1. Ke’ng seo barutiwa ba Jesu ba ilego ba se botša lešaba?

KA LETŠATŠI le lengwe banna le basadi ba bantši ba be ba bokane kua Jerusalema. Ba be ba etšwa dinageng tše di fapafapanego e bile ba bolela maleme a go se swane. Selo se sengwe sa go makatša se ile sa direga letšatšing leo. Bajuda ba bangwe ba ile ba thoma go kgona go bolela maleme a batho bao ba bego ba etetše moo Jerusalema! Seo se ile sa makatša batho bao, eupša seo se ilego sa ba makatša le go feta ke dilo tšeo Bajuda bao ba bego ba ba botša tšona, le seo moapostola Petro a ilego a ba botša sona. Batho bao ba ile ba ithuta gore ba swanetše go ba le tumelo go Jesu Kriste e le gore ba tle ba phologe. Molaetša woo o ile wa kgoma dipelo tša bona kudu moo ba ilego ba botšiša gore: “Re dire’ng”? Petro o ile a ba araba ka gore: “Yo mongwe le yo mongwe a kolobetšwe.”—Dit. 2:37, 38.

2. Re tlo ithuta’ng sehlogong se? (Bona seswantšho sa letlakala la ka ntle.)

² Seo se ilego sa direga ka morago ga moo se be se tloga se makatša. Letšatšing leo batho ba e ka bago ba 3 000 ba ile ba kolobetšwa gomme ya ba barutiwa ba Jesu. Tiragalo ye e be e le mathomomayo a modiro o mogolo wo Jesu a o neilego balatedi ba gagwe wa go dira batho barutiwa. Le lehono re sa dira modiro woo. Eupša re ka se kgone go thuša motho gore a kolobetšwe ka go no bolela le yena ka diiri tše sego kae feela. Go ka tšea dikgwedi, ngwaga goba go feta moo gore motho yo re ithutago le yena a feleletše a kolobeditšwe. Ge e ba o ithuta Beibele le motho yo a itšego, o a tseba gore go nyakega gore o šome ka thata go mo thuša gore mafelelong a tle a kolobetšwe. Sehlogong se re tlo ithuta gore o ka dira eng go thuša morutwana gore mafelelong a kolobetšwe.

3. Go ya ka Mateo 28:19, 20, ke eng seo morutwana a swanetšego go se dira gore mafelelong a kolobetšwe?

³ Pele morutwana a ka kolobetšwa, o swanetše go diriša seo a ithutago sona. (Bala Mateo 28:19, 20.) Ge e ba morutwana a diriša seo a ithutago sona, o swana le monna wa temogo yo Jesu a boletšego ka yena papišong ya gagwe gore o aga ntlo ya gagwe godimo ga leswika. (Mat. 7:24, 25; Luka 6:47, 48) Re ka thuša bjang motho yo re ithutago le yena Beibele gore a diriše seo a ithutago sona? A re boneng dilo tše tharo tšeo re ka di dirago.

4. Re ka thuša bjang motho yo re ithutago le yena go šoma ka thata gore mafelelong a kolobetšwe? (Bona le lepokisi leo le rego, “ Thuša Morutwana go Ipeela Dilo Tšeo a Nyakago go di Dira le Gore a di Fihlelele.”)

