1. Mogoba wo mogolo wa ku botala ba wo butsiye gore wo make ying?

KE MO go hlekeletsanne banna le basadi ba go tšwa dinageng tsa go tlala ba gore fote ba bolabola mebolabolo ya mehlobohlobo. Go makegiye selo se sengwana sa go makatsa ka letšatši lone. Di f’lo makega gore Majuda ya mangwana ma kgone go bolabola mebolabolo ya batho bo ne ba vakašiye! Tsotsone di makatsiye mogoba, mara tso Majuda yane ma ba butsiyeng tsona le tso Petro wa lepostola a ba butsiyeng tsona ke mo di makatsa ka matla. Gana hone ke mo go kena le taba ya gore ba ko phona mo ba ka dumela ga Jeso Kreste. Molayetsa wone wo tikisiye dipelo tsa batho bone ka matla. Ka mokgo di ba tikisiyeng ka matla ka gona, ba yye ba šinya ba butsisa gore: “Re make ying?” Petro mo a ba fetola a re: “Ye mongwana le ye mongwana wa lune a kolobetsiwe.”—Meber. 2:37, 38.

2. Re nyoko bolabola ka ying ga hlogotaba yowa? (Lebelela sethombhe sa ka tawong.)

² Tso di makegiyeng ka nthago ga mone ke mo di sa hlayisege. Ka letšatši lone go yye gwa kolobetsiwa gana hala ga 3 000 ya batho ke mokane ba ba malata ya Kreste. Ke mo go thomisa mmereko wo mogolo wa go maka batho gore go be malata wo Jeso a wo neyyeng bo ba mo latelelang. Bo ba mo latelelang ba sa na ba maka mmereko wone le lekgono. Lekgono re ka sa fo bolabola le motho ka diawaranyana ke mokane ra re o šele a lukiye gore a ka kolobetsiwa. Di ka fo tseya dikgwedi kela mongwaga kela go feta hone gore motho yene a feleletse a kolobetsiwa. Mo nkare le wene o naye motho ye o balang naye Bhayibele, o di tšiba gabutši gore o ka šinya o ro bhahla o kene o karakara gore o mo gelepe go ba lelata la Kreste. Ga hlogotaba yowa, re nyoko bolabola ka tso o ka di makang gore o gelepe ye o tšhutang naye Bhayibele gore a be lelata la go kolobetsiwa.

3. Matewu 28:19, 20 yi re king so ye re tšhutang naye a ka se makang gore a feleletse a kolobetsiwa?

³ Mo motho ye o balang naye Bhayibele a soko kolobetsiwa, di nyaka a thomise ka go berekisa tso Bhayibele yi di tšhutisang. (Bala Matewu 28:19, 20.) Mo ye re balang naye a berekisa tso a di tšhutang, o nyoko tshwana le “motho wa go hlalefa” yela Jeso a yyeng a beyisa ka yene, wa gore o yepiye mokoti wa go yisa gore a yage ntlo yage gedimo ga letlapa. (Mat. 7:24, 25; Luk. 6:47, 48) Re ka mo gelepa byang ye re tšhutang naye gore a berekise tso a di tšhutang? Tla re boneneng dilo ka ditharo tso re ka di makang.

4. Mo ye o tšhutang naye a thomisa go phiphila, o ka mo gelepa byang gore a šinye a ba gabutši gore a kolobetsiwe? (Lebelela le lebhokisi la gore “ Gelepa ye o Tšhutang Naye Gore a be le Tso a Nyakang go di Segelela Fote a di Make.”)

