1. Pipi kiris-nebã wakatẽ, bõe la a Zeezi karen-biisã yeel neb kʋʋng tɩ b maane?

NEB kʋʋng sẽn yaa pagb la rap n yi tẽns toɛy-toɛya, n tog sor n wa Zerizalɛm. B gomda buud-goam toor-toore. Yel-solemd n zĩnd baraare. Zʋɩf-rãmb sull n tiig n gomd sãambã buud-goam toɛy-toɛyã. Kʋʋngã sẽn wʋm zʋɩf-rãmbã sẽn yeel-b bũmb ningã ling-b lame. La tʋm-tʋmd a Pɩyɛɛr sẽn yeel bũmb ningã maneg n ling-b lame n paase. Kʋʋngã bãngame tɩ b sã n wilg tɩ b tẽeda a Zeezi Kiristi, b tõe n paama fãagre. Koɛɛg ning b sẽn wʋmã kẽ-b lame, hal tɩ b sok yaa: “Bõe la d segd n maane?” A Pɩyɛɛr leok-b lame yaa: “Bɩ y ned kam fãa reeg lisgu”—Tʋʋ. 2:37, 38.

2. Bõe yell la d na n gom sõs-kãngã pʋgẽ? (Ges-y sebrã pipi neng fotã.)

² Bũmb ning sẽn maan rẽ poorã yɩɩ lingr tɛkẽ. Sẽn zems neb 3 000 n deeg lisg baraar n lebg Kirist karen-biisi. Yaa a Zeezi sẽn kõ a karen-biisã noor tɩ b sõng neb a taab tɩ b lebg yẽ karen-biisã tʋʋmd sɩngr la woto. A karen-biisã ket n tʋmda tʋʋm-kãng rũndã-rũndã. La rũndã-rũndã wã, d pa tõe n zãms ned Biiblã lɛɛr a wãn pʋgẽ bal t’a wa tõog n deeg lisg ye. Tõe n kaoosa kiis bɩ yʋʋmde, wall sẽn yɩɩd rẽ, tɩ karen-biig yaool n wa tõog n deeg lisgu. Sõng ned t’a lebg Kiristã karen-biig yaa tʋʋm-saalga. Y sã n zãmsda ned Biiblã, y mii rẽ vẽenega. Sõs-kãngã pʋgẽ, d na n yãa d sẽn tõe n sõng Biibl karen-biig to-to t’a wa reeg lisgu.

3. Wa Matiye 28:19, 20 sẽn wilgdã, bõe la Biibl karen-biig segd n maan n wa tõog n deeg lisgu?

³ Biibl karen-biig segd n tũud a sẽn zãmsd Biiblã pʋgẽ wã, n yaool n wa tõog n deeg lisgu. (Karm-y Matiye 28:19, 20.) Biibl karen-biig sã n tũud a sẽn zãmsdã, a lebgda wa “rao sẽn tar yam” a Zeezi sẽn bilg a yel-bũnd pʋgẽ wã, sẽn deng n tu zulung n yẽbg a roog pĩig zugã. (Mat. 7:24, 25; Luk 6:47, 48) Wãn to la d tõe n sõng Biibl karen-biig t’a tũ bũmb ning a sẽn zãmsdã? Ad sagls a tãab sẽn tõe n sõng-do.

4. Bõe la d tõe n maan n sõng karen-biig t’a modg n wa reeg lisgu? (Ges-y zĩ-gũbrã: “ Sõng-y y Biibl karen-biigã t’a yãk a sẽn dat n wa maane, la a sɩd wa tõog n maane.”)

⁴ Sõng-y karen-biigã t’a yãk a sẽn dat n wa maane. Bõe yĩng tɩ y segd n maan woto? D rɩk makre. Yãmb sã n na n wẽn mobill n kẽng hal zĩig sẽn zãre, y tõeeme n mi n yals n vʋʋs bɩ n kok pemsem. Rẽ wã, y pa na n getẽ tɩ yaa wa y sẽn debd zĩig ningã tolg n zãrame tɩ loog noor ye. Woto me, Biibl karen-biigã sã n yãk bũmb kẽer n maand masã tɛka, a na n bãngame tɩ lisgã me yaa bũmb a sẽn tõe n wa reege. Tall-y Vɩɩmd-y wakat sẽn kõn sa! sebrã zĩig ning sẽn gʋls tɩ “Y sẽn tog n maane” n sõng karen-biigã t’a yãk a sẽn na n wa maane. Sak fãa baasgẽ, wilg-y karen-biigã bũmb ning a sẽn yãk n na n wa maanã sẽn tõe n sõng-a to-to t’a tũ bũmb nins a sẽn bãngã. Y sã n nee bũmb a to y karen-biigã sẽn tõe n yãk yam n wa maane, bɩ y gʋls rẽ sebrã zĩig ning b sẽn gʋls tɩ “Bũmb a to” wã. Wakat fãa, bɩ y lebg n ges zãmsgã zĩ-kãng ne y karen-biigã, n gom bũmb nins a sẽn yãk yam n dat n maan masã la kaoosg zugẽ wã yell ne-a.

