1. Aalongwa yaJesus yomethelemumvo lyotango oya li ya lombwele ongundu yaantu yi ninge shike?

ESIKU LIMWE ongundu onene yaalumentu naakiintu ya za miilongo yi ili noyi ili notaya popi omalaka ga yoolokathana oya li ya gongala. Esiku ndyoka opwa ningwa oshinima oshikumithi. Aajuda yamwe oya tameke okupopya omalaka omakwiilongo! Aantu mboka ya li po oya li ya kuminwa noonkondo oohapu ndhoka dha popiwa kAajuda nosho wo komuyapostoli Petrus. Aantu mboka oya li yu uvu kutya otaya vulu owala okuhupithwa ngele oya kala ye na eitaalo muJesus Kristus. Shoka osha li she ya gumu lela komitima, noshe ya ningitha nokuli ya pule, taya ti: “Otu na okuninga shike?” Petrus okwe ya yamukula, a ti: “Kehe gumwe gwomune na ninginithwe.” — Iil. 2:37, 38, NW.

2. Oshike tatu ka kundathana moshitopolwa shika? (Tala ethano lyokombanda.)

² Konima yethimbo opwa ka ningwa ishewe oshinima shilwe oshikumithi. Mesiku olyo tuu ndyoka, aantu 3 000 lwaampono oya ninginithwa, e taya ningi aalongwa yaKristus. Iilonga yokuninga aantu aalongwa mbyoka Jesus a lombwele aalanduli ye ya longe opo ya tamekele mpoka. Nokunena aalanduli ye otaya tsikile okulonga iilonga mbyoka. Kunena, omuntu ita vulu okuninginithwa mbalambala sho opo owala a tseya oshili. Ohashi pula oomwedhi nenge omvula nenge nokuli ethimbo li vulithe po, opo omuntu a kale a gwana okuninginithwa. Okuninga aantu aalongwa yaKristus ohaku pula oonkambadhala dha mana mo, ngaashi hatu shi mono uuna tatu konakona Ombiimbeli nayo. Moshitopolwa shika, otatu ka kundathana shoka to vulu okuninga, opo wu kwathele omukonakonimbiimbeli gwoye a ninginithwe.

3. Ngaashi sha popiwa muMateus 28:19, 20, omukonakoni oku na okuninga shike, opo a ninge ehumokomeho nokuninginithwe?

³ Manga omukonakoni inaa ninginithwa, tango oku na okutula miilonga shoka ti ilongo mOmbiimbeli. (Lesha Mateus 28:19, 20.)  Uuna omukonakoni a tameke okutula miilonga shoka ti ilongo, kungawo ota ningi shoka sha li sha ningwa ‘komulumentu omunandunge’ gwomethaneko lyaJesus, ngoka a tungile ongulu ye kemanya. (Mat. 7:24, 25; Luk. 6:47, 48) Ongiini tatu vulu okukwathela omukonakoni a tule miilonga shoka ti ilongo? Natu ka taleni kiinima itatu mbyoka tatu vulu okuninga.

4. Ongiini tatu vulu okukwathela omukonakoni a tsikile okuninga ehumokomeho, opo a vule okuninginithwa? (Tala wo oshimpungu “ Kwathela omukonakoni gwoye i itulile po omalalakano noku ga adhe.”)

⁴Kwathela omukonakoni gwoye i itulile po omalalakano. Omolwashike mbela wu na oku shi ninga? Natu taleni kethaneko tali landula: Natu tye ando oto yi molweendo olule. Sho wu li molweendo ndwoka otashi vulika wu kale to thuwa po pomahala gontumba omawanawa. Kungawo hoka to yi ito ka mona kokule naanaa. Sha faathana, uuna omukonakoni i itulile po omalalakano gopokathimbo e te ga adha, otashi vulika a mone kutya nelalakano lyokuninginithwa ota vulu oku li adha. Longitha oshitopolwa “Itulila po elalakano,” tashi adhika membo Kala nonkalamwenyo ombwanawa sigo aluhe, wu kwathele omukonakoni gwoye a ninge ehumokomeho. Kehulilo lyoshileshwa kehe, kundathana naye kombinga yankene elalakano ndyoka tali ke mu kwathela a tule miilonga shoka opo owala i ilongo. Ngele owa hala omukonakoni gwoye a adhe elalakano lilwe, li nyola mpoka pwa nyolwa “Omalalakano galwe.” Kala ho longitha oshitopolwa shoka mu talulule pamwe nomukonakoni gwoye omalalakano ge gopokathimbo ngoka a hala okwaadha nosho wo ngoka tage ke mu pula ethimbo ele e ga adhe.