⁴ Gelepa ye o tšhutang naye gore a be le tso a nyakang go di segelela. Ke ntaba? Tla re beyise ka taba ke yowa: Mo nkare o nyoko rwalagana o ya kayekaye, mong takataka, o ka tipotsa gore o nyoko tsama o yema ho pateng gore o bone dilo tsa go jabodisa. Mo o kene o tsama o yema, wa lebala le gore mo o yang a yi howa. Byalo, le mo ye o tšhutang naye Bhayibele a maka letheto la dilo tsa gore a ka yakgoswa a di segelela fote a di maka, le yene o ko di boneng gore aa sa le kgole le go kolobetsiwa. Berekisa lebhokisi la gore “Maka Tsowa ša” hala ga puku ya gore Tikwise ka Lephelo go ya go Yye! gore o gelepe ye o tšhutang naye gore a be le tso a nyakang go di segelela. Mo le fetsa go bala, bolabolaneng ka gore tso a nyakang go di segelela di yelana byang le tso a di tšhutiyeng. Mo nkare go na le so o nyakang ye o tšhutang naye a se segelela, se ngwale hala ga gore ba ngwadiye gore “Tse Dingwana.” Dulaneng le berekisa tso le di ngwadiyeng go bona gore di gona tso a ka kgonang go di segelela go se botala kela mo nako yi kene yi ya.

5. Mareka 10:17-22 yi re Jeso o yitseri king ga monna yela wa nghamula, fote ke ntaba a hlayye tsotsone?

 ⁵ Gelepa ye o tšhutang naye gore a tšhentšhe maphelelo yage. (Bala Mareka 10:17-22.) Jeso ke mo a di tšiba gore di ka sa be lula gore monna yela wa nghamula a rekise dilo tsage ka mokana ga tsona. (Mar. 10:23) Mara, Jeso o yye a fo mmotsa go na go le ka mokgonone gore a tšhentšhe ka mokgo ne a tseya dilo ka gona. Ke ntaba? Ka taba la gore Jeso ke mo a mo nyaka ka matla. Ka dinako tse dingwana, re ka fo kwa re tšeba go botsa ye re balang naye gore a berekise tso a di tšhutang ka taba la gore re bona nkare a ka sa tšhentšhi gana byalo. Di ka fo tseya nako gore batho ba lisetse mekgwa ya botala ke mokane ba be le mekgwa ya nyuwane. (Makol. 3:9, 10) Mo o ka fo yakgoswa o yatlala taba yone gore le petapete ka yona, le yene o nyoko yakgoswa a di bona mo a tshwaneleng a potolle gona. Mo o maka gore le bolabole ka taba yone, o ko ba o sa fo mo lisetsa o kene o mmona gore mollo wa mo tšhuba.—Pis. 141:5; Diy. 27:17.

6. Ke ntaba di nyaka o butsise ye o tšhutang naye gore o nagana ying?

⁶ Di gabutši ka matla gore o butsise ye o tšhutang naye gore yene o nagana ying ka taba yo le tšhutang ka yona ka nako yone. Tsotsone di nyoko go yedisela gore ye o tšhutang naye o kwisisa ditaba go segela kaye le gore ke difeng tsa gore wa di tshepa. Mo o dulela go maka tsotsone, go nyoko fefoga ku mahlong go bolabola naye ka ditaba tsa nkare di ya roba go bolabola ka tsona. Puku ya gore Tikwise ka Lephelo go ya go Yye! yi na le diputsiso tsa go tlala tsa gore di nyaka motho a hlaye so a se naganang. Mo re beyisa, setšhuto 04 se na le putsiso ya gore: “O bona nkare Jehova yene o tikwa byang mo o berekisa lebitso lage?” Setšhuto 09 se na le putsiso ya gore: “Ke difeng dilo tsa gore wene o nabela go rapela ka tsona?” Mathomisong, o ka kraya ye o tšhutang naye a tseya nako go fetola diputsiso tsowa. O ka mo gelepa gore a berekise mangwalo le dithombhe mo a bolabola tso a di naganang.

7. Re ka maka byang gore tso di makegeleng ba bangwana di re berekele?

⁷ Mo ye o tšhutang naye a šele a kwisisa tso a tshwaneleng go di maka, mo hlohletsele gore a di make ka go berekisa tso di makegeleng ba bangwana. Mo re beyisa, mo nkare ye o tšhutang naye di ya mo thathafela go ya megahlanong, o ka mo šupetsa vidiyo ya gore Jehova o Mpasopiye wa Tšiba ya gore yi nyarela ga “Nyakela” ga setšhuto 14. Ga ditšhuto tsa go tlala tsa puku yowa ya gore Tikwise ka Lephelo go ya go Yye! o nyoko kraya tso di makegeleng ba bangwana ga “Kenelela” kela ga “Nyakela.” * O pasope o sa kraye o tshwanisa ye o tšhutang naye le motho ye mongwana wa kraya o šele o mmotsa gore, “Mo yewa a di kgona, le wene o ka di kgona.” Lisetsa ye o tšhutang naye a timakele sepheto sone. Mara mmotse gore motho ye a leng mone vidiyong o gelepiye king gore a berekise tso Bhayibele yi di tšhutisang. Nakwenngwana o ka mo šupetsa lengwalo kela selo se sengwana sa gore motho yene o se makiye. Mo di kgonega, šihlela gore Jehova o mo gelepiye byang ga motho yene.

