1. Ethu baani yaddeliwe muthithi ole ni anamahara a Yesu?

MUTHITHI ni muthithi wahiyana ni alobwana a luwani dhohiyana-hiyana yahidhowa oJerusale, athu ale yawoga dhiwogelo dhohiyana-hiyana. Labo nenne wereya ethu yootikiniha. Morurumusa mwaana nikuru naanamahara a Yesu yaali aJudewu wambela owoga ewogelo ya athu yale yadhele wawaredhela. Ela watikiniha athu owinjhiva mbwenye yathabwile waddiginya murima waali muthenga wanamahara a Yesu ni wamurumiwi Peduru. Aliwa ohudhera wihina yegi evulusiwe yohoweleya otonyihedha wi enomuroromela Yesu Kiristu. Aliwa ohagalala vanlubale ofiyedha okoha. “Nere ddi?” Peduru wera: ‘Muthwaruwe, vano kadda muthu abaddiziwe’. — Atos 2:37, 38.

2. Muwari mwa yohudhera ela nnaasuze ddi? (Osugwe fotu yavakapani.)

² Vasogolova wereya ethu yootikiniha. Labo nne athu owakwana 3,000 obaddiziwa, vano okala anamahara a Kiristu. Ala yaali mabasa obajha Yesu arumiliye anamaharaye wihina yapare. Mabasa owahudhiha athu wihina ekale anamahara. Ofiyedha peeno anamahara a Yesu enna olaleyave. Mudhidhi wehu kannawedha omukavihera muthu labo nimodha ofiyedha obaddiziwa. Wihina nimukavihere muthu podi omala malabo, mweri, obe yaka. Akala onoomuhudhiha muthu we ohunona wihina omuhudhiha muthu wi akale namahara enohoweleya wilibihera. Yohudhera ela nnere woona ethu baani onafuniwe werana wihina omukavihere namahudherawo ofiyedha obaddiziwa.

3. Mowiwanana ni Mateus 28:19, 20, wihina namahudherihu abaddiziwe nere ddi?

³ Ahinathi obaddiziwa, namahudhera arajhihe oparihedha  mabasa dhithu anahudheriye mBibliyani. (Omwileri Mateus 28:19, 20.) Namahudhera eraga ndo oliye onoligana ni ‘muthu eenonelo’ asorihiwe muwari mwaha nladdaniho na Yesu egi mulobwana yola onomuddihiha aliserisaye wi amage nyumbaye valibweni. (Mat. 7:24, 25; Luc. 6:47, 48) Nnaamukavihere addi namahudhera omparihedha mabasa nde anahudheriye? Nnere woona dhoxagiha tharu.

4. Nnaamukavihere addi namahudherihu ofiyedha obaddiziwa? (Osugwe kwaduru “ Omukavihere namahudherawo okanna dhooluba.”)

⁴ Omukavihere namahudherawo okanna dhooluba. Ekalele ddi yapama werana ndo? Karajhiha wubuwela yotajhiha ela: Wubuwele weddaga olenddo wolapela ni karo we kunafiye winayiwe wahimmele vego. Ni makalelo yala olenddoola woolapa kunugomihe. Ni makalelo mamodhave sapama namahudhera a Bibliya okanna dholuba dha mudhidhi vang’ono, erana ndo oliye anere wonelamo wihina obaddiziwa kahiyo ethu yorusa. Wihina omukavihere nnamahudherawo wunnuwelavo olabihedhe “epaddi” enawoga tente o seguinte muwari mwa livuru Ofwanye egumi yohagalala ya malabo amatene. Omagomihero wa kadda musolo muthapanyedhege makalelo yoluba ela eniwananiwa ni ele namahudherawo asuziliye. Akala onofuna wihina nnamahudherawo akanne yoluba emodha we podi oleba mburo vinihina “outra ideia”. Olabihedhege epaddi yela wathapanyaga ni nnamahudherawo wodhela dholuba dhaye naari dhikale dha mudhidhi vang’ono obe dha mudhidhi wowinjhiva.

