1. Abantu baingi abaabaire beeteeraine omu kyasha ky’okubanza bakagambirwa kukora ki?

ABASHAIJA n’abakazi baingi kuruga omu mahanga maingi bakaba beeteeraine barikugamba endimi zitarikushushana. Aha izooba eryo hakabaho ekintu kirikushemeza. Abayudaaya bakaba nibagamba endimi z’abantu abo abaabaire beeteeraniireyo! Kikaba nikitangaaza, ahabw’ebi Abayudaaya baabaire nibagamba, kandi n’ebi entumwa Petero yaagambiire boona, bikaba biri bikuru munonga. Bikaba birimu obutumwa oburikugira ngu baikiririza omuri Yesu Kristo, nibaija kujunwa. Obutumwa obwo bukakwata munonga aha abantu. Bakakwatwaho munonga, baahika n’aha kubuuza bati: “Tugire tuta?” Petero akabagarukamu ati: “Mwena mubatizibwe.”​—Byak. 2:37, 38.

2. Nituza kushwijuma ki omu kicweka eki? (Reeba ekishushani ekiri aha kipampagare.)

² Ekyakuratsireho kikaba nikishemeza. Abantu nka 3,000 bakabatizibwa aha izooba eryo baaba abeegi ba Kristo. Egi ekaba eri entandikiriro y’omurimo gw’amaani ogw’okuhindura abantu abeegi, ogu Yesu yaaragiire abakuratsi be kukora. Omurimo ogu gugumiizemu kuhika n’omu kyasha kya 21. Hati, titurikubaasa kuhwera omuntu kuhika aha kubatizibwa omu shaaha nkye. Nikitwara ameezi nari omwaka nari n’okurengamu omwegi wa Baibuli kubaasa kuhika aha kubatizibwa. Okuhindura abantu abeegi ti murimo gworobi, nk’oku orikukimanya, ku oraabe oine ou orikwegyesa Baibuli. Omu kicweka eki, nituza kureeba eki orikubaasa kukora kuhwera ou orikwegyesa Baibuli kuba omwegi wa Yesu obatiziibwe.

3. Kurugiirira ahari Matayo 28:19, 20, omwegi aine kukora ki kutunguuka akabatizibwa?

³ Omwegi wa Baibuli kubaasa kubatizibwa, aine kugyendera aha bi Baibuli erikwegyesa. (Shoma Matayo 28:19, 20.) Yaabigyenderaho naagyeragyeranisibwa “n’omuntu ow’obwengye” omu ky’okureeberaho kya Yesu owaatimbire omusingi akombekamu enju ye aha rukiri ruhami. (Mat. 7:24, 25; Luk. 6:47, 48) Nitubaasa kuhwera tuta omwegi kugyendera aha bi arikwega? Ka tureebe obuhabuzi bushatu.

4. Nitubaasa kuhwera tuta omwegi wa Baibuli kugumizamu naakorerera ekigyendererwa kye ky’okubatizibwa? (Reeba akabokusi “ Hwera Omwegi Kutaho Ebigyendererwa Kandi Abihikiirize.”)

⁴ Hwera omwegi kutaho ebigyendererwa. Ahabw’enki? Teekateeka aha ky’okureeberaho eki: Omu rugyendo ruraingwa, noobaasa kugyenda nooyemerera kureeba ebintu birungi ebiri haihi n’omuhanda. Obwo orugyendo ruraingwa orwo tirurikwija kukurusya. Nikyo kimwe, omwegi wa Baibuli yaaguma naataho ebigyendererwa bigufu kandi arikubihikiiriza, naija kureeba ngu nikibaasika kuhika aha kigyendererwa ky’okubatizibwa. Koresa ekicweka ekiine omutwe, “Ekigyendererwa” ekiri omu kitabo Yesiimire Amagara Ebiro Byona! kumuhwera kutunguuka. Aha muheru gwa buri ishomo, shoboorora oku ekigyendererwa ekyo kirikubaasa kumuhwera kugyendera aha bi yaaheza kwega. Waaba nooyenda ngu omwegi agire ekigyendererwa ekindi eki araahikiirize, kihandiikye aha mwanya oguriho ekigambo “Ekindi.” Iwe n’omwegi mugume nimukoresa ekicweka eki kweijutsya ebigyendererwa ebi omwegi arikubaasa kuhikaho hati n’ebya nyentsya.

