NKHANI YOPFUNZIRA 22
Thandizani mapfunziro yanu ya Baibolo kupita patsogolo na kubatizika
‘Ndipo aliyese wa imwepo abatizike.’—MAC. 2:38.
NYIMBO NA. 72 Tikulalikira Choonadi Chonena za Ufumu
VOMWE TIPFUNZIRE *
1. Ko gulu ya wanthu woyambirira idauziwa kuti ichite chani?
GULU ikulu ya amuna na akazi ochokera m’madziko yosiyanasiyana, achayankhula viseweredwe vosiyanasiyana ali pabodzi. Pa ntsiku mweyi padachitika vinthu vosayebweka. Gulu ya Ayuda idayamba kuyankhula chiseweredwe cha wanthu alendo omwe adabwera. Vomwe Ayuda adanena na vomwe Petulo adanena venze vosayebweka ndipo vidadabwisa maninge gulu ile. Mwevi vinkuphatanidzapo ntontholo wakuti iwo angadzapulumuke akakhulupirira Yesu Khrisitu. Gulu ile idakhudziwa maninge na mawu mwaya. Wanthu adakhudziwa maninge mwakuti adabvunza kuti: ‘Tichite chani?’ Pakuwadawira, Petulo adati: ‘Aliyese wa imwepo abatizike.’—Mac. 2:37, 38.
M’bale waperekezewa na nkazi wake ndipo ankuphatisa basa kabukhu kakuti ‘Kondwani na moyo mpaka kalekale!’ pakupfunzira na mulumbwana. (Onani ndime 2)
2. Ko tikambirane chani mu nkhani ino? (Onani foto ya pakhava.)
2 Vidachitika patsogolo pake venze vokomedza. Wanthu okwana 3.000 adabatizika ntsiku ibodzi, nkukhala opfunzira wa Khrisitu. Kumoku kwenze kuyamba chabe kwa basa ikulu yomwe Yesu adawuza opfunzira wake kuti achite. Basa mweyi idakapitiriza basi mpaka ntsiku zathu zino. Ntsiku zino, tibatizalini munthu mu nthawe idikidiki, nthawe zinango vingatenge minyezi panango magole kuti wopfunzira akwanirise chakulinga chimwechi. Kuti tithandize munthu kukhala wopfunzira ni basa ikulu, ndipo peno imwepo munkupfunzira Baibolo na munthu, munkudziwa bwino vimwevi. Mu nkhani ino tiwone vomwe tingachite kuti tithandize wopfunzira Baibolo wathu kufika pakubatizika.
THANDIZANI PFUNZIRO YANU YA BAIBOLO KUPHATISA BASA VOMWE ANKUPFUNZIRA
3. Ninge mwavinkuwonesera pa Mateyu 28:19, 20, ni chani chomwe wopfunzira achadikana kuchita kuti apite patsogolo na kubatizika?
3 Akalibe wabatizika, wopfunzira Baibolo achadikana kuphatisira basa vomwe Baibolo ichapfunzisa. (Lewengani Mateyu 28:19, 20.) Wopfunzira Baibolo akambaphatisa basa vomwe wapfunzira adzakhale ninge ‘munthu wochenjera’ yemwe Yesu adamunena pachitsanzo chake kuti adamanga na maziko yolimba nyumba yake. (Mat. 7:24, 25; Luka 6:47, 48) Ko tingathandize tani wopfunzira kuphatisa basa vomwe ankupfunzira? Naboni tikambirane mpfundo zitatu.
4. Ko tingathandize tani pfunziro kuti iyenerere kubatiziwa? (Onani bokosi yakuti: “ Thandizani pfunziro yanu kukhala na volinga na kuvikwanirisa.”)