5. Mowiwanana ni Marcos 10:17-22, Yesu amwaddele ddi mulobwana ole oorela, ki mwahaya bwaddi?

⁵ Omukavihere namahudherawo osaddula egumaye. (Omwileri Marcos 10:17-22.) Yesu ahinona wi yaakale ethu yorusa muthu oorela oguliha dhoorela dhaye. (Marcos 10:23) Naarive dhigari ndo Yesu omwaddela mulobwana  ole wihina agulihe dhoorela dhaye anniyena. Mwahaya bwaddi? Mwaha Yesu ahikanna odhivela nuliye. Malabo mamodha kannamukongomedha namahudherihu oparihedha mabasa ahudheriye mwaha nnubuwela wi kanathi wihina asaddule egumi yaye. Hee, ebaribari wihina osukuma dhilemelelo dhaye ni owara emuthu exa onoovira mudhidhi wowinjhivene. (Col. 3:9, 10) Mbwenye mwathapanyedha muselu yola vahinathi osa vohilegela oliye anere osaddula egumaye. Mbwenye we wahimukuwaga namahudherawo ethu anafuniye wera enere otonyihedha wi onomudhivela.— Sal. 141:5; Pro. 27:17.

6. Ekalele ddi yapama wawerana makoho wihina wone mubuwelo wa namahudhera?

⁶ Omukoha muthu wi none anubuweliye enatapulela omukavihera namahudhera wihina ubuwele muselu nnathapanyedhihu. Waweregena makoho mamodha wihina onone enubuwela namahudherawo ni dhithu anarumeedhiye, werana ndo enere okweya othapanyedha muselu dhorusa osogolo. Livuru Ofwanye egumi yohagalala ya malabo amatene! nihikanna makoho owinjhiva owoona mubuwelo wa muthu. Motajhiha musolo 4 onokoha: “Walabihedhaga ndina na Yehova oliye anonamo avi?” Musolo 9 onokoha “Dhithu dhinudhivela walobelaga sivi?” Omambelelowene nnamahudherawo podi omala mudhidhi wowinjhiva wihina aakule nikoho onafuniwe woona mubuwelo waye. Mbwenye we podi omuxagiha makalelo owubuwela, motajhiha omukavihere namahudherawo wihina aakulaga alabihedhege dholebela ni fotu dhinadha kadda musolo

7. Nnaalabihedhe addi dhopadduwa dhereyile wihina nimukavihere namahudherihu?

⁷ Namahudherawo oonelamo dhithu baani dhinahoweleya osaddula, oparihedhe mabasa dhopadduwa dhereyile wihina omukongomedhe ethu baani anafuniye werana. Motajhiha akala namahudherawo anona wi ethu yorusa woona mutugumano omutonyihedhe Vidiyu enna musolo Jeova sempre cuidou de mim enafwanyeya epaddi quer “pesquisar mais” musolo 14. Musolo dhowinjhiva dha livuru nna Ofwanye egumi yohagalala ya malabo amatene!, onere ofwanya dhopadduwa dhereyile epaddi enawoga “Aprenda mais” obe “quer pesquisar mais.” * Pole-pole omuliganiha namahudherawo ni athu amodha wegi, “Akala oliye ohanda werana ndala niweya onere wanda.” Omwihiye namahudherawo oonelemo yeka ethu baani anafuniye werana. Yapamaya fuumutonyihedha dhithu baani erilena muthu ole amoniliye nvidiyuni dhimukavihere oparihedha mabasa dholebela dha mBibliyani. Obe nyu podi wileri yolebela enathabwa owoga muselu yole obe ethu eriliyena. Dhenyeya osorihege ethu baani Yehova eriliyena wihina amukavihere muthu ole.

8. Nnande addi omukavihera namahudherihu omudhivela Yehova?

⁸ Omukavihere namahudherawo okanna odhivela ni Yehova. Onande addi? Woona wi ohukanna ofuru omwaddelege dhikalelo dha Yehova. Omukavihere wonelamo wi Yehova, Mulugu oohagalala oliye anakala epaddi wa athu yale enamudhivela. (1 Tim. 1:11; Heb. 11:6) Omutonyihedhe namahudherawo wihina oparihedha mabasa Bibliya anawogiye winowadhana mareeliho, teto mareeliho ala, enotonyihedha wihina Yehova anowuudhivela. (Isa. 48:17, 18) Namahudhera aathabwaga omudhivela Yehova anere owedha osaddula egumaye. — 1 João 5:3.

