1. Tiheeni oohuserya a Yesu yaalenlaaya muloko yoole mutokweene opaka?

MULOKO mutokweene wa alopwana ni athiyana waaya o Yerusalemu. Awo yaarweenle mu ilapo soohiyanahiyana nave yaanaloca ilocelo soohiyanahiyana. Echu yootikhiniha yaaheereya mu nihiku nenle. Mootutuxa Ayuta akina yaapacerya oloca ilocelo sa achu a maloko makina yaawo yaaruule! Ela yaatikhiniha vancipale muloko yoole mutokweene, nyenya yeeyo Ayuta yaaloncaaya wa yaawo ni yeeyo murummwa Pedro aalonceiye yaari echu yoohicuwaleya. Eyo yaaphitaanyerya muchaka yoowo yaahusenryaaya wi yaaphwanela omuroromela Yesu Kristu. Muchaka yoola waatannya mirima saya. Awo yaaceenyeryeya ophiyerya wi yaakoha eriki: “Neere esheeni vano?” Pedro aawaakhula ariki: “Mmoha ni mmoha a nyuwo apatisiwe.”—Saw. 2:37, 38.

2. Tiheeni nnahaalaahu othokororya mmwaha yoola? (Moone eruku va ekaapa.)

² Yeeyo yeeren’ye voocharela yaari yootikhiniha. Achu awaakhwana 3.000 yaapatisiwa nihiku nenle, ekhala oomuchara a Kristu. Ala yaari mapacereryo a muteko mutokweene wa waapaka oohuserya yoowo Yesu aalamulenleiye oomuchara awe opaka. Oomuchara a Yesu annapaka muteko mmohamoha olelo. Mmahiku ahu, hinnamuhusiha muchu mu iwora savakhaani voocharela aphwanelela opatisiwa. Sinnaviravo miyeeri naari eyaakha naari opwaha wi oohuserya aakhwanihe yoolakelela yeela. Onnachuneya wiilipixerya wi nimukhaviherye muchu okhala oohuserya a Kristu. Mmwaha yoola, nnahaala othokororya echu munaphwanelaanyu weera wi mmukhaviherye oohuserya anyu a Piipiliya ophiyerya opatisiwa.

3. Ntoko etharihiwaaya mu Mateu 28:19, 20, tiheeni oohuserya a Piipiliya onaphwaneleiye weera wi aye vahoolo ophiyerya opatisiwa?

³ Ahaakumve opatisiwa, oohuserya a Piipiliya onaphwanela opharihela yeeyo Piipiliya onahusiheiye. (Mwaalakhanye Mateu 28:19, 20.) Vaavaa oohuserya onaphariheleiye yeeyo onahusereiye, owo onnalikana ni “mulopwana a miruku” onalociwa mu niphwanaphwaniho na Yesu yoowo aatenke empaawe vamwala. (Mat. 7:24, 25; Luka 6:47, 48) Nni nimukhaviherye hai oohuserya a Piipiliya opharihela yeeyo onahusereiye? Hankooni nthokororye ichu raru seiho nnaphwanelaahu weera.

4. Nni niwerye hai omukhaviherya oohuserya a Piipiliya otitelela wiilipixerya ophiyerya opatisiwa? (Moone tho ekaaxa “ Mmukhaviherye Oohuserya Anyu Otikitherya ni Waakhwaniherya Soolakelela.”)

⁴ Mmukhaviherye oohuserya anyu a Piipiliya otikitherya soolakelela. Ntakhara heeni munaphwanelaanyu weerano yeeyo? Muthokororye niphwanaphwaniho nla: Wakhala wi munapaka mukwaha muyaaka nipuro noorakamela, munanwerya olakelela weemela mapuro yaawo ari ooreeraxa variyari va mukwaha anyu. Mmukhalelo yoola, mukwaha owo hokhala woovelaveliha. Moolikana, ti yoophwanelela wa oohuserya a Piipiliya otikitherya ni waakhwaniherya soolakelela sa elukuluku vakhaani. Mwa weerano yeela, owo onahaala wiiwexexa wi opatiso tahi yoolakelela ehinaweryeya. Wi mmukhaviherye oohuserya anyu oya vahoolo, mpharihele makupa ani “Yoolakelela” mu liivuru Mpuhe Okumi Okhala Wookhala! Wookuchulani wa mwaha ori woothene, muloce mukhalelo yoolakelela eyo eniiwananaaya ni yeeyo oohuserya anyu a Piipiliya omanleiye ohuserya. Wakhala wi munnachuna wi oohuserya anyu akhaleno yoolakelela yoohiyana, nyuwaano munanwerya orepela makupa ani “Ekina.” Ilukuluku soothene mphariheleke makupa yaala a liivuru wi mvaanele ni oohuserya anyu a Piipiliya vooloca sa soolakelela sawe, moohipwacha saari sa elukuluku vakhaani naari elukuluku yincipale.