⁴ Thuša morutwana go ipeela dilo tšeo a nyakago go di dira. Ke ka baka la’ng o swanetše go dira seo? Ka mohlala, a re re o tšea leeto la go ya kgole, gomme ge o le tseleng o fela o khutša mafelong ao a kgahlišago. Ge o dira seo o ka se bone mo o yago e le kgole. Ka mo go swanago, ge e ba morutwana a ka ipeela dilo tšeo a nyakago go di fihlelela ka nako e kopana gomme a kgona go di fihlelela, o tlo bona le gore a ka kgona le go kolobetšwa. Diriša karolo ya “Seo o ka se dirago” ka pukung ya O ka Thabela Bophelo go ya go Ile! go thuša morutwana gore a dire tšwelopele. Mafelelong a thuto e nngwe le e nngwe, boledišana le morutwana wa gago gore seo a nyakago go se fihlelela se ka mo thuša bjang go diriša seo a sa tšwago go ithuta sona. Ge e ba go na le seo o nyakago gore morutwana a se fihlelele, se ngwale karolong yeo e rego “Dilo tše dingwe.” Dula o diriša karolo ye go boledišana le morutwana wa gago go mmontšha dilo tšeo a ka kgonago go di fihlelela kapela le tšeo a ka tšeago nako e telele gore a di fihlelele.

5. Go ya ka Mareka 10:17-22, Jesu o ile a botša monna wa mohumi gore a dire eng, gona ka baka la’ng?

⁵ Thuša morutwana go dira diphetogo. (Bala Mareka 10:17-22.) Jesu o be a tseba gore go be go ka se be bonolo gore monna wa mohumi yoo  a bego a bolela le yena a rekiše dilo ka moka tšeo a bego a na le tšona. (Mar. 10:23) Eupša Jesu o ile a no botša monna yoo gore a di rekiše. Ka baka la’ng? Ka gobane Jesu o be a rata monna yoo. Ka dinako tše dingwe re ka no se kgothaletše bao re ithutago le bona gore ba diriše seo ba ithutago sona ka gobane re nagana gore e sa le kapela gore ba ka dira diphetogo. Go ka tšea nako gore batho ba fetoše maphelo a bona. (Bakol. 3:9, 10) Eupša ge o ka thoma go boledišana kapejana le motho yoo o ithutago le yena ka diphetogo tšeo a swanetšego go di dira, le yena o tla thoma go dira diphetogo. Ge o boledišana le yena ka dilo tšeo ka moka o tla be o bontšha gore o na le taba le yena.—Ps. 141:5; Die. 27:17.

6. Ke ka baka la’ng re swanetše go botšiša morutwana gore o nagana eng?

⁶ Go bohlokwa gore o botšiše morutwana gore o nagana eng ka taba yeo le boledišanago ka yona. Se se tla go thuša go tseba seo morutwana a se kwešišago le seo a se dumelago. Ge e ba o dira se ka mehla, se se tla go thuša gore o boledišane le morutwana ka dilo tšeo go sego bonolo gore a di amogele. Puku ya O ka Thabela Bophelo go ya go Ile! e na le dipotšišo tše dintši tšeo di nyakago gore morutwana a bolele gore o nagana eng. Ka mohlala, thuto 04 e na le potšišo yeo e rego: “O nagana gore Jehofa yena o ikwa bjang ge re mmitša ka leina la gagwe?” Thuto 09 yona e na le potšišo yeo e rego: “Ke dilo dife tše dingwe tšeo wena o ka ratago go di rapelela?” Mathomong go ka no se be bonolo gore morutwana a arabe dipotšišo tša mohuta wo. O ka mmontšha gore a ka hlalosa bjang mangwalo le diswantšho tšeo di lego ka pukung ye.

7. Re ka diriša bjang mehlala ya ba bangwe go thuša morutwana?

⁷ Ka morago ga gore morutwana a kwešiše seo a swanetšego go se dira, diriša mehlala ya ba bangwe go mo kgothaletša gore a diriše seo a ithutago sona. Ka mohlala, ge e ba morutwana a sa tle dibokeng ka mehla, o ka mmontšha bidio yeo e rego Jehofa o be a Dutše a Ntlhokometše karolong yeo e rego “O ithutile eng” go thuto 14. O tla hwetša diphihlelo tša go swana le ye ka pukung ya O ka Thabela Bophelo go ya go Ile! karolong yeo e rego “Ithute ka mo go Tseneletšego” goba ya “O Ithutile Eng.” * O hlokomele gore o se ke wa swantšha morutwana le motho yo mongwe ka go mmotša gore, “ge e ba motho yoo a kgonne le wena o ka kgona.” Tlogela morutwana gore a fihlelele phetho ka boyena. Boledišana le yena ka seo se thušitšego motho wa mo bidiong go diriša seo a ithutilego sona. Mohlomongwe o ka bolela ka lengwalo goba ka seo motho yoo a se dirilego. Neng le neng ge go kgonega, hlalosa kamoo Jehofa a ilego a thuša motho yoo.

