1. Kansi gulu ya ŵanthu esonkhana ku Yerusalemu mu 33 C.E., yeuzhyiwa kucita cinji?

 PA PENTEKOSITE wa mu 33 C.E., gulu ikulu ya analume na anakazi esonkhana ku Yerusalemu. Ŵanthu aŵa efumila m’vyalo vosiyanasiyana ndipo enzolaŵila vilaŵilo vosiyanasiyana. Pa siku iyi pecitika cinthu ciyakine capadela. Ayuda ayakine eyamba kulaŵila m’vilaŵilo va ŵanthu ocokela m’vyalo viyakine. Izi zedabwisha ŵanthu onse enzepo. Olo n’tetyo, onse ecita ngako cidwi na zecilaŵila mtumwi Petulo. Yove eŵauzhya kuti angapulumuke ngati okhulupilila Yesu Khristu. Mau aŵa yeŵafwika ngako pa mtima cakuti ekonsha kuti: “Kansi tufunika kucitanji?” Poyankha, Petulo eŵauzhya kuti, “Aliyense wa mweo abatizike.”​—Mac. 2:37, 38.

2. Kansi tikambilane cinji m’nkhani ino? (Onani cithunzithunzi pacikuto.)

² Zecitika pavuli pake zenze zocitisha cidwi ngako. Pa siku iyi, ŵanthu 3,000 ebatizika nonkhala ophunzila a Khristu. Ici niye cenze ciyambi ca nchito yopanga ophunzila yamene Yesu elamula ophunzila ŵake kuti akocita. Nchito iyi yupitilizhya kucitika mpaka masiku ŵano. Koma masiku ŵano, n’zosakwanishika kuphunzisa munthu nomuyavya kuti abatizike pa siku tyala imozi. Zingatole miyezi, caka olo vyaka vinyinji kuti wophunzila alute pasogolo nobatizika. Ndipo ngati muphunzila Baibo na munthu muyakine, mungavomelezhye kuti n’cinthu lini copepuka kuyavya munthu kuti ankhale wophunzila wa Khristu. Mu nkhani ino, tikambilane zatingacite kuti tiyavye ophunzila Baibo kuluta pasogolo nobatizika.

3. Molingana na Mateyu 28:19, 20, kansi wophunzila Baibo ofunika kucitanji kuti alute pasogolo nobatizika?

³ Akaliyobatizika, wophunzila Baibo ofunika kuseŵenzesha zinthu zakuphunzila kufumila m’Baibo. (Ŵelengani Mateyu  28:19, 20.) Ngati wophunzila oseŵenzesha zinthu zakuphunzila, onkhala monga “munthu wocenjela” wa mu fanizo ya Yesu. Munthu uyu emanga ng’anda yake pa maziko otang’a. (Mat. 7:24, 25; Luka 6:47, 48) Tingacitenji kuti tiyavye wophunzila Baibo kuti akoseŵenzesha zakuphunzila? Tiyeni tilaŵizhyane zinthu zitatu zatingacite.

4. Kansi tingayavye tyani wophunzila Baibo kunkhala na zolinga zingamuyavye kuti abatizike? (Onani kabokosi kakuti “ Yavyani Wophunzila Baibo Kuziikila Zolinga Nozikwanilisha.”)

⁴ Yavyani wophunzila wanu kunkhala na zolinga. Ndaŵa yanji kucita izi n’kofunika? Ganizilani cisanzo ici: Ngati mufuna kuya pa ulwendo utali, mungayambe mwaganizila za malo aweme yamene mungafune kupanama noyaonako. Izi zingakuyavyeni kuti osati mukoika maganizo ŵanu pa kutalimpha kwa msenga. Molingana na izi, ngati wophunzila Baibo oziikila zolinga zitontho-zitontho nozikwanilisha, aone kuti angakwanilishe colinga cakuti abatizike. Mukoseŵenzesha mbali yakuti “Zamungacite” m’buku yakuti Sangalalani na Moyo Kosasila! poyavya wophunzila wanu kunkhala na zolinga. Mukasilizhya kuphunzila mutu uliwonse, mukokambilana na wophunzila wanu mwamene mbali yakuti “Zamungacite” ingamuyavyile kuseŵenzesha zawaphunzila. Ngati pali ziyakine zamuona kuti wophunzila wanu ofunika kucita, mungazilembe pa mbali yakuti “Ziyakine Zamungacite.” Nthawi na nthawi, mukoseŵenzesha mbali iyi poonesha wophunzila wanu zolinga zangakwanilishe mu nthawi itontho na zolinga zingamutolele nthawi itali kuti azikwanilishe.

