1. Апостол Петр адӕмӕн цы загъта?

ИЕРУСАЛИММӔ алы бӕстӕтӕй ӕрцыд тынг бирӕ адӕм. Уыди дзы нӕлгоймӕгтӕ дӕр ӕмӕ сылгоймӕгтӕ дӕр, ӕмӕ дзырдтой алыхуызон ӕвзӕгтыл. Уыцы бон ӕрцыд диссаджы хабар. Дзуттӕгтӕй чидӕртӕ райдыдтой уыцы адӕмы ӕвзӕгтыл дзурын! Фӕлӕ ноджы диссагдӕр та уыд, уыцы дзуттӕгтӕ сын цы дзырдтой ӕмӕ сын апостол Петр цы загъта, уый. Уыцы адӕм базыдтой, Йесо Чырыстийыл куы баууӕндой, уӕд сӕ бон кӕй уыдзӕн фервӕзын. Уыцы хабар сӕ зӕрдӕты арф ахызт. Ӕмӕ Йесойы ахуыргӕнинӕгты бафарстой: «Цы кӕнгӕ нын у?» Петр сын дзуапп радта: «Ӕрфӕсмон кӕнут ӕмӕ уӕ алчидӕр... донаргъуыд райсӕд» (Хъуыд. 2:37, 38).

2. Ацы статьяйы цӕуыл аныхас кӕндзыстӕм? (Кӕс нывмӕ ӕддаг цъарыл.)

² Уый фӕстӕ цы ’рцыд, уый дӕр диссаг уыд. Уыцы бон 3 мин адӕймаджы бӕрц донаргъуыд райстой, ӕмӕ систы Чырыстийы ахуыргӕнинӕгтӕ. Афтӕ райдыдта, Йесо йӕ фӕдылдзӕуджытӕн кӕй бахӕс кодта, уыцы стыр куыст. Ӕмӕ суанг абон дӕр, 21 ӕнусы, цӕттӕ кӕнӕм ахуыргӕнинӕгтӕ. Ныртӕккӕ нӕ бон нӕ вӕййы адӕймагӕн цалдӕр сахатмӕ баххуыс кӕнын, цӕмӕй донаргъуыд райса. Уымӕн бахъӕуы цалдӕр мӕйы кӕнӕ суанг афӕдз дӕр, йе та уымӕй дӕр фылдӕр. Кӕд искӕимӕ Библи ахуыр кӕныс, уӕд ӕй зондзынӕ, Чырыстийы ахуыргӕнинаджы бацӕттӕ кӕныныл бафыдӕбон кӕнын кӕй фӕхъӕуы. Ӕмӕ ацы статьяйы аныхас кӕндзыстӕм, дӕ бон куыд у адӕймагӕн баххуыс кӕнын, цӕмӕй донаргъуыд райса.

3. Матфейы 28:19, 20 стихтӕм гӕсгӕ, адӕймаг цы хъуамӕ райдайа аразын, цалынмӕ донаргъуыд райса, уӕдмӕ?

³ Цалынмӕ адӕймаг донаргъуыд райса, уӕдмӕ хъуамӕ райдайа, Библи цы дзуры, уымӕ гӕсгӕ архайын. (Бакӕс Матфейы  28:19, 20.) Афтӕ куы кӕна, уӕд уыдзӕн, «хӕдзар аразгӕйӕ арф чи ныкъкъахта» ӕмӕ «йӕ хӕдзар къӕдзӕхыл чи сарӕзта, уыцы зондджын адӕймаджы хуызӕн» (Матф. 7:24, 25; Лук. 6:47, 48). Нӕ бон куыд у адӕймагӕн уыцы хъуыддаджы ӕххуыс кӕнын? Ӕркӕсӕм ӕртӕ уынаффӕмӕ.

4. Нӕ бон куыд у, Библи кӕимӕ ахуыр кӕнӕм, уымӕн ӕххуыс кӕнын, цӕмӕй донаргъуыд райса? (Ноджыдӕр кӕс рамкӕ « Адӕймагӕн ӕххуыс кӕн, цӕмӕй йӕ разы нысӕнттӕ ӕвӕра ӕмӕ йӕ къухы бафтой».)