4 Thandizani wopfunzira wanu kukhala na volinga. Ko imwepo mungachite tani vimwevi? Ganizirani chitsanzo ichi: Peno imwepo munkufuna kuchita ulendo utali, mungaoneretu malo yabwino yomwe mungambapume pakuyenda. Mukachita vimwevi ulendo ufupika. Mwakulingana na vimwevi, wopfunzira Baibolo akakhala na volinga vomwe angavikwanirise mosachedwa, vingakhale vosashupa kukwanirisa chakulinga chofuna kubatizika. Phatisirani basa mbali yakuti ‘Vati nichite’ mu bukhu yakuti: Kondwani na moyo mpaka kale-kale! kuti muthandize wopfunzira wanu kuyenda patsogolo. Kumapeto kwa pfunziro iliyose, kambiranani volinga vomwe mwapfunzira manjemanje na wopfunzira wanu. Peno munavolinga vinango vosiyana na vimwevi vinembeni pa mbali yakuti ‘Chinango.’ Nthawe zose phatisirani basa mbali mweyi kuti muwone volinga vomwe angavikwanirise mwakankulumize na vomwe vingatenge nthawe itali.
5. Mobverana na Maliko 10:17-22, nchani chomwe Yesu adawuza mwamuna wolemera, ndipo ndawa chani?
5 Thandizani pfunziro yanu kusiya makhalidwe yoipa pamoyo wake. (Lewengani Maliko 10:17-22.) Yesu adaona kuti venze voshupa kwa mwamuna munango wolemera kugulisa vinthu vake. (Maliko 10:23) Pamwapa, Yesu adawuza mwamuna ule kuti achite kuchinja kukulu moku pamoyo wake. Ndawa chani? Ndawa yakuti Yesu ambamukonda. Nthawe zinango, tingaleke kulimbikisa wopfunzira kuphatisira basa vomwe ankupfunzira ndawa yakuti tinkuwona kuti niwosakonzeka kuchinja pa moyo wake. Vitenga nthawe kuti munthu asiye vomwe adadjaira na kuvala umunthu wanyowani. (Akol. 3:9, 10) Koma mukayamba kumufotokozera, iye angawonese kuchinja patsogolo pake. Mukambakambirana vimwevi, vichawonesa kuti imwepo muchamukonda.—Sal. 141:5; Miy. 27:17.
6. Ko ndawa chani tichadekana kuphatisira basa mibvunzo yochitisa kuganiza?
6 Ni vodikana maninge kubvunza wopfunzira kuti afotokoze vomwe ankuganiza pa nkhani yomwe ankupfunzira. Phatisira basa mibvunzo ninge mwaya kuti mudziwe vomwe wopfunzira wabvesa na vomwe achakhulupirira. Imwepo mukambachita vimwevi nthawe zose, mudzawone kuti vidzakhale vosashupa kukambirana nkhani zoshupa kutsogolo. Bukhu yakuti Kondwani na moyo mpaka kalekale! inamibvunzo yazinji yothandiza kudziwa vomwe wopfunzira ankuganiza. Mwakulinganiza, pfunziro 04 inambvunzo wakuti: ‘Ko munkuwona kuti Yahova achabvatani mukambaphatisa basa dzina yake?’ Pfunziro 09 inambvunzo wakuti: ‘Ni vinthu viponi vomwe mungafune kupempherera?’ Chakuyamba ipaseni nthawe pfunziro yanu kuti iganize va midawiro yake. Mungamuthandize mwa kumupfunzisa vomwe viri m’mafoto.
7. Ko tingaphatisire tani basa bwino vitsanzo va vochitika chaivo va pamoyo?
7 Mukabvesa vomwe pfunziro yanu ichadekana kuchita, phatisirani basa vitsanzo va vochitika chaivo kuti mumulimbikise kuchita vimwevi. Mwakulinganiza, peno pfunziro yanu ikulimbikira kugumanika pamisonkhano mungamuonese vidiyo yakuti: Yahova adanisamalira pa mbali yakuti ‘Kuti mudziwe vizinji’ mu pfunziro 14. Mu misolo yazinji mu bukhu yakuti Kondwani na moyo mpaka kalekale! Mudzagumane mawu ninge yakuti ‘Pfunzirani vizinji’ panango yakuti ‘Kuti mudziwe vizinji.’ * Samalani kuti muleke kumbalinganiza pfunziro yanu na munthu munango nkumbati: ‘Peno iye adakwanisa kuchita ivi, imwepo mungakwanisembo.’ M’malo mwake muthandizeni kuzindikira vomwe vidathandiza munthu wa mu vidiyo kuphatisira basa vomwe Baibolo ichapfunzisa. Panango mungaphatisire basa lemba yomwe ili pa nkhani mweyo panango chinthu chinango chomwe chidachitikadi. Peno ni vokwanisika, tsindikani momwe Yahova adathandizira munthu muyo.
