MWAHA WOOSOMIYA 22
Mwaakavihere atthu anaasomiheenyu Ibiiblya mpaka wampattisiyaaya
“Khula ntthu apattisiye.”—MITE. 2:38.
NCIPO 72 Pregar as Verdades do Reino
NINHALA WIITTHUCANI? *
1. Isiyani yaarumiyaaya upanka atthu enci yaawile u Yerusalemu?
MPHWINKO waatthu enci, alopwana ni athiyana olapo coovirikanaca, yaari u Yerusalemu. Ayo atthwaayo yooluma iluuuka coovirikanaca. Nne nihukunne yaheerannya itthu yootikhiniha. Ikhurupu yaatthari a Yesu ayuuta yahancera wuuluma iluuka caatthu olapo cikhwaawe yaawile u Yerusalemu. Iyo yahaatikhiniha cinene ayo atthwaayo. Masi itthu yaalalyeeriyaaya naatthari a Yesu ni naapostolu Peturu phaatepile waavara nrima ayo atthwaayo. Ayo atthwaayo yaheetthuca wiira yahaana yathoonyeraka umwaamini Yesu Kristu wiira yoopwe. Wahaatteela nrima cinene, mpaka yahokoha co: “Isiyani inlamuliyeehu upanka?” Ni ayo yaakhuliye co: “Khula ntthu apattisiye.”—Mite. 2:37, 38.
Munna mmoca naamwaarawe nansomiha Ibiiblya mmirawo cisile mmatatani ilivuru Mphwanye Utteeliya Uhimmala! (Nwehe iparaagarafu 2)
2. Ninhala wiitthucani nhina ula mwahoola? (Nwehe ilatarato yo wakaapani.)
2 Vano, yahokhumelela itthu yootikhiniha. Atthu 3.000 yahopattisiya nne nihukunne ni yahokhala atthari a Kristu. Waanaapacapaca nteko muulupale Yesu waarumilyaawe attharyaawe—nteko wo waapanka eetthuci. Mahukwaala, atthari a Yesu nanlelo ari moovara uyo ntekooyo. Ilelo, hiiva khaninkhikitiri unkavihera ntthu mpaka wampattisiyaawe nhina iwoora vakaani paahi. Ninaavirihaka myeeri, mwaakha mmoca awula myaakha cinci wiira ninkavihere ntthu mpaka wampattisiyaawe. Wakhala wiira nyuuva nhaana ntthu nonsomiheenyu Ibiiblya, nnaacuwela wiira uyo ukhanle nteko woorika cinene. Nhina ula mwahoola, ninaahala woona isiyani inlamuliyeenyu upanka wiira munkavihere ntthu nonsomiheenyu Ibiiblya wiira apattisiye.
MUNKAVIHERE NTTHU NONSOMIHEENYU IBIIBLYA WEETTELA CITTHU CINEETTHUCAAWE
3. Toko cinthoonyeraaya Matewus 28:19, 20, isiyani ntthu inlamuliyaawe upanka hinaaya upattisiya?
3 Ntthu nonsomiheenyu Ibiiblya hinaaya upattisiya, haana eettelaka muukumini wawe citthu cineetthucihaaya Ibiiblya. (Nsome Matewus 28:19, 20. *) Ntthu nonsomiheehu Ibiiblya eettelaka itthu inhimyaaya Ibiiblya, naalikanaca ni “nlopwana ankhili omaana” noteka inupaawe yoothipeliya sana-saana waculu itthaya yoolipa. (Mat. 7:24, 25; Luka 6:47, 48) Ninhala unkavihera cani ntthu nonsomiheehu Ibiiblya wiira eettele citthu cineetthucaawe? Nttwee noone citthu tthaaru.
4. Isiyani inlamuliyeenyu upanka wiira munkavihere ntthu nonsomiheenyu uhihiyerera wiikurumica wiira apattisiye? (Nwehe ikwaaturu ineera “ Munkavihere ntthu nonsomiheenyu Ibiiblya wiihelela mipika co munnepani ni wiirannyeeha.”)