5. Ngaashi sha popiwa muMarkus 10:17-22, Jesus okwa li a lombwele omulumentu omuyamba a ninge shike, nomolwashike?

⁵Kwathela omukonakoni gwoye a ninge omalunduluko ngoka ga pumbiwa, opo a kale a gwana okuninginithwa. (Lesha Markus 10:17-22.) Jesus okwa li e shi kutya otashi ka kala oshidhigu komulumentu gwontumba omuyamba a landithe po iinima ye ayihe. (Mark. 10:23) Nonando ongawo, Jesus okwe mu lombwele e shi ninge.  Omolwashike mbela? Omolwaashoka Jesus okwa li e mu hole. Omathimbo gamwe, otashi vulika kaatu ladhipike omukonakoni a tule miilonga shoka ti ilongo, molwaashoka tu wete kutya ini ilongekidha natango okuninga omalunduluko ngoka ga pumbiwa. Otashi vulika shi pule ethimbo, opo omuntu a ninge omalunduluko monkalamwenyo ye. (Kol. 3:9, 10) Ihe ngele owa kundathana naye nziya kombinga yomalunduluko ngoka e na okuninga, ote ke ga tula wo miilonga nziya. Ngele owe shi ningi, otashi ulike kutya owu na ko nasha naye. — Eps. 141:5; Omayel. 27:17.

6. Omolwashike twa pumbwa okukala hatu pula omukonakoni nkene u uvitile shoka tatu kundathana naye?

⁶ Osha simana okupula omukonakoni nkene u uvitile shoka tamu kundathana naye. Shoka otashi ke ku kwathela wu mone ngele oku uvite ko shoka tamu kundathana nosho wo shoka i itaala. Ngele owa kala ho shi ningi pandjigilile, otashi ka kala oshipu okukundathana naye monakuyiwa kombinga yiinima mbyoka tashi vulika yi kale iidhigu kuye oku yi taamba ko. Membo Kala nonkalamwenyo ombwanawa sigo aluhe omu na omapulo goludhi ndoka ogendji. Pashiholelwa, moshileshwa 4 omu na epulo tali ti: “Sho to dhiladhila, Jehova oha kala u uvite ngiini uuna to tumbula edhina lye?” Oshileshwa 9 oshi na epulo tali ti: “Iinima yimwe yini wa hala okukwatela momagalikano goye?” Petameko, omukonakoni gwoye otashi vulika a kale a pumbwa ethimbo a dhiladhile kombinga yankene e na okuyamukula epulo ndyoka. Oto vulu oku mu dheula a kale ha dhiladhila muule kombinga yomanyolo ngoka ge etwa moshileshwa shoka nosho wo kombinga yomathano.

7. Ongiini tatu vulu okukwathela omukonakoni tatu longitha iimoniwa yayalwe?

⁷ Uuna omukonakoni gwoye u uvite ko shoka e na okuninga, longitha iimoniwa yayamwe wu mu ladhipike e shi ninge. Pashiholelwa, ngele omukonakoni gwoye iha kala aluhe pokugongala, oto vulu oku mu ulukila okavidio Jehova okwa sila ndje oshimpwiyu, taka adhika kohi yoshitopolwa “Uuyelele wa gwedhwa po” moshileshwa 14. Miileshwa oyindji yembo Kala nonkalamwenyo ombwanawa sigo aluhe, kohi yoshitopolwa “Ilonga oshindji” nenge “Uuyelele wa gwedhwa po,” oto ka adha mo iimoniwa ya fa mbyoka. * Yanda okuyelekanitha omukonakoni gwoye naakonakoni yalwe, mokutya , “Ngele ntumba ota vulu oku shi ninga, nangoye oto vulu oku shi ninga.” Mu etha a thike pehulithodhiladhilo ndyoka ye mwene. Pehala lyokuninga ngawo, popya naye kombinga yiinima yokondandalunde mbyoka ya kwathele omuntu ngoka u ulikwa mokavidio a tule miilonga omakotampango gOmbiimbeli. Oto vulu wo oku mu ulukila enyolo ndyoka lya popiwa mo nenge sha shilwe. Uuna tashi wapa, tsa omuthindo nkene Jehova a kwathele omuntu ngoka.