8. Ko tingathandizetani wopfunzira kuti ambakonde Yahova?
8 Thandizani pfunziro yanu kuyamba kukonda Yahova. Mungachitetani? Gumanani nthawe yoganizira mosamala makhalidwe ya Yahova. Thandizani pfunziro yanu kuona Yahova kuti ni Mulungu wachimwemwe yemwe achathandiza omwe achamukonda. (1 Tim. 1:11; Aheb. 11:6) Muoneseni wopfunzira kuti adzaphindule akambaphatisira basa vomwe ankupfunzira, ndipo mufotokozereni kuti kuchita vimwevi kuchawonesa kuti tichamukonda Yahova. (Yes. 48:17, 18) Wopfunzira wanu adzalimbikisiwe kuchita kuchinja kulikose ndawa yakuti achakonda Yahova.—1 Yoh. 5:3.
MUDZIWIKISENI KWA ABALE NA ALONGO
9. Mwakubverana na Maliko 10:29, 30, ko ni chani chomwe chingathandize wopfunzira kuti abatizike?
9 Kuti apite patsogolo na kubatizika, wopfunzira Baibolo achadikana kuchita khama. Ninge mwamuna wolemera yemwe watomolewa kale, mapfunziro yanango yachadekana kusiya vinthu vinango vakuthupi. Peno basa yomwe achaphata ni yosabverana na mpfundo za m’Baibolo, achadekana kuchinja. Azinji asiya azishamwali wawo womwe achakondalini Yahova, anango asiya wachibale omwe achazonda Mboni za Yahova. Yesu adadziwa kuti anango Angashupike kuchita kuchinja kwa tene. Koma iye adati omwe adzamutewere adzadzilingelini. Ndipo adzadalisiwe na banja yawuzimu yachikondi. (Lewengani Maliko 10:29, 30.) Ko mungathandize tani wopfunzira wanu kuti aphindule na mphaso yabwino maninge?
10. Ko tinkupfunzira chani pa vomwe vidachitikira Manuel?
10 Kulisani ushamwali na pfunziro yanu. Ni vakudikana maninge kuwonesa pfunziro yanu kuti muchaiganizira maninge. Ndawa chani? Onani vomwe Manuel adanena, yemwe achakhala ku México. Ankukumbukira pomwe iye wenze wopfunzira Baibolo, iye adati: ‘Tikanati tayamba pfunziro iliyose, yemwe anganipfunzisa angayamba na kunibvunza momwe niliri. Iye adanithandiza kukhala womasuka ndipo vidanithandiza kuti nimbafotokoze nkhani zinango momasuka. Ningadzibvadi kuti anganiikhira nzeru.’
11. Ko tingathandize tani wopfunzira wathu tikambacheza naye?
11 Mbachezani na pfunziro yanu ninge momwe Yesu angachitira na opfunzira wake. (Yoh. 3:22) Peno ni vokwanisika, chemerani pfunziro yanu ya Baibolo kudzadya naye chakudya kumuyi kwanu panango kudzanyang’anira naye pabodzi pologalama yathu ya Broadcasting. Pfunziro yanu idzatembeje maninge mukachita vimwevi pa nthawe ya feria yomwe angadzibve kukhala yekhayekha. Kazibwe wa ku Uganda adanena kuti: ‘Ninkukumbuka kuti nidapfunzira vizinji na yemwe anganipfunzisa Baibolo ndawa yakukhala naye nthawe itali. Ndipo nidaona momwe Yahova achasamalira maninge wanthu wake na kuwona momwe iwo aliri wokondwa. Vimwevi ndivo vomwe ningada pamoyo wangu.’