4 Munkavihere ntthu nonsomiheenyu Ibiiblya wiihelela mipika. Kontha isiyani nhaana munkaviheraka upanka iyo itthwiiyo? Muupuwele nna ntakiheronna: Nyuuva nhaana nkwaha woottayi ni nnohala urwaa mpaasikeerini. Nrwaakoono nno nipuronno, nyuuva atthunaka mwanhala ulakela weemela mapuro ooreeraca toko uri myooloko, wiira moone. Mwapankaka commo, nyuuva khamwaahala utepa woocya cinene. Inanna imoca, ntthu nonsomiheenyu Ibiiblya haana eehelelaka mipika cankaani, ulakela citthu cimpheelaawe wiikurumica upanka hinaaya upattisiya. Apankaka commo, uyo khanhala wuupuwela wiira upattisiya ikhanle itthu inrika. Wiira munkavihere ntthu nonsomiheenyu Ibiiblya ukhitiri wiihelela mipika, nvarele nteko mphantte wo ilivuru Mphwanye Utteeliya Uhimmala! wantikhiye “Itthu yoohala upanka.” Wiimaleloni waya khula mpantta unhaleenyu unsomiha, moopele mwaha manannani uyo mpikooyo cinvaranacaaya niitthu yaakhunlyaawe. Moona wiira uhaavo mpika nkhwaawe unlamuliyaawe wiihelela, moopele mwaha nkhayi nuuyo ni pooti wantikha mphantte uneera “Itthu ikhwaawe.” Nhihiye uvarela nteko ula mphatte wo iyo ilivurwiiyo wiira moopele mwaha mipika cankaani ni cuulupale ca ntthu nonsomiheenyu Ibiiblya.
5. Toko cinthoonyeraaya Markus 10:17-22, isiyani Yesu yaamwiirenlyaawe nlopwana thaciri wiira ahaana apankaka? Ni nlattuni?
5 Munkavihere ntthu nonsomiheenyu Ibiiblya upanka marukunuso moolupale muukumini wawe. (Nsome Markus 10:17-22. *) Yesu ahocuwela wiira nlopwana thaciri wanhala unrika uthumiha mihakhu cotheene caarinaawe. (Mark. 10:23) Masi Yesu hataa acuwelaka wiira yaari itthu yaahala unrika ule nlopwanoole, uyo ahomwiirela wiira ahaana apankaka iyo itthwiiyo. Kontha isiyani? Kontha Yesu aananfenta cinene. Ikwaha cikiina, hiiva khaninonkurumicaka ntthu nonsomiheehu weettela itthu yiitthucalyaawe kontha ninoopuwelaka wiira uyo khanhala ukhitiri. Khweeliini, pooti uvira ukati mwinci wiira ntthu ahiye upanka citthu cootakhala ni meettelo oohinamaana. (Akol. 3:9, 10) Masi mwankurumicaka woohipicapica upanka ayo marukunuswaayo, uyo naahala waakuva urukunusa nrimaawe ni uhiya citthu cootakhala caapankaawe. Mwamoopanaka mwaha ntthu nonsomiheenyu ni mwanhimyeeraka marukunuso anlamuliyaawe upanka, nnaahala uthoonyera wiira nnanwacera.—Isaa. 141:5; Miru. 27:17.
6. Kontha isiyani nihaana upanka makoho anhala unkavihera ntthu nonsomiheehu uhimya itthu inoopuwelaawe awula inkupalyaawe?
6 Unaareera cinene upanka makoho anhala unkavihera ntthu nonsomiheehu uhimya itthu inoopuwelaawe awula inkupalyaawe nhina mwaha unonsomiheehu. Ayo makohwaayo anaahala wuukaviherani woona isiyani incuwelaawe ni inkupalyaawe ntthu nonsomiheenyu Ibiiblya. Mwapankaka ayo makohwaayo, nnaahala ukhitiri woopela mwaha saana citthu cinhala unrika ukupali ntthu nonsomiheenyu. Ilivuru Mphwanye Utteeliya Uhimmala! ihaana makoho menci anhala unkavihera ntthu nonsomiheenyu uhimya itthu inkupalyaawe awula inoopuwelaawe. Wootakihera, mpantta 4 unaakoha co: “Woonela winyu, Yehova nokhala cani mwaromolaka ncina nawe?” Ni nhina mpantta 9, nihaavo nikoho nineera co: “Citthuni coocivenleni ulepela awula usukhuru munlompaka Nluku?” Wiipaceroni, ntthu nonsomiheenyu atthunaka naahala upicapica waakhula ayo makohwaayo. Masi nyuuva pooti unkavihera wiira akhitiri waakhula. Wootakihera, mmwiirele wiira oopuwele iveerusu co mbiiblyani awula ilatarato cirivo uyo mphanttyooyo.