5. Nk’oku kiri omuri Mako 10:17-22, Yesu akagambira omugaiga kukora ki, kandi ahabw’enki?

⁵ Hwera ou orikwegyesa kukora empinduka. (Shoma Mako 10:17-22.) Yesu akaba naamanya ngu nikiija kugumira omushaija omugaiga  kutunda ebintu bye byona. (Mak. 10:23) Kwonka nabwo, akamugambira kukora empinduka mpango egi. Ahabw’enki? N’ahabw’okuba Yesu akamugirira rukundo. Obumwe, nitubaasa kutahiga omwegi wa Baibuli kugyendera aha bi arikwega ahabw’okuteekateeka ngu tayeteekateekire kukora empinduka. Nikibaasa kutwara obwire abantu kureka emitwarize yaabo eya ira, reero bakataho omuntu musya. (Kol. 3:9, 10) Kwonka waarahuka kugamba aha nshonga, nikihwera omwegi kurahuka kutandika kukora empindahinduka. Waagaaniira nawe aha nshonga egi, nooyoreka ngu noomufaho.​—Zab. 141:5; Enf. 27:17.

6. Ahabw’enki twine kubuuza omwegi kugamba eki arikuteekateeka?

⁶ Ni kikuru kubuuza omwegi eki arikuteekateeka aha nshonga. Koresa ekibuuzo nk’ekyo kumanya oku omwegi arikwetegyereza n’ebi arikwikiriza. Waaguma nookora eki butoosha, nikiija kukworobera omu biro by’omumaisho kugamba aha nshonga ezitarikumworobera kwikiriza. Ekitabo Yesiimire Amagara Ebiro Byona! kirimu ebibuuzo ebirikuhwera omwegi kugamba eki arikuteekateeka. Nk’eky’okureeberaho, omu ishomo rya 04 harimu ekibuuzo: “Noogira ngu Yehova naayehurira ata waakoresa eiziina rye?” Eishomo rya 09 ririmu ekibuuzo: “Ni bintu ki ebimwe ebi orikwenda kugambaho omu kushaba?” Omu kubanza, ou orikwegyesa nikibaasa kumwetengyesa kuteekateeka oku araagarukyemu ebibuuzo ebi. Noobaasa kumuhwera kuteekateeka aha byahandiikirwe n’ebishushani.

7. Nitubaasa kukoresa gye tuta ebi abandi baarabiremu?

⁷ Omwegi yaaheza kwetegyereza eki aine kukora, koresa ebyabaireho ebirikworekwa omu vidiyo kumuhiga kukikora. Nk’eky’okureeberaho, omwegi yaaba naagumirwa kuza omu nteerane, noobaasa kumworeka vidiyo Yehova Akandeeberera eri omu kicweka “Jumbura Ebindi” eky’eishomo rya 14. Omu mashomo maingi agari omu kitabo Yesiimire Amagara Ebiro Byona! noija kushangamu eby’okureeberaho nk’ebi omu kicweka “Shwijuma Gye” nari “Jumbura Ebindi.” * Yegyendesereze kutagyeragyeranisa ou orikwegyesa n’orikworekwa omu vidiyo orikugira ngu, “ku araabe naabaasa kukikora naiwe noobaasa kukikora.” Reka omwegi abe niwe yaayemanyira enshonga egyo. Kureka, gamba aha nshonga zimwe ezaahweraire omuntu orikworekwa omu vidiyo kugyendera aha nyegyesa za Baibuli. Obundi noobaasa kwihayo enshonga emwe omu kyahandiikirwe nari ekintu eki yaakozire. Kyaba nikibaasika, hamiiriza enshonga oku Yehova yaahweraire omuntu ogwo.

8. Noobaasa kuhwera ota omwegi kukunda Yehova?

⁸ Hwera omwegi kukunda Yehova. Ota shi? Sherura oburyo bw’okugamba aha mitwarize ya Yehova. Hwera ou orikwegyesa kwetegyereza ngu Yehova ni Ruhanga orikushemererwa kandi orikushagika abarikumukunda. (1 Tim. 1:11; Heb. 11:6) Yoreka omwegi ngu naija kugasirwa yaagyendera aha bi arikwega, kandi shoboororera omwegi ngu ekyo nikyoreka ngu naakunda Yehova. (Isa. 48:17, 18) Omwegi nikiija kumuhiga kukora empinduka ezirikwetengyesa yaayongyera kukunda Yehova.​—1 Yoh. 5:3.