8. Ongiini tatu vulu okukwathela omukonakoni gwetu a kale e hole Jehova?

⁸Kwathela omukonakoni gwoye a kale e hole Jehova. Omomukalo guni mbela? Konga oompito wu mu kwathele i ilonge kombinga yomaukwatya gaJehova. Mu kwathela a mone kutya Jehova oKalunga omunyanyukwi ngoka ha kwathele mboka ye mu hole. (1 Tim. 1:11; Heb. 11:6) Ulukila omukonakoni gwoye kutya ngele okwa kala ha tula miilonga uuyelele mboka ti ilongo ota ka mona mo uuwanawa, e to mu yelithile kutya uuwanawa mboka ta mono mo otawu ulike kutya Jehova oku mu hole. (Jes. 48:17, 18) Sho ohole ye yokuhola Jehova tayi ende tayi koko, otayi ke mu inyengitha a ninge omalunduluko ngoka ga pumbiwa. — 1 Joh. 5:3.

9. Metsokumwe naMarkus 10:29, 30, oshike tashi vulu okukwathela omukonakoni e ethe po iinima yimwe, opo a vule okuninga omulongwa gwaKristus a ninginithwa?

⁹ Opo omukonakoni a ninge ehumokomeho, okwa pumbwa okweetha po iinima yimwe. Ngaashi  omulumentu omuyamba ngoka a popiwa metetekelo, aakonakoni yamwe otashi vulika ya kale ya pumbwa okweetha po iinima yopamaliko. Ngele iilonga yawo yokwiikongela omboloto itayi tsu kumwe nomakotampango gOmbiimbeli, otashi vulika ye na oku yi etha po, e taya kongo po yimwe mbyoka tayi opalele. Oyendji yomuyo otashi vulika ye ethe po okweendathana nookuume kawo aakulu mboka ihaaya longele Jehova. Yalwe otashi vulika ya kale kaaye niwe nayo kaantu yaandjawo mboka kaaye hole Oonzapo dhaJehova. Jesus okwa popi kutya otashi vulika shi ka kale oshidhigu kaantu yamwe ya ninge omaiyambo ga tya ngaaka. Ihe oku uvaneke kutya mboka taye mu landula itaye ki ipa uusama. Jehova ote ke ya laleka nuuyamba moku ya pa aamwahe yopambepo ye ya hole. (Lesha Markus 10:29, 30.) Ongiini to vulu okukwathela omukonakoni gwoye a mone uuwanawa momagano ngoka omawanawa?

10. Oshike wi ilonga moshimoniwa shaManuel?

¹⁰Panga uukuume nomukonakoni gwoye. Osha simana okuulukila omukonakoni gwoye kutya owu na ko nasha naye. Omolwashike mbela? Ndhindhilika shoka sha popiwa komumwatate Manuel, ngoka ha zi koMeksiko. Ota dhimbulukwa nkene ngoka a li ha konakona naye a li e mu kwathele, ta ti: “Oshikando kehe manga inaatu tameka okukonakona, omumwatate ngoka a li ha konakona nangame okwa li aluhe ha pula ndje ngele ayihe otayi ende ngaa nawa. Okwa li ha kwathele ndje ndi kale nde mu mangulukila, opo ndi vule okupopya naye kombinga yakehe shimwe. Onda li handi kala ndu uvite kutya oku na ko nasha shili nangame.”