5. Molingana na Maliko 10:17-22, kansi Yesu euzhya munthu wolemela kuti acite cinji, ndipo ndaŵa yanji?

⁵ Yavyani wophunzila Baibo kupanga masinthidwe pa umoyo. (Ŵelengani Maliko 10:17-22.) Yesu eziŵa kuti cenze lini copepuka kuti munthu wolemela agulise vinthu vake vonse. (Mko. 10:23) Olo n’tetyo, emuuzhya kuti apange masinthidwe aya pa umoyo wake cifukwa Yesu enzomukonda.  Nthawi ziyakine, tingakangiwe kulimbikisha wophunzila wasu kuti akoseŵenzesha mfundo zakuphunzila cifukwa coganiza kuti angakwanishe lini kucinja. N’cendi kuti zingatole nthawi kuti ŵanthu aleke kucita vinthu viipa veenzocita kale noyamba kucita vinthu vabwino. (Akol. 3:9, 10) Koma wophunzila wanu angacinje umoyo wake ngati mungayambe kamangu kumuuzhya zinthu zakufunika kucinja. Kucita izi kungaoneshe kuti mumukonda.​—Sal. 141:5; Miy. 27:17.

6. Ndaŵa yanji tufunika kuseŵenzesha makonsho yamene yangacitishe wophunzila kufotokoza maganizo ŵake?

⁶ Mukoseŵenzesha makonsho yangacitishe kuti wophunzila wanu afotokoze zakuganiza pa nkhani yamukambilana. Izi zingakuyavyeni kuziŵa zakukhulupilila. Ndipo zingakuthandizeni kuziŵa ngati omvwishisha zamuphunzila olo yai. Ngati mucita izi nthawi zonse, munkhale omasuka kulaŵizhyana naye mfundo zamene zingaoneke zovuta kuti azivomelezhye. Buku yakuti Sangalalani na Moyo Kosasila! ili na makonsho yanyinji yamene yangayavye wophunzila wanu kufotokoza zakuganiza. Mwacisanzo, m’mutu 4 muli konsho yakuti: “Kansi muganiza kuti Yehova akumvwa tyani mukaseŵenzesha zina yake?” Ndipo m’mutu 9 muli konsho yakuti: “Ni zinthu zotyani zamungakonde kupemphelela?” Poyamba, wophunzila wanu angavutike kuyankha makonsho aŵa. Koma mungamuyavye kupeza mayankho mwa kumulimbikisha kuganizila pa Malemba na vithunzithunzi.

7. Kansi tingaseŵenzeshe tyani visanzo va ŵanthu ayakine poyavya wophunzila wasu?

⁷ Ngati wophunzila wanu wazindikila zakufunika kucita, mungaseŵenzeshe nkhani na mavidyo ya ŵanthu amene ekwanisha kupanga masinthidwe pa umoyo wao pomuonesha kuti naye angakwanishe. Mwacisanzo, ngati wophunzila wanu opezeka lini pa misonkhano nthawi zonse, mungamutambishe vidyo ya mutu wakuti Yehova Onikonda yamene ili pa mbali yakuti “Fufuzani” m’mutu 14. Mitu inyinji m’buku yakuti Sangalalani na Moyo Kosasila! ili na nkhani na mavidyo ya ŵanthu amene ekwanisha kucinja umoyo wao. Nkhani na mavidyo aya zupezeka pa mbali yakuti “Phunzilani Zinyinji” na yakuti “Fufuzani.” * Koma mufunika kupewa kulinganizhya wophunzila wanu na munthu wamwaŵelenga olo kuonelela mu vidyo mwa kulaŵila mau akuti, “Ngati uyu ekwanisha, ndiye kuti namwe mungakwanishe.” Cingankhale bwino ngati wophunzila wanu angazindikile mfundo iyi pa yove yeka. Tetyo, mukolaŵila zinthu zeyavya munthu wamwaona m’vidyo kuti ayambe kuseŵenzesha mfundo za m’Baibo. Mwacisanzo, mungatomole lemba olo zinthu ziyakine zecicita kuti acinje. Nthawi zonse, mukogogomezela mwamene Yehova eyavyila munthu wamwaŵelenga olo kuonelela m’vidyo.