8. Re ka mo gelepa byang ye re tšhutang naye gore a šupetse gore ga Jehova o mo nyaka ka matla?

⁸ Gelepa ye o tšhutang naye gore a šupetse gore ga Jehova o mo nyaka ka matla. Byang? Nyakana le mašuba ya go mo šupetsa gore Jehova ke motho wa mošaga mang. Mo gelepe gore a di bone gore Jehova ke Modimo wa gore o jabodiye fote o pasopa bo ba mo nyakang. (1 Thim. 1:11; Maheb. 11:6) Šupetsa ye o tšhutang naye gore di nyoko mmerekela mo a berekisa tso a di tšhutang, fote o mo hlatollele gore dilo tsowa di fo šupetsa gore Jehova o mo nyaka ka matla. (Jes. 48:17, 18) Mo ye o tšhutang naye a kene a ya mahlong a šupetsa gore ga Jehova o mo nyaka ka  matla, tsotsone di nyoko mo tšhofa gore a ghobolle ga nkare go kekemme.—1 Joh. 5:3.

9. Mareka 10:29, 30 yi re king so se ka gelepang motho gore a tikone tse dingwana mo a nyaka go ba lelata la gore le kolobetsiwwe?

⁹ Ye o tšhutang naye Bhayibele di nyaka a tikone tse dingwana gore a thogo kolobetsiwa. Ba bangwana di ka fo nyaka gore ba tikone dilo tsa mabešebeše go fo tshwana le monna yela re bolabodiyeng ka yene wa nghamula. Mo nkare mmereko wa go tipasopa wo ba wo makang a wo yelane le ditšhiko tsa Bhayibele, di ka fo nyaka gore ba kraye wo mongwana. Di ka fo nyaka gore ba go tlala ba lisetse banghana ba bona ba gore ga Jehova a ba mo nyake. Ba bangwana ba ka jikela ke mašaga ya bona ya gore ma nyenya Dihlatse tsa Jehova. Jeso o hlayye gore di ka fo sa be lula gore ba bangwana ba tikone dilo tse dingwana. Mara o bolabodiye gore bo ba gore baa mo latelela ba ka sa šale ba tšebiye. Jehova o nyoko ba rufa ba šala ba bafele, o nyoko maka gore ba be ga mutši wa gore wo ba nyaka ka matla. (Bala Mareka 10:29, 30.) O ka maka byang gore o gelepe ye o tšhutang naye Bhayibele gore le yene dilo tsowa di thogo mmerekela?

10. O tšhuta ying ga tso di makegeleng Manuel?

¹⁰ Nghanelana le ye o tšhutang naye. Di gabutši ka matla gore o šupetse ye o tšhutang naye gore o mo tseyela gedimo. Ke ntaba? Bona so se hlayyeng ke Manuel wa gore o dula Mexico. Mo a gopola nakwela ba sa mo tšhutisa Bhayibele o re: “Thitšere yaka ke mo yi mputsisa gore ke tsugiye byang mo re soko thomisa go bala. O n’gelepiye gore ke sa tšhoge fote ke sa tšhabe go mmotsa ka dilo tse dingwana. Ne ke di bona gore wa tihlupa ka nna.”

