1. A redisaiplo er a Jesus ngngera te dilu er a klou el ildois er a rechad?

A KLOU el ildois er a resechal me a redil a mlora Jerusalem. Tirka mle chad er a kakerous el beluu e melekoi a betok el kakerous el omelekoi. Ngar ngii a mengasireng el tekoi el dilubech er tiakid el sils. A Rechijudea el dimlak a skulir a mlo sebechir el melekoi a omelekingir! Me alta tia kmal mle mengasireng el tekoi engdi aike el lullekoi tirka el Chijudea me a apostol Petrus a lmuut el mengasireng. Tia el seked a silubii el kmo ngsebechir el mo suobel a lsekum te mo oumerang er a Jesus Kristus. Tia el klumech a kmal rirutech a rengrir. Te uleker el kmo: “A ki mekerang?” Me a Petrus a dilu er tir el kmo: “Ar derta er kemiu . . . bo metecholb.”​—Rel. 2:37, 38, BT.

2. Ngera kede mo mesaod er tia el suobel? (Momes er a siasing er a medal tia el babier.)

² A ongingil tekoi el dilubech a dirrek el kmal mengasireng. Te bekord el 3,000 el chad a miltecholb er tiakid el sils el mo disaiplo er a Kristus. Tia mle uchelel a ureor er a omeruul el disaiplo el Jesus a dilu er a rultirakl er ngii el mo meruul er ngii. Tia el lureor a melemolem el mei er chelecha el taem. Me nguaisei engdi ngdiak el sebechel a chad er chelecha el taem el rongesii a klemerang e metecholb er a chelsel a di sesei el sikang. A chad a locha mo mesuub el betok el buil, ta el rak, me a lechub e nglmuut el kemanget el taem e mo metecholb. Ngmeringel el ureor a dolengeseu er a chad el mesuub el mo nguu a techolb. Ke locha mtebengii tiang a lsekum e ke mesuub lobengkel a chad. Ngar tia el suobel e kede mo mesaod aike el sebechem el meruul el ngosuir a chad el mosuub lobengkel el mo nguu a techolb.

3. El ua lolekoi a Mateus 28:19, 20, ngngera kirel a study er kid el meruul er ngii me lolengeriakl el mo nguu a techolb?

³ A uchei er a lemetecholb a chad e ngkirel el mo oltaut aike el lolisechakl a Biblia. (Monguiu er a Mateus 28:19, 20.) A study er kid sel bo loltaut aike el losuub, e ngmo ua ngike el “mellomes a rengul chad” er a okesiu er a Jesus el mle kiesii a chutem el mo dmolech e loia uchetemel a blil er a risois. (Mt. 7:24, 25; Lk. 6:47, 48) Kede mekera ngosuir a chad el mo oltaut aike el losuub? Ka me bo dosaod a edei el tekoi.

4. Ngmekera sebechem el ngosuir a study er kau el melemolem el olengeriakl el mo nguu a techolb? (Dirrek el momes er a baks el “ Mngesuir a Chad el Mosuub el Lobengkel el Mo Meruul e Oltaut a Turrekong er Ngii.”)

⁴ Mngesuir el mo meruul a turrekong er ngii. Ngera uchul me ngkired el meruul er tiang? Molatk er tia el okesiu: A lsekum e ke mora kemanget el omerael e ke locha mo stob er a bebil basio. Seikid e ngdiak el bo el mesaul a rengum er tia el kemanget el omerael. Me ngdi osisiu, a chad el mesuub sel leruul e lotaut a mekekerei el turrekong er ngii e ngmo sebechel mesa el kmo ngsebechel nguu a techolb. Mousbech er sel “Goal” el feature el ngar er a Enjoy Life Forever! el book el ngosuir a study er kau el mo meruul a turrekong. Ngar a ulebengelel a bek lomesubiu e mngesuir el mesa rolel e a turrekong er ngii a ngosuir el mo oltaut aike el losuub. A lsekum e ngngar ngii a ngodech el turrekong el soam el kirel a study er kau e mlechesii er cheungel a “Other.” Bo blechoel lousbech er tiakid el taem er a uriul er a omesubiu el mesaod a mekekerei me a meklou el turrekong er ngii.