⁴ Ӕххуыс ын кӕн йӕ разы нысӕнттӕ ӕвӕрынӕн. Уый ахсджиаг цӕмӕн у? Ахъуыды кӕнӕм ахӕм цӕвиттоныл. Зӕгъӕм, фӕнд кӕныс дард балцы ацӕуын. Ӕмӕ хъуыды кӕныс, дӕ бон ма фӕндагыл кӕмыты у ӕрлӕууын, ууыл. Ӕвӕццӕгӕн дӕ бафӕнддзӕн, фӕндагыл цы рӕсугъд бынӕттӕ ис, уыдон дӕр фенын. Ӕмӕ дӕм уӕд афтӕ нӕ кӕсдзӕн, ӕмӕ, кӕдӕм цӕуыс, уыцы бынат дард у. Раст афтӕ, Библи кӕимӕ ахуыр кӕныс, уымӕн дӕр йӕ бон у йӕ разы ӕвӕрын, цыбыр рӕстӕгмӕ йӕ къухы чи бафтдзӕн, ахӕм нысӕнттӕ. Ӕмӕ йӕ къухы куы бафтой, уӕд ӕй бамбардзӕн, донаргъуыд райсын дӕр ын кӕй бантысдзӕн. Чиныджы «Амондджынӕй цӕр ӕнустӕм!» алы урочы кӕрон дӕр ис рамкӕ «Дӕ нысан». Ӕмӕ-иу урок куы равзарат, уӕд-иу йемӕ аныхас кӕн, уыцы нысан ын куыд баххуыс кӕндзӕн, урокӕй цы базыдта, уымӕ гӕсгӕ архайынӕн. Кӕд дӕ фӕнды, цӕмӕй йӕ разы ӕндӕр нысан сӕвӕра, уӕд уыцы нысан та дӕ бон у ныффыссын, «Ӕндӕр нысан» кӕм ис фыст, уым. Уыцы рамкӕйы фӕрцы-иу йемӕ аныхас кӕн, цыбыр рӕстӕгмӕ йӕ къухы чи бафтдзӕн, ахӕм нысӕнттыл дӕр ӕмӕ, фылдӕр рӕстӕг кӕмӕн хъӕуы, ахӕм нысӕнттыл дӕр.

5. Марчы 10:17–22 стихты куыд фыст ис, афтӕмӕй Йесо хъӕздыг лӕгӕн цы загъта ӕмӕ цӕмӕн?

⁵ Ӕххуыс ын кӕн йӕ царды ивындзинӕдтӕ скӕнынӕн. (Бакӕс Марчы 10:17–22.) Йесо зыдта, хъӕздыг лӕгӕн зын кӕй уыдзӕн йӕ фӕллӕйттӕ иууылдӕр ауӕй кӕнын (Мар. 10:23). Фӕлӕ йын уӕддӕр загъта, уыцы стыр ивындзинад кӕй хъуамӕ сараза. Цӕмӕн ын загъта афтӕ? Уымӕн ӕмӕ йӕ уарзта. Хатт нӕм, чи зоны, афтӕ фӕкӕсы, ӕмӕ адӕймаг  цӕттӕ нӕма у хъӕугӕ ивындзинӕдтӕ скӕнынмӕ. Ӕмӕ фӕхъуыды кӕнӕм, зӕгъгӕ йын фӕстӕдӕр зӕгъдзынӕн, цӕмӕй райдайа, цы базыдта, уымӕ гӕсгӕ архайын. Кӕй зӕгъын ӕй хъӕуы, кӕйдӕр бахъӕуы бирӕ рӕстӕг, цӕмӕй йӕ зӕронд удыхъӕд ногмӕ раива ӕмӕ йе ’взӕр хъуыддӕгтӕ ныууадза (Кол. 3:9, 10). Фӕлӕ йемӕ ууыл цас раздӕр аныхас кӕнай, уыйас тагъддӕр райдайдзӕн йӕ цард ивын. Стӕй афтӕмӕй равдисдзынӕ, кӕй йӕ уарзыс ӕмӕ дӕ йӕ хорз кӕй фӕнды (Пс. 141:5; Ӕмб. 27:17).

6. Кӕимӕ ахуыр кӕнӕм, уыдоны-иу сӕ хъуыдыйӕ цӕмӕн хъуамӕ бафӕрсӕм?

