1. Апостол Петур, Йерусалими ка ӕрӕмбурд ӕй, еци адӕнӕн ци загъта?

ЕУХАТТ Йерусалими хъӕбӕр берӕ адӕн ӕрӕмбурдӕй. Еци адӕн адтӕнцӕ аллихузи бӕститӕй ӕма аллихузи ӕвзӕгтӕбӕл дзурдтонцӕ. Еци рӕстӕг еу дессаг сӕхе цӕститӕй фӕууидтонцӕ. Хумӕтӕг ӕма ахургонд ка н’ адтӕй, уӕхӕн дзиуиттӕгтӕ аллихузи ӕвзӕгтӕбӕл исдзурдтонцӕ. Фал сӕмӕ никки дессагдӕр ба фӕккастӕй, ци дзурдтонцӕ, е. Апостол Петур син загъта, Йесо Киристебӕл ку баууӕндонцӕ, уӕд ервӕзт ке уодзӕнцӕ. Петури дзурдтӕ сӕ зӕрдӕмӕ хъӕбӕр багъардтонцӕ ӕма ’й бафарстонцӕ: «Ци кӕнгӕ нин ӕй?» Петур ба син загъта: «Алкедӕр [уи]... донаргъуд райсӕд» (Гъуд. 2:37, 38).

2. Аци статьяй ци базондзиан? (Кӕсӕ хузӕмӕ ӕндаг цъарӕбӕл.)

² Еци бон 3 000 адӕймаги донаргъуд райстонцӕ ӕма иссӕнцӕ Йесо Киристей ахуркӕнуйнӕгтӕ. Гъе уӕд райдӕдта, Йесо ӕ фӕдбӕлдзӕугутӕн ке бафӕдзахста, еци куст – ахуркӕнуйнӕгтӕ цӕттӕ кӕнуни куст, ӕма абони уӕнгӕ дӕр цӕуй. Фал абони адӕймаги цалдӕр сахаттемӕ донаргъудмӕ нӕ бацӕттӕ кӕндзӕнӕ. Уомӕн дзӕвгарӕ фулдӕр рӕстӕг гъӕуй, кӕми мӕйтӕ, кӕми ба ӕнзтӕ дӕр. Адӕймаги донаргъудмӕ бацӕттӕ кӕнун минкъий куст нӕй. Аци статьяй базондзиан, нӕ бон куд ӕй, Библи ка ахур кӕнуй, уонӕн банхус кӕнун, цӕмӕй донаргъуд райсонцӕ ӕма Киристей фӕдбӕлдзӕугутӕ исуонцӕ.

3. Матфеййи 28:19, 20 куд финст ӕй, уомӕ гӕсгӕ ахуркӕнуйнаги ци кӕнун гъӕуй, цӕмӕй донаргъуд райса?

³ Донаргъуд райсуни размӕ бал ахуркӕнуйнаг гъӕуама ӕ царди пайда кӕнун райдайа, Библийӕй ци базудта, уомӕй.  (Бакӕсӕ Матфеййи 28:19, 20.) Ӕма уӕд уодзӕй, «хӕдзарӕ кӕнгӕй арф ка никъкъахта ӕма ӕ хӕдзарӕн бундор къӕдзӕхбӕл ка ниввардта, уӕхӕн лӕги хузӕн» (Матф. 7:24, 25; Лук. 6:47, 48). Мах бон ба куд ӕй адӕймагӕн банхус кӕнун, цӕмӕй Библийӕй ци базудта, уомӕ гӕсгӕ архайун райдайа? Гъӕйдӕ ӕркӕсӕн ӕртӕ унаффемӕ.

4. Нӕ бон куд ӕй ахуркӕнуйнаги донаргъудмӕ цӕттӕ кӕнун? (Кӕсӕ ма рамкӕ « Ахуркӕнуйнагӕн ӕнхус кӕнӕ нисӕнттӕ ӕвӕрун ӕма сӕмӕ тундзун».)