5. Wa Mark 10:17-22 sẽn wilgdã, bõe la a Zeezi yeel arzɛk soabã t’a maane, la bõe yĩnga?

⁵ Sõng-y karen-biigã t’a toeem bũmb kẽer  a vɩɩmã pʋgẽ. (Karm-y Mark 10:17-22.) A Zeezi bãngame tɩ ra na n yɩɩ toog ne rao a ye sẽn yaa arzɛk soab t’a koos a paoongã fãa. (Mark 10:23) La a Zeezi yeela raoã t’a maan woto, baa ne rẽ sẽn da pa na n yɩ nana ne-a wã. Bõe yĩnga? Yaa a Zeezi sẽn da nong-a wã yĩnga. Wakat ninga, d tõeeme n pa yeel Biibl karen-biig t’a tũ bũmb nins a sẽn zãmsdã, bala d tagsdame t’a pa segl n sa n na n toeem ye. Tõe n kaoosame tɩ neb kẽer wa tõog n bas b minim-wẽnse, la b yeelg nin-paalgã. (Kol. 3:9, 10) La y sã n sõs ne karen-biigã yellã zug pĩnd-pĩnda, tõe n kɩtame t’a toeem tao-tao. Y sã n tall sõsg a woto ne y karen-biigã, wilgdame t’a yell sɩd pak-y lame.—Yɩɩn. 141:5; Yel. 27:17.

6. Bõe yĩng tɩ d segd n sokd karen-biigã sogsg sẽn na n kɩt t’a wilg a sẽn tagsde?

⁶ Yɩta sõma tɩ y mi n sok karen-biigã t’a wilg a tagsg bũmb ning wɛɛngẽ. Tũnugd-y ne sogsg a woto buudu, n bao n bãng y karen-biigã sẽn wʋmd zãmsgã võor to-to, la bũmb nins a sẽn tẽedã me. Y sã n nong n maand woto, na n yɩɩ nana tɩ y wa tõog n sõs ne-a yɛl sẽn tagem zugu. Vɩɩmd-y wakat sẽn kõn sa! sebrã tara sogsg wʋsg sẽn tõe n kɩt tɩ karen-biigã wilg a tagsgo. Wala makre, sak a 4 sokdame yaa: “Y tagsdame tɩ y sã n pʋt a Zeova yʋʋrã, a tagsg yaa wãna?” Sak a 9 wã sokdame yaa: “Yãmb rat n pʋʋsa a Zeova n gom bõe yelle?” Sɩngrẽ wã, tõe n yɩɩ toog ne karen-biigã t’a tõog n leok sogs-kãensã. Y tõe n sõng-a lame t’a tags sebrã vɛrse-rãmbã la fot-rãmbã zug neere.

7. Wãn to la d tõe n tũnug ne neb vɩɩm kibay n sõng Biibl karen-biig sõma?

⁷ Y karen-biigã sã n wa bãng a sẽn segd n maanegã, bɩ y togs-a neb kẽer vɩɩm kibay tɩ sõng-a t’a tõog n maan dẽ. Wala makre, sã n yaa toog ne-a t’a tõog n wat tigissã, y tõe n wilg-a-la video ning gom-zug sẽn yaa: A Zeova gesa m yelle, sẽn be sak 14 soabã zĩig ning b sẽn gʋls tɩ “Ges-y-yã” wã. Vɩɩmd-y wakat sẽn kõn sa! sebrã sags wʋsg pʋgẽ, y na n yãa neb vɩɩm kibay zĩis nins b sẽn gʋls tɩ “Paas-y y bãngrã,” bɩ “Ges-y-yã.” * Gũus-y n da mak karen-biigã ne ned a to, n yeel tɩ yẽ soabã sã n tõogame, yẽ me na n tõogame ye. Bas-y tɩ yẽ meng wa yeel woto. Lebg-y n tẽeg-y-yã-a bũmb a wãn sẽn sõng ned ning yell b sẽn gomd video wã pʋgẽ wã t’a tũ Biiblã sẽn yetã. Y tõe n tẽeg-a-la vɛrse bɩ bũmb takɩ nin-kãng sẽn maan tɩ sõng-a. Sã n tõeeme fãa, bɩ y wilg-a a Zeova sẽn sõng nin-kãngã to-to.