8. Kansi tingayavye tyani wophunzila wasu kuti ayambe kukonda Yehova?

⁸ Yavyani wophunzila wanu kuti ayambe kukonda Yehova. Kansi mungacite tyani zamene izi? Pamuphunzila nthawi zonse, mukopeza mipata yamungayavyilemo wophunzila wanu kuona minkhalidwe ya Yehova. Mukomuyavya kuziŵa kuti Yehova ni Mulungu wacimwemwe ndipo ocilikiza ŵanthu amene omukonda. (1 Tim. 1:11; Aheb. 11:6) Musimikizhyileni kuti angapindule ngako ngati oseŵenzesha zakuphunzila. Ndipo muyavyeni kuzindikila kuti madaliso yangapeze ni umboni wakuti Yehova omukonda. (Yes. 48:17, 18) Ngati wophunzila wanu okulisha cikondi cake pa Yehova, zingamuyavye kuti acinje umoyo wake nonkhala pa ushamwali na Mulungu.​—1 Yoh. 5:3.

9. Molingana na Maliko 10:29, 30, kansi wophunzila Baibo angafunike kucitanji kuti alute pasogolo nobatizika?

⁹ Kuti alute pasogolo nobatizika, wophunzila Baibo ofunika kuzitana zinthu ziyakine. Molingana na munthu wolemela wamene Yesu emuuzhya kuti akagulise vinthu vake, ophunzila Baibo ayakine angafunike kuleka nchito yamene yukatizhyana lini na mfundo za m’Baibo. Ayakine angafunike kuleka kukatizhyana na ayao amene okonda lini Yehova. Ndipo ayakine angakaniwe na abanja ŵao amene ozonda Mboni za Yehova. Yesu ekamba kuti cingankhale covuta kuti ayakine apange masinthidwe oteti. Koma elonjeza kuti ŵala amene angakwanishe kucita izi, akakatishiwe lini mwala. M’malo mwake, Yehova akaŵadalise mwa kuŵapasa banja yauzimu. (Ŵelengani Maliko 10:29, 30.) Kansi mungayavye tyani wophunzila wanu kuti apindule na daliso iyi?

10. Kansi mwaphunzilapo cinji pa zecilaŵila mkwasu Manuel?

¹⁰ Nkhalani pa ushamwali na wophunzila Baibo wanu. Nthawi zonse, mukocita zinthu zoonesha kuti mumukonda. Ndaŵa yanji kucita izi n’kofunika? Mkwasu Manuel wa ku Mexico efotokoza mwecimuyavyila mkwasu enzomuphunzisa Baibo. Yove eciti: “Nthawi zonse tikaliyoyamba kuphunzila, enzonikonsha za umoyo wangu. Ndipo enzonilimbikisha kuti nikonkhala womasuka kumuuzhya ciliconse. Izi zenicitisha kuona kuti enzonikonda ngako.”