9. Mowiwanana ni Marcos 10:29, 30, enaamukavihere muthu okala namahara oobaddiziwa ddi?

⁹ Wihina namahudhera afiyedhe obaddiziwa oliye anere ohowela wilibihera vanlubale. Ninga mulobwana ole oorela asorihiwe mundduli, anamahudhera amodha enohowela ohiya dhithu dhimodha dhomwilini yanniwana. Motajhiha akala aliwa enoolabana dhithu dhihiniwanana ni malamulo a Bibliya, podi wera enere ohoweleya wasukuma mabasa yala. Ohiya eyo anamahudhera amodha podi ohowelaga ogwadda wandana yanniwana ni athu yale yahinamudhivela Yehova, amodhaya podi widdiwa ni amudhiwa ehinaafuna Anamona a Yehova. Yesu ahinona wi wa athu amodha kiyakale ethu yokweya werana ndo. Mbwenye oliye ohupaganya wihina ale ethomile omuhara oliye kinadha yikubanyedha, ohiya iyo yere wawakela mareeliho mwaha wokanna emudhi yomuzimuni. (Omwileri Marcos 10:29, 30.) Onere ddi wihina nnamahudherawo awakele mareeliho yala?

10. Ohudhere ddi niila Yereye ni Manuel?

¹⁰ Wandane nnamahudherawo. Sathima omutonyihedha nnamahudherawo wihina onomuthuwathuwela. Mwahaya bwaddi? Kasugwa asorihile Manuel, anakala elabo yo México. Ubuwelaga mudhidhi aaliye namahudhera a Bibliya oliye onosoriha egi: “Kadda labo noohudhera nahinabajhe namahudhihaga ogikoha akala gihiseliwa. Oliye oogikavihera murimaga okurumuwa ni ogivuruwana gaamwaddelaga ethu-sithu. Miyo gowonelamo wi mwebaribarene oliye onogipwatha.”

11. Ojha mudhidhi vamodha nnamahudherawo ekalele ddi ethu yapama?

¹¹ Yesu ojha mudhidhi ni anamaharaye, weregena emodhave ni namahudherawo. (João 3:22) Oliye ambela wunnuwelavo ononamo avi omwithana wihina mwamug’we txaya obe mwaajhe vamodha obe naari mwawoone TV JW. Eyo podi omudhivela namahudherawo  thabwathabwa wakala mudhidhi wafesta, mwebaribarene labo nenna oliye podi okala owukuwene mwaha kanna muthu owaredhana. Kazibwe, anakala elabo yo Uganda, onosoriha egi: “Kahiyo mudhidhive wohudhera baahi gizusalimi wodhela Yehova, mbwenye gaadheraga nnamahudhihaga goosuza dhithu dhimodha. Miyo gowoona wi Yehova onowapwatha adharaaye mwaha wa yeyo aliwa enohagalala, siyeyo gunddelesimi.”

12. Ekalele ddi yapama wathukulelawo anamalaleya amodha wanamahudherawo?

¹² Wathukulelegewo addibila amodha wanamahudherawo. Podi wera malabo owinjhiva, nnadhiveliwa omusuziha yekihu namahudhera obe omuthukulelawo muthu mmodhave. Naari werana eyo egali ethu yapama, yere okala yowoma nahathukulelegewo addibila ohiyana-hiyana. Dmitrii anakala Omoldavia, ohusoriha egi: “Kadda namalaleya adha nnamahudhihaga ogitapulelamo mwamakalelo ohiyana eyo yogikavihera woona epaddi gahudherimi ni monelo mmodha. Ohiya eyo labo noobajha woona mutugumano kaganna manyazo mwaha gahimala wanona addibila ni arogola owinjhiva.”

13. Ekalele ddi yapama omukavihera namahudherihu woona mutugumano?

¹³ Omukavihere namahudherawo woona mutugumano. Mwahaya bwaddi? Mwaha Yehova aharuma adharaaye wihina etugumanege, ela enokosa epaddi yowebedha wehu. (Heb. 10:24, 25) Ohiya eyo addibilihu ni arogolihu enokosa epaddi ya emudhi yehu yomuzimuni. Nakala vamodha omutugumanoni enakala ninga iyo atene nnojha muziwo mmodhave. Sathima omukavihera namahudherawo woona mutugumano, mwahaya bowi wihina abaddiziwe enohoweleya ohara thalo yela. Podi wera malabo mamodha namahudherawo enomurusa werana eyo. Akala siyeyo enereya nnamahudherawo, livuru Ofwanye egumi yohagalala ya malabo amatene! nnaamukavihere addi?