⁴ Ахуркӕнуйнагӕн нисӕнттӕ ӕвӕрунмӕ ӕнхус кӕнӕ. Е ӕхсидзгӕ цӕмӕн ӕй? Дӕ цӕститӕбӕл рауайун кӕнӕ, цума дӕхе идард балцимӕ цӕттӕ кӕнис. Ӕвӕдзи, ци рауӕнмӕ ӕма кутемӕй бахъӕртдзӕнцӕ, айдагъ уобӕл нӕ сагъӕс кӕндзӕнӕ, фал ма надбӕл цӕхуӕн рӕсугъд бунӕттӕ ӕнгъезуй фӕууинун, уобӕл дӕр. Ӕма еци рӕсугъд бунӕтти рази ӕрлӕууӕ-ӕрлӕууӕ кӕнгӕ ке цӕудзӕнӕ, уой фӕрци еци даргъ надӕй уотӕ хъӕбӕр нӕ бафӕллайдзӕнӕ. Гъе уотӕ, Библи ке хӕццӕ ахур кӕнис, е дӕр, цубур рӕстӕгмӕ ӕ къохи ка бафтуйдзӕй, уӕхӕн нисӕнттӕ ку ӕвӕра, уӕд имӕ донаргъуд райсун дӕр уотӕ идард ӕма ӕнӕбахъӕртгӕ нисан нӕ кӕсдзӕй. Уомӕ гӕсгӕ киунуги «Радуйтесь жизни сейчас и вечно!» ес рамкитӕ «Мои цели», зӕгъгӕ. Ӕма алли ахури кӕрон дӕр дӕ бон ӕй адӕймаги хӕццӕ радзорун, еци нисӕнттӕ ин куд банхус кӕндзӕнцӕ, ци базудта, уомӕ гӕсгӕ архайун. Кӕд ма ’й никкидӕр цидӕр ӕййивддзийнӕдтӕ гъӕуй искӕнун, уӕд уой ба бафинсетӕ рамки «Другие», зӕгъгӕ. Еци рамки фӕрци дӕр адӕймагӕн ӕнхус кӕнӕ, цубур рӕстӕгмӕ ӕ къохи ка бафтуйдзӕй, уӕхӕн нисӕнттӕ ӕвӕрун, удта фулдӕр рӕстӕг кӕбӕл багъӕудзӕй уӕхӕнттӕ дӕр.

5. Марки 10:17–22 куд финст ӕй, уомӕ гӕсгӕ Йесо гъӕздуг лӕгӕн ци загъта ӕма цӕмӕн?

⁵ Ахуркӕнуйнагӕн ӕййивддзийнӕдтӕ кӕнунмӕ ӕнхус кӕнӕ. (Бакӕсӕ Марки 10:17–22.) Йесо ӕй зудта, гъӕздуг лӕгӕн ӕ  мулк рауӕйӕ кӕнун ӕма ӕхца мӕгуртӕбӕл байуарун куд зин уодзӕй, уой (Мар. 10:23). Фал ин ӕй уӕддӕр ӕргом загъта, уотӕ бакӕнун ӕй ке гъӕудзӕй. Цума цӕмӕн? Уомӕн ӕма ин ӕ хуарзбӕл тухстӕй. Хатгай нӕмӕ уотӕ фӕккӕсуй, ӕма адӕймаг цӕттӕ нӕма ӕй ӕййивддзийнӕдтӕ кӕнунмӕ, ӕма ин уомӕ гӕсгӕ нецима фӕдздзорӕн. Дзубанди дӕр ибӕл нӕййес, адӕймаги рӕстӕг гъӕуй, цӕмӕй берӕ ӕнзтӕ ке кодта, еци гъуддӕгтӕ ниууадза ӕма ӕ уодигъӕдӕ нӕуӕгмӕ раййева (Кол. 3:9, 10). Фал ӕй цӕхуӕн ӕййивддзийнӕдтӕ гъӕудзӕй искӕнун, уобӕл куд раздӕр радзорӕн, уотӕ сӕбӕл архайун дӕр раздӕр райдайдзӕй. Удта уотемӕй бавдесдзиан, адӕймагбӕл ӕцӕгӕйдӕр ке тухсӕн (Пс. 141:5; Ӕмб. 27:17).