11. Kansi ophunzila Baibo angapindule tyani ngati tupeza nthawi yotandala nao?

¹¹ Mukopeza nthawi yotandala na wophunzila wanu monga ni mwenzocitila Yesu na ophunzila ŵake. (Yoh. 3:22) Ngati wophunzila wanu oluta pasogolo, mungamuitile ku cakulya ku ng’anda kwanu olo kumusenga kuti mukatambile pamozi J.W Broadcasting. Angayamikile ngako ngati mungacite izi pa nthawi yakuti ayake na abanja ŵake ocita vikondwelelo vosakatizhyana na Malemba. Mkwasu Kazibwe wa ku Uganda elaŵila kuti: “Kuyangizhyila pa phunzilo ya Baibo, nuona kuti kutandala na mkwasu enzoniphunzisa Baibo kweniyavya kuti niziŵe zinthu zinyinji ziyakine. Kwenicitisha kuona cimwemwe caali naco atumiki a Mulungu noona  kuti Yehova oŵasamalila ngako. Izi niye zenenzofuna mu umoyo wangu.”

12. Ndaŵa yanji tufunika kutolako ofalisa osiyanasiyana ku phunzilo yasu?

¹² Mukotolako ofalisa osiyanasiyana ku phunzilo yanu. Nthawi ziyakine, tingaone kuti cili bwino kuluta seka ku phunzilo olo kungotola wofalisa umozi na umozi. Koma wophunzila wasu angapindule ngako ngati tutolako ofalisa osiyanasiyana. Mkwasu Dmitrii, wa ku Moldova elaŵila kuti: “Wofalisa aliyense wamene enzowela na enzoniphunzisa Baibo, enzofotokoza mfundo m’njila yocitisha cidwi. Izi zenzoniyavya kuona njila ziyakine zaningaseŵenzeshelemo zinthu zenenzophunzila. Ndipo niliyokumvwe nsoni penepezeka pa misonkhano kwa nthawi yoyamba, cifukwa nenzoziŵako kale akwasu na azilongosi anyinji.”

13. Ndaŵa yanji tufunika kulimbikisha wophunzila Baibo kupezeka pa misonkhano?

¹³ Yavyani wophunzila Baibo kuti akopezeka pa misonkhano. Ndaŵa yanji kucita izi n’kofunika? Cifukwa Yehova ofuna kuti atumiki ŵake akosonkhana pamozi, ndipo kucita izi ni mbali ya kulambila. (Aheb. 10:24, 25) Kuyangizhyila apo, akwasu na azilongosi ni banja yasu yauzimu. Tetyo, tikapezeka pa misonkhano zunkhala monga tulyela pamozi cakulya cabwino ngako. Ngati mulimbikisha wophunzila wanu kuti akopezeka pa misonkhano, ndiye kuti mumuyavya kutola imozi mwa masitepu yangamuyavye kuti abatizike. Koma nthawi ziyakine cingankhale covuta kuti wophunzila Baibo ayambe kupezeka pa misonkhano. Kansi buku yakuti Sangalalani na Moyo Kosasila! ingamuyavye tyani kugonjesa mavuto yomukangisha kupezeka pa misonkhano?

14. Kansi tingalimbikishe tyani wophunzila Baibo kuti ayambe kupezeka pa misonkhano?

¹⁴ Seŵenzeshani mfundo zili m’mutu 10, m’buku yakuti Sangalalani na Moyo Kosasila! polimbikisha wophunzila kuti ayambe kupezeka pa misonkhano. Buku iyi ikaliyofalisiwa, ofalisa ayakine esengewa kuti aseŵenzeshe mfundo zili m’mutu 10 poyavya ophunzila ŵao. Ofalisa aŵa elaŵila kuti mfundo za m’mutu uyu zeyavya kuti ophunzila ŵao ayambe kupezeka pa misonkhano. Koma izi zutanthauza lini kuti mufunika kuyembekeza mpaka mukayambe kuphunzila mutu 10 kuti muyambe kuŵaitila. Mungafunike kucita izi mukangoyamba kuphunzila nao ndipo mukoŵaitila mowelezhyawelezhya. Ophunzila Baibo okumana na mavuto osiyanasiyana. Tetyo, mukomvwishila ngati wophunzila wanu okuuzhyani mavuto yakukumana nayo noona mwamungamuyavyile. Mufunika lini kufooka ngati akaliyoyamba kupezeka pa misonkhano olo kuti mwamuitila kwa nthawi zinyinji. M’malo mwake, mufunika kuleza mtima nopitilizhya kumuitila.

