1. First century yę́ędą́ą́ʼ áłah jizlı̨́ı̨́ʼ yę́ę haa dadoohnííł hoʼdooʼniid?

TʼÓÓ ahayóí hastóí dóó sáanii bizaad ałʼąą ádaatʼéii daʼníłtsʼą́ą́dę́ę́ʼ ahíikai. Éí bijı̨́ Jew dineʼé doo daʼííłtaʼii éí łahdę́ę́ʼ neheeskaígíí bizaad bee yádajiłtiʼ, áko ayóó átʼéhígi áhoodzaa. Ákondi yilʼaadii Peter dóó Jew dineʼé ádaanínígíí éí aláahdi átʼéii yee hadaasdzííʼ. Jesus Christ dajoodlą́ągo yisdáhizhdookah haʼníigo dazdiiztsʼą́ą́ʼ. Áłah daazlı̨́ʼígíí díí haneʼ yéigo dabidiisʼnááʼ. Éí biniinaa ndaʼídééłkid: ‘Haash dadiiʼnííł?’ Peter áháłní: “Tʼááłáʼí nootínígo baptize ádanihidiʼdoolnííł.”—Acts 2:37, 38, NW.

2. Haʼátʼíí baa nídadíitʼįįł? (Naaltsoos bikááʼdę́ʼígíí níníłʼı̨́.)

² Íídą́ą́ʼ tʼááłaʼ jı̨́ 3,000 daatsʼí jiltʼéego baptize ádahoʼdiilyaa, áko Jesus yikééʼ ndaakaii dajizlı̨́ı̨́ʼ. Jesus íhoołʼaahii ádaałeʼ nínę́ę biʼdeezhnish. Dííshjı̨́įdi tʼáá ákótʼéego biʼoonish. Kʼad éí doo tʼááłaʼ jı̨́ baptize ádahoʼdilneʼ da. Ląʼí nídíziʼ doodaiiʼ náhahgo índa íhoołʼaahii baptize ádabiʼdiilʼįįh. Nihił béédahózin, łaʼda íhoołʼaahii dooleełgo éí ayóó binaʼanishgo átʼé. Kʼad baa nídadíitʼįįłígíí éí Diyin Bizaad bee naniitinígíí bíká anéiilwoʼgo baptize ádoolníiłgo Jesus yikééʼ yigáał doo.

3. Matthew 28:19, 20 éí íhoołʼaahii haitʼéego baptism yichʼįʼ náás yigáał doo, ní?

³ Íhoołʼaahígíí tʼah doo baptize ábiʼdilnééhgóó, Diyin Bizaad binaʼnitin yikʼehgo yigáał doo. (Matthew 28:19, 20 yíníłtaʼ.) Kótʼéego éí diné hóyáanii Jesus yaa halneʼ yę́ę nahojílin doo. Jesus éí “diné hóyáanii” wóyahdę́ę́ʼ haʼíítłʼinígíí tséʼéłkáaʼgi hooghan áyiilaa, ní. (Matt. 7:24, 25; Luke 6:47, 48) Naniitinígíí yíhoołʼą́ʼígíí haitʼéego yikʼehgo hináa dooígíí bee bíká adiilwoł? Bee áká adiilwołígíí táaʼgo baa nídadíitʼįįł.

4. Íhoołʼaahii haitʼéego bíká anéiilwoʼgo baptism yichʼįʼ náás yigáał doo? (“ Nanítinígíí Yíká Atʼíinii dóó Shóyoołtʼeehgi Bee Bíká Anánílwoʼ” ałdóʼ níníłʼı̨́.)

⁴ Naniitinígíí éí yíká átʼíinii bee bíká adiilwoł. Haʼátʼíí biniyé áká adiilwoł? Kótʼéego baa nitsíníkees: Nízaadgóó chʼaa joogáałgo, tʼáá ahą́ą́h hanínájílyįhgo éí doo ayóó ánízáad da nahalin. Tʼáá ákótʼéego, íhoołʼaahii yíká átʼíinii bá bikʼíhwiilzhíishgo éí baptism tʼáá tsı̨́łígo ádooníiłgo yaa nitsékees. Naaltsoos Enjoy Life Forever! biyiʼ “Goal” (Bíká Ánítʼı̨́) choiníłʼı̨́įgo nanítinígíí náás yigáał doo. Bíhooʼaah ałtso álʼįįhgo, íhoołʼaahii éí Bíká Ánítʼı̨́ dóó yíhoołʼą́ʼígíí haitʼéego ahídéétʼiʼgi bił baa nídíítʼįįł. Bíká Ánítʼı̨́ biyaagi łahgo átʼéii íidoolííł nínízinígíí éí “Other” (Bóóltąʼígíí) biyaagi bá ádíílííł. Bíká Ánítʼı̨́ biyaagi daasdzohígíí éí nanítinígíí bił tʼáá ahą́ą́h nánółʼįįhgo baa nátʼı̨́į doo. Bíká ánítʼı̨́ łaʼ tʼáá tsı̨́łígo baa hwiilzhíísh, łaʼ éí tʼáá bił nidahalzhiish.