6. Адӕймагмӕ фарстатӕ дӕттун цӕмӕн гъӕуй?

⁶ Хъӕбӕр ӕхсидзгӕ ӕй, цӕмӕй ахури рӕстӕг адӕймаг, ци гъуди кӕнуй, уой дзора. Уомӕ гӕсгӕ имӕ уӕхӕн фарстатӕ дӕттӕ, цӕмӕй ӕй балӕдӕрай, цӕбӕл ӕууӕндуй, удта ӕрмӕг хуарз лӕдӕруй ӕви нӕ, уой. Адӕймаг аллихузи фарстатӕбӕл дзуӕппитӕ дӕттун ку исахур уа, уӕд ин уотемӕй, зиндӕр дзорӕн кӕбӕл ӕй, уӕхӕн темитӕбӕл дзорун дӕр ӕнцондӕр уодзӕй. Киунуги «Радуйтесь жизни сейчас и вечно!», адӕймаги гъуди базонунмӕ берӕ фарстатӕ ес. Зӕгъӕн, 4 сӕри уӕхӕн фарста ес, «Что, по-вашему, чувствует Иегова, когда вы обращаетесь к нему по имени?», 9 ба – «О чём бы вы хотели помолиться?». Фиццӕгти адӕймагӕн, ӕвӕдзи, зин уодзӕй уӕхӕн фарстатӕбӕл дзуапп дӕттун. Фал ин ӕнхус кӕнӕ. Зӕгъисӕ ин, цӕмӕй расагъӕс кӕна, ци стихтӕ ӕма си хузтӕ ес, етӕ сӕйраг теми хӕццӕ куд баст ӕнцӕ, уобӕл.

7. Нӕ бон куд ӕй еске царди хабӕрттӕй пайда кӕнун?

⁷ Дӕ ахуркӕнуйнаг ӕй ку лӕдӕра, раййевун ӕй кӕми гъӕуй, уой, фал ку неци архайа, уӕд ин дӕ бон ӕй еске царди хабӕрттӕ цӕветтонӕн ӕрхӕссун. Зӕгъӕн, алли ӕмбурдмӕ нӕ фӕццӕуй. Уӕхӕн уавӕри ин дӕ бон ӕй бавдесун видеоролик «Иегова заботился обо мне». Иссерӕн ӕй ес 14 сӕри, рамки «Дополнительно». Уӕхӕн видеороликтӕмӕ ссылкитӕ аци киунуги берӕ ес ӕма уодзӕнцӕ рамки «Дополнительно» кенӕ ба хаййи «Копните глубже» *. Ӕрмӕст лӕмбунӕг уо ӕма адӕймаги еске хӕццӕ ма барӕ, удта ин уотӕ дӕр ма дзорӕ: «Кӕд уой бон иссӕй, уӕд дӕу бон дӕр исуодзӕй». Уой адӕймаг гъӕуама ӕхуӕдӕг балӕдӕра. Дӕ бон ӕй ахуркӕнуйнагӕн ӕ гъос ӕрдарун видеороликки сӕйраг гъудитӕмӕ, цӕхуӕндӕр стихмӕ кенӕ си ке кой цудӕй, еци адӕймаг Библийӕй ци базудта, уомӕй царди куд испайда кодта ӕма ин Йеговӕ куд ӕнхус кодта, уомӕ.

8. Нӕ бон куд ӕй адӕймагӕн банхус кӕнун, цӕмӕй Йегови бауарза?