5. Mwawiiwanana ni Marko 10:17-22, tiheeni Yesu aamulenleiye mulopwana ooreela wi eere, nave ntakhara heeni?

 ⁵ Mmukhaviherye oohuserya anyu a Piipiliya opaka matorokelo mookumini. (Mwaalakhanye Marko 10:17-22.) Yesu aanasuwela wi waahaala okhala woovila wa mulopwana ooreela okuliha ichu sawe soothene. (Mar. 10:23) Naamwi hiihaa, Yesu aamuleela mulopwana ole wi apake matorokelo yaala matokweene mookumini mwawe. Ntakhara heeni? Nthowa nawi Yesu aamusivela yoowo. Vakina vaya, hinnamuceenyerya oohuserya a Piipiliya opharihela yeeyo onahusereiye woona wi nnuupuwela wi nivano owo hareheryen’ye opaka matorokelo. Eparipari wi ohiya sookhovelela sakhalai ni onwara muchu a hiihaano eri echu enamaliha elukuluku yincipale. (Kol. 3:9, 10) Nyenya, wakhala wi munnamuleela oohuserya anyu a Piipiliya woosiilo, owo tho onahaala opacerya opaka matorokelo vahilekenle. Wakhala wi munnavaanela ni oohuserya anyu a Piipiliya sa yeela, munnooniherya wi munnamusivela.—Sal. 141:5; Masi. 27:17.

6. Ntakhara heeni ninnaphwanela opharihela makoho anamweeriha muchu oloca moonelo awe?

⁶ Makoho vooloca sa moonelo wa muchu, ennamukhaviherya oohuserya a Piipiliya oloca yeeyo onuupuweleiye vooloca sa mwaha. Mpharihele makoho yaawo anahaala wookhaviheryaani osuwela yeeyo oohuserya a Piipiliya oniiwexexeiye ni onaroromeleiye. Wakhala wi moheerano yeela, onamukhala wookhweya ovaanela ni yoowo miyaha soochuneya sa muhoolo. Liivuru Mpuhe Okumi Okhala Wookhala! ookhalano makoho mancipale yaawo anamukhaviherya muchu oloca moonelo awe. Ntoko yootakiherya, mwaha 04 wookhalano nikoho nla: “Munoona wi Yehova onoona hai vaavaa munapharihelaanyu nsina nawe?” Nave mwaha 09 wookhalano nikoho nla: “Ichu taani mwaahaalaanyu osiveliwa oloca mmavekelo anyu?” Woopaceryani, akhweya oohuserya anyu a Piipiliya onamuchuna elukuluku wi awerye waakhula nikoho vooloca sa moonelo awe. Nyenya munanwerya omukhaviherya wi uupuweleleke. Ntoko yootakiherya, mmweerihe oohuserya anyu a Piipiliya wuupuwelela soorepa sa Mpiipiliya naari iruku sinaphwanyeya va mwaha.