⁶ Кӕимӕ ахуыр кӕныс, уымӕ-иу дӕтт фарстатӕ йӕ хъуыды базонынӕн. Афтӕмӕй-иу базондзынӕ, ӕрмӕг ӕмбары ӕви нӕ, стӕй, цӕуыл ӕууӕнды, уый. Афтӕ арӕх куы кӕнай, уӕд дын уый фӕстӕ ӕнцондӕр уыдзӕн йемӕ ӕндӕр хабӕрттыл дӕр ныхас кӕнын, зӕгъӕм, ӕргом аныхас кӕнын афтӕ ӕнцон кӕуыл нӕ вӕййы, уыдоныл. Чиныджы «Амондджынӕй цӕр ӕнустӕм!» ис бирӕ фарстатӕ адӕймаджы хъуыды базонынӕн. Зӕгъӕм, 04-ӕм урочы ис ахӕм фарста: «Куыд дӕм кӕсы, Йегъовӕмӕ йӕ номӕй куы фӕдзурыс, уӕд ын ӕхсызгон нӕ вӕййы?». 09-ӕм урочы та ис ахӕм фарста: «Цӕй тыххӕй дӕ фӕнды Хуыцаумӕ скувын?». Райдианы, чи зоны, адӕймагӕн ӕнцон ма уа ахӕм фарстатӕн дзуапп дӕттын. Фӕлӕ йын дӕ бон у баххуыс кӕнын. Ахуыр ӕй кӕн, чиныджы цы стихтӕ ӕмӕ нывтӕ ис, уыдоныл хъуыды кӕнын.

7. Библи йӕ цард кӕмӕн аивта, уыцы лӕггадгӕнджыты хабӕртты фӕрцы дӕ бон куыд у адӕймагӕн баххуыс кӕнын?

⁷ Адӕймаг куы бамбара, цы йӕ хъӕуы саразын, уӕд ын цы баххуыс кӕндзӕн, цӕмӕй ивындзинӕдтӕ скӕна? Дӕ бон ын у кӕйдӕрты хабӕрттӕ радзурын. Зӕгъӕм, кӕд ын нӕ уайы алы ӕмбырдмӕ дӕр цӕуын, уӕд ын дӕ бон у равдисын видеоролик «Йегъовӕ мын алкӕддӕр ӕххуыс кодта». Ссарӕн ӕй ис 14-ӕм урочы, рубрикӕйы «Фылдӕр ӕрмӕг». Ахӕм хабӕрттӕ ссарӕн ис уроктӕй бирӕты. Сты рубрикӕйы «Фылдӕр базон» кӕнӕ рубрикӕйы «Фылдӕр ӕрмӕг» *. Нӕ хъӕуы адӕймаджы искӕимӕ барын ӕмӕ йын афтӕ дзурын: «Кӕд уымӕн йӕ бон баци, уӕд дӕуӕн дӕр бон бауыдзӕн». Уадз ӕмӕ уыцы хъуыдымӕ йӕхӕдӕг ӕрцӕуа. Фӕлтау-иу йемӕ аныхас кӕн, видеороликы кӕй кой уыди, уыцы адӕймагӕн цы баххуыс кодта, цӕмӕй Библийы уагӕвӕрдтӕм гӕсгӕ цӕрын райдыдтаид. Чи зоны йын баххуыс кодта Библийӕ кӕцыдӕр стих. Кӕнӕ йын йӕ хъус ӕрдар, адӕймаг йӕхӕдӕг дӕр цы сарӕзта, цӕмӕй, Библийӕ цы базыдта, уымӕ гӕсгӕ цӕрын райдыдтаид. Стӕй-иу ын йӕ хъус ӕрдар, Йегъовӕ йын куыд баххуыс кодта, уымӕ.

8. Библи кӕимӕ ахуыр кӕнӕм, уымӕн нӕ бон куыд у баххуыс кӕнын, цӕмӕй Йегъовӕйы бауарза?

