1. Vika vandongesi va Yesu va lekele cimo civunga ca kama ca vantu?

CIMO Civunga ca kama ca vampuevo na vamala va ku vifuti via ku liseza-seza kaha vakua ku handeka malimi a ku liseza-seza, va ile ku Yelusalema. Kaha tangua lize, kua solokele cimo cikomoueso ca kama. Vamo vaYundeya, va putukile ku handeka malimi a vaze vangendzi va ku vifuti vieka! Vutuhu evi via puile cikomoueso ca kama, vunoni viuma via komouesele cikuma, via puile muzimbu u va ambuluile vaYundeya vaco kaha na mezi a va lekele kapostolo Petulu. Ua lekele vaze vangendzi ngueni, nga va muesa lutsilielo muli Yesu Kilistu, va ka ovoka. Muzimbu uaco ua kuatele cikuma ku mitima ya vaze vangendzi. Ngeci vehuile nguavo: “Vamuanetu, tu ka linga vati?” Kaha Petulu ua handekele ngueni: “Limbatizienu mu va vose.”—Vili. 2:37, 38.

2. Vika tu hilula mu cilongesa cino? (Talenu cikupulo ca helu lia Vutala.)

² Viuma via hateleko vikevio honi via tovalele cikuma. Vantu va heta ku 3.000, va va mbatizile mu litangua lize vene na ku pua vandongesi va Kilistu. Evi, vikevio via puile vuputukilo vua cipanga ca kama ca ku puisa vantu vandongesi cize ca sikile Yesu. Kaha cipanga caco, ca heta na ku matangua ano. Vunoni ku matangua ano, ka citava ku longesa muntu vusunga na ku mu mbatiza mu litangua lia ngongo. Vamo vandongesi ve ku ambata vingonde ni vene muaka ni ku tuvakana oho amba va va mbatize. Ngue mu mua tantekeya, ku puisa muntu ndongesi ca tondeka ku lihakela kapandi ka kama. Mu cilongesa cino, tu hilula vika vi mu hasa ku linga mu kuase ndongesi yenu linga va mu mbatize.

3. Ngue muya muesa Mateo 28:19, 20, vika na pande ku linga ndongesi mangana a hete ku mbatizimu?

³ Ntsimbu kanda va mu mbatize, ndongesi na pande ku pangesa viya longesa Mbimbiliya. (Tandenu Mateo 28:19, 20.) Nga ndongesi a pangesa vize vie ku lilongesa, ue ku pua ngue uze “yala mukua mangana,” ua mu cisimo ca Yesu ua hindile luvula lua kola linga a tungileho ndzivo yeni. (Mat. 7:24, 25; Luka 6:47, 48) Vati tu hasa ku kuasa ndongesi a pangese vie ku lilongesa? Tu hilulenu vinguli vitatu.

4. Vati tu hasa ku kuasa ndongesi a tualeleho ku kola vuino mu lutsilielo na ku mbatizimu? (Talenu naua cikasa “ Kuasenu Ndongesi Yenu a Lihakele Vizango via mu Lutsilielo na ku vi Puisamo.”)

⁴ Kuasenu ndongesi yenu a lihakele vizango via mu lutsilielo. Vika ca puila ca seho? Singaniekenu ha cimueso eci: Nga muli na ku enda vungendzi vua laha, mu hasa ku imana-imana ha vihela via cili, ngeci mua ha vindonga, ni mincinda. Nga mu lingamo, ka mu ka mono ku laha ca vungendzi. Na vuno vene, nga ndongesi ua Mbimbiliya a lihakela vizango via tonda ku puisamo mu ntsimbu ya indende ka ka mono ku laha ca vungendzi vua ku heta ku mbatizimu. Puenu na ku pangesa cikasa, “Lingenu Evi” ca mu livulu Yoyenu mu Ndzolela ku Miaka Yose! mu ku kuasa ndongesi yenu ku kola mu lutsilielo. Ku ntsongo ya nkala cilongesa, puenu na ku simutuila vati mutamba “Lingenu Evi,” ua likuata na viuma via na lilongesa ndongesi yenu. Nga kuli cimo cizango ceka ci mu tonda ndongesi yenu a pangeleho, ci sonekenu ha “Vikuavo.” Puenu na ku pangesa ou mutamba mu ku hituluka na ndongesi yenu mu vizango via tonda ku puisamo mu ntsimbu ya indende na vize via tonda ku puisamo mu ntsimbu ya kama.