5. Mark 10:17-22 bikʼehgo Jesus éí diné átʼíinii haa díínííł yidííniid, éí haʼátʼíí biniyé?

⁵ Nanítinígíí beʼiinaʼ yáʼátʼéehgo yoołtʼih dooleełgi bee bíká anánílwoʼ. (Mark 10: 17-22 yíníłtaʼ.) Jesus bił bééhózin, diné atʼíinii éí bee hólóonii baa nahidoonihgi tʼáá bá nanitłʼah. (Mark 10:23) Ákótʼée ndi, hastiin łaʼ kódíínííł yidííniid. Haʼátʼíí biniyé? Jó, Jesus ayóóʼáhóʼní. Łahda éí yíhoołʼaahígíí yikʼehgo áánííł doo yíneelʼą́ą da niidzin łeh, áko yee chánah dooleeł yę́ę doo bee bichʼįʼ yéiiltiʼ da łeh. Łaʼ éí tʼáá ałkʼidą́ą́ʼ yaa ndaakai yę́ę doo tsı̨́įłgo nahjįʼ ádeileʼ da. (Col. 3:9, 10) Tʼáá tsı̨́łígo bił baa nísínítʼįįdgo éí tʼáá tsı̨́łígo beʼiinaʼ yáʼátʼéehgo íidoolííł. Kódaatʼéii bił baa nánítʼı̨́įgo éí bí baa aʼááh nínízingi yaa ákodínóozįįł.—Ps. 141:5; Prov. 27:17.

6. Díí haitʼéego baa nitsíníkees diníigo haʼátʼíí biniyé íhoołʼaahii nabídíłkid doo?

⁶ Baa íhoołʼaahígíí haitʼéego baa nitsíníkees diníigo nanítinígíí nabídíłkid. Kótʼéego naʼídíłkidgo éí yikʼiʼdiyiitįįh daatsʼí índa yoodláanii nił bééhodoozįįł. Tʼáá ahą́ą́h kótʼéego nabídíłkidgo éí yaa yistiʼ yę́ę doo bá nantłʼagóó yaa nátʼı̨́ dooleeł. Naaltsoos Enjoy Life Forever! éí naʼídíkid ląʼí dabikááʼ. Bíhooʼaah 04 kótʼéego łaʼ naʼídíkid: “Jiihóvah bízhiʼ choiníłʼı̨́įgo bił haitʼé?” Bíhooʼaah 09 naʼídíkid łaʼ kótʼé: “Haʼátʼíísh bíká sodiszin doo nínízin?” Hadoodzihgi shı̨́ı̨́ áłtsé yaa nitsékees doo. Diyin Bizaad biiʼ saad dah naazhjaaʼígíí dóó nidaʼashchʼąąʼígíí choyoołʼı̨́įgo bizaad ałkééʼ niidoonił, díí bee bíká anánílwoʼ.

7. Tʼáá aaníí áhoodzaago baa dahaneʼígíí haitʼéego bitsʼą́ą́dóó íhooʼaah?

⁷ Ádooníiłgi yikʼiʼdiitą́ągo, łaʼda tʼáá aaníí ákódzaago baa haneʼígíí bił chʼídííʼááł. Áłah néidleehgóó naagháagi bá nantłʼago, video Jehovah Cared for Me wolyéhígíí bá nidííłkił. Éí Enjoy Life Forever! bíhooʼaah 14 góneʼ “Explore” (Baa Nanítá) biyaagi chʼétʼą́. Bíhooʼaah ałkééʼ sinilígíí łaʼ “Dig Deeper” (Yéigo Naniłkaah) doodaiiʼ “Explore” biyaagi kótʼéego baa dahaneʼ. * Nanítinígíí tʼáadoo náánáłaʼ ádzaaígíí bił ahą́ą́h nináníʼniłí. “Éí kótʼéego íʼiilaa, ni ałdóʼ bííníghahgo átʼé,” tʼáadoo bidiníní. Bíniʼdii tʼáá bí yaa ákodínóozįįł. Video biiʼ baa haneʼígíí haitʼéego Diyin Bizaad binaʼnitin bíká eelwod, doodaiiʼ saad dah shijaaʼ daatsʼí bidiisnááʼ? Naʼídíłkid kódaatʼéii éí yinahjįʼ akʼiʼdidootı̨́ı̨́ł. Baa dahóoneʼígíí haitʼéego Jiihóvah bíká eelwod diníigo nabídíłkidgo éí yikʼiʼdidootı̨́ı̨́ł.

