1. Ixuku elikhulu latshelwa ukuthi lenzeni?

IXUKU elikhulu lamadoda labesifazana elalivela emazweni amanengi futhi likhuluma indimi ezitshiyeneyo lalibuthene eJerusalema njalo kwenzakala isimanga ngelanga lelo. Amanye amaJuda aqalisa ukukhuluma indimi zexuku lelo. Lokhu kwalimangalisa kodwa okwalimangalisa kakhulu yilokho amaJuda la lomphostoli uPhetro abakutshoyo kulo. Latshelwa ukuthi lingasindiswa nxa lingatshengisa ukuthi lilokholo kuJesu Khristu. Amazwi la athophela ezinhliziyweni zalo okokuthi labuza lathi: “Kumele senzeni?” UPhetro waliphendula wathi: ‘Ngamunye wenu kabhabhathizwe.’—ImiSeb. 2:37, 38.

2. Sizaxoxa ngani esihlokweni lesi? (Khangela umfanekiso ongaphandle.)

² Okwenzakala ngemva kwalokhu kwakumangalisa. Kwabhabhathizwa abantu abangaba ngu-3 000 baba ngabafundi bakaKhristu. Lokhu kwakuyikuqala komsebenzi omkhulu wokwenza abafundi uJesu ayelaye abalandeli bakhe ukuthi bawenze. Umsebenzi lo ulokhu usenziwa lalamuhla. Khathesi umuntu kabhabhathizwa ngemva kwamahora nje efunde iqiniso. Kungathatha izinyanga, umnyaka kumbe iminyaka ukuthi umfundi abhabhathizwe. Ukwenza abafundi ngumsebenzi onzima njengoba nje usazi nxa kuyikuthi kulomuntu ofunda laye iBhayibhili. Esihlokweni lesi sizaxoxa ngokuthi ungenzani ukuze uncede ofunda labo ukuthi babhabhathizwe.

3. Ngokwalokho okutshiwo kuMathewu 28:19, 20, umfundi kumele enzeni?

³ Umfundi kumele enze lokho okutshiwo liBhayibhili ukuze afanele ukubhabhathizwa. (Bala uMathewu 28:19, 20.) Nxa engakusebenzisa akufundayo uzafanana “lendoda ehlakaniphileyo”  uJesu akhuluma ngayo emzekelisweni wakhe eyagebha yatshona ukuze yakhe indlu yayo edwaleni. (Mat. 7:24, 25; Luk. 6:47, 48) Singamnceda njani umfundi ukuthi akwenze lokhu? Kasixoxeni ngezinto ezintathu esingazenza.

4. Singamnceda njani umfundi wethu ukuthi athuthuke aze abhabhathizwe? (Khangela lebhokisi elithi “ Ncedisa Umfundi Wakho Ahlele Afuna Ukukwenza Futhi Akwenze.”)

⁴ Nceda umfundi ahlele angakwenza. Kungani kumele ukwenze lokhu? Cabanga ngomzekeliso lo. Ake sithi ufuna ukuthatha uhambo olude ngemota yakho. Ungakhetha ukuhamba usima ubuka indawo ezinhle. Nxa ungenza njalo kawusoze utheneke amandla ngenxa yobude bomango. Nxa umfundi angahlela ukuthi uzakwenzani, abesekwenza ngemva kwesikhatshana, uzabona ukuthi angenelisa ukubhabhathizwa. Sebenzisa ingxenye ethi “Ongakwenza” esebhukwini elithi Ungathokoza Kuze Kube Nini Lanini! ukuze uncede umfundi wakho ahlele angakwenza. Ekupheleni kwesifundo ngasinye, xoxa lomfundi wakho ngokuthi ukuhlela lokho angakwenza kuzamnceda njani ukuthi asebenzise elisanda kukufunda. Nxa kulokunye ofuna umfundi wakho akwenze, angakubhala endaweni ethi “Bhala Okunye Ofuna Ukukwenza.” Hlala usebenzisa ingxenye le ukuze wena lomfundi wakho libone izinto angazenza ngesikhatshana lezingathatha isikhathi ukuthi azenze.