5. Ngue muya muesa Mako 10:17-22, vika Yesu ua lekele umo mpite, kaha omo lia vika?

⁵ Kuasenu ndongesi yenu a alulule viuma mu muono ueni. (Tandenu Mako 10:17-22.) Yesu  ua tantekeyele ngecize ca cikalu kuli mpite ku landesa vupite vueni vuose. (Mako 10:23) Vutuhu ngoco, Yesu ua lekele uze mpite a lingemo. Omo lia vika? Muomu Yesu ua mu lemene. Vintsimbu vimo, tu hasa ku likanuuela ku leka ndongesi a pangese vize vie ku lilongesa omo lia ku singanieka ngecize kanda a ci pueho. Ci hasa ku ambata ntsimbu linga muntu a likele vilinga via ku vihia na ku zala vuntu vua vuha. (Kolo. 3:9, 10) Vunoni ua livanga ka liveyele. Ngeci mukemuo nga mu livanga ku simutuilaho neni, a ka livanga ku pangelaho. Cikuavo naua, ku simutuila neni ha cimpande caco, ce ku muesa ngecize mua mu haka seho.—Visa. 141:5; Visi. 27:17.

6. Omo lia vika tua pande ku linga ndongesi vihula via cifua ce ku muenamo viuma?

⁶ Ca pua ca seho ku veta ha cilambu, mu ivue vili mu ntulo ya ndongesi. Puenu na ku pangesa vihula linga mu nongonone vika a tantekeya ndongesi ni ku tsiliela. Nga ku vuputukilo, mu pua na ku mu linga vihula via cifua eci kusua kumo, ku lutue ci ka mi puila ca casi ku simutuila neni ha vimpande via vikalu. Mu livulu Yoyenu mu Ndzolela ku Miaka Yose! mua kala vihula via vingi via cifua eci. Ca ku muenako, ha cilongesa 04 ha kala cihula: “Mu ku mona cenu, vati ue ku livua Yehova ku mutima mu mue ku tumbula lizina lieni?” Kaha ha cilongesa 09, ha kala cihula: “Viuma vika mu tonda ku kundika mu vivundilo vienu?” Ha katete, ndongesi yenu ci hasa ku mu kaluuila ku kumbulula vihula via cifua eci. Vunoni mu hasa ku mu longesa mua ku vi kumbuluila, mu ku pua na ku hilula neni ha mikanda ya mu Mbimbiliya ni vikupulo via likuata na cimpande ci muli na ku simutuila.

7. Vati tu hasa ku pangesa vimona mu ku kuasa ndongesi?

⁷ Nga ndongesi yenu nevuisisa via na pande ku linga, puenu na ku pangesa vimona mu ku mu kaniamesa ku puisamo via ku linga. Ca ku muenako, nga ndongesi yenu ce ku mu kaluuila ku kunguluka, mu hasa ku mu lekesa video Yehova ue ku Nji Kuasa ili mu mutamba “Konkenuho” ua mu cilongesa 14. Mu cingi ca vilongesa via livulu Yoyenu mu Ndzolela ku Miaka Yose! mu ka uana vimona via cifua eci mu mutamba, “Tantekeyenu Vikuavo” cipue mu “Konkenuho.” * Kaha liniungenu ku ku setekesa ndongesi na muntu ua mu video ni vantu veka halumo mu ku handeka nguenu, “nga ikeye a vi hasa, nove u vi hasa.” Vunoni ecelenu ndongesi a pue na ku lingamo ivene nga a tonda. Vunoni puenu na ku tsindika ha vimamuna via kuasele muntu ua mu video linga a pangese vilongesa via mu Mbimbiliya. Ca ku muenako, mu hasa ku tumbula umo mukanda ua mu Mbimbiliya ua pangesele muntu uaco, ni vimo viuma via lingile. Hose oho ha ci tavela ku lingamo, tsindikenu ha vati Yehova ua kuasele muntu uaco.