⁸ Баххуыс ын кӕн Йегъовӕйы бауарзынӕн. Алы фадатӕй дӕр-иу спайда кӕн, цӕмӕй йын баххуыс кӕнай Йегъовӕйы миниуджыты тыххӕй фылдӕр базонынӕн. Баххуыс ын кӕн, цӕмӕй бамбара, Йегъовӕ амондджын Хуыцау кӕй у ӕмӕ йӕ чи уарзы, уыдонӕн кӕй ӕххуыс кӕны (1 Тим. 1:11; Дзут. 11:6). Бамбарын ын кӕн, Йегъовӕйы фӕдзӕхстытӕм гӕсгӕ куы цӕра, уӕд ын уый пайда кӕй хӕсдзӕн, ӕмӕ уый ууыл дзурӕг кӕй у, ӕмӕ йӕ Йегъовӕ уарзы (Ис. 48:17, 18). Йегъовӕйы куы бауарза, уӕд ӕй бафӕнддзӕн, цы хъӕуы, уый фӕивын (1 Иоан. 5:3).

9. Марчы 10:29, 30 стихтӕм гӕсгӕ, адӕймагӕн цы баххуыс кӕндзӕн, цӕмӕй йӕхи цӕмӕйдӕрты фӕцух кӕнын ма тӕрса?

⁹ Библи кӕимӕ ахуыр кӕныс, уый бахъӕудзӕн йӕхи цӕмӕйдӕрты фӕцух кӕнын кӕнӕ цыдӕртӕ ныууадзын, цӕмӕй Йегъовӕйы лӕггадгӕнӕг суа. Гыццыл раздӕр цы хъӕздыг лӕджы кой кодтам, уыйау кӕйдӕрты фӕхъӕуы сӕ  цард фӕхуымӕтӕгдӕр кӕнын. Зӕгъӕм, кӕд, чырыстонӕн кӕм не ’мбӕлы, ахӕм куысты кусынц, уӕд сӕ бахъӕуы сӕ куыст ныууадзын. Бирӕты бахъӕуы аскъуыддзаг кӕнын, Йегъовӕйы чи нӕ уарзы, уыцы ӕмбӕлттимӕ кӕй нал лымӕн кӕндзысты. Кӕмӕйдӕрты та сӕ бинонтӕ адард вӕййынц, уымӕн ӕмӕ Йегъовӕйы Ӕвдисӕнты нӕ фӕуарзынц. Йесо ӕмбӕрста, кӕмӕндӕрты зын кӕй уыдзӕн ахӕм ивындзинӕдтӕ скӕнын. Фӕлӕ зӕрдӕ бавӕрдта, йӕ фӕдыл чи ацӕуа, уыдон фыдӕнхъӕл кӕй ницӕмӕй фӕуыдзысты. Уыдонӕн фӕзындзӕн ӕнувыд чырыстон бинонтӕ. (Бакӕс Марчы 10:29, 30.) Дӕ бон куыд у, кӕимӕ ахуыр кӕныс, уымӕн баххуыс кӕнын, цӕмӕй уыцы диссаджы лӕварӕй схайджын уа?

10. Мануэль цы радзырдта, уый дын цӕуыл дзурӕг у?

¹⁰ Йӕ хорз ӕмбал су. Библи кӕимӕ ахуыр кӕныс, уый хъуамӕ уына, кӕй йӕ уарзыс. Уый ахсджиаг цӕмӕн у? Ӕфсымӕр Мануэль цӕры Мексикӕйы. Уый радзырдта: «Мемӕ Библи чи ахуыр кодта, уыцы ’фсымӕр-иу мӕ алы ахуыры размӕ бафарста, куыд дӕн, уымӕй. Уый фӕрцы-иу нал тыхстӕн, ӕмӕ-иу мӕ бон уыди йемӕ алцӕуыл дӕр аныхас кӕнын. Ӕз ӕй уыдтон, кӕй мӕ уарзы».

11. Библи кӕимӕ ахуыр кӕнӕм, уыимӕ рӕстӕг цӕмӕн хъуамӕ ӕрвитӕм?

