1. Wanem nao aposol Peter talem olketa wea hipap lo Jerusalem for mas duim?

STAKA pipol hipap lo Jerusalem lo Pentecost 33 C.E. Olketa kam from olketa difren kantri and story lo staka difren languis. Wanfala spesol samting happen lo datfala day. Samfala Jew start for story lo languis blo olketa. Hem tru datwan spesol, bat wanem olketa Jew and aposol Peter storyim hem important winim datwan. Olketa herem hao olketa savve sev sapos olketa showimaot faith lo Jesus Christ. Datfala message barava kasem heart blo olketa hia, and olketa askem Peter and olketa aposol: “Wanem nao mifala mas duim?” Peter sei: “Iufala mas repent and baptaes.”—Acts 2:37, 38.

2. Wanem nao bae iumi storyim lo disfala article? (Lukim piksa lo front page.)

² Lo datfala sem day, samting olsem 3,000 baptaes and kamap disaepol blo Jesus Christ. Hem barava nambawan samting! Datwan hem start blo waka for helpem pipol kamap disaepol wea Jesus sei olketa follower blo hem mas duim. Datfala waka hem gohed kam kasem distaem. Bat distaem bae hard for samwan baptaes lo sem day olketa herem gud nius. Maet hem need for study for sixfala month or winim wan year bifor hem fit for baptaes. Sapos iu garem Bible study, bae iu savve hem bigfala waka for helpem hem kamap disaepol. Lo disfala article bae iumi storyim wanem iumi savve duim for helpem Bible study for kasem goal for baptaes.

3. Olsem Matthew 28:19, 20 storyim, wanem nao Bible study mas duim mekem hem fit for baptaes?

³ Bifor Bible study savve baptaes, hem mas followim wanem Bible teachim. (Readim Matthew 28:19, 20.) Bible study wea followim wanem hem lanem hem olsem datfala man lo tokpiksa blo Jesus “wea garem gudfala tingting.” Hem digim hol wea deep for putim faondeson blo haos antap lo ston. (Matt. 7:24, 25; Luke 6:47, 48) Hao nao iumi savve helpem Bible study for followim wanem hem lanem? Bae iumi storyim thrifala samting.

4. Hao nao iumi savve helpem Bible study for kasem goal for baptaes? (Lukim tu box “ Helpem Bible Study for Kasem Olketa Goal wea Hem Markem.”)

⁴ Helpem Bible study for markem olketa goal. Why nao olsem? Tingim tokpiksa hia: Sapos man bae wakabaot go lo farawe ples, maet hem disaed for stop lelebet lo tu-thri naesfala ples lo gogo blo hem. Datwan bae mekem hem tingse ples hia no hard tumas for kasem. Olsem tu, taem Bible study markem olketa goal wea hem savve kasem firstaem, datwan bae mekem hem luksavve bae hem no hard tumas for kasem goal for baptaes. Insaed datfala Enjoyim Laef for Olowe! buk, each leson garem sekson “Goal” wea storyim samting for Bible study waka lo hem. Teacher bae storyim datwan witim Bible study lo end blo each leson. Bat sapos iumi laekem Bible study for markem nara goal tu, raetem datwan anda lo heding “Nara Goal.” Iumi savve iusim disfala sekson tu for storyim olketa goal blo Bible study blo iumi.

5. Lo Mark 10:17-22, wanem nao Jesus talem datfala rich man for duim, and why nao olsem?

⁵ Helpem Bible study for changem olketa  samting lo laef blo hem. (Readim Mark 10:17-22.) Jesus savve datfala rich man bae faendem hem hard for salem olketa samting wea hem ownim. (Mark 10:23) Jesus askem hem for duim datwan bikos hem lovem datfala man and hem luksavve man hia need for changem samting lo laef blo hem. Maet iumi hol bak for talem Bible study for changem samting from iumi tingse hem no redi yet. Bat maet hem tek taem for hem lusim old wei blo hem and garem niufala wei. (Col. 3:9, 10) So hem gud for no delay for storyim samting Bible study need for changem mekem hem start for duim datwan. From iumi storyim datwan lo hem iumi showimaot iumi tingim hem.—Sams 141:5; Provebs 27:17.

6. Why nao hem gud for askem Bible study for talemaot tingting blo hem?

⁶ Hem gud for askem Bible study for talemaot tingting blo hem abaotem wanem iutufala studyim. Datwan bae helpem iumi for savve sapos hem minim datfala subject and for luksavve lo wanem hem bilivim. Sapos iumi evritaem askem tingting blo hem, datwan bae helpem iumi for storyim eni samting wea hem need for changem. Lo Enjoyim Laef for Olowe! buk, hem garem staka kwestin for Bible study. Olsem example, leson 04 garem kwestin: “Hao nao feeling blo Jehovah taem iu iusim nem blo hem?” And leson 09: “Wat nao samfala samting iu laek for prea abaotem?” Maet hem no isi for Bible study talemaot tingting blo hem. So askem hem for storyim olketa scripture and piksa lo buk for helpem hem for no fraet for talemaot tingting blo hem.