5. El ua lolekoi a Markus 10:17-22, ngngera ngdilu Jesus el mora ta el merau el chad? E ngera uchul?

⁵ Mngesuir el melodech er a klengar er ngii. (Monguiu er a Markus 10:17-22.) A Jesus a mle medengei el kmo ngmeringel er a  merau el chad a mo olterau a rokui el kloklel. (Mk. 10:23) Me nguaisei engdi a Jesus a dilu er ngii el chad el mo meruul er tia el klou el omelodech er a klengar er ngii. E ngera uchul? E le Jesus a mle betik a rengul er ngii. A lebebil e ngmo diak dolisiich er a study er kid el mo oltaut a tekoi el losuub e le kede omdasu el kmo ngdirkak el bo el sebechel el meruul aika el omelodech. A rechad a locha ousbech a taem el mo medobed aike el dimla blekerdelir e mo oubail er ngike el beches el chad. (Kol. 3:9, 10) Me nguaisei, engdi a lsekum kede mereched el mo mesaod aika el tekoi el obengkel, e ngii a mo mereched el meruul aika el omelodech. Sel mosaod aika el tekoi el obengkel e ke ochotii el kmo, ke mera el omekerreu er ngii.​—Psa. 141:5; Osi. 27:17.

6. Ngera uchul me ngkired loker er a uldesuel a chad el dosuub el obengkel?

⁶ Ngkmal klou a ultutelel el doker er a chad el dosuub el obengkel er a uldesuel el kirel a tekoi. Tia mo ocholt aike el lodengei me aike el loumerang. Sel bo blechoel el meruul el uaisei e ngmo beot er kau a mesaod aike el tekoi el meringel er ngii er a ngar medam. Sel book el Enjoy Life Forever! a kmal betok a ungil el ker ngii. El ua tiang, a 04 el suobel a oker el kmo: “Omomdasu e ngmo uangera uldesuel a Jehovah sel mousbech er a ngklel?” A 09 el suobel a oker el kmo: “Ngera bebil tekoi el soam el meluluuch el kirel?” A uchelel e a study er kau a locha mo ousbech a taem el melatk e onger chouaika el ker. Ngsebechem el olengeseu er ngii loeak sel mosisecheklii el mo meduch el melatk a bades me a siasing el ngar er a babier el mousbech er ngii el mesuub.

7. Ngmekera sebeched el mo ungil lousbech a experience er a rechad?

⁷ A chad el mosuub lobengkel sel bo lodengei aike el kirel meruul e mousbech a experience er a rechad el mo melisiich er ngii el mo oltaut. El ua tiang, a chad el mosuub lobengkel a meringel er ngii a mei er a miting. Ngsebechem lochotii er ngii sel video el Jehovah Cared for Me el ngar cheungel a “Explore” er a 14 el suobel. Ngar er a chelsel aike el betok el suobel er a book el Enjoy Life Forever! e ngsebechem el metik chouaika el experience er cheungel a “Dig Deeper” me a lechub e ng “Explore.” * Mkerekikl me lak bo momekesiu er a study er kau er a rebebil e molekoi er ngii el kmo, “A lsekum e ngika sebechel, e kau me ngdirrek el sebechem.” Becherei a chad el mesuub me di lengii el mo mtebengii tia el tekoi. Bai mosaod a tekoi el ngar er a video el ngilsuir a chad el mo oltaut a osisechakl er a Biblia. Nglocha sebechem el mesaod er a bades me a lechub e ngtekoi lerirellii a chad er a video. E sel sebechel, e mosaod er a rolel e a Jehovah a ngilsuir a chad.

8. Kede mekera e ngosuir a chad el dosuub lobengkel el mo betik a rengul er a Jehovah?

⁸ Mngesuir el mo betik a rengul er a Jehovah. Ngmekera omoruul er tiang? Mosiik a techall el mo ngosuir el mo omtab a blekerdelel a Jehovah. Mngesuir el mo omes er a Jehovah el dmeu a rengul el Dios el lolengeseu er tirke el betik a rengrir er ngii. (1 Ti. 1:11, NW; Heb. 11:6) Mochotii er ngii el kmo ngmo uchul a klungiolel a loltaut a tekoi losuub e msodii el mo er ngii el kmo aika el klungiaol a olechotel a bltkil a rengul a Jehovah el mo er ngii. (Isa. 48:17, 18) A chad el mosuub el obengkel a mo soal meruul omelodech sel lemukeroul a bltkil a rengul el mora Jehovah.​—1 Jn. 5:3.

9. El ualolekoi a Markus 10:29, 30, ngera sebechel ngosuir a chad el mo chemoit a tekoi er tia el beluulechad e mo metecholb el disaiplo?