7. Nni nipharihele hai saweereya seeparipari wi nimukhaviherye oohuserya a Piipiliya?

⁷ Vaavaa oohuserya anyu a Piipiliya oniiwexexeiye wi matorokelo taani owo onaphwaneleiye opaka, mpharihele saweereya seeparipari wi simuceenyerye weerano yeela. Ntoko yootakiherya, wakhala wi oohuserya anyu a Piipiliya onnoovelela ophiya mmithukumano, mmoonihe exilema Ilukuluku Soothene Yehova Onnakikhapelela enaphwanyeya mmakupa ani “Otholathola” mmwaha 14. Mmiyaha sincipale sa liivuru Mpuhe Okumi Okhala Wookhala! munahaala ophwanyamo saweereya seeparipari mmakupa ani “Ohuserya Mwawiiseela” naari “Otholathola.” * Mukhaleno ekaasoope wi muhimulikanyiheke oohuserya anyu a Piipiliya ni muchu mukina, mulocaka wi: “Waakhanle wi ola oowerya weerano, nyu tho munanwerya.” Mmuhiye oohuserya anyu a Piipiliya ophiyerya makuchuwelo yaala mukhateiye. Echu yoophwanelela weerano, ori othokororya ipontu soochuneya seiho saamukhavihenrye muchu a mu exilema opharihela mahusiheryo a Mpiipiliyani. Akhweya munanwerya othokororya yoorepa yooluluwanya naari echu yeeyo owo aapankeiye. Wakhala wooweryeya, mmooniherye mukhalelo Yehova aamukhavihenryeiye muchu owo.

8. Nni niwerye hai omukhaviherya oohuserya ahu a Piipiliya omusivela Yehova?

⁸ Mmukhaviherye oohuserya anyu omusivela Yehova. Muni mweereno hai yeela? Ilukuluku soothene enaphwanyeyaaya ekari, mutharihe mikhalelo sa Yehova. Mmukhaviherye oohuserya anyu a Piipiliya woona wi Yehova Muluku oohakalala  ni wi owo ilukuluku soothene onnaakhaviherya yaale anamusivela. (1 Tim. 1:11; Ahe. 11:6) Mmooniherye oohuserya a Piipiliya wi opharihela yeeyo owo onahusereiye ennakumiherya miphurelo sincipale nave wi miphurelo iho yawooniherya yawi Yehova onnamusivela. (Isa. 48:17, 18) Vaavaa oohuserya anyu onamusiveleiye Yehova vancipale owo onahaala oceenyeryeya opaka matorokelo oochuneyaxa mookumini.—1 Yoh. 5:3.

9. Mwawiiwanana ni Marko 10:29, 30, tiheeni enahaala omukhaviherya muchu opaka matorokelo oochuneya wi akhale oohuserya oopatisiwa?

⁹ Wi oohuserya a Piipiliya aphiyerye opatisiwa, owo onaphwanela wiilipixerya. Hiihaa ntoko mulopwana ooreela olociwe woopaceryani, wa oohuserya akina onamuchuneya ohiya ichu saya soomwiilini. Ntoko yootakiherya, waakhanle wi awo analapa mmuteko yoowo ohiniiwanana ni malakiheryo a Mpiipiliyani, akhweya awo anamuchuna otoroka muteko yoowo. Ohiya yeeyoru, oohuserya akina akhweya onamuchuneya waahiya asinthamwene yaawo ahinamusivela Yehova. Akina ananwerya wiiciwa ni amusi yaawo ahinaasivela Anamoona a Yehova. Yesu aahiiwexexa wi opaka wiilipixerya yoola hiwaahaala okhala wookhweya wa akina. Nyenya owo aalaiherya wi yaale yaahaala olakelela omuchara, hiyaahaala okhalano ekeerelani. Awo yaahaala waakhela nchuwelo na emusi yoosivela yoomunepani. (Mwaalakhanye Marko 10:29, 30.) Tiheeni munaphwanelaanyu weera wi oohuserya anyu a Piipiliya aakhele yamahala yeela yoochuneya?

10. Tiheeni muhusenryaanyu orweela wa yaweereya ya Manuel?

¹⁰ Mukhale nthamwene a oohuserya anyu. Ti woochuneya omooniherya oohuserya anyu a Piipiliya wi munnampwacha. Ntakhara heeni? Moone yeeyo Manuel, onakhala o Mexiko olonceiye. Uupuwelaka sa muculi elukuluku yeeyo aareiye oohuserya a Piipiliya, Manuel onnathariha: “Nihaakumve ohuserya, muhusiha aka aanakikoha waakhanle wi kookhala phaama. Owo aanakikhaviherya okhala oomaaleleya nave eyo yaanakeeriha oloca echu vyakala. Kaanawerya woona wi owo chiryene aanakipwacha.”