⁸ Ахуркӕнуйнагӕн ӕнхус кӕнӕ, цӕмӕй Йегови бауарза. Арӕхдӕр ин Йегови менеугутӕмӕ е ’ргом раздахисӕ, цӕмӕй ӕй балӕдӕра, Йеговӕ амондгун Хуцау ке ӕй, удта ’й ка уарзуй, уонӕн ӕнхус ке кӕнуй (1 Тим. 1:11; Дзиуит. 11:6). Адӕймагӕн балӕдӕрун кӕнӕ, Библийӕй ци базонуй, уомӕ гӕсгӕ ку архайа, уӕд ин е пайдайӕй уӕлдай ке неци ӕрхӕсдзӕй ӕма е, Йеговӕ ’й берӕ ке уарзуй, уобӕл дзорӕг ке ӕй (Ис. 48:17, 18). Ахуркӕнуйнаг Йегови куд фулдӕр уарза, уотӕ ’й хъӕбӕрдӕр фӕнддзӕй ӕ цард Библий уагӕвӕрдтӕмӕ гӕсгӕ ӕййевун (1 Иоан. 5:3).

9. Марки 10:29, 30 финст дзурдтӕ адӕймагӕн куд банхус кӕндзӕнцӕ, цӕмӕй ма тӕрса, ци ӕййивддзийнӕдтӕ искӕнун ӕй гъӕудзӕй, уонӕй?

⁹ Цӕмӕй адӕймаг донаргъуд райса, уой туххӕй ӕй ӕ царди цидӕртӕ раййевун гъӕудзӕй  ӕма е алкӕд ӕнцон нӕ фӕууй. Йесо ке хӕццӕ дзурдта, еци гъӕздуг лӕг дӕр уӕхӕн уавӕри адтӕй. Ка ’й зонуй, адӕймаги багъӕудзӕй ӕ куст раййевун, уомӕн ӕма уоми ку коса, уӕд Библий уагӕвӕрдти сӕрти хездзӕй. Кенӕ ба ’й багъӕудзӕй, Йегови ка нӕ уарзуй, еци ӕмбӕлттӕй ӕхе райеуварс кӕнун. Кенӕ ба ӕ хеуӕнттӕ ӕ нихмӕ рацӕудзӕнцӕ. Йесо ӕргом дзурдта, ӕ фӕдбӕл цӕун ӕнцон ке нӕ уодзӕй, фал зӕрдӕ байвардта, ка рацӕуа, е ке нӕ фӕффудӕнгъӕл уодзӕй. Йеговӕ ин райарфӕ кӕндзӕй ӕма ин ратдзӕй, бийнонти хузӕн ин ка исуодзӕй берӕ уӕхӕн хуӕртӕ ӕма ӕнсувӕртӕ. (Бакӕсӕ Марки 10:29, 30.) Мах бон ба ин куд ӕй банхус кӕнун?

10. Мануэли хабарӕй цӕбӕл ахур кӕнтӕ?

¹⁰ Ахуркӕнуйнагӕн е ’мбал исуо. Адӕймаг ӕй гъӕуама лӕдӕра, ӕцӕгӕйдӕр ибӕл ке тухсӕн, уой. Мексикӕй еу ӕнсувӕр Мануэль зӕгъуй: «Мӕ хӕццӕ Библи ка ахур кодта, еци ӕнсувӕр мӕ алли ахури разӕй дӕр рафӕрсидӕ, куд дӕн ӕма мӕмӕ ци хабӕрттӕ ес, уобӕл. Нӕ ахури размӕ уотӕ ке радзубандитӕ кӕнианӕ, уой фӕрци цӕбӕлфӕнди дӕр мӕ бон адтӕй ӕ хӕццӕ дзорун. Уидтон ӕй, ӕцӕгӕйдӕр мӕбӕл ке тухстӕй, уой».

11. Ахуркӕнуйнаги хӕццӕ рӕстӕг ку ӕрветӕн, уӕд ин е ци пайда ӕрхӕсдзӕй?