¹¹ Йесо-иу йӕ ахуыргӕнинӕгтимӕ арӕх рӕстӕг ӕрвыста. Ӕмӕ-иу мах дӕр хъуамӕ рӕстӕг ӕрвитӕм, Библи кӕимӕ ахуыр кӕнӕм, уыдонимӕ (Иоан. 3:22). Библи кӕимӕ ахуыр кӕныс, уый кӕд йӕ цард Библийы уагӕвӕрдтӕм гӕсгӕ аразын райдыдта, уӕд ӕй дӕ бон у уазӕгуаты фӕхонын, зӕгъӕм, къофи бацымынмӕ кӕнӕ иумӕ исты бахӕрынмӕ. Йе та уӕ бон у иумӕ нӕ телеуынынады ӕрвылмӕйон программӕтӕй искӕцымӕ бакӕсын. Уӕлдайдӕр дӕ фӕбузныг уыдзӕн, йӕ бинонтӕ кӕнӕ йе ’мбӕлттӕ цавӕрдӕр бӕрӕгбон куы кӕной, уыцы рӕстӕг ӕй куы фӕхонай. Уӕд йӕхимӕ иунӕг нӕ кӕсдзӕн. Ӕфсымӕр Казибве цӕры Угандӕйы. Уый афтӕ зӕгъы: «Мӕнмӕ гӕсгӕ, Йегъовӕйы тыххӕй ахуыры рӕстӕг цас базыдтон, уыйбӕрц базыдтон, мемӕ Библи чи ахуыр кодта, уыимӕ рӕстӕг ӕрвитгӕйӕ. Ӕз ӕй уыдтон, Йегъовӕ йӕ адӕмы куыд уарзы ӕмӕ куыд амондджын сты. Ӕмӕ мӕн дӕр афтӕ фӕндыд цӕрын».

12. Библийы ахуырмӕ-иу алыхуызон хъусынгӕнджыты цӕмӕн хъуамӕ фӕхонӕм?

 ¹² Библийы ахуырмӕ-иу алыхуызон хъусынгӕнджыты фӕхон. Чи зоны нӕ хатт Библийы ахуырмӕ фӕфӕнды иунӕгӕй ацӕуын кӕнӕ фӕхонӕм уыцы иу хъусынгӕнӕджы. Ӕмӕ нын кӕд афтӕ ӕнцондӕр вӕййы, уӕддӕр, кӕимӕ ахуыр кӕнӕм, уымӕн фылдӕр пайда ӕрхӕсдзӕн, немӕ-иу алыхуызон хъусынгӕнджыты куы ’рбакӕнӕм. Дмитрий цӕры Молдавийы. Ӕмӕ уый афтӕ зӕгъы: «Алы хъусынгӕнӕгӕй дӕр-иу ног цыдӕр базыдтон. Алчидӕр-иу мын мӕ хъус ӕндӕр цӕмӕдӕр ӕрдардта. Ӕмӕ-иу уый фӕрцы ӕрмӕг хуыздӕр бамбӕрстон. Федтон-иу, ноджыдӕр ма мӕ бон куыд у, цы базыдтон, уымӕ гӕсгӕ архайын. Уымӕй уӕлдай ма фыццаг хатт ӕмбырдмӕ куы ацыдтӕн, уӕд афтӕ тынг не ’фсӕрмы кодтон, уымӕн ӕмӕ хотӕ ӕмӕ ’фсымӕртӕй бирӕты зыдтон».

13. Кӕимӕ ахуыр кӕнӕм, уымӕн цӕмӕн хъӕуы баххуыс кӕнын, цӕмӕй ӕмбырдтӕм цӕуын райдайа?

¹³ Ӕххуыс ын кӕн, цӕмӕй ӕмбырдтӕм цӕуын райдайа. Уый ахсджиаг цӕмӕн у? Йегъовӕ йӕ лӕггадгӕнджытӕн бафӕдзӕхста, цӕмӕй иумӕ ӕмбырд кӕной. Уый дӕр нӕ лӕггадмӕ хауы (Дзут. 10:24, 25). Стӕй нӕ хотӕ ӕмӕ не ’фсымӕртӕ сты нӕ чырыстон бинонтӕ. Ӕмӕ, ӕмбырды куы вӕййӕм, уӕд уый афтӕ вӕййы, цыма иумӕ дзаджджын фынгтыл бадӕм. Адӕймагӕн куы баххуыс кӕнай, цӕмӕй ӕмбырдтӕм цӕуын райдайа, уӕд ноджыдӕр иу ахсджиаг къахдзӕф сараздзӕн ӕмӕ йӕ нысанмӕ фӕхӕстӕгдӕр уыдзӕн. Фӕлӕ йын уый, чи зоны, афтӕ ӕнцон ма уа. Уыцы хъуыддаджы йын баххуыс кӕндзӕн чиныг «Амондджынӕй цӕр ӕнустӕм!».