5. Ngokwalokho okutshiwo kuMakho 10:17-22, uJesu watshela indoda enothileyo ukuthi yenzeni futhi kungani?

⁵ Nceda umfundi wakho atshintshe impilo yakhe. (Bala uMakho 10:17-22.) UJesu wayekwazi ukuthi kwakuzakuba nzima ukuthi indoda enothileyo ithengise zonke izinto eyayilazo. (Mak. 10:23) Kodwa wayitshela ukuthi ilwenze utshintsho lolu olukhulu ngenxa yokuthi wayeyithanda. Ngezinye izikhathi singayekela ukukhuthaza umfundi ukuthi asebenzise lokho akufundayo ngenxa yokuthi siyabe  sizitshela ukuthi kakakulungeli ukwenza utshintsho oluthile. Khona kungathatha isikhathi ukuthi umuntu ahlubule ubuntu obudala agqoke obutsha. (Kol. 3:9, 10) Kodwa nxa singaxoxa masinyane ngotshintsho okumele alwenze, uzaphangisa ukuqalisa ukulwenza. Nxa sixoxa laye ngalokhu, siyabe sitshengisa ukuthi silendaba laye.—Hubo. 141:5; Zaga. 27:17.

6. Kungani kumele sibuze umfundi ukuthi ucabangani ngendaba esifunda ngayo?

⁶ Kuqakathekile ukuthi sibuze umfundi ukuthi ucabangani ngalokho akufundayo. Ukubuza imibuzo enjalo kuzasinceda sibone ukuthi umfundi uyakuzwisisa futhi uyakukholwa yini lokho akufundayo. Nxa singahlala sikwenza lokhu kuzaba lula ukuthi sixoxe ngendaba okungaba nzima ukuthi azikholwe. Ibhuku elithi Ungathokoza Kuze Kube Nini Lanini! lilemibuzo engasinceda sazi ukuthi umfundi ucabangani. Ngokwesibonelo, isifundo 04 silombuzo othi: “Ucabanga ukuthi uJehova uzwa njani nxa usebenzisa ibizo lakhe?” Isifundo 09 silombuzo othi: “Yiziphi izinto ongafisa ukuzitshela uNkulunkulu emithandazweni yakho?” Ekuqaliseni kungaba nzima ukuthi umfundi aphendule imibuzo le. Ungamncedisa ngokumqeqetsha ukuthi acabangisise ngemibhalo langamapikitsha asebhukwini.

7. Singakusebenzisa njani okwenzakala empilweni zabanye ngendlela ephumelelayo?

⁷ Nxa umfundi wakho esekwazi okumele akwenze, ungamkhuthaza ukuthi enze njalo usebenzisa izindaba zalokho okwenzakala empilweni zabanye. Ngokwesibonelo, nxa engahlali engena imihlangano yebandla ungambukelisa ividiyo ethi UJehova Ulendaba Lami etholakala kungxenye ethi “Thola Okunengi” ekusifundo 14. Izifundo ezinengi zebhuku elithi Ungathokoza Kuze Kube Nini Lanini! zilezindaba zalokho okwenzakala empilweni zabanye ngaphansi kwengxenye ethi “Gebha Ujule” kumbe ethi “Thola Okunengi.” * Ungaqathanisi umfundi wakho lomunye umuntu ngokutsho amazwi anjengalawa, “Nxa yena wakwenza, lawe ungakwenza.” Umfundi nguye okumele azibonele ukuthi uyenelisa ukutshintsha. Wena ongakwenza yikukhuluma ngezinto ezanceda umuntu okukhulunywa ngaye kuvidiyo ukuthi asebenzise lokho okufundiswa liBhayibhili. Engxenye ungakhuluma ngombhalo owamthintayo kumbe lokho akwenzayo. Lapho okuvuma khona, gcizelela indlela uJehova amncedisa ngayo umuntu lowo.

8. Singamncedisa njani umuntu esifunda laye iBhayibhili ukuthi athande uJehova?

⁸ Ncedisa umfundi wakho ukuthi athande uJehova. Ungakwenza njani lokhu? Dinga amathuba okuncedisa umfundi wakho ukuthi afunde okunengi ngobuntu bukaJehova. Msize abone ukuthi uJehova unguNkulunkulu othokozayo osekela labo abamthandayo. (1 Tim. 1:11; Heb. 11:6) Mtshele umfundi ukuthi kuzamnceda ukusebenzisa lokho akufundayo ubusumchasisela ukuthi indlela okuzamnceda ngayo itshengisa ukuthi uJehova uyamthanda. (Isaya. 48:17, 18) Nxa umfundi wakho engamthanda kakhulu uJehova, uzazimisela ukwenza utshintsho okumele alwenze empilweni yakhe.—1 Joh. 5:3.