8. O ka thuša bjang morutwana gore a rate Jehofa?

⁸ Thuša morutwana gore a rate Jehofa. O ka mo thuša bjang? Mo rute ka dika tša Jehofa gomme o mo thuše go bona gore Jehofa ke Modimo yo a thabilego, e bile o hlokomela bao ba mo ratago. (1 Tim. 1:11; Baheb. 11:6) Bontšha morutwana gore o tlo holega ge a ka diriša seo a ithutago sona le gore ye ke tsela ya Jehofa ya go mmontšha gore o a mo rata. (Jes. 48:17, 18) Ge morutwana a dutše a tiiša segwera sa gagwe le Jehofa, seo se tla dira gore a dire diphetogo bophelong bja gagwe.—1 Joh. 5:3.

9. Go ya ka Mareka 10:29, 30, o ka dira’ng go thuša morutwana gore a tlogele dilo tše dingwe e le gore mafelelong a kolobetšwe?

⁹ Morutwana o swanetše go tlogela dilo tše itšego gore mafelelong a kolobetšwe. Go swana le monna wa mohumi yoo re boletšego ka yena  pejana, barutwana ba bangwe ba swanetše go ikemišetša go tlogela dilo tše itšego. Ge e ba ba šoma mošomo woo o sa dumelelanego le melao ya motheo ya Beibele, ba ka swanelwa ke go o tlogela. Ba bangwe ba ka swanelwa ke go tlogela bagwera ba bona bao ba sa ratego Jehofa. Jesu o be a tseba gore go be go ka se be bonolo gore ba bangwe ba kgone go tlogela dilo tše e le gore ba mo latele. Ba bangwe bao ba gabo bona ba sa ratego Dihlatse tša Jehofa, ba ka no se sa ba amogela. Eupša Jesu o ile a tshepiša gore batho ka moka bao ba mo latelago ba ka se itshole. Jehofa o tla ba šegofatša ka go ba nea lapa leo le ba ratago kudu. (Bala Mareka 10:29, 30.) O ka thuša bjang morutwana gore e tle e be karolo ya lapa leo?

10. O ithuta’ng go seo Manuel a se boletšego?

¹⁰ Gwerana le motho yoo o ithutago le yena Beibele. Go bohlokwa gore o bontšhe morutwana gore o tloga o na le taba le yena. Ka baka la’ng? Ekwa seo Manuel yo a dulago kua Mexico a se boletšego. Ge a be a gopola nako ya ge a be a sa ithuta Beibele o re: “Nako e nngwe le e nngwe pele re ka ithuta, motho yoo ke bego ke ithuta le yena o be a mpotšiša gore bophelo bo ya bjang. O ile a nthuša gore ke ikwe ke lokologile gomme ke kgone go mmotša se sengwe le se sengwe. Ke ile ka kgona go bona gore o tloga a na le taba le nna.”

11. Barutwana ba ka holega bjang ge ba fetša nako le rena?

¹¹ Fetša nako le barutwana go swana le ge Jesu a ile a fetša nako le balatedi ba gagwe. (Joh. 3:22) Ge e ba go kgonega o ka mema morutwana yo a tšwelago pele gabotse go tlo nwa teye le wena, go ja dijo goba go lebelela a mangwe a mananeo a kgwedi le kgwedi. Morutwana a ka thabela gore o mo meme nakong ya maikhutšo ka ge a tla be a lewa ke bodutu. Kazibwe yo a dulago Uganda o re: “Ke nagana gore go fetša nako e ntši ke na le morutiši wa ka go nthušitše gore ke ithute mo gontši ka Jehofa go no swana le ge re be re swere thuto. Ke ile ka bona kamoo Jehofa a hlokomelago bahlanka ba gagwe le kamoo ba thabilego ka gona. Se ke seo ke bego ke se nyaka bophelong.”