9. Kuhikaana na Mako 10:29, 30, niki ekirikubaasa kuhwera omuntu kugira ebi yaayefeerereza kuba omwegi obatiziibwe?

⁹ Omwegi kubaasa kutunguuka kuhika aha kubatizibwa, aine kugira ebi yaayefeerereza.  Nk’omugaiga owaagambwaho, abeegi abamwe nikibaasa kubeetengyesa kugira ebintu ebi baayefeerereza. Emirimo yaabo yaaba etarikuhikaana n’emisingye ya Baibuli, nibabaasa kugireka basherure endiijo. Abamwe nibaba baine kutsigaho abanywani abatarikuheereza Yehova. Abandi nibabaasa kuba nibahiiganisibwa ab’eka yaabo abatarikukunda Abajurizi ba Yehova. Yesu akeetegyereza ngu nikibaasa kugumira bamwe kwefeerereza batyo. Kwonka akaraganisa ngu abarikumukuratira tarikwija kubareebya. Nibaija kutunga enshumbuushano niyo eka y’eby’omwoyo erikubakunda. (Shoma Mako 10:29, 30.) Noobaasa kuhwera ota ou orikwegyesa Baibuli kugasirwa omu kiconco kirungi eki?

10. Nooyegyera ki aha ky’okureeberaho kya Manuel?

¹⁰ Nywana omwegi waawe. Ni kikuru kworeka ou orikwegyesa ngu noomufaho. Ahabw’enki? Yetegyereze ebi Manuel orikutuura omuri Mexico yaagambire. Arikwijuka obu yaabaire naayega Baibuli, naagira ati: “Tutakatandikire kwega, omwegyesa wangye akaba abanza yaambuuza oku ndi. Akaba ampwera kwikaikana n’okwigura omutima kumugambira enshonga ezindi. Nkaba nindeeba ngu buzima naanfaho.”

11. Abeegi baitu nibabaasa kugasirwa bata twashashaanuka nabo?

¹¹ Shashaanuka n’abu orikwegyesa Baibuli, nk’oku Yesu yaabaire naashashaanuka n’abakuratsi be. (Yoh. 3:22) Kyaba nikibaasika, yeta omwegi orikutunguuka owaawe mugire eki mwarya hamwe nari eki mwanywa nari mureebe hamwe emwe ahari broadcast eza buri kwezi. Ou orikwegyesa naabaasa kusiima entebeekanisa egyo na munonga omu bwire bw’ebiro bikuru eby’ensi obu arikuba aine eihamba. “Ninteekateeka ngu nkeega bingi ebirikukwata ahari Yehova ndikushashaanuka n’omwegyesa wangye kukira omu bwire bw’okwega,” Kazibwe, orikutuura omu Uganda nikwo arikugira. “Nkareeba oku Yehova arikureeberera abantu be n’oku bashemereirwe. Naanye eki nikyo naabaire niinyenda.”

12. Ahabw’enki twine kugyenda n’ababuurizi batari bamwe aha mwegi wa Baibuli?

 ¹² Gyenda n’ababuurizi abandi orikuza kwegyesa omwegi. Obumwe, nitubaasa kuteekateeka ngu kyorobi kugyenda wenka nari kuguma noogyenda n’omubuurizi niwe omwe. Ekyo n’obu kiraabe kyorobi, abu turikwegyesa nibabaasa kugasirwa twaguma nitutwarayo ababuurizi b’omutaano. “Buri mubuurizi owaabaire aija omu kwega kwangye, akaba ashoboorora ebintu omu muringo gw’omutaano kumpwera kwetegyereza gye enshonga,” Dmitrii orikutuura omuri Moldova nikwo arikugira. “Eki kikaba nikimpwera kureeba enshonga omu miringo etari emwe n’emwe. Kandi nkaba ntaine nshoni nyingi obu naaza omu ruteerane omurundi gw’okubanza, ahabw’okugira ngu nkaba naareebire ab’eishe-emwe na banyaanyazi-itwe baingi.”

13. Ahabw’enki twine kuhwera abu turikwegyesa Baibuli kwija omu nteerane?

¹³ Hwera ou orikwegyesa kuza omu nteerane z’ekibiina. Ahabw’enki? N’ahabw’okugira ngu Yehova naaha abarikumuramya ekiragiro ky’okuza omu nteerane hamwe, kandi n’ekicweka ky’okuramya kwaitu. (Heb. 10:24, 25) Okwongyera ahari ekyo, ab’eishe-emwe n’eka yaitu ey’eby’omwoyo. Twaba turi nabo omu nteerane, nituba turi nk’ab’eka emwe turikurya hamwe eby’okurya. Waahwera ou orikwegyesa Baibuli kuza omu nteerane, nooba waamuhwera kutemba rimwe aha madaara makuru ag’okuhika aha kubatizibwa. Kwonka eri niribaasa kuba riri eidaara rigumire ahariwe. Ekitabo Yesiimire Amagara Ebiro Byona! nikibaasa kuhwera kita omwegi wa Baibuli kusingura oburemeezi obu aine?