⁹ A chad a lolengeriakl el mo nguu a techolb e ngngar ngii a tekoi el kirel el mo mengoit. Ngdi ua ngike el merau el chad el dulsaod er ngii er a uchei, a rebebil mesuub a Biblia a kirir el mo mengoit a tekoi er tia el beluulechad. A lsekum a urerir a omtok a osisechakl er a Biblia e ngkirir el mo meruul a omelodech. A rebetok a mla mo cheroid er a resechelirir el tir a diak lebetik a rengrir er a Jehovah. A rekuk bebil a mla mechoit er a telungalek er tir el diak el sorir a Resioning er a Jehovah. Me a Jesus a dilu el kmo nglocha mo meringel er a rebebil el mengoit aika el tekoi. Engdi ngtilbir el kmo tirke el mo oltirakl er ngii a diak bo louuchel a rengrir. Te mo mukngeltengat er a telungalek er tir er a klereng. (Monguiu er a Markus 10:29, 30.) Ngmekera omngesuir a study er kau el mo nguu a klungiolel er tia el sengk?

10. Ngera ke suubii er a experience er a Manuel?

¹⁰ Mokurulii a deleuill er kau me a study er kau. Ngklou a ultutelel a omochotii er a study er kau el kmo ke omekerreu er ngii. E ngerang? Molatk a tekingel a Manuel el kiei er a Mexico. Ngmesaod el kirel sel taem er a dirk losuub a Biblia el kmo: “Bek el taem er a uchei er aki mosuub e ngike el milsuub lobengkek a oker el kmo ak uangerang. Ngngilsukak el mo chelellakl a renguk e mo sebechek louchais er ngii a ngii di el tekoi. Ngmle sebechek el melechesuar el kmo ngkmal ulemekerreu er ngak.”

11. Ngmekera mo uchul a klungiolir a re study er kid sel longoit a taem lobengked?

¹¹ Mongoit a taem lobengterir tirke el mosuub lobengterir, el ua Jesus el milengoit a taem lobengterir a rultirakl er ngii. (Jn. 3:22) E a lsebechel e molengit er a study er kau el ngii a olengeriakl, el mora blim e molim a kohi, ko momengur, me a lechub e ko momes er a broadcast. A study er kau a locha kmal mo ousbech choua ikaikid el taem er a temel a  holidays, e le nglocha mo omelechesiu er ngii el kmo ngkmal di ngii el tang. A Kazibwe el kiei er a Uganda a kmo: “Nglmuut el klou a ksilubii el kirel a Jehovah er a kungoit a taem lobengkel a chad el kulsuub el obengkel er a bai temel a omesubam. Ak milsa el kmo a Jehovah a kmal omekerreu er a rechedal. Ak dirrek el milsa deurreng er tir. Ngkmal mle soak tia el tekoi el kirel a klengar er ngak.”

12. Ngera uchul me ngungil a dobetiterir a rekakerous el chad el mora study er kid?

¹² Molengit er a rekakerous el chad el mo teloi er a omesubiu. A lebebil e kede locha mo omdasu el kmo ngbeot a di lekid el mora study er kid me a lechub a lsekum ngdi osisiu el chad a obengked er a bek el taem. Me alta tia locha beot, engdi ngmo uchul a klungiolel a study er kid a lsekum e kede melai er a rekakerous el chad el mo teloi er a omesubed. A Dmitrii el kiei er a Moldova a kmo: “A derta el chad el mle teloi er a omesubek er a Biblia a mle ngodech a rolel a losaod a tekoi. Tia ngilsukak el mo omes a suobel el ngar er a kakerous el rolel. Ngdirrek el mlo uchul me ngdimlak sal merur er a kkot el mora miting e le ak mla mo medengelterir a rebetok er a rudam me a rudos.”

13. Ngera uchul me ngkired el ngosuir a chad el dosuub lobengkel el mei er a miting?

¹³ Mngesuir el mei er a miting er a ongdibel. E ngera uchul? A Jehovah mengerechir er a remesiungel el mo dmak el mengull er ngii. (Heb. 10:24, 25) Me a lmuut kung, a rudam me a rudos er kid a telungalek er kid er a klereng. Sel dengar er a miting lobengterir engdi ua dengar er a blid el dmak el omengur. Sel mngesuir a study er kau el mei er a miting, e ke ngosuir el rullii a ta er a klou a ultutelel dauch el mo nguu a techolb. Me nguaisei engdi nglocha mo meringel er ngii a mei er a miting. Ngmekera babier el Enjoy Life Forever! e sebechel ngosukau el ngosuir a study er kau el mo mesisiich a ngii di el omelsemai el merrob er ngii el mei er a miting?