12. Ke ka baka la’ng re swanetše go ya le bagoeledi ba bangwe ge re yo ithuta Beibele le morutwana?

 ¹² Mema bagoeledi ba bangwe ge o yo ithuta le morutwana. Ka dinako tše dingwe re ka bona go le bonolo gore ge re yo ithuta le morutwana re sepele re nnoši goba re sepele le motho yoo re tlwaetšego go sepela le yena. Le ge e ba re ka hwetša go le bonolo go dira bjalo, eupša morutwana a ka holega kudu ge ka dinako tše dingwe re ka tla le bagoeledi ba bangwe. Dmitrii yo a dulago kua Moldova o re: “Mogoeledi yo mongwe le yo mongwe yoo a bego a etla le motho yoo a bego a nthuta Beibele, o be a na le tsela ya gagwe ya go hlalosa dilo. Seo se ile sa nthuša gore ke bone ditsela tše dingwe tšeo nka dirišago seo ke ithutago sona. Le gona ke be ke se ka tšhoga ge ke be ke eya dibokeng la mathomo, ka gobane ke be ke šetše ke kopane le bana babo rena le dikgaetšedi ba bantši.”

13. Ke ka baka la’ng re swanetše go thuša motho yo re ithutago le yena gore a tle dibokeng?

¹³ Thuša motho yo o ithutago le yena gore a tle dibokeng. Ka baka la’ng? Ka gobane Jehofa o laetše bahlanka ba gagwe gore ba bokane gotee ka ge seo e le se sengwe sa dilo tšeo re swanetšego go di dira gore re mo hlankele. (Baheb. 10:24, 25) Le gona bana babo rena le dikgaetšedi ka phuthegong ba no swana le batho ba gabo rena. Ge re na le bona dibokeng, go no swana le ge re dutše le batho ba gabo rena ka gae re eja dijo le bona. Ge o thuša motho yo o balago le yena go tla dibokeng, o mo thuša go dira selo sa bohlokwa kudu seo se tlago go dira gore mafelelong a kolobetšwe. Eupša go ka se be bonolo gore a thome go tla dibokeng. Puku ya O ka Thabela Bophelo go ya go Ile! e ka thuša bjang morutwana go rarolla bothata le ge e le bofe bjo bo mo thibelago go tla dibokeng?

14. O ka kgothaletša bjang barutwana go tla dibokeng?

¹⁴ Diriša thuto 10 ka pukung ya O ka Thabela Bophelo go ya go Ile! go kgothaletša morutwana go tla dibokeng. Pele puku ye e ka lokollwa, mokgatlo o ile wa kgopela bagoeledi ba bangwe go ithuta thuto 10 le barutwana ba bona. Ba re e ile ya ba thuša go kgothaletša barutwana go tla dibokeng. Eupša o se ke wa emela go ithuta thuto 10 le morutwana pele o ka mo mema gore a tle dibokeng. O ka dira seo kapelapela e bile o dule o mo gopotša gore a tle dibokeng. Barutwana ba na le mathata a go se swane. Tseba dilo tšeo morutwana a di hlokago e le gore o kgone go mo thuša. O se ke wa fela matla ge go tšea nako gore a tle dibokeng. Le gona o se ke wa fela pelo, eupša tšwela pele o mo mema gore a tle dibokeng.