14. Nitubaasa kuhiga tuta abu turikwegyesa kwija omu nteerane?

¹⁴ Koresa eishomo rya 10 ery’ekitabo Yesiimire Amagara Ebiro Byona! kukuhwera kuhiga omwegi wa Baibuli. Ababuurizi abaagyeziise ekitabo eki kitakashohoziibwe bakaba abasinguzi omu kuhwera abeegi kutandika kuza omu nteerane. Kwonka, toine kutegyereza kuhika omu ishomo rya 10 kubaasa kweta omwegi kwija omu nteerane. Mwete ahonaaho kandi gumizamu noomweta butoosha. Abeegi ba Baibuli nibaremesibwa ebintu bitarikushushana. N’ahabw’ekyo, ta omutima aha buremeezi bw’omwegi waawe, kandi oreebe oku orikubaasa kumuhwera. Otahwamu amaani kyamutwarira obwire kwija omu nteerane. Mugumisirize kwonka otarekyera aho kumweta.

15. Abeegi baitu nibabaasa kuba nibatiina ki?

¹⁵ Noijuka ngu naiwe okaba oinemu obwoba bw’okuba omwe aha Bajurizi ba Yehova? Obundi okaba nootiina ngu torikubaasa kubuurira omu rweteeraine. Nari obundi okaba nootiina ngu ab’eka yaawe n’abanywani nibaija kukuhakanisa. Kyaba nikwo kiri, noobaasa kwetegyereza oku omwegi arikwehurira. Yesu akeetegyereza ngu okutiina nk’okwo nikwija kubaho. Kwonka, akahiga abakuratsi be ngu tibaine kwikiriza okutiina nk’okwo kubaremesa kuheereza Yehova. (Mat. 10:16, 17, 27, 28) Yesu akahwera ata abakuratsi be kusingura okutiina kwabo? Kandi noobaasa kumutooreza ota?

16. Nitubaasa kutendeka tuta abeegi ba Baibuli kugamba aha kwikiriza kwabo?

¹⁶ Mporampora tendeka omwegi kugambira abandi aha kwikiriza kwe. Abeegi ba Yesu baine kuba baagizire obwoba obu Yesu yaabohereza kubuurira. Kwonka akabahwera arikubagambira ahu baine kubuurira n’obutumwa obu baine kubuurira. (Mat. 10:5-7) Nitubaasa kutooreza tuta Yesu? Hwera omwegi waawe kureeba ahu arikubaasa kubuurira. Nk’eky’okureeberaho, mubuuze ku araabe naamanya  omuntu orikubaasa kugasirwa omu mazima ga Baibuli. Reero muhwere kutebeekanisa ebi araagambe orikumworeka oku arikubaasa kubuurira omu muringo gworobi. Kyaba nikibaasika, noobaasa kukoresa ebicweka by’okwegyezamu, “Abamwe Nibagira Ngu” na “Omuntu Naabaasa Kubuuza” ebiri omu kitabo Yesiimire Amagara Ebiro Byona! Teeraho kutendeka omwegi kukoresa Baibuli kugarukamu omu muringo gworobi kandi ogw’obwengye.

17. Nitubaasa kukoresa tuta Matayo 10:19, 20, 29-31, twaba nituhwera omwegi kwesiga Yehova?

¹⁷ Hwera ou orikwegyesa Baibuli kwesiga Yehova. Yesu akahamiza abeegi be ngu Yehova naija kubahwera ahabw’okugira ngu naabakunda. (Shoma Matayo 10:19, 20, 29-31.) Yijutsya omwegi ngu Yehova nawe naija kumuhwera. Noobaasa kumuhwera kwesiga Yehova orikushaba nawe aha bikwatiraine n’ebigyendererwa bye. “Omwegyesa wangye akaba naakira kugamba aha bigyendererwa byangye omu kushaba kwe,” Franciszek nikwo arikugira, orikutuura omuri Poland. “Ku naareebire oku Yehova arikugarukamu okushaba kw’omwegyesa wangye, ahonaaho nkatandika kushaba. Nkareeba obuhwezi bwa Yehova, obu naabaire niinyenda kushaba orusa aha murimo kuza omu nteerane z’ekibiina n’omu ruteerane oruhango orw’ebiro bishatu.”

18. Omurimo gwaitu gw’okwegyesa abantu Baibuli nigureetera Yehova kwehurira ata?

¹⁸ Yehova naafayo munonga aha beegi ba Baibuli. Naakimanya gye ngu nitukora n’amaani kuhwera abantu kumwiririra haihi, kandi ekyo naakitukundira. (Isa. 52:7) Ku oraabe otaine ou orikwegyesa Baibuli hati, nabwo noobaasa kuhwera abeegi ba Baibuli kutunguuka kuhika aha kubatizibwa orikugyenda n’ababuurizi abandi baaba nibaza kubeegyesa.