8. Wãn to la d tõe n sõng Biibl karen-biig t’a wa nong a Zeova?

⁸ Sõng-y karen-biigã t’a wa nong a Zeova. Wãn to la y na n sõng-a? Bao-y segb n gomd a Zeova zʋg-sõma wã yell ne-a. Sõng-y-yã-a t’a bãng t’a Zeova yaa Wẽnnaam sẽn yaa sũ-noog soaba, sẽn sõngd neb nins sẽn nong-a wã. (1 Tɩm. 1:11; Ebre. 11:6) Wilg-y-yã-a t’a sã n tũud bũmb nins a sẽn zãmsdã, na n naf-a lame, la tɩ woto wilgdame t’a Zeova sɩd nong-a lame. (Eza. 48:17, 18) Y karen-biigã sẽn nong a Zeova to-to wã sã n tar paasgo, a na n tʋll n toeema bũmb kẽer a vɩɩmã pʋgẽ.—1 Zã 5:3.

9. Wa Mark 10:29, 30 sẽn wilgdã, bõe n tõe n sõng Biibl karen-biig t’a modg n wa tõog n deeg lisgu?

⁹ Yaa tɩlɛ tɩ Biibl karen-biig modg n  yaool n wa tõog n deeg lisgu. Wa arzɛk soabã yell d sẽn gom tɩ loogã, yaa tɩlɛ me ne Biibl karen-biis kẽer tɩ b sak n bõn b paoongo. Sã n mik tɩ b nug-tʋʋmã pa zems ne Biiblã noyã, na n yɩɩ tɩlɛ tɩ b bao tʋʋmd a to sẽn zemse. Tõe n yɩɩ tɩlɛ ne karen-biis wʋsg tɩ b bas b zo-rãmb sẽn pa nong a Zeova. Kẽer zags rãmb sẽn pa nong a Zeova Kaset rãmbã na n daag-b lame n base. A Zeezi sak n deegame tɩ na n yɩɩ toog ne neb kẽer tɩ b sak n maan modgr a woto. La a pʋlmame tɩ neb nins sẽn na n kell n tũ yẽ wã pa na n wa maan b bãngẽ ye. A Zeova na n keo-b lame, n kɩt tɩ b paam n naag a nin-buiidã sẽn yaa wa zak a ye neba, n nong taabã. (Karm-y Mark 10:29, 30.) Wãn to la y tõe n sõng y Biibl karen-biig t’a tõog n dɩ kũun-kãngã sẽn be rasãndã nafa?

10. Yam-bʋg la d tõe n dɩk a Manuwɛll kibarã pʋgẽ?

¹⁰ Yõg-y zood ne y karen-biigã. Yɩta sõma tɩ y wilg karen-biigã t’a yell sɩd pak-y lame. Bõe yĩnga? Ad saam-biig a ye yʋʋr sẽn boond t’a Manuwɛll sẽn be Megsik sẽn yeele, a sẽn wa n zãmsd Biiblã: “Wakat fãa, nand tɩ d zãms Biiblã, m karen-saambã rengd n soka maam n na n bãng m gãase. A sõngda maam tɩ m yamã gãande, la a sakdẽ tɩ m togsd-a sẽn be m sũurẽ. Rẽ kɩtame tɩ m bãng tɩ m yell sɩd pak-a lame.”