8. Íhoołʼaahii Jiihóvah ayóóʼáyóʼní dooleełgo haitʼéego bee bíká anéiilwoʼ doo?

⁸ Nanítinígíí Jiihóvah ayóóʼáyóʼní dooleełgi bee bíká anánílwoʼ. Haitʼéego? Jiihóvah yee átʼéii bił ííshjání ádanileʼ. Jiihóvah éí Diyin bił hózhóonii nilı̨́, áádóó ayóóʼádabóʼníinii yíká análwoʼ, díí yaa ákonízin doogo bee bíká anánílwoʼ. (1 Tim. 1:11, NW; Heb. 11:6) Jiihóvah ayóóʼánóʼnínígíí biniinaa díí bíhoołʼaahígíí ná yáʼátʼééh, bidiní. (Isa. 48:17, 18) Jiihóvah ayóóʼáyóʼní yileełgo éí yíneedlı̨́įgo beʼiinaʼ yáʼátʼéehgo íidoolííł.—1 John 5:3.

9. Matthew 19:29 bikʼehgo, haʼátʼíí háká adoolwołgo hwee hólóonii ninázhdidooʼááł, áádóó íhoołʼaahii baptize ályaii jidooleeł?

⁹ Íhoołʼaahii baptize ábidiʼdoolníiłgo, haʼátʼíí shı̨́ı̨́ ayóóʼáyóʼnínę́ę ninéiididooʼááł.  Diné atʼíinii baa chʼíhootʼánę́ę nahalingo, łaʼ shı̨́ı̨́ bee dahólóonii ninádeididooʼááł. Honaanish ajíłʼínígíí Diyin Bizaad bikʼehgo oodááł há nanitłʼahgo áyósingo éí naanish náánáłaʼ baa nitsíjíkees doo. Łaʼ éí hakʼis Jiihóvah doo ayóóʼádayóʼníi da, áko éí bikʼis yitsʼą́ąjįʼ dahidiikááh. Łaʼ hakʼéí Jiihóvah Yá Dahalneʼé deijoołá, éí hatsʼá hidookahgo átʼé. Jesus bił bééhózin, kótʼéego nihił hazʼą́ągo éí nihá nanitłʼah. Ákondi bikééʼ deiyíkáhígíí éí ninádeidiyiizʼánígíí doo yąąh dabíniʼ da doo, níigo yee nihoníʼą́. (Matthew 19:29 yíníłtaʼ.) Diyin kʼehgo bił haijééʼ ayóó ánoolningo nihaa yílyáii éí nanítinígíí haitʼéego yaa ákodínóozįįł?

10. Manuel baa haneʼ haʼátʼíí bitsʼą́ą́dóó bíhwiiniłʼą́ą́ʼ?

¹⁰ Nanítinígíí áhánígo bił ké ahidíʼní. Nanítinígíí nił nilı̨́įgi bił bééhózingo íínísin. Manuel, Mexicodi bighan. Íhoołʼaahii jílı̨́ yę́ędą́ą́ʼ bééjílniihgo ájíní: “Diyin Bizaad bíhooshʼaah tʼáá bítséedi, nashinitinígíí éí áníshtʼéegi yínaʼídíłkid łeh. Shíká análwoʼgo shiiʼ hááhwiildóóh, áko doo tʼą́ą́ʼ kóníshtʼée dago yáshtiʼ łeh. Nashinitinígíí éí ayóó shíneedlı̨́įgo shaa áhályą́ągo baa ákonisin.”