14. Нӕ бон куыд у, Библи кӕимӕ ахуыр кӕнӕм, уымӕн баххуыс кӕнын, цӕмӕй ӕмбырдтӕм цӕуын райдайа?

¹⁴ 10-ӕм урочы фӕрцы дӕ бон уыдзӕн, Библи кӕимӕ ахуыр кӕныс, уымӕн баххуыс кӕнын, цӕмӕй ӕмбырдтӕм цӕуын райдайа. Цалынмӕ ацы чиныг уагъд не ’рцыд, уӕдмӕ ӕфсымӕртӕ фӕлтӕрдджын хъусынгӕнджытӕн бахӕс кодтой, цӕмӕй ацы урок бафӕлвӕрдтаиккой. Ӕмӕ уыцы хъусынгӕнджытӕ радзырдтой, кӕимӕ ахуыр кодтой, уыдонӕн тынг кӕй баххуыс кодта. Кӕй зӕгъын ӕй хъӕуы, 10-ӕм урокмӕ ӕнхъӕлмӕ кӕсын нӕ хъӕуы. Адӕймаджы ӕмбырдтӕм цас раздӕр фӕхонай, уыйас хуыздӕр. Библи кӕимӕ фӕахуыр кӕнӕм, уыдонӕй иутӕн иу цыдӕр вӕййы къуылымпыйы хос, иннӕтӕн – ӕндӕр цыдӕр. Ахъуыды-иу кӕн, алкӕмӕн дӕр сӕ дӕ бон баххуыс кӕнын куыд у, ууыл. Адӕймаг ӕмбырдтӕм цӕуын уайтагъд куы нӕ райдайа, уӕд-иу дӕ ныфс ма асӕттӕд. Чи зоны, бахъӕуа иуцасдӕр банхъӕлмӕ кӕсын. Фӕлӕ-иу ын уый тыххӕй рӕстӕгӕй-рӕстӕгмӕ дзур.

15. Библи кӕимӕ фӕахуыр кӕнӕм, уыдон цӕмӕйты фӕтӕрсынц?

¹⁵ Дӕхӕдӕг Библи куы ахуыр кодтай, уӕд дӕ ныфс хастай, Йегъовӕйы Ӕвдисӕн суай, уымӕ? Чи зоны, хъуыды кодтай, ӕмӕ хӕдзарӕй-хӕдзармӕ хъусын кӕнын дӕ бон никуы бауыдзӕн. Кӕнӕ, чи зоны, тарстӕ, дӕ бинонтӕ кӕнӕ де ’мбӕлттӕ дӕ ныхмӕ куы рацӕуой, уымӕй. Ӕмӕ уӕд, Библи кӕимӕ ахуыр кӕныс, уыдоны дӕр бамбардзынӕ. Йесо зыдта, чидӕртӕ ахӕм цӕмӕйдӕрты кӕй тӕрсдзысты. Фӕлӕ йӕ фӕдылдзӕуджытӕн фӕдзӕхста, цӕмӕй мацӕмӕй тарстаиккой ӕмӕ сӕ мацы бахъыгдардтаид Йегъовӕйӕн лӕггад кӕнын (Матф. 10:16, 17, 27, 28). Йесо йӕ фӕдылдзӕуджытӕн куыд баххуыс кодта ӕмӕ йӕ нӕ бон цӕмӕй у бафӕзмын?

16. Нӕ бон куыд у адӕймаджы ахуыр кӕнын, цӕмӕй, цӕуыл баууӕндыд, уыдӕтты тыххӕй иннӕтӕн дзура?