15. Ni vinthu votyani vingacitishe wophunzila Baibo kunkhala na wowa?

¹⁵ Payakine namwe mwenzocita wowa kunkhala Mboni ya Yehova pemwenze mukaliyobatizika. Payakine mwenzoona kuti mungakwanishe lini kulalikila ng’anda na ng’anda. Olo payakine mwenzoyopa kuti abanja ŵanu na ayanu angokusushani. Ngati mwenzokumvwa teti, ndiye kuti mungamvwishishe mwakumvwila wophunzila Baibo wanu. Ndipo Yesu ekamba kuti ŵanthu ayakine akonkhala na mantha oteti. Koma elimbikisha ophunzila ŵake kuti enzofunika lini kulola kuti mantha yaŵakangishe kutumikila Yehova. (Mat. 10:16, 17, 27, 28) Kansi Yesu eŵayavya tyani ophunzila ŵake kusilizhya wowa? Ndipo tingatolele tyani cisanzo cake?

16. Kansi tingalimbikishe tyani wophunzila Baibo kuti ayambe kuuzhyako ayakine zakuphunzila?

¹⁶ Mukolimbikisha wophunzila wanu kuti akouzhyako ayakine zakuphunzila. Payakine ophunzila a Yesu enze na wowa peciŵatuma kuti akalalikile. Koma Yesu eŵalimbikisha mwa kuŵauzhya kweenzofunika kulalikila na zeenzofunika kulaŵila. (Mat. 10:5-7) Kansi mungatolele tyani cisanzo ca Yesu? Mukoyavya wophunzila wanu  kuziŵa ŵanthu ŵangalalikile. Mwacisanzo, mungamukonshe ngati oziŵako aliyense wamene angapindule na mfundo iyakine ya m’Baibo. Pavuli pake, muyavyeni kukonzekela zati akakambe mwa kumuonesha cisanzo coonesha mwangacitile. Ngati n’zokwanishika, mungamuyavye kukonzekela poseŵenzesha mbali yakuti “Ŵanthu Ayakine Okamba Kuti” na yakuti “Ŵanthu Ayakine Angakonshe Kuti” yopezeka m’buku yakuti Sangalalani na Moyo Kosasila! Pocita izi, mufunika soti kumuonesha mwangaseŵenzeshele Baibo popeleka mayankho yosavuta.

17. Kansi tingaseŵenzeshe tyani Mateyu 10:19, 20, 29-31 poyavya wophunzila wasu kuti akodalila Yehova?

¹⁷ Yavyani wophunzila wanu kuti akodalila Yehova. Yesu euzhya ophunzila ŵake kuti Yehova enze wokonzeka kuŵayavya nthawi zonse cifukwa enzoŵakonda. (Ŵelengani Mateyu 10:19, 20, 29-31.) Namwe, mukosimikizhyila wophunzila wanu kuti Yehova akomuyavya nthawi zonse. Mungamuyavye kuti akodalila Yehova mwa kupemphela naye pamozi notomola zolinga zake m’pemphelo. Mkwasu Franciszek wa ku Poland elaŵila kuti, “Mkwasu wamene enzoniphunzisa Baibo enzotomola zolinga zangu m’mapemphelo ŵake. Peneona kuti Yehova enzoyankha mapemphelo ŵake, nane neyamba kupemphela. Nenzoona kuti Yehova enzoniyavya nikafuna kusenga abosi kuti anipase nthawi yakuyopezeka pa misonkhano.”

18. Kansi Yehova akumvwa tyani na nchito yakucita ofalisa?

¹⁸ Yehova oŵakonda ngako ophunzila Baibo ŵasu. Ndipo oyamikila khama yakucita ofalisa poyavya ŵanthu kuvwendela pafupi na yove. Izi zucitisha kuti akoŵakonda ngako soti. (Yes. 52:7) Ngati pali lomba muliye phunzilo ya Baibo, mungayavye mphela ophunzila Baibo kuluta pasogolo nobatizika mwa kuzipeleka kuluta na ofalisa ayakine ku maphunzilo ŵao.