8. Vati tu hasa ku kuasa ndongesi yetu ku lema Yehova?

⁸ Kuasenu ndongesi yenu a hete ha ku lema Yehova. Vati mu hasa ku lingamo? Mu ku tonda vukovelelo vua ku pua na ku tsindika ha vifua via Yehova. Puenu na ku kuasa ndongesi yenu a mone Yehova ku pua Njambi ua ndzolela, uze ue ku kuasa vaze va mu lema. (1 Tim. 1:11; VaHe. 11:6) Mu lekenu nguenu, mu ku niunga vize via na lilongesa a ka uanamo vukuasi vua kama, kaha na ku mu lomboluela nguenu, vukuasi vuaco vua pua vukaleho vua muesa ngecize Yehova ua mu lema. (Isaya 48:17, 18) Nga cilemo ca ndongesi yenu kuli Yehova ci kola, na cizango ca ku alulula muono ueni linga aye Yehova ku mutima ci ka kola.—1 Yoa. 5:3.

9. Kuliya na Mako 10:29, 30, vika vi hasa ku kuasa muntu, a linge viose vi tondeka linga a pue ndongesi ua ku mbatiza?

⁹ Linga a kole mu lutsilielo na ku heta ku  mbatizimu, ndongesi ua Mbimbiliya a ka tondeka ku likela ni ku seza vimo ku nima. Ngeci mua uze mpite u tu na tumbuile, vamo vandongesi halumo ve ku tondeka ku likela ku lengeya vupite. Kaha nga vipanga viavo ka via litombuele na masiko a mu Mbimbiliya, va ka tondeka ku likelavio. Vavengi ve ku tondeka ku seza vavusamba ka va lemene Yehova. Vamo co ve ku va mbila kuti kuli vavusoko ka va lemene Vakaleho va Yehova. Yesu ua handekele ngueni, ci hasa ku pua ca cikalu ku vantu vaco, ku alulula muono uavo mu vifua evi. Vunoni ua kulahesele ngecize vose va mu kava, ka va ka liveye. Va ka tambula civezikiso ca ku kala na vusoko vua mu lutsilielo vuze vu ka va muesa cilemo ca kama. (Tandenu Mako 10:29, 30.) Vika mu hasa ku linga mangana ndongesi yenu a uane vukuasi kuli ovu vuana vua seho?

10. Vika mua lilongesa ku muzimbu ua Manuel?

¹⁰ Likuatenu vusamba na ndongesi yenu. Ca pua ca seho ku muesa ngecize mua haka seho kuli ndongesi yenu. Omo lia vika? Halakanenu via handekele Manuel ua ku Mexico. Ngueni, mua puile ndongesi ua Mbimbiliya, ntsimbu kanda va putuke ku lilongesa, mulongisi ueni ua kele na ku mu hula cihindu ceni. Evi via mu kuasele ku livua ku zituka na ku leka mulongisi ueni viuma vikuavo. Kaha ivene ngueni, “Viose evi via nji muesele ngecize mulongisi uange ua nji haka seho.”

11. Vukuasi vuka va hasa ku uana vandongesi vetu nga tu pua na ku sikama navo?

¹¹ Ngeci mua Yesu, nenu puenu na ku sikama na vandongesi venu. (Yoa. 3:22) Nga citava, puenu na ku lania ndongesi yenu uze ali na ku kola mu lutsilielo a ku hitiseko vimo mu kanua ni ku tala programa ya Broadcasting ku ndzivo yenu. Evi vi hasa ku kuasa cikuma ndongesi yenu, nga mu mu lania ha matangua eku livua vulika ngeci mua ha matangua a ku huima ni a vilika via cifuti. Muanetu Kazibwe ua ku Uganda ngueni: “Nji mona nja lilongesele via vingi ku tuala hali Yehova, ha vintsimbu vi nja kele na ku sikama na mulongisi uange, ku tuvakana mu cilongesa mpundu. Muomu nja kele na ku mona cifua ca kele na ku niungilamo Yehova  vangamba veni na ndzolela i va kele nayo. Ngeci nange nja tondele muono uaco.”