11. Naniitinígíí bił ahínéikahgo haitʼéego bíká adoolwoł?

¹¹ Jesus bikééʼ ndaakaii yił ahínéikah yę́ęgi átʼéego, nanítinígíí bił ahínéinitʼash. (John 3:22) Nanítinígíí éí hooghangi nihaa díínáałgo ahwééh łaʼ díídlı̨́ı̨́ł doodaiiʼ nihił adííyı̨́ı̨́ł bididííniił, doodaiiʼ nínádíziʼgo broadcast ánálʼįįhígíí nihił dínííłʼįįł bididííniił. Holidays baa halzhishgo łaʼ bił dahodikʼą́ą łeh, bí ákótʼéego éí wóshdę́ę́ʼ bidííníniidgo yaa ahééh nízin doo. Kazibwe, Ugandadę́ę́ʼ nijigháago ájíní: “Nashinitinígíí bił honishłǫ́ǫgo, Jiihóvah tʼáá ląʼígóó baa íhoołʼą́ą́ʼ. Jiihóvah bidineʼé  tʼáá íiyisíí yaa áhályą́ áádóó ayóó bił dahózhǫ́ǫgo baa ákoniizı̨́ı̨́ʼ. Ákótʼéego hinishnáa doo nisin.”

12. Haʼátʼíísh biniyé nanítinígíí bichʼįʼ náánáłaʼ bił ałnáánítʼash doo?

¹² Naʼnítingi, náánáłaʼ bił ałnáánítʼash. Tʼáá sáhí ałnáájídáahgo doodaiiʼ nahalneʼé tʼááłáʼígíí bił ałnáájítʼashgo éí doo nanitłʼah da. Ákondi, hodeeshzhiizhgóó nanítinígíí bá yáʼátʼéeh dooleełgi éí íiyisíí baa nitsíníkeesgo nidahalneʼé náánáłaʼ bił ałnáánítʼash. Dmitrii, Moldovadi bighango ání: “Íhooshʼaahgi nidahalneʼé nídaakahígíí tʼáá bí yídahoołʼą́ʼígíí yee shił dahalneʼ, éí binahjįʼ bíhooshʼaahígíí tʼáá ałtsodę́ę́ʼ néshʼı̨́ dóó baa nitséskees. Brothers dóó sisters ląʼí tʼáá íídą́ą́ʼ béédahosésįįd, áko áłah aleehgi tsʼídá áłtsé níyáago doo ayóó yánísin da.”

13. Íhoołʼaahii áłah néidleehgóó naagháa doogo haitʼéego bíká adiilwoł?

¹³ Nanítinígíí éí Jiihóvah deidósinii áłah nádleehgóó naaghá dooleełgi bee bíká anánílwoʼ. Haʼátʼíí biniyé? Jó, Jiihóvah éí dabidósinii ahínáohkah yidííniid; áko ahínéikahgo éí Jiihóvah dadíníilzin. (Heb. 10:24, 25) Brothers dóó sisters éí tʼááłáʼí bił hajííjééʼ nahalingo baa nitsídeikees. Áłah niidlı̨́įgo éí tʼáá hooghangi ahíjiikaigo daʼjiyą́ nahalin. Nanítinígíí áłah néidleehgi nádáahgo éí baptism yíká átʼı̨́įgo átʼé. Ndi tʼáá bá nanitłʼah dooleełgo átʼé. Naaltsoos Enjoy Life Forever! haitʼéego bíká adoolwołgo bá nanitłʼah yę́ę yikʼeh didoodleeł?

14. Íhoołʼaahii haitʼéego yíneedlı̨́įgo áłah néidleehgóó naaghá dooleeł?

¹⁴ Naaltsoos Enjoy Life Forever! bíhooʼaah 10 choiníłʼı̨́įgo, nanítinígíí yíhoołʼaahígíí yíneedlı̨́į doo. Díí naaltsoos tʼah doo álnééh yę́ędą́ą́ʼ, nahaneʼ dayiichįįhígíí kótʼéego éʼélʼı̨́ tʼáá íídą́ą́ʼ nayídaneeztą́ą́ʼ. Nideinitinígíí áłah néidleehgóó ndaakai daazlı̨́ı̨́ʼ, áko kótʼéego éʼélʼı̨́ yéigo áká eelwod. Áłah néidleehgóó naniná bididííniił, doo éí bíhooʼaah 10 baa hoolzhiizhgo índa kóbididííniił da. Ídahoołʼaahii ałʼąą átʼéego bee bichʼįʼ anídahaztʼiʼ, éí biniinaa ákódaatʼéégóó bá baa ákonínízingo bíká anánílwoʼ. Doo hah áłah néidleehgóó naaghá yileehgóó, doo bikʼee nąąh nááhonikaʼ da doo. Haʼíínílní áádóó tʼáá ahą́ą́h béébiyíłnííh.