14. Ngmekera sebeched el melisiich er a study er kid el mo omuchel el ngar er a miting?

¹⁴ Mousbech er a 10 el suobel er a book el Enjoy Life Forever! el melisiich er a study er kau. A uchei er a bo lemerek omelechesel tia el book e te ullengit er a rebebil publisher el mo ousbech er tia el suobel er a re study er tir. Te kmo tia kmal oureor e ngilsuterir a re study el mo omuchel el ngar er a miting. Me nguaisei, engdi lak mongiil el mora 10 el suobel el mo invite er a study er kau el mei er a miting. Di mereched el mo invite er ngii e molemolem el meruul el uaisei. A derta el chad el mesuub a kakerous a omelsemai el lechelebangel. Me bo mkerekikl el omes aike el lousbech a derta er tir e momes a rolel e ngsebechem el ngosuterir. Lak bo lemechitechut a rengum a lsekum ngousbech er a taem el mo sebechel lomuchel el ngar er a miting. Bo moba kllourreng me a dirrek el blakerreng.

15. Ngera uchul me a study er kid a locha mo medakt?

¹⁵ Ke dirk melatk er kau el mle medakt el mo ta er a Sioning er a Jehovah? Ke locha ulemdasu el kmo ngkmal diak el sebechem el mo omerk er a klumech. Me a lechub e ke mle medakt a bo lomtok er kau a telungalek er kau me a resechelim. A leuaisei, e ke medengelii a lolechesuar er ngii a study er kau. A Jesus a dilu el kmo a rebebil a mo medakt chouaika el tekoi. Me nguaisei engdi ngmillisiich er a rultirakl er ngii me lak lebechei aika el dektir me bo luchul e ngdiak losiou er a Jehovah. (Mt. 10:16, 17, 27, 28, BT) Ngmilekera Jesus e ngosuterir a rultirakl er ngii el mo mesisiich a dektir? E mekera sebechem loltirakl er a kerebil?

16. Kede mekera osisecheklii a chad el dosuub lobengkel el mo ouchais er a klaumerang er ngii?

 ¹⁶ Mokekokau lolisechakl er ngii el mo ouchais er a rebebil er a klaumerang er ngii. A redisaiplo er a Jesus a locha mlo medakt er a ledu er tir el mo omerk er a klumech. Engdi Jesus a ngilsuterir loeak a louchais er tir a basio el bo lomerk me a tekoi el bo lolekoi. (Mt. 10:5-7) Ngmekera sebechem loltirakl er a kerebil a Jesus? Mngesuir a study er kau el mo mtab aike el taem el sebechel lomerk er a klumech. El ua tiang, moker er ngii el kmo ngmedengelii a chad el lousbech el rongesii a ileakl el klemerang er a Biblia. E mngesuir el kutmokl aike el bo lolekoi loeak sel mochotii er ngii a beot el rolel e ngsebechel el meruul el uaisei. Sel bo lungil blsechel e mousbech er a ta er aike el ngar cheungel a “Some People Say” me a “Someone May Ask” er a book el Enjoy Life Forever! el ngosuir el practice. Sel moruul er tiang e molisechakl er ngii el mo meduch lousbech er a Biblia el onger el ngar er a beot e ungil rolel.

17. Ngmekera sebeched lousbech er a Mateus 10:19, 20, 29-31 sel dolengeseu er a study er kid el mo oumera el ulsirs er a Jehovah?

¹⁷ Mngesuir el mo oumera lulsirs er a Jehovah. A Jesus a ulelterekokl a rengrir a redisaiplo er ngii el kmo a Jehovah a mo olengeseu er tir e le ngbetik a rengul er tir. (Monguiu er a Mateus 10:19, 20, 29-31.) Mouchais er a study er kau el kmo a Jehovah a dirrek el mo ngosuir. Ngsebechem el ngosuir el mo oumera lulsirs er a Jehovah loeak sel moluluuch lobengkel el kirel a turrekong er ngii. A Franciszek el kiei er a Poland a kmo: “Ngike el milsuub lobengkek a mle blechoel el meluluuch el kirel a turrekong er ngak. Sera kisa Jehovah longer a nglunguchel, e ak mlo meluluuch. Ak milechesuar a ngelsuil a Jehovah er aike el taem er a kuusbech el melai a ulengellek er a beches el urerek me bo lsebechek el ngar er a miting e mora klou el ongdibel.”

18. Ngua ngera uldesuel a Jehovah el kirel a ureor er a osisechakl el loruul a Rekristiano?

¹⁸ A Jehovah a kmal betik a rengul er a rechad el dosuub el obengterir. E kmal oba omereng el saul el kirel a meringel lurered el mesuub lobengterir e olengeseu er tir el mo kmeed er ngii. (Isa. 52:7) A lsekum e ngdiak a chad el mosuub lobengkel er chelechang, e ngdirk sebechem el ngosuterir a rechad el mesuub el mo olengeriakl el mo nguu a techolb loeak sel mobengterir a rebebil el mora study er tir.