11. Ongiini aakonakoni yetu tashi vulika ya mone uuwanawa mokukala hatu kutha ethimbo tu kale nayo?

¹¹ Kala ho kutha ethimbo wu kale pamwe nomukonakoni gwoye, ngaashi Jesus a li ha kutha ethimbo a kale pamwe naalanduli ye. (Joh. 3:22) Ngele otashi wapa, mu hiya kaandjeni mu ka nwe sha pamwe, mu lye pamwe nenge mu tale opolohalama yotiivii JW yokomwedhi. Otashi vulika te ke shi pandula, unene tuu pethimbo lyomatango omanene, sho oyendji yomwaamboka e shi haya kala yi ipyakidhila niituthi yi ili noyi ili. Omumwatate Kazibwe, ngoka ha zi koUganda, okwa ti: “Ondi wete kutya ondi ilonga oshindji kombinga yaJehova mokweendathana nomumwatate ngoka  a li ha konakona nangame. Onda mono nkene Jehova ha sile aapiya ye oshimpwiyu nonkene haya kala aluhe ya nyanyukwa. Shoka osho nda kala nda hala monkalamwenyo yandje.”

12. Omolwashike tu na okukala hatu yi komukonakoni naauvithi ya yoolokathana?

¹²Kala ho yi komukonakoni gwoye naauvithi ya yoolokathana. Otashi vulika tu kale tu na ondjigilile yokuya komukonakoni gwetu otse atuke nenge hatu yi ko owala nomuuvithi gumwe awike. Nonando okuninga ngawo otashi vulika shi kale oshipu kutse, omukonakoni gwetu ota ka mona mo uuwanawa ngele otwa kala hatu yi kuye naauvithi ya yoolokathana. Dmitrii, ngoka ha zi moMoldova, okwa ti: “Aauvithi ayehe mboka ya li haya kala pekonakonombiimbeli lyandje oya li haya yelitha iinima momikalo dha yoolokathana. Shoka osha kwathele ndje ndi mone nkene tandi vulu okutula miilonga shoka tandi ilongo momikalo dha yoolokathana. Osha kwathele ndje wo kaandi kale unene nda sa ohoni sho nda yi kokugongala oshikando shandje shotango, oshoka aamwatate naamwameme oyendji onde yi igilila nale.”

13. Omolwashike twa pumbwa okukwathela omukonakoni gwetu a kale ha gongala?

¹³Kwathela omukonakoni gwoye a kale he ya kokugongala. Omolwashike mbela? Omolwaashoka Jehova okwa pa aalongeli ye elombwelo ya kale haya gongala, shoka shi li omukalo gwoku mu longela. (Heb. 10:24, 25) Shimwe ishewe, aamwatate naamwameme oye li onga aakwanezimo yetu. Uuna twa gongala pamwe nayo, ohatu kala twa fa tu li megumbo limwe tatu li pamwe iikulya ya telekekeka. Uuna to kwathele omukonakoni gwoye a kale ha kala pokugongala, kungawo oto mu kwathele a katuke onkatu ya simanenena, opo a ninginithwe. Ihe otashi vulika shi kale oshidhigu kuye a kale he ya kokugongala. Embo Kala nonkalamwenyo ombwanawa sigo aluhe otali vulu ngiini okukwathela omukonakoni gwoye a sinde omashongo ngoka tashi vulika ge mu imbe a kale ha gongala?

14. Ongiini tatu vulu okukwathela omukonakoni gwetu a kale he ya kokugongala?

¹⁴ Longitha oshileshwa 10 shembo Kala nonkalamwenyo ombwanawa sigo aluhe wu kwathele omukonakoni gwoye, opo a kale he ya kokugongala. Manga embo ndika inaali pita, aauvithi yamwe oya pulwa ya longithe oshileshwa shoka ya kwathele aakonakoni yawo ya kale haye ya kokugongala. Aauvithi mboka oya ti kutya oshileshwa shoka osha kwathela lela. Ihe ngoye ku na okutegelela sigo mwa thiki poshileshwa 10, opo wu hiye nawa omukonakoni gwoye kokugongala. Mu hiya nziya ngaashi tashi vulika, e to tsikile okukala ho shi ningi. Aakonakoni oya yoolokathana noye na omaupyakadhi ga yoolokathana. Onkee ano, gandja eitulomo koompumbwe dhomukonakoni gwoye, e to tala nkene to vulu oku mu kwathela. Ino teka omukumo ngele otashi mu pula ethimbo, opo a vule okukala he ya kokugongala. Kala wu na eidhidhimiko, ihe ino etha po okukala ho mu hiya.

15. Uumbanda wuni aakonakoni yetu tashi vulika ya kale ye na?

¹⁵ Mbela oto dhimbulukwa pompito yimwe sho wa li wa tila okuninga Onzapo yaJehova? Otashi vulika wa li wu uvite kutya ku na esiku wu ka vule okuuvitha egumbo negumbo. Nenge tashi vulika wa li wa tila okupatanekwa kuyaandjeni nenge kookuume koye. Ngele osho, oto vulu okuuva ko nkene omukonakoni gwoye tashi vulika a kale u uvite. Jesus okwa popi kutya aantu yamwe otashi vulika ya kwatwe kuumbanda mboka. Nonando ongawo, okwa ladhipike aalanduli ye kaaye ethe uumbanda wu ya imbe ya longele Jehova. (Mat. 10:16, 17, 27, 28) Jesus okwa li a kwathele ngiini aalanduli ye ya sinde uumbanda mboka ya li ye na, nongiini to vulu okulandula oshiholelwa she?

16. Ongiini to vulu okudheula omukonakoni gwoye a kale ha lombwele yalwe kombinga yeitaalo lye?

¹⁶Dheula omukonakoni gwoye kashonanakashona a kale ha lombwele yalwe kombinga yeitaalo lye.  Aalongwa yaJesus otashi vulika ya li ya tila sho e ya tumu ye ku uvithe. Ihe Jesus okwe ya kwathele moku ya lombwela mpoka ye na oku ku uvitha naashoka ye na okuuvitha kombinga yasho. (Mat. 10:5-7) Ongiini to vulu okuholela Jesus? Kwathela omukonakoni gwoye a mone kutya opoompito dhini ta vulu okuuvitha. Pashiholelwa, mu pula ngele oku shi gumwe ngoka a hala okwiilonga oshili yOmbiimbeli. Opo nduno, mu kwathela i ilongekidhile shoka ta ka popya, moku mu ulukila nkene ta vulu okuuvithila omuntu ngoka. Uuna tashi wapa, oto vulu oku mu dheula to longitha uuyelele mboka tawu adhika membo Kala nonkalamwenyo ombwanawa sigo aluhe, kohi yoshipalanyolo “Aantu yamwe ohaya ti” nenge “Gumwe otashi vulika a pule ta ti.” Sho to shi ningi, gandja eitulomo koku mu dheula a kale ha longitha Ombiimbeli a gandje omayamukulo ga yela notaga ti sha.

17. Ongiini tatu vulu okulongitha Mateus 10:19, 20, 29-31, tu kwathele omukonakoni gwetu a kale i inekela muJehova?

¹⁷Kwathela omukonakoni gwoye a kale i inekela muJehova. Jesus okwa li a shilipaleke aalongwa ye kutya Jehova ote ke ya kwathela, molwaashoka oku ya hole. (Lesha Mateus 10:19, 20, 29-31.) Dhimbulukitha omukonakoni gwoye kutya Jehova naye ote ke mu kwathela. Oto vulu oku mu kwathela a kale i inekela muJehova, mokukala ho galikana pamwe naye kombinga yomalalakano ge. Franciszek, ngoka ha zi koPoland, okwa ti: “Olundji omumwatate ngoka a li ha konakona nangame okwa li ha popi omalalakano gandje uuna ta galikana. Sho nda mono nkene Jehova ta yamukula omagalikano ge, nangame onda tameke nziya okukala handi galikana. Sho opo nda tameke iilonga iipe, onda mono nkene Jehova a kwathele ndje sho nda li nda hala okutula mo efudho, opo ndi vule okuya kokugongala nosho wo koshigongi shimwe shoshitopolwa.”

18. Jehova oku uvitile ngiini iilonga mbyoka aauvithi haya longo?

¹⁸ Jehova oku na ko nasha noonkondo naakonakoni yetu. Oku hole nokwa pandula noonkondo oonkambadhala ndhoka aauvithi ayehe haya ningi, opo ya kwathele aantu ya hedhe popepi naye. (Jes. 52:7) Ngele ngashingeyi ku na omukonakonimbiimbeli, natango oto vulu okukwathela aakonakoni yalwe ya ninge ehumokomeho noya ninginithwe, mokukala ho wayimine aauvithi yalwe uuna taya ka konakona nagumwe.