11. Mo re fokatsa le bo re tšhutang nabo, tsotsone di ka ba thuša ka ying?

¹¹ Fokatsa le bo o ba tšhutisang Bhayibele go fo tshwana le mo Jeso a yye a fokatsa le bo ba mo latelelang. (Joh. 3:22) Mo nkare ye o tšhutang naye Bhayibele o šupetsa nkare wa phiphila, o ka mmitsa mo go kgonega, gore a tle mo o dulang gona le tinwele namuneti kela le je ggoši kela le lebelele letheto le lengwana la setiši sa JW. Ye o tšhutang naye a ka jabola ka matla mo o mo mema ka diholidheyi mo a kwa budutu. Kazibwe  wa gore o dula Uganda o re, “Nakwela thitšere yaka a fokatsa le nna, ke nagana gore ke tšhutiye tsa go tlala gage go tshwana le mo re tšhuta Bhayibele. Ke di bonne gore batho ba Jehova ba jabodiye, fote wa ba pasopa. Ke tso ne ke di nyaka.”

12. Ke ntaba re tshwanele re ye le magageru ya mohlobohlobo mo re ye bala le ye re tšhutang naye Bhayibele?

¹² Ariye le magageru ya mohlobohlobo mo o ye bala le ye o tšhutang naye Bhayibele. Ka dinako tse dingwana, o ka kraya re fo tiyela re ntoši kela re fo kitela le motho yenela mo re ye bala le ye re tšhutang naye. Di ka fo šupa di le lula go maka ka mokgonone mara di nyoko gelepa ye re tšhutang naye Bhayibele mo re ya le magageru ya mohlobohlobo. Dmitrii wa gore o dula Moldova o re, “Batšhomayedi ba gore ne ba tla le ye a tšhutang le nna ke mo ba hlatolla dilo ka mokgwa wa go sa tshwane. Tsotsone di n’gelepiye go bona gore king tso nka di makang gore ke thogo berekisa tso ke di tšhutang. Fote ne ke sa sa na dihlong mo ke ya mogahlanong la mathomo ka taba la gore ne ke šele ke tšiba magageru ya go tlala.”

13. Ke ntaba di nyaka o gelepe ye o balang naye gore a ye megahlanong ya phutego?

¹³ Gelepa ye o balang naye gore a ye megahlanong ya phutego. Ke ntaba? Ka taba la gore Jehova o nyaka gore bo ba mo rapelang ba gahlane ggoši; tsotsone di sipidisana le morapelo wa rune. (Maheb. 10:24, 25) Go tokegela gana hone, magageru ya ka phutegong re ma tseya nkare ke ba mitši kela mašaga ya rune. Mo re le nabo megahlanong ya phutego, di fo tshwana le mo nkare re gaye re ja tsa go ja tsa go natefa. Mo o gelepa ye o balang naye gore a ye megahlanong ya phutego, o mo gelepa gore a make selo se segolo sa gore se nyoko maka gore a feleletse a kolobetsiwwe. Mara di ka fo sa be lula gore a make tsotsone. Puku ya gore Tikwise ka Lephelo go ya go Yye! yi ka mo gelepa byang ye o tšhutang naye gore a thogo hlula tso di ka liketsang go mo phiriketsa mo a re o nyaka go ya megahlanong ya phutego?

14. Re ka maka byang gore re hlohletsele bo re tšhutang nabo Bhayibele gore ba ye megahlanong?

¹⁴ Berekisa setšhuto 10 sa puku ya gore Tikwise ka Lephelo go ya go Yye! gore o thogo hlohletsela ye o tšhutang naye. Mo puku yowa yi soko ntshiwa, ba yye ba kgopela batšhomayedi ba bangwana gore ba liketse setšhuto sowa, batšhomayedi bone ba yitseri se ba berekele fote se ba gelepiye ka matla. Mara ye o tšhutang naye o ka mo mema gore a tle megahlanong le mo le soko segela ga setšhuto 10. O sa diyege go mo mema fote o mo meme o sa fetsi. Bo re tšhutang nabo a ba phiriketse ke dilo tsa go tshwana. Lebelela gore ye o tšhutang naye o phiriketsa king ke mokane o liketse go mo gelepa. O sa lahle tewu mo o bona nkare aa yi kene ya go tla megahlanong. Mo lefisele pelo mara o kene o fo mo mema.