Mukambatenga abale osiyanasiyana ku pfunziro yanu, pfunziro yanu idzaone kuti nivosashupa kugumanika kumisonkhano (Onani ndime 12) *
12. Ndawa chani tichadekana kuyenda na ofalisa osiyanasiyana kumapfunziro ya Baibolo?
12 Mbayendani na wofalisa osiyanasiyana ku pfunziro yanu. Nthawe zinango, tingambaone ninge ni vosashupa kumbachitisa pfunziro tili tekhatekha panango kumbandoyenda na ofalisa m’bodzi na m’bodzi. Koma tikambatenga ofalisa osiyanasiyana nthawe na nthawe, pfunziro yathu ya Baibolo idzaphindule maninge. Dmitrii yemwe achakhala ku Moldóvia adati: ‘Wofalisa aliyese yemwe angabwera ku pfunziro yangu angafotokoza vinthu mu njira zosiyasiyana. Vimwevi vidanithandiza kuona momwe ningaphatisire basa vomwe ningapfunzira mu njira zosiyanasiyana. Pakuti nimbawadzikwako kale abale na alongo azinji, nilibe kuchita manyazi panidayenda koyamba kumisonkhano.’
13. Ndawa chani tichadikana kuthandiza pfunziro kugumanika pamisonkhano?
13 Thandizani pfunziro yanu kugumanika pamisonkhano ya mpingu. Ndawa chani? Ndawa yakuti Yahova adalamula atumiki wake kuti ambasonkhane pabodzi. Imweyi ni mbali ibodzi ya kupemphera kwathu. (Aheb. 10:24, 25) Kuingizira mwapa, abale na alongo wathu ni banja yathu yauzimu. Tikakhala kumisonkhano na iwo, vingakhale ninge tili panyumba ibodzi ndipo tinkudyera pabodzi chakudya. Mukambathandiza pfunziro yanu kugumanika pamisonkhano ndiye kuti mukumuthandiza kupita patsogolo kuti abatizike. Koma palisoti chinthu chinango choshupa chomwe iye achadikana kuchita. Ko bukhu yakuti Kondwani na moyo mpaka kalekale! ingathandize tani wopfunzira wanu kupirira bvuto iliyose yomwe angagumane nayo?
14. Ko tingalimbikise tani mapfunziro yathu kuti agumanike pamisonkhano?
14 Phatisirani basa pfunziro 10 ya bukhu yakuti Kondwani na moyo mpaka kalekale! kuti mulimbikise pfunziro yanu. Ofalisa wodziwa vizinji omwe adakumbiriwa kuti ayeserere bukhu mweyi ikanati yachosewa, adagumana na maphindu yabwino maninge pakuthandiza mapfunziro yawo kugumanika pamisonkhano yathu. Koma tichadikanalini kudikhira kuti tikadzafika pa pfunziro 10 ndipo pomwe tidzachemerere munthu kumisonkhano yathu. Muchemerereni mwakankulumize vikakwanisika ndipo chitani vimwevi nthawe zose. Mapfunziro yazinji yankugumana na mabvuto yosiyanasiyana, ndipomwapa khalani tcheru kwa mapfunziro yanu kuti mudziwe vomwe achadikana ndipo wonani momwe mungawathandizire. Ayi kufoka peno vingatenge nthawe kuti agumanike kumisonkhano. Khalani woleza moyo na olimbikira.
THANDIZANI PFUNZIRO YA BAIBOLO KUMALISA MANTHA
15. Ko ni mantha ya chani yomwe pfunziro yathu ingakhale nayo?
15 Ko imwepo mudakakumbukira pomwe mungabva mantha pang’ono kuti mukhale wa Mboni za Yahova? Panango mungaona kuti mungakwaniselini kulalikira. Panango mwenze na mantha yakuti abale wanu panango azishamwali angakutsutseni. Peno ni teno, mungamufotokozerembo wopfunzira wanu. Yesu adazindikira kuti wanthu anango angakhale na mantha ninge mwaya. Podiya venze tene, iye adalimbikisa wotewera wake kuti ayi kuti abvume kuti mantha yawakangise kutumikira Yahova. (Mat. 10:16, 17, 27, 28) Ko Yesu adathandiza tani wotewera wake kumalisa mantha yawo? Ndipo imwepo mungatewedzere tani chitsanzo chake?