¹¹ Йесо ӕ ахуркӕнуйнӕгти хӕццӕ рӕстӕг ӕрвиста, ӕма дӕу бон дӕр ӕй уотӕ архайун (Иоан. 3:22). Адӕймагбӕл бӕрӕг ку уа, Библий уагӕвӕрдтӕмӕ гӕсгӕ архайун ӕй ке фӕндуй, уӕд ӕй дӕ бон ӕй уӕхемӕ ӕрбахонун ӕма фӕйнӕ чаййи рацумун кенӕ ба бакӕсун программӕмӕ JW Broadcasting^®. Уӕлдайдӕр ба ’й бӕрӕгбӕнтти рӕстӕг хуарз уайдӕ ӕрбахонун, цӕмӕй ма ӕнкъард кӕна. Угандӕй еу ӕнсувӕр Казибве зӕгъуй: «Мӕ хӕццӕ Библи ка ахур кодта, еци ӕнсувӕри хӕццӕ рӕстӕг ӕрветгӕй Йегови туххӕй цӕйбӕрцӕ цидӕртӕ базудтон, уойбӕрцӕ, ӕвӕдзи, нӕ ахури рӕстӕг дӕр нӕ базудтон. Уидтон ӕй, Йеговӕ ӕ лӕггадгӕнгутӕбӕл куд тухсуй ӕма ци амондгун адӕн ӕнцӕ, уой. Ӕма мӕн дӕр уотӕ цӕрун фӕндадтӕй».

12. Ахурмӕ аллихузи хуӕртӕ ӕма ӕнсувӕрти хонун цӕмӕн гъӕуй?

 ¹² Ахурмӕ аллихузи хуӕртӕ ӕма ӕнсувӕрти хонӕ. Ка ’й зонуй нин ӕнцондӕр ӕй ахур еунӕгӕй рауадзун кенӕ ба еци еу адӕймаги хӕццӕ цӕун. Фал ахуркӕнуйнагмӕ аллихузи хуӕртӕ ӕма ӕнсувӕрти хӕццӕ ку цӕуӕн, уӕд ин е фулдӕр пайда ӕрхӕсдзӕй. Е бӕрӕг ӕй, Молдовӕй еу ӕнсувӕр Дмитриййи дзурдтӕй: «Алли адӕймаг дӕр ести гъуди лӕдӕрун кӕнгӕй, ӕхе зӕрдӕн хӕстӕгдӕр ка ӕй, уӕхӕн цӕветтонтӕ ӕрхӕссидӕ. Уой фӕрци мӕ бон адтӕй ӕрмӕгбӕл ӕллирдиги расагъӕс кӕнун. Удта фиццаг хатт ӕмбурдмӕ ку цудтӕн, уӕд дӕр уотӕ хъӕбӕр нӕ тухстӕн, уомӕн ӕма си берети фӕсмардтон».

13. Адӕймаги ӕмбурдтӕмӕ цӕунмӕ разӕнгард кӕнун цӕмӕн гъӕуй?

¹³ Ахуркӕнуйнаги разӕнгард кӕнӕ ӕмбурдтӕмӕ цӕун. Е ӕхсидзгӕ цӕмӕн ӕй? Уомӕн ӕма Йеговӕ ӕхуӕдӕг бафӕдзахста ӕ лӕггадгӕнгутӕн еумӕ ӕмбурд кӕнун. Не ’мбурдтӕ дӕр нӕ лӕггадӕмӕ хаунцӕ (Дзиуит. 10:24, 25). Удта хуӕртӕ ӕма ӕнсувӕрти хӕццӕ кӕрӕдзебӕл ци тӕгтӕй баст ан, уой ӕнгъезуй рабарун, бийнонтӕ кӕрӕдзебӕл куд баст фӕуунцӕ, уой хӕццӕ. Ӕмбурдмӕ ку ’рбацӕуӕн, уӕд фӕууӕн, еу фингӕбӕл ка ӕрӕмбурд уй, уӕхӕн бийнонти хузӕн. Мадта адӕймаг ӕмбурдтӕмӕ цӕун ку райдайа, уӕд донаргъудмӕ еу къахдзӕф фӕххӕстӕгдӕр уодзӕй. Фал е алкӕмӕн ӕнцон нӕ фӕууй. Цума син еци гъуддаги киунугӕ «Радуйтесь жизни сейчас и вечно!» куд банхус кӕндзӕй?