15. Íhoołʼaahii haʼátʼíí yikʼee bił yéeʼ łeh?

¹⁵ Béénílniih shı̨́ı̨́, Jiihóvah Yá Halneʼé dííleełgi bikʼee nił yééʼ ńtʼééʼ. Hootahgóó nahaneʼ doo ádeeshlíił da shı̨́ı̨́ nínízin ńtʼééʼ. Nikʼis dóó nikʼéí nikʼijįʼ dadooleeł shı̨́ı̨́ ałdóʼ bikʼee nił yééʼ ńtʼééʼ. Áko nanítinígíí kótʼéego yééʼ nilı̨́įgi nił bééhózin. Jesus éí łaʼ kótʼéego bił daayééʼ ní. Ákondi bikééʼ ndaakai yę́ę éí Jiihóvah bá ndaałʼaʼgi tʼáadoo bikʼee nihił daayéʼí yidííniid. (Matt. 10:16, 17, 27, 28) Jesus bikééʼ ndaakai yę́ę haitʼéego yíká eelwodgo doo bił daayéeʼ da daazlı̨́ı̨́ʼ? Haitʼéego beʼíłʼı̨́į doo?

16. Naniitinígíí éí yíhoołʼaahígíí yaa halneʼ dooleełgo haitʼéego naniitin doo?

¹⁶ Nanítinígíí éí nahalneʼ yiyiichįįh dooleełgi bee nanítin. Jesus bídahoołʼaahii nidahołneʼ doo yidííniidgo, tʼóó bił daayééʼ. Jesus éí dayínóhkááhgóó kódadohníigo dahołneʼ hałníigo nahoneeztą́ą́ʼ. (Matt. 10:5-7) Haitʼéego Jesus  beʼíłʼı̨́į doo? Nanítinígíí éí yééhósinígíí łaʼ Diyin Bizaad bíhwiideeshʼááł daatsʼí nízin. Bíká adiilwołgo yee hadoodzihígíí hashtʼeidoolíiłgo doo bá nanitłʼah da doo. Naaltsoos Enjoy Life Forever! “Some People Say” (Łaʼ éí Kódajiní) dóó “Someone May Ask” (Kótʼéego Łaʼ Ndaʼídíłkid) dabikááʼígíí choiníłʼı̨́įgo hadoodzihgi nayínítaah doo. Kótʼéego éí nanítinígíí Diyin Bizaad doo bá nantłʼagóó yaa chʼíhwiiʼaah doo.

17. Matthew 10:19, 20, 29-31 choiniilʼı̨́įgo, íhoołʼaahii éí haitʼéego Jiihóvah yaʼólí dooleeł?

¹⁷ Nanítinígíí Jiihóvah yaʼólíi doogo bee bíká anánílwoʼ. Jesus éí bídahoołʼaahii Jiihóvah nihíká adoolwoł, háálá ayóóʼánihóʼní, yidííniid. (Matthew 10:19, 20, 29-31 yíníłtaʼ.) Ni ałdóʼ níká adoolwołgo átʼé bididííniił. Bił sodílzin, áko yíká atʼíinii Jiihóvah yíyókeedígíí binahjįʼ Jiihóvah yaʼólíi doo. Franciszek, Polanddi kééhatʼı̨́įgo ání, “Nashinitinígíí éí sodilzingo bíká áshtʼíinii ałdóʼ yíká sodilzin. Jiihóvah díí sodizin yidiiztsʼą́ą́ʼ, áko shí ałdóʼ sodiszingo baa nídiisdzá. Áłah néidleehgóó dóó nitsaago áłah náʼádleehgóó naasháa doo biniyé naashnishdę́ę́ʼ shá náhooʼaah doo biniyé sodeeszin. Jiihóvah shisodizin yidiiztsʼą́ą́ʼ.”

18. Oodlání nidazhʼnitingi Jiihóvah haitʼéego haa nitsékees?

¹⁸ Jiihóvah éí ídahoołʼaahii ayóóʼáyóʼní. Oodlání nidaʼnitinígíí binahjįʼ diné Jiihóvah áhánígo yéédahoosįįh, áko nidaʼnitinígíí ayóóʼáyóʼní. (Isa. 52:7) Azhą́ doo łaʼda Diyin Bizaad bee nanítin da ndi, nidahalneʼé íhoołʼaahii bee dahólónígíí łahdóó bíká anánílwoʼ. Kótʼéego éí baptism yichʼįʼ náás deiyíkáah doo.