7. Manannani cinhaleehu uvarela nteko citthu ciwiirannyenle atthu akhwaawe wiira ninkavihere ntthu nonsomiheehu Ibiiblya?
7 Moonaka wiira ntthu nonsomiheenyu Ibiiblya hocuwela marukunusoni anlamuliyaawe upanka, munthoonyere citthu ciwiirannyenle atthu akhwaawe cinhala unkurumica upanka ayo marukunuswaayo. Wootakihera, moonaka wiira ntthu nonsomiheenyu Ibiiblya unanrika urwaa umikutthaanoni, munthoonyere ividiyu ineera Yehova khahiile ukiwacera, iri mphantte wantikhiye “Mwaapheelaka ucuwela citthu cikiina,” nhina mpantta 14. Mipantta cinci colivuru Mphwanye Utteeliya Uhimmala!, cinaattonkaca ihantisi co mayamunneehu mapuro yantikhiye “Muncerere wiitthuca winyu” ni “Mwaapheelaka ucuwela citthu cikiina.” * Masi ratta! Nhinlattanihe ntthu nonsomiheenyu Ibiiblya naatthu akhwaawe, mmwiirelaka: “Wakhala wiira ula ntthuula hokhitiri upanka iyo, nyuuva ciicammo nnaahala ukhitiri.” Munhiye ntthu nonsomiheenyu Ibiiblya wiira oopuwele iyo veekha cawe. Masi nyuuva nhaana munthoonyeraka paahi citthu cankavihenre ntthu noolumiya nviidiyuni weettela inhimyaaya Ibiiblya. Moopele mwaha iveerusu iromoliye awula itthu yaapankalyaawe ntthuuyo. Nhihiye unthoonyera wiira Yehova phinkavihere uyo ntthuuyo.
8. Manannani cinhaleehu unkavihera ntthu nonsomiheehu Ibiiblya wiira anfente Yehova?
8 Munkavihere ntthu nonsomiheenyu unfenta Yehova. Nnohala unkavihera manannani? Khula ukati, ntothe unthoonyera ntthu nonsomiheenyu makhalelo omaana a Yehova. Munthoonyere wiira Yehova khanle Nluku ootteeliya ni khanhiya waakavihera ale anonfenta. (1 Tim. 1:11; Mabere. 11:6) Ni munkavihere ucuwela wiira naahala uphwanya ifayita cinci eettelaka itthu inhimyaaya Ibiiblya, ni nnyo ifayitannyo cinthoonyera wiira uyo naafentiya ni Yehova. (Isai. 48:17, 18) Coo, ntthu nonsomiheenyu Ibiiblya naahala upheela unfenta Yehova ni upheela wawe unfenta Yehova, unaahala unkurumica cinene upanka marukunuso muukumini wawe wiira eettele citthu cineetthucaawe.—1 Jo. 5:3.
MUNKAVIHERE WAACUWELA MAYAMUNNA AKIINA
9. Toko cinthoonyeraaya Markus 10:29, 30, isiyani inhala unkavihera ntthu waamini uleva citthu cikhwaawe wiira akhale ntthari a Yesu oopattisiya?