14. Нӕ бон куд ӕй адӕймаги разӕнгард кӕнун, цӕмӕй ӕмбурдтӕмӕ цӕун райдайа?

¹⁴ Ӕмбурдтӕмӕ цӕун куд ӕхсидзгӕ ӕй, уобӕл дзурд цӕуй 10 сӕри, киунуги «Радуйтесь жизни сейчас и вечно!». Аци киунугӕ ку нӕма рауагътонцӕ, уӕд цалдӕр фӕлтӕрдгун игъосунгӕнӕги сӕ Библий ахурти бавзурстонцӕ 10 уроккӕй испайда кӕнун, ӕма загътонцӕ, устур ӕнхус син ке фӕцӕй. Ке зӕгъун ӕй гъӕуй, цӕмӕй адӕймаги ӕмбурдмӕ фӕххонай, уой туххӕй 10 сӕрмӕ кӕд бахъӕртдзиайтӕ, уой хезун нӕ гъӕуй. Ӕмбурдти туххӕй ин куд раздӕр райдайай дзорун, уотӕ хуӕздӕр. Алли адӕймагмӕ дӕр ӕхе зиндзийнӕдтӕ фӕууй. Ӕма бал ӕй базонӕ, адӕймаги ӕмбурдтӕмӕ цӕунмӕ ци хъор кӕнуй ӕма расагъӕс кӕнӕ, дӕ бон ин банхус кӕнун куд ӕй, уобӕл. Фиццӕгти ку нӕ кома, уӕд дӕ нифс ма расӕттӕд. Фӕразон уо ӕма идарддӕр архайӕ.

15. Библи ка ахур кӕнуй, етӕ арӕх цӕмӕй фӕттӕрсунцӕ?

¹⁵ Дӕхе ӕргъуди кӕнай. Ӕвӕдзи, дӕу дӕр нецибал фӕгъгъӕуидӕ, игъосун кӕнун дӕ ке гъӕудзӕй, уобӕл ку расагъӕс кӕнисӕ, уӕд. Кенӕ ба, ӕвӕдзи, тухстӕ, Йегови Ӕвдесӕн ку исуай, уӕд уомӕ де ’мбӕлттӕ ӕма дӕ хеуӕнттӕ ци цӕстӕй ракӕсдзӕнцӕ, уобӕл. Кӕд уотӕ адтӕй, уӕд, ӕвӕдзи, нур Библи ке хӕццӕ ахур кӕнис, уой дӕр хуарз лӕдӕрис. Йесо ӕй зудта, ӕ ахуркӕнуйнӕгтӕй еуӕй-еуетӕ тӕрсгӕ ке кӕндзӕнцӕ, ӕма сӕ фӕдзахста, цӕмӕй сӕ еци тас Йеговӕй ма раидард кодтайдӕ (Матф. 10:16, 17, 27, 28). Йесо ӕ ахуркӕнуйнӕгтӕн куд ӕнхус кодта, цӕмӕй ма тарстайуонцӕ? Ӕма ’й нӕ бон фӕнзун куд ӕй?

16. Нӕ бон куд ахуркӕнуйнаги цӕттӕ кӕнун, цӕмӕй ци базудта, уой иннетӕн дзорун райдайа?