16. Ko tingapfunzise tani wopfunzira wathu kufotokoza va chikhulupiriro chake?
16 Nthawe zose pfunzisani pfunziro yanu kufotokoza va chikhulupiriro chake. Wopfunzira wa Yesu angabvambo mantha pomwe adatumiwa kuti akalalikire. Koma Yesu adawathandiza mwakuwawuza komwe akalalikire na vomwe akalalikire. (Mat. 10:5-7) Ko tingatewedzere tani Yesu? Thandizani pfunziro yanu kuona komwe angakalalikire. Mwakulinganiza mungamubvunze peno ankudziwa munthu munango yemwe achaona kuti ni phindu kupfunzira chonadi cha m’Baibolo. Vikakhala vokwanisika mungaphatisire basa mbali zakuti ‘Wanthu anango achati’ na yakuti ‘Anango achabvunza kuti’ zomwe zichagumanika mu bukhu yakuti Kondwani na moyo mpaka kalekale! Mukambachita vimwevi muthandizeni momwe angaperekere mdawiro m’mawu yosashupa na yachigwato.
17. Ko tingaphatise tani basa Mateyu 10:19, 20, 29-31 pakuthandiza wopfunzira wathu kuthemba Yahova?
17 Thandizani wopfunzira wanu kuthemba Yahova. Yesu adatsimikizira wotewera wake kuti Yahova adzawathandize ndawa yakuti Iye angawakonda. (Lewengani Mateyu 10:19, 20, 29-31.) Mukumbuseni wopfunzira wanu kuti Yahova adzamuthandizembo. Mungamuthandize kuthemba Yahova mwakupemphera kwa Yahova kuti akwanise kukwanirisa volinga vake. Franciszek yemwe achakhala ku Polónia adanena kuti: ‘Yemwe anganipfunzisa amabatomola volinga vangu m’mapemphero yake. Pomwe nidaona momwe Yahova adadawirira mapemphero ya yemwe anganipfunzisa, pamwapo nidayambiratu kumbapempherambo. Nidayamba kuona chithandizo cha Yahova pomwe nimbafuna ntsiku za feria ku basa kwangu kuti nikagumanike ku nsonkhano wachigawo na misonkhano yanango.’
18. Ko Yahova achabvatani na basa yopfunzisa ya Akhrisitu?
18 Yahova achasamalira bwino mapfunziro yathu. Iye achatembeja kukhala na Akhrisitu omwe achaphata basa molimbikira kuti athandize wanthu kumufenderera ndipo achawakonda ndawa yochita vimwevi. (Yes. 52:7) Peno imwepo manjewuno mulibe pfunziro, mungapitirize kuthandiza mapfunziro kupita patsogolo na kubatiziwa mwakuperekeza anango ku mapfunziro yawo ya Baibolo.
NYIMBO NA. 60 Akamvera Adzapeza Moyo
^ ndi. 5 Mu nkhani ino tikambirane momwe Yesu adathandizira wanthu kukhala wopfunzira wake na vomwe tingachite kuti timutewedzere. Tikambirane soti vinthu vinango vomwe viri mu bukhu inyowani yakuti Kondwani na moyo mpaka kalekale! Bukhu mweyi idakonzewa kuti ithandize mapfunziro yathu ya Baibolo kuyenda patsogolo mpaka kubatizika.
^ ndi. 7 Mungagumane vitsanzo va vochitika chaivo va pamoyo (1) mu Buku Lofufuzira Nkhani la Mboni za Yehova pa msolo wakuti ‘Baibulo’ patsogolo pake ‘Lothandiza,’ patsogolo pake ‘‘Baibulo Limasintha Anthu’ (Nkhani za mu Nsanja ya Olonda)’ panango (2) nyang’anirani mavidiyo ya pa JW Library® pa mbali yakuti ‘Vochitika pa moyo wa anango.’
^ ndi. 62 MAWU YOFOTOKOZERA MAFOTO: M’bale ankuperekezewa na nkazi wake kukachitisa pfunziro munthu wachilumbwana. Pa nthawe inango ankukumbira abale osiyanasiyana kuti akamuperekeze kupfunziro.