15. Bo re tšhutang nabo ba ka tshosa king?

¹⁵ Ayitsano o sa gopola nakwela o kwa pelo yowa yi fo re kikiti, o kwa o tšhaba go ba Hlatse ya Jehova? Nakwenngwana ne o bona nkare o ka sa di kgone tsa go tšhomayela. Kela ne o bona nkare mašaga yago le banghana bago ba nyoko go phigisa. Mo nkare go sone, o ka kwisisa gore ye o balang naye o tikwa byang. Jeso o hlayye gore ba bangwana ba nyoko tšhoga ka taba la dilo tsowa. Mara o butsiye bo ba mo latelelang gore go tšhoga go sa ba lisisi go berekela Jehova. (Mat. 10:16, 17, 27, 28) Jeso o makiye byang gore a thogo gelepa bo ba mo latelelang gore ba sa sa tšhoga? Fote o ka mo yekisela byang?

16. O ka mo tšhutisa byang motho ye o balang naye gore a botse ba bangwana ka tso a di tšhutang?

¹⁶ O fo ya o kene o tšhutisa ye o balang naye gore a kgone go botsa ba bangwana ka so a se dumelang. Malata ya Jeso ma ka fo ba ma yye ma tšhoga mo Jeso a ma roma gore ma ye tšhomayeleng. Mara Jeso o ma gelepiye ka go ma botsa gore ma tšhomayele kaye le gore ma bolabole ma re king. (Mat. 10:5-7) O ka mo yekisela byang ga  Jeso? Gelepa ye o tšhutang naye gore a tšibe gore a ka tšhomayela kaye. Mo re beyisa, mmutsise gore go na le ye a mo tšibang wa gore a ka gelepa ke nnete ya Bhayibele. Ke mokane o mo gelepe gore a lukiselele so a nyoko se bolabolang ka go mo šupetsa mokgwa wa gore wo lula. Mo di kgonega, le ka lukiselela le le ka babedi le berekisa tso go bolabodiwang ka tsona ga “Batho ba Bangwana ba re” le “Ye Mongwana a ka Butsisa Gore” tsa gore di krayega ga puku ya Tikwise ka Lephelo go ya go Yye! Mo le maka ka mokgonone, hlupega ka go tšhutisa ye o balang naye gore a fetole ka mokgwa wa gore wo lula a kene a berekisa Bhayibele.

17. O ka berekisa Matewu 10:19, 20, 29-31 ka mokgo mang mo o nyaka go gelepa motho ye o balang naye gore a tshepe Jehova?

¹⁷ Gelepa ye o tšhutang naye gore a tshepele ga Jehova. Jeso o butsiye malata yage gore Jehova o nyoko ma gelepa ka taba la gore O ma nyaka ka matla. (Bala Matewu 10:19, 20, 29-31.) Gopotsa ye o tšhutang naye gore le yene Jehova o nyoko mo gelepa. O ka mo gelepa gore a tshepele ga Jehova ka go rapela naye ka dilo tso a nyakang go di segelela. Franciszek wa gore o dula Poland o re, “Mo ye a ntšhutisang Bhayibele a rapela, ke mo a dula a tšhela le dilo tso re bolabodiyeng ka tsona gore ke nyaka go di segelela. Mo ke bona ka mokgo Jehova ne a fetola merapelo ya thitšere yaka, le nna ka napa ke tlwayela mokgwa wowa wa go rapela. Ke bonne ka mokgo Jehova a n’gelepiyeng ka gona nakwela ke kgopela matšatši mmerekong waka wa nyuwane gore ke kgone go ya mogahlanong wo mogolo le megahlanong ya phutego.”

18. Jehova o tikwa byang ka mmereko wo wo makang ke mathitšere ya Makreste?

¹⁸ Jehova wa tihlupa ka batho bo re balang nabo Bhayibele. O wo tseyela gedimo mmereko wa go maka gore ba bangwana ba thogo šutela thina naye wo wo makang ke mathitšere ya Makreste, fote tsotsone di maka gore a nape a ba nyaka tsa nkare ke moka. (Jes. 52:7) Mo nkare a go na motho ye o balang naye gana byalo, o ka di kgona go gelepa batho gore ba karakare gore ba thogo kolobetsiwa ka go felegetsa batšhomayedi ba bangwana mo ba ya ga batho bo ba tšhutang nabo Bhayibele.