11. D sã n baood sẽk n be ne d Biibl karen-biisã, wãn to la rẽ tõe n naf-ba?

¹¹ Wa a Zeezi, bɩ yãmb me mi n bao sẽk n zĩnd ne y Biibl karen-biisã. (Zã 3:22) Y karen-biigã sã n sɩnga yɛl kẽer toeeng a vɩɩmã pʋgẽ, y tõe n mi n bool-a-la y zakẽ t’a wa tɩ y rɩk maasga, bɩ n dɩ, wall y ges JW Teledifiziyõ. Sã n yaa dũniyã rãmb kibs wakat la y bool y karen-biigã, a sũur na n yɩɩ noog n yɩɩda, a sẽn pa na n naag a zakã rãmb n maan kibsã yĩnga. A Kazibwe sẽn be Ugãnda wã yeelame: “M tagsdame tɩ m zãmsa bũmb wʋsg a Zeova zug Biiblã zãmsg wakate, la m sẽn da mi n be ne m karen-saambã me. Mam bãngame t’a Zeova geta a nin-buiidã yell sõma, la tɩ  b tara sũ-noog hakɩɩka. Kell n yaa woto la m da rat m vɩɩmã pʋgẽ.”

12. D sã n na n tɩ zãms ned Biiblã, bõe yĩng tɩ d segd n mi n kɩt tɩ koe-moondb toor-toor yãag-do?

¹² Kos-y koe-moondb toor-toor tɩ b mi n yãag-y tɩ y tɩ zãms Biiblã ne y karen-biigã. Wakat ninga, d tõe n getame tɩ yaa nana n yɩɩd tɩ d kẽng d yembre, wall d kẽngd ne koe-moond ning sẽn nong n yãagd tõndã bala. Baa d sã n getame tɩ woto n yaa nana n yɩɩda, d sã n talld koe-moondb toor-toor n kẽngd karen-biigã nengẽ, na n naf-a lame n yɩɩda. A Dimitri sẽn be Moldavi wã yeelame: “Koe-moond fãa sẽn tũ n wa zãms maam Biiblã sẽn bilgd yɛlã to-to wã yaa toor ne a taabã. Rẽ sõnga maam tɩ m bãng m sẽn tõe n tũ m sẽn zãmsd bũmb ninsã to-to bũmb toor-toor pʋgẽ. Sẽn paase, m sẽn wa n kẽng tigsg pipi wã, m da pa zoet yãnd wʋsg ye. Bala m da zoe n mii saam-biis wʋsgo.”

13. Bõe yĩng tɩ d segd n sõng Biibl karen-biig t’a wat tigissã?

¹³ Sõng-y karen-biigã t’a wat tigissã. Bõe yĩnga? Bala a Zeova kõo a nin-buiidã noor tɩ b tigimd taaba. Woto naaga bũmb nins d sẽn maand n waoogd-a wã. (Ebre. 10:24, 25) Sẽn paase, d saam-bi-rapã la d saam-bi-pogsã sẽn be tigingã pʋgẽ wã yaa wa d zakã neba. D sã n wa tigim taab tigissã sasa, yaa wa d sẽn be yiri, n naag taab n dɩt rɩ-noogo. Y sã n sõng y Biibl karen-biigã t’a wat tigissã, y sõngd-a lame t’a maand bũmb sẽn tar yõod wʋsg sẽn na n sõng-a t’a wa tõog n deeg lisgu. La tõe tɩ yaa toog ne-a t’a sɩng tigissã waoongo. Wãn to la Vɩɩmd-y wakat sẽn kõn sa! sebrã tõe n sõng y Biibl karen-biigã t’a tõog n mao ne zu-loɛɛg buud fãa a sẽn tõe n wa sege?

14. Wãn to la d tõe n sõng Biibl karen-biig t’a tʋll n wat tigissã?

¹⁴ Tũnug-y ne Vɩɩmd-y wakat sẽn kõn sa! sebrã sak 10 n sõng y karen-biigã t’a tʋll n wat tigissã. Nand tɩ b yiis seb-kãngã, koe-moondb sẽn tar minim la b kos tɩ b tũ sebrã zãms-kãngã saglsã, la b sɩd tõog n sõnga b Biibl karen-biisã tɩ b wat tigissã. Ra gũ-y n wa ta sak 10, n yaool n bool y karen-biigã t’a wa tigissã ye. Da bas-y tɩ kaoos la y bool-a t’a wa tigissã ye. Rẽ poor bɩ y ket n boond-a. Biibl karen-biisã segda zu-loees toor-toore. Rẽ wã, bɩ y bao n bãng y karen-biigã sẽn dat sõngr ningã, la y ges y sã n tõe n maana bũmb takɩ n sõng-a. Sã n kaoos t’a ket n pa wat tigissã, bɩ y ra koms raood ye. Tall-y sũ-mare, la y ket n boond-a.