9. Ngokwalokho okutshiwo kuMakho 10:29, 30, kuyini okunganceda umfundi ukuthi atshiye ezinye izinto ukuze abhabhathizwe?

⁹ Umfundi kumele alahlekelwe ngezinye izinto ukuze athuthuke aze abhabhathizwe. Abanye kungadingeka ukuthi balahlekelwe yimpahla  yabo njengendoda enothileyo esike sakhuluma ngayo. Nxa kuyikuthi imisebenzi abayenzayo kayihambelani lalokho okutshiwo liBhayibhili kungadingeka ukuthi bayitshiye. Kwabanengi kungadingeka ukuthi batshiyane labangane abangamthandiyo uJehova. Abanye bona bangalahlelwa iganga ngamalunga emuli angabathandiyo oFakazi bakaJehova. UJesu watsho ukuthi abanye kuzabathwalisa nzima ukutshiya ezinye izinto. Kodwa wathembisa labo abamlandelayo ukuthi abasoze badane ngoba uJehova uzababusisa ngokubanika imuli yabantu bakhe ebathandayo. (Bala uMakho 10:29, 30.) Ungamnceda njani umfundi wakho ukuthi abe lilunga lemuli le?

10. Ufundani kulokho okwatshiwo nguManuel?

¹⁰ Woba ngumngane womfundi wakho. Kuqakathekile ukuthi utshengise ukuthi ulendaba lomfundi wakho. Kungani? Cabanga ngamazwi kaManuel ohlala eMexico. Ukhuluma ngalokho okwenzakala ngesikhathi esafunda iBhayibhili esithi: “Umuntu owayengifundisa iBhayibhili wayehlala engibuza impilo singakaqalisi ukufunda. Wayengenza ngikhululeke futhi wayengivumela ukuthi ngimxoxele loba yini. Ngabona ukuthi wayelendaba lami sibili.”

11. Ukuzinika isikhathi sokuba labantu esifunda labo kungabanceda njani?

¹¹ Zinike isikhathi sokuba labantu ofunda labo iBhayibhili njengoba nje uJesu wazinika isikhathi sokuba labafundi bakhe. (Joh. 3:22) Nxa umfundi wakho ethuthuka, ungamnxusa emzini wakho ukuthi lizozinathela itiye kumbe lizokudla ndawonye loba libukele olunye lwenhlelo zethu ze-JW Broadcasting eziphuma nyanga zonke. Angabonga kakhulu nxa ungamnxusa ngesikhathi abangane bakhe kumbe abemuli yakhe benanza amaholideyi enkolo yamanga kumbe awesizwe ngoba angabe elesizungu. UKazibwe ohlala e-Uganda uthi: “Ngicabanga ukuthi engakufunda ngoJehova ngokuba lomuntu owayengifundisa kuyalingana lalokho engakufunda ngesikhathi sifunda. Ngabona ukuthi uJehova ulendaba labantu bakhe sibili lokuthi bayathokoza. Lokhu yikho engangikufuna empilweni yami.”

12. Kungani kumele sihambe labamemezeli abatshiyeneyo nxa sisiyaqhuba isifundo seBhayibhili?

 ¹² Cela abamemezeli abatshiyeneyo ukuthi bahambe lawe nxa usiya esifundweni sakho. Ngezinye izikhathi singabona angani kungcono ukuthi sihambe sodwa kumbe lommemezeli ofananayo nxa sisiyaqhuba isifundo. Kodwa umuntu esifunda laye angancedakala kakhulu nxa singahamba labamemezeli abatshiyeneyo. UDmitrii ohlala eMoldova uthi: “Ummemezeli ngamunye owayebuya wayelendlela yakhe yokuchasisa izinto. Lokhu kwanginceda ngabona ezinye indlela engangingasebenzisa ngazo lokho engangikufunda. Kanti njalo ngangingelanhloni kangako ngesikhathi ngiqalisa ukungena imihlangano yebandla njengoba abafowethu labodadewethu abanengi ngasengike ngababona.”

13. Kungani kumele sincede umfundi ukuthi angene imihlangano yebandla?

¹³ Ncedisa umfundi wakho ukuthi angene imihlangano yebandla. Kungani kumele ukwenze lokhu? Ngenxa yokuthi uJehova ulaya abantu bakhe ukuthi bahlangane ndawonye, kuyindlela yokumkhonza. (Heb. 10:24, 25) Kanti njalo abafowethu labodadewethu ebandleni bayimuli yethu. Nxa silabo emihlanganweni yebandla kuyabe kungani sindawonye ngekhaya sisidla ukudla okumnandi. Nxa uncedisa umfundi wakho ukuthi angene imihlangano yebandla uyabe umsiza ukuthi enze okunye okuqakathekileyo okuzamenza abhabhathizwe. Kodwa kungaba nzima ukuthi ayingene. Ibhuku elithi Ungathokoza Kuze Kube Nini Lanini! lingamnceda njani umfundi wakho ukuthi anqobe loba yini emvimbela ukuthi angene imihlangano yebandla?