12. Omo lia vika tua pande ku ya-ya-ya na vamuanetu va ku liseza-seza ku cilongesa?

¹² Puenu na ku ya-ya-ya na vamuanetu va ku liseza-seza ku cilongesa. Vintsimbu vimo, tu hasa ku livua ngecize ca casi kuya lika lietu ku cilongesa ni ku ya-ya-ya na mukua ku ambulula umo lika ntsimbu yose. Vutuhu ca pua ca casi ku lingamo, vunoni vandongesi vetu va Mbimbiliya ve ku uana vukuasi vua kama nga tu pua na ku yako na vakua ku ambulula va ku liseza-seza. Muanetu Dmitrii ua ku Moldavia ngueni: “Nkala mukua ku ambulula uezile ku cilongesa cange, ua kele na ku lombolola viuma mu njila yeka ya ku lifuila. Evi via nji kuasele ku mona cimpande cimo lika mu vinjila via ku liseza-seza. Kaha naua, ka nja lisosomuene cikuma mu nja ka kungulukile lua katete. Muomu tele nji tantekeya laza vamuanetu va vengi.”

13. Omo lia vika tua pande ku kuasa vandongesi vetu va pue na ku kunguluka?

¹³ Kuasenu ndongesi yenu a pue na ku kunguluka. Omo lia vika? Muomu Yehova ua sika vangamba veni ku pua na ku likungulula; kaha ca pua naua mutamba ua ku lemesa cetu. (VaHe. 10:24, 25) Cikuavo naua, vamuanetu mu cikungulukilo, va pua vusoko vuetu vua mu lutsilielo. Ku kala navo ku viuano, ca pua ngue kulia navo ku ndzivo. Ngeci mukemuo, ku kuasa ndongesi yenu a putuke ku kunguluka ca pua ku mu kuasa ku hana cinanga ca kama ci mu hetesa ku mbatizimu. Vunoni cinanga caco ci hasa ku mu puila ca cikalu. Vati livulu Yoyenu mu Ndzolela ku Miaka Yose! li hasa ku kuasa ndongesi yenu ku vula nkala citanga ca ali naco?

14. Vati tu hasa ku kaniamesa ndongesi yetu a pue na ku kunguluka?

¹⁴ Pangesenu cilongesa 10 ca mu livulu Yoyenu mu Ndzolela ku Miaka Yose! linga ci mi kuase ku kaniamesa ndongesi yenu a pue na ku kunguluka. Vakua ku ambulula va vutongue va va hanene eci cilongesa linga va ci seteke mu lihia ntsimbu kanda livulu liaco li tuhuke, va muene ngecize cilongesa caco ca kuasele mua kama vandongesi vavo ku kunguluka. Vunoni, kati mu lavelele ngecize noho mu na hete ha cilongesa 10, amba mu lanie ndongesi yenu ku viuano. Puenu na ku mu lania ku putukila vene ku cavua-cavua, kaha tualelenuho ku lingamo. Vandongesi va liseza-seza, ngeci na visoti vi ve ku lihita navio via liseza-seza. Ngeci mukemuo, puenu na ku tuala mana ku viuma via tondeka mpundu ndongesi yenu na ku tonda vukovelelo vua ku mu kuasa. Vunoni kati mu ivue vusiua nga ndongesi yenu ali na ku simbula ku putuka ku kunguluka. Kalenu na lukakatela, vunoni oku mu tualelelaho ku mu lania.