15. Bõe n tõe n kẽes Biibl karen-biig rabeem?

¹⁵ Y ket n tẽrame tɩ y sẽn wa n dat n lebg a Zeova Kaset soabã, rabeem bilf n da tar-y bɩ? Tõe tɩ y ra yetame tɩ y pa na n tol n tõog n moon koɛɛgã zak-zak la zãma sʋk ye. Tõe me tɩ y ra maanda rabeem, y zakã rãmb bɩ y zo-rãmbã sẽn da tõe n nams yãmbã yĩnga. Sã n yaa woto, y wʋmda y karen-biigã sẽn yɛɛsdã võore. A Zeezi yeelame tɩ neb kẽer tõe n sɩd maanda rabeem yɛl a woto buud yĩnga. La a yeela a karen-biisã tɩ b ra bas tɩ rabeemã kɩt tɩ b bas a Zeova tũub ye. (Mat. 10:16, 17, 27, 28) Wãn to la a Zeezi sõng a karen-biisã tɩ b tõog b rabeemã? La wãn to la tõnd me tõe n maan wa a Zeezi?

16. Wãn to la d tõe n sõng d Biibl karen-biigã t’a gom a tẽebã yell ne neb a taabã?

¹⁶ Sõngd-y karen-biigã bilf-bilfu, t’a gomd a tẽebã yell ne a taabã. Tõe t’a Zeezi sẽn wa n tʋm a karen-biisã tɩ  b tɩ moonã, b ra yɛɛsda bilfu. La a sõng-b lame n wilg-b zĩig ning b sẽn segd n moone, la koɛɛg ning b sẽn segd n moonã. (Mat. 10:5-7) Wãn to la y tõe n dɩk a Zeezi togs-n taare? Sõng-y karen-biigã t’a bãng a sẽn tõe n moon koɛɛgã wakat ninga. Wala makre, sok-y-yã-a n ges a sã n mii neda, t’a soab sã n paam tɩ b wilg-a bũmb takɩ Biiblã sẽn yet bɩ na n naf-a. Rẽ poore, bɩ y sõng-a t’a bãng a sẽn na n togs bũmb ningã, la a sẽn na n togs rẽ nana-nana to-to. Sã n zemsame, y tõe n tũnuga ne Vɩɩmd-y wakat sẽn kõn sa! sebrã zĩig nins sẽn gʋls tɩ “Neb kẽer sẽn yete,” ne “Nina tõe n sokame yaa” wã n sõs ne-a. Y sã n wa maand woto, bɩ y modg n sõng-a t’a bãng a sẽn tõe n tall Biiblã to-to n leok ned sokr nana-nana, la ne bʋgsem.

17. Wãn to la d tõe n tũnug ne Matiye 10:19, 20, 29-31 wã n sõng d Biibl karen-biigã t’a teeg a Zeova?

¹⁷ Sõng-y karen-biigã t’a teeg a Zeova. A Zeezi yeela a karen-biisã t’a Zeova na n sõng-b-la a sẽn nong-bã yĩnga. (Karm-y Matiye 10:19, 20, 29-31.) Tẽeg-y karen-biigã t’a Zeova na n sõnga yẽ me. Y sã n wa pʋʋsd ne-a, bɩ y gom bũmb nins a sẽn yãk yam n na n maanã yelle, tɩ sõng-a t’a teeg a Zeova. A Frãnsiszɛk sẽn be Poloyn wã yeelame: “Mam karen-saambã ra mi n gomda bũmb nins m sẽn yãk yam n na n maanã yell a pʋʋsg pʋgẽ. M sẽn yã t’a Zeova leoka a pʋʋsgã, tao-tao bala, ma-me sɩnga pʋʋsgo. Mam wa n sɩnga tʋʋm paalem, n da rat tɩ b kõ-m sor tɩ m kẽng tigissã la tigis-kãsenga, la m sɩd yãame t’a Zeova sõng-m lame.”

18. A Zeova tagsg yaa wãn to ne koe-moondbã tʋʋmde?

¹⁸ Tõnd Biibl karen-biisã yell paka a Zeova hal wʋsgo. A nee koe-moondbã sẽn maand modgr nins n na n sõng nebã tɩ b lebg a zo-rãmbã, la a nong-b-la rẽ yĩnga. (Eza. 52:7) Baa y sã n pa tar ned n zãmsd-a Biiblã, y tõe n yãagda koe-moondb n tɩ zãmsd b karen-biisã Biiblã, tɩ sõng-b tɩ b wa tõog n deeg lisgu.