14. Singabakhuthaza njani esifunda labo iBhayibhili ukuthi bangene imihlangano yebandla?

¹⁴ Sebenzisa isifundo 10 sebhuku elithi Ungathokoza Kuze Kube Nini Lanini! ukuze ukhuthaze umfundi wakho ukuthi angene imihlangano yebandla. Ngesikhathi ibhuku leli lisabhalwa, abanye abamemezeli abazingcitshi ekufundiseni bacelwa ukuthi bafunde isifundo lesi lezifundo zabo. Bathi sazinceda ukuthi ziqalise ukungena imihlangano. Kodwa akumelanga ulinde lize lifike kusifundo 10 ungakanxusi umfundi wakho emihlanganweni. Mnxuse lisanda nje kuqalisa ukufunda futhi uqhubeke usenza njalo. Inhlupho zabafundi ziyatshiyana, yikho nanzelela okuhlupha umfundi ngamunye ubusubona ukuthi ungamncedisa njani. Ungadani nxa kungathatha isikhathi ukuthi aqalise ukungena imihlangano yebandla. Bekezela kodwa uphikelele.

15. Yiziphi izinto abafundi abangabe bezesaba?

¹⁵ Uyasikhumbula yini isikhathi lapho owawusesaba khona ukuba nguFakazi kaJehova? Engxenye wawucabanga ukuthi ngeke wenelise ukutshumayela kumbe wawusesaba ukuthi abangakini loba abangane bangakuphikisa. Nxa kunjalo, uyakwazi ukuthi umfundi wakho uzizwa njani. UJesu watsho ukuthi abanye abantu bazakwesaba. Kodwa wakhuthaza abalandeli bakhe ukuthi bangavumeli ukwesaba kubavimbe ukuthi bakhonze uJehova. (Mat. 10:16, 17, 27, 28) UJesu wabanceda njani abalandeli bakhe ukuthi banqobe ukwesaba futhi ungamlingisela njani?

16. Singamqeqetsha njani umfundi ukuthi atshumayele?

¹⁶ Mqeqetshe ukuthi atshumayele. Kumele ukuthi abafundi babesesaba ngesikhathi uJesu ebathuma ukuthi bayetshumayela. Kodwa wabancedisa ngokubatshela ukuthi batshumayeze obani lokuthi batshumayele besithini. (Mat. 10:5-7) Ungamlingisela njani uJesu? Ncedisa umfundi wakho akwazi ukuthi ngobani angabatshumayeza. Ngokwesibonelo, mbuze ukuthi ukhona yini amaziyo ongancedwa ngokuthile okufundiswa liBhayibhili. Ngemva kwalokho  mncedise alungiselele azakutsho ngokumtshengisa indlela elula angayisebenzisa ukuze amtshumayeze. Nxa kuvuma, lingaphrakthiza lisebenzisa ingxenye ethi “Abanye Bathi” lethi “Omunye Angathi,” etholakala ebhukwini elithi Ungathokoza Kuze Kube Nini Lanini! Ngesikhathi lisenza njalo, gxila ekuqeqetsheni umfundi wakho ukuthi asebenzise iBhayibhili ukuze aphendule ngendlela elula futhi engasoze ikhube amtshumayezayo.

17. Singamsebenzisa njani uMathewu 10:19, 20, 29-31 lapho sinceda esifunda laye ukuthi athembele kuJehova?

¹⁷ Ncedisa umfundi wakho ukuthi athembe uJehova. UJesu waqinisekisa abafundi bakhe ukuthi uJehova wayezabancedisa ngenxa yokuthi wayebathanda. (Bala uMathewu 10:19, 20, 29-31.) Tshela umfundi wakho ukuthi uJehova uzamncedisa laye. Ungamsiza ukuthi athembele kuJehova ngokuthandaza laye mayelana lalokho afuna ukukwenza. UFranciszek ohlala ePoland uthi: “Owayengifundisa wayejayele ukuqamba lokho engangifuna ukukwenza nxa ethandaza. Ngathi ngibona uJehova ephendula imithandazo yakhe, lami ngahle ngaqalisa ukuthandaza. Ngabona indlela uJehova angincedisa ngayo ngesikhathi kumele ngicele amalanga emsebenzini wami omutsha ukuze ngiye emihlanganweni yebandla lasemhlanganweni wesabelo.”

18. UJehova uzwa njani ngomsebenzi wokufundisa owenziwa ngamaKhristu?

¹⁸ UJehova ulendaba labantu esibafundisa iBhayibhili. Uyakwazi ukuthi ababafundisayo basebenza nzima ukuze babancede basondele kuye futhi lokhu kwenza abathande. (Isaya. 52:7) Lanxa khathesi ungelasifundo seBhayibhili osiqhubayo, ungenelisa ukuncedisa abafunda iBhayibhili ukuthi bathuthuke baze babhabhathizwe ngokuhamba labanye abamemezeli nxa besiyabafundisa.