7. Hao nao iumi savve iusim experience blo olketa brata or sista for helpem Bible study?

⁷ For helpem Bible study changem samting followim wanem hem lanem, iumi savve iusim samfala experience blo olketa brata and sista. Olsem example, sapos Bible study no kam evritaem lo meeting, iumi savve showim hem datfala video Jehovah Lukaftarem Mi wea insaed Enjoyim Laef for Olowe! buk lo leson 14, anda lo sekson “Faendemaot Moa.” Iumi bae faendem staka experience olsem lo datfala buk, insaed olketa sekson “Dig Go Moa” and “Faendemaot Moa.” * Bat iumi no laek for comparem Bible study blo iumi witim brata insaed video. Hem nogud for sei lo hem, “Datfala brata changem samting, so iu savve changem tu.” Letem Bible study for wakemaot seleva. Iumi savve storyim scripture or nara samting wea helpem datfala brata lo video for followim wanem Bible teachim. Hem gud tu for storyim Jehovah nao helpem brata hia.

8. Hao nao iumi savve helpem Bible study for lovem Jehovah?

⁸ Helpem Bible study for lovem Jehovah. Hao nao for duim datwan? Storyim olketa gudfala wei blo Jehovah and storyim hao hem datfala hapi God wea lukaftarem olketa wea lovem hem. (1 Tim. 1:11; Heb. 11:6) Helpem Bible study for luksavve hem bae kasem olketa blessing from hem followim wanem hem lanem, and explainim olketa blessing hia showimaot Jehovah lovem hem. (Aesaea 48:17, 18) Taem Bible study blo  iumi lovem Jehovah, datwan bae helpem hem for changem eni nara samting.—1 John 5:3.

9. Olsem Mark 10:29, 30 storyim, wanem nao savve helpem Bible study for changem samting lo laef blo hem?

⁹ For Bible study kasem goal for baptaes, maet hem mas changem samting lo laef blo hem, olsem datfala rich man mas salem olketa samting. So maet Bible study mas changem waka blo hem from hem no savve followim olketa Bible principle bikos lo datfala waka. Or maet hem mas stop for fren witim samfala fren from bifor. Or maet samfala lo famili les lo hem from olketa no laekem Olketa Jehovah’s Witness. Jesus luksavve hem no isi for man deal witim olketa hard samting olsem. Bat hem sei olketa wea kamap follower blo hem bae hapi lo datfala disison bikos olketa bae insaed wanfala spiritual famili wea lovem olketa. (Readim Mark 10:29, 30.) Hao nao iumi savve helpem Bible study blo iumi for stap insaed datfala spiritual famili?

10. Wanem nao iumi lanem from experience blo Manuel?

¹⁰ Kamap fren blo Bible study. Hem important for Bible study luksavve iumi tingim hem. Why nao olsem? Manuel wea stap lo Mexico storyim taem wea hem studyim Bible. Hem sei: “Bifor mitufala study, teacher savve askem mi abaotem laef blo mi. Datwan helpem mi for no fraet for storyim eni samting lo hem. Mi luksavve hem barava tingim mi.”

11. Storyim gud samting wea kamaot from teacher fren gud witim Bible study.

¹¹ Fren gud witim Bible study blo iumi, olsem Jesus fren witim olketa follower blo hem. (John 3:22) Taem Bible study start for followim wanem hem lanem, maet hem fitim for iumi invaetem hem lo  haos for kaikai or for lukim Broadcasting. Maet hem gud for duim datwan lo taem blo celebration olsem Christmas from Bible study savve lonely bikos hem no joinim olketa celebration hia. Kazibwe wea stap lo Uganda sei: “Taem mi studyim Bible mi lanem staka samting abaotem Jehovah, bat mi lanem staka samting tu from mi spendem taem witim teacher blo mi. Mi lukim Jehovah lukaftarem hem and hem hapi. Mi tu laek for kasem datwan.”

12. Why nao hem gud for invaetem olketa difren pablisa for kam lo Bible study?

¹² Invaetem olketa difren pablisa for kam lo Bible study. Maet hem isi for iumi duim Bible study seleva or for wanfala fren nomoa joinim iumi evritaem. Bat sapos iumi invaetem olketa difren pablisa, datwan savve helpem Bible study. Dmitrii wea stap lo Moldova sei: “Each pablisa wea kam lo study garem difren wei for explainim sem point. Datwan helpem mi for minim gud olketa point hia. And taem mi go lo first meeting, mi no fraet from mi savve lo staka brata and sista finis.”