¹⁶ Адӕймаги сабургай цӕттӕ кӕнӕ, ци базудта, уой иннетӕн дзорунмӕ. Йесо ӕ ахуркӕнуйнӕгти фиццаг хатт игъосун кӕнунмӕ ку рарвиста, уӕд, ӕвӕдзи, хъӕбӕр тухстӕнцӕ. Цума син ци банхус кодта? Йесо син балӕдӕрун кодта, кумӕ син цӕугӕ ’й ӕма  син ци дзоргӕ ’й, уой (Матф. 10:5–7). Нӕ бон куд ӕй Йесой фӕнзун? Ахуркӕнуйнагӕн бӕлӕдӕрун кӕнӕ, ӕ бон кӕмӕн ӕй игъосун кӕнун, уой. Ахури рӕстӕг ӕй бафӕрсӕ, ци гъудитӕмӕ ӕркастайтӕ, етӕ ӕ зонгитӕй пайда кӕмӕн уодзӕнцӕ, уобӕл. Уой фӕсте ба ин дӕхуӕдӕг бавдесӕ, еци гъудитӕ хумӕтӕг дзурдтӕй куд ӕнгъезуй балӕдӕрун кӕнун, уой. Фӕстагмӕ ба, куд дзордзӕй, уой дӕубӕл равзарӕд. Киунуги «Радуйтесь жизни сейчас и вечно!» ма уӕ бон ӕй ӕркӕсун рамкитӕмӕ «Некоторые говорят» кенӕ «Кто-то может спросить». Адӕймагӕн лӕдӕрун кӕнӕ, адӕни хӕццӕ дзоргӕй куд ӕхсидзгӕ ӕй Библийӕй пайда кӕнун, удта фӕлмӕнӕй ӕма уӕзданӕй дзорун.

17. Нӕ бон куд ӕй Матфеййи 10:19, 20, 29–31 финст дзурдти фӕрци адӕймагӕн банхус кӕнун, цӕмӕй ӕ зӕрдӕ Йеговӕбӕл дарун райдайа?

¹⁷ Адӕймаги ахур кӕнӕ ӕ зӕрдӕ Йеговӕбӕл дарун. Йесо ӕ ахуркӕнуйнӕгтӕн зӕрдӕ байвардта, Йеговӕ син ке ӕнхус кӕндзӕй, уомӕн ӕма сӕ берӕ уарзуй. (Бакӕсӕ Матфеййи 10:19, 20, 29–31.) Адӕймагӕн ӕ зӕрдӕбӕл ӕрлӕуун кӕнисӕ, Йеговӕ ’й ке нӕ ниууаддзӕй ӕма ин ӕнхус ке кӕндзӕй. Дӕ бон ӕй ӕ хӕццӕ ковун, цӕмӕй ӕ нисӕнттӕ ӕ къохи бафтуйонцӕ. Польшӕй еу ӕнсувӕр Францишек загъта: «Мӕ хӕццӕ Библи ка ахур кодта, еци ӕнсувӕр арӕх фӕкковидӕ, мӕ нисӕнттӕ мӕ къохи куд бафтуйонцӕ, уобӕл. Уидтон ӕй, Йеговӕ ин ӕ кувдтитӕбӕл куд дзуапп кодта, уой, ӕма имӕ мӕхуӕдӕг дӕр ковун райдӕдтон. Ӕмбурди кенӕ конгресси туххӕй мӕ мӕхе кустӕй ракорун ку фӕгъгъӕуидӕ, уӕд мин Йеговӕ хъӕбӕр ӕнхус кӕнидӕ».

18. Йеговӕ ахуркӕнуйнӕгтӕ цӕттӕ кӕнуни гъуддагмӕ цӕхуӕн цӕстӕй кӕсуй?

¹⁸ Йеговӕ хъӕбӕр тухсуй, Библи ка ахур кӕнуй, уонӕбӕл. Уинуй ӕй, ӕ лӕггадгӕнгутӕ ахуркӕнуйнӕгтӕн банхус кӕнунбӕл куд архайунцӕ, уой (Ис. 52:7). Гъӕйдӕ мадта аци статьяй унаффитӕй пайда кӕнӕн, еске хӕццӕ Библи ку ахур кӕнӕн, уӕд. Уотемӕй ахуркӕнуйнӕгтӕн ӕнхус кӕндзиан, цӕмӕй рӕстдзийнади надбӕл ӕрфедар уонцӕ ӕма донаргъуд райсонцӕ.