15. Ke’ng seo se ka dirago gore barutwana ba tšhoge?

¹⁵ Na o sa gopola letšhogonyana le o kilego wa ba le lona pele o ka ba yo mongwe wa Dihlatse tša Jehofa? Mohlomongwe o ile wa ikwa okare o ka se kgone go ruta batho Beibele ka magaeng a bona. Goba mohlomongwe o ile wa tšhošwa ke gore bagwera ba gago goba ba geno ba ka go ganetša. Ge e ba o kile wa ikwa bjalo, o ka kgona go kwešiša kamoo morutwana a ikwago ka gona. Jesu le yena o ile a bolela gore ba bangwe ba tlo tšhoga. Eupša o ile a laela balatedi ba gagwe gore ba se dumelele letšhogo le ba dira gore ba se ke ba hlankela Jehofa. (Mat. 10:16, 17, 27, 28) Jesu o ile a thuša balatedi ba gagwe bjang gore ba se ke ba tšhoga, gona o ka mo ekiša bjang?

16. O ka thuša bjang morutwana go botša ba bangwe seo a ithutago sona?

¹⁶ Ganyenyane-ganyenyane tlwaetša morutwana go botša ba bangwe seo a ithutago sona. Barutiwa ba Jesu ba ka ba ba ile ba tšhoga ge a be a ba laela gore ba ye go ruta ba bangwe ditaba tše dibotse. Eupša Jesu o ile a ba thuša ka go ba botša gore ba ye ba bolele ditaba tšeo kae le gore ba bolele ka eng. (Mat. 10:5-7) O ka ekiša Jesu bjang? Thuša morutwana go bona gore a  ka botša bomang ditaba tše dibotse. Ka mohlala, mmotšiše ge e ba a tseba motho yo a ka holwago ke go ithuta se sengwe ka Beibeleng. Mo thuše go lokišeletša molaetša o mo kopana wo a ka kgonago go o botša ba bangwe. Ge e ba go kgonega, diriša karolo ye e rego “Batho ba Bangwe ba re” le yeo e rego “Motho yo Mongwe a ka go Botšiša Gore,” ka pukung ya O ka Thabela Bophelo go ya go Ile! Ge o mo thuša, fetša nako e ntši o diriša Beibele go mo araba ka tsela e bonolo le e kwagalago.

17. Re ka diriša bjang Mateo 10:19, 20, 29-31 ge re thuša morutwana gore a tshepe Jehofa?

¹⁷ Thuša morutwana gore a tshepe Jehofa. Jesu o ile a botša barutiwa ba gagwe gore Jehofa o be a tlo ba thuša ka gobane o a ba rata. (Bala Mateo 10:19, 20, 29-31.) Gopotša morutwana gore le yena Jehofa o tlo mo thuša. O ka mo thuša gore a tshepe Jehofa ka gore o rapele le yena gomme o botše Jehofa ka dilo tšeo a nyakago go di fihlelela. Franciszek yo a dulago kua Poland o re: “Motho yo a bego a nthuta Beibele gantši o be a bolela dilo tšeo ke nyakago go di dira ge a rapela. Ge ke bona kamoo Jehofa a bego a araba dithapelo tša motho yoo, le nna ke ile ka thoma go rapela. Ke ile ka bona kamoo Jehofa a ilego a nthuša ka gona ge ke be ke kgopela matšatši a go ya dibokeng le kopanong ya selete mošomong woo ke bego ke sa tšwa go o hwetša.”

18. Jehofa o ikwa bjang ka modiro wa go dira batho barutiwa?

¹⁸ Jehofa o rata barutwana ba Beibele kudu. O rata le Bakriste e bile o tseba kamoo ba šomago ka thata go thuša batho gore e be bagwera ba gagwe. (Jes. 52:7) Ge e ba ga bjale o se na motho yo o ithutago le yena Beibele, o ka kgona go thuša barutwana ba Beibele gore mafelelong ba kolobetšwe. O ka dira seo ka gore o sepele le bagoeledi ba bangwe ge ba yo ithuta le barutwana bao.