1. Abigha ba Yesu mubabwira ekikumula ky’abandu ky’omwatsi wahi?

EKIKUMULA ky’abalume n’abakali mukyabalamira e Yerusalema. Babya ibakalua omo biharo mbiriri-mbiriri kandi ibakabugha emibughe mbiriri-mbiriri. Ekiro ekyo, muhabya omwatsi ow’eriswekya! Ekikumula ky’Abayahudi mukyatsuka eribugha omo mubughe w’abandu abo. Abandu abo mubasweka kutsibu, aliwe ebyo Bayahudi abo babya bakabugha n’eby’omukwenda Petero abwirabo byabya by’omughaso munene. Mubababwira bati bakendilamibwa bamabikirirya Yesu Kristo. Omwatsi oyo mwatula oko mitima y’abandu. Neryo mubabulya bati: “Tuyire tuti kwehi?” Neryo Petero mwasubiryabo ati: “Obuli mundu abatisibawe.”​—Emib. 2:37, 38.

2. Omo mwatsi ono tukendikania okuki? (Lebaya epitsa eyiri oko kijalada.)

² Ekyakoleka enyula sy’omwatsi oyo mukyaswekya. Abandu hakuhi 3 000 mubabatisibwa ekiro ekyo n’eribya bigha ba Kristo. Eyo yabya nzuko y’omubírí munene owo Yesu abugha ati abigha biwe bakole. Abigha biwe banemulola embere erikola omubírí oyo nibya n’erihika lino. Omo mughulu wetu ono, situlikanaya n’omundu oko katambi kake kasa neryo inialuatolera eribatisibwa. Kyanganasaba emisi, omwaka kutse emyaka, omwigha w’eBiblia erihika okwibatisibwa. Ni mubírí munene eriwatikya omundu eribya mwigha wa Kristo. Omo mwatsi ono, tukendilangira ekyo wangakola utoke eriwatikya omwigha waghu ahike okwibatisibwa n’eribya mwigha wa Kristo.

3. Ngoko kisakire omo Matayo 28:19, 20, omwigha w’eBiblia atolere iniayirati atoke erilola embere erihika okwibatisibwa?

³ Embere sy’eribatisibwa, omwigha w’eBiblia atolere iniakolesya ebyo eBiblia yikakangiriraya. (Soma Matayo 28:19, 20.) Omughulu omwigha w’eBiblia akakolesaya emyatsi eyo akigha  akabya “ng’omundu wamenge” oyo Yesu akanayako omo musyo wiwe ati, mwatakula emwisi kutsibu atoke erihimba enyumba yiwe y’oko libwe. (Mat. 7:24, 25; Luka 6:47, 48) Twangawatikya tuti omwigha erikolesya emyatsi eyakigha? Tukanaye oko myatsi isatu (3) eyerikola.

4. Twangawatikya tuti omwigha w’eBiblia erilola embere erihika okwibatisibwa? (Lebaya n’akasanduku “ Watikaya omwigha waghu eriyihiriraho eby’erikola n’eriberereryabyo.”)

⁴ Watikaya omwigha eriyihiriraho ebyakendikola. Busanaki litolere iwakola utya? Eky’erileberyako, wamanza erighenda olughendo luli, ukaghenda ukaluhukira ahuwene. Erikola utya kikakuwatikaya erilangira olughendo nga si luli. Kobine bitya n’oko mwigha w’eBiblia. Atolere eriyihiriraho eby’erikola ebyakendihikira luba. Eriyira atya ekyo kikamuwatikaya erilangira ngoko kyanganatokekana iniasyahika okwibatisibwa. Kolesaya ekitsweka “Ekyowangakola” ekiri omo kitabu Tsemera engebe kera na kera! omwigha waghu atoke eriyihiriraho emyatsi eyangakola. Oko mwiso w’obuli somo bulaya omwigha waghu ekyo abiriyihiriraho erikola nga kyanganamuwatikya kiti erikolesya ebyo mwamabigha. Wamabya iwunemulengekania oko undi mwatsi owo mwigha waghu atolere inyakola, handikagho ahikwa ahahandikire hati “Ekindi eky’erikola.” Ubye ukakolesya akasanduku ako erikania n’omwigha waghu oko myatsi eyo abiriyihiriraho eyo anganahikira luba, n’eyakendisyahikira omo biro bikasa.