15. Viuma vika vi hasa ku vuisa ndongesi yetu liova?

¹⁵ Vuno mua vuileko kamo ka liova mu mua tondele ku pua Mukaleho ua Yehova ni? Ca ku muenako, halumo mua livuile ngecize ka mu ka hasa ku ambulula. Ni mua lisosomuene ngecize, vavusoko na vavusamba va ka mi luisa. Nga mukemuo, kaha mu hasa ku lihaka mu cihela ca ndongisi yenu. Yesu ua handekele ngecize vamo vantu va hasa ku ivua liova lia cifua eci. Vunoni ua kaniamesele vandongesi veni, linga kati va tavese liova li va lingise ku likela ku pangela Yehova. (Mat. 10:16, 17, 27, 28) Vati Yesu ua kuasele vandongesi veni va vule liova li va kele na ku ivua? Kaha vati mu hasa ku kava lungano lueni?

16. Vati tu hasa ku kuasa ndongesi yetu a pue na ku lekako vakuavo viuma vie ku lilongesa?

¹⁶ Tualelelenuho ku kuasa ndongesi yenu a pue na ku lekako vakuavo vie ku lilongesa. Vandongesi va Yesu, halumo va lisosomuene mua va tumine kuya mu ku ambulula. Vunoni Yesu ua va kuasele va tantekeye kuiko va ka ambuluila na muzimbu u va pandele ku ambulula.  (Mat. 10:5-7) Vati mu hasa ku mu tambuluisa? Kuasenu ndongesi yenu a tantekeye kuiko na pande ku ambuluila. Ca ku muenako, mu hulenu nga a tantekeya umo a hasa ku uana vukuasi mu ku lilongesa vumo vusunga vua mu Mbimbiliya. Mu nima yaco, mu kuasenu ku liviukisila vati a ka handeka muzimbu uaco mu njila ya yasi. Hose ha ci tavela, mu hasa ku pangesa mutamba “Vamo ve ku Handeka Nguavo” na “Vamo ve ku Hula Nguavo” ya mu livulu Yoyenu mu Ndzolela ku Miaka Yose! Kaha omo mu lingamo, puenu na ku tuala mana ku ku longesa ndongesi yenu a pue na ku pangesa Mbimbiliya, mu ku hana vikumbululo via viasi na liano.

17. Vati tu hasa ku pangesa Mateo 10:19, 20, 29-31, omo tu kuasa ndongesi yetu a kulahele muli Yehova?

¹⁷ Puenu na ku kuasa ndongesi yenu a kulahele muli Yehova. Yesu, ua kulahesele vandongesi veni ngecize Yehova a ka va kuasa muomu ua va lema. (Tandenu Mateo 10:19, 20, 29-31.) Vuluisenu ndongesi yenu ngecize neni Yehova a ka mu kuasa. Mu hasa ku mu kuasa a kulahele muli Yehova mu ku vundila neni ku tuala ha vizango vieni. Muanetu Franciszek ua ku Polônia ngueni: “Mu nja muene vati Yehova ua kumbuluile vivundilo via mulongisi uange, nange nja putukile ku vundila. Nja vuile ngecize Yehova ua kele na ku nji kuasa, mu nja kele na ku vundila matangua a ku huima ku vipanga viange linga njiye ku viuano ni ku ciuano ca muhato.”

18. Vati Yehova ue ku livua ku tuala ha cipanga ca ku longesa ci ve ku linga Vakua Kilistu?

¹⁸ Yehova ua haka seho ya kama ku vandongesi vetu va Mbimbiliya. A tantekeya kapandi ka ve ku lihakela Vakua Kilistu linga va longese vantu ku likuata neni vusamba, kaha mueka ua va lema omo lia kapandi ka ve ku lihakela. (Isaya 52:7) Nga mu ntsimbu ino ka muesi na cilongesa ca Mbimbiliya na cimo cahi, kasi mu hasa ku kuasa vandongesi va Mbimbiliya ku kola mu lutsilielo mu ku tuhuka mu lihia na vaze va kala na vilongesa via Mbimbiliya.