13. Why nao hem important for encouragem Bible study for attendim olketa meeting?

¹³ Encouragem Bible study for attendim olketa meeting. Hem important for duim datwan bikos Jehovah sei iumi shud hipap tugeta for worshipim hem. (Heb. 10:24, 25) And tu, spiritual famili blo iumi hem olketa brata and sista lo kongregeson. Olketa meeting hem chance for story witim olketa and for encouragem each other. Taem iumi encouragem Bible study for attendim olketa meeting bikos datwan bae helpem hem kasem goal for baptaes. Bat maet hem hol bak for kam lo olketa meeting. Hao nao datfala buk Enjoyim Laef for Olowe! savve helpem Bible study for laek attendim olketa meeting?

14. Wanem nao iumi savve duim for encouragem Bible study for attendim olketa meeting?

¹⁴ Iumi savve iusim leson 10 blo Enjoyim Laef for Olowe! buk for encouragem Bible study for attendim olketa meeting. Bifor mifala releasem disfala buk mifala askem samfala pablisa for duim leson 10 witim Bible study blo olketa and olketa sei datwan encouragem olketa for kam lo olketa meeting. Bat iumi no need for kasem leson 10 bifor iumi invaetem Bible study for kam lo meeting. Iumi savve invaetem hem enitaem. Olketa Bible study bae garem difren reason for no kam lo olketa meeting, so trae for luksavve lo reason blo Bible study blo iumi and helpem hem. No givap sapos hem no kam lo olketa meeting firstaem, bat patient witim hem and gohed invaetem hem.

15. Maet why nao Bible study fraet for kamap Witness?

¹⁵ Waswe lo taem iumi study, iumi fraet taem iumi tingim wanem iumi need for duim for kamap wanfala Jehovah’s Witness? Maet iumi fraet for duim preaching waka. Or maet iumi wari nogud famili and olketa fren againstim iumi sapos iumi kamap Witness. Sapos olsem, bae iumi minim feeling blo Bible study blo iumi. Jesus luksavve hem normal for man fraet, so hem sei olketa follower blo hem shud no fraet for duim wanem Jehovah laekem. (Matt. 10:16, 17, 27, 28) Hao nao Jesus helpem olketa follower blo hem for no fraet? And hao nao bae  iumi helpem Bible study blo iumi for no fraet?

16. Hao nao iumi savve trainim Bible study for storyim wanem hem lanem lo narawan?

¹⁶ Trainim Bible study for storyim wanem hem lanem lo narawan. Taem Jesus talem olketa disaepol for go preach, maet olketa fraet. Bat Jesus trainim olketa taem hem talem olketa hu for preach lo olketa and wanem for talem. (Matt. 10:5-7) Hao nao iumi savve followim example blo Jesus? Helpem Bible study for tingim eniwan wea hem savve preach lo hem. Olsem example, askem hem for tingim samwan wea maet interest for lanem samting from Bible. Then helpem hem for savve hao for storyim datwan lo simpol wei. For practicem hao for storyim olketa difren subject, iumi savve iusim sekson lo Enjoyim Laef for Olowe! buk olsem “Samfala Savve Talem” and “Eniwan Maet Ask.” Taem iumi duim datwan, trainim hem for iusim olketa scripture and for story lo kaenfala wei.

17. Hao nao iumi savve iusim Matthew 10:19, 20, 29-31 for helpem Bible study depend lo Jehovah?

¹⁷ Helpem Bible study for depend lo Jehovah. Jesus talem olketa disaepol Jehovah bae helpem olketa bikos Hem lovem olketa. (Readim Matthew 10:19, 20, 29-31.) Storyim hao Jehovah bae helpem Bible study tu. Iumi savve helpem hem for depend lo Jehovah taem iumi prea witim hem abaotem olketa goal wea hem markem. Franciszek wea stap lo Poland sei: “Teacher blo mi savve storyim olketa goal wea mi markem taem hem prea. Then mi lukim Jehovah helpem mi for kasem olketa goal hia, so mi tu start for askem Jehovah for helpem mi. So taem mi askem boss for taem off for attendim meeting or convention, mi lukim Jehovah helpem mi.”

18. Hao nao Jehovah ting lo olketa pablisa wea waka hard for helpem Bible study?

¹⁸ Jehovah barava lovem olketa Bible study blo iumi, and hem lovem and tinghae lo olketa pablisa wea waka hard for helpem olketa Bible study fren gud witim hem. (Aesaea 52:7) Sapos iumi no garem Bible study distaem, iumi savve joinim olketa nara pablisa lo Bible study for helpem hem kamap fit for baptaes.