14. Wihina namahudherihu ambele woona mutugumano nere ddi?

¹⁴ Olabihedhe musolo 10 wa livuru Ofwanye egumi yohagalala ya malabo amatene wihina omukongomedhe namahudherawo. Livuru nna nihinakume anamalaleya okovelela yahithaniwa wihina yehe musolo yola, aliwa wera musolo ola ohuriya pamadhene ni ohakavihera anamahudheriwa wambela woona mutugumano. Eyo kinatapulela wi ojheherege musolo 10 wihina omwithanele namahudherawo omutugumanoni. Omwithanele namahudherawo omutugumanoni vohilegela ni onagomena omwithanelawo. Kadda namahudhera a Bibliya ohukanna makathamiho aye. Bumwahaya woonege ethu baani namahudherawo anahoweliye windo woone akala onere omukavihera ni ethu-sithu. Naari oliye alegelege odhowa woona mutugumano onakwerebeye onone ojheha mbwenye okale antidi.

15. Dhithu baani anamahudherihu enoviwa?

¹⁵ Nuukala Namona a Yehova wahidheliwa woova vang’ono? Podi wera wahubuwela kaginaawedhe walaleya athu amodha. Obe wubuwela akwawo ni amudhawo enere wusadduwela. Akala yupadduwele siyela vano onowonelamo ele enereya nnamahudherawo. Yesu ahinona wi athu amodha yere ofwanyiwa woova ninga wewula. Mbwenye Yesu wakongomedha anamaharaye wihina yahihiye woova wahiha omulabela Yehova. (Mat. 10:16, 17, 27, 28) Wihina anamahara a Yesu egonjhihe woova Yesu awaddenle ddi? Ki we onaamutajhihe avi?

16. Nnaamukavihere addi namahudherihu onona olaleya?

 ¹⁶ Omukavihere namahudherawo olaleya. Yesu nuwaruma anamaharaye wihina yalaleye podi wera aliwa yahinyanyuwa vang’ono. Mbwenye Yesu wakavihera, nimakalelo baani? Oliye wawaddela anamaharaye muthenga baani yafuniwa olaleya ni mburoya yafuniwa olaleyawo. (Mat. 10:5-7) Ki we onaamutajhihe addi Yesu? Omukavihere nnamahudherawo woona mburo baani anafuniye olaleya. Motajhiha kamukohe, ohumunona muthu aadhiveliwe wahamulaleye muthenga ola wa mBibliyani? Windo omukavihere namahudherawo makalelo okweya olaleya muthenga ola muthu yoyo anaafwanyiye. Dhenyeya we podi wiwegeredha vamodha ni oliye mulabihedhaga epaddi enawoga: “Athu amodha enawoga yegi” ni “Muthu akoha egi” muwari mwa livuru Ofwanye egumi yohagalala ya malabo amatene!. Mudhidhi yola muniwegeredhinyu omuxagihe nnamahudherawo omulabihedha Bibliya wihina anone ovaha dhowakula dhokweya ni dhapama.

17. Nnamparihedhe addi mabasa Mateus 10:19, 20, 29-31 wihina nimukavihere namahudherihu omuroromela Yehova?

¹⁷ Omukavihere namahudherawo omuroromela Yehova. Yesu aharoromeliha anamaharaye wihina Yehova onowadhivela teto kanadha ahiya wakavihera. (Omwileri Mateus 10:19, 20, 29-31.) Omubusedhe nnamahudherawo wihina Yehova anere wukavihera. Makalelo apama omukavihera namahudherawo omuroromela Yehova fulobela vamodha ni oliye wodhela dholuba dhaye. Franciszek anakala Opolonia ohusoriha egi: “Namahudhihaga alobelaga oosorihesa dholuba dhaaga.” “Vano miyo nuwona wi Yehova owawakula malobelo anamahudhihaga ni miyoya obajha olobela. Nlabo genyiwimi omabasani wihina gikanne malabo odhowa omutugumanoni ni omusonkanoni, gahonelamo wi Yehova oogikavihera.”

18. Yehova anawona avi mabasa enaapara anamahudhiha a Bibliya?

¹⁸ Yehova onowapwatha anamahudherihu a Bibliya. Oliye onowadhivela vanlubale ale eli anamahudhiha mwaha ohunona makalelo enilibihedhiwa wihina ehudhihe ebaribari ya Mulugu. (Isa. 52:7) Podi wera mudhidhi yola kunna namahudhera akala siyeyo opathe ofuru waanamalaleya amodha wihina wahare yadhowaga omuhudhiha Bibliya, werena ndala niweya onere wakavihera anamahudhera ala wunnuwelavo ofiyedha obaddiziwa.