9 Wiira ntthu nonsomiheenyu Ibiiblya arwee uhoolo mpaka wampattisiyaawe, uyo haana ahiyaka uttuli citthu cikiina. Toko nlopwana thaciri moopenleehu mwaha, atthu akiina ansomihiya Ibiiblya ahaana ahiyaka uttuli mihakhu ni citthu cikiina. Wootakihera, wakhala wiira nteko unvaraaya unaavirikaniha mattharelelo o mbiiblyani, ayo atthunaka ahaana yaahiyaka uyo ntekooyo ni utotha nkiina. Ciicammo, atthu enci ansomihiya Ibiiblya ahaana yahiyaka waapatthanana atthu ahinonfenta Yehova. Ni ahaavo ankhottiya naamucyaaya ahinaacivela ni Masaahiti a Yehova. Yesu ahohimya wiira uhiya uttuli nnyo citthunnyo atthu akiina wanhala waarika. Masi uyo ahokhuluveliha wiira ale anlakela untthara, khanhala uttharuwa wahoolo. Uhiya commo, ayo yanhala waaphwanya amuci o mminepani oofentana venci. (Nsome Markus 10:29, 30. *) Isiyani inlamuliyeenyu upanka wiira ntthu nonsomiheenyu Ibiiblya aakhele iyo iparakheeyo?
10. Itthu yankhumelenle Manuel iwiitthucihaleni isiyani?
10 Mumpatthanane ntthu nonsomiheenyu Ibiiblya. Nyuuva nhaana nthoonyeraka wiira nnanwacera ntthu nonsomiheenyu Ibiiblya. Kontha isiyani? Moone itthu yuulumalyaawe munneehu Manuel, nokhala u México. Oopuwelaka ukati waasomihiyaawe Ibiiblya, uyo neera: “Munna aakisomiha Ibiiblya aanaakikohaka wakhala wiira kahaavo salaama hinancera ukisomiha. Uyo ankikaviheraka ukhala woohoova ni ankihiya wuuluma khula mwaha waapheelaaka hinancera ukisomiha. Mi kaanoona wiira uyo khweeliini ankiwacera.”
11. Kontha isiyani unaareera ntthu nosomihiya Ibiiblya uviriha ukati nkhayi ni ule nonsomiha?
11 Yesu anvirihaka ukati naattharyaawe. Ni nyuuva ciicammo nvirihe ukati ni ntthu nonsomiheenyu Ibiiblya. (Joau 3:22) Wakhala wiira uyo nawiikurumica, nnoonela cani unlattula wiira munlyane awula wiira moone nkhayi iporokaraama JW Broadcasting yo ula mweeryuula? Iyo inaahala unkavihera ntthu nonsomiheenyu Ibiiblya, venci-venci nakhalaka nihuku noovirihiya isukuhuuluyo ntuninyani yiitthucalyaawe wiira makristau khanlamuliya utthapelela. Kontha mahuku ofesta co ntuninyani, uyo pooti wiicoona ukhala veekha. Munna mmoca nokhala u Uganda neehaniya Kazibwe, neera: “Mi akiitthucile myaha ca Yehova ukati wonkomeehu wiira kisomihiye Ibiiblya paasi, masi kaheetthuca ciicammo ikwaha caavirihaaka ukati koopaka mwaha ni munna aakisomiha. Mi kihoona inanna Yehova cinaawaceraawe atthu anonswalela ni inanna ayo cinkhalaaya ootteeliya. Iyo phi itthu miiva yaatothaaka.”
Mwaacisaka alalyeeri akhwaawe wuusomihani Ibiiblya, ntthu nonsomiheenyu khunhala utepa unrika ulakela urwaa umikutthaano (Nwehe iparaagarafu 12) *
12. Kontha isiyani unaareera waalattula anamalalyeera akhwaawe wiira aniveleele wuusomihani Ibiiblya?
12 Mwaalattule anamalalyeera akhwaawe wiira yuuveleeleni wuusomihani Ibiiblya. Ukati nkiina, hiiva pooti unaakuvyeela urwaa veekha cihu unsomiha Ibiiblya ntthu awula urwaa nkhayi ni munna mmocaaru ikwaha cotheene. Hataa unaakuvyeelaka upanka iyo, waanaareera ukati nkiina waalattula anamalalyeera akhwaawe. Napankaka commo ninaahala unkavihera ntthu nonsomiheehu Ibiiblya. Munna mmoca neehaniya Dmitrii, nokhala u Moldávia, neera: “Ukati waasomihiyaaka Ibiiblya, khula namalalyeera anveleela munna aakisomiha Ibiiblya ahaana inannaawe yootaphulela citthu. Iyo yahokikavihera woona mananna makhwaawe oweettela itthu yeetthucaaka. Ciicammo, ikwaha yaapacenryaaka urwaa umikutthaanoni, akaatepile usanka kontha kaanaacuwela miyamunna ni miyaanuunu enci.”
13. Kontha isiyani nihaana ninkurumicaka ntthu nonsomiheehu Ibiiblya urwaa umikutthaanoni?
13 Munkavihere ntthu nonsomiheenyu Ibiiblya urwaa umikutthaanoni. Kontha isiyani? Kontha Yehova haaruma apoovwaawe uthukumana wiira answalele. (Mabere. 10:24, 25) Ciicammo, miyamunneehu ni miyaanuunwiihu ankhala amuciihu o mminepani. Nakhalaka naayo umikutthaanoni, unaalikanaca nuukhala wamoca naamuciihu wiira nilye nkhayi iyoolya yoociva. Ntthu nonsomiheenyu Ibiiblya haana arwaaka umikutthaanoni, kontha iyo phi itthu inhala unkavihera urwaa uhoolo ni upattisiya. Masi pooti ukhalaka wiira ntthu nonsomiheenyu Ibiiblya unanrika urwaa umikutthaanoni. Vano yankhumelelaka iyo itthwiiyo, ilivuru Mphwanye Utteeliya Uhimmala! inhala unkavihera cani?
14. Manannani cinlamuliyeehu unkurumica urwaa umikutthaanoni ntthu nonsomiheehu Ibiiblya?
14 Nvarele nteko mpantta 10 wolivuru Mphwanye Utteeliya Uhimmala! wiira munkurumice ntthu nonsomiheenyu Ibiiblya. Ihinaaya ukumiheriya iyo ilivurwiiyo, mayamunna yancenre ulalyeera khalayi yaholattuliya utteha uvarela nteko mpantta 10. Ayo yenre wiira uyo mpanttooyo uhaakavihera atthu enci anaasomihaaya wancera urwaa umikutthaanoni. Masi hiiva nihiweherere upacera waasomiha mpantta 10 wiira naalattule atthu anaasomiheehu Ibiiblya urwaa umikutthaanoni. Nhipicapice waakurumica urwaa umikutthaanoni ni nhihiyerere waalattula. Khula ntthu rina marikarikwaawe. Phimaana, moone marikarikoni arinaawe ntthu nonsomiheenyu Ibiiblya ni ntothe unkavihera. Hataa ukhalaka wiira naapica ulakela urwaa umikutthaanoni, nhoocye. Munvilele ni nhihiyerere unlattula.
MUNKAVIHERE NTTHU NONSOMIHEENYU IBIIBLYA UMALIHA WOOVA URINAAWE
15. Citthuni atthunaka cimmwiiriha woova ntthu nonsomiheenyu Ibiiblya?
15 Ukati waasomihiyeenyu Ibiiblya, nyuuva mwahoova ukhala Saahiti a Yehova? Nyuuva atthunaka moopuwela wiira khamwaahala ukhitiri waalalyeera atthu moolumo a Nluku. Awula pooti mwahoova ulupatthiya ni urukunuweliya naamuciinyu ni ale yaari apatthaniinyu. Wakhala wiira iyo itthwiiyo yahowiirannyeelani, nyuuva pooti nnaacuweleeha isiyani immwiira ntthu nonsomiheenyu Ibiiblya. Yesu ahohimya wiira ahaavo yaahala woova. Masi uyo ahaakurumica attharyaawe wiira ahitepe woova mpaka wanhiyaaya unswalela Yehova. (Mat. 10:16, 17, 27, 28) Isiyani Yesu yaapankilyaawe wiira aakavihere attharyaawe umaliha woova waarinaaya? Ni nyuuva nnohala untakiha cani Yesu?
16. Manannani cinhaleehu unfuntta ntthu nonsomiheehu Ibiiblya ulalyeera?
16 Munfuntte ulalyeera ntthu nonsomiheenyu Ibiiblya. Ukati Yesu waaveleelihalyaawe attharyaawe wiira yalalyeere, ayo atthunaka yahokhala owoova. Masi Yesu ahaakavihera. Manannani? Uyo ahaahimyera attharyaawe nipuro noohala urwaa ulalyeera ni ahaafuntta itthu yoohala wuuluma. (Mat. 10:5-7) Nyuuva nnohala untakiha cani Yesu? Munkavihere ntthu nonsomiheenyu Ibiiblya ucuwela nipuro noohala urwaa ulalyeera. Wootakihera, munkohe co: ‘Nnancuwela ntthu yaahala uncivela wiiwa ila ikhweeli yo mbiiblyaniila?’ Vano munkavihere wuupuwela inanna yo wuuluma wiira anlalyeere uyo ntthuuyo. Mwapheelaka, pooti uvarela nteko ilivuru “Mphwanye Utteeliya Uhimmala!” mphantte wantikhiye “Atthu akiina aneera” ni “Ntthu akohaka” wiira munkavihere wuupuwela itthu yoohala wuuluma. Ni ukati wonlakihera ulalyeera, mwiikurumice cinene umwiitthuciha uvarela nteko Ibiiblya wiira aakhule makoho niihisima ni woohirikarikiha wiiwiya itthu inoolumaawe.
17. Manannani cinhaleehu uvarela nteko itthu inhimyaaya Matewus 10:19, 20, 29-31 wiira ninkavihere ntthu nonsomiheehu unkhuluvela Yehova?
17 Munkavihere ntthu nonsomomiheenyu Ibiiblya unkhuluvela Yehova. Yesu ahaakhuluveliha attharyaawe wiira Yehova aanaafenta, ni nlattu wo waafenta, khaahala uhiya waakavihera. (Nsome Matewus 10:19, 20, 29-31. *) Mmuupusere ntthu nonsomiheenyu Ibiiblya wiira Yehova naahala unkavihera. Inanna imoca ntthu nonsomiheenyu Ibiiblya cinhalaawe uthoonyera wiira nankhuluvela Yehova, ukhanle unlopwa anhimyeeraka mipika ciihelenlyaawe awula citthu cilakenlyaawe upanka. Munna mmoca neehaniya Franciszek, nokhala u Polônia, neera: “Munna aakisomiha Ibiiblya anromolaka citthu comaana caalakenlyaaka upanka khula ukati waalompaawe ni mi. Ukati woonalyaaka wiira Yehova aanaakhula mavekelo a munna aakisomiha, ni mi ciicammo kahancera ulompa. Mi kahoona wiira Yehova ahokikavihera ukati wancalyaaka upheelaca nteko nkiina ni ukati waalepenlyaaka uleviya untekoni wiira kirwee koone mikutthaano ni ikonkereesu.”
18. Yehova noowehera cani nteko unvaraaya ale ansomiha Ibiiblya?
18 Yehova nawaawacera atthu anaasomiheehu Ibiiblya. Ni uyo nawaafenta venci ale ansomiha Ibiiblya kontha naacuwela inanna cineekurumicaaya cinene wiira awiitthucihe akhunanaya ikhweeli co mbiiblyani. (Isai. 52:7) Pooti ukhala wiira nna co, nyuuva khanrina ntthu nonsomiheenyu Ibiiblya. Masi hataa ukhalaka commo, mwiikurumice waaveleela anamalalyeera akhwaawe wuusomihani Ibiiblya. Upanka commo, unaahala waakavihera atthu ansomiheenyu Ibiiblya wiira apattisiye.
NCIPO 60 A Mensagem de Vida
^ par. 5 Nhina ula mwahoola, ninaahala woona manannani Yesu caakhitinryaawe waakhaliha attharyaawe ale yanviriyana ni ninaahala wiitthuca mananna ontakiha. Ciicammo ninaahala woona mananna ciryaaya ilivuru yo naanaano Mphwanye Utteeliya Uhimmala! Iyo ilivurwiiyo ipankiye wiira yaakavihere atthu anaasomiheehu Ibiiblya urwaa uhoolo mpaka wampattisiyaaya.
^ par. 3 Matewus 28:19 Coo, nrwee, ni mwaapanke eetthuci atthu olapo cotheene, mwaapattisaka mwancina na Athumwaane, ni na Mwaana, ni no nnepa wowaarya, 20 mwawiitthucihaka wiiwelela citthu cotheene cuurumalyaakani. Ni ncuwele wiira mahuku otheene kiri ni nyuuva, mpaka wiimaleloni ulumwenku.
^ par. 5 Markus 10:17 Ukati waakhumaawe, nlopwana mmoca ahowa atthawaka, ahokhoroma uhoolo wawe ni ahonkoha: “Mwiitthucihi namaana, isiyani inlamuliyaaka upanka wiira kaakhele ukumi woohimala?” 18 Yesu ahomwaakhula, eeraka: “Unkiihanelani namaana? Namaana khanle Nluku paahi, khaavo-tho nkiina. 19 We unaacuwela malamulo aneera: ‘Uhimwiive ntthu; uheette uluva; uhinnye; uhimootherye nkhunanaa; uhinnyonke nkhunanaa; waahisime athumwana ni anumwana.’” 20 Vano nlopwanooyo ahomwiirela Yesu: “Mwiitthucihi, mi kinneettela citthu cotheenennyo ikhumelo inamwannyaaka.” 21 Yesu ahonweha ule nlopwanoole ni athoonyeraka unfenta, ahomwiirela co: “Ihaavo inoohaleela: Urwee, watumihe mihakhu cirinaa ni waavahe unsurukhuuyo amasikhini, ni weeva unkoophwanya mihaku wiirimu, ni uwe wookhale nttharyaaka.” 22 Masi uyo ahokhala ooriipiya nrima nlattu wo itthu yaakhuliyaawe ni ahorwaa nari nimasukhuli, kontha ahaana mihakhu cinci.
^ par. 7 Ahaavo mapuro meeli anhaleenyu ukhitiri uphwanya ihantisi cinci: (1) Ilivuru ineehaniya Guia de Pesquisas para Testemunhas de Jeová. Nrwee mphantte wantikhiye “Bíblia,” vano nwehe nipuro nantikhiye “Valor prático” ni “‘A Bíblia muda a vida das pessoas’ (série de A Sentinela).” (2) Nhina JW Library®, nkele mphantte wo Áudio e Vídeo ni nrwee mpaka wantikhiye “Intrevista ni Coowiirannyeela Mayamunneehu.”
^ par. 9 Markus 10:29 Yesu aheerela co: “Kinoohimeryani ikhweeli: Khaavo nhala uhiya inupa, asunnawe, anumwaane, athumwaane, asaanaawe awula imatta cawe, nlattu wawaka ni nlattu wohapari comaana, 30 hinhala waakhela imaara iminya, inupa, asunnawe, anumwaane, athumwaane, asaanaawe ni imatta cawe phiyaaru va, anyokhiyaka, ni uhoolo, ukumi woohimala.”
^ par. 17 Matewus 10:19 Masi yoovarakani, nhisanke nlattu woohicuwela itthu yoorwaa wuuluma ni mananna owuuluma, ukhala wiira uyo ukatyuuyo nnaarwaa ucuwelihiya itthu yowuuluma. 20 Kontha khannarwaaka wuuluma veekheenyu, masi nnepa wowaarya wa Apaapeenyu phinrwaa wuukaviherani wuuluma. 29 Keera iphera piili cintumihiya ninsurukhu mmoca urina ifayita vakaani? Masi, khiivo hataa iphera imoca immorela vathi Apaapeenyu woohicuwela. 30 Ni ikharari cotheene co mmuru winyu cihaalikeliya. 31 Phimaana, nhoove; nyuuva nhaana ifayita cinene uvikana ipheera cinci.
^ par. 66 ILATARATO: Munna mmoca naamwaarawe ansomihaka Ibiiblya mmirawo. Mahuku makhwaawe, uyo nawaacisa mayamunna akhwaawe ukati woorwaa unsomiha Ibiiblya uyo mmirawooyo.