¹⁶ Гыццылгай йӕ ахуыр кӕн, цӕмӕй, цӕуыл баууӕндыд, уыдӕтты тыххӕй иннӕтӕн дӕр дзура. Йесо йӕ ахуыргӕнинӕгты хъусын кӕнынмӕ куы арвыста, уӕд, ӕвӕццӕгӕн, тыхстысты. Фӕлӕ сын баххуыс кодта. Загъта сын, кӕмӕн хъуамӕ хъусын кӕной ӕмӕ адӕмӕн цы хъуамӕ дзурой (Матф. 10:5–7). Дӕ бон куыд у Йесойы бафӕзмын? Кӕимӕ ахуыр кӕныс, уымӕн баххуыс кӕн, цӕмӕй ахъуыды кӕна, йӕ  бон хъусын кӕнын кӕмӕн у, ууыл. Зӕгъӕм, ис ӕй бафӕрсӕн, зӕгъгӕ, цы базыдтай, уый кӕмӕн баххуыс кӕнид. Уый фӕстӕ йын равдис, уый хуымӕтӕгӕй йӕ бон куыд у саразын. Афтӕмӕй йын баххуыс кӕндзынӕ, цӕмӕй цӕттӕ уа искӕимӕ аныхас кӕнынмӕ. Уӕ бон ма у иумӕ афӕлварын, адӕймагимӕ куыд аныхас кӕндзӕн, уый. Баххуыс уын кӕндзысты, чиныджы «Амондджынӕй цӕр ӕнустӕм!» цы рубрикӕтӕ ис, уыдон. Хуыйнынц «Иуӕй-иутӕ фӕзӕгъынц» ӕмӕ «Исчи дӕ куы бафӕрса». Сахуыр ӕй кӕн, цӕмӕй Библийы фӕрцы йӕ бон уа хуымӕтӕг дзуаппытӕ дӕттын ӕмӕ фӕлмӕнӕй ныхас кӕнын.

17. Матфейы 10:19, 20, 29–31 стихты фӕрцы нӕ бон куыд у адӕймагӕн баххуыс кӕнын, цӕмӕй сахуыр уа йӕ зӕрдӕ Йегъовӕйыл дарын?

¹⁷ Сахуыр ӕй кӕн йӕ зӕрдӕ Йегъовӕйыл дарын. Йесо йӕ ахуыргӕнинӕгтӕн ныфс бавӕрдта, Йегъовӕ сын кӕй ӕххуыс кӕндзӕн, уымӕн ӕмӕ сӕ уарзы. (Бакӕс Матфейы 10:19, 20, 29–31.) Ӕмӕ, кӕимӕ ахуыр кӕныс, уымӕн-иу йӕ зӕрдыл ӕрлӕууын кӕн, Йегъовӕ уымӕн дӕр кӕй ӕххуыс кӕндзӕн. Цы нысӕнттӕ йын ис, уыдоны тыххӕй йемӕ куы кувай, уӕд афтӕмӕй дӕр сахуыр уыдзӕн йӕ ныфс Йегъовӕйыл дарын. Ӕфсымӕр Францишек цӕры Польшӕйы. Уый афтӕ зӕгъы: «Мемӕ Библи чи ахуыр кодта, уыцы ӕфсымӕр-иу йӕ куывдтыты арӕх скодта мӕ нысӕнтты кой. Йегъовӕ йын йӕ куывдтытӕн дзуапп куыд лӕвӕрдта, уый уыдтон, ӕмӕ йӕм ӕз дӕр кувын райдыдтон. Куы-иу мӕ хъуыди мӕхи мӕ ног куыстӕй ракурын, цӕмӕй-иу ӕмбырдтӕм кӕнӕ конгресмӕ ацыдаин, уӕд-иу ӕй уыдтон, Йегъовӕ мын кӕй ӕххуыс кӕны».

18. Искӕимӕ Библи чи ахуыр кӕны, уыцы хъусынгӕнджыты фыдӕбонмӕ Йегъовӕ цы цӕстӕй кӕсы?

¹⁸ Библи кӕимӕ ахуыр кӕнӕм, уыцы адӕмӕн Йегъовӕ тынг аргъ кӕны. Ӕмӕ, семӕ чи ахуыр кӕны, уыцы хъусынгӕнджыты дӕр тынг уарзы, уымӕн ӕмӕ уыны, куыд фыдӕбон кӕнынц. Уыдон уыцы адӕмӕн ӕххуыс кӕнынц, цӕмӕй Хуыцаумӕ баввахс уой (Ис. 52:7). Чи зоны, ныртӕккӕ дӕхӕдӕг Библи никӕимӕ ахуыр кӕныс. Фӕлӕ дӕ бон у иннӕ хъусынгӕнджытимӕ сӕ Библийы ахуыртӕм цӕуын. Афтӕмӕй, кӕимӕ ахуыр кӕнынц, уыцы адӕмӕн ӕххуыс кӕндзынӕ, цӕмӕй сӕ уырнындзинад фидар кӕна, ӕмӕ ӕппынфӕстаг донаргъуыд райсой.