11. Ntakhara heeni eryaaya yaphaama oohuserya a Piipiliya omaliha elukuluku ni muhusiha awe?

 ¹¹ Yesu aanasiveliwa omaliha elukuluku ni oomuchara awe. Mweereno emohamoha ni oohuserya anyu. (Yoh. 3:22) Waakhanle wi owo onnaya vahoolo, munoona hai onwopa wi mulye vamoha naari omoona broadcasting? Eyo enahaala omukhaviherya oohuserya anyu, xaxaxa, wakhala wi elukuluku ya ifesta. Mweeparipari, owo onanwerya wiisoona omeekha mu ilukuluku seiho. Kazibwe, onakhala o Ukanta oloca: “Tahi wi pahiru kihusenrye sa Yehova moorweela wa yoohuserya aka, nyenya tho mu ilukuluku kaamalihaaka kiri ni muhusiha aka. Kaawerya woona mukhalelo Yehova onaapwacheiye akapuro awe nave mukhalelo awo aryaaya oohakalala. Yaari yeela chiryene kaachunaaka.”

12. Ntakhara heeni ti yaphaama waawopaka alaleeryi oohiyanahiyana ntakhara yoohuserya ya Piipiliya?

¹² Mwaawope alaleeryi oohiyanahiyana wi mweecihe yoohuserya anyu. Vakina vaya, nnanwerya woona wi ti wookhweya oyawo mukhatiihu wa yoohuserya ahu naari onwopaka mulaleeryi mmohamoha. Naamwi weerano hiiha eri yoophwanelela, enahaala okhala yaphaama wa oohuserya ahu, wakhala wi mu ilukuluku ikina, ninnaawopa alaleeryi oohiyanahiyana. Dmitrii, onakhala o Moldova, ooloca: “Mulaleeryi ori oothene aakhala va yoohuserya aka aanathariha ichu mmukhalelo woohiyana. Eyo yaanakikhaviherya woona miyaha mmukhalelo woohiyana. Ohiya yeeyo, vaavaa kaaphin’yaaka mmuthukumano mu ekwaha aka yoopacerya, nkaakhanle awuuliwa muru nthowa nawi kaahaasuwela anna ni arokora ancipale.”

13. Ntakhara heeni nnaphwanelaahu omukhaviherya oohuserya ahu ophiya mmithukumano?

¹³ Mmukhaviherye oohuserya anyu ophiya mmithukumanoni sa muloko. Ntakhara heeni? Nthowa nawi Yehova ohaalamulela alapeli awe wi ethukumaneke; awo makupa a malapelo ahu. (Ahe. 10:24, 25) Ohiya yeeyo, anna ni arokora ahu emusi ahu yoomunepani. Vaavaa nnakhalaahu vamoha mmithukumanoni enakhala ntoko wi nri vamoha nlyaaka yoolya yoosiva. Ti woochuneya omukhaviherya oohuserya anyu a Piipiliya ophiya mmithukumanoni, woona wi eyo echu emoha yoochuneyaxa enahaala omukhaviherya oohuserya anyu opatisiwa. Vakina vaya, enanwerya okhala echu yoovila wa oohuserya anyu weerano. Waakhanle wi ti hiiha, ti mwawiihai liivuru Mpuhe Okumi Okhala Wookhala! oneereiye amukhaviherye?

14. Nni nimuceenyerye hai oohuserya ahu ophiya mmithukumano?

¹⁴ Mpharihele mwaha 10 wa liivuru Mpuhe Okumi Okhala Wookhala! wi mmuceenyerye oohuserya anyu. Liivuru yoola ahaakumve ovonyiwa, yaahiwompwa alaleeryi akina a mavyakelo wi yeecihe yoohuserya ni mwaha yoola. Awo alonce wi mwaha ola waaphara muteko nave waahaakhaviherya oohuserya aya opacerya ophiya mmithukumano. Nyenya mweeparipari, muhiweherye wi mphiye mmwaha 10 wi munwope oohuserya anyu ophiya mmithukumano. Mweereno yeela mwawaakuveya nave mutitelele onwopa moohihiyererya. Oohuserya ori oothene a Piipiliya onnahoolela makacamiho oohiyanahiyana. Mwa yeela, mvareryele soothowa sa oohuserya anyu nave moone waakhanle wi munanwerya omvaha nikhaviheryo noophara muteko. Naamwi owo alekelaka waakhulela nwopelo anyu, muhiceecheye. Mukhale oopisa murima, nyenya a nthiti.

15. Ichu taani sinahaala omweeriha oohuserya anyu woova?

¹⁵ Apwanne nyuwaano mwaakhala awoova vaavaa mwaapacenryaanyu okhala Namoona a Yehova? Akhweya mwaanoona wi himwaahaala owerya olaleerya wa achu akina. Naari akhweya nyuwaano mwaanoova wi amusi anyu naari asinthamwene anyu yaahaala woorukunuwelani. Waakhanle wi nyuwaano mwaahiisoona mmukhalelo yoola, mweeparipari munanwerya omwiiwexexa oohuserya anyu a Piipiliya. Yesu aahisuwela wi akhweya wa akina yaahaala okhalano  woova ntoko yoola. Nyenya owo aahaaceenyerya oomuchara awe wi hiyaaphwanela weemererya wi woona waahiihe omurumeela Yehova. (Mat. 10:16, 17, 27, 28) Tiheeni Yesu enreiye wi aakhaviherye oomuchara awe ovootha woova? Nave muni mmutakiherye hai?

16. Nni nimuvyakihe hai oohuserya ahu wi alaleeryeke?

¹⁶ Mmuvyakihe oohuserya anyu wi alaleeryeke. Vaavaa Yesu aarummeiye oohuserya awe wi yalaleerye awo yaahikhala awuukhuwa. Nyenya Yesu aahaakhaviherya. Mwawiihai? Owo aahaaleela oomuchara awe mpuro woolaleeryawo ni muchaka yaahaalaaya oloca. (Mat. 10:5-7) Muni mmutakiherye hai Yesu? Mmukhaviherye oohuserya anyu osuwela mpuro woolaleeryawo. Ntoko yootakiherya, mmukohe, ‘Apwanne woomusuwela muchu aahaala osiveliwa osuwela eparipari yeela ya Mpiipiliyani?’ Mwawiihiiha mmukhaviherye oohuserya wuupuwela mukhalelo wookhweya wa oloca eparipari yeeyo ni muchu yoowo. Wakhala woophwanelela, munanwerya orehererya vamoha ni yoowo mpharihelaka makupa ani “Achu Akina Ani” a mu liivuru Mpuhe Okumi Okhala Wookhala! Nave vaavaa muneeraanyuno yeela, mutikitheryeye mu omuhusiha oohuserya anyu ompharihela Piipiliya wi avahererye maakhulo ookhweya, nyenya moosivela.

17. Nni nimpharihele hai Mateu 10:19, 20, 29-31 wi nimukhaviherye oohuserya ahu omuroromela Yehova?

¹⁷ Mmukhaviherye oohuserya anyu omuroromela Yehova. Yesu aahaaroromeliha oohuserya awe wi Yehova onnaasivela nave nthowa na yeeyo owo aahaala otitelela waakhaviheryaka. (Mwaalakhanye Mateu 10:19, 20, 29-31.) Mmuupuxerye oohuserya anyu wi Yehova onahaala omukhaviherya. Mukhalelo mmoha wa omuhusiha oohuserya anyu a Piipiliya omuroromela Yehova ori ovekela ni yoowo vooloca sa soolakelela sawe. Franciszek, yoowo onakhala o Poloniya, ooloca: “Ilukuluku soothene muhusiha aka aanaloca soolakelela saka mmavekelo awe. Vaavaa koonaka wi Yehova aanaakhula mavekelo a muhusiha aka, mi tho kaapacerya ovekela. Kaahoona wi Yehova aakikhaviherya vaavaa kaapacenryaaka olapa mmuteko muvyaani nave kiveka mahiku wi kiweryeke ophiya va mithukumano sa muloko muthukumano wa muceche.”

18. Yehova onoona hai muteko yoowo anamahusiha a Piipiliya anapakaaya?

¹⁸ Yehova onnaapwacha vancipale oohuserya ahu a Piipiliya. Nave owo onnaasivela vancipale yaawo ari ahusiha nthowa nawi oosuwela wiilipixerya woothene anapakaaya wi yaahusihe akina iparipari vooloca sa Muluku. (Isa. 52:7) Akhweya, mu elukuluku yeela, nyuwaano hamunawerya weeciha yoohuserya ya Piipiliya. Mwawiihiiha, mpharihele ekari moorweela wa waahoola alaleeryi akina mu soohuserya saya sa Piipiliya. Mmukhalelo yoola nyuwaano munanwerya waakhaviherya oohuserya a Piipiliya wi eye vahoolo ophiyerya opatisiwa.