5. Ngoko kihandikire omo Mariko 10:17-22, Yesu mwabwira omulume muteke ati akole mwatsi wahi, kandi busanaki?

⁵ Watikaya omwigha wawu erikola esyombinduka omo ngebe yiwe. (Soma Mariko 10:17-22.) Yesu abya inianasi ngoko kikendikala oko mulume muteke oyo erighulya ebyosi ebyawiteko. (Mar. 10:23) Aliwe, Yesu mwabwira omulume oyo ati akole embinduka nene eyo omo ngebe yiwe. Busanaki? Kundi Yesu abya anzire omulume oyo. Twamalengekania tuti omwigha wetu w’eBiblia  syalyayiteghekania erikola embinduka nyilebe omo ngebe yiwe, twanganubaha erimubwira tuti akolesaye omwatsi mulebe omo ngebe yiwe. Kyanganasaba mughulu muli omundu erileka emibere mibi, n’eryambala omundu muhya-muhya. (Kol. 3:9, 10) Aliwe wamabikania naye oko mwatsi oyo ko luba, iwanganamuwatikya eritsuka erikola luba esyombinduka esitolere. Erikania naye luba oko mwatsi oyo kikakanganaya ngoko umutsomene.​—Esy. 141:5; Emi. 27:17.

6. Busanaki ni ky’omughaso eribulya omwigha amalengekania wiwe?

⁶ Ni ky’omughaso eribulya omwigha wetu w’eBiblia y’amalengekania wiwe oko mwatsi mulebe. Erikola tutya kikawatikaya eriminya eby’omwigha asi n’ebyo alighire. Wamabya ukakola utya kangyi-kangyi, ikikendisyoloba erikania naye oko myatsi eyo ate angaligha luba. Ekitabu Tsemera engebe kera na kera! kyuswiremo amabulyo awalingayo. Eky’erileberyako, esomo 04 ikabulaya yiti: “Ukalengekanaya uti Yehova akayowa ati omughulu ukamwahula omo rina liwe?” N’esomo 09 yikabulaya yiti: “Iwe wanzire erisaba busana n’emyatsi yahi?” Oko mwanzo kyanganakala oko mwigha waghu erisubirya oko mabulyo ayo. Wanganamuwatikya erilengekania oko masako n’esyopitsa esiri omo kitabu.

7. Twangakolesya tuti ndeke ebyalolawako n’abandi?

⁷ Omughulu omwigha waghu amabiminya ebyo atolere erikola, kolesaya ebyalolawako eby’ekwenene erimuhira m’omuhwa w’erikola ekyo atolere eniakola. Eky’erileberyako, omwigha wawu amabya isyalihika oko mihindano ko ngendo nyingyi, wanganamukangania evideo Yehova mwangwatikya eyikabanika omo somo 14 omo kitsweka “Ebindi ebyo wangakola”. Omo syosomo nyingyi esye kitabu Tsemera engebe kera na kera! ukendibanamo ebyalolawako bingyi, omo kitsweka “Wighe bingyi” n’omo kitsweka “Ebindi ebyo wangakola”. * Isiwabya ukalingirirania omwigha waghu w’eBiblia n’owundi mundu n’erimubwira uti: “Kundi lebe mwakatoka naghu ukenditoka.” Uleke omwigha waghu w’eBiblia ayisoghe iyuwene-wene. Omo mwanya w’erikola utya, ukanaye n’omwigha waghu oko mundu oyukanibweko omo video n’erimuwatikya erikolesya amakangirirya w’eBiblia. Kutse wanganamukangania erisako lighuma eririmo enzumwa y’omughaso, kutse omwatsi mughuma owo mundu oyukakanibawako omo video akola. Kyamatokekana uhire omuwato w’oko ekyo Yehova akola eriwatikya omundu oyo.

8. Twangawatikya tuti abigha betu b’eBiblia eryanza Yehova?

⁸ Uwatikaye omwigha waghu eryanza Yehova. Wangakola ekyo kyo wuti? Sondekanaya ehyanya erihira omuwato oko mibere ya Yehova. Watikaya omwigha waghu eriminya ngoko Yehova ni Mungu ow’obutseme, oyukawatikaya abamwanzire. (1 Tim. 1:11; Ebr. 11:6) Kanganaya omwigha waghu ngoko akendibana endundi amabikolesya ebyo akigha, kandi umukanganaye ngoko endundi eyo akendibana yikakanganaya ngoko Yehova amwanzire. (Isa. 48:17, 18) Omwigha waghu amabyanza Yehova, olwanzo olo ilukendimukuna erikola esyombinduka esitolere.​—1 Yoa. 5:3.

9. Ngoko kisakire omo Mariko 10:29, 30, ekyangawatikya omundu eriherera emyatsi mingyi atoke eribatisibwa n’eribya mwigha wa Kristo niki?

⁹ Omwigha w’eBiblia atolere iniaherera emyatsi mingyi atoke erihika okwibatisibwa. Ng’omulume muteke oyo tulyakanayako, abigha  balebe banganasabwa eriherera emyatsi milebe ey’ekinya-mubiri. Omubírí owo bakakola amabya inyakabuna esyokanuni sy’eBiblia, ekyo kyanganabasaba erirondya owundi mubírí. Abangyi kyanganabasaba erilekana n’abanywani babo abatekolera Yehova. Abandi banganaghanwa n’abandu ab’oko kihanda kyabo abatekolera Yehova. Yesu mwabugha ati kyanganasyakala oko bandi erikola esyombinduka esikasaba eriyiherera ngy’eri. Aliwe kandi mwalagha ati abakasyamukwama sibendisyaluhira buyira. Yehova akendisyabahemba omwibaha ekihanda eky’obunya-kirimu ekirimo olwanzo. (Soma Mariko 10:29, 30.) Wangawatikya uti omwigha waghu eribana emiyisa eyikalwira omo kihembo kibuya eki?

10. Ekyo mughala wetu Manuel ayilangirira omughu abya akigha eBiblia kyamakwighisyaki?

¹⁰ Ukole obwira n’omwigha waghu. Ni ky’omughaso munene erikangania omwigha waghu ngoko umutsomene. Busanaki? Lebaya ebyo mughala wetu Manuel, owe Mexico akibuka. Akabugha ati: “Omughulu n’abya ng’igha eBiblia, omukangirirya waghe iniakanibulaya embere sy’erigha nga mungasiba niti. Ekyo ikikaleka inayowa ndeke, kandi inayowa bwiranda erimubwira emyatsi yosi. Ikikalangirika ndeke ngoko anitsomene.”

11. Omwigha eribya akalabya endambi yo haghuma netu ekyo kyangamuwatikya kiti?

¹¹ Ubye ukalabya endambi n’abigha baghu ngoko Yesu abya akakola n’abigha biwe. (Yoa. 3:22) Kyamatokekana wanganabirikira omwigha waghu eka waghu neryo imwalya akalyo ko haghuma, kutse imwakwama e Teledifizio yo kughuma. Omwigha waghu anganatsema wamabimukokya ewaghu omo kiro ekitemo mubírí, nibughambu, omughulu abandu b’oko kihanda kiwe kutse abira biwe bali omo kisendebele ekikabuna esyokanuni sya Yehova. Mughala wetu Kazibwe owe Uganda akabugha ati: “Munigha emyatsi mingyi oko Yehova omughulu nabya ngalabya endambi n’omukangirirya waghe kulenga omughulu twabya tukigha. Munayilangirira ngoko Yehova atsomene abandu biwe, kandi ngoko bali n’obutseme  bw’ekwenene omo ngebe yabo. Naghe munanza eribasosa omo ngebe yaghe.”

12. Busanaki ni ky’omughaso eribya tukasa n’abatuliri mbiriri-mbiriri oko funzo y’eBiblia?

¹² Ubye ukasa n’abatuliri mbiriri-mbiriri ukasigha n’omwigha waghu. Oko katambi kalebe, wanganalangira nga litolere eribya ukaghenda iwuwene kutse eribya ukaghenda n’omutuliri mughumerera omughulu ukayigha n’omwigha waghu. Nomo twanganalangira nga ky’olobire erikola tutya, aliwe twamabibya tukasa n’abatuliri mbiriri-mbiriri itwanganawatikya omwigha wetu. Mughala wetu Dmitrii owe Moldova akabugha ati: “Obuli mutuliri oyo wabya akasa oko funzo yaghe iniawite enzira yiwe eyerikangirirya. Ekyo mukyaniwatikya erilangira esindi nzira esyo nangakolesyamo ebyo ng’igha. Nabere nahika oko muhindano engendo y’erimbere munitubaha kundi inabiriminya abaghala n’abali betu bangyi.”

13. Busanaki ni ky’omughaso eriwatikya abigha betu eribya bakahika oko mihindano?

¹³ Watikaya omwigha waghu erihika oko mihindano y’endeko. Busanaki? Kundi Yehova akasaba abakamuramaya erihindana haghuma. (Ebr. 10:24, 25) N’ekindi, abaghala n’abali betu bakabya b’oko kihanda kyetu eky’obunya-kirimu. Omughulu tuli oko mihindano n’abaghala n’abali betu, tukayowa nga tuli eka tukalya akalyo akasihire ko haghuma. Omughulu ukawatikaya omwigha waghu w’eBiblia erihika oko mihindano, ukabya iwukamuwatikya erikola omwatsi w’omughaso munene owakendisyamukolya okwibatisibwa. Kyanganakala oko mwigha eritsuka eribya akahika oko mihindano. Aliwe, ekitabu Tsemera engebe kera na kera! kyangawatikya kiti omwigha waghu erikinda ebyangamukakirya erihika oko mihindano?

14. Twangahira omo mwigha wetu m’omuhwa tuti atoke eribya akahika oko mihindano?

¹⁴ Kolesaya esomo 10 ey’ekitabu Tsemere engebe kera na kera! erikuwatikya erihira omo mwigha m’omuhwa w’erihika oko mihindano. Abatuliri abasabawa erikolesya esomo eyi embere sy’erikokotibwa ly’ekitabu eki, mubabana ebighuma ebyuwene erileta abigha babo b’oko mihindano. Sibughambu litolere iwalindirira erihika oko somo 10 imuwatoka erikokya omwigha waghu y’oko mihindano. Umukokaye luba oko mihindano kandi ulole embere erikola utya. Abigha b’eBiblia bawite amaligho mbiriri-mbiriri. Okw’ekyo ni ky’omughaso eriminya ebiyitawa by’omwigha waghu. Isiwabunika mutima atitatsuka erihindana luba. Ubye n’omutima w’erilindirira kandi isiwaluha erimukokya.

15. Omwigha wetu w’eBiblia anganakwa obuba bwaki?

¹⁵ Ukinibukire ngoko wabya ukubaha eribya mughuma w’oko Bimiri ba Yehova? Alinga iwukayowa nga siwendisyatoka nahake eritulira lukyo kwa lukyo. Kutse wabya ukasagha uti ab’oko kihanda kyaghu n’abira baghu bakendikughana kusangwa wabiribya Mwimiri wa Yehova. Naghu wamabya ikowabya ukayowa utya, wanganatoka eriyihira omo mwanya w’omwigha waghu. Yesu mwakangania ngoko abandu balebe banganabere n’obuba obuli ng’obo. Aliwe, mwabwira abigha biwe ati isibaleka obuba bukabakakirya erikolera Yehova. (Mat. 10:16, 17, 27, 28) Yesu mwawatikya ati abigha biwe eritendibya n’obuba? Naghu wangakola ekyo kyo uti?

16. Twangabegherya tuti abigha betu b’eBiblia erikanirya abandi oko ebyo bakigha?

¹⁶ Uwatikaye omwigha waghu yo bolo-bolo erikanirya abandi oko myatsi eyo akigha. Omughulu Yesu atuma abigha biwe eriyatulira, alinga mubanubaha. Aliwe Yesu mwabakangya aho bakenditulira, n’engulu eyo bakenditula. (Mat. 10:5-7) Wangigha Yesu yo uti? Watikaya omwigha waghu eriminya omughulu ow’angatulirako. Eky’erileberyako, umubulaye ng’anasi  omundu mulebe oyo angatsemera eriminya ekwenene nyilebe eyikalua omo Biblia. Neryo, umuwatikaye eriteghekania emyatsi eyo akendibugha omo nzira eyolobire akakania oko kwenene eyo. Kyamatokekana, wanganakolesya ekitsweka “Abandu balebe bakabugha bati” ekikabanika omo kitabu Tsemera engebe kera na kera! Omughulu ukakola utya ukawatikaya omwigha waghu erisubirya oko mabulyo omo nzira eyolobire.

17. Twangakolesya tuti erisako erye Matayo 10:19, 20, 29-31 eriwatikya omwigha wetu eriyiketera Yehova?

¹⁷ Watikaya omwigha waghu eriyiketera Yehova. Yesu mwabwira abigha biwe ati Yehova akendisyabawatikya kundi abanzire. (Soma Matayo 10:19, 20, 29-31.) Ubwire omwigha waghu ngoko Yehova akendimuwatikya. Wanganamuwatikya oko myatsi eyo abiriyihiriraho erikola. Mughala wetu Franciszek owe Polonye akabugha atya: “Omukangirirya waghe w’eBiblia iniakabya asaba, iniakahula omo musabe emyatsi eyo nabiriyisogha erikola. Omughulu nabya ngalangira ngoko Yehova anemusubirya oko misabe y’omukangirirya waghe, naghe munatsuka eribya ngasaba. Munayilangirira ngoko Yehova abya akaniwatikya omughulu nabya ngasaba omupatro waghe ehamuli eyeriya oko mihindano, nibya n’oko mihindano minene-minene eye kiharo.”

18. Yehova akayowati akalangira omubírí munene owo abakangirirya Bakristo banemukola lino?

¹⁸ Yehova atsomene kutsibu abigha betu b’eBiblia. Anasi ngoko abakangirirya b’eKikristo bakakola omubírí munene eriwatikya abandu eriyitunda hakuhi naye, kandi akatsemerabo busana n’ekyo. (Isa. 52:7) Wamabya isiuwite efunzo eyo ukasondala lino, wanganawatikya abigha b’eBiblia erilola embere erihika okwibatisibwa eribya ukakwamanisya abandi batuliri omo syofunzo syabo.