona be haḡuḡurumu neganai be itaiamu ia na heḡereḡere baine bapatiso totona. Enjoy Life Forever! bukana ai, kaha ta ladana “Goal” ba ḡaukaralaia emu stiuden ba durua tahua ḡaudia baine ato totona. Lesen ta ta dokodiai, unu tahua ḡaudia ese emu stiuden bae durua e dibamu ḡaudia baine badina daladia ba herevalai. Bema oi na o uramu emu stiuden na tahua ḡauna ma ta baine haḡuḡurua, ina kaha ladana “Other” ai ba torea. Nega iboudiai ina kaha ba ḡaukaralaia emu stiuden ida nega kwadoḡi bona nega daudau lalonai baine haḡuḡuru tahua ḡaudia ba riviulai.

5. Mareko 10:17-22 ai, Iesu ese taḡa tauna ta be e hamaoroa dahaka baine kara, bona dahaka dainai?

⁵ Emu stiuden ba durua ena mauri lalonai sensi haida baine kara. (Mareko 10:17-22 ba duahi.) Iesu na mai dibana taḡa tauna ta ese ena kohu iboudiai baine hoihoilai na auka. (Mar. 10:23, NWT) To, Iesu ese e hamaoroa unu baine kara toma. Dahaka dainai? Badina Iesu ese ia na e lalokau henia. Nega haida basita uramu stiuden ta baita  hagoadaia e dibamu ḡaudia baine badina, badina baita laloamu ia na do dia heḡereḡere sensi baine kara totona. Reana ta na nega daudau lalonai ena mauri gunana be haidauamu bona mauri matamatana be badinaiamu. (Kol. 3:9, 10, NWT) To, matamanai stiuden ese baine kara ḡaudia bo herevalai heboumu neganai, ia na taina ruana ena kara be haidaumu. Bema unu bo kara tomamu, o hahedinaraiamu ia na o laloa badamu.​—Sal. 141:5; Her. 27:17.

6. Dahaka dainai stiuden baita nanadaia ena lalohadai baine gwauraia?

⁶ Ḡau badana na stiuden baita nanadaia ta herevalaiamu topik ai ena lalohadai baine gwauraia. Una ese stiuden be duruamu baine laloparara bona e dibamu ḡaudia baine abi dae. Hanaihanai unu bo kara tomamu neganai, gabeai stiuden ese be daradaralaimu topik bo herevalai hebou dibamu. Enjoy Life Forever! bukana ai, henanadai namodia momo e tore. Heḡereḡere, lesen 04 ai henanadai ta na ina: “O laloamu Iehova ladana bo ḡaukaralaiamu neganai, iena hemami be ede bamona?” Bona lesen 09 ai henanadai ta bina: “O uramu ba ḡuriḡurilai ḡaudia haida be dahaka?” Reana matamanai, emu stiuden enai na auka unu henanadai baine haerelai. To ba durua diba e hetore siridia bona laulau baine lalodia bona baine herevalai.

7. Edena dalai haida edia ekspiriens baita ḡaukaralai namonamo?

⁷ Emu stiuden ese baine kara ḡaudia be dibamu neganai, haida edia ekspiriens amo ba hagoadaia unu e diba ḡaudia baine badina totona. Heḡereḡere, bema emu stiuden na e hekwarahimu hebou bainema hanaihanai, lesen 14 ai ina kaha “Explore” ai vidio ladana Jehovah Cared for Me ba hahedinarai henia. Enjoy Life Forever! bukana ena lesen momo ai, ini kaha “Dig Deeper” eiava “Explore” ai ekspiriens unu bamodia bo davarimu. * To, namona na ba henahua toho, dia namo emu stiuden na ma ta ida ba haheḡereḡerea, bena bao gwa, “Bema ia na unu e kara toma, oi danu unu ba kara toma diba.” Namona na stiuden sibona ese baine haeroa ia be dahaka baine kara. To, emu stiuden ida una vidio ai o itaia tauna be dahaka ese e durua Baibul ena hahediba herevadia e badina ba herevalaia. Reana siri badana ta eiava e karaia ḡauna ta ba herevalaia. Bema mai dalana, Iehova ese una tadikaka o taihu e durua dalana ba gwauraia.

8. Edena dalai eda stiuden baita durua Iehova baine lalokau henia?

⁸ Emu stiuden ba durua Iehova baine lalokau henia. Edena dalai? Dala ba tahu emu stiuden ba durua Iehova ena kara namodia baine diba namonamo totona. Ba durua bena baine laloparara Iehova na moale Diravana bona ia e lalokau heniamu taudia na e durudiamu. (1 Tim. 1:11, NWT; Heb. 11:6) Emu stiuden enai ba hahedinaraia e dibamu ḡaudia be badinamu neganai, una ese be duruamu bona ba hadibaia Iehova ese ia na e lalokau heniamu. (Isa. 48:17, 18) Emu stiuden ese ena lalokau Iehova enai be hagoadaiamu neganai, be uramu ena mauri lalonai sensi badadia baine kara.​—1 Ioa. 5:3.

9. Mareko 10:29, 30 heḡereḡerena, dahaka ese ta baine durua diba ḡau haida baine dadarai bapatiso baine abi totona?

⁹ Baibul stiuden ta na baine goada ela bona baine bapatiso totona, ḡau haida baine dadarai na namo. Matamanai tame herevalaia  taḡa tauna heḡereḡerena, stiuden haida ediai na auka edia kohu bae dadarai. Bema e karaiamu moni ḡaukarana ese Baibul ena hahekau herevadia e utumu, reana ḡaukara ma ta bae tahua diba. Momo na Iehova asie lalokau heniamu taudia itura henidia karana e hadokoa. Haida be edia ruma bese taudia ese e dadaraidiamu badina Iehova ena Witnes na asie ura henidiamu. Iesu na e gwa haida ediai na auka ḡau unu bamodia bae dadarai totona. To, ia na e gwauhamata ia e badinaiamu taudia na basie lalohisihisi. Iehova ese iena lalokau ruma besena lalonai baine hakaudia vareai. (Mareko 10:29, 30 ba duahi.) Edena dalai emu Baibul stiuden ba durua una harihari ḡauna namona baine laloa bada?

10. Manuel ena ekspiriens amo dahaka o dibamu?

¹⁰ Emu stiuden na turamu ai ba halaoa. Ḡau badana na, emu stiuden enai ba hahedinaraia ia na o laloa badamu. Dahaka dainai? Mexico ai e nohomu tadikakana, Manuel ena hereva mani a laloa. E stadiva negana e laloa lou neganai, ini e gwau toma: “Stadi negadia ta ta ai, lau e stadi heniguva tauna ese nega momo e nanadaiguva, ‘oi namo?’ Ia ese e duruguva basina gari to lalogu ai e miava ḡaudia na baine herevalai. Na mamia ia ese lau na e lalogu badava.”

11. Nega baita ato bona eda stiuden baita bamodiamu neganai, dahaka be varamu?

¹¹ Nega bavato emu stiuden ba bamodia, Iesu ese ena hahediba e bamodiava heḡereḡerena. (Ioa. 3:22) Bema emu Baibul stiuden na e goadamu, ba boiria diba emu ruma ai bavaniani hebou eiava hua ta ta ai e lasimu broadcast vidio ta ba itaia hebou. Emu stiuden na holidei negadiai reana sibona dainai bo boiriamu neganai be moalemu. Kazibwe, Uganda ai e nohomu tauna ta na e gwa: “Lau e stadi heniguva tadikakana ibamona karana amo Iehova na dibaia namonamo. Na itaia Iehova ese ena taunimanima na e lalodia badamu bona idia na e moalemu. Lau na mauri unu bamona na urava.”

12. Dahaka dainai pablisa idauidau na eda stadi ai ba helai vareai?

 ¹² Pablisa idauidau ba boiridia emu stadi ai bae helai vareai. Nega haida baita lalomu, siboda baitala na namo eiava ta manadaia pablisana ida baitala. Ena be una na dala haraḡana, to pablisa idauidau ida baita laomu neganai eda Baibul stiuden na be durua badamu. Moldova ai e nohomu tadikakana, Dmitrii na e gwa: “Egu stadi ai e helai vareaiva pablisa ta ta ese topik ta na dala idauidau ai e herevalaiva. Una ese e duruguva dala idauidau ai na dibava ḡaudia baina badinadia. Egu hebou ginigunana nala neganai, asina hemarai badina tadikaka taihu momo na da na dibadia.”

13. Dahaka dainai eda stiuden baita durudia hebou baema?

¹³ Emu stiuden ba durua kongrigeisin heboudia baema. Dahaka dainai? Badina Iehova ese iena hesiai taudia e haḡanidia bae hebou; una na eda tomadiho kahana ta. (Heb. 10:24, 25) Danu, tadikaka bona taihu na eda ruma bese na heto. Idia ida ta heboumu neganai, una na vaitani ruma ai aniani namona ta moalelaia hebou. Emu Baibul stiuden o duruamu hebou e maimu neganai, oi na ia o duruamu mai anina bada ḡauna ta baine karaia unu amo baine bapatiso. To, reana matamanai enai na auka hebou bainema. Edena dalai Enjoy Life Forever! bukana ese emu stiuden baine durua ia e kouamu ḡaudia baine hanaidia?

14. Edena dalai eda stiuden baita hagoadaia hebou bainema?

¹⁴ Enjoy Life Forever! bukana ena lesen 10 ba ḡaukaralaia emu stiuden ba hagoadaia. Ina buka do se halasia neganai, pablisa haida e noidia ina lesen na edia stiuden ida bae herevalaia. Idia na e gwa, una lesen ese edia stiuden e durudia hebou baela totona. To, basita nari ela bona lesen 10 ai baita kau bena eda Baibul stiuden baita boiridia hebou baema. Namona na o stadi henia matama negana amo ba invaitia loulou hebou bainema. Stiuden ta ta edia hekwakwanai na idauidau. Una dainai emu stiuden ena hekwakwanai ba laloa bona ba itaia edena dalai heduru ba henia. Bema ia na hebou se maimu basio lalomanoka. Namona na ba haheauka bona dounu ba durua.

15. Eda stiuden be dahaka ḡau haida daidiai e garimu?

¹⁵ Reana guna oi na o gariva Iehova ena Witnes ta ai baola. O laloava taunimanima na basio haroro henidia dibamu. Eiava o gariva hari be emu famili o turamu ese be daḡedaḡe henimu. Bema unu bamona, emu Baibul stiuden ena hemami na bo lalopararalaiamu. Iesu na e gwa haida na unu ḡau daidiai be garimu. To, ia ese ia murinai e rakava taudia e hagoadadia unu ḡau ese idia na basie koudia Iehova bae hesiai henia totona. (Mat. 10:16, 17, 27, 28) Edena dalai Iesu ese ia murinai e rakava taudia e durudia basie gari? Bona edena dalai ena haheitalai baita tohotohoa?

16. Edena dalai eda stiuden baita hadibaia ia e diba ḡaudia na ma haida ediai baine herevalai?

¹⁶ Emu stiuden ba hadibaia e diba ḡaudia na ma haida ediai baine herevalai. Iesu ese ena hahediba e siaidia bae haroro neganai, reana idia na e gari. To, Iesu ese e durudia bona e hadibadia edeseniai bae haroro bona dahaka sivarai bae harorolaia. (Mat. 10:5-7) Edena dalai Iesu ena haheitalai ba tohotohoa? Emu stiuden ba hadibaia edeseniai bona ededia nega ai baine haroro. Heḡereḡere, ba nanadaia bema ia mai dibana tauna ta na Baibul ena hereva momokanina ta amo heduru baine abi diba. Bena ba durua una hereva momokanina baine  gwauraia dala haraḡana ta baine heḡaeḡaelaia. Enjoy Life Forever! bukana ai ini kaha “Some People Say” bona “Someone May Ask” ai e hetore herevadia na ia ida ba praktislai. Una o karaiamu lalonai, ba durua Baibul baine ḡaukaralaia mai aonegana ida haere kwadoḡidia baine heni.

17. Edena dalai Mataio 10:19, 20, 29-31 baita ḡaukaralaia eda stiuden baita durua Iehova baine abidadama henia?

¹⁷ Emu stiuden ba durua Iehova baine abidadama henia. Iesu ese ena hahediba e hadibadia Iehova ese idia na baine durudia badina e lalokau henidiamu. (Mataio 10:19, 20, 29-31 ba duahi.) Emu stiuden ba hadibaia Iehova ese ia danu be duruamu. Iehova enai baine tabekau totona ba durua dalana ta na, ia ida ena tahua ḡaudia ba ḡuriḡurilai. Poland ai e nohomu tadikakana, Franciszek na e gwa: “Nega momo lau e stadi heniguva tadikakana ese ena ḡuriḡuri ai egu tahua ḡaudia e herevalaiva. Iehova ese ena ḡuriḡuri e haerelau daladia na ita neganai, una ese e hagoadagu baina ḡuriḡuri. Hebou maraḡidia bona badadia bainala totona egu moni ḡaukara matamatana ai egu bosi na noia dina haida basina ḡaukara neganai, Iehova ena heduru na na mamia.”

18. Iehova ese Kristen taudia edia hahediba ḡaukarana be ede e laloa tomamu?

¹⁸ Iehova ese eda Baibul stiuden na e lalodia badamu. Ia ese Kristen hahediba taudia na e lalokau henidiamu badina mai dibana idia na e ḡaukara goadamu taunimanima bae durudia ia bae tura henia. (Isa. 52:7) Bema ina horai oi na do asi emu Baibul stadi ta, pablisa ma haida edia stadi ai ba helai vareai bona edia stadi taudia ba durudia bae